ཨེ་ཝྃ་ཧོ།

སློབ་དཔོན་སངས་རྒྱས་གཉིས་པའི་གསོལ་འདེབས་ལེའུ་བདུན་མ་བཞུགས་སོ། ། ༄༅། །གུ་རུ་ན་མོ༔ མེ་ཕོ་རྟའི་ལོ་རྒྱལ་གྱི་ཟླ་བ་ལ༔ དཔལ་བསམ་ཡས་སུ་ཚོགས་ཀྱི་མཆོད་པ་རྒྱ་ཆེན་པོ་བཏང་བའི་དུས་སུ༔ སློབ་དཔོན་ཆེན་པོ་པདྨ་འབྱུང་གནས་ལ༔ དགེ་སློང་ནམ་མཁའི་སྙིང་པོ་དང༔ རྒྱལ་པོ་ཁྲི་སྲོང་ལྡེའུ་བཙན་དང༔ མཁའ་འགྲོ་ཡེ་ཤེས་མཚོ་རྒྱལ་དང༔ སྣ་ནམ་རྡོ་རྗེ་བདུད་འཇོམས་དང༔ ལྷ་སྲས་མུ་ཁྲི་བཙན་པོ་དང་ལྔས༔ ཕྱག་དང་སྐོར་བ་བྱས༔ རིན་པོ་ཆེའི་མཎྜལ་ཕུལ་ནས་ཞུས་པ༔ ཀྱེ་སློབ་དཔོན་ཆེན་པོ་ལགས༔ གསང་སྔགས་ཀྱི་ཆོས་གསུངས་པ་ཐམས་ཅད་ཀྱི་ནང་ནས་དམ་ཚིག་བསྲུང་བ་གལ་ཆེ༔ དེའི་ནང་ནས་ཀྱང་བླ་མ་ལ་གསོལ་བ་འདེབས་པ་གཙོ་ཆེ་བར་གསུངས་གདའ་བས༔ བདག་ཅག་རྣམས་ལ་དང་བ་འདྲེན་པ༔ བྱིན་རླབས་ཆེ་བ༔ གང་ཟག་ཐ་མལ་པ་བློ་རྨོངས་པས་ཚིག་གི་ར་མདར་སྦྲན་པས་གསང་སྔགས་ཀྱི་ལྷ་རྣམས་ཀྱི་ཐུགས་དམ་སྐུལ་བ༔ གུ་རུ་ཉིད་ཀྱི་བྱིན་རླབས་འཇུག་པ༔ནང་ནུབ་ཏུ་གསོལ་བ་འདེབས་པ་ལ་ཚིག་ཉུང་ལ་དོན་འདུས་པ་ཞིག་བདག་ཅག་དང་མ་འོངས་པའི་སེམས་ཅན་རྣམས་ལ་སངས་རྒྱས་ཉིད་ཀྱིས་གསུང་བར་ཞུ་ཞེས་ཞུས་པས༔ སློབ་དཔོན་ཆེན་པོས་བཀའ་བསྩལ་པ༔ ཉོན་ཅིག་བོད་ཀྱི་སྐལ་ལྡན་རྣམས༔ གསང་སྔགས་ཀྱི་ཐེག་པ་འདི་འབྱུང་བ་ནི་དཀོན་ཏེ༔ སྔོན་སངས་རྒྱས་འོད་སྲུང་ཆེན་པོས་ཆོས་ཀྱི་འཁོར་ལོ་བསྐོར་བའི་དུས་སུ་ཡང་གསང་སྔགས་རྡོ་རྗེ་ཐེག་པ་འདི་མ་གསུངས༔ སངས་རྒྱས་བྱེ་བ་ཕྲག་བརྒྱད་ཅུ་རྩ་བཞིས་ཀྱང་མ་གསུངས༔ མ་འོངས་པའི་སངས་རྒྱས་རྣམས་ཀྱིས་ཀྱང་གསུང་བར་མི་འགྱུར་རོ༔ ཅིའི་ཕྱིར་ཞེ་ན༔ འགྲོ་བ་རྣམས་སྣོད་དུ་མ་གྱུར་པའི་ཕྱིར་རོ༔ སྔོན་བསྐལ་པ་ཐོག་མ་ལ་བསྐལ་པ་ཀུན་བཀོད་ཅེས་བྱ་བ་བྱུང་བའི་ཚེ༔ སངས་རྒྱས་སྔོན་བྱུང་གི་རྒྱལ་པོ་ཞེས་བྱ་བའི་བསྟན་པ་ལ་གསང་སྔགས་རྒྱ་ཆེར་བསྒྲགས་སོ༔ ད་ལྟར་གྱི་སངས་རྒྱས་ཤཱཀྱ་ཐུབ་པའི་བསྟན་པ་འདི་ལ་གསང་སྔགས་བྱོན་པའོ༔ ད་སྟེ་བསྐལ་པ་བྱེ་བ་འདས་པའི་འོག་ཏུ་བསྐལ་པ་མེ་ཏོག་བཀོད་པ་ཞེས་བྱ་བ་འབྱུང་བའི་ཚེ༔ སངས་རྒྱས་འཇམ་དཔལ་དབྱངས་ཞེས་བྱ་བ་ད་ལྟའི་ང་དང་ཚུལ་མཐུན་པ་ཞིག་འབྱུང་སྟེ༔ དེས་གསང་སྔགས་རྒྱ་ཆེར་སྟོན་པར་འགྱུར་རོ༔བསྐལ་པ་དེ་གསུམ་ནི་འགྲོ་བ་རྣམས་སྣོད་དུ་རུང་བའི་ཕྱིར་རོ༔ བསྐལ་པ་དེ་གསུམ་མ་ཡིན་པ་དུས་ནམ་ཡང་གསང་སྔགས་མི་འབྱུང་ངོ༔ དེ་བས་ན་བསྟན་པ་འདི་ལ་དལ་འབྱོར་གྱི་མི་ལུས་ཐོབ༔ གསང་སྔགས་ཀྱི་སྒོར་ཞུགས་པ་རྣམས་ནི་ལེ་ལོ་དང་བཏང་སྙོམས་ཀྱི་དབང་དུ་མ་སོང་བ་གལ་ཆེ༔ ད་གསང་སྔགས་ཉམས་སུ་ལེན་པ་ལ་དགོས་པའི་ཆོས་བཞི་བྱ་བ་ཚང་དགོས༔ དེ་མ་ཚང་ན་དམ་ཚིག་ཉམས་ཏེ་འཁོར་བར་འཁྱམས་ངེས༔ ངན་སོང་དུ་ལྟུང་ངེས༔དེ་ཅིའི་ཕྱིར་ཞེ་ན༔ དུས་གསུམ་གྱི་སངས་རྒྱས་རྣམས་ཀྱིས་ཀྱང་ཉོན་མོངས་པ་རང་རྒྱུད་དུ་སྤྱད་པས་བྱང་ཆུབ་ཐོབ་པར་མ་གསུངས་སོ༔ དགོས་པའི་ཆོས་བཞི་ནི༔ སྒོ་གསུམ་ཐ་མལ་དུ་འཆོར་བ་ལ་འཁྲི་བ་བཙན་ཐབས་སུ་གཅོད་པའི་གདམས་ངག་དགོས༔ ཉོན་མོངས་དུག་ལྔ་སྟོབས་ཆེ་ན༔དུག་ལྔ་རང་གྲོལ་དུ་ཤེས་པའི་གདམས་ངག་དགོས༔ འདུ་འཛི་གཡེང་བའི་དབང་དུ་སོང་ན༔རེ་དོགས་བར་ཆད་དུ་ཤེས་པའི་གདམས་ངག་དགོས༔ དམ་ཚིག་གཙང་མ་བསྲུང་བ་ལ༔སྐྱེས་བུས་གཞུ་འགེངས་པ་ལྟ་བུའི་གདམས་ངག་དགོས༔ དེ་ཡང་གསང་སྔགས་ཀྱི་ཐེག་པ་ནི་ཨུ་དུམྦ་རའི་མེ་ཏོག་ལྟ་བུ་སྟེ་འབྱུང་བར་མི་འགྱུར༔ གལ་ཏེ་འབྱུང་ཡང་ཡུན་དུ་མི་གནས་སོ༔ དེ་ནི་འགྲོ་བ་རྣམས་སྣོད་དུ་མ་གྱུར་པའི་ཕྱིར་རོ༔ ད་ཁྱེད་རྒྱལ་པོས་དབུ་མཛད་པ་རྣམས་ཉོན་ཅིག༔ བསྟན་པ་འདི་ལ་དལ་འབྱོར་གྱི་མི་ལུས་ཐོབ༔ གསང་སྔགས་ཀྱི་སྒོར་ཞུགས༔ཚེ་འདི་ལ་བྱང་ཆུབ་འཐོབ་པར་འདོད་པ་རྣམས་ཀྱིས༔ རྩ་བ་དང་ཡན་ལག་གི་དམ་ཚིག་གཙང་མར་བསྲུང་བ་གལ་ཆེ༔ དེ་མ་བསྲུངས་ན་འཚོ་བྱེད་ཀྱི་སྨན་བཙལ་བས་རེག་ཕུང་གི་དུག་དང་འཕྲད་པ་ལྟ་བུའོ༔ དམ་ཚིག་བསྲུང་བ་ལ་དད་པ་དང་བརྩོན་འགྲུས་ཤེས་རབ་གསུམ་ཚང་དགོས༔ དད་པ་མེད་ན་གསང་སྔགས་ཀྱི་སྣོད་དུ་མི་རུང༔ བརྩོན་འགྲུས་མེད་ན་ལེ་ལོ་ཅན་ཐ་མལ་དུ་འཆོར༔ ཤེས་རབ་མེད་ན་གསང་སྔགས་ཀྱི་ལྟ་སྤྱོད་ཟབ་མོ་དབྱེ་མི་ཤེས༔ གསང་སྔགས་ནི་འགྲོ་བ་དད་གུས་ཅན་གྱི་དོན་དུ་བྱོན་པ་ཡིན༔ དེ་ཡང་རང་ལ་གསང་སྔགས་སྟོན་པའི་བླ་མ་དེ་སངས་རྒྱས་དངོས་སུ་ཤེས་པས་གསོལ་བ་འདི་ལྟར་ཐོབ་ཅིག་གསུངས་སོ༔ ཨེ་མ་ཧོཿ སྤྲོས་བྲལ་ཆོས་ཀྱི་དབྱིངས་ཀྱི་ཞིང་ཁམས་སུཿ ཆོས་ཉིད་དུས་གསུམ་སྐྱེ་འགགས་མེད་པའི་ངངཿ བྱ་བྲལ་ལྷུན་རྫོགས་བདེ་བ་ཆེན་པོའི་སྐུཿ ནམ་མཁའ་བཞིན་དུ་ཐུགས་རྗེ་ཕྱོགས་རིས་མེདཿབླ་མ་ཆོས་ཀྱི་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ བདེ་ཆེན་ལྷུན་གྱིས་གྲུབ་པའི་ཞིང་ཁམས་སུཿ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱིཿ ཡེ་ཤེས་ལྔ་ལྡན་བདེ་བར་གཤེགས་པའི་སྐུཿ ཐུགས་རྗེའི་བྱེ་བྲག་སྣ་ཚོགས་སོ་སོར་སྟོནཿ བླ་མ་ལོངས་སྤྱོད་རྫོགས་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ མི་བརྗེད་འཇིག་རྟེན་དག་པའི་ཞིང་ཁམས་སུཿ ཐུགས་རྗེ་ཆེན་པོས་འགྲོ་བའི་དོན་ལ་བྱོནཿ གང་ལ་གང་འདུལ་ཐབས་ཀྱིས་འགྲོ་དོན་མཛདཿ འདས་དང་མ་བྱོན་ད་ལྟ་དུས་གསུམ་གྱིཿ བླ་མ་སྤྲུལ་པའི་སྐུ་ལ་གསོལ་བ་འདེབསཿ ཨུ་རྒྱན་པདྨ་འབྱུང་གནས་ལ་གསོལ་བ་འདེབསཿ དེ་ལྟར་རྒྱུན་ཆད་མེད་པར་གསོལ་བ་ཐོབ༔ ཅེས་གསུངས་སོ༔ཁ་སྐོང་བརྒྱུད་འདེབས་ནི། ཆོས་སྐུ་ཀུན་ཏུ་བཟང་པོ་ལ་གསོལ་བ་འདེབས། །ལོངས་སྐུ་རྒྱལ་བ་རིགས་ལྔ་ལ་གསོལ་བ་འདེབས། །སྤྲུལ་སྐུ་རིགས་གསུམ་མགོན་པོ་ལ་གསོལ་བ་འདེབས། །ཡང་སྤྲུལ་དགའ་རབ་རྡོ་རྗེ་ལ་གསོལ་བ་འདེབས། །སློབ་དཔོན་འཇམ་དཔལ་བཤེས་གཉེན་ལ༴རིག་འཛིན་ཤྲཱྀ་སེང་ཧ་ལ༴པཎ་ཆེན་བི་མ་མི་དྲ་ལ༴རྒྱལ་སྲས་པདྨ་འབྱུང་གནས་ལ༴ཆོས་རྒྱལ་ཁྲི་སྲོང་ལྡེའུ་བཙན་ལ་༴མཁའ་འགྲོ་ཡེ་ཤེས་མཚོ་རྒྱལ་ལ༴དགེ་སློང་ནམ་མཁའི་སྙིང་པོ་ལ༴སྣ་ནམ་རྡོ་རྗེ་བདུད་འཇོམས་ལ༴ལྷ་སྲས་མུ་ཁྲི་བཙད་པོ་ལ༴སྤྲུལ་སྐུ་བཟང་པོ་གྲགས་པ་ལ༴རིག་འཛིན་དངོས་གྲུབ་རྒྱལ་མཚན་ལ༴ཀུན་སྤངས་དོན་ཡོད་རྒྱལ་མཚན་ལ༴བརྒྱུད་འཛིན་བསོད་ནམས་མཆོག་བཟང་ལ༴གྲུབ་ཆེན་ཐང་སྟོང་རྒྱལ་པོ་ལ༴མཚུངས་མེད་དངོས་གྲུབ་དཔལ་ལྡན་ལ༴གྲུབ་ཆེན་ཀུན་དགའ་བཟང་པོ་ལ༴ མི་འགྱུར་ལས་འཕྲོ་གླིང་པ་ལ༴ རྒྱལ་དབང་རིན་ཆེན་ཕུན་ཚོགས་ལ༴ སྤྲུལ་སྐུ་ནམ་མཁའ་བརྒྱ་བྱིན་ལ༴ མཁས་གྲུབ་མདོ་སྔགས་བསྟན་འཛིན་ལ༴ རིག་འཛིན་ཕྲིན་ལས་ལྷུན་གྲུབ་ལ༴ ཆོས་རྒྱལ་གཏེར་བདག་གླིང་པ་ལ༴ འགྱུར་མེད་ཐེག་མཆོག་བསྟན་འཛིན་ལ༴ འགྱུར་མེད་ཀུན་བཟང་རྣམ་རྒྱལ་ལ༴…

ཆོས་ཀྱི་རྗེ་དང་དིལ་མགོ་མཁྱེན་བརྩེ་རྣམ་གཉིས་ཀྱི་མཇལ་འཕྲད། མཁན་ཆེན་བསོད་དར་རྒྱས། ཡིག་སྒྱུར་པ། ཤེས་རབ་ཉི་མ། ༡༩༩༠ ལོའི་ཟླ་༧ ཚེས་༡༤ སྔ་དྲོ་ཆུ་ཚོད་དགུ་པར། ཆོས་ཀྱི་རྗེ་ཉིད་ཀྱིས་རྒྱ་གར་ལ་སྡོད་པའི་འབྲུག་རྒྱལ་ཁབ་གཞུང་ཚབ་ཁང་གི་སྤྲོ་ཁང་ནང་ནས། དིལ་མགོ་མཁྱེན་བརྩེ་རིན་པོ་ཆེ་ལ་མཇལ་འཕྲད་ཞུས། དིལ་མགོ་མཁྱེན་བརྩེས་སྐུ་སྟོད་གཅེར་བུར་ཕྱུང་ཞིང་མགུལ་དུ་མངོན་གསལ་དོད་པའི་སྒོ་ནས་གའུ་ཆེན་པོ་ཞིག་དང་། གཟི་སོགས་བྱིན་རླབས་ཀྱི་རྟེན་འགའ་རེ་བཏགས་ནས། གཟིམ་ཁྲི་ཆེན་པོ་ཞིག་གི་ཐོག་ལ་བཞུགས་འདུག ངས་ཐོག་མར་རྒྱ་གར་ལ་ཚད་པ་ཤིན་ཏུ་ཆེ་བའི་རྒྱུ་མཚན་གྱིས། རིན་པོ་ཆེས་སྐུ་སྟོད་གཅེར་བུར་ཕུད་པ་ཡིན་རྒྱུ་རེད་བསམས་ཀྱང་། ཕྱིས་འབྲུག་རྒྱལ་ཁབ་ནས་ཁོང་མཇལ་བའི་དུས་སུ་ཡང་སྐུ་སྟོད་ལ་ན་བཟའ་མནབས་མི་འདུག་པས། གཟོད་ཁོང་གི་མཛད་པ་དེ་ལ་དགོས་པ་དང་དགོངས་གཞི་ཁྱད་པར་ཅན་རེ་ཡོད་རྒྱུ་རེད་སྙམ་པ་བྱུང་། རྗེ་ཉིད་གཟིམ་ཁང་གི་སྒོ་ནས་ཡར་བྱོན་མ་ཐག དིལ་མགོ་མཁྱེན་བརྩེ་ལ་ཕྱག་ཕུལ། རིན་པོ་ཆེས་ཕྱག་མ་འཚལ། ཕྱག་མ་འཚལ། ངའི་རྐང་བ་མི་བདེ་བས་ཡར་ལང་མི་ཐུབ་གི ཅེས་གསུངས་ཏེ་ནན་གྱིས་བཀག་ཀྱང་། རྗེ་ཉིད་ཀྱིས་ཕྱག་གསུམ་ཕུལ་བར་བྱས། དེ་རྗེས། སྐྱེས་བུ་དམ་པ་ཁོང་གཉིས་ཀྱིས་དར་ཁ་འབུལ་རེས་མཛད་དེ། ཆོས་ཀྱི་རྗེ་ཉིད་རིན་པོ་ཆེའི་གཟིམ་ཁྲིའི་ཟུར་ལ་འདུག་ཁྲི་ཞིག་ཡོད་པ་དེའི་སྟེང་ལ་བཞུགས། ཁོང་རྣམ་པ་གཉིས་མཇལ་འཕྲད་ཐོག་མར་མཛད་པ་ཡིན་ཡང་། རྒྱུས་ཡོད་ཀྱི་གྲོགས་པོ་བཟང་པོ་གཉིས་འཕྲད་བྱུང་བ་ལྟར་ཐུགས་མཉེས་པའི་གསུང་གླེང་མང་པོ་གནང་། དིལ་མགོ་མཁྱེན་བརྩེ་རིན་པོ་ཆེས་རྗེ་ཉིད་བོད་ནས་བལ་པོ་ལ་ཕེབས་པའི་ལམ་བར་གྱི་གནས་ཚུལ་ལ་ཐུགས་འདྲི་མཛད་ཅིང་། རྗེ་ཉིད་ཀྱིས་དེ་ལ་ལན་ཞིབ་མོའི་སྒོ་ནས་ཞུས། དེ་ནས་རྗེའི་སྐུ་སྲིང་མས་ལུས་ལ་བཅངས་པའི་ཁུག་མའི་ནང་ནས། བོད་མི་རྣམས་ཀྱིས་རིན་པོ་ཆེ་ལ་འབུལ་རྒྱུར་བསྐུར་བའི་དངུལ་བཏུམས་པའི་དར་ཁ་ཕྱིར་བླངས་ཏེ། ཡར་ཕུལ་བ་དང་མཉམ་དུ། རྗེ་ཉིད་ཀྱིས་ཀྱང་འབུལ་བ་འགའ་རེ་མཛད། དེའི་ཚེ། ངས་པར་ཆས་ཡར་བླངས་ནས་པར་ལེན་མགོ་བརྩམས། དང་པོར་ངས་འཁྱུག་སྒྲོན་གྱི་སྒོ་མ་ཕྱེས་པར་པར་ཞིག་བླངས་པས། རྗེ་ཉིད་ཀྱིས་ཅི་ཡང་མ་གསུངས། གཟིམ་ཁང་ནང་ལ་འོད་གསལ་པོ་མི་འདུག་པས་པར་ཡག་པོ་ལོན་ཡོད་རྒྱུ་མ་རེད་བསམས་ཏེ། པར་ཆས་འཁྱུག་སྒྲོན་གྱི་སྒོ་ཕྱེས་ནས་སླར་ཡང་གཅིག་བླངས་པས། རྗེ་ཉིད་ཀྱིས་སྤྱན་འབྲུ་ཚུགས་སུ་ང་ལ་གཟིགས་སོང་། ཡིན་ཡང་པར་དེའི་ནང་ལ་མི་གཞན་ཡང་ཆུད་སོང་བས། དེ་འདྲའི་ཡིད་ཚིམ་མོ་རང་མ་བྱུང་བའི་རྐྱེན་གྱིས། ཟུར་གཞན་ཞིག་ནས་ཡང་བསྐྱར་པར་གཅིག་བླངས་པའི་དུས་སུ། རྗེ་ཉིད་ཀྱིས་དེ་ལ་ཐུགས་མི་དགྱེས་པའི་ཚུལ་མཛད་དེ། ཁྱོད་ལ་པར་མ་ལེན་ཞེས་བཤད་པ་མ་ཡིན་ནམ། ཁྱོད་ཀྱིས་ཅི་བྱེད་བཞིན་ཡོད། ཅེས་བཀའ་བཀྱོན་ཕེབས། ངས་པར་ཆས་མར་བཞག་ཏེ་ལེན་མ་ཕོད། རྗེ་ཉིད་ཀྱིས་བཀའ་བཀྱོན་གནང་བྱུང་ཡང་། ཕྱི་རབས་གདུལ་བྱ་རྣམས་ཀྱི་དྲན་རྟེན་གྱི་ཆེད་དུ། ལོ་རྒྱུས་ཀྱི་རང་བཞིན་ལྡན་པའི་པར་དེ་དེ་ལྟ་བུའི་སྒོ་ནས་ལེན་ཐུབ་པ་བྱུང་བས། ངའི་སེམས་ལ་ནི་དགའ་བ་ལས་མ་སྐྱེས། དིལ་མགོ་མཁྱེན་བརྩེ་རིན་པོ་ཆེས། ངས་ཁྱེད་ལ་འཕྲིན་ཡིག་ཅིག་བྲིས་ཏེ་འཇམ་དཔལ་རྫོགས་པ་ཆེན་པོའི་སྨོན་ལམ་ལ་འགྲེལ་བ་ཞིག་མཛད་དགོས་པའི་བསྐུལ་མ་ཞུས་ཡོད་པས། ཁྱེད་ཀྱིས་མཛད་ཐུབ་པ་ཨེ་བྱུང་། ཞེས་བཀའ་འདྲི་ཕེབས། རྗེ་ཉིད་ཀྱིས་གུས་པ་དང་ལྡན་པའི་སྒོ་ནས། ད་དུང་བྲིས་མེད། ངས་དཔེ་ལྟ་མང་པོ་རེ་བྱས་ཏེ་བྲིས་ན་མང་པོ་འབྲི་རྒྱུ་འོང་ཀྱང་དེ་ལ་དོན་ཆེན་པོ་མེད། གསོལ་འདེབས་རེ་བྱས་ན་རིག་སྟོང་གི་ཀློང་ནས་རྩོལ་མེད་དུ་ཤར་འོང་རྒྱུ་ཞིག་ཡོད་དར་བས། ད་བར་དུ་དེ་ལ་བསྒུགས་པ་ཡིན། དེ་སྔ་ས་བཅད་འདི་ཙམ་ལས་ཡིད་ངོ་ལ་འཆར་རྒྱུ་མི་འདུག་ཅེས་ཞུ་བཞིན། གྲ་སྒྲིག་ཟིན་པའི་ས་བཅད་དེ་དར་ཁ་ཞིག་གིས་བཏུམས་ནས་མཁྱེན་བརྩེ་རིན་པོ་ཆེ་ལ་ཕུལ། རིན་པོ་ཆེ་ཐུགས་ཤིན་ཏུ་དགྱེས་ཏེ། འགྲེལ་བ་དེ་མཐར་ཕྱིན་པར་འབྲི་ཐུབ་པའི་བཀའ་དྲིན་གནང་རོགས་གྱིས། ཞེས་ཡང་ཡང་བསྐུལ་མ་མཛད་ནས་གསོལ་བ་བཏབ་པས། རྗེ་ཉིད་ཀྱིས་དབུ་ལྕོག་ལྕོག་མཛད་བཞིན། ཡ་ཡ། རེད་འོང་ན་ཐང་། ཞེས་གསུངས། མཁྱེན་བརྩེ་རིན་པོ་ཆེས། ཁྱེད་ཀྱིས་རིན་ཆེན་གཏེར་མཛོད་ཀྱི་དབང་ལུང་གསན་ཐུབ་པ་ཨེ་བྱུང་ཞེས་དྲིས་པ་ལ། རྗེ་ཉིད་ཀྱིས་དེ་མ་ཐོབ། ལོ་གཞོན་དུས་དཔེ་ཆ་སྦྱང་རྒྱུ་ཤིན་ཏུ་གལ་ཆེ་བ་ཡིན་ཞིང་། དཔེ་ཆ་ཤེས་ན་དབང་ལུང་ག་ལེར་ལས་སླ་རྒྱུ་རེད་བསམས་པ་ཡིན་ཡང་། ཕྱིས་སུ་ཟིང་འཁྲུག་ཆེན་པོ་ལངས་ནས་སྐྱེས་ཆེན་དམ་པ་མང་པོ་སྐུ་གཤེགས་པའམ་ཕྱི་ཕྱོགས་ལ་བྱོན་སོང་ནས། ཞུ་བའི་སྐལ་བ་མ་ལྡན་པས་ང་ལ་དབང་ལུང་རྒྱ་ཆེན་པོ་ཐོབ་མ་སོང་གསུངས། རྗེ་ཉིད་ཀྱི་ཞལ་ནས་ཡང་། ང་ཆུང་བྱིས་པའི་དུས་ནས་བླ་མ་མི་ཕམ་རིན་པོ་ཆེ་ལ་ཐུན་མོང་མ་ཡིན་པའི་དད་གུས་ཆེན་མོ་ཡོད། དེ་ལྟར་ཡུན་རིང་མོ་ལ་གསོལ་བ་བཏབ་པས། བླ་མ་མི་ཕམ་རིན་པོ་ཆེའི་བྱིན་རླབས་ལ་བརྟེན་ནས་རྫོགས་པ་ཆེན་པོ་ལ་གོ་རྟོགས་ཤར་སྣང་སྐྱེས་ཤིང་། དུས་དེ་ནས་བཟུང་ངས་བསྟན་པ་དང་སེམས་ཅན་གྱི་དོན་ལ་གང་ཐུབ་ཅི་ཐུབ་བྱས་པ་ཡིན་ཞེས་མཁྱེན་བརྩེ་རིན་པོ་ཆེ་ལ་གསུངས། མཁྱེན་བརྩེ་རིན་པོ་ཆེས་གསན་རྗེས་ཕྱག་ཐལ་མོ་སྦྱར་ཏེ། ད་ཧ་ཅང་ཡག་པོ་འདུག ད་ཧ་ཅང་ཡག་པོ་འདུག་གསུངས། ཡང་རིན་པོ་ཆེས། ཁྱེད་ཀྱིས་གཏེར་ག་གེ་མོ་ཞིག་གཏེར་ནས་བཞེས་ཐུབ་པ་ཨེ་བྱུང་གསུངས། རྗེ་ཉིད་ཀྱིས། མ་ལོན་ཐལ། ང་དེའི་དོན་དུ་ཉག་རོང་ལ་སོང་རུང་། རྟེན་འབྲེལ་གཞན་དབང་དུ་གྱུར་ནས་གནས་སྐབས་མི་སྐྱུར་ཀ་མེད་བྱུང་སོང་གསུངས། དེ་དུས།…

