• April 2021

    འདིར་དྲྭ་གྲོགས་ཡོངས་ནས་ཚིག་བདུན་གསོལ་འདེབས། ༡༠༠༽ སིདྡྷི་༡༠༠༽ མ་ཎི་༡༠༠༽ འོད་མཚན། ༡༠༠༽ བཅས་གསུང་རོགས། མཐར་ཀུན་བཟང་སྨོན་ལམ་དང་བཟང་སྤྱོད་ཚར་རེ་འདོན་རོགས། རྒྱ་གར་འཕགས་ཡུལ་ལ་རིམས་ནད་ཀྱི་ཛ་དྲག་སྐོར་ལ་མྱ་ངན་ཞུ་བ་དང་སྨོན་ལམ་བཟང་པོ་ཡོད།

  • April 2021

    སྔགས་མང་ལ་རྫོགས་ཆེན་བསྒོམ་པར་སྐུལ་བའི་མགུར་གླུ་གང་ཤར།

    སྔགས་མང་ལ་རྫོགས་ཆེན་བསྒོམ་པར་སྐུལ་བའི་མགུར་གླུ་གང་ཤར།      རང་བྱུང་སངས་རྒྱས་པད་མ་འབྱུང་གནས་དང་དབྱེར་མ་མཆིས་པའི་སྨན་རྒྱལ་གཡུ་ཐོག་ཡོན་ཏན་མགོན་པོ་ལ་ཕྱག་འཚལ་ལོ། མཆོད་དོ། སྐྱབས་སུ་མཆིའོ།། གདོད་མའི་མགོན་པོ་སྤྲོས་པ་དྲི་མ་མེད།།  ཁ་སྦྱོར་ཡན་ལག་བདེ་ཆེན་ཀློང་དུ་གྲོལ།། འཇའ་ལུས་རྡོ་རྗེའི་བདག་ཉིད་སྤྲུལ་བའི་སྐུ།།  ཀུན་བཟང་བླ་མས་དུས་རྟག་བྱིན་གྱིས་རློབས།། མཆོག་གསུམ་དབྱེར་མེད་གུ་རུ་རིན་པོ་ཆེ།།  སྐུ་གསུམ་བདག་ཉིད་རྩ་བའི་བླ་མ་དང་།། རྩ་གསུམ་དབྱེར་མེད་རྒྱུད་པའི་བླ་མའི་ཚོགས།།  བསླུ་མེད་སྐྱབས་གནས་ཡིན་ནོ་སྔགས་པ་ཚོ།། ཐུན་མོང་བློ་ལྡོག་རྣམ་བཞིས་བློ་སྦྱོང་ལ།།  ཐུན་མིན་སྔོན་འགྲོ་རྩ་གསུམ་མཐར་ཕྱིན་བསྙེན།། རྩ་རླུང་ཐིག་ལེའི་རྩལ་དང་བོགས་ཐོན་ནས།།  འོད་གསལ་རྫོགས་ཆེན་ཞུས་ཤིག་སྔགས་པ་ཚོ།། ཆོས་རྣམས་སེམས་ལ་འདུས་པའི་སེམས་ཀྱི་སྡེ།།  སྣང་སྲིད་ཆོས་ཉིད་ཀློང་འདུས་ཀློང་སྡེ་དང་།། འཁོར་འདས་དབྱེར་མེད་རང་གྲོལ་མན་ངག་སྡེ།།  རྫོགས་ཆེན་སྡེ་གསུམ་ཡིན་ནོ་སྔགས་པ་ཚོ།། ཞེ་སྡང་གཉེན་པོར་མ་ཧ་ཡོ་ག་བསྟན།།  འདོད་ཆགས་གཉེན་པོ་ཨ་ནུ་ཡོ་ག་ཡིན།། གཏི་མུག་རང་སངས་ཨ་ཏི་ཡོ་ག་སྟེ།།  རྒྱུད་མཐུན་ཉམས་སུ་ལོངས་ཤིག་སྔགས་པ་ཚོ།། སྔོན་བསགས་ལས་མེད་བསྟན་པ་འདིར་མི་མཇལ།།  རིག་ངོ་འཕྲོད་ནས་བསྐྱང་ན་མི་གྲོལ་མེད།། འཇིག་རྟེན་འཁོར་བར་བྲེལ་བ་ཆེ་བའི་དུས།།  རྫོགས་ཆེན་ངོ་སྤྲོད་དགོས་སོ་སྔགས་པ་ཚོ།། མཐོང་ན་ཞིང་པ་འབྲོག་པ་གྲོལ་བར་འགྱུར།།  མ་མཐོང་བླ་ཆེན་སྤྲུལ་སྐུ་འཁྲུལ་བར་འགྱུར།། རྟོགས་གྲོལ་ཅིག་ཅར་ཡེ་ཤེས་རྗེན་པ་འདི།།  མ་འཁྲུལ་སྐྱོང་ཤིག་ལས་ཅན་སྔགས་པ་ཚོ།། འཇིག་རྟེན་འཁོར་བ་བྲེལ་འཚུབ་ཆེ་བའི་དུས།།  ཉོན་མོངས་མང་ལ་རྩོད་ཉོག་དར་བའི་དུས།། སྣང་རིག་ཟང་ཐལ་ཅན་གྱི་རྫོགས་ཆེན་བསྒོམ།།  འདི་ཕྱི་གཉིས་ཀ་སྐྱིད་དོ་སྔགས་པ་ཚོ།། སྐྱེས་སྟོབས་ཤེས་རབ་མེད་ན་མེད་དུ་ཆུག།  སྦྱངས་པའི་ཡོན་ཏན་དམིགས་བསལ་དགོས་མ་ཡིན།།…

