༒སྐྱེ་འཆི་དོན་ལྡན་གྱི་སྙིང་གཏམ་མགུར་མ།།
༒སྐྱེ་འཆི་དོན་ལྡན་གྱི་སྙིང་གཏམ་མགུར་མ།།
ན་མོ་གུ་རུ་པདྨ་ཀ་ར་ཡེ།།
རྗེ་བླ་མ་དཀོན་མཆོག་གསུམ་ལ་འདུད།།
ལས་རྟེན་འབྲེལ་བསླུ་བ་མེད་པ་དང་།།
དུས་སྐྱེ་ནས་འཆི་ལ་ཉེ་བ་འདིས།།
དོན་རང་ཅག་ཀུན་ལ་བརྡ་ཞིག་བསྟན།།
མགོན་ཤཱཀྱ་སེངྒེའི་མན་ཆད་དང་།།
ལུས་སྲོག་ལྡན་སེམས་ཅན་ཐམས་ཅད་ཀུན།།
ཚེ་འཇའ་ལུས་འཕོ་ཆེན་མ་འགྲུབ་ན།།
འཆི་མི་དགོས་པ་ཞིག་སུ་ཡང་མེད།།
སྐྱེ་མི་ལུས་སྙིང་པོ་ལོན་པའི་ཚེ།།
རྒས་མཉེར་མ་སྐྲ་དཀར་མཛེས་པའི་རྒྱན།།
ན་སྡུག་བསྔལ་གང་ཡོད་སྒྲིབ་སྦྱོང་ལགས།།
འཆི་རང་དབང་ཐོབ་པ་དམ་པའི་གཤིས།།
གཞི་གཉུག་མའི་བཙན་ས་ཟིན་པའི་ཐབས།།
ལམ་ཀ་དག་ཁྲེགས་ཆོད་གདམས་པའི་མཐུས།།
འབྲས་ཀུན་བཟང་རྒྱལ་ས་ཕྱིན་པའི་ཚེ།།
གནད་སངས་རྒྱས་དགོངས་པ་ཚེ་འདིར་ཕྱིན།།
ལུས་དལ་འབྱོར་དོན་ཆེན་ཤེས་པ་དང་།།
ཚེ་མི་རྟག་རྒྱུད་ལ་འབྱོར་བའི་ཚེ།།
ལས་རྒྱུ་འབྲས་མིག་གི་འབྲས་བཞིན་སྲུང་།།
ལམ་བདེན་བཞི་བརྩོན་པར་ཆོས་ཉིད་ལགས།།
སྐྱབས་བསླུ་མེད་དཀོན་མཆོག་སྐྱབས་སུ་འགྲོ།།
མ་སེམས་ཅན་དོན་ལ་བྱང་སེམས་བསྐྱེད།།
སེམས་ཀུན་བཟང་ཕྱིར་ཏུ་རྡོར་སེམས་སྒོམ།།
ཚོགས་རྫོགས་ཕྱིར་གསང་གསུམ་མཎྜལ་མཆོད།།
ཕྱི་ངོ་ལྐོག་མཚུངས་པས་བླ་མ་བསྟེན།།
ནང་དྲན་ཤེས་བག་ཡོད་རྒྱུན་དུ་འགྲོགས།།
དོན་གསང་བའི་སྐྱབས་གནས་བླ་མ་ལྟ།།
གནད་རང་རིག་བླ་མའི་རྣལ་འབྱོར་བརྩོན།།
དད་ངེས་འབྱུང་ལྡན་པ་རབ་བྱུང་ཡིན།།
གུས་བྱང་སེམས་མཆིས་པ་སེམས་དཔའ་ལགས།།
དམ་གསང་ཚིག་འཛིན་པའི་རྡོ་རྗེ་འཆང་།།
ཡབ་ཀུན་ཏུ་བཟང་དང་དགོངས་པ་མཉམས།།
བསྟན་བཤད་སྒྲུབ་ཕྲིན་ལས་རྒྱུད་པར་འཛིན།།
འགྲོ་མ་ལུས་ཕན་བདེའི་ནུས་པར་སྐྱོང་།།
ཆོས་རྫོགས་པ་ཆེན་པོའི་བརྒྱུད་པ་སྤེལ།།
དཔལ་དགྱེས་པ་རྡོ་རྗེའི་སྙིང་གཏམ་ལགས།།
ཞེས་པ་རབ་གནས་ས་ཕག་ཁྲུམས་ཟླའི་གནམ་གང་ལ་ངོས་ཀྱི་མཁའ་འགྲོ་ཡིད་བཞིན་ནོར་བུ་དང་སློབ་མ་སྒྲུབ་དཔོན་སངས་རྒྱས་ཀུན་འདུས་སྐུལ་ངོར་གང་ཤར་གདམས་གླུ་རུ་ཤྲཱིཿཨེ་མ་ཧོས་ཨེ་ཝཾ་ཀུན་བཟང་ཆོས་གླིང་ནས་བྲིས་པར་དགེའོ།། །།
