• June 2021

    ༄༅།།འཛམ་གླིང་ཞི་བདེའི་རླུང་རྟའི་སྨོན་ལམ་

    ༄༅།།འཛམ་གླིང་ཞི་བདེའི་རླུང་རྟའི་སྨོན་ལམ་ དྲི་མེད་གསེར་གྱི་འཁོར་ལོ་རིན་པོ་ཆེ་ ཞེས་བྱ་བ་བཞུགས་སོ།། ན་མོ་མ་ཧཱ་གུ་རུ་བུདྡྷ་ཛྙཱ་ན་པདྨ་ཀ་ར་ཡེ།། ༼༡༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ འཛམ་གླིང་དག་པའི་ཞིང་མཆོག་དཔལ་རི་ནས།། འཛམ་བུ་གླིང་དུ་འགྲོ་བའི་དོན་མཛད་པའི།། འཛམ་གླིང་ཆོས་ཀྱི་རྒྱལ་པོ་རིན་པོ་ཆེས།། འཛམ་གླིང་ཞི་བདེའི་རླུང་རྟ་ཡར་ལ་སྒྲོན།། ༼༢༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ རྒྱལ་བ་ཀུན་འདུས་ཨོ་རྒྱན་པདྨ་འབྱུང་།། གསོལ་བ་འདེབས་སོ་སྙིགས་དུས་འགྲོ་ཀུན་སྐྱོབས།། ལས་ཀྱི་སྟོབས་རྣམས་ཡོངས་སུ་དག་བྱེད་ཅིང།། རྣམ་སྨིན་རིག་འཛིན་དགའ་བའི་རླུང་རྟ་རྒྱལ།། ༼༣༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ སངས་རྒྱས་སྨན་བླ་ཨོ་རྒྱན་པདྨ་འབྱུང་།། གསོལ་བ་འདེབས་སོ་ནད་གདོན་ཞི་བར་མཛོད།། ཉོན་མོངས་སྟོབས་རྣམས་ཀུན་ཏུ་འཇོམས་པར་བྱེད།། ཚེ་དབང་རིག་འཛིན་མཆོག་གི་རླུང་རྟ་རྒྱལ།། ༼༤༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ སྣང་སྲིད་ཟིལ་གནོན་ཨོ་རྒྱན་པདྨ་འབྱུང་།། གསོལ་བ་འདེབས་སོ་ཚེ་བསོད་རྒྱས་པར་མཛོད།། བདུད་ཀྱིས་སྟོབས་རྣམས་སྟོབས་མེད་རབ་བྱེད་ཅིང་།། ཕྱག་ཆེན་རིག་འཛིན་དབང་དྲག་རླུང་རྟ་རྒྱལ།། ༼༥༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔  རྡོ་རྗེ་གོ་ཁྲབ་ཨོ་རྒྱན་པདྨ་འབྱུང་།། གསོལ་བ་འདེབས་སོ་གསང་གསུམ་སྲུང་བས་གཏམས།། བཟང་པོ་སྤྱོད་པའི་སྟོབས་ནི་རྫོགས་པར་བགྱི།། ལྷུན་གྲུབ་རིག་འཛིན་སྐྱེས་དགའི་རླུང་རྟ་རྒྱལ།། ༼༦༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ རྒྱལ་ལོ་རྒྱལ་ལོ་དཀོན་མཆོག་གསུམ་པོ་རྒྱལ།། རྒྱལ་ལོ་མཁའ་འགྲོ་དཔལ་མགོན་ལྷ་ཚོགས་རྒྱལ།། རྒྱལ་ལོ་འགྲོ་བ་རིགས་དྲུག་ཚིམས་པས་རྒྱལ།། རྒྱལ་ལོ་བགེགས་རིགས་ལན་ཆགས་བྱང་བས་རྒྱལ།། ༼༧༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ རྒྱལ་ཀུན་ཞི་རྒྱས་དབང་དྲག་ལས་ཀུན་རྒྱལ།། རྒྱལ་མཚན་འཛམ་གླིང་ཞི་བདེའི་རླུང་རྟ་རྒྱལ།། རྒྱལ་ཀུན་མཆོད་དང་འགྲོ་བའི་སྨིན་གྲོལ་རྒྱལ།། རྒྱལ་ཁམས་ཕྱོགས་ལས་རྣམ་པར་རྒྱལ་གྱུར་ཅིག། ༼༨༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཆོས་ཉིད་དོན་དམ་རྒྱལ་བའི་བདེན་པ་དང་།། ཆོས་ཅན་ཀུན་རྫོབ་འཁོར་བའི་རྟེན་འབྲེལ་ལས།། ཆོས་བཞིན་སྤྱོད་པའི་སྔ་འགྱུར་བསྟན་པ་ཉིད།། ཆོས་དབྱིངས་རབ་འབྱམས་ཁམས་ཀུན་ཁྱབ་གྱུར་ཅིག།། ༼༩༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔    སྟེང་ན་རིག་འཛིན་བརྒྱུད་པའི་བྱིན་རླབས་བཀྲ།། བར་ན་ཡི་དམ་ལྷ་ཡིས་དངོས་གྲུབ་ཤིས།། མཐའ་འཁོར་མཁའ་འགྲོ་ཆོས་སྐྱོང་ཕན་བདེས་ལེགས།། འཛམ་གླིང་ཞི་བདེའི་རླུང་རྟ་དཀར་པོ་རྒྱལ།། ༼༡༠༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཕྱི་སྣོད་དག་པ་འབྱུང་བའི་རང་བཞིན་བརྟས།། ནང་བཅུད་རྫོགས་པ་ཡེ་ཤེས་དཀྱིལ་འཁོར་ཤར།། གསང་བ་སྨིན་གྲོལ་གདམས་པའི་ལམ་བཟང་རྒྱལ།། རྒྱལ་ལོ་གུ་རུ་ཡིད་བཞིན་ནོར་བུ་རྒྱལ།། ༼༡༡༽ སངས་རྒྱས་ཀུན་འདུས་པདྨའི་ཉི་མ་ཤར།། དམ་ཆོས་ཀུན་འདུས་རྫོགས་ཆེན་ཟླ་བ་ཚེས།། དགེ་འདུན་ཀུན་འདུས་ཀུན་མཁྱེན་ཕྲིན་ལས་རྒྱས།། འཛམ་གླིང་ཞི་བདེའི་སྣང་བ་རྟག་བརྟན་ཤོག། ཞེས་པ་འདི་ཡང་རབ་གནས་ལྕགས་གླིང་སྣྲོན་ཟླ་བའི་ཡར་ཚེས་བཅོ་ལྔ་སྟེ་འཛམ་གླིང་སྤྱི་བསང་ཆེན་མོ་ཞེས་ཡོངས་སུ་གྲགས་པའི་ཉི་མ་བཟང་པོ་ལ་༸སྐྱབས་རྗེ་བླ་མ་དམ་པ་སྒོ་ཆེན་མཆོག་སྤྲུལ་གསང་སྔགས་བསྟན་འཛིན་རིན་པོ་ཆེས་བཀའ་དགོངས་བསྩལ་བ་བཞིན་དུ་འཛམ་གླིང་ཡུལ་གྲུ་ཀུན་ཏུ་འཛམ་གླིང་ཞི་བདེའི་རླུང་རྟ་སྒྲོན་ཞིང་། ཁྱད་པར་རང་གིས་འབོད་བསྐུལ་བཞིན་དུ་ཁྲ་ཕུ་འཛམ་གླིང་ལ་རྩེ་ནས་ཁྲ་ལྗོངས་ལྷ་སྡེ་ཕྱུག་མོས་བསྟན་པའི་སྤྱི་རིམ་ཆེན་མོ་འཚོགས་པ་དང་། ངོས་ལ་ཤིན་ཏུ་དད་དང་དམ་ཚིག་གི་སྙིང་ཉེ་བའི་དགེ་འདུན་འཕགས་པའི་ལྷ་སྡེ་དགོན་གྲྭ་ཡོངས་ནས་འཛམ་གླིང་ས་ཕྱོགས་གང་སར་ཕྲིན་ལས་ཀུན་བཟང་གི་མཛད་པ་སྤེལ་བ་ལ་ཡི་རང་བཅས་རང་སྣང་གང་ཤར་སྨོན་ཚིག་ཏུ་རྡོལ་བ་འདི་ཉིད་དབྱིན་ཡུལ་རི་བོ་གངས་ལྡན་གྱི་མཁའ་དཔལ་ཀུན་རིག་གི་ཨེ་ཝཾ་རྫོགས་ཆེན་ཆོས་སྒར་ནས་མཁན་ཆེན་བླ་མ་འམ་ཨེ་མ་ཧོས་སྙིང་ནས་གསོལ་བ་འདེབས་པ་དེ་དེ་བཞིན་དུ་འགྲུབ་པར་གྱུར་ཅིག་གུ།། ཤྲཱིཿསརྦ་ལོ་ཀ་བི་ཛ་ཡནྟུ།། །།