  • April 2021

    སྲིད་པའི་འབྱོར་བ་ལ་ཁའི་ན་བུན། །

    སྲིད་པའི་འབྱོར་བ་ལ་ཁའི་ན་བུན། ། འདུས་པའི་གཉེན་གྲོགས་ཚོང་འདུས་མགྲོན་པོ། ། མ་ངེས་སྐྱིད་སྡུག་མདང་གི་རྨི་ལམ། ། བསམ་ཞིང་བསམ་ན་སྙིང་པོ་མི་འདུག །  རྒྱུས་མེད་གཤིན་རྗེ་ཕོ་ཉས་ཁྲིད་ནས། ། ཕྱི་མའི་འཕྲང་རིང་འགྲིམ་པའི་གྲོགས་ལ། ། སྐྱབས་ཀྱི་དམ་པ་རྩ་གསུམ་ལྷ་ཡིས། ། ཐུགས་རྗེའི་སྤྱན་གྱིས་སྐྱེལ་མ་མཛོད་ཅིག ། སྐྱེས་ནས་འཆི་བ་འཁོར་བའི་ཆོས་ཉིད། ། བསྒྱུར་དུ་མེད་པ་སྒྱུ་མའི་རང་མདངས། ། མི་བཟློག་གཤིན་རྗེ་རྒྱལ་པོའི་བཀའ་ཡིག ། ཉམ་ཆུང་གྲོགས་ཀྱི་སྟེང་དུ་སླེབས་སོང་། ། སྔོན་སྨོན་ལས་ཀྱི་ཆར་ཟིམ་བབས་ཚེ། ། ཡོད་ཡོད་འདྲ་བའི་དགུང་གི་འཇའ་ཚོན། ། དུང་སེམས་ཉི་མ་གསལ་དུ་སོང་ཚེ། ། མི་མཐོང་ནམ་མཁའི་དབྱིངས་སུ་ཡལ་སོང་། ། ན་གཞོན་ལང་ཚོའི་མེ་ཏོག་རྒྱས་དུས། ། ཡིད་ཀྱི་ཆུ་བོ་གཅིག་ཏུ་འདྲེས་པའི། ། འདྲིས་འདྲིས་ཆུང་གྲོགས་སེམས་ཀྱི་ཚེར་མ། ། ད་ལྟ་རིགས་དྲུག་གང་དུ་ཡོད་ན། །…

