• April 2021

    སྲིད་གསུམ་རྣམ་རྒྱལ་དུས་ཆེན།

    སྲིད་གསུམ་རྣམ་རྒྱལ་དུས་ཆེན། 三界尊胜殊胜日 དེ་རིང་བོད་ཟླ་གསུམ་པའི་ཚེས་བཅོ་ལྔ་ནི་དགེ་སྡིག་གང་བསྒྲུབ་བྱེ་བར་འགྱུར་བའི་སངས་རྒྱས་འོད་དཔག་མེད་ཀྱི་དུས་ཆེན་ཡིན་པ་མ་ཟད། དགེ་སྡིག་གང་བསྒྲུབ་བྱེ་བ་ཁྲིར་འགྱུར་བའི་མཉམ་མེད་ཐུབ་པའི་དབང་པོས་དཔལ་ལྡན་འབྲས་སྤུངས་མཆོད་རྟེན་དུ་དུས་འཁོར་ཆེན་མོའི་རྒྱུད་གསུངས་པའི་དུས་ཆེན་ཡང་ཡིན་པས་ཅི་ནུས་ནས་རྣམ་དཀར་དགེ་བའི་ལས་ལ་འབད་པར་ཞུ། དེ་ཡང་སྨན་རྩིས་ཁང་གི་ལོ་ཐོའི་ནང་འཁོད་པ་ལྟར། བོད་ཟླ་གསུམ་པའི་ཚེས་བཅོ་ལྔ་ནི་རྒྱལ་བས་དུས་འཁོར་གསུངས་པའི་དུས་ཆེན་རེད། དེ་ཡང་བདག་གཅག་གི་སྟོན་པ་ཐུགས་རྗེ་ཅན་དེ་ཉིད་དགུང་ལོ་སོ་དྲུག་པའི་ས་ག་ཟླ་བའི་ཚེས་བཅོ་ལྔ་ལ་གནས་མཆོག་རྡོ་རྗེ་གདན་དུ་བྱང་ཆུབ་ཏུ་མངོན་པར་རྫོགས་པའི་ཕྱི་ལོའི་ནག་པ་ཟླ་བའི་ཉ་ལ།  རྒྱ་གར་ལྷོ་ཕྱོགས་དཔལ་གྱི་རི་དང་ཉེ་ཁུལ་དུ་ཡོད་པའི་དཔལ་ལྡན་འབྲས་དཀར་སྤུངས་པའི་མཆོད་རྟེན་གྱི་བུམ་པའི་ནང་དུ།  བྱང་ཤམ་བྷ་ལའི་ཆོས་རྒྱལ་ཟླ་བ་བཟང་པོས་སེམས་ཅན་ཐམས་ཅད་ཀྱིས་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་འགྲུབ་པའི་དོན་དུ་ཞུས་པ་བཞིན།  ཆོས་རྒྱལ་ཟླ་བ་བཟང་པོས་གཙོ་བྱས་པའི་ཤམ་བྷ་ལའི་སྐལ་ལྡན་གྱི་གདུལ་བྱ་རྣམས་ལ་སྟོན་པ་སངས་རྒྱས་ཀྱིས་ཐོག་མར་དུས་འཁོར་རྩ་རྒྱུད་གསུངས་པ་རེད། དཔལ་དུས་ཀྱི་འཁོར་ལོའི་ནང་དོན་དང་ཕན་ཡོན།  དུས་འཁོར་ཀྱི་ནང་དོན་ནི།  ཕྱི་ནང་གཞན་གསུམ་དུས་ཀྱི་འཁོར་ལོ་ཡི། །ཞེས་གསུངས་པ་ལྟར།  དུས་འཁོར་ལ་ཕྱི་དུས་ཀྱི་འཁོར་ལོ་དང༌། ནང་དུས་ཀྱི་འཁོར་ལོ།  གཞན་དུས་ཀྱི་འཁོར་ལོ་བཅས་གསུམ་ཡོད་ལ།  དེ་ཡང་ཕྱི་དུས་ཀྱི་འཁོར་ལོ་ནི།  ཟླ་བ་བཅུ་གཉིས་དང་ཞག་མ་སུམ་བརྒྱ་དྲུག་ཅུ་སོགས་ནི་དུས་དང༌།  ལོ་འཁོར་གཅིག་ལ་དེ་དག་འཁོར་བས་དུས་འཁོར་ཞེས་བརྗོད་པ་དང༌། དེས་མཚོན་ནས་ཉི་ཟླ་རྒྱུ་སྐར་གྱི་འཁོར་ཚུལ་ཡང་དེའི་ནང་དུ་འདུས་ཡོད།  ནང་དུས་ཀྱི་འཁོར་ལོ་ནི་མིའི་ལུས་ཀྱི་རྩ་རླུང་ཐིག་ལེ་ཁམས་ལ་སོགས་པ་ཉིན་ཞག་གཅིག་ལ་དེ་དག་འཁོར་བས་ནང་དུས་ཀྱི་འཁོར་ལོ་ཞེས་བརྗོད།  གཞན་དུས་ཀྱི་འཁོར་ལོ་ནི་གཞལ་ཡས་ཁང་དང་ཡི་དམ་གྱི་ལྷ་ལ་སོགས་པ་ཟུང་དུ་འབྲེལ་ནས་གསང་སྔགས་ཀྱི་ལྷ་སྒོམ་ཚུལ་ལ་བཤད་པ་ཞིག་ཡིན།  ཡང་ན།  ཕྱི་འཇིག་རྟེན་ཁམས་ཀྱི་ཉི་ཟླ་རྒྱུ་སྐར་སོགས་ཀྱི་འཁོར་ཚུལ་རྣམས་ནང་དུ་མིའི་ལུས་ཀྱི་འབྱུང་བ་ལྔ་དང་རྩ་རླུང་ཐིག་ལེ་བཅས་ཀྱི་ཆགས་ཚུལ་ངེས་ཅན་ཡོད་པ་དང་ཟུང་འབྲེལ་བྱས་ནས་གསང་སྔགས་ཀྱི་ལམ་སྒོམ་ཚུལ་བཤད་པ་ཡིན།  དེ་ལྟར་དཔལ་དང་པོའི་སངས་རྒྱས་དུས་ཀྱི་འཁོར་ལོའི་དཀྱིལ་འཁོར་ལ་བརྟེན་ནས་བདག་ཉིད་འཇུག་ཅིང་ཉམས་སུ་བླངས་པ་ལས།  ལམ་བསྐྱེད་རྫོགས་ཡན་ལག་དང་བཅས་པ་ལ་དབང་བ་དང་།  ཐིག་ལེ་རིགས་བཞིའི་སྟེང་གི་མ་དག་པའི་སྒྲིབ་པ་བཞི་སྦྱངས་ནས་རྡོ་རྗེ་བཞི་འགྲུབ་པའི་ནུས་པ་ཁྱད་པར་ཅན་འཇོག་ལ།   ལྷག་པའི་ལྷ་ཡི་མཚན་མའི་མཐུས་གནས་སྐབས་བར་ཆད་ཞི་ཞིང་།  ཆོས་མཐུན་གྱི་བསམ་པ་ཡིད་བཞིན་དུ་འགྲུབ་པ།  འཛམ་གླིང་ཡངས་པའི་ཁྱོན་ལ་ནད་མུག་འཁྲུག་རྩོད་སོགས་ཞི་ནས་ཞི་བདེའི་དཔལ་ལ་ལོངས་སུ་སྤྱོད་པ་དང་།  མཐར་ཐུག་ཕྱི་མར་རིག་འཛིན་གྱི་གནས་ཤམ་བྷ་ལའི་ཞིང་མཆོག་ཏུ་སྐྱེ་བའམ་རིགས་ལྡན་ཉེར་ལྔ་བ་དྲག་པོ་འཁོར་ལོ་ཅན་གྱིས་ཀླ་ཀློ་རྨག་མེད་དུ་བཅོམ་པའི་མཐར།  སླར་ཡང་སྔགས་ཀྱི་བསྟན་པ་ཉི་མ་ལྟར་གསལ་བར་མཛད་པའི་དུས་དེར་སྐྱེས་ནས་རིགས་ལྡན་དངོས་ལས།  དཔལ་དུས་ཀྱི་འཁོར་ལོའི་དབང་ལུང་མན་ངག་དང་བཅས་པའི་གསུང་གི་བདུད་རྩི་དངོས་མྱོང་བ་ལ་བརྟེན་ནས།  དཔལ་དང་པོའི་སངས་རྒྱས་ཀྱི་གོ་འཕང་མངོན་དུ་བྱེད་པ་སོགས་གནས་སྐབས་དང་མཐར་ཐུག་གི་ཕན་ཡོན་བསམ་གྱིས་མི་ཁྱབ་པའོ།། མཚན་སྔགས་ནི། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མགོན་པོ་དཔལ་དུས་ཀྱི་འཁོར་ལོ་ལ་ཕྱག་འཚལ་ལོ།། མཆོད་དོ་སྐྱབས་སུ་མཆིའོ།།