༡༤ ༄༅། ། རིག་འཛིན་འཇིགས་མེད་གླིང་པའི་མཛད་རྣམ་བསྡུས་པ། མཛད་པ་པོ། བདུད་འཇོམས་འཇིགས་བྲལ་ཡེ་ཤེས་རྡོ་རྗེ། ༄༅། །པཎ་ཆེན་བི་མ་ལ་དང་ཆོས་རྒྱལ་ཁྲི་སྲོང་རྒྱལ་སྲས་ལྷ་རྗེ་རྣམས་ཟུང་དུ་འཇུག་པའི་རྣམ་འཕྲུལ་རིག་འཛིན་ཆོས་རྗེ་གླིང་པའི་སྐུའི་སྐྱེ་བ་དེ་མ་ཐག་པ་ཀུན་མཁྱེན་འཇིགས་མེད་གླིང་པ་ནི། གུ་རུ་ཆོས་དབང་། སངས་རྒྱས་གླིང་པ། ཆོས་གླིང་དང་རྭ་སྟོན་ཡབ་སྲས་སོགས་ཀྱི་གཏེར་ལུང་ལས་གསལ་བ་ལྟར་འཕྱོང་རྒྱས་སྲོང་བཙན་བང་སོ་དམར་པོའི་ལྷོ་ཕྱོགས་དཔལ་རི་དགོན་པའི་ཉེ་འདབས་སུ། ཆོས་རྗེ་འབྲུག་པའི་ཐུགས་སྲས་ཆེ་བ་དྲུག་གི་ནང་ཚན། རྒྱ་བྲག་པའི་དབོན་རིགས་སུ་རབ་བྱུང་བཅུ་གཉིས་པའི་ས་མོ་བྱ་ལོ་རྒྱལ་ཟླ་བའི་ཀུན་མཁྱེན་ཆེན་པོའི་སྐུ་མཆོད་ཀྱི་ཉིན་སྔ་དྲོའི་ཆར་སྐུ་འཁྲུངས། ཆུང་ངུ་ནས་གཏེར་ཆེན་སངས་རྒྱས་བླ་མ་དང་། ཆོས་རྗེ་གླིང་པའི་སྔོན་རབས་གསལ་བ་སོགས་དམ་པའི་རིགས་སད། དགུང་ལོ་དྲུག་པར་རྗེ་བཙུན་པྲཛྙཱ་རསྨིའི་འཁོར་ལོ་གསུམ་གྱི་ཕྱག་རྗེས་རྨ་མེད་པའི་གནས་དཔལ་གྱི་རི་བོའི་ཆོས་གྲྭར་བཞུགས། མཚོ་རྒྱལ་སྤྲུལ་སྐུ་ངག་དབང་བློ་བཟང་པདྨར་གཙུག་ཕུད་ཕུལ་བས་མཚན་པདྨ་མཁྱེན་བརྩེའི་འོད་ཟེར་ཞེས་གསོལ༑ ཕྱིས་གནས་གསར་བ་ངག་དབང་ཀུན་དགའ་ལེགས་པའི་འབྱུང་གནས་ཀྱི་དྲུང་ནས་དགེ་ཚུལ་གྱི་སྡོམ་པའང་བཞེས། གནས་བརྟན་ཀུན་བཟང་འོད་ཟེར་ལས་གྲོལ་ཏིག་དང་བླ་མ་དགོངས་འདུས་སོགས་ཀྱི་དབང་ལུང་དང་། ཁྱད་པར་དགུང་ལོ་བཅུ་གསུམ་པར་རིག་འཛིན་ཐུགས་མཆོག་རྡོ་རྗེ་མཇལ་ནས་ཕྱག་རྒྱ་ཆེན་པོ་ཡེ་ཤེས་མཐོང་གྲོལ་སོགས་གསན་པས་ཐོག་མར་རྒྱུད་སྨིན་ཏེ་རྩ་བའི་བླ་མ་མཆོག་གཅིག་ཏུ་མཛད་པ་ལྟར་ཕྱིས་ཡེ་ཤེས་ཀྱི་སྐུས་ཀྱང་རྗེས་སུ་བཟུང་། གཞན་ཡང་སྔ་ཕྱིར་གཏེར་ཆེན་དྲི་མེད་གླིང་པ། ཞང་སྒོམ་དྷརྨ་ཀིརྟི། སྨིན་གླིང་གྲུབ་དབང་ཤྲཱི་ནཱ་ཐ། བསྟན་འཛིན་ཡེ་ཤེས་ལྷུན་གྲུབ། ཐང་འབྲོག་དབོན་པདྨ་མཆོག་གྲུབ༑ མོན་རྫ་དཀར་བླ་མ་དར་རྒྱས་སོགས་ཡོངས་འཛིན་དུ་མ་ལས་སྔ་འགྱུར་བཀའ་མ་དང་། གཏེར་ཁ་གོང་འོག་གཙོ་བོར་གྱུར་པའི་བཀའ་གཏེར་འགངས་ཆེ་བ་རྣམས་དང་། གསར་མའི་སྨིན་གྲོལ་ཡང་ཅི་རིགས་པ་གསན༑ ཞར་བྱུང་སྐར་རྩིས་སོགས་ཐ་སྙད་ཀྱི་རིགས་པའང་ཆ་ཤས་ཙམ་གསན་པ་ལས། ཕྱག་བྲིས་ཀྱིས་མཚོན་མདོ་སྔགས་གཞུང་ལུགས་ཆེན་མོའི་གནད་གསང་དང་། སྙན་འགྱུར་ཕུན་སུམ་ཚོགས་པའི་གསུང་རྩོམ་སོགས་སྐྱེས་ཐོབ་ཀྱི་རྩལ་ལས་རང་བྱུང་བ་མ་གཏོགས་ཐ་སྙད་ལ་སྦྱང་རྩོལ་མ་མཛད་པར་སྙིང་པོའི་སྒྲུབ་པ་ལ་ཐུགས་གཞོལ། དགུང་ལོ་ཉེར་བརྒྱད་པ་མེ་གླང་ཆོ་འཕྲུལ་ཆེན་པོ་ནས་བརྩམ་རང་དགོན་དཔལ་རིའི་སྒོམ་ཁང་ཐིག་ལེ་ཉག་གཅིག་ཏུ་ལོ་གསུམ་གྱི་བཅད་རྒྱ་དམ་བཅའ་བརྟན་པོས། གཙོ་བོར་གཏེར་ཆེན་ཤེས་རབ་འོད་ཟེར་གྱི་ཟབ་གཏེར་གྲོལ་ཏིག་དགོངས་པ་རང་གྲོལ་རིང་བརྒྱུད་དང་། ཉེ་བརྒྱུད་ཀྱི་ཚུལ་དུ་བཀའ་བབས་པ་ལྟར་དེའི་བསྐྱེད་རྫོགས་ཁོ་ན་ཐུགས་ཉམས་སུ་བཞེས་པས་དྲོད་རྟགས་ཁྱད་པར་ཅན་བརྙེས། གཞན་ཡང་གཏེར་ཁ་གོང་འོག་གིས་མཚོན་ཟབ་གཏེར་མང་པོའི་ལྷ་རབ་འབྱམས་ཀྱི་བསྙེན་སྒྲུབ་མཐར་ཕྱིན་པས་རྣམ་པར་སྨིན་པའི་རིག་འཛིན་གྱི་ལྡངས་ཚད་མངོན་དུ་གྱུར། རྩ་རླུང་ཐིག་ལེའི་རྣལ་འབྱོར་ལ་དབང་འབྱོར་པས་མགྲིན་པ་ལོངས་སྤྱོད་ཀྱི་འཁོར་ལོ་རྩ་ཁམས་ཡི་གེའི་སྤྲིན་དུ་དེངས་ཤིང་། སྣང་བ་དཔེ་ཆར་ཤར་བས་ཚིག་དོན་ཕུན་སུམ་ཚོགས་