  • April 2021

    སྲིད་གསུམ་རྣམ་རྒྱལ་དུས་ཆེན།

    སྲིད་གསུམ་རྣམ་རྒྱལ་དུས་ཆེན། 三界尊胜殊胜日 དེ་རིང་བོད་ཟླ་གསུམ་པའི་ཚེས་བཅོ་ལྔ་ནི་དགེ་སྡིག་གང་བསྒྲུབ་བྱེ་བར་འགྱུར་བའི་སངས་རྒྱས་འོད་དཔག་མེད་ཀྱི་དུས་ཆེན་ཡིན་པ་མ་ཟད། དགེ་སྡིག་གང་བསྒྲུབ་བྱེ་བ་ཁྲིར་འགྱུར་བའི་མཉམ་མེད་ཐུབ་པའི་དབང་པོས་དཔལ་ལྡན་འབྲས་སྤུངས་མཆོད་རྟེན་དུ་དུས་འཁོར་ཆེན་མོའི་རྒྱུད་གསུངས་པའི་དུས་ཆེན་ཡང་ཡིན་པས་ཅི་ནུས་ནས་རྣམ་དཀར་དགེ་བའི་ལས་ལ་འབད་པར་ཞུ། དེ་ཡང་སྨན་རྩིས་ཁང་གི་ལོ་ཐོའི་ནང་འཁོད་པ་ལྟར། བོད་ཟླ་གསུམ་པའི་ཚེས་བཅོ་ལྔ་ནི་རྒྱལ་བས་དུས་འཁོར་གསུངས་པའི་དུས་ཆེན་རེད། དེ་ཡང་བདག་གཅག་གི་སྟོན་པ་ཐུགས་རྗེ་ཅན་དེ་ཉིད་དགུང་ལོ་སོ་དྲུག་པའི་ས་ག་ཟླ་བའི་ཚེས་བཅོ་ལྔ་ལ་གནས་མཆོག་རྡོ་རྗེ་གདན་དུ་བྱང་ཆུབ་ཏུ་མངོན་པར་རྫོགས་པའི་ཕྱི་ལོའི་ནག་པ་ཟླ་བའི་ཉ་ལ།  རྒྱ་གར་ལྷོ་ཕྱོགས་དཔལ་གྱི་རི་དང་ཉེ་ཁུལ་དུ་ཡོད་པའི་དཔལ་ལྡན་འབྲས་དཀར་སྤུངས་པའི་མཆོད་རྟེན་གྱི་བུམ་པའི་ནང་དུ།  བྱང་ཤམ་བྷ་ལའི་ཆོས་རྒྱལ་ཟླ་བ་བཟང་པོས་སེམས་ཅན་ཐམས་ཅད་ཀྱིས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་འགྲུབ་པའི་དོན་དུ་ཞུས་པ་བཞིན།  ཆོས་རྒྱལ་ཟླ་བ་བཟང་པོས་གཙོ་བྱས་པའི་ཤམ་བྷ་ལའི་སྐལ་ལྡན་གྱི་གདུལ་བྱ་རྣམས་ལ་སྟོན་པ་སངས་རྒྱས་ཀྱིས་ཐོག་མར་དུས་འཁོར་རྩ་རྒྱུད་གསུངས་པ་རེད། དཔལ་དུས་ཀྱི་འཁོར་ལོའི་ནང་དོན་དང་ཕན་ཡོན།  དུས་འཁོར་ཀྱི་ནང་དོན་ནི།  ཕྱི་ནང་གཞན་གསུམ་དུས་ཀྱི་འཁོར་ལོ་ཡི། །ཞེས་གསུངས་པ་ལྟར།  དུས་འཁོར་ལ་ཕྱི་དུས་ཀྱི་འཁོར་ལོ་དང༌། ནང་དུས་ཀྱི་འཁོར་ལོ།  གཞན་དུས་ཀྱི་འཁོར་ལོ་བཅས་གསུམ་ཡོད་ལ།  དེ་ཡང་ཕྱི་དུས་ཀྱི་འཁོར་ལོ་ནི།  ཟླ་བ་བཅུ་གཉིས་དང་ཞག་མ་སུམ་བརྒྱ་དྲུག་ཅུ་སོགས་ནི་དུས་དང༌།  ལོ་འཁོར་གཅིག་ལ་དེ་དག་འཁོར་བས་དུས་འཁོར་ཞེས་བརྗོད་པ་དང༌། དེས་མཚོན་ནས་ཉི་ཟླ་རྒྱུ་སྐར་གྱི་འཁོར་ཚུལ་ཡང་དེའི་ནང་དུ་འདུས་ཡོད།  