ཨེ་ཝྃ་ཧོ།

༈ སྡེ་གསུམ་ཀློང་དགུའི་ཤིང་རྟ་ཆེན་པོ་ཀུན་མཁྱེན་ཀློང་ཆེན་རབ་འབྱམས་ཀྱི་འདས་ལོ་ ༦༦༡ འཁོར་བའི་རྗེས་དྲན་བསུ། ༄༅། །ཀུན་མཁྱེན་ཆེན་པོའི་བླ་མའི་རྣལ་འབྱོར་བཞུགས། ཨཱཿ འོད་གསལ་ལྷུན་གྲུབ་འཇའ་ཟེར་ཐིག་ལེའི་ཀློང་། །ཀ་དག་གདོད་མའི་མགོན་པོ་ཀློང་ཆེན་པ། །དཀར་གསལ་མཛེས་མཛུམ་ངལ་གསོས་ཕྱག་རྒྱ་ཅན། །དྲན་པས་མཆོག་གཏེར་སྐྱབས་ཀུན་ངོ་བོར་གསལ། །ཡེ་ཤེས་སྐུ་ཅན་གདོད་མའི་མགོན་པོ་ལ། །གུས་པས་ཕྱག་འཚལ་མཆོད་འབུལ་གསོལ་བ་འདེབས། །ཚེ་རབས་ཕྲེང་བར་འབྲལ་མེད་རྗེས་བཟུང་ལ། །ཐུགས་ཡིད་གཅིག་ཏུ་འདྲེས་པར་བྱིན་གྱིས་བརློབ། །ཞེས་དང་། ཨོཾ་ཨཱཿཧཱུྃ་བཛྲ་མ་ཧཱ་གུ་རུ་བི་མ་ལ་རསྨི་སརྦ་སིདྡྷི་ཧཱུྃཿ ཞེས་བཟླས་མཐར། བླ་མ་དགྱེས་པས་འོད་ཞུ་རང་ལ་ཐིམ། །ཡེ་ཤེས་དགོངས་པའི་རྩལ་དབང་སེམས་ལ་རྫོགས། །རིག་སྟོང་ཆོས་ཟད་དགོངས་པ་བླ་མའི་ཞལ། །དུས་བཞི་མཉམ་ཉིད་ཀློང་དུ་ཨེ་མ་ཧོ། ། ཞེས་མོད་ལ་མཉམ་པར་བཞག་གོ །ཞེས་པའང་རང་བཞིན་རྫོགས་པ་ཆེན་པོའི་རྣལ་འབྱོར་བ་བླ་མ་དམ་པ་འོད་གསལ་འཇའ་ལུས་རྡོ་རྗེའི་ཐུགས་བཞེད་བཞིན་པདྨ་དགྱེས་པས་བྲིས་པའོ། ། ༈ གངས་རི་ཐོད་དཀར་རིན་ཆེན་སྙིང་པོའི་མགུལ། །ཡོན་ཏན་ཀུན་འབྱུང་དགའ་བའི་སྐྱེད་ཚལ་དུ། ། སྙིང་པོའི་དོན་གཟིགས་སྦས་པའི་རྣལ་འབྱོར་བ། །ཀློང༵་ཆེ༵ན་ར༵བ་འབྱམ༵ས་ཞབས་ལ་གསོལ་བ་འདེབས།། ཉིད་ཀྱི་ཞལ་གསུང་ལགས། ༈ རྒྱལ་བ་ཀུན་ཀྱི་ཡེ་ཤེས་གཅིག་བསྡུས་པ། །མཁྱེན་རབ་ཆོས་ཀྱི་ཉི་མ་འབྱམས་སུ་ཀླས། ། ཀློང༵་ཆེ༵ན་ར༵བ་འབྱམ༵ས་ཞབས་ལ་གསོལ་བ་འདེབས། །ཕྱོགས་མེད་ཤེས་རབ་མཆོག་གི་དངོས་གྲུབ་སྩོལ། ། རིག་འཛིན་འཇིགས་མེད་གླིང་པས། ༈ ཆོས་ཟད་ཀློང་དུ་ཆོས་སྐུའི་དགོངས་པ་བརྙེས། །འོད་གསལ་དབྱིངས་སུ་ལོངས་སྐུའི་ཞིང་སྣང་གཟིགས། ། གདུལ་བྱའི་སྣང་ངོར་སྤྲུལ་སྐུའི་འགྲོ་དོན་མཛད། །ཀུན༵་མཁྱེན༵་ཆོ༵ས་ཀྱི༵་རྒྱལ༵་པོ་ལ་ཕྱག་འཚལ། ། ཨོ་རྒྱན་འཇིགས་མེད་ཆོས་ཀྱི་དབང་པོས། ༈ ཆོས་ཀུན་མཉམ་པ་ཉིད་ཀྱི་གཞི་དབྱིངས་སུ། །རང་སྣང་སྐུ་གསུམ་རོལ་བའི་རྩལ་རྫོགས་པའི། ། སྒྲིབ་བྲལ་གདོད་མའི་མགོན་པོ་ཀློང་ཆེན་པ། །དྲི༵་མེ༵ད་འོ༵ད་ཟེ༵ར་ཞབས་ལ་གསོལ་བ་འདེབས། ། འཇམ་མགོན་མི་ཕམ་པ་མཆོག་གིས། ༈ ཀ་དག་ཆོས་སྐུའི་དགོངས་པ་མངོན་དུ་གྱུར། །རང་སྣང་ལོངས་སྐུའི་སྤྲིན་ཆེན་ཚོམ་བུར་བཀོད། ། སྣ་ཚོགས་སྤྲུལ་བ་རྒྱ་མཚོའི་འགྲོ་ཁམས་འདུལ། །ཀློང༵༵་ཆེ༵ན་ཆོ༵ས་ཀྱི༵་རྒྱ༵ལ་པོ༵ར་གཙུག་གིས་བསྟེན། ། ཀུན་གཟིགས་མཁན་ཆེན་བླ་མས་གསུང་། ༸ཀུན་མཁྱེན་བླ་མ་མཁྱེན་ནོ། ཨེ་མ་ཧོ༔ ཀ་དག་ཆོས་ཀུན་མཉམ་ཉིད་ཀུན་དབྱིངས་སུ།། ལྷུན་གྲུབ་རང་སྣང་སྐུ་གསུམ་རོལ་རྩལ་རྫོགས།། ཀུན་བཟང་གདོད་མའི་མགོན་པོ་ཀློང་ཆེན་པ།། ཀུན་མཁྱེན་རྒྱལ་བའི་དབང་པོར་གསོལ་བ་འདེབས།། འགྲོ་ཀུན་སྨིན་གྲོལ་ནུས་པར་བྱིན་གྱིས་རློབས།། ཨོྃ་བུདྡྷ་ཛྙཱ་ན་སརྦ་སིདྡྷི་ཕ་ལ་ཧཱུྃ་ཨ། ཐོ་རངས་ཁར་འོད་གསལ་དག་པའི་ཞིང་ཁམས་ནས་ཤྲཱིཿ ཨེ་མ་ཧོས་ཡོ་ཀར་གླིང་གི་མགྲོན་ཁང་ནས་རྩེ་གཅིག་ཏུ་སྨོན་པར་དོན་དང་ལྡན་པར་གྱུར་ཅིག་གུ།། །། 28/1/2024 in York Hotel Taipei

སྔ་འགྱུར་བསྟན་པ་རྒྱས་པའི་སྨོན་ལམ་ཆོས་རྒྱལ་དགྱེས་པའི་ཞལ་ལུང་ཞེས་བྱ་བ་བཞུགས་སོ།། དེ་ཡང་དུས་ཀྱི་ཐ་མར་རྩ་གསུམ་ལྷ་ཡི་ཐུགས་རྒྱུད་བསྐུལ་ནས་བསྟན་པའི་སྙིང་པོ་རིན་པོ་ཆེ་རྒྱས་པར་གྱུར་ཅིག་སྙམ་དུ་ལན་གཅིག་ཙམ་མོས་པ་ཡང་བསོད་ནམས་ཚད་མེད་པ་དང་ལྡན་ཞིང་། རྒྱལ་བའི་སྲས་ཀྱི་སྨོན་ལམ་ཡོངས་སུ་རྫོགས་ནས་སྐྱེ་བ་ཀུན་ཏུ་རྒྱལ་བའི་ཆོས་དང་ཆོས་ཀྱི་སྙིང་པོ་ཟབ་མོའི་ཐེག་པ་དང་འཕྲད་ནས་འཛིན་སྐྱོང་སྤེལ་བས་མྱུར་དུ་རྣམ་པ་ཐམས་ཅད་མཁྱེན་པའི་ཡེ་ཤེས་ལ་རེག་པར་འགྱུར་བའི་དགོས་པ་ཡོད་པས། སྐལ་བཟང་རྣམས་ཀྱིས་དུས་དུས་དང་། ཁྱད་པར་ཚོགས་མང་གི་སྐབས་སུ་འདི་ལྟར་སྨོན་ལམ་གདབ་པར