  • June 2021

    སྨོན་བསྡུས་འཆི་མེད་ཀུན་བཟང་རྒྱལ་མོ།།

    སྨོན་བསྡུས་འཆི་མེད་ཀུན་བཟང་རྒྱལ་མོ།། ཨོཾ་ཨཱཿཧཱུཾ་ཧྲཱིཿ སྣང་སྲིད་རྣམ་དག་བླ་མའི་དཀྱིལ་འཁོར་ལ།། སྣང་སྲིད་ཀུན་བཟང་མཆོད་སྤྲིན་རྒྱ་མཚོར་འབུལ།། སྣང་སྲིད་ཐམས་ཅད་སྨིན་གྲོལ་དཔལ་ལ་སྤྱོད།། སྣང་སྲིད་རིག་པའི་ངོ་བོར་སངས་རྒྱས་ཤོག། སྣང་བ་དག་པ་ཞིང་ཁམས་མངོན་སུམ་མཐོང་།། སྲིད་པ་ལྷ་ཡི་ཞལ་མཇལ་དངོས་གྲུབ་ཐོབ།། སྣང་སྲིད་བདེ་ཆེན་ཡེ་ཤེས་རྩལ་རྒྱས་ནས།། སྣང་སྲིད་ཕྱག་རྒྱས་རང་བཞིན་བྱང་ཆུབ་ཤོག། སྣང་བ་ཚོགས་དྲུག་རང་གྲོལ་རྒྱན་དུ་དག། སྲིད་པ་ལྷ་དང་ལྷ་མོའི་རྩལ་དུ་རྫོགས།། སྣང་སྲིད་ཕན་བདེའི་རོལ་བ་ཀུན་ལ་སྨིན།། སྣང་སྲིད་ཕྲིན་ལས་ཐུགས་རྗེ་ཀུན་ཁྱབ་ཤོག། ཅེས་པ་རབ་གནས་ལྕགས་གླང་སྣྲོན་ཟླའི་དཀར་ཕྱོགས་རྒྱལ་བ་གསུམ་པར་བརྩེ་བའི་ཡུམ་ཆེན་འཆི་མེད་རྒྱལ་མོས་ངོར་ཨེ་མ་ཧོས་ད་བྲིས་ད་སྤེལ་བགྱིས་པར་དགེའོ།།

  • June 2021

    ཨོ་རྒྱན་པདྨ་འབྱུང་གནས་ཀྱི་པད་ཞྭ་མཐོང་གྲོལ་གྱི་བརྡ་དོན་

    ཨོ་རྒྱན་པདྨ་འབྱུང་གནས་ཀྱི་པད་ཞྭ་མཐོང་གྲོལ་གྱི་བརྡ་དོན་ ཡིད་བཞིན་ནོར་བུའི་གཙུག་ཏོར་ཅེས་བྱ་བ་བཞུགས་སོ།། ན་མོ་མ་ཧཱ་གུ་རུ་པདྨ་ཀ་ར་ཡེ།། ༼༡༽ ཀ་དག་སྤྲོས་བྲལ་བླ་མ་ཆོས་དབྱིངས་ལས།། ལྷུན་གྲུབ་འོད་གསལ་སྙིང་པོ་ལོངས་སྤྱོད་རྫོགས།། ཟུང་འཇུག་རིག་པའི་དབང་ཕྱུག་སྤྲུལ་པའི་སྐུ།། ཀུན་འདུས་པདྨ་ཀ་རས་བདག་སོགས་སྐྱོངས།། ༼༢༽ པདྨ་རྒྱལ་པོའི་པད་ཞྭ་མཐོང་གྲོལ་རྩལ།། ཞྭ་དབྱིབ་བཟླུམ་འཁྱིལ་ཆོས་སྐུ་ཉག་གཅིག་བརྡའ།། མཐའ་བསྐོར་འཇའ་འོད་སྣ་ལྔས་རིགས་ལྔ་མཚོན།། འབྲས་ཆོས་ཉེར་ལྔས་ཕན་དར་སྟེང་དུ་གསལ།། ༼༣༽ ཕྱོགས་མདོག་ནང་མས་སྤྲུལ་སྐུའི་ཕྲིན་ལས་དང་།། སོག་གུར་ལྟ་བུས་མཚམས་བཅད་སྲུང་མའི་བརྡར།། ཞྭ་ཀླད་མཐིང་མདོག་ཀུན་ཁྱབ་རིག་པ་ལ།། ལྕགས་རིའི་འཁོར་ཡུག་གསེར་རྐུད་དམ་ཚིག་འབྲེལ།། ༼༤༽ ལིང་ཚེའི་མདུན་ངོས་རིན་ཆེན་སྣ་ལྔས་མཛེས།། རིགས་ལྔ་ཡབ་ཡུམ་སྲོག་སྔགས་གཟེར་བས་སྡོམ།། འགྱུར་མེད་རྡོ་རྗེ་ཏོག་དང་ཕྲིན་ལས་ཀུན།། བྱ་རྒྱལ་རྒོད་ཀྱི་རྩེ་སྒྲོས་རྣམ་པར་རྒྱན།། ༼༥༽ ཕྱོགས་མཚམས་སྣ་ལྔས་འཇའ་རིས་བཀྲ་བ་ནི།། ཕྱི་ལྟར་འབྱུང་ལྔ་ནང་དུ་རིགས་ལྔ་དང་།། གསང་བ་མཁའ་འགྲོ་སྡེ་ལྔའི་དཔེ་དོན་དང་།། ཡང་གསང་རྩ་གནས་ལུས་ཀྱི་དྲྭ་བར་མཚོན།།  ༼༦༽ ཞྭ་རྣ་ཅོད་པན་ཁ་དོག་སྣ་ལྔ་ཉིད།། ཕྱི་ལྟར་འདོད་ཡོན་ཡེ་ཤེས་རྩལ་དུ་གོ། ནང་ལྟར་མདོ་སྔགས་ཐེག་པའི་བདེ་བ་མྱོང་།། གསང་བ་འཁོར་འདས་དབྱེར་མེད་རྟོགས་པའོ།། ༼༧༽ མདུན་གྱི་ཞྭ་རྩེ་རྣམ་གསུམ་ངོམས་པ་ནི།། ཕྱི་ལྟར་སྒོ་གསུམ་དགརྫོགས་སྨིན་པའི་བརྡའ།། ནང་དུ་སྡོམ་གསུམ་རྡོ་རྗེ་འཛིན་པའི་རྟགས།། གསང་བ་ཁམས་འགྲོ་ཀུན་འདྲེན་པར་མཚོན།། ༼༨༽ ཞྭ་རྩེའི་མཐའ་འཁོར་འཇའ་མཚོན་དྲུག་རིས་ཀུན།། ཀུན་བཟང་ཕྱིན་དྲུག་སྤྱོད་པའི་ལྕགས་རི་མཚོན།། ནང་དུ་ཚོགས་དྲུག་ངོ་བོ་ཉིད་གྲོལ་བརྡའ།། གསང་བ་སྒྲོལ་མ་དྲུག་གི་རང་བཞིན་ནོ།། ༼༩༽ རྡོ་རྗེའི་ཏོག་གི་རྩ་བ་འཁོར་ལོས་བརྒྱན།། ཞྭ་ནང་པདྨ་ཆོས་འབྱུང་དཀྱིལ་འཁོར་བཀྲ།། འཁོར་འདས་ཟུང་འཇུག་རྟེན་འབྲེལ་དེ་ཁོ་ན།། ཨེ་ཝཾ་ཉི་ཟླ་ནཱ་དའི་དགེ་མཚན་འབར།། ༼༡༠༽ པད་ཞྭ་ཕྱི་ལྟར་དྲི་མེད་པདྨ་མཚོན།། ནང་ལྟར་རིགས་བདག་པདྨ་འབྱུང་གནས་མཚོན།། གསང་བ་སྙིང་རྗེ་ཤེས་རབ་རྒྱས་པར་མཚོན།། ཡང་གསང་སངས་རྒྱས་པདྨ་སམ་བྷ་ཝ།། ༼༡༡༽ པད་ཞྭ་ཉིད་ལ་མཆོག་གསུམ་སྐྱབས་གནས་ཚང་།། ནང་དུ་རྩ་གསུམ་རྒྱལ་བའི་དཀྱིལ་འཁོར་རྫོགས།། གསང་བ་སྐུ་གསུམ་ཐུགས་རྗེའི་ཕྲིན་ལས་དང་།། ཡང་གསང་རྣམ་ཐར་གསུམ་ལྡན་དེ་ཉིད་དོ།། ༼༡༢༽ མཐོང་གྲོལ་པད་ཞྭ་པདྨ་འདབ་ལྡན་གྱི།། བརྡ་དོན་རིག་པའི་ཡེ་ཤེས་མེ་ལོང་འདི།། བསམ་འགྲུབ་བླ་མས་བསྐུལ་བའི་ངོར།། ཤྲཱིཿསྨྱོན་ཨེ་མ་ཧོ་ཡིས་ཐོལ་བྲིས་བགྱིས།། ཞེས་པ་འདི་ཡང་རབ་གནས་ལྕགས་གླང་སྣྲོན་ཟླའི་ཚེ་བཅུའི་ཉིན་མཁའ་འགྲོ་གུ་རུ་མཚོ་མོ་དང་བླ་མ་བསམ་འགྲུབ་རིན་ཆེན་གྱིས་བརྡ་སྐུལ་ལས་དེ་ཉིད་དུ་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་ཨེ་མ་ཧོས་རྣམ་རྟོག་ཆོས་སྐུའི་འདྲ་འབག་ཏུ་ཕུལ་བར་དགེའོ།། །།