  • April 2021

    ༄༅།།ཨོ་རྒྱན་གུ་རུ་རིན་པོ་ཆེའི་གསོལ་འདེབས་

    ༄༅།།ཨོ་རྒྱན་གུ་རུ་རིན་པོ་ཆེའི་གསོལ་འདེབས་ བསམ་དོན་ལྷུན་གྲུབ་ཡིད་བཞིན་ནོར་བུ།། ན་མོ་མ་ཧཱ་གུ་རུ་པདྨ་ཀ་ར་ཡེ།། སྣང་སྲིད་རྣམ་དག་ཟངས་མདོག་དཔལ་རི་ནས།། སྐྱབས་གནས་ཀུན་འདུས་ཨོ་རྒྱན་པདྨ་འབྱུང་།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སྤྱི་བོ་བདེ་ཆེན་དག་པའི་དཀྱིལ་འཁོར་ནས།། བླ་མ་ཀུན་འདུས་ཨོ་རྒྱན་རིན་པོ་ཆེ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  མགྲིན་པ་ལོངས་སྤྱོད་འཁོར་ལོའི་དཀྱིལ་འཁོར་ནས།། ཡི་དམ་ཀུན་འདུས་རྡོ་རྗེ་གོ་ཁྲབ་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སྙིང་ཁར་འདབ་བརྒྱད་ཆོས་ཀྱི་དཀྱིལ་འཁོར་ནས།། མཁའ་འགྲོ་ཀུན་འདུས་གསང་བ་ཡེ་ཤེས་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  ལྟེ་བ་སྒྱུ་འཕྲུལ་སྤྲུལ་བའི་དཀྱིལ་འཁོར་ནས།། ཆོས་སྐྱོང་ཀུན་འདུས་གེ་སར་རྒྱལ་པོ་ལ།། གསོལ་བ་འདེབས་སོ་མཆོག་ཐུན་དངོས་གྲུབ་སྩོལ།། བསམ་དོན་ཡིད་བཞིན་འགྲུབ་པར་བྱིན་གྱིས་རློབས།། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  གསང་གནས་མཁའ་སྤྱོད་འོད་ལྔའི་དཀྱིལ་འཁོར་ནས།། སངས་རྒྱས་ཀུན་འདུས་པདྨ་འབྱུང་གནས་ལ།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  ཕྱི་ཡི་བར་ཆད་འབྱུང་བཞིའི་གཡོ་འཁྲུག་བཟློག། ནང་གི་བར་ཆད་སེམས་ཀྱི་སྡུག་བསྔལ་སོལ།། གསང་བའི་བར་ཆད་སེམས་དང་སེམས་བྱུང་གྲོལ།།  བསམ་དོན་ཡིད་བཞིན་འགྲུབ་པར་བྱིན་གྱིས་རློབས།།  ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔  སངས་རྒྱས་བསྟན་པ་དར་ཞིང་རྒྱས་པར་ཤོག། སེམས་ཅན་ཐམས་ཅད་བདེ་ཞིང་སྐྱིད་པར་ཤོག། རང་གཞན་དོན་གཉིས་ལྷུན་གྱིས་འགྲུབ་པར་ཤོག། འགྲོ་ཀུན་ཀུན་བཟང་གོ་འཕང་མྱུར་ཐོབ་ཤོག། ཨོཾ་ཨཱ་ཧཱུྃཿབཛྲ་གུ་རུ་པདྨ་སིདྡྷི་ཧཱུྃ༔ ཞེས་པ་འདི་ཡང་རབ་གནས་ལྕགས་གླང་གི་ནག་པ་ཟླ་བའི་སྲིད་གསུམ་རྣམ་པར་རྒྱལ་བའི་དུས་ཆེན་ལ་བདེ་སྟོང་ཆོས་ཉིད་སྣང་བའི་རིག་རྩལ་ལས་ཤར་བ་བཞིན་དུ་གབ་སྦས་གསང་བ་མེད་པར་སྙིགས་དུས་འགྲོ་བ་ཀུན་ལ་སྨན་པའི་ཆེད་དུ་རིག་འཛིན་ཨེ་མ་ཧོས་དེ་ཉིད་དུ་ཝེལ་སིའི་རི་བོ་གངས་ལྡན་(Snowden) གྱི་རྩེ་ནས་གུ་རུ་རྩ་གསུམ་ཀུན་འདུས་ལ་དད་གུས་དག་སྣང་གིས་རྩེ་གཅིག་ཏུ་གསོལ་བར་འདེབས་པར་དགེའོ།། ཤྲཱིཿསརྦ་མངྒ་ལཾ།། །།

  • April 2021

    ༄༅།།གཏེར་སྟོན་ཆེ་ཡོས་རིག་འཛིན་ཆེན་པོའམ་གཏེར་རྒན་འཇིགས་མེད་སྣ་ཚོགས་རང་གྲོལ་རིན་པོ་ཆེའི་མཛད་རྣམ་རགས་བསྡུས་བཞུགས་སོ།

    ༄༅།།གཏེར་སྟོན་ཆེ་ཡོས་རིག་འཛིན་ཆེན་པོའམ་གཏེར་རྒན་འཇིགས་མེད་སྣ་ཚོགས་རང་གྲོལ་རིན་པོ་ཆེའི་མཛད་རྣམ་རགས་བསྡུས་བཞུགས་སོ། དེ་ཡང་གཏེར་སྟོན་ཆེ་ཡོས་རིག་འཛིན་ཆེན་པོ་ནི། སྔར་སྡེ་དགེའི་སྲིད་སྐྱོང་གོང་མ་ཞིག་གི་རིང་ལ། ཨ་པོའི་བན་སྐྱ་ལྔ་ཞེས་པའི་དཔའ་མཛངས་རྟུལ་ཕོད་ཅན། འགྲན་ཟླ་མ་མཆིས་ཤིང་གཞན་སྡེ་ཟིལ་གྱིས་གནོན་པའི་བུ་སྤུན་ལྔ་བྱུང་བ། སྤུན་འདི་ལྔ་བོས་ས་སྐྱོང་སྡེ་དགེའི་ཆབ་སྲིད་ལ་ཞབས་འདེགས་ཆེ་ངོས་ཞུས་པས། སྡེ་དགེའི་ས་སྐྱོང་དཔོན་པོ་ཐུགས་མཉེས་ཏེ། ཨ་པོ་སྤུན་ལྔའི་རིགས་རྒྱུད་རྣམས་ལ་རྩི་མཐོང་ཆེ་འཇོག་བྱས་ཏེ་ཅི་འདོད་དུ་གནས་ཆོག་པའི་བཀའ་ཡིག་དང་བདག་རྐྱེན་བསྩལ། སྤུན་དེ་ལྔའི་ནང་གི་ཨ་པོ་ཆེ་ཡོས་ཀྱི་བརྒྱུད་པར། ཨ་པོ་ནོར་ཚེ་ཟེར་བའི་མི་དྲག་འབྱོར་ལྡན་ཞིག་བྱུང་བ་ལ། བཀྲ་པ་དང་སྔོ་ཕྲུག་ཟེར་བའི་བུ་གཉིས་བྱུང་། དེའི་ཕྱི་མ་སྔོ་ཕྲུག་ལ་བུ་སྤུན་གཉིས་བྱུང་བ་ལས། ཆེ་བ་རྟ་མགྲིན་མགོན་པོ་ནི། གཏེར་སྟོན་ཆེ་ཡོས་རིག་འཛིན་ཆེན་པོའི་ཡབ་ཡིན་ལ། མ་ཡུམ་ཨ་ཚབ་བཟའ་བོ་དགའ་ཞེས་བ་གཉིས་ཀྱི་སྲས་སུ་། ཁམས་རི་བོ་ཆེ་དང་ཉེ་བའི་ལུང་བཟང་སྟོད་ཅེས་པའི་དྲུང་དུ། རབ་བྱུང་བཅུ་གསུམ་པའི་མེ་འབྲུག་(སྤྱི་ལོ་༡༧༩༦) ལོར་སྐུ་འཁྲུངས། སྐུ་ན་ཕྲ་བའི་དུས་ནས་བཟུང་། ཨོ་ཊི་ཡ་ནའི་རིག་འཛིན་ཆེན་པོ་དངོས་ཉམས་རྨི་ལམ་ཅི་རིགས་པར་ཞལ་གཟིགས་ཤིང་ལུང་བསྟན་མང་དུ་མཛད། སྐུ་ཆུང་དུས་དེར་ས་སྐྱའི་དགོན་པ་ཞིག་ཏུ་བཞུགས་ནས་སློབ་གཉེར་གནང་།  སྐུ་ན་ཅུང་ཟད་རྒྱས་ནས་ཕྱག་ཚ་རྟོགས་ལྡན་འཇིགས་མེད་ཆོས་དབྱིངས་རང་གྲོལ་ལོ་གསུམ་དུ་བསྟེན་ཞིང་ཟབ་ཆོས་མང་པོ་ཞུས་པ་དང་། ལྷུན་གྲུབ་སྒང་བ་དཔལ་ལྡན་རྒྱ་མཚོ་སོགས་བླ་མ་དེ་དག་གི་སྤྱན་སྔར། སྔ་འགྱུར་གྱི་དབང་བཀའ་དུ་མ་དང་། ཡེ་ཤེས་བླ་མའི་ཟབ་ཁྲིད་སོགས་གསན། ལུང་བསྟན་དུས་བབས་བཞིན། འཁྲུངས་ཡུལ་དང་ཉེ་བར། འབྲི་ར་སྤུན་གསུམ་དང་ལུག་སྟོད་བྲག་དཀར་སོགས་སུ་དམ་རྫས་དང་ལྷའི་སྣང་བརྙན་མང་བོ། གཞན་ཡང་ཕྱག་རྡོར་སྒྲུབ་སྐོར་སོགས་ཟབ་ཆོས་སྣ་ཚོགས་བཅས་གཏེར་ནས་བཞེས། ཕྱག་ཚ་རྟོགས་ལྡན་འཇིགས་མེད་ཆོས་དབྱིངས་རང་གྲོལ་གྱིས་དབང་བཀའ་མང་པོ་གནང་མཐར། གསང་མཚན་ འཇིགས་མེད་ཆོས་འབྱིངས་རང་གྲོལ་ཞེས་བསྩལ་ཞིང་མདོ་སྨད་དུ་འགྲོ་དོན་སྐྱོང་བར་ཕེབས་རྒྱུའི་བཀའ་གནང་བ་དང་།  སྔར་སྡེ་དགེའི་ཚོང་དཔོན་གཡུ་རྣའི་སྲས་མོ། སྲི་བཅོལ་ནས་ཕྱག་ཚ་རིན་པོ་ཆེའི་མདུན་དུ་བཞག་ཡོད་པའི་མཁའ་འགྲོ་ཀུན་དགའ་ཆོས་སྒྲོན་ལགས། གཏེར་སྟོན་རིག་འཛིན་པའི་རིགས་མར་བསྩལ་ནས། མདོ་སྨད་དུ་རྫོང་བདའ་མཛད་སྐབས།  ལུང་བསྟན་བསྩལ་བ་ནི།  Imageཞེས་བཀའ་ལུང་འགྱུར་བ་མེད་པས་གཙུག་ཏུ་དབང་བསྐུར་བ་ལྟར། གཏེར་སྟོན་རིག་འཛིན་ཡབ་ཡུམ་མདོ་སྨད་ཕྱོགས་སུ་ཞབས་ཐང་ལ་བྱོན་པའི་ལམ་དུ། རྡོ་གྲུབ་ཆེན་ཀུན་བཟང་གཞན་ཕན་དང་མཇལ་ནས། ཁོང་གི་དྲུང་དུ་ཀློང་ཆེན་སྙིང་ཐིག་གི་སྐོར་རྫོགས་པར་གསན།  ཁོང་གིས་ཀྱང་། བུ་སློབ་ཁྱོད་ནི་ཕྱག་ཚའི་བཀའ་བཞིན་མདོ་སྨད་དུ་སོང་དང་འགྲོ་དོན་རྒྱ་ཆེན་པོ་ཡོད་པས་སྐྱོང་ཤིག་དང་། ཁྱེད་ནི་སྔོན་རྒྱལ་སྲས་ལྷ་རྗེ་དང་། ཉི་མའི་སྙིང་པོ། འབྲོམ་སྟོན་པ་རྒྱལ་བའི་འབྱུང་གནས། དྭགས་པོ་ཟླ་འོད་གཞོན་ནུ། གཏེར་སྟོན་ཨོ་རྒྱན་གླིང་པ་སོགས་ཀྱི་སྐྱེས་ཕྲེང་ཁྱད་པར་བ་བཅུ་གཉིས་ཀྱིས་དབུས་གཙང་ཕྱོགས་ཀྱི་འགྲོ་དོན་བསྐྱང་ཟིན་པ་ཡིན། ད་སྐྱེ་བ་བཅུ་གསུམ་པ་ནས་མདོ་སྨད་དུ་གདུལ་བྱ་སྐྱོང་བའི་དུས་ལ་བབས་པ་ཡིན་གསུངས་ནས།  ཡོངས་སུ་གྲགས་པའི་མཚན། རིག་འཛིན་བདེ་ཆེན་རྡོ་རྗེ་ཞེས་གསོལ་ཞིང་།  ཁོང་གི་ཡོན་ཏན་ལ་ཆེ་བ་མཛད་པ་ནི། ཞེས་བསྔགས་ཤིང་ཕེབས་བསྐུལ་གནང་བ་བཞིན་རིམ་གྱིས་མདོ་སྨད་དུ་ཨ་སྐྱོ་བ་མཛད་ནས་ཕེབས། དང་པོར་ཕེབས་ཡུལ་མཚོ་སྔོན་སོག་ཡུལ་དང་། མ་ཧཱ་དེ་ཝའི་གནས་ནི་མཚོ་སྙིང་མ་ཧཱ་དཱེ་བ་ཡིན་པར་དགོངས་ནས། མཚོ་སྔོན་པོའི་མཐའ་འཁོར་གྱི་སོག་ཡུལ་དུ་བྱོན་ཀྱང་གདུལ་བྱ་མ་བྱུང་། དེ་ནས་ཆོས་རྗེ་གསེར་ཁང་བ་ཆེན་པོར་མཇའ་ནས། དགའ་ལྡན་ལྷ་བརྒྱ་མའི་བླ་མའི་རྣལ་འབྱོར་གྱི་ཁྲིད་དང་། དགེ་ལྡན་ཕྱག་རྒྱ་ཆེན་པོའི་ཁྲིད་སོགས་གསན། ཆོས་རྗེས་ཐུགས་དགྱེས་ཚོར་ཆེན་པོ་གནང་། དེ་ནས་མཚོ་སྙིང་དུ་བྱོན་ཏེ། རྗེ་བདག་ཉིད་ཆེན་པོའི་ཞལ་གཟིགས་ཤིང་། ལྗགས་བརྐྱངས་པའི་སྣེ་ལས་བདུད་རྩི་བབས་པ་ནུ་མ་ནུ་བ་ལྟར་བཏུང་པས། དེ་ནས་བཟུང་སྟེ་མཁྱེན་རབ་ཀྱི་ཀློང་རྡོལ་ཏེ། འཆད་རྩོད་རྩོམ་གསུམ་ལ་ཐོགས་པ་མེད་པ་བྱུང་བ་ཡིན་གསུངས། དེ་ནས་སྐུ་འབུམ་བྱམས་པ་གླིང་དུ་བྱོན་ཏེ། ཕྱག་མཆོད་གནད་མ་གནང་ཞིང་། མར་མི་དྭགས་གསུམ་བཀའ་འབུམ་གྱི་ལུང་གསན། དྭགས་པོ་ལྷ་རྗེ་དང་མི་ལ་བཞད་པའི་རྡོ་རྗེ་ཡི་ཞལ་གཟིགས། དེ་ནས་བྲག་དཀར་སྤྲེའུ་རྫོང་གནས་ཀྱི་སྙན་པ་གསན་ནས་དེར་བྱོན་ཞིང་སྒྲུབ་པ་མཛད་ནས་རེ་ཞིག་བཞུགས། དེ་ནས་རེབ་གོང་གྲུབ་གནས་བརྒྱད་ལ་མཇལ་གཟིགས་བྱེད་ཆེད། ཁྲི་ཀ་བརྒྱུད་ནས་ཕེབས་ལམ་བསམ་སྦྱོར་ངན་པ་ཅན་ཞིག་གིས་དུག་ཟས་དྲང་བ་ཡིན་འདུག་ཀྱང་སྤྱན་ཡངས་སུ་བཅང་བས་མ་ཚོར། དེ་ནས་རེབ་གོང་སྟོད་ཀྱི་ཆོས་དབྱངས་སྟོབས་ལྡན་སྒར་ཁར་ཕེབས་ཏེ། ཁོང་གི་མདུན་ནས་ལུང་ཁྲིད་དུ་མ་གསན་སྐབས། ཡུམ་མཁའ་འགྲོ་ཀུན་དགའ་ཆོས་སྒྲོན་ལ་རིགས་སྲས་ཞིག་འཁྲུངས་བ། ནང་ཆེན་དེའི་སྒར་གཞིས་ནས་བསླང་པས་ཕྱིན་ཏེ་བཞག   ཕྱིས་སུ་གཏེར་སྟོན་དུ་མ་རོ་གཅིག་གི་སྐྱེ་བར་གྲགས་པ་སོག་པོའི་རྒྱ་ཁྲི་ཚང་ཡིན་ནོ། དེ་ནས་གྲུབ་དབང་ཞབས་དཀར་བ་དང་གྲུབ་དབང་ནམ་མཁའ་ཚང་གཉིས་ལས་ཀྱང་དབང་ཁྲིད་དུ་མ་གསན། དེ་ནས་རེབ་གོང་གྲུབ་གནས་བརྒྱད་དུ་གནས་མཇལ་ཞུས་ནས་རྩེ་གཞུང་དམག་སར་དུ་བྱོན་ཏེ། དམག་སར་པཎྚིཏ་ཀུན་བཟང་སྟོབས་ལྡན་དབང་པོའི་མདུན་དུ་མཇལ་བར་ཕེབས་པ་ན། ཁོང་གིས་གཟིགས་མ་ཐག་ཁྱེད་ཀྱི་སྤྱན་དམར་པོར་འཁྲུགས་ཡོད། དུག་གི་རྟགས་ཡིན། ལྟོ་བ་མི་བདེ་བ་ཡོད་པ་འདྲ་གསུངས་པས། ལན་ཞིབ་པར་ཞུས་བ་ན། མྱུར་དུ་ཀརྨ་ལྷ་སྟངས་སུ་ཕེབས་དགོས། ཞེས་གསུངས་པ་ལྟར་དང་དུ་བླང་ནས་རྐང་ལམ་མགྱོགས་ཤད་ཀྱིས་ཕེབས་ནས་སྡེ་དགེའི་ཀརྨ་ལྷ་སྟངས་སུ་བྱོན་པ་ན། སྡེ་དགེའི་འཇིགས་མེད་སྐལ་བཟང་མཆོག་གིས་ཕུར་བརྒྱུད་ཀྱི་དབང་གནང་པ་དང་དུས་འཛོམ་ནས་དབང་གསན། དུག་གིས་ན་བའི་རྒྱུ་མཚན་ཞུས་པ་ན། བཀའ་གནང་ལྟར་ཞག་བདུན་དུ་སྒྲུབ་པ་མཛད་ནས་དུག་དངོས་སུ་སྤྱངས་ཏེ་སྤྲིན་དང་བྲལ་བའི་ཟླ་བ་བཞིན་དུ་གྱུར་རོ།།  དེ་ནས་གཏེར་སྟོན་བདེ་ཆེན་རྡོ་རྗེའི་ཐུགས་དགོངས་ལ། ད་སྐབས་བླ་མ་རིན་པོ་ཆེ་(ཕྱག་ཚ་རྟོགས་ལྡན་ཚང་)་ཡང་བཞུགས་མེད་པས། ཁོང་གི་ལུང་བསྟན་གྱི་མདོ་སྨད་ཀྱི་གནས་གསལ་བོ་མི་ངེས་པ་དང་། གདུལ་བྱ་ཡང་དཀོན་པར་འདུག་པས།…

  • April 2021

    ༄༅། །སྤྲུལ་སྐུ་ཀརྨ་གླིང་པའི་གཏེར་བྱོན་བཛྲ་གུ་རུའི་ཕན་ཡོན་དང་འབྲུ་འགྲེལ་བཞུགས་སོ།།

