• March 2019

    དབྱངས་གསལ་གྱི་སྦྲང་ཆར་ཟིལ་མ།

    དབྱངས་གསལ་གྱི་སྦྲང་ཆར་ཟིལ་མ།ན་མོ་གུ་རུ་ཨ་མྲི་ཏ་ཡེ།འབྱུང་བཞིའི་བསྐལ་པ་ཆགས་འཇིག་མ་བྱུང་གོང་།།གཉུག་མའི་ཡེ་ཤེས་གསལ་སྒྲིབ་མ་མཆིས་སྐབས།།ང་དང་ཁྱོད་ཀྱི་ཐ་སྙེད་མ་འདོགས་སྔོན།།ཀུན་བཟང་པདྨའི་བདུད་རྩི་ཨེ་མ་ཧོ།།ཤ་ཆང་རོ་བཅུད་ལྗགས་ལ་མ་སིམ་པར།།ངན་སོང་སྡུག་བསྔལ་སེམས་ལ་མ་ཚོར་བར།།དྲིན་ཆེན་ཕ་མའི་བྱམས་བརྩེ་མངར་མོས་བཅུད།།དལ་འབྱོར་ཡིད་བཞིན་ནོར་བུ་ཨེ་མ་ཧོ།།མཚོ་བྱུང་ལྷ་མོའི་ཞལ་རས་མ་མཇལ་སྔོན།།པི་ཝཾ་དབྱངས་རྟས་ལྷིང་འཇགས་མ་སད་ངང་།།དབྱངས་གསལ་མཛེས་མའི་འོ་འཛིན་རོལ་བའི་ཚེ།།གཏིང་མཐའ་བྲལ་པའི་དགའ་བདེ་ཨེ་མ་ཧོ།།ཕྱི་ནང་སྒྱུ་རྩལ་དག་ཞིང་མ་མཇལ་གོང་།།གྲོང་ཁྱིམ་སྒོ་ལམ་ཕྱུགས་དང་མ་བྲལ་སྔོན།།ཟབ་དོན་ལྟ་སྒོམ་བློ་ལ་མ་འཆར་ཡང་།།དྭངས་གཙང་སེམས་གཤིས་རིན་ཆེན་ཨེ་མ་ཧོ།།འཇིག་རྟེན་ཆོས་བརྒྱད་བློ་ལ་མ་འཁོར་དུས།།འཕགས་པའི་ནོར་བདུན་རྒྱུད་ལ་རང་འབྱོར་ནས།།ཕ་རོལ་ཕྱིན་དྲུག་སྤྱོད་པའི་ཕྲིན་ལས་དཔལ།།སྨན་ཆར་བདུད་རྩིས་འཁོར་འདས་མཛེས་གྱུར་ཅིག།ཞེས་པ་འདི་ཡང་རབ་གནས་ས་ཁྱིའི་རྒྱལ་ཟླའི་སྟོང་བ་གསུམ་པར་ཤྲཱིཿཨེ་མ་ཧོ་ནུབ་གླིང་ཝེལ་སི་གངས་ལྡན་རི་བོའི་ལྷོ་ངོགས་ཨེ་ཝཾ་རྫོགས་ཆེན་དུས་འཁོར་འོད་གསལ་རི་ཁྲོད་དུ་སྦྱར་བ་དགེའོ།། སྤྱི་ལོ་༢༠༡༩ ཟླ་༡ ཚེས་༤་ལའོ།།