་བྱ་སྟེ།། ན་མོ། ཕྱོགས་བཅུའི་བདེ་བར་གཤེགས་པ་སྲས་དང་བཅས། །ཁྱད་པར་མཉམ་མེད་ཤཱཀྱའི་རྒྱལ་པོ་དང་། །རྒྱལ་སྲས་བརྒྱད་དང་གནས་བརྟན་འཕགས་པའི་ཚོགས། །མཁྱེན་བརྩེའི་བདག་ཉིད་མཆོག་རྣམས་དགོངས་སུ་གསོལ། །ཕན་བདེའི་འབྱུང་གནས་བསྟན་པ་རིན་པོ་ཆེ། །སྟོན་དང་སེམས་དཔའ་འཕགས་པ་མཆོག་རྣམས་ཀྱིས། །ཡང་ཡང་དཀའ་བས་བཙལ་ཞིང་བརྣགས་པའི་དོན། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །མཁན་སློབ་ཆོས་རྒྱལ་སྤྲུལ་པའི་ལོ་པཎ་དང་། །བཀའ་གཏེར་རིག་འཛིན་བརྒྱུད་པ་ཡི་དམ་ལྷ། །མ་མགོན་གཟའ་རྡོར་བརྒྱུད་གསུམ་དྲེགས་པའི་ཚོགས། །སྔ་འགྱུར་རྩ་གསུམ་ལྷ་ཚོགས་དགོངས་སུ་གསོལ། །ཐུབ་བསྟན་མདོ་དང་སྔགས་ཀྱི་ཚུལ་མཐའ་དག །གངས་ཅན་ལྗོངས་སུ་བརྩེ་བས་དྲངས་གྱུར་པ། །ཆེས་ཆེར་སྤེལ་བའི་རྡོ་རྗེའི་དམ་དགོངས་ནས། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཕྱོགས་དུས་རྒྱལ་བའི་སྐུ་གསུང་ཐུགས་རྡོ་རྗེའི། །རིགས་གསུམ་སེམས་དཔའི་སྒྱུ་འཕྲུལ་རོལ་མོ་ཡིས། །གངས་ཅན་ཕན་བདེའི་ཉི་མ་གསལ་བར་མཛད། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱལ་དང་རྒྱལ་སྲས་འཕགས་པ་ཆེན་པོའི་ཚོགས། །བསམ་བཞིན་སྤྲུལ་པའི་ཟློས་གར་ཉེར་བཟུང་ནས། །དྲི་མེད་རྒྱལ་བསྟན་ནོར་བུའི་རྒྱལ་མཚན་བསྒྲེངས། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཐུན་མོང་ཐུན་མིན་གཞུང་ཀུན་རང་དབང་གིས། །མ་ནོར་བསྒྱུར་ཞུས་གཏན་ལ་ཕབ་པ་ཡིས། །གངས་ལྗོངས་སྣང་བའི་སྒོ་ཆེན་ཐོག་མར་ཕྱེས། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །སྐལ་བཟང་གདུལ་བྱས་མདོ་དང་སྔགས་ཀྱི་ཚུལ། །ཉམས་སུ་ལེན་ལ་གཞན་དྲིང་མི་འཇོག་པར། །བཀའ་དང་དགོངས་པ་འགྲེལ་བའི་གཞུང་ཀུན་རྫོགས། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །བདེན་གསུངས་བཀའ་ཡི་རྒྱ་མཚོ་ཆེན་པོ་ལ། །ཟབ་མོའི་ཆོས་གཏེར་ནོར་བུའི་མངོན་པར་མཛེས། །མདོ་དང་སྔགས་ཀྱི་ལམ་བཟང་ཟུང་དུ་འབྲེལ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྨད་བྱུང་ཟ་ཧོར་མཁན་པོའི་སྤྱོད་པ་དང་། །མཚུངས་མེད་དཔལ་ལྡན་ཀླུ་ཡི་ལྟ་བ་གཉིས། །ཟུང་འབྲེལ་བརྒྱུད་པའི་བཀའ་སྲོལ་ཕྱག་རྒྱས་བཏབ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཟབ་མོའི་ནང་རྒྱུད་སྡེ་གསུམ་དགོངས་པའི་བཅུད། །ཐུན་མིན་མན་ངག་གསང་བའི་ལམ་མཆོག་ནས། །འཇའ་ལུས་ཆོས་སྐུར་གཤེགས་པའི་ངོ་མཚར་འབར་། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རབ་འབྱམས་ཞི་ཁྲོའི་ཁྱབ་བདག་སྒྲུབ་སྡེ་བརྒྱད། །བཀའ་བབས་རིག་འཛིན་སོ་སོའི་དགོངས་བཅུད་དང། །ཀུན་འདུས་པདྨའི་བཀའ་སྲོལ་གཅིག་ཏུ་འཁྱིལ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱུ་དང་འབྲས་བུ་གསང་སྔགས་ཐེག་པ་ཆེ། །ཚང་ལ་མ་ནོར་རིག་འཛིན་བརྒྱུད་པའི་ལུང་། །ཌཱ་ཀིའི་ཞལ་གྱི་དྲོད་རླངས་ཐོ་ལེ་བ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྡོ་རྗེ་འཆང་གི་དགོངས་དོན་བདུད་རྩིའི་བཅུད། །མཁས་གྲུབ་བྱེ་བའི་ཞལ་ནས་སྙན་དུ་བརྒྱུད། །རྟོག་གེ་ངན་པས་རང་བཟོས་མ་བསླད་པར། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །གསེར་ཞིང་ནོར་བུས་སྤྲས་པའི་ཡོན་གྱིས་ཀྱང་། །མི་འགུགས་དབྱིངས་ཀྱི་མཁའ་འགྲོའི་ཐུགས་མཛོད་ཆོས། །བརྩེ་བས་རྗེས་འཇུག་སྐལ་བ་ཁོ་ནར་བཀྲམ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ངོ་བོ་ཀ་ནས་དག་པའི་ཡེ་ཤེས་ལ། །རང་བཞིན་ལྷུན་གྱིས་གྲུབ་པའི་གདངས་ཤར་བས། །བླུན་སྒོམ་སེམས་ལས་འདས་པའི་རྫོགས་པ་ཆེ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཡོད་མེད་ཕྱོགས་རེར་ཞེན་པའི་དམིགས་གཏད་ཞིག །མཐར་འཛིན་ལྟ་བའི་འཛིན་སྟངས་དྲུང་ནས་ཕྱུང་། །གཞི་ལམ་འབྲས་བུ་སྣང་སྟོང་ཟུང་དུ་འཇུག །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །དུས་གསུམ་རྒྱལ་བའི་དགོངས་པ་མཐར་ཐུག་དོན། །ཟབ་ཞི་སྤྲོས་བྲལ་འོད་གསལ་འདུས་མ་བྱས། །རིག་སྟོང་མི་ཤིགས་རྡོ་རྗེའི་གྲུབ་པའི་མཐའ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །མང་དུ་ཐོས་པ་ལུང་གིས་སྤྲིན་འཁྲིགས་ཤིང་། །ཕ་རོལ་རྒོལ་འཇོམས་རིགས་པའི་གློག་ཕྲེང་འབར། །མན་ངག་གནད་ཀྱི་བདུད་རྩི་སྙིང་ལ་སིམ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྨད་བྱུང་ཨ་ཏི་ཡོ་གའི་གསང་ལམ་ནས། །མ་ལུས་རྒྱལ་བ་ཀུན་གྱི་ཡེ་ཤེས་སྐུ། །ཁྱབ་བདག་འཇམ་དཔལ་རྡོ་རྗེར་རབ་བསྒྲུབས་པ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །ཡང་དག་ཚད་མ་གསུམ་གྱི་ང་རོ་ཡིས། །ལྟ་དམན་རི་དྭགས་ཚོགས་རྣམས་སྐྲག་མཛད་པ། །ཐེག་མཆོག་སེངྒེའི་སྒྲ་དབྱངས་ས་གསུམ་ཁྱབ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག །རྒྱལ་བསྟན་ཡོངས་སུ་རྫོགས་པའི་གོས་བཟང་རྩེར། །འོད་གསལ་རྡོ་རྗེ་སྙིང་པོའི་ཏོག་མཛེས་པ། །ཕྱོགས་ལས་རྣམ་པར་རྒྱལ་བའི་རྒྱལ་མཚན་མཐོ། །མཚོ་སྐྱེས་རྒྱལ་བའི་བསྟན་པ་རྒྱས་གྱུར་ཅིག…

མ་ཧཱ་ཀ་ལའི་གསོལ་མཆོད་གང་བསམ་ལྷུན་གྲུབ་ ཅེས་བྱ་བ་བཞུགས་སོ།། ཧཱུྃ་ཧྲཱིཿ་ཧཱུྃ།། ༼༡༽ སྲིན་ཡུལ་ལང་ཀའི་གྲོང་བརྡལ་ཀྱི།། དབུས་ཀྱི་རི་བོ་མ་ལ་ཡར།། ཀོ་ཀ་ཐང་དམར་རྒྱ་མཚོའི་དོ།། དྲག་ཤུལ་དུར་ཁྲོད་ཁྱབ་པར་བརྡལ།། ༼༢༽ གནམ་ལྕག་འབར་བའི་རྩེ་མོ་ན།། དཔལ་ལྡན་མ་ཧཱ་ཀ་ལ་ཆེ།། ཚུར་བྱོན་ཚུར་བྱོན་ད་ཚུར་བྱོན།། དམ་ཚིག་དབང་གིས་མཆོད་སྤྲིན་བཞེས།། ༼༣༽ ཕྱི་མཆོད་འདོན་ཡོན་སྣ་ཚོགས་མཆོད།། ནང་མཆོད་སྨན་རཀ་བདུད་རྩིས་མཆོད།། གསང་མཆོད་ཡེ་ཤེས་ཀུན་བཟང་མཆོད།། གང་བསམ་ལྷུན་གྱིས་གྲུབ་པར་མཛོད།། ཨོྃ་ཤྲཱི་མ་ཧཱ་ཀ་ལ་ཧཱུྃ་ཕཊཿ ཤྲཱིཿ་གླིང་པས་སོ། ༣/༡/༢༠༢༤། 3/1/2024