    ༄༅། །སྤྲུལ་སྐུ་ཀརྨ་གླིང་པའི་གཏེར་བྱོན་བཛྲ་གུ་རུའི་ཕན་ཡོན་དང་འབྲུ་འགྲེལ་བཞུགས་སོ།། ༄༅། །ཨ༔ ནཛ་ཤམཐ།། ཞམ༔ རྒ། རྨ༔ བཛྲ་གུ་རུ་དེ་ཝ་ཌཱཀྐི་ནི་ཧཱུྃ༔  བླ་མ་ཡི་དམ་མཁའ་འགྲོ་གསུམ་ལ་ཕྱག་འཚལ་ལོ༔  བདག་སྐྱེ་དམན་ཡེ་ཤེས་མཚོ་རྒྱལ་གྱིས༔ ཕྱི་ནང་གསང་བའི་མཎྜལ་རྒྱ་ཆེན་པོ་ཕུལ་ནས་ཞུས་པ༔  ཀྱཻ༔ སློབ་དཔོན་པདྨ་འབྱུང་གནས་ལགས༔ བདག་ཅག་བོད་ཀྱི་སེམས་ཅན་ཐམས་ཅད་ལ༔ ཚེ་འདི་དང་ཕྱི་མའི་དོན་རྒྱ་ཆེན་པོ་མཛད་པ་ཤིན་ཏུ་བཀའ་དྲིན་ཉིད་ལས་ཆེ་བ་སྔར་ཡང་མ་བྱོན༔ ཕྱིས་ཀྱང་མི་འབྱོན་པས༔ ཉིད་ཀྱི་སྒྲུབ་པ་ཉིང་ཁུ་ལྟ་བུ་གནང་བ་ཡིས༔ བདག་སྐྱེ་དམན་ཡིན་ཀྱང་ཐེ་ཚོམ་མེད་དེ༔ མ་འོངས་པའི་སེམས་ཅན་བློ་སྣ་མང་ཞིང་དམུ་རྒོད་ཆེ་བ༔ དམ་པའི་ཆོས་ལ་ལོག་པར་ལྟ་ཞིང་༔ ཁྱད་པར་གསང་སྔགས་བླ་མེད་ཀྱི་ཆོས་ལ་སྐུར་འདེབས་བྱེད་དུ་འོང་བས༔ དེ་དུས་སེམས་ཅན་ཐམས་ཅད་ལ་ནད་མུག་མཚོན་གསུམ་དར་ཁྱད་པར་དུ་རྒྱ་བོད་ཧོར་གསུམ་གྲོག་མའི་ཚང་བཤིགས་པ་འདྲ་བ་བོད་འབངས་སྡུག་པའི་དུས་ལ་བབས༔  དེ་རྣམས་བཅོས་པའི་ཐབས་མང་དུ་གསུང་ཤིང་༔ མ་འོངས་པའི་གང་ཟག་རྣམས་སྒྲུབ་ལོང་མེད་པ༔ ཅུང་ཟད་རེ་སྒྲུབ་འདོད་པ་རྣམས་ཀྱང་༔ བར་ཆད་དབང་ཆེ་བ་འོང་༔ སེམས་ཅན་ཁ་མི་འཆམས༔ རྫས་དང་སྤྱོད་པ་མི་གཙང་༔ དུས་ངན་དེ་འདྲ་ཤིན་ཏུ་བཟློག་པར་དཀའ༔  དེ་འདྲའི་དུས་སུ་གུ་རུ་ཉིད་ཀྱི་སྒྲུབ་ཐབས་བཛྲ་གུ་རུ་ཁོ་ན་ལ་བརྟེན་ན་ཕན་ཡོན་ཅི་ལྟ་བུ་ལགས༔ མ་འོངས་པའི་བློ་དམན་རྣམས་ཀྱི་དོན་དུ་གསུང་བར་ཞུ་ཞེས་ཞུས་སོ༔  དེ་ནས་སློབ་དཔོན་ཆེན་པོས་བཀའ་སྩལ་པ༔ འོ་དད་ལྡན་བུ་མོ་ཁྱོད་ཀྱིས་ཞུས་པ་དེ་ཤིན་ཏུ་བདེན་ནོ༔  མ་འོངས་དེ་འདྲའི་དུས་ཚོད་ལ༔ སེམས་ཅན་ལ་གནས་སྐབས་དང་མཐར་ཐུག་ལ་ཕན་ཐོགས་ངེས་པ་ཡིན༔  མན་ངག་སྒྲུབ་ཐབས་དཔག་ཏུ་མེད་པ་ས་གཏེར་ཆུ་གཏེར་བྲག་གཏེར་ནམ་མཁའི་གཏེར་ལ་སོགས་པ་མང་དུ་སྦས་ཏེ༔ དུས་ངན་གྱི་སྐབས་ལས་ཅན་རྣམས་ཀྱི་ཐབས་རྟེན་འབྲེལ་འགྲིགས་ཤིན་ཏུ་དཀའ༔ སེམས་ཅན་གྱི་བསོད་ནམས་ཟད་པའི་རྟགས་ཡིན་ནོ༔ འོན་ཀྱང་དེ་འདྲའི་དུས་ལ༔ བཛྲ་གུ་རུའི་སྙིང་པོ་འདི་གནས་ཆེན་པོའམ༔ དགོན་སྡེའམ༔ རི་བོ་ཆེན་པོའི་རྩེའམ༔ ཆུ་བོ་ཆེན་པོའི་འགྲམ་དང་༔ ལྷ་སྲིན་འབྱུང་པོ་དར་བའི་ས་མགོ་ས་མདོ་ལ་སོགས་པ་ལ༔ སྔགས་པ་དམ་ཚིག་དང་ལྡན་པ༔ དགེ་འདུན་སྡོམ་ལྡན༔ སྐྱེ་བོ་དད་ཅན༔ བུད་མེད་མཚན་ལྡན་ལ་སོགས་པ་རྣམས་ཀྱིས་སེམས་བསྐྱེད་རྒྱ་ཆེན་པོའི་ངང་ནས༔ བརྒྱ་སྟོང་ཁྲིད་འབུམ་བྱེ་བ་དང་དུང་ཕྱུར་ལ་སོགས་པ་ཅི་འགྲུབ་བཟླས་ན༔ ཕན་ཡོན་དང་ནུས་པ་བསམ་གྱིས་མི་ཁྱབ༔ ཡུལ་ཕྱོགས་ཐམས་ཅད་ལ་ནད་མུག་མཚོན་གསུམ་དམག་འཁྲུག་ལོ་ཉེས་ལྟས་ངན་ཆོ་འཕྲུལ་ངན་པ་ཐམས་ཅད་བཟློག༔ ཆར་ཆུ་འབེབས་ཤིང་ལོ་ཕྱུགས་ལེགས་པ་དང་༔ ཡུལ་ཕྱོགས་ལ་བཀྲ་ཤིས་པར་འགྱུར་རོ༔  ཚེ་འདི་དང་ཕྱི་མ་བར་དོའི་འཕྲང་གསུམ་ལ༔ རབ་དངོས༔ འབྲིང་ཉམས༔ ཐ་མ་རྨི་ལམ་ལ་ང་དང་ཡང་ནས་ཡང་དུ་འཕྲད་ཅིང་༔ ས་ལམ་རིམ་པར་རྫོགས་ནས་རྔ་ཡབ་གླིང་དུ་རིག་འཛིན་ཕོ་མོའི་གྲལ་དུ་ཚུད་པར་ཐེ་ཚོམ་མེད་དོ༔  བརྒྱ་རེ་བཟླས་པ་མ་ཆག་ན་ཡང་གཞན་གྱི་ཡིད་དུ་འོང་ཞིང་ཟས་ནོར་ལོངས་སྤྱོད་འབད་མེད་དུ་འབྱུང་༔ སྟོང་དང་ཁྲི་ལ་སོགས་པ་བཟླས་ན་གཞན་སྣང་ཟིལ་གྱིས་གནོན་ཅིང་བྱིན་རླབས་དང་ནུས་པ་ཐོགས་པ་མེད་པར་འགྲུབ་བོ༔  འབུམ་དང་བྱེ་བ་སོགས་བཟླས་པ་བྱེད་ན༔ ཁམས་གསུམ་དབང་དུ་འདུས༔ སྲིད་གསུམ་ཟིལ་གྱིས་གནོན༔ ལྷ་འདྲེ་བྲན་དུ་འཁོལ༔ འཕྲིན་ལས་རྣམ་བཞི་གང་ལ་ཡང་ཐོགས་པ་མེད་པར་འགྲུབ་ཅིང་སེམས་ཅན་ཐམས་ཅད་ལ་ཅི་བསམ་པའི་འགྲོ་དོན་དཔག་ཏུ་མེད་པ་བྱེད་ནུས་པར་འགྱུར་རོ༔  བྱེ་བ་གསུམ་མམ་བདུན་ལ་སོགས་པ་བགྲང་བར་ནུས་ན་དུས་གསུམ་སངས་རྒྱས་རྣམས་དང་འབྲལ་བ་མེད་ཅིང་༔ ང་དང་དབྱེར་མི་ཕྱེད་པར་ལྷ་སྲིན་སྡེ་བརྒྱད་ཐམས་ཅད་བཀའ་ཉན་གསུང་བསྟོད༔ ཅི་བཅོལ་བའི་ལས་བསྒྲུབ་ཅིང་༔ རབ་འདི་ལ་འཇའ་ལུས་འགྲུབ༔ འབྲིང་འཆི་ཁར་འོད་གསལ་མ་བུ་འཕྲོད༔ ཐ་མ་ཡང་བར་དོར་ང་ཡི་ཞལ་མཐོང་ནས་སྣང་བ་རང་སར་གྲོལ་ཏེ་རྔ་ཡབ་གླིང་དུ་སྐྱེ་ནས་འགྲོ་དོན་དཔག་ཏུ་མེད་པ་འབྱུང་བར་འགྱུར་རོ༔ ཞེས་གསུངས་སོ༔  སློབ་དཔོན་ཆེན་པོ་ལགས༔ འདི་ལྟ་བུའི་ཕན་ཡོན་དང་ནུས་པ་དཔག་ཏུ་མེད་པ་རྒྱ་ཆེན་པོ་གསུངས་པ་བཀའ་དྲིན་ཆེ་ལགས༔ མ་འོངས་སེམས་ཅན་རྣམས་ཀྱི་དོན་དུ་གུ་རུ་པདྨའི་འབྲུ་འགྲེལ་གྱི་ཕན་ཡོན་ནུས་པ་དཔག་ཏུ་མེད་ཡང་༔  མདོར་བསྡུས་པ་ཞིག་གསུངས་པར་ཞུས་ཞེས་ཞུས་སོ༔  དེ་ནས་སློབ་དཔོན་ཆེན་པོས་བཀའ་སྩལ་པ༔ འོ་རིགས་ཀྱི་བུ་མོ༔ བཛྲ་གུ་རུ་ཞེས་པ་ནི༔ ང་གཅིག་པུའི་སྙིང་པོ་མ་ཡིན་ཏེ༔ ཡི་དམ་རྒྱུད་སྡེ་བཞི་དང་༔ ཐེག་པ་རིམ་དགུ་དང་༔ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སོགས་པའི་སྲོག་སྙིང་༔ དུས་གསུམ་སངས་རྒྱས་ཐམས་ཅད་དང་༔ བླ་མ་ཡི་དམ་མཁའ་འགྲོ་ཆོས་སྐྱོང་ལ་སོགས་པའི་སྙིང་པོ་འདི་ལ་ཚར་བའོ༔  ཚང་བའི་རྒྱུ་མཚན་ཅི་ལྟ་བུ་ཞེ་ན༔ ལེགས་པར་ཉོན་ལ་ཡིད་ལ་ཟུངས་ཤིག༔ བཟླ་བར་གྱིས་ཤིག༔ འབྲི་བར་གྱིས་ཤིག༔ མ་འོངས་སེམས་ཅན་རྣམས་ལ་བསྟན་པར་གྱིས་ཤིག༔  ༡༽ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་ནི་སྐུ་གསུང་ཐུགས་ཀྱི་སྙིང་པོ་མཆོག༔…