པའི་རྡོ་རྗེའི་གླུ་སོགས་ཆོས་ཀྱི་མཛོད་ཆེན་པོ་རྡོལ། བླ་མ་དགོངས་པ་འདུས་པའི་བསྙེན་སྒྲུབ་སྐབས་སྤྱི་གཙུག་ནས་རྟ་སྐད་ཀྱི་གདངས་འཚེར་ཅིང་ཨོ་རྒྱན་ཆེན་པོས་དཔལ་པདྨ་དབང་ཆེན་ཞེས་མཚན་གྱི་ཅོད་པན་དཔྱངས། སློབ་དཔོན་འཇམ་དཔལ་བཤེས་གཉེན་གྱིས་དངོས་སུ་བྱིན་གྱིས་བརླབས་པའི་མཐུས་མཚོན་བྱེད་དཔེའི་ཡེ་ཤེས་ཇི་བཞིན་པ་ཐུགས་ཉམས་སུ་བསྟར་བས་ཧེ་རུ་ཀའི་ཆས་ཀྱི་བརྗིད་པའི་བརྟུལ་ཞུགས་ཆེན་པོའི་སྤྱོད་པ་བསྐྱངས། ཁྱད་པར་འོད་གསལ་གྱི་སྣང་ཆར་བལ་ཡུལ་མཆོད་རྟེན་བྱ་རུང་ཁ་ཤོར་དུ་ཆོས་སྐུ་ཡེ་ཤེས་ཀྱི་མཁའ་འགྲོ་མས་ཀློང་བྱང་མཁའ་འགྲོའི་བརྡ་མངོན་དུ་བསྩལ་བ་ལ་བརྟེན་ནས༑ རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེ་ཞེས་ཡོངས་སུ་གྲགས་པའི་ཆོས་མཛོད་ཆེན་པོར་དབང་སྒྱུར་བ་སོགས་མཁས་གྲུབ་ཀྱི་གོ་འཕང་མཐོན་པོར་གཤེགས་ཀྱང་། དེ་ཙམ་གྱིས་ཀྱང་ཐུགས་མ་ཚིམས་པར་ཕྱོགས་དེའི་ལོ་གསུམ་གྲོལ་འཕྲལ་དཔལ་གྱི་བསམ་ཡས་མཆིམས་ཕུར་བྱོན། གསང་ཆེན་མེ་ཏོག་ཕུག་ཏུ་དཀའ་སྤྱད་དྲག་པོས་སླར་ཡང་ལོ་གསུམ་སྙིང་པོ་དོན་གྱི་སྒྲུབ་པ་ལ་རྩེ་གཅིག་ཏུ་གཞོལ་བའི་སྐབས། སྤྱིར་དག་པའི་གཟིགས་སྣང་མཐའ་ཡས་པ་དང་། ལྷག་པར་ཀུན་མཁྱེན་ཆོས་ཀྱི་རྒྱལ་པོ་ཀློང་ཆེན་རབ་འབྱམས་བཟང་པོའི་ཡེ་ཤེས་ཀྱི་སྐུ་ལན་གསུམ་དུ་མཇལ། སྐུ་གསུང་ཐུགས་ཀྱི་བྱིན་རླབས་དངོས་སུ་འཕོས་ཤིང་གསུང་གི་གནང་བ་ཆེན་པོ་ཐོབ་པ་ལ་བརྟེན། འཕགས་ལམ་དོན་གྱི་ཡེ་ཤེས་རྫོགས་པ་ཆེན་པོའི་བདེན་པ་མཐོང་། གནས་དེར་སྐལ་ལྡན་གྱི་སློབ་མ་བཅོ་ལྔ་ལ་ཐུགས་གཏེར་ཆེན་མོའི་སྨིན་གྲོལ་གྱི་སྒོ་འཕར་དང་པོར་དབྱེ་བ་ནས་བརྩམས་ཟབ་དོན་ཐང་མར་བརྡལ་བས་རྫོགས་པ་ཆེན་པོ་སྙིང་ཐིག་གི་ཤིང་རྟ་གཅིག་པུར་གྱུར། ལོ་གསུམ་གྱི་དམ་བཅའ་མཐར་ཕྱིན་ནས། ཆོས་དབང་རིན་པོ་ཆེའི་ཟབ་གཏེར་མཁའ་རིའི་ཞུས་ལན་ལས། འཕྱོང་རྒྱས་ནང་དུ་ང་སྤྲུལ་དོན་བྱེད་འོང་༔ སུ་ཡིན་མི་ཤེས་གཅིག་ཅར་སྨྲ་བ་འབྱུང་༔ འཕྱིང་བར་མདོ་འམ་བང་སོ་དམར་པོའི་ལྷོར༔ ལྷ་བབས་མཆོད་རྟེན་དགོན་སྡེ་འཆའ་ཡང་སྲིད༔ ཅེས་རྡོ་རྗེའི་ལུང་གི་བདེན་དོན་མངོན་དུ་གྱུར་ཅིང་། རྩེ་ལེ་སྣ་ཚོགས་རང་གྲོལ་གྱི་ཡེ་ཤེས་ཀྱི་སྐུས་དགོངས་པ་མངོན་དུ་གཏད། བརྡ་ཐབས་བསྟན་པ་སོགས་རྒྱུ་རྐྱེན་རྟེན་འབྲེལ་དུ་མ་ལ་བརྟེན་ནས་རང་གནས་སུ་ཕེབས་ཏེ༑ འཕྱོང་རྒྱས་སྲོང་བཙན་བང་སོའི་ལྷོ་ཕྱོགས་སྐུང་གི་རི་སུལ་དོན་མཁར་ལུང་པའི་ཕུར། དཔལ་ཚེ་རིང་ལྗོངས་པདྨ་འོད་གསལ་ཐེག་མཆོག་གླིང་གི་རི་ཁྲོད་རྟེན་དང་བརྟེན་པར་བཅས་པ་གསར་དུ་བཏབ་ནས་སྐུ་ཚེ་དེ་སྲིད་དུ་བྱ་བྲལ་སྦས་པའི་རྣལ་འབྱོར་ཚུལ་གྱིས་བཞུགས་སྟན་ཆགས། གངས་ཅན་མཐའ་དབུས་ཀུན་དང་ལྷོ་མོན་རྒྱ་གར་གྱི་ས་མཚམས་ཚུན་ནས་ལས་ལྡན་གྱི་སློབ་མ་མཐའ་ཡས་པ་ལ། རྙིང་མ་བཀའ་གཏེར་སྤྱི་དང་༑ གཙོ་བོར་སྙིང་ཐིག་གསར་རྙིང་གི་གདམས་པ་རྩལ་དུ་བཏོན་ནས་ཆོས་ཀྱི་ཕྲིན་ལས་རྨད་དུ་བྱུང་། ཆོས་འཁོར་རྣམ་པ་གསུམ་དུ་ཁྲི་མཆོད་མང་པོ་དང་། འཆི་ངེས་པའི་སྲོག་བསླུ་གྲངས་ལས་འདས་པ་སོགས་ལན་དང་རྣམ་སྨིན་ལ་རེ་བ་མེད་པའི་ཆོས་སྦྱིན་རླབས་པོ་ཆེ་གནང་། བསམ་ཡས་ཆོས་འཁོར་ཆེན་པོར་གསེར་སྦྱངས་ཀྱི་འཁོར་ལོ་ཕུལ་ཅིང་རིན་ཆེན་གཉིས་པའི་རྒྱལ་བ་མ་ཕམ་པའི་སྣང་བརྙན་ཆེན་པོ་བཞེངས། རབ་གནས་བསྐྱར་བ་སོགས་དང་། བསྟན་དགྲ་གོརྵའི་དཔུང་ཆེན་བོད་དུ་ལྷགས་པའི་སྐབས་དམག་ཟློག་རྟགས་ཐོན་མཛད་པས་མཚོན་བྱ་བ་ལས་ཀྱི་འཁོར་ལོ་དང་བསྟན་སྲིད་བདེ་ཐབས་ཀྱི་མཛད་པ་རྨད་དུ་བྱུང་བས་གཞུང་ས་ཆེན་པོ་ནས་ཀྱང་མཐོང་བཀུར་ཕུལ་དུ་བྱུང་བ་གནང༌། ཁྱད་པར་ཕྱོགས་གང་དུའང་སྔ་འགྱུར་གྱི་བསྟན་པ་ཉག་ཕྲ་བར་གྱུར་པས་སྤྲུལ་པའི་ཆོས་རྒྱལ་ལོ་པཎ་རྣམས་ཀྱི་ཐུགས་བསྐྱེད་རྒྱ་ཆེན་པོའི་ཕྲིན་ལས་ཆུད་འཛའ་བ་དང་༑ དེ་རྣམས་ཀྱི་ཕྱག་རྗེས་རྨ་མེད་པ་ཟུབ་ཏུ་ཉེ་བ་ཐུགས་ཀྱིས་མ་བཟོད་དེ། རྙིང་རྒྱུད་རིན་པོ་ཆེ་སྨིན་གླིང་གི་དཔེ་གང་བཞུགས་ཚང་མ་དབུ་ཤོག་ལྔ་རིན་པོ་ཆེ་སྣ་ལྔས་བྲིས་ཤིང་དེ་ཕྱིན་སྐྱ་ཆོས་པུསྟི་ཉེར་ལྔ་སྐོར་ཡོ་བྱད་དང་རྒྱུ་དངོས་ཕུན་སུམ་ཚོགས་པས་བསྒྲུབས་པར་མཛད། སྔོན་ཆད་ཕྱོགས་འདིར་དཀར་ཆག་ཏུ་འདེབས་པ་དང་གཏན་ཚིགས་ཀྱིས་བསྒྲུབས་པའི་དེབ་ཐེར་རྒྱས་པར་འགོད་པ་མ་བྱུང་མོད། རྗེ་བཙུན་འདི་ཉིད་ཀྱིས་གཏན་ཚིགས་གསུམ་དང་འབྲེལ་བའི་སྤོབས་པ་ཟབ་ལ་རྒྱ་ཆེ་བས་སྔ་འགྱུར་རྒྱུད་འབུམ་རིན་པོ་ཆེའི་རྟོགས་པ་བརྗོད་པ་འཛམ་གླིང་ཐ་གྲུར་ཁྱབ་པའི་རྒྱན་ཅེས་བྱ་བ་མཛད་དེ་ལུང་རིགས་ཀྱི་སྣང་བ་བཟང་པོས་ལོག་རྟོག་དང་ཐེ་ཚོམ་གྱི་མུན་པས་ཕྱོགས་བསླད་པ་ཐམས་ཅད་དྲུང་ནས་འབྱིན་པར་མཛད་དོ། །གཞན་ཡང་ཐུགས་གཏེར་ཀློང་ཆེན་སྙིང་ཐིག་གཞུང་རྩ་བ་གསལ་བྱེད་དང་བཅས་པ། རླངས་ཆེན་དཔལ་གྱི་སེང་གེས་སྤྲུལ་པའི་དཀྱིལ་འཁོར་དུ་དབང་བསྐུར་ཅིང་གདམས་ངག་བསྩལ་བ་ལ་བརྟེན་བཀའ་ཡི་བསྡུ་བ་གསར་དུ་མཛད་པའི་ཕུར་པ་རྒྱུད་ལུགས། ཀུན་མཁྱེན་ཆེན་པོའི་བྱིན་རླབས་ལ་བརྟེན་དགོངས་གཏེར་བསྟན་བཅོས་ཀྱི་ཚུལ་དུ་སྩལ་བའི་བསྟན་པ་ཡོངས་རྫོགས་ཀྱི་ལམ་རིམ་ཡོན་ཏན་རིན་པོ་ཆེའི་མཛོད་རྩ་འགྲེལ་སོགས་ཕུལ་དུ་བྱུང་བའི་གསུང་འབུམ་གླེགས་བམ་དགུར་ལོངས་པ་བཞུགས། གསུང་ལས་སྐྱེས་པའི་སློབ་མ་ས་སྐྱའི་ཁྲི་ཆེན་ངག་དབང་དཔལ་ལྡན་ཆོས་སྐྱོང་སྐུ་མཆེད། འབྲི་གུང་པའི་སྤྲུལ་སྐུ་རྣམ་གཉིས། རྡོ་རྗེ་བྲག་རིག་འཛིན་མཆོག་གི་སྤྲུལ་སྐུ། ལྷོ་བྲག་གསུང་སྤྲུལ་དང་ཐུགས་སྲས། བོ་དོང་པའི་བསྟན་འཛིན་སྦྱོར་ར་སྤྲུལ་སྐུ། རི་བོ་དགའ་ལྡན་པའི་རིང་ལུགས་འཛིན་པ་དགའ་ལྡན་ཤར་བྱང་རྣམ་གཉིས་དང་། མོན་མཚོ་སྣ་དགོན་རྩེ་སྤྲུལ་སྐུ་སོགས་བླ་ཆེན་དང་མི་ཆེན་དྲེགས་པ་ཅན་རྣམས་ནས་བཟུང་། བྱ་བྲལ་སྒྲུབ་བཙུན་གྱིས་མཐའ་བརྟེན་པ་གྲངས་ཀྱིས་མི་ལངས་ཤིང་། ཁམས་ཕྱོགས་རྙིང་མའི་བླ་སྤྲུལ་ཕལ་ཆེར་གྱིས་ཀྱང་ཞབས་ལ་གཏུགས། ཁྱད་པར་ནང་ཐུགས་ཀྱི་སྲས་གཅིག་པུ་ལྷ་སྲས་མུ་རུབ་བཙད་པོའི་རྣམ་འཕྲུལ་གྲུབ་དབང་འཇིགས་མེད་ཕྲིན་ལས་འོད་ཟེར༑ བྱང་སེམས་ཆེན་པོ་འཇིགས་མེད་རྒྱལ་བའི་མྱུ་གུ། མོན་མཁས་གྲུབ་འཇིགས་མེད་ཀུན་གྲོལ་སོགས་ཀྱི་ཕྲིན་ལས་ལ་བརྟེན་ལྷོ་ཕྱོགས་རྒྱ་གར་གྱི་ས་མཚམས་དང་། ཤར་ཕྱོགས་རྒྱ་སོག་གི་བར་ཆོས་ཀྱི་སྣང་བས་ཁྱབ་པའི་ཕྲིན་ལས་ནི་ཕྱི་དུས་འདིར་སུས་ཀྱང་འགྲན་ཟླར་མ་གྱུར་པ་མ་ཟད། རྗེ་ཉིད་ཀྱིས་ཁོ་བོས་དབེན་པའི་རིར་ལོ་བདུན་བྱང་ཆུབ་ཀྱི་སེམས་རྩེ་གཅིག་ཏུ་བསྒོམས་པས་བསྟན་པ་དར་རྒྱས་སུ་འབྱུང་བར་ཞལ་གྱིས་བཞེས་པ་ལྟར། དེང་སང་ཡང་སྙིང་ཐིག་གི་སྨིན་གྲོལ་ཉམས་ལེན་ཕྱོགས་ཐམས་ཅད་དུ་མ་ཁྱབ་པ་མེད་པ་ལྟ་བུས་ཇེ་དར་དུ་འགྲོ་བར་སྣང་བས་ལུང་བསྟན་གྱི་བདེན་དོན་མངོན་དུ་གྱུར། དེ་ལྟ་བུའི་འཁོར་ལོ་གསུམ་གྱི་མཛད་པ་མཐར་ཕྱིན་ནས་དགུང་ལོ་བདུན་ཅུར་སོན་པ་ས་རྟ་དབྱུག་པ་ཟླ་བའི་ཚེས་གསུམ་ལ་རང་གནས་ཚེ་རིང་ལྗོངས་ཀྱི་ཡང་དབེན་རྣམ་གྲོལ་ཡང་རྩེར་པདྨ་འོད་ཀྱི་ཞིང་ཁམས་ཆེན་པོར་རྟགས་དང་ཆོ་འཕྲུལ་མངོན་པར་འདུ་མཛད་དེ་གཤེགས་པ་ན། སྔ་ཚུད་ནས་ཞལ་ཆེམས་རྡོ་རྗེའི་ཚིག་ངོ་མཚར་ཅན་ཞིབ་མོ་བསྩལ་བ་ལྟར་རྗེས་ཀྱི་བྱ་བ་རྣམས་དབོན་འོད་ཟེར་ཕྲིན་ལས་སོགས་ཀྱིས་ཐུགས་དགོངས་རྫོགས་པའི་བྱ་བ་རྒྱ་ཆེན་པོ་མཐར་ཕྱིན་པར་མཛད་དོ། ། །…

༄༅།།༸ཀུན་མཁྱེན་རོང་ཟོམ་མ་ཧཱ་པཎྜིཏ་དྲན་པ་ གསུང་རབ་ཀྱི་མེ་ལོང་ཞེས་བྱ་བཞུགས་སོ།། ཨ། ཨ་ལ་ལ་ཧོ་ནམ་མཁའི་དབྱིངས།། མི་ཟད་ཡེ་ཤེས་ཟ་མ་ཏོག། རིག་པ་ཀུན་བཟང་རིན་པོ་ཆེ།། ཀུན་གཟིགས་རྒྱལ་བའི་དབང་པོར་དྲན།། ཨ་ཡིག་ལས་འཁྲུངས་ཀུན་མཁྱེན་རྗེ།། རོང་ཟོམ་མ་ཧཱ་པཎྜིཏ།། སྙིང་གི་མུན་སེལ་ཉི་མའི་འོད།། ཡིད་ཀྱི་མཁའ་ལ་འགགས་མེད་ཤར།། ལེགས་བཤད་གསུང་གི་བདུད་རྩི་ཆེ།། ཟླ་བའི་འོད་བཞིན་བདུད་རྩིའི་བཅུད།། ཚ་གདུང་ཀུན་སེལ་བསིལ་ཟེར་ཅན།། ཀུན་དུང་ཉ་གང་རྫོགས་ཆེན་དྲན།། ཚེ་གཅིག་ཐེག་ཆེན་ཚུལ་འཇུག་གི། ཐོག་མཐའ་བར་དུ་དགེ་བའི་གཏམ།། མཇལ་བའི་སྐལ་བཟང་ཨེ་མ་ཧོ།། ཡིད་བཞིན་ནོར་བུ་འདི་ཀོ་དྲན། ཤེས་བཞིན་ཆེན་པོའི་སྣོད་བཟང་དུ།། བཏང་སྙོམས་ཆེན་པོའི་ངང་དུ་འཇུག། རང་ངོ་ཤེས་ཤིང་རང་བབས་བཞགས།། རང་གྲོལ་ཡེ་ཤེས་གཉུག་སེམས་དྲན།། ཀུན་བཟང་སྤྱོད་པ་རྒྱ་མཚོའི་དཔལ།། དམ་ཚིག་མདོ་རྒྱས་རྒྱལ་བའི་གཞུང་།། མན་ངག་ལྟ་ཕྲེང་རྒྱལ་བའི་སྤྱན།། འགྲོ་ལ་བསྟན་པའི་བཀའ་དྲིན་དྲན།། ཉོན་ཤེས་རང་གྲོལ་སྦྲུལ་མདུད་བཞིན།། སྣང་སྲིད་སྣང་བ་ལྷ་རུ་བསྒྲུབས།། སྒྱུ་འཕྲུལ་རྣམ་གསུམ་བཤད་པའི་མདངས།། ཀུན་ལ་སྣང་བའི་རིག་པ་དྲན།། དྲན་པ་ནམ་མཁའི་ཆོས་རྒྱལ་དྲན།། དྲན་རིག་སངས་རྒྱས་ཡེ་ཤེས་སྐུ།། སྐུ་གསུམ་ཀུན་འདུས་པཎྜིཏ།། ཀུན་མཁྱེན་རོང་ཟོམ་ཆེན་པོ་དྲན།། དྲན་པའི་གདུང་བ་སྙིང་ནས་འབར།། བྱིན་རླབས་དངོས་གྲུབ་ལུས་ལ་ཁྱབ། ཕན་བདེ་མ་ལུས་འགྲོ་ལ་སྨིན།། འཁོར་བ་དོང་ནས་སྤྲུགས་པར་ཤོག། ཅེས་པ་འདི་ཡང་རབ་གནས་ཆུ་ཡོས་ཁྲུམས་སྟོད་ཟླ་བའི་ཡར་ངོའི་རྫོགས་པ་དང་པོ་ལ་རྨི་ལམ་འོད་གསལ་དག་པའི་སྣང་ཆ་དང་ཆོས་མཆེད་ཆོས་དགའི་སྨྲ་བཟང་ཐོས་པའི་རྐྱེན་བྱས་ནས་གང་ཤར་བ་དག་ལ་བཅོས་བསྒྱུར་མེད་པར་ཨེ་ཝྃ་དྷཱིཿ ཧྲཱིྃ་མཁའ་འགྲོའི་གླིང་ནས་ཨེ་མ་ཧོས་དག་དྲན་གླུ་རུ་བླངས་པར་དགེའོ།། །།

བདེན་བརྫུན་རྩོད་པས་རྫོཊ་རྒྱུ་ཅི་ཡང་མེད།། ཡོད་མེད་དཔྱད་པས་ཤེས་རྒྱུ་ཅི་ཡང་མེད།། འགལ་འབྲེལ་བརྩེཊ་པས་གྲོལ་རྒྱུ་ལར་ནས་མེད།། བླ་མ་གོང་མས་བསླུས་པ་གཏན་ནས་མེད།། …. 西安广仁寺