ནང་དུས་ཀྱི་འཁོར་ལོ་ནི་མིའི་ལུས་ཀྱི་རྩ་རླུང་ཐིག་ལེ་ཁམས་ལ་སོགས་པ་ཉིན་ཞག་གཅིག་ལ་དེ་དག་འཁོར་བས་ནང་དུས་ཀྱི་འཁོར་ལོ་ཞེས་བརྗོད།  གཞན་དུས་ཀྱི་འཁོར་ལོ་ནི་གཞལ་ཡས་ཁང་དང་ཡི་དམ་གྱི་ལྷ་ལ་སོགས་པ་ཟུང་དུ་འབྲེལ་ནས་གསང་སྔགས་ཀྱི་ལྷ་སྒོམ་ཚུལ་ལ་བཤད་པ་ཞིག་ཡིན།  ཡང་ན།  ཕྱི་འཇིག་རྟེན་ཁམས་ཀྱི་ཉི་ཟླ་རྒྱུ་སྐར་སོགས་ཀྱི་འཁོར་ཚུལ་རྣམས་ནང་དུ་མིའི་ལུས་ཀྱི་འབྱུང་བ་ལྔ་དང་རྩ་རླུང་ཐིག་ལེ་བཅས་ཀྱི་ཆགས་ཚུལ་ངེས་ཅན་ཡོད་པ་དང་ཟུང་འབྲེལ་བྱས་ནས་གསང་སྔགས་ཀྱི་ལམ་སྒོམ་ཚུལ་བཤད་པ་ཡིན།  དེ་ལྟར་དཔལ་དང་པོའི་སངས་རྒྱས་དུས་ཀྱི་འཁོར་ལོའི་དཀྱིལ་འཁོར་ལ་བརྟེན་ནས་བདག་ཉིད་འཇུག་ཅིང་ཉམས་སུ་བླངས་པ་ལས།  ལམ་བསྐྱེད་རྫོགས་ཡན་ལག་དང་བཅས་པ་ལ་དབང་བ་དང་།  ཐིག་ལེ་རིགས་བཞིའི་སྟེང་གི་མ་དག་པའི་སྒྲིབ་པ་བཞི་སྦྱངས་ནས་རྡོ་རྗེ་བཞི་འགྲུབ་པའི་ནུས་པ་ཁྱད་པར་ཅན་འཇོག་ལ།   ལྷག་པའི་ལྷ་ཡི་མཚན་མའི་མཐུས་གནས་སྐབས་བར་ཆད་ཞི་ཞིང་།  ཆོས་མཐུན་གྱི་བསམ་པ་ཡིད་བཞིན་དུ་འགྲུབ་པ།  འཛམ་གླིང་ཡངས་པའི་ཁྱོན་ལ་ནད་མུག་འཁྲུག་རྩོད་སོགས་ཞི་ནས་ཞི་བདེའི་དཔལ་ལ་ལོངས་སུ་སྤྱོད་པ་དང་།  མཐར་ཐུག་ཕྱི་མར་རིག་འཛིན་གྱི་གནས་ཤམ་བྷ་ལའི་ཞིང་མཆོག་ཏུ་སྐྱེ་བའམ་རིགས་ལྡན་ཉེར་ལྔ་བ་དྲག་པོ་འཁོར་ལོ་ཅན་གྱིས་ཀླ་ཀློ་རྨག་མེད་དུ་བཅོམ་པའི་མཐར།  སླར་ཡང་སྔགས་ཀྱི་བསྟན་པ་ཉི་མ་ལྟར་གསལ་བར་མཛད་པའི་དུས་དེར་སྐྱེས་ནས་རིགས་ལྡན་དངོས་ལས།  དཔལ་དུས་ཀྱི་འཁོར་ལོའི་དབང་ལུང་མན་ངག་དང་བཅས་པའི་གསུང་གི་བདུད་རྩི་དངོས་མྱོང་བ་ལ་བརྟེན་ནས།  དཔལ་དང་པོའི་སངས་རྒྱས་ཀྱི་གོ་འཕང་མངོན་དུ་བྱེད་པ་སོགས་གནས་སྐབས་དང་མཐར་ཐུག་གི་ཕན་ཡོན་བསམ་གྱིས་མི་ཁྱབ་པའོ།། མཚན་སྔགས་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་དཔལ་དུས་ཀྱི་འཁོར་ལོ་ལ་ཕྱག་འཚལ་ལོ།། མཆོད་དོ་སྐྱབས་སུ་མཆིའོ།།