  • April 2021

    རྡོ་རྗེའི་ཚིག་བདུན་གསོལ་འདེབས་ཀྱི་དམིགས་ཁྲིད་ཅུང་ཟད་སྨོས་པ་ཟབ་ལམ་ཡོངས་རྫོགས་བཞུགས།

    རྡོ་རྗེའི་ཚིག་བདུན་གསོལ་འདེབས་ཀྱི་དམིགས་ཁྲིད་ཅུང་ཟད་སྨོས་པ་ཟབ་ལམ་ཡོངས་རྫོགས་བཞུགས། ན་མོ་གུ་ར་ཝེ། སྤྱིར་བདག་ཅག་སྟོན་པ་མཉམ་མེད་ཤཱཀྱའི་རྒྱལ་པོའི་རྗེས་སུ་འཇུག་པ་ཐམས་ཅད་ཀྱི་མཁས་དང་གྲུབ་པ་བརྙེས་པའི་ཕྱག་སྲོལ་དང་གསུང་གི་གསང་བ་ལ་ཆེ་བ་དུ་མ་དང་ལྡན་པ་སྨོས་ཀྱིས་མི་ལྡང་ཀྱང་རང་རེ་སྔ་འགྱུར་རྙིང་མ་བ་རྣམས་ཀྱི་ཆོས་སྤྱོད་ཐམས་ཅད་ཀྱི་ཐོག་མར་གུ་རུ་རིན་པོ་ཆེའི་རྡོ་རྗེའི་གསུང་གསོལ་འདེབས་ཚིག་བདུན་མ་གསུང་པ་འདི་དགོས་པ་མཆོག་ལྡན་དུ་མཐོང་ནས་དེའི་དམིགས་ཁྲིད་མདོ་ཙམ་ཞུ་ན། ཧཱུྃ༔ ཞེས་སྐུ་གསུང་ཐུགས་གཉིས་སུ་མེད་པའི་ཡེ་ཤེས་སྲོག་གི་སྙིང་པོ་འདི་བརྗོད་པས། རང་རེའི་ཆོས་ལུགས་ཀྱི་མཚན་ལས་གསང་སྔགས་རྙིང་མ་བ་ཞེས་གྲགས་པ་བཞིན་སྒེར་གྱི་སྟོན་པ་ཕྱོགས་དུས་སྲས་བཅས་རྒྱལ་བའི་ཡེ་ཤེས་ཀྱི་ཉིན་བྱེད་སྔགས་ཀྱི་སྟོན་པའི་ཚུལ་དུ་བཞེངས་པ་གུ་རུ་རིན་པོ་ཆེའི་རྗེས་འཇུག་གྱུར་པའི་སྐལ་བཟང་གིས་ལྟ་སྒོམ་སྤྱོད་པའི་ཉམས་ལེན་གྱི་གཙོ་བོ་རྡོ་རྗེ་ཐེག་པ་རྣལ་འབྱོར་བླ་མེད་ཀྱི་གཞུང་བསྲངས་ནས་མདོ་སྔགས་ཡོངས་རྫོགས་དེའི་ལམ་སྟེགས་སུ་བཀྲལ་ཏེ་མི་འགལ་བར་ཉམས་སུ་ལེན་དགོས་པའི་གནད་དོན་མཚོན་བྱེད་ཡིན་པ་ཁོང་དུ་ཆུད་པའི་ཆེ་བ་ངོ་ཤེས་པ་དང༌། ཐུགས་སྲོག་རྡོ་རྗེའི་སྔགས་ཀྱི་སྒྲ་གདངས་བརྗོད་མ་ཐག་སྣང་གྲགས་རིག་པ་བསྒྲུབ་བྱའི་དཀྱིལ་འཁོར་དེའི་རྡོ་རྗེ་གསུམ་གྱི་སྣང་ཆ་སད་པའི་མོས་གུས་ཀྱིས་ཨོ་རྒྱན་ཆོས་ཀྱི་རྒྱལ་པོ་ལྷང་གིས་དྲན་པར་བྱས་ཏེ་གསོལ་བ་འདེབས་པ་ནི་ལམ་གནད་ཆེ་ཤོས་ཡིན་ཏེ། རྡོ་རྗེ་ཐེག་པ་དག་སྣང་ལམ་བྱེད་དུ་གྲགས་པ་བཞིན་སྣང་སྤྱོད་ཐ་མལ་དུ་མ་ཤོར་བ། སྣོད་བཅུད་རྒྱུད་གསུམ་གདན་གསུམ་རྡོ་རྗེའི་གྲོང་ཁྱེར་དུ་ཤེས་པ་མདོ་དང་སྒོ་བསྟུན་པའི་སངས་རྒྱས་ཕལ་པོ་ཆེ་སྤྱོད་ཡུལ་ཡོངས་སུ་དག་པའི་མདོ་སྡེ་ལས་བྱང་ཆུབ་སེམས་དཔས་སངས་རྒྱས་ཀྱི་ཞིང་རྒྱ་མཚོ་སྦྱངས་བའི་ཚུལ་གྱིས་གསུངས་པ་དང༌། དོན་གནད་ཀྱང་ཚང་ཞིང་ཨུ་རྒྱན་ཡུལ་གྱི་སོགས་ནས། མང་པོས་བསྐོར༔ཞེས་ཛམ་གླིང་གདུལ་བྱའི་བསོད་ནམས་ཀྱི་སྐལ་པར་ལྷོ་ནུབ་འོ་མ་ཅན་གྱི་རྒྱ་མཚོར་རྩ་གསུམ་ཀུན་འདུས་གུ་རུ་རིན་པོ་ཆེ་སྐུ་འཁྲུངས་ནས་སྐུ་ཚེ་གཅིག་གི་མཛད་པ་ཐུན་མོང་གི་གདུལ་བྱའི་སྣང་ཆར་རྡོ་རྗེ་ཐེག་པ་གསང་སྔགས་ཀྱི་ལམ་དང་རྗེས་སུ་མཐུན་པ་རིག་འཛིན་རྣམ་བཞིའི་སྤང་རྟོགས་ཡོངས་སུ་རྫོགས་ནས་སྔགས་ཀྱི་རྒྱུད་ལུང་མན་ངག་ལ་རིག་པ་རྩལ་གྱི་བརྟུལ་ཞུགས་ཀྱིས་མངའ་དབང་བསྒྱུར་བའི་ཆེ་རྟགས་སུ་མཁའ་འགྲོའི་འཁོར་དང་བཅས་པའི་ཡོན་ཏན་རྗེས་སུ་དྲན་པར་བྱ་དགོས་ལ། སྤྱིར་སྔགས་ཀྱི་ལྟ་སྤྱོད་ལ་མཁྱེན་རྒྱ་ཆུང་བ་དག་གིས་མཁའ་འགྲོ་ཞེས་བུད་མེད་ཁོ་ན་ལ་ངོས་འཛིན་ནས་འཕྱར་ཀ་སྒྲོགས་ཀྱང་སྙིང་རྗེའི་གནས་ཏེ། མཁའ་ནི་ཆོས་ཉིད་རྣམ་ཀུན་མཆོག་ལྡན་དང༌། འགྲོ་བ་དང་གཤེགས་པ་དོན་གཅིག་པས་དེ་ཉིད་མངོན་དུ་རྟོགས་པའི་གང་ཟག་གི་མཚན་གྱི་སྒྲ་ཡིན་པས། རྡོ་རྗེ་ནམ་མཁའི་དཀྱིལ་ལྟ་བུའི་དོན་སོ་སོ་རང་རིག་པའི་ཡེ་ཤེས་ཀྱིས་མངོན་དུ་བྱས་པའི་གསང་སྔགས་ཀྱི་ལྟ་སྒོམ་སྤྱོད་པ་ཉམས་འོག་ཏུ་ཆུད་པ་མཐའ་དག་ལ་གསུངས་པས་ན་ངེས་པ་ལྔ་ལྡན་གྱི་སྟོན་འཁོར་ཏེ། རྒྱུད་སྡེ་ཐམས་ཅད་ཀྱི་གླེང་གཞི་ཨེ་ཝཾ་གྱིས་སྒྲས་བཤད་དགོས་པ་དང་དགྱེས་པ་རྡོ་རྗེའི་རྒྱུད་དུ་རྡོ་རྗེ་བཙུན་མོའི་བྷ་ག་ལ་བཞུགས་པ་དང་ཚིག་དོན་མཚུངས་པའི་ཕྱིར་རོ། །ཁྱེད་ཀྱི་རྗེས་སུ་བདག་སྒྲུབ་ཀྱིས༔ ཞེས་པ་སྔོན་བྱུང་སྟོན་པའི་རྣམ་ཐར་རྗེས་འཇུག་གདུལ་བྱའི་ཉམས་ལེན་ཞེས་གྲགས་པ་བཞིན་མདོ་སྔགས་ཐུན་མོང་གི་ལུགས། དུས་གསུམ་གྱི་རྒྱལ་བ་སྲས་དང་བཅས་པས་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་བསླབས་པས། རྒྱལ་བའི་སྲས་ཀྱི་ཐུགས་བསྐྱེད་དང་མཛད་པ་སྨོན་ལམ་རྒྱ་མཚོ་ཡོངས་སུ་རྫོགས་པ་དང༌། ཁྱད་པར་རྡོ་རྗེའི་བླ་མ་པདྨ་སཾ་བྷ་ཝ་ཞེས་འཇིག་རྟེན་གསུམ་ན་སྙན་པར་གྲགས་པ་བཞིན་གསང་བ་གསུམ་གྱི་མཛད་སྤྱོད་ཐམས་ཅད་དབང་པོ་རབ་རིན་པོ་ཆེ་ལྟ་བུའི་གང་ཟག་གསང་སྔགས་ཀྱི་ལྟ་སྒོམ་སྤྱོད་པ་ཐམས་ཅད་སྒྲ་ཇི་བཞིན་དུ་ཚུར་མཐོང་གདུལ་བྱའི་སྣང་ངོར་ཡང་མཐར་ཕྱིན་ཏེ། ཁྱབ་བདག་སྤྱི་དཔལ་ཆེན་པོ་ཧེ་རུ་ཀ་དང་དགོངས་སྤྱོད་གཉིས་སུ་མེད་པ་སྐུ་ལྔ་ལྷུན་གྲུབ་ཀྱི་རིག་འཛིན་བདེ་གཤེགས་སྨིན་པ་རྒྱ་མཚོ་ཞེས་གྲགས་པའི་གསང་བ་བསམ་མི་ཁྱབ་པ་ལ་གདུལ་བྱ་རང་རང་གིས་ལྟ་སྒོམ་སྤྱོད་པ་དབང་པོའི་ཆུན་ཚོད་ལྟར་དངོས་དང་བརྒྱུད་ནས་ཡིད་ཆེས་དད་མོས་ཀྱིས་སྒྲུབ་པའམ་སློབ་ཅིང་འདུན་པས། དབང་རབ་ཀྱིས་སྒྲ་ཇི་བཞིན། དབང་འབྲིང་གིས་དངོས་བརྒྱུད་ནས་ལྟ་སྒོམ་སྤྱོད་པ་ཇི་ལྟར་དཔོག་ཚད། ཐ་མས་ཀྱང་སངས་རྒྱས་ཀྱི་མཛད་པ་ལ་མོས་གུས་དང་དང་བས་སྨོན་ལམ་དང་གསོལ་འདེབས་ལ་བརྩོན་ན་མཐར་ཕྱིན་ངེས་པ་ཕྱག་རྒྱ་ཆེན་པོའི་དངོས་གྲུབ་མཆོག་གི་སར་སྦྱོར་ལ། གང་ལྟར་ཡང་བླ་མའི་རྣམ་ཐར་ཡིད་ཡུལ་དུ་བྱས་པས་ཟབ་ལམ་གྱི་སྣོད་ལྡན་དུ་གྱུར་ཏེ་དཀར་པོའི་ཆོས་སྣང་བའི་སྒོ་དད་པའི་ཤུགས་ཀྱིས་བསྐུལ་ཏེ།བྱིན་གྱིས་བརླབ་ཕྱིར་གཤེགས་སུ་གསོལ༔ ཞེས་དོན་ལ་སངས་རྒྱས་རང་ངོར་གཤེགས་བཞུགས་ཀྱི་མཚན་མ་དང་བྲལ་ཀྱང་རྣམ་པ་གདུལ་བྱའི་དད་པའི་སྣང་ངོར་མངོན་སུམ་ལྟ་བུར་བྱོན་པ་གཤེགས་པའམ་གུ་རུ་རིན་པོ་ཆེའི་རྡོ་རྗེ་གསུམ་གྱིས་བྱིན་གྱིས་བརླབ་པའི་འོད་ཟེར་ཆུ་རྒྱུན་གཅིག་མའི་དབང་བཞི་བསྐུར་བས་ལུས་ངག་ཡིད་གསུམ་ཐ་མལ་གྱི་འཁྲུལ་ཤེས་སྦྱངས་ཏེ་སྒྲིབ་པ་བཞི་དག །དབང་བཞིའི་རྟོགས་པ་ཆིག་རྫོགས་སུ་སྐྱེས། ལམ་བཞི་སྒོམ་པའི་སྐལ་ལྡན་དུ་བྱས། སྐུ་བཞིའི་ས་བོན་རྒྱུད་ལ་སྨིན་པས་བསྒྲུབ་བྱ་སྒྲུབ་བྱེད་གཉིས་མེད་དུ་གྱུར་ཕྱིར་དག་པའི་སྐུ་དང་ཡེ་ཤེས་ཀྱི་རོལ་པ་བཀོད་པ་བསམ་གྱིས་མི་ཁྱབ་པའི་སྤྲིན་ཡེ་ཤེས་ཆེན་པོའི་བྱིན་རླབས་འཕོས་ནས་གདོད་ནས་དམ་ཡེ་དབྱེར་མེད་ཀྱི་ཡིན་ལུགས་མངོན་དུ་སད་པར་མཛད་དུ་གསོལ་ཞེས་སྨོན་པ་སྟེ། དེ་ལྟར་དམིགས་པའི་རོལ་པ་མང་དུ་སྤྲོས་པ་ཐམས་ཅད་བླ་མ་སངས་རྒྱས་ཀུན་གྱི་མེས་པོ་གཅིག་ལ་གསོལ་བ་གདབ་པའི་རིམ་པ་ལམ་ཐམས་ཅད་ཀྱི་གནད་དོན་གྱིས་ལྕི་བ་ཡིན་པས་གུྃ་རུྃ། སྤྱིར་བླ་མ་ཐམས་ཅད་ལ་ཡིད་ཆེས་ཀྱི་དད་པས་གསོལ་བ་རྩེ་གཅིག་ཏུ་བཏབ་ན་བླ་མ་ཀུན་གྱི་ཐུགས་རྗེ་བྱིན་རླབས་འཇུག་ངེས་ཤིང་དེ་ཐམས་ཅད་ཀྱང་རྩ་གསུམ་ཀུན་འདུས་པྃདྨྃ་འབྱུང་གནས་གཅིག་གི་ཡེ་ཤེས་ཀྱི་ཆོ་འཕྲུལ་དུ་ངེས་ཤེས་རྩེ་གཅིག་ཏུ་བསྐྱེད་པས། ཐུན་མོང་དང་མཆོག་གི་སིདྡྷི་སྩོལ་ཅིག་ཅེས་ཧཱུྃ་གིས་ཐུགས་སྲོག་ནས་བོས་ཏེ་བསྐུལ་བས་བླ་མ་འཁོར་བཅས་འོད་དུ་ལྟེམས་ཀྱིས་ཞུ་བས་རང་ལ་ཐིམ་པས་ལྕགས་ལ་གསེར་འགྱུར་གྱིས་རྩིས་ཐེབས་པ་བཞིན་གཉིས་སུ་མེད་པར་ཐུགས་ཡིད་གཅིག་ཏུ་འདྲེས་པར་བསམ་པས། སྤྱིར་བླ་མ་སྒྲུབ་ཚུལ་ལ་སྐབས་འདིར་ཕྱི་གསོལ་འདེབས་སུ་སྒྲུབ་པ་གཙོ་བོ་བཤད་པ་ཡིན་ཡང༌། ནང་བླ་མ་སྐུ་གསུམ་དུ་སྒྲུབ་པའང་བསྒྲུབ་གཞིའི་ངོས་ནས་དབྱེ་བས་རྡོ་རྗེའི་ཚིག་རྐང་བདུན་མའི་སྒེར་སྒྲུབ་དུ་གསལ་བ་གང་འདོད་བསྒོམ་ཞིང༌། སྒྲུབ་བྱེད་སྣང་སྲིད་བླ་མའི་དཀྱིལ་འཁོར་དུ་ཤར་བ་བསྐྱེད་རིམ་ལྷ་སྣང་དང་ཆོས་ཉིད་རང་རིག་དབྱེར་མེད་དུ་ཤེས་པ་རྫོགས་རིམ་ཡིན་ཞིང་དེ་དག་ཀྱང་བསྙེན་སྒྲུབ་ལས་གསུམ་ལ་སྦྱར་དུ་རུང་ཞིང༌། མདོར་ན་ཟབ་ལམ་གྱི་གནད་འདི་ཙམ་ཞིག་ཤེས་པས་སེམས་རྒྱུད་ལ་སྦྱར་བའི་ཉམས་ལེན་བྱས་ནས། བཀའ་གདམས་པའི་གསུང་སྒྲོས་བཞིན་སྣོད་བཅུད་སྡིག་པས་གང་བའི་རྩོད་དུས་སུ་སྐྱེས་ཀྱང༌། དལ་འབྱོར་ལན་གཅིག་ཐོབ་པ་འདི་སྐད་ཅིག་ཀྱང་འཕྲོག་བརླག་མི་ཤོར་བའི་ཆེད་དྲན་ཤེས་བག་ཡོད་མ་བྱས་ན། ལྟར་སྣང་གི་ཆོས་དང་ཡིན་རློམས་ཀྱིས་སྣང་བ་མཐོ་ཡང༌། ཉི་མ་གཅིག་ལ་འཆི་བདག་ཞགས་པས་ཐེབས་དུས་བག་མི་ཚ་བའི་གདེང་མི་འོང་བས་སངས་རྒྱས་གཉིས་པ་བཀའ་དྲིན་ཅན་དེའི་གསོལ་འདེབས་ཀུན་གྱི་ངག་ལ་ཡོད་པ་འདི་ཙམ་ཡང་རྡོ་རྗེའི་ཚིག་རྐང་གསང་ཆེན་ངེས་པའི་རྒྱུད་ཀྱི་རྒྱལ་པོ་རྣམས་དང་དབྱེར་མེད་པས་མཚོན། འབྲེལ་ཚད་དོན་ལྡན་གྱི་ཟབ་དོན་ཐང་མར་བརྡལ་བའི་ཕ་ནོར་གྱི་རིན་ཐང་རང་ངོ་ཤེས་པའི་གསལ་འདེབས་ཙམ་དུ་འདུ་འཛིའི་ཞགས་པས་བསྡམས་ཏེ་ལོག་འཚོའི་ལྕིད་ཀྱིས་ནོན་པའི་གྱི་ན་བ་ཨུ་རྒྱན་སྐྱབས་སམ་བཀྲ་ཤིས་དཔལ་འབྱོར་དུ་འབོད་པའི་མདོ་ཁམས་ནས་འཁྱར་བའི་རྒན་ཁོག་གིས་བྲིས་པ་ཟབ་གནད་མང་དུ་འདུས་པའི་ཨུ་པ་དེ་ཤ་ཡིན་པར་རློམས་པས་ཀུན་གྱིས་གཟིགས་ཏེ་གནད་ཆེ་དོན་ལྡན་ཡིན་མིན་ཐུགས་དཔྱད་མཛད་པར་ཞུ་བ་ལགས་སོ། །རྙིང་མར་ཁས་འཆེ་བན་སྔགས་ཐམས་ཅད་ཀྱིས། །འདི་ཙམ་ཉམས་སུ་བླངས་ཀྱང་ཟབ་དོན་དང༌། །འབྲེལ་སྙམ་དད་སྤྲོའི་སྣང་བ་དཀར་དུས་བྲིས། །སེམས་དང་ཆོས་གཉིས་འདྲེས་པའི་གསོལ་འདེབས་ཞུ། །རྡོ་རྗེའི་བླ་མ་པདྨ་སཾ་བྷ་ཝས། །རྡོ་རྗེའི་གསུང་གི་གསང་བ་ཆ་ཙམ་ཡང༌། །རྡོ་རྗེའི་རྒྱུད་དོན་རྫོགས་ལ་གཟིགས་མཛོད་དང༌། །རྡོ་རྗེའི་ལམ་འདི་ཉི་བཞིན་ལྷམ་མེར་གསལ། །རྡོ་རྗེའི་བཅུད་ལྡན་གདོང་ལྔའི་ནུ་ཞོ་ལ། །རྡོ་རྗེའི་ལྟ་སྒོམ་སྤྱོད་པའི་ནུས་ཕྲ་ཡང༌། །རྡོ་རྗེ་རིན་ཆེན་ལྟ་བུའི་དད་སྣོད་ཀྱིས། །རྡོ་རྗེའི་བཅུད་ལ་མྱངས་ན་འཚེངས་བར་རློམས། །ངག་གི་གསོལ་འདེབས་གདོན་བྱ་མ་མང་ཡང༌། །སེམས་ཀྱི་དད་མོས་གསེར་ཞུན་ལྟར་གཙང་བས། །རྡོ་རྗེའི་ཚིག་རྐང་བདུན་མ་ཁོ་ན་ལ། །འདི་ཕྱིའི་བློ་གཏད་ཆོག་སྙམ་བྲིས་པ་ལགས། །རྣམ་དཀར་དགེ་དེས་མ་གྱུར་ཡིད་ཅན་སྣོད། །སངས་རྒྱས་པདྨའི་ཐུགས་བསྐྱེད་ལྕགས་ཀྱུ་ཡིས། །བཟུང་ནས་སྲིད་ཞིར་མི་གནས་གོ་འཕང་ཆེར། །བགྲོད་པའི་སྐལ་བཟང་ཚེ་འདིར་མངོན་བྱེད་ཤོག །སརྦ་མངྒ་ལཾ། དགེའོ།། །། ༧སྐྱབས་རྗེ་དིལ་མཁྱེན་རིན་པོ་ཆེས།

