ཀཿ་ ཐོག་རིག་འཛིན་ཆེན་པོ་མཁྱེན་ནོ།
ཀཿ་ ཐོག་རིག་འཛིན་ཆེན་པོ་མཁྱེན་ནོ། ཨེ་མ་ཧོ༔ པདྨ་ཀ་ར་ནམ་མཁའི་སྙིང་པོའི་དཔལ།། ཀུན་མཁྱེན་རོང་ཟོམ་ས་བཟང་པཎྜིཏ།། ཀཿ ཐོག་རིག་འཛིན་ཚེ་དབང་ནོར་བུ་རྗེ།། པདྨ་དབང་ཆེན་དགྱེས་པའི་རྡོ་རྗེ་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསྟན་དང་འགྲོ་བའི་དོན་ཀུན་ལྷུན་གྲུབ་ཤོག། ཨོྃ་ཛྙཱ་ན་གུ་རུ་བཛྲ་སིདྡྷི་ཧཱུྃ༔ ཕྱི་སྣང་འབྱུང་བ་ཐམས་ཅད་རང་སར་དག། ནང་བཅུད་སེམས་ཁམས་འོད་གསལ་ངང་དུ་རྫོགས།། གསང་ཆེན་རིག་པའི་ཡོན་ཏན་མ་ལུས་སྨིན།། རིག་འཛིན་རྒྱལ་བའི་དགོངས་པ་མཐར་ཕྱིན་ཤོག། ཅེས་པ་འདི་ཡང་རབ་གནས་ཟིལ་གནོན་ཞེས་པ་མེ་ཕོ་རྟའི་ལོ་ཁྲུམས་ཟླའི་ཡར་ངོའི་རྒྱལ་བ་གཉིས་པའི་ཐོ་རངས་ཁར་མགོན་པོ་གང་གི་གསུང་སྐད་ཐོས་པ་དང་རྗེ་ཉིད་ལ་མི་ཕྱེད་པའི་དད་གུས་ཅན་རྒྱལ་ཁམས་དངོས་སྟོབས་རིགས་པའི་རྣམ་དཔྱོད་ལ་ཆགས་ཐོགས་ཀུན་བྲལ་ཨེ་མ་ཧོས་གཉུག་སེམས་བདེ་བ་ཆེན་པོས་ངང་ནས་ཤར་བ་བཞིན་ཤྲཱིས་སུག་ལས་བགྱིས་པར་དོན་དང་ལྡན་པར་གྱུར་ཅིག་གུ།། །། 29/9/2026
ཨེ་ཝྃ་སྒོམ་ཐབས་སྐད་ཅིག་མ།
ཨེ་ཝྃ་སྒོམ་ཐབས་སྐད་ཅིག་མ། ཨེ་མ་ཧོ།། ཟབ་ཞི་སྤྲོས་བྲལ་འདུས་མ་བྱས་པའི་ཀ་དག་སྟོང་གསལ་སྣང་བ་འཁྲུལ་མེད་དམ་པ་ཆོས་ཀྱི་དབྱིངས།། བདེ་ཆེན་བདུད་རྩིའི་དྭངས་གསལ་ཡངས་པ་ལྷུན་གྲུབ་འོད་གསལ་འཛིན་མེད་ལྟ་བ་དབྱིངས་རིག་བརྗེན་པའི་གཤིས།། སངས་རྒྱས་ཡེ་ཤེས་གཉུག་སེམས་དེ་ཉིད་ཨེ་ཝྃ་ཟུང་འཇུག་ཀུན་དང་མཚུངས་མེད་ངང་དུ་རོལ་གཅིག་ཕྱིར།། མ་ལུས་ཆོས་ཀུན་མ་གཡོས་མ་བཅོས་ངོ་བོ་རང་བཞིན་ཐུགས་རྗེ་ཆེན་པོས་དག་མཉམ་ཀློང་དུ་ཨ་།། ཞེས་ཨ་ཅི་ནུས་བཟླའ་བཞིན་དུ་མཐར་ནི་ངག་སྒྲ་མེད་དང་སེམས་འཛིན་མེད་ཀྱི་ངང་དུ་མཉམ་པར་བཞགས་ནས་དད་གུས་བླ་ན་མེད་པའི་བླ་མའི་ཐུགས་དང་རང་སེམས་དབྱེར་མེད་ངང་དུ་མཉམ་པར་བཞག་གོ། ཅེས་པ་འདི་འང་ཤར་ཕྱོགས་མཁའ་འགྲོ་རིག་འཛིན་དབྱངས་ཅན་ལྷ་མོས་བསྐུལ་ངོར་ཐོ་རངས་ཁར་ཉམས་སྣང་གང་ཤར་དུ་རིག་འཛིན་དཔལ་དགྱེས་པ་རྡོ་རྗེས་དེ་ཉིད་དུ་ཕུལ་བར་དགེའོ།། །། 7/9/2026
ངེས་དོན་གྱི་མཁས་དབང་ཉིད་དགོངས་པ་རྫོགས་ཟིན་འདུག
ངེས་དོན་གྱི་མཁས་དབང་ཉིད་དགོངས་པ་རྫོགས་ཟིན་འདུག ཀྱེ་མ་ཧོ།། རབ་འབྱམས་མཁས་པ་ངག་གི་དབང་ཕྱུག་མཆོག། རེ་ཞིག་དགོངས་པ་ཆོས་དབྱིངས་སུ་གཟིམས་ཀྱང་།། བསྟན་འགྲོར་ཕན་བདེའི་མཛད་པའི་འོད་སྣང་ཞིག། མྱུར་ཏུ་འཆར་བའི་སྨོན་ལམ་སྙིང་ནས་སྨོན།། ཤྲཱིས་སོ།། རེ་ཞིག་དགོངསགངས་ཅན་བོད་ཀྱི་ཤེས་རིག་གི་དཔེ་མཛོད་ཁང་ཆེན་པོ་ཞིག་ང་ཚོ་དང་གཏན་དུ་བྲལ་བར་མྱ་ངན་ཞུ། མཐའ་ཡས་གཞུང་ལུགས་རྒྱ་མཚོའི་ཕ་རོལ་ཏུ་སོན་ཅིང་། ལུང་རྟོགས་བསྟན་པའི་སྲོག་ཤིང་དུ་གྱུར་པའི་དཔལ་ལྡན་བཤེས་གཉེན་ཆེན་པོ། མཁས་པའི་དབང་པོ་དགེ་བཤེས་ངག་གི་དབང་ཕྱུག་རིན་ཆེན་དངོས་གྲུབ་མཆོག་དེ་རིང་གློ་བུར་དུ་དགོངས་པ་ཆོས་དབྱིངས་སུ་ཐིམ་པའི་ཡིད་བཞེད་སྐྱོ་བའི་གནས་ཚུལ་ཐོས་རྗེས། ཡིད་མ་ཆེས་པའི་མྱ་ངན་དང་སྐྱོ་གདུང་གིས་སེམས་ཁོང་ཡོངས་སུ་ནོན་སོང་། ཁོང་དང་ང་གཉིས་ནི་ཕ་ས་གཅིག་ལས་ཆེ་བའི་ཕ་ཡུལ་གཅིག་པའི་གཉེན་ཟླ་ཙམ་མ་ཟད། ཁོ་བོས་བརྩམས་པའི་དེབ་ཁ་ཤས་ཀྱི་སྔོན་གླེང་དང་མཇུག་བྱང་གི་འཚམས་སྦྱོར་གཞུང་ལུགས་ཀྱི་དཔྱད་སྟོབས་དང་ལྡན་པའི་སྒོ་ནས་འབྲི་གནང་མཛད་མྱོང་བ་དང་། དེ་བཞིན་སྐད་འཕྲིན་ཚོགས་པའི་ནང་དུ་རིག་གཞུང་གི་བགྲོ་གླེང་དང་རྩོམ་ཡིག་གི་ལམ་ནས་དགག་བཞག་བགྲོ་གླེང་མང་པོ་བྱེད་མྱོང་བའི་གཅེས་པའི་རིག་གྲོགས་དང་། བརྩེ་བའི་འབྲེལ་ལམ་ཟབ་པའི་གོ་ས་མཐོ་བའི་བཤེས་གཉེན་ཞིག་ཀྱང་ཡིན། ཁོང་ནི་བོད་ཀྱི་རིག་གནས་དང་བསྟན་པའི་གནས་བབ་གལ་ཆེན་ནང་། རླབས་ཆེན་གྱི་མཛད་རེས་དང་འཕྲིན་ལས་ཀྱིས་ཕྱུག་པའི་ཤེས་རིག་གི་མཛོད་ཁང་ཆེན་པོ་ཞིག་དང་། ཕྱི་རབ་པ་རྣམས་ཀྱི་ལམ་སྟོན་གྱི་སྒྲོན་མེ་ཆེན་པོ་ཞིག་ཡིན། དེ་རིང་མཁས་དབང་ཁོང་ང་ཚོ་དང་གཏན་དུ་བྲལ་བ་ནི། གངས་ཅན་བོད་ཀྱི་ཤེས་རིག་དང་བསྟན་པ་སྤྱིའི་འཕེལ་རིམ་དང་། ལྷག་པར་དུ་ཁོ་བོ་སྒེར་གྱི་སེམས་ཁོང་དུ་ཕངས་སེམས་དང་གྱོང་གུན་བསམ་གྱིས་མི་ཁྱབ་པ་ཞིག་ཏུ་གྱུར། ལུང་རྟོགས་ཀྱི་ཡོན་ཏན། གཞུང་ལུགས་རྒྱ་མཚོར་འཆད་རྩོད་རྩོམ་གསུམ་གྱིས་མཁས་པའི་མཛད་པ་མཐར་ཕྱིན་པ། འབྲེལ་ལམ་དང་མཛད་ཕྲིན། ཕ་ཡུལ་གཅིག་པའི་བརྩེ་སེམས་དང་། རིག་གཞུང་བགྲོ་གླེང་དང་དེབ་ཀྱི་སྔོན་གླེང་སོགས་ཀྱིས་འབྲེལ་བའི་རིག་གྲོགས་དམ་པ། སློབ་མ་གྲངས་མེད་ལ་ཤེས་རིག་གི་བདུད་རྩི་འབུལ་མཁན་གྱི་བཤེས་གཉེན་ཆེན་པོ། མྱ་ངན་དང་སྨོན་ལམ། ཁོང་གི་རླབས་ཆེན་གྱི་མཛད་རེས་ལ་རྗེས་དྲན་དང་། གཏན་གྱི་སྐྱབས་གནས་སུ་མྱུར་དུ་སྐྱེ་བ་བཞེས་ནས་ཡང་བསྐྱར་འགྲོ་བའི་དོན་མཛད་པའི་སྨོན་ལམ་ཞུ། ཁོང་གི་སྐུ་ཡི་བཀོད་པ་ཆོས་དབྱིངས་སུ་ཐིམ་ཡང་། ཐུགས་ཀྱི་ཡོན་ཏན། གསུང་གི་བདུད་རྩི། རིག་གཞུང་གི་འོད་སྣང་དང་རླབས་ཆེན་གྱི་མཛད་རེས་རྣམས་ང་ཚོའི་སེམས་ཁོང་དུ་གཏན་དུ་གནས་པར་ངེས། རིག་གྲོགས་གདོང་མཁན་པས། ༢༠༢༦/༨/༢༡/༩/༤༠ཏྲེ་ཧོར་རྒྱལ་ཡོངས་ལྷན་ཚོགས། See less
༈ ༸སྐྱབས་རྗེ་དམ་པ་མཁན་ཆེན་བསོད་ནམས་དར་རྒྱས་ཀྱི་