  • April 2021

    ༄༅།།ཨོ་རྒྱན་གུ་རུ་རིན་པོ་ཆེའི་གསོལ་འདེབས་

    ༄༅།།ཨོ་རྒྱན་གུ་རུ་རིན་པོ་ཆེའི་གསོལ་འདེབས་ བསམ་དོན་ལྷུན་གྲུབ་ཡིད་བཞིན་ནོར་བུ།། ན་མོ་མ་ཧཱ་གུ་རུ་པདྨ་ཀ་ར་ཡེ།། སྣང་སྲིད་རྣམ་དག་ཟངས་མདོག་དཔལ་རི་ནས།། སྐྱབས་གནས་ཀུན་འདུས་ཨོ་རྒྱན་པདྨ་འབྱུང་།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སྤྱི་བོ་བདེ་ཆེན་དག་པའི་དཀྱིལ་འཁོར་ནས།། བླ་མ་ཀུན་འདུས་ཨོ་རྒྱན་རིན་པོ་ཆེ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  མགྲིན་པ་ལོངས་སྤྱོད་འཁོར་ལོའི་དཀྱིལ་འཁོར་ནས།། ཡི་དམ་ཀུན་འདུས་རྡོ་རྗེ་གོ་ཁྲབ་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སྙིང་ཁར་འདབ་བརྒྱད་ཆོས་ཀྱི་དཀྱིལ་འཁོར་ནས།། མཁའ་འགྲོ་ཀུན་འདུས་གསང་བ་ཡེ་ཤེས་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  ལྟེ་བ་སྒྱུ་འཕྲུལ་སྤྲུལ་བའི་དཀྱིལ་འཁོར་ནས།། ཆོས་སྐྱོང་ཀུན་འདུས་གེ་སར་རྒྱལ་པོ་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  གསང་གནས་མཁའ་སྤྱོད་འོད་ལྔའི་དཀྱིལ་འཁོར་ནས།། སངས་རྒྱས་ཀུན་འདུས་པདྨ་འབྱུང་གནས་ལ།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  ཕྱི་ཡི་བར་ཆད་འབྱུང་བཞིའི་གཡོ་འཁྲུག་བཟློག། ནང་གི་བར་ཆད་སེམས་ཀྱི་སྡུག་བསྔལ་སོལ།། གསང་བའི་བར་ཆད་སེམས་དང་སེམས་བྱུང་གྲོལ།།  བསམ་དོན་ཡིད་བཞིན་འགྲུབ་པར་བྱིན་གྱིས་རློབས།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སངས་རྒྱས་བསྟན་པ་དར་ཞིང་རྒྱས་པར་ཤོག། སེམས་ཅན་ཐམས་ཅད་བདེ་ཞིང་སྐྱིད་པར་ཤོག། རང་གཞན་དོན་གཉིས་ལྷུན་གྱིས་འགྲུབ་པར་ཤོག། འགྲོ་ཀུན་ཀུན་བཟང་གོ་འཕང་མྱུར་ཐོབ་ཤོག།…