  • June 2021

    ཨ་ནེ་སྒྲོལ་མ་ཆོས་སྒྲོན་བདེ་བའི་སྨོན་ལམ་ཡེ་ཤེས་ཀྱི་མེ་ལོང་།།

    ཨ་ནེ་སྒྲོལ་མ་ཆོས་སྒྲོན་བདེ་བའི་སྨོན་ལམ་ཡེ་ཤེས་ཀྱི་མེ་ལོང་།། ཨེ་མ་ཧོ།། ཚུལ་ཁྲིམས་རྣམ་དག་ཆོས་སྤྱོད་བཅུ་ལ་བརྩོན།། ཏིང་འཛིན་ཡང་དག་ཆོས་དབྱངས་སྙན་པར་མགུར།། ཤེས་རབ་ཀུན་བཟང་ངང་དུ་མཉམ་བཞགས་ཐུགས།། སྒྲོལ་མ་ཆོས་སྒྲོན་འཁོར་འདས་དཔལ་དུ་ཤོག། ཕྱི་ལྟར་བཙུན་མ་རབ་བྱུང་ཆས་གོས་གསོལ།། ནང་ལྟར་སྦས་པའི་རྣལ་འབྱོར་རྗེ་བཙུན་མ།། གསང་བ་ཀུན་བཟང་ངང་དུ་བྱང་ཆུབ་པ།། ཨ་ནེ་སྒྲོན་ཆོས་ས་ལམ་མཐར་ཕྱིན་ཤོག། ཆུང་ནས་དད་དང་སྙིང་རྗེ་ལྷན་སྐྱེས་མངའ།། ཆེ་ནས་ཆོས་ལམ་དགོངས་པ་མཐར་ཕྱིན་ནས།། ཐུགས་དམ་དྲང་པོར་བཞུགས་ལ་གསོལ་བ་འདེབས།། བསྟན་འགྲོའི་མགོན་དུ་སླར་ཡང་མྱུར་བྱོན་སྨོན།། ཞེས་པ་འདི་ཡང་རབ་གནས་ལྕགས་གླང་ས་ག་ཟླ་བའི་དབང་ཕྱོགས་མཁའ་འགྲོ་འདུ་བའི་དུས་ཆེན་ལ་ཨ་ནེ་སྒྲོལ་མ་ཆོས་སྒྲོན་ཉིད་གློ་བུར་དུ་སྔ་གྲོ་ཆུ་ཚོད་དྲུག་པ་ཙམ་ལ་ཚོགས་གྲལ་ནས་དབུ་མཛོད་གནང་ནས་བཀྲ་ཤིས་བརྒྱད་པ་ཚར་གསུམ་གྱི་མཐའ་མ་བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག། ཅེས་དྲིལ་བུ་བཅད་མཚམས་བཞག་པ་དང་དེ་ཀ་རང་ལ་ཐུགས་དམ་ངང་ལ་མཉམ་པར་བཞགས་སོང་ཞེས་ཐུགས་དམ་ལ་བཞུགས་པར་ཐོས་པའི་མོད་ལ་ཨེ་མ་ཧོས་སྨོན་པར་དགེའོ། ། །། སྤྱི་ལོ་༢༠༢༡ ཟླ་བ ༦ ཚེས་༤ ལ། བོད་རྒྱལ་ལོ། ༢༡༤༨ ཟླ་བ་༤ ཚེས ༢༥ ལའོ།།༼མཆན༽ ད་དུང་ཡང་ཐུགས་དམ་བཞུགས་ཡོད། དེ་ཡང་སྐུ་གདུང་ཤིན་ཏུ་གསང་བ་བྱས་ཏེ་བཞག་ན་ཡང་ངོས་ལ་ཡ་མཚན་པ་ཞིག་ལ་རྨི་ལམ་གསལ་ཐག་ཆོད་པ་ཞིག་རྨིས། གང་ལྟར་ཉིན་གཉིས་ཀྱི་མཚམས་སུ་སྤྲུལ་སྐུ་ངང་ཆུང་ལས་སྐད་དེ་གསལ་བོ་ཐོས། འཕྲིན་ལམ་ལས་སྤྲུལ་སྐུ་ཨ་ཉ་དགྲ་འདུལ་ལ་འབྲེལ་བཤད་ཆ་འཕྲིན་བྱས། རིམ་གྱིས་གནས་ནང་སྤྲུལ་སྐུ་ཆོས་བཀྲ་དང་། མཁན་ཆེན་བཤད་སྒྲུབ་རྒྱ་མཚོ་ལ་འབྲེལ་ནས་དངོས་ཡོད་བདེན་པ་ར་སྤྲོད་བྱུང་། མདོར་ན་གློ་བུར་དུ་སྐྱེན་པོའི་མཁའ་སྤྱོད་མཁའ་འགྲོའི་གླིང་ནས་བཙུན་མ་སྒྲོན་ཆོས་ཞིང་དུ་ཕེབས་པ་ལ་སྐྱེན་པོ་སྡེ་དགོན་ཡོངས་ལ་མྱ་ངན་དང་ཁྱད་པར་སྨན་ལྷ་ཚང་ལ་མྱ་ངན་ཞུ་བ་དང་ཚོགས་བསགས་བྱས་ཡོད་ཞུ་བ་དེ་ཡིན། ཚེས་བཅུ་ལ་སྐུ་གདུང་མཆོད་འབུལ་རེད། ཨེ་ཧོས་གུ་རུ་རྡོ་རྗེ་གོ་ཁྲབ་ཀྱི་ཐུན་མཚམས་ནས་ད་བྲིས་ད་སྤེལ།