ཞབས་བརྟན་ཚེ་མཆོག་དཔལ་གཏེར་ ཅེས་བྱ་བ་བཞུགས་སོ།། ན་མོ་མ་ཧཱ་གུ་རུ་རཏྣ་པུནྱེ་ཏྲ་ཡཱ་ཡ།། ༼༡༽ ཀ་དག་གདོད་མའི་མགོན་པོ་ཀུན་ཏུ་བཟང་།། ལྷུན་གྲུབ་ཡེ་ཤེས་རོལ་གར་རྡོ་རྗེ་འཆང་།། བཅོམ་ལྡན་རིག་པའི་དབང་ཕྱུག་པདྨ་འབྱུང་།། ཆོས་རྗེ་ཡིད་བཞིན་ནོར་བུས་དགེ་ལེགས་སྩོལ།། ༼༢༽ བསོད་ནམས་ཡེ་ཤེས་ཚེ་དཔག་མེད་པའི་སྐུ།། ལུང་རྟོགས་བསྟན་པའི་བཤད་སྒྲུབ་སྤེལ་བའི་གསུང་།། རྒྱལ་ཀུན་ཡོན་ཏན་འཕྲིན་ལས་ཀུན་མཁྱེན་ཐུགས།། མཁན་ཆེན་དམ་པའི་བཞེད་དོན་ལྷུན་གྲུབ་ཤོག། ༼༣༽ དཀོན་མཆོག་རིན་ཆེན་གསུམ་གྱི་བདེན་སྟོབས་དང་།། རྩ་གསུམ་ཆོས་སྐྱོང་སྲུང་མའི་བྱིན་རླབས་དང་།། སྐུ་གསུམ་རྒྱལ་བའི་མཛད་པ་སྐྱོང་བའི་མགོན།། མ་ལུས་འགྲོ་བའི་དཔལ་དུ་ཞབས་བརྟན་ཤོག། ཅེས་པ་འདི་ཡང་རབ་གནས་ཟིལ་གནོན་ཞེས་པ་མེ་ཕོ་རྟ་ཡི་ལོ། སྣྲོན་ཟླའི་ཆོས་འཁོར་བསྐོར་བའི་དུས་བཟང་ངམ་མགོན་པོ་གང་གི་སྐུ་ཡི་འཁྲུངས་སྐར་ལ་རིག་འཛིན་ཀུན་བཟང་ཆོས་སྒྲོན་དང་རིག་འཛིན་དབྱངས་ཅན་ལྷ་མོ་དང་ཨེ་ཝྃ་རིག་འཛིན་དཔལ་སྒྲོལ་སོགས་དད་གུས་དག་སྣང་ཅན་གྱིས་བསྐུལ་ངོ་དང་འོད་གསལ་དག་སྣང་བའི་བར་གསེང་ནས་གང་ཤར་བ་ཉིད་ལ་བཅོས་བསྒྱུར་གང་ཡང་མེད་པར་ནུབ་ཕྱོགས་ཡོ་རོབ་སི་ལོ་ཝི་ནི་ཡའི་ཨེ་ཝྃ་ཀརྨ་ནོར་བུ་གླིང་ནས་རིག་འཛིན་དཔལ་དགྱེས་པ་རྡོ་རྗེ་རུ་འབོད་པས་སྨོན་ཚིག་ཏུ་བྲིས་པར་དགེའོ།། དགེའོ།། དགེའོ།། །།
འཛམ་གླིང་སྤྱི་བསང་གི་དུས་ཆེན་ངོ་སྤྲོད་མདོར་བསྡུས།
ཨེ་མ་ཧོ། ། གངས་ལྗོངས་ཀྱི་དབུས་གཙང་གི་གཙོ་བོར་གྱུར་པའི་ཡུལ་གྲུར་བོད་ཟླ་ ༥ ཚེས་ ༡༥ ཉིན་འཛམ་གླིང་སྤྱི་བསངས་ཞེས་པའི་དུས་སྟོན་གཏོང་སྲོལ་ཡོད་པ་འདི་ཉིད་ཀྱི་བྱུང་ཚུལ་ནི། སྤྱི་ལོའི་དུས་རབས་བརྒྱད་པའི་ནང་བཙན་པོ་ཁྲི་སྲོང་ལྡེའུ་བཙན་གྱིས་མཁན་ཆེན་ཞི་བ་འཚོ་དང་། སློབ་དཔོན་པདྨ་འབྱུང་གནས་བོད་དུ་གདན་དྲངས་ཏེ་བོད་ཀྱི་ལྷ་འདྲེ་གདུག་པ་ཅན་རྣམས་དམ་ལ་བཏགས་ནས་ལས་ལ་བསྐུལ་བས་བསམ་ཡས་མི་འགྱུར་ལུགས་གསུམ་ལྷུན་གྱིས་གྲུབ་པའི་གཙུག་ལག་ཁང་རྟེན་དང་བརྟེན་པར་བཅས་པ་གསར་བཞེངས་མཛད་སྐབས་ཉིན་མོ་མིས་བརྩིགས་པ་ལས་མཚན་མོ་ལྷ་འདྲེས་བརྩིགས་པ་མགྱོགས་པར་བྱུང་ནས་ལེགས་བསྒྲུབས་ཟིན་པའི་གཏང་རག་ཏུ་ཧད་པོ་རི་རྩེར་སློབ་དཔོན་རིན་པོ་ཆེས་རྒྱགས་རྔན་ལྷ་བསང་གི་འདོན་ཆོས་བརྩམས་ཏེ་བསང་མཆོད་ཀྱིས་གཟེངས་བསྟོད་རྒྱ་ཆེར་མཛད་པའི་དུས་ཚོད་དང༌། དུས་དེ་ནས་བཟུང་ལོ་ལྟར་བོད་ཟླ་ ༥ ཚེས་ ༡༥ ཉིན་འཛམ་གླིང་ཡོངས་ཀྱི་དཀར་ཕྱོགས་སྐྱོང་བའི་ལྷ་སྲུང་རྣམས་ལ་སྤྱི་བསངས་དང་གསོལ་མཆོད་བྱེད་པའི་སྲོལ་བཟང་འདི་ཉིད་དར་འཕེལ་བྱུང་བ་ཞིག་ཡིན། དབྱར་གསོལ་རྗེས་འབྲེལ་དགའ་སྟོན་གྱི་སླད་ལས་ཁུངས་སོ་སོས་སྤྲོ་ཆུང་ཉིན་གསུམ་ནས་ལྔའི་བར་གཏོང་སྲོལ་ཡོད་པ་བཅས་ཀྱི་ཐོག་དུས་དེར་ལྷ་ས་ཁུལ་དུ་གནམ་གཤིས་དྲོ་ལ་རྩི་ཤིང་ལོ་འདབ་རྒྱས་པ། མེ་ཏོག་བཞད་ཅིང་ཆར་རྒྱུན་གྱི་འགོ་ཚུགས་པ། ཁུ་བྱུག་གི་གྲེ་འགྱུར་རྣ་ལར་འཇེབས་པ། ཞིང་ལས་ལ་བྲེལ་འཚུབ་འཇགས་ཐོག་ཟས་རིགས་སོས་པ་ཁྲོམ་རར་དོན་པ་སོགས་ཀྱི་སྐབས་ཡིན་པས་གྲོང་ཁུལ་ཁོར་ཡུག་གི་གླིང་ཁ་རྣམས་སུ་དབྱར་སྐྱིད་སྤྲོ་གསེང་ལ་རོལ་བའི་སྐྱེ་བོ་རྣམས་གུར་རམ་རས་ཡོལ་གྱིས་བསྐོར་ནས་ཞིམ་མངར་བཟའ་བཏུང་ལ་རོལ་བཞིན་པར་སྙན་འཇེབས་ལྡན་པའི་རོལ་དབྱངས་ཀྱི་ཁྲོད་དུ་གཞས་དང་ཞབས་བྲོས་ཁེངས་པ་དང༌། ལ་ལས་གུར་ནང་ཞག་སྡོད་ཉིན་བཅུ་གྲངས་ཀྱང་བྱེད་སྲོལ་ཡོད། མཆོད་པ་ཆེན་པོ་བཞིའི་ཡ་གྱལ་དུ་གྱུར་པའི་མཛད་སྒོ་དེ་ནི་མི་ལོ་སྟོང་གི་གོང་སྟེ། མཁན་སློབ་ཆོས་གསུམ་གྱི་སྐུ་དུས་སུ། དཔལ་བསམ་ཡས་ལུགས་གསུམ་མི་འགྱུར་ལྷུན་གྱིས་གྲུབ་པའི་གཙུག་ཁང་ལག་ཁང་གསར་བཞེངས་ལེགས་གྲུབ་བྱུང་ནས། སྐྱེ་བོ་མཆོག་དམན་ཡོངས་ཀྱིས་དེ་ཕྱིར་དགའ་སྟོན་རྒྱ་ཆེ་གཟབ་རྒྱས་གནང་བ་དང་འབྲེལ། གུ་རུ་པད་མ་འབྱུང་གནས་ཀྱིས་ལྷ་སྲིན་གདུག་པ་ཅན་དམ་ལ་བཏགས་པའི་དུས་དང་བསྟུན་ནས། འཛམ་བུ་གླིང་གི་དཀར་ཕྱོགས་སྐྱོང་བའི་ལྷ་ཀླུ་ཡུལ་ལྷ་གཞི་བདག་ཀུན་ལ་བསང་གི་བརྔན་པའི་དུས་བཟང་དེར། འཛམ་གླིང་སྤྱི་བསང་ཞེས་སུ་གྲགས། ཤྲཱིས་སོ།།
༄༅།།ཐིག་ལེ་འཛིན་མེད་ཆོས་ཀྱི་དབྱིངས་སུ་ཐིམ།
༄༅།།ཐིག་ལེ་འཛིན་མེད་ཆོས་ཀྱི་དབྱིངས་སུ་ཐིམ། ཨེ་མ་ཧོ༔ ༼༡༽ ཀ་དག་དེ་བཞིན་ཉིད་ཀྱི་ཏིང་འཛིན་ལས།། ལྷུན་གྲུབ་ཀུན་སྣང་འོད་ཀྱིས་ཞིང་ཀུན་ཁྱབ།། ཨེ་ཝྃ་ཡེ་ཤེས་རིག་པའི་ཐིག་ལེ་ཉིད།། ཆོས་ཉིད་དབྱིངས་སུ་ཐིམ་པའི་རྟེན་འབྲེལ་ཤར།། ༼༢༽ སྣང་བ་ལྷ་རུ་ལྟ་བའི་བསྐྱེད་རིམ་གསལ།། གྲགས་པ་སྔགས་སུ་རྫོགས་པའི་རིམ་པར་གནས།། དྲན་པ་ཐུགས་རྗེ་རྫོགས་པ་ཆེན་པོའི་ངང་།། ཀུན་བཟང་ཀུན་ཁྱབ་ཐིག་ལེས་ཀློང་དུ་ཨ།། ༼༣༽ མཆོག་གསུམ་རིན་ཆེན་དམ་པའི་བྱིན་རླབས་དང་།། སྐུ་གསུམ་རྒྱལ་བ་རྒྱ་མཚོས་ཐུགས་རྗེ་དང་།། དད་གསུམ་མེ་ཏོག་བཀྲ་བའི་ཐིག་ལེའི་དབུས།། རྩ་གསུམ་ཆོས་སྐྱོང་འཕོ་ཆེན་སྐུ་འགྲུབ་ཤོག།། ཅེས་པ་འདི་ཡང་རབ་གནས་ཟིལ་གནོན་ཞེས་པ་མེ་རྟ་ལོའི་ས་ག་ཟླ་བའི་ཡར་ངོའི་རྒྱལ་བ་གསུམ་པར་རིག་འཛིན་ཐིག་ལེ་འཛིན་མེད་དགོངས་པ་ཆོས་དབྱིངས་སུ་བསྡུས་པའི་ཚེ་གང་ཤར་དུ་དེ་ཉིད་ཐོལ་སྨོན་དུ་རྨི་ལམ་དབང་ཕྱུག་གམ་ཤྲཱིཿ གླིང་པས་སོ།། 28/5/26.9.21PM
Alt Sidebar
Search