  • April 2021

    ༄༅།།གཏེར་སྟོན་ཆེ་ཡོས་རིག་འཛིན་ཆེན་པོའམ་གཏེར་རྒན་འཇིགས་མེད་སྣ་ཚོགས་རང་གྲོལ་རིན་པོ་ཆེའི་མཛད་རྣམ་རགས་བསྡུས་བཞུགས་སོ།

    ༄༅།།གཏེར་སྟོན་ཆེ་ཡོས་རིག་འཛིན་ཆེན་པོའམ་གཏེར་རྒན་འཇིགས་མེད་སྣ་ཚོགས་རང་གྲོལ་རིན་པོ་ཆེའི་མཛད་རྣམ་རགས་བསྡུས་བཞུགས་སོ། དེ་ཡང་གཏེར་སྟོན་ཆེ་ཡོས་རིག་འཛིན་ཆེན་པོ་ནི། སྔར་སྡེ་དགེའི་སྲིད་སྐྱོང་གོང་མ་ཞིག་གི་རིང་ལ། ཨ་པོའི་བན་སྐྱ་ལྔ་ཞེས་པའི་དཔའ་མཛངས་རྟུལ་ཕོད་ཅན། འགྲན་ཟླ་མ་མཆིས་ཤིང་གཞན་སྡེ་ཟིལ་གྱིས་གནོན་པའི་བུ་སྤུན་ལྔ་བྱུང་བ། སྤུན་འདི་ལྔ་བོས་ས་སྐྱོང་སྡེ་དགེའི་ཆབ་སྲིད་ལ་ཞབས་འདེགས་ཆེ་ངོས་ཞུས་པས། སྡེ་དགེའི་ས་སྐྱོང་དཔོན་པོ་ཐུགས་མཉེས་ཏེ། ཨ་པོ་སྤུན་ལྔའི་རིགས་རྒྱུད་རྣམས་ལ་རྩི་མཐོང་ཆེ་འཇོག་བྱས་ཏེ་ཅི་འདོད་དུ་གནས་ཆོག་པའི་བཀའ་ཡིག་དང་བདག་རྐྱེན་བསྩལ། སྤུན་དེ་ལྔའི་ནང་གི་ཨ་པོ་ཆེ་ཡོས་ཀྱི་བརྒྱུད་པར། ཨ་པོ་ནོར་ཚེ་ཟེར་བའི་མི་དྲག་འབྱོར་ལྡན་ཞིག་བྱུང་བ་ལ། བཀྲ་པ་དང་སྔོ་ཕྲུག་ཟེར་བའི་བུ་གཉིས་བྱུང་། དེའི་ཕྱི་མ་སྔོ་ཕྲུག་ལ་བུ་སྤུན་གཉིས་བྱུང་བ་ལས། ཆེ་བ་རྟ་མགྲིན་མགོན་པོ་ནི། གཏེར་སྟོན་ཆེ་ཡོས་རིག་འཛིན་ཆེན་པོའི་ཡབ་ཡིན་ལ། མ་ཡུམ་ཨ་ཚབ་བཟའ་བོ་དགའ་ཞེས་བ་གཉིས་ཀྱི་སྲས་སུ་། ཁམས་རི་བོ་ཆེ་དང་ཉེ་བའི་ལུང་བཟང་སྟོད་ཅེས་པའི་དྲུང་དུ། རབ་བྱུང་བཅུ་གསུམ་པའི་མེ་འབྲུག་(སྤྱི་ལོ་༡༧༩༦) ལོར་སྐུ་འཁྲུངས། སྐུ་ན་ཕྲ་བའི་དུས་ནས་བཟུང་། ཨོ་ཊི་ཡ་ནའི་རིག་འཛིན་ཆེན་པོ་དངོས་ཉམས་རྨི་ལམ་ཅི་རིགས་པར་ཞལ་གཟིགས་ཤིང་ལུང་བསྟན་མང་དུ་མཛད། སྐུ་ཆུང་དུས་དེར་ས་སྐྱའི་དགོན་པ་ཞིག་ཏུ་བཞུགས་ནས་སློབ་གཉེར་གནང་།  