  • June 2021

    ༄༅། །ཞབས་བརྟན་སྨོན་ཚིག་འཆི་མེད་རྔ་སྒྲ་བཞུགས་སོ། །  

    ༄༅། །ཞབས་བརྟན་སྨོན་ཚིག་འཆི་མེད་རྔ་སྒྲ་བཞུགས་སོ། །   སྟོན་ཁའི་མཁའ་ལ་གཟའ་སྐར་ཤར་འདྲ་བའི།  ། བཀའ་བརྒྱད་བདུན་བརྒྱ་ཉེར་ལྔའི་ལྷ་ཚོགས་ཀྱི།  ། ཞི་རྒྱས་དབང་དྲག་འཕྲིན་ལས་ཚད་མེད་པས།  ། བསྟན་འཛིན་སྐྱེས་བུའི་སྐུ་ཚེ་བསྲིང་བར་མཛོད།  ། ཨོ་རྒྱན་མཁའ་འགྲོའི་གསང་མཛོད་གཏེར་གྱི་ཆོས།  །    ཤེས་རབ་རང་བྱུང་སྒྲོན་མེའི་རྩལ་ལས་ཤར།  ། པདྨའི་རྒྱལ་ཚབ་སྟག་ཤམ་སྤྲུལ་པའི་སྐུ།  ། འཇིགས་བྲལ་སྦས་པའི་རྡོ་རྗེ་ཞབས་བརྟན་ཤོག  ། ཁམས་གསུམ་ཟིལ་གནོན་རིག་པའི་རྒྱལ་ས་ཟིན།  ། སྣང་སེམས་སྒྱུ་མའི་འཁོར་ལ་རང་དབང་བསྒྱུར།  ། པདྨ་རྒྱལ་པོ་ཉིད་དང་དབྱེར་མེད་དུ།  ། བྱིན་རླབས་རྒྱ་མཚོའི་གཏེར་དུ་ཞབས་བརྟན་ཤོག  ། སྣང་སྲིད་དག་པར་ཤར་བས་འདུལ་ཁྲིམས་གཙང་།  ། ཚད་མེད་བྱང་ཆུབ་སེམས་ལ་རང་དབང་འབྱོར།  ། ཤཱཀྱ་སེངྒེ་ཉིད་དང་དབྱེར་མེད་དུ།  ། མདོ་སྔགས་བསྟན་པའི་བདག་པོར་ཞབས་བརྟན་ཤོག  ། ནམ་མཁའ་ལྟ་བུའི་ཆོས་ཉིད་དོན་རྟོགས་ནས། ། མ་ལུས་ཤེས་བྱའི་ཆོས་ཀུན་སྒྲིབ་མེད་གསལ།  ། བློ་ལྡན་མཆོག་སྲེད་ཉིད་དང་དབྱེར་མེད་དུ།  ། བླུན་རྨོངས་འགྲོ་བའི་སྒྲོན་མེར་ཞབས་བརྟན་ཤོག  ། དགའ་བཞིའི་འགྲོས་ཀྱིས་ས་ལམ་ཐོད་བརྒལ་བྱས།  ། འདོད་ཡོན་མ་སྤངས་ཚོགས་གཉིས་གྲོགས་སུ་བསྒྱུར།  ། མཚོ་སྐྱེས་རྡོ་རྗེ་ཉིད་དང་དབྱེར་མེད་དུ།  ། གནས་གསུམ་མཁའ་འགྲོའི་གྲོགས་སུ་ཞབས་བརྟན་ཤོག  ། པདྨའི་ཐ་ཚིགས་བཀའ་ལ་མི་ཉན་པའི།  ། སྡེ་བརྒྱད་འབྱུང་པོའི་མགོ་བོ་རྡོག་པས་ནོན།  ། རྡོ་རྗེ་གྲོ་ལོད་ཉིད་དང་དབྱེར་མེད་དུ།  ། བདུད་སྲིན་དམ་སྲིའི་གཤེད་དུ་ཞབས་བརྟན་ཤོག  ། སྨོན་ལོག་ཀླ་ཀློའི་བྱད་ཀ་དབྱིངས་སུ་བཟློག  ། བསྟན་པའི་དགྲ་བོའི་ཚེ་སྲོག་ཕུར་རྩེས་བཞེས།  ། སེངྒེ་སྒྲ་སྒྲོག་ཉིད་དང་དབྱེར་མེད་དུ།  ། བསྟན་འགྲོའི་དཔལ་མགོན་དམ་པར་ཞབས་བརྟན་ཤོག  ། ཆོས་བརྒྱད་འཁྲུལ་བའི་རྟོག་པ་ཟིལ་གྱིས་མནན།  ། བརྟུལ་ཞུགས་སྤྱོད་པས་སྣང་སེམས་དབང་དུ་བསྡུས།  ། ཉི་མ་འོད་ཟེར་ཉིད་དང་དབྱེར་མེད་དུ།  ། སྙིགས་ལྔའི་མུན་སེལ་ཉིད་དུ་ཞབས་བརྟན་ཤོག  ། འབྲེལ་ཚད་འགྲོ་ལ་ཐར་བའི་ས་བོན་བཞག  ། འཕྲིན་ལས་རྣམ་བཞིས་བསྟན་པའི་ཉམས་རྒུད་གསོས།  ། པདྨ་སམ་བྷ་ཉིད་དང་དབྱེར་མེད་དུ།  ། རྗེ་འབངས་ཉེར་ལྔའི་ཚབ་ཏུ་ཞབས་བརྟན་ཤོག  ། ཡོ་བྱད་རེ་ལ་བསྟན་སྲུང་དམ་ཅན་འཁོར།  ། སྐྲ་རྩེ་རེ་ན་མཁའ་འགྲོའི་བརྡ་གླུ་ལེན།  ། རས་དཀར་ནབ་བཟར་དཔའ་བོའི་བྱིན་གཡང་ཆགས།  ། བཤད་སྒྲུབ་བསྟན་འཛིན་དམ་པ་ཞབས་བརྟན་ཤོག  ། མཚུངས་མེད་བླ་མའི་སྐུ་ཚེ་ཡུན་དུ་བརྟན། …

  • June 2021

    ཆོས་མཆེད་ཀྱི་བཀའ་ལན་ལ་སྤྲིངས་ཡིག་གསེར་གྱི་མེ་ཏོག

    ཆོས་མཆེད་ཀྱི་བཀའ་ལན་ལ་སྤྲིངས་ཡིག་གསེར་གྱི་མེ་ཏོག ཀྱེ་ཀྱེ་ཨ་ལ་ལ་ཧོ།། ༼༡༽ ཞལ་ནས་མཚམས་རེ་མདོ་མེད་ཡིན་ཟེར་ནས།། འདུ་ཤེས་གསུམ་པ་ཟེར་ནས་རང་ལ་སྨད།། མཚམས་རེ་རང་སྣང་གང་ཤར་ཤྲཱིཿསྨྱོན་ལ།། ཅི་དྲན་གང་དྲན་བརྗོད་པར་དྲན་སོང་ངམ།། ༼༢༽ མཁས་དབང་འཛིན་མཚམས་ནམ་མཁའི་ནོར་བུ་ཟེར།། ཆོས་མཆེད་བརྩེ་གདུང་ཅན་ལ་ཐེར་འདོན་ཟེར།། རྒྱལ་བསྟན་གཙང་སེལ་འཁན་ལ་བདེན་ཁ་སྟེར།། ཆེ་མཐོའི་ཞབས་ནས་བལྡག་པར་མ་ཡིན་ནམ།། ༼༣༽ སངས་རྒྱས་དངོས་མཐོང་དད་པ་ལྟ་ཅི་སྨྲོས།། གྲུབ་རྫུན་རེད་ཟེར་ལོག་ལྟས་འགེངས་པའི་ཚེ།། བཏང་སྙོམས་ལུང་མ་བསྟན་ལ་འཇོགས་བཞག་ན།། དབལ་འབྲུག་དམ་པས་སྙིང་ནས་བཟོད་ཕོད་དམ།། ༼༤༽ བདེན་ཡང་རྫུན་མ་ཟེར་ནས་སྡིགས་ར་འཐེན།། བྱམས་ཡང་རལ་བ་ཟེར་ནས་ངན་སྨད་བྱེད།། བརྩེ་ཡང་ངོ་དགའ་ཟེར་ནས་ལོང་གཏམ་སྤེལ།། བྱ་བྲལ་དམ་པས་དབྱིངས་ནས་གཟིགས་ལགས་སམ། ༼༥༽ ཐ་སྙད་ཤེས་བྱར་གོ་ནོར་མ་འཐེབ་ན།། མཁས་དབང་རྫ་ཚེས་གསུངས་ལ་བདེན་ཁ་སྒྲོན།། དམ་ཚིག་ཟོལ་ཟོག་མེད་པའི་སྔ་འགྱུར་བར།། རབ་སྔགས་ཁྲག་བཞིན་དཀྲུག་པ་མཐོང་ལགས་སམ།། ༼༦༽ མཐོན་པོ་རིགས་དུས་གཉའ་བ་སྒུ་རུ་རུ།། ཉམས་ཆུང་མགོ་ལ་རྐང་བརྫིས་བྱེད་པའི་དུས།། ལྷག་བསམ་ངོ་ལྐོག་ཌཱ་རུ་དཀྲོལ་བ་ལ།། བདེན་པའི་རྒྱལ་རྔ་རྡུང་བ་ཅུང་བདེན་ནམ།། ༼༧༽ བལྟས་པ་ཙམ་གྱིས་སྐྱོན་གླེང་འུ་རུ་རུ།། མཐོང་བ་ཙམ་གྱིས་ངན་སྨད་ཤ་ར་ར།། ཚོར་བ་མེད་པའི་ཟུར་ཟ་ཐ་ར་ར།། མཆེད་ལྕམ་ནང་གི་དམ་ཚིག་འདི་ཡིན་ནམ།། ༼༨༽ ཨ་ལ་ཀུ་རེ་མིན་ནོ་སྙིང་གི་གྲོགས།། ཨ་ཅང་རྩེད་མོ་མིན་ནོ་དམ་ཚིག་ཅན།། ཨ་ཁ་གཟེར་རེ་ཅན་ཞིག་མིན་ན་ཡང་།། ཨ་མའི་བུ་ཚོས་གོ་མྱོང་རྟོགས་ཕྱིར་ཕུལ།། བཀྲ་ཤིས་རྟགས་བརྒྱད་ཚང་བའི་ཐོལ་རྩོམ་འདི།། བདེ་ལེགས་ཚེ་རབས་འགྲོག་པའི་མཆེད་ལྕམ་བར།། ཕུན་ཚོགས་དམ་ཚིག་ཟབ་མོའི་འཚམས་འདྲི་བཅས།། དཔའ་བོ་འབྲོང་ཚ་མཆོག་ལ་ཨེ་ཧོས་སྤྲིངས།། བོད་རྒྱལ་ལོ། ༢༡༤༨ ཟླ་༥་ཚེས་༡་ལ།  སྤྱི་ལོ། ༢༠༢༡/༦/༡༡་ལའོ།།