  • April 2021

    གཏེར་ཆེན་ཉི་མ་གྲགས་པའི་འཁྲུངས་རབས་གསོལ་འདེབས་བསྡུས་པ་བཞུགས་སོ།།

    གཏེར་ཆེན་ཉི་མ་གྲགས་པའི་འཁྲུངས་རབས་གསོལ་འདེབས་བསྡུས་པ་བཞུགས་སོ།། ཧྲཱི༔ སྔོན་ཚེ་འཕགས་པ་སེམས་ཉིད་ངལ་གསོ་ཞེས།། སྟོན་པའི་སྤྱན་སྔར་དགྲ་བཅོམ་བློ་གྲོས་གྲགས།། གུ་རུའི་དྲུང་དུ་མཁོན་ཆེན་ཀླུ་ཡི་དབང་།། མ་འོངས་སངས་རྒྱས་སོ་བདུན་དྲག་པོ་ཆེ།། ཉི་མ་གྲགས་པའི་ཞབས་ལ་གསོལ་བ་འདེབས།། མཆོག་དང་ཐུན་མོང་དངོས་གྲུབ་སྩལ་དུ་གསོལ།། ཁམས་པ་ཉི་མ་གྲགས་པའི་རྣམ་ཐར་མདོར་བསྡུས་བདུད་རྩིའི་རྒྱ་མཚོ་བཞུགས། མཛད་པ་པོ། གཏེར་ཆེན་ཉི་མ་གྲགས་པ། དཔལ་མགོན་བླ་མ་དམ་པའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །འཕོ་ལུང་ཆོས་རྗེའི་སྐྱེ་བར་འབོད་པ་སྤྲང་པོ་རིགས་འཛིན་རྣམ་རྒྱལ་བ་བདག །ཡུལ་མདོ་ཁམས་སྒོམ་སྡེ་ནང་ཆེན་དུ། །བྱམས་མེ་ཀརྨ་རྣམ་རྒྱལ་དང་། བླ་བཟའ་བསོད་ནམས་མཚོ་གཉིས་ཀྱི་བུ་གསུམ་གྱི་འབྲིང་བ་ལ་སྐྱེས་ཤིང་། ཆུང་ངུ་ནས་ཁུ་བོ་བླ་མ་དང་སྤྱི་བུག་ཀརྨ་བྱང་ཆུབ་སོགས་ལ་བུ་སྟོན་ཆོས་འབྱུང་དང་མ་ཎི་བཀའ་འབུམ། རྗེ་བཙུན་གྱི་བཀའ་འབུམ་རྣམས་ཀྱི་ལུང་ཐོབ། ལྷོ་པ་སྐུ་སྐྱེ་དཀོན་མཆོག་འཕྲིན་ལས་རྣམ་རྒྱལ་ལ། ཞི་ཁྲོ་དགོངས་པ་རང་གྲོལ་གྱི་ཁྲོམ་དབང་། ཡང་ཟབ་ཀྱི་དབང་ལུང་ཡོངས་རྫོགས་ཐོབ་སྟག་ལུང་ལོ་ཆེན་སྒྲོག་ར་བ་ཆེན་པོ་ལ་སྒྲུབ་ཐབས་བརྒྱ་རྩ་ཁྲོམ་ཆོས་སུ་ཐོབ། ཆུང་ངུའི་དུས་ནས་སློབ་དཔོན་ཆེན་པོ་ལ་དད་པ་དབང་མེད་དུ་འབར་བ་ཞིག་ཡོད་པའི་སྟབས་ཀྱིས། སྔ་འགྱུར་རྡོ་རྗེ་ཐེག་པའི་རིང་ལུགས་ཀྱི་ཅོད་པན་འཛིན་པ་ཆེན་པོ་མཁས་གྲུབ་ཀྱི་དབང་ཕྱུག་དམ་པ་རྫོགས་ཆེན་པདྨ་རིགས་འཛིན་གྱི་ཞབས་རྡུལ་སྤྱི་བོར་བླངས་པས། ལོ་བཅོ་བརྒྱད་ཀྱི་བར་དུ་སྐུ་དྲིན་བསམ་གྱིས་མི་ཁྱབ་པས་བསྐྱང་། རིགས་འཛིན་འཇའ་ཚོན་སྙིང་པོའི་དཀོན་མཆོག་སྤྱི་འདུས། གུ་རུ་རཏྣ་གླིང་པའི་ཐུགས་སྒྲུབ། དྲག་པོ་དམར་ནག་མེ་འཕྲེང་ཆོས་སྐྱོང་མ་ནིང་། གཟའ་རྒོད་དུག་གི་སྤུ་གྲི། གྲྭ་པ་མངོན་ཤེས་ཀྱི་ཛམ་བྷ་ལ་དམར་པོ། མངའ་བདག་ཉང་གི་དྲག་པོ་དམར་ཆེན། རྟ་ནག་ལྕགས་རལ་ཅན། རྗེ་རཏྣའི་ཚེ་སྒྲུབ་རྡོ་རྗེ་འཕྲེང་བ་དང་ཚེ་སྒྲུབ་གསང་བ་འདུས་པ། སངས་རྒྱས་གླིང་པའི་ཚེ་སྒྲུབ་ཉི་ཟླ་ཁ་སྦྱོར། ནམ་མཁའ་འཇིགས་མེད་ཀྱི་རིགས་འཛིན་སྲོག་སྒྲུབ། བདུད་འདུལ་རྡོ་རྗེའི་སྤྲུལ་སྐུ་སྙིང་ཐིག མི་འགྱུར་རྡོ་རྗེའི་དཔལ་རྣོ་པྲ། མཁས་གྲུབ་ཐམས་ཅད་མཁྱེན་པ་ཀློང་རམ་པས་མཛད་པའི་རྫོགས་པ་ཆེན་པོ་སེམས་ཉིད་ངལ་བསོ། འགྲེལ་པ་ཤིང་རྟ་ཆེན་མོ། སྤྱི་དོན་ལེགས་བཤད་རྒྱ་མཚོ། ཡང་དག་པར་རྫོགས་པའི་སངས་རྒྱས་ཀྱི་སྐྱེས་རབ་བརྒྱ་རྩ། པདྨ་བཀའི་ཐང་ཡིག་ཤེལ་བྲག་མ། རྡོ་རྗེ་གླིང་པས་གཏེར་ནས་སྤྱན་དྲངས་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོ། རྒྱུད་རྒྱལ་གསང་བ་སྙིང་པོ། བཀའ་བརྒྱད་གསང་བ་ཡོངས་རྫོགས་ཀྱི་དབང་མོ་ཆེ་དང་འདོན་ཆོག་གི་ལུང་། ཞི་ཁྲོ་དགོངས་པ་རང་གྲོལ་གྱི་དབང་ལུང་ཡོངས་རྫོགས་དང་དབང་བསྡུས་པ་གཏོར་དབང་རེག་པ་དོན་ལྡན། ལབ་ཀྱི་སྒྲོལ་མའི་གཅོད་ཟབ་དོན་ཐུགས་ཀྱི་ཉིང་ཁུ་དང་གཅོད་དབང་ནམ་མཁའ་སྒོ་འབྱེད། བཀའ་རྫོགས་པ་ཆེན་པོ་མཁའ་འགྲོ་སྙིང་ཐིག་གི་དབང་ལུང་ཡོངས་རྫོགས་དང་། ཟབ་ཁྲིད་ཆེན་མོ་ཉམས་ཁྲིད་དུ་ཐོབ། གནས་མཆོག་ཆེན་པོ་དཔལ་རྩྭ་རི་ཏྲ་རུ་ས་སྤྲེལ་ལ་སོང་ཞིང་། དག་པ་ཤེལ་རིའི་བྱང་ཤར་གྱི་མཚམས་སུ་ཨོ་རྒྱན་སངས་རྒྱས་གཉིས་པའི་བྱིན་གྱིས་བརླབས་པའི་གནས་མཆོག་དཔལ་རི་ཟླུམ་ཅན་བསྐལ་བཟང་སངས་རྒྱས་སྟོང་གི་ཕོ་བྲང་མཚོ་ཆེན་པོ་བརྒྱ་རྩ་བརྒྱད་ཀྱིས་བསྐོར་བ་མཁའ་འགྲོ་མ་བསྒྲུབ་རང་བཞིན་འདུ་བའི་གནས་མཆོག་སྦས་པའི་ལུང་དབེན་པའི་གནས་ཟབ་ལམ་རྡོ་རྗེ་རྭ་བ་ཞེས་བྱ་བར་ལོ་གསུམ་གྱི་བཅད་རྒྱའི་ཁོངས་ནས། དཔལ་རྫོགས་ཆེན་པ་ལ་བཀའ་རྫོགས་པ་ཆེན་པོ་སྡེ་གསུམ་ཀློང་དགུ་མན་ངག་བརྒྱད་ཅུ་རྩ་བཞི་ཤོ་ལོ་ཀ་འབུམ་ཕྲག་དྲུག་ཅུའི་སྙིང་པོ་གཅིག་ཏུ་དྲིལ་བ་བཀའ་རྫོགས་པ་ཆེན་པོ་གསང་བ་སྙིང་གི་ཐིག་པའི་དབང་ཁྲིད་ལུང་མན་ངག་ཞལ་གདམས་དང་བཅས་པ། ཡིད་བཞིན་རིན་པོ་ཆེའི་མཛོད་ཀྱི་ཁྲིད། རྫོགས་པ་ཆེན་པོ་སེམས་ཉིད་ངལ་བསོ། སྒྱུ་མ་ངལ་བསོ། བསམ་གཏན་ངལ་བསོ་སྟེ་ངལ་བསོ་སྐོར་གསུམ་གྱི་ཁྲིད། རིགས་འཛིན་ཆེན་པོ་རཏྣ་གླིང་པའི་གུ་རུའི་གསང་ཁྲིད་རིམ་ལྔ་ཞེས་བྱ་བ་ཁྲིད་ཆེན་ལྔ་ཡོངས་རྫོགས་ཉམས་ཁྲིད་དུ་ཐོབ་ཅིང་མཚུངས་མེད་རིན་པོ་ཆེས་ཐུགས་རྗེས་བཟུང་བས་ཀ་དག་གི་ཡེ་ཤེས་རང་ཞལ་མཇལ་ཏེ་འཁོར་བ་དོང་སྤྲུགས། སྲིད་པ་ཕྱིར་བསྙིལ། བག་ཆགས་དྲུང་ཕྱུངས། ཀུན་བཟང་འཁོར་ལོ་ཚོགས་ཆེན་གྱི་གོ་འཕང་ལ་བཀོད་དོ། མཆོག་གི་སྤྲུལ་སྐུ་རྡོ་རྗེ་བྲག་པའི་སྐུ་གཞོགས་ནས་རིགས་འཛིན་ཆེན་པོ་རྒོད་ཀྱི་ལྡེམ་འཕྲུའི་གཏེར་ཁའི་ཐུགས་རྗེ་ཆེན་པོ། རྡོ་རྗེ་ཕག་མོ་རྒོད་ལྡེམ་པའི་གཏེར་མ། དུམ་པ་རྒྱ་ཞང་ཁྲོམ་ཆེན་པོའི་གཏེར་མ་འཇམ་དཔལ་གཤིན་རྗེ་ཚེ་བདག་ནག་པོའི་དབང་ལུང་དང་བཅས་པ་ཐོབ། པད་གླིང་གསུམ་པ་ཞབས་དྲུང་གསུང་སྤྲུལ་རིན་པོ་ཆེའི་སྐུ་གཞོགས་ནས་རིགས་འཛིན་པདྨ་གླིང་པའི་ཚེ་སྒྲུབ་རྡོ་རྗེ་འོད་ཀྱི་འཕྲེང་བའི་དབང་ལུང་ཐོབ། ཞབས་དྲུང་བསྟན་འཛིན་འགྱུར་མེད་རྡོ་རྗེའི་སྐུ་གཞོག་ནས་འདུས་པ་མདོ་དབང་ཆེན་མོ་དཀྱིལ་འཁོར་བརྒྱ་དྲུག་ཅུ་པའི་དབང་མོ་ཆེ་ཡོངས་རྫོགས། ཐམས་ཅད་མཁྱེན་པ་ཀློང་རམ་སྨྲ་བའི་སེངྒེའི་ཞབས་ཀྱིས་མཛད་པའི་བསྟན་བཅོས་ཡིད་བཞིན་རིན་པོ་ཆེའི་མཛོད། གྲུབ་མཐའ་རིན་པོ་ཆེའི་མཛོད། ཐེག་མཆོག་རིན་པོ་ཆེའི་མཛོད། གནས་ལུགས་རིན་པོ་ཆེའི་མཛོད། ཆོས་དབྱིངས་རིན་པོ་ཆེའི་མཛོད། ཚིག་དོན་རིན་པོ་ཆེའི་མཛོད། མན་ངག་རིན་པོ་ཆེའི་མཛོད་དང་བཅས་པའི་གདམ་པ་མཐའ་རྒྱས་ཐོབ། གདན་ས་ཆེན་པོ་སྨྲ་བོ་ལྕོག་ཏུ་མངའ་བདག་ཉང་ཉི་མ་འོད་ཟེར་གྱི་གདུང་རབས་བཅོ་ལྔ་པ་མངའ་བདག་ཆོས་ཀྱི་དབང་པོའི་ཞབས་དྲུང་ནས། བཀའ་བརྒྱད་བདེ་གཤེགས་འདུས་པ་པུ་ཏི་བཅུ་གཉིས། དབང་སྒྲུབ་ཆེན་དང་འབྲེལ་བ་གཅིག །སྨན་སྒྲུབ་དང་འབྲེལ་བ་གཅིག་དང་ཚར་གཉིས། གཏེར་མགོན་ཕྱག་བཞི་པ་ཐུགས་རྗེ་ཁྲོས་མ་ནག་མོ། ཉང་རལ་པའི་རྣམ་ཐར་གཏེར་འབྱུང་རྣམས་ཀྱི་དབང་ལུང་ཡོངས་རྫོགས་ཐོབ། ལྷོ་བྲག་མཁར་ཆུར་སྒམ་པོ་སྤྲུལ་སྐུ་ལ་རོ་སྙོམས་རྒྱ་གཞུང་ཞུས། རིགས་འཛིན་གུ་རུ་ཆོས་དབང་གི་གདུང་བརྒྱུད་དཔལ་འབྱོར་རྒྱ་མཚོ་ལ། བཀའ་རྫོགས་པ་ཆེན་པོ་སངས་རྒྱས་མཉམ་སྦྱོར། ཐུགས་རྗེ་ཆེན་པོ་ཡང་སྙིང་འདུས་པ། ཐུགས་རྗེ་ཆེན་པོ་འཁོར་བ་དོང་སྤྲུགས། ཐུགས་སྒྲུབ་གསང་བ་འདུས་པ། བཀའ་བརྒྱད་གསང་བ་ཡོངས་རྫོགས་ཀྱི་ལུང་ཕལ་མོ་ཆེ་རྣམས་ཐོབ། རས་ཆུང་སྤྲུལ་སྐུ་ལ་ལུང་འབྲེལ་ཕྲན་བུ་ཐོབ། འཕྱོང་རྒྱས་དཔལ་རི་སྤྲུལ་སྐུ་ལ་བླ་མ་དགོངས་པ་འདུས་པའི་དབང་གི་སྐོར་ཡོངས་རྫོགས། པདྨ་བཀའི་ཐང་ཡིག་སྡེ་ལྔའི་ལུང་རྣམས་ཐོབ། དྭགས་པོ་སྤྲུལ་སྐུ་ལ། དྭགས་པོ་བཀའ་འབུམ་གྱི་ལུང་དང་། ཞབས་དྲུང་རྒྱལ་སྲས་ལས་གསོ་རིགས་རྒྱུད་བཞི་ཐོབ། མཁས་གྲུབ་བྱ་བྲལ་ཆོས་རྗེའི་གདུང་བརྒྱུད་ལྷ་ཡུལ་བླ་མ་རིགས་འཛིན་ལ་མཁའ་འགྲོ་སྙིང་ཐིག་དང་གསང་བ་སྙིང་ཐིག་གི་བསྡུས་དོན་ཤིན་ཏུ་ཟབ་པའི་སྙིང་པོ་ཀུན་མཁྱེན་ཀློང་རམ་ཞབས་ཀྱིས་མཛད་པའི་ཟབ་ཁྲིད་རིན་ཆེན་གསེར་འཕྲེང་དང་རིན་ཆེན་གསེར་སྐྱེད་ཀྱི་ལུང་ཐོབ། གཉགས་ཆེན་ཛྙཱ་ནའི་གདུང་བརྒྱུད་ཆོས་རྗེ་བྲེས་པ་ནས། བཀའ་རྫོགས་པ་ཆེན་པོ་ཡང་གསང་བླ་ན་མེད་པ་ཟབ་མོ་སྙིང་ཐིག་གི་དབང་ལུང་ཡོངས་རྫོགས་སུ་ཐོབ། རྣམ་འབྱོར་པ་ཉི་ཟླ་ཀློང་གསལ་ལ་རིགས་འཛིན་བསྟན་གཉིས་གླིང་པའི་གཏེར་ཁའི་ཟབ་རྒྱ།…