སྐུ་ན་ཅུང་ཟད་རྒྱས་ནས་ཕྱག་ཚ་རྟོགས་ལྡན་འཇིགས་མེད་ཆོས་དབྱིངས་རང་གྲོལ་ལོ་གསུམ་དུ་བསྟེན་ཞིང་ཟབ་ཆོས་མང་པོ་ཞུས་པ་དང་། ལྷུན་གྲུབ་སྒང་བ་དཔལ་ལྡན་རྒྱ་མཚོ་སོགས་བླ་མ་དེ་དག་གི་སྤྱན་སྔར། སྔ་འགྱུར་གྱི་དབང་བཀའ་དུ་མ་དང་། ཡེ་ཤེས་བླ་མའི་ཟབ་ཁྲིད་སོགས་གསན། ལུང་བསྟན་དུས་བབས་བཞིན། འཁྲུངས་ཡུལ་དང་ཉེ་བར། འབྲི་ར་སྤུན་གསུམ་དང་ལུག་སྟོད་བྲག་དཀར་སོགས་སུ་དམ་རྫས་དང་ལྷའི་སྣང་བརྙན་མང་བོ། གཞན་ཡང་ཕྱག་རྡོར་སྒྲུབ་སྐོར་སོགས་ཟབ་ཆོས་སྣ་ཚོགས་བཅས་གཏེར་ནས་བཞེས། ཕྱག་ཚ་རྟོགས་ལྡན་འཇིགས་མེད་ཆོས་དབྱིངས་རང་གྲོལ་གྱིས་དབང་བཀའ་མང་པོ་གནང་མཐར། གསང་མཚན་ འཇིགས་མེད་ཆོས་འབྱིངས་རང་གྲོལ་ཞེས་བསྩལ་ཞིང་མདོ་སྨད་དུ་འགྲོ་དོན་སྐྱོང་བར་ཕེབས་རྒྱུའི་བཀའ་གནང་བ་དང་།  སྔར་སྡེ་དགེའི་ཚོང་དཔོན་གཡུ་རྣའི་སྲས་མོ། སྲི་བཅོལ་ནས་ཕྱག་ཚ་རིན་པོ་ཆེའི་མདུན་དུ་བཞག་ཡོད་པའི་མཁའ་འགྲོ་ཀུན་དགའ་ཆོས་སྒྲོན་ལགས། གཏེར་སྟོན་རིག་འཛིན་པའི་རིགས་མར་བསྩལ་ནས། མདོ་སྨད་དུ་རྫོང་བདའ་མཛད་སྐབས།  ལུང་བསྟན་བསྩལ་བ་ནི།  Imageཞེས་བཀའ་ལུང་འགྱུར་བ་མེད་པས་གཙུག་ཏུ་དབང་བསྐུར་བ་ལྟར། གཏེར་སྟོན་རིག་འཛིན་ཡབ་ཡུམ་མདོ་སྨད་ཕྱོགས་སུ་ཞབས་ཐང་ལ་བྱོན་པའི་ལམ་དུ། རྡོ་གྲུབ་ཆེན་ཀུན་བཟང་གཞན་ཕན་དང་མཇལ་ནས།…