བཀྲ་ཤིས་བརྒྱད་པ་བཞུགས།ཨོཾ།།སྣང་སྲིད་རྣམ་དག་རང་བཞིན་ལྷུན་གྲུབ་པའི། །བཀྲ་ཤིས་ཕྱོགས་བཅུའི་ཞིང་ན་བཞུགས་པ་ཡི། །སངས་རྒྱས་ཆོས་དང་དགེ་འདུན་འཕགས་པའི་ཚོགས། །ཀུན་ལ་ཕྱག་འཚལ་བདག་ཅག་བཀྲ་ཤིས་ཤོག །སྒྲོན་མེའི་རྒྱལ་པོ་རྩལ་བརྟན་དོན་འགྲུབ་དགོངས། །བྱམས་པའི་རྒྱན་དཔལ་དགེ་གྲགས་དཔལ་དམ་པ། །ཀུན་ལ་དགོངས་པ་རྒྱ་ཆེར་གྲགས་པ་ཅན། །ལྷུན་པོ་ལྟར་འཕགས་རྩལ་གྲགས་དཔལ་དང་ནི། །སེམས་ཅན་ཐམས་ཅད་ལ་དགོངས་གྲགས་པའི་དཔལ། །ཡིད་ཚིམས་མཛད་པ་རྩལ་རབ་གྲགས་དཔལ་ཏེ། །མཚན་ཙམ་ཐོས་པས་བཀྲ་ཤིས་དཔལ་འཕེལ་བ། །བདེ་བར་གཤེགས་པ་བརྒྱད་ལ་ཕྱག་འཚལ་ལོ། །འཇམ་དཔལ་གཞོན་ནུ་དཔལ་ལྡན་རྡོ་རྗེ་འཛིན། །སྤྱན་རས་གཟིགས་དབང་མགོན་པོ་བྱམས་པའི་དཔལ། །ས་ཡི་སྙིང་པོ་སྒྲིབ་པ་རྣམ་པར་སེལ། །ནམ་མཁའི་སྙིང་པོ་འཕགས་མཆོག་ཀུན་ཏུ་བཟང༌། །ཨུཏྤལ་རྡོ་རྗེ་པད་དཀར་ཀླུ་ཤིང་དང༌། །ནོར་བུ་ཟླ་བ་རལ་གྲི་ཉི་མ་ཡི། །ཕྱག་མཚན་ལེགས་བསྣམས་བཀྲ་ཤིས་དཔལ་གྱི་མཆོག །བྱང་ཆུབ་སེམས་དཔའ་བརྒྱད་ལ་ཕྱག་འཚལ་ལོ། །རིན་ཆེན་གདུགས་མཆོག་བཀྲ་ཤིས་གསེར་གྱི་ཉ། །འདོད་འབྱུང་བུམ་བཟང་ཡིད་འོང་ཀཱ་མ་ལ། །སྙན་གྲགས་དུང་དང་ཕུན་ཚོགས་དཔལ་བེའུ། །མི་ནུབ་རྒྱལ་མཚན་དབང་བསྒྱུར་འཁོར་ལོ་སྟེ། །རིན་ཆེན་རྟགས་མཆོག་བརྒྱད་ཀྱི་ཕྱག་མཚན་ཅན། །ཕྱོགས་དུས་རྒྱལ་བ་མཆོད་ཅིང་དགྱེས་བསྐྱེད་མ། །སྒེག་སོགས་ངོ་བོ་དྲན་པས་དཔལ་སྤེལ་བའི། །བཀྲ་ཤིས་ལྷ་མོ་བརྒྱད་ལ་ཕྱག་འཚལ་ལོ། །ཚངས་པ་ཆེན་པོ་བདེ་འབྱུང་སྲེད་མེད་བུ། །མིག་སྟོང་ལྡན་དང་རྒྱལ་པོ་ཡུལ་འཁོར་སྲུང༌། །འཕགས་སྐྱེས་པོ་དང་ཀླུ་དབང་མིག་མི་བཟང༌། །རྣམ་ཐོས་སྲས་ཏེ་ལྷ་རྫས་འཁོར་ལོ་དང༌། །ཏྲི་ཤུ་ལ་དང་མདུང་ཐུང་རྡོ་རྗེ་ཅན། །པི་ཝཾ་རལ་གྲི་མཆོད་རྟེན་རྒྱལ་མཚན་འཛིན། །ས་གསུམ་གནས་སུ་དགེ་ལེགས་བཀྲ་ཤིས་སྤེལ། །འཇིག་རྟེན་སྐྱོང་བ་བརྒྱད་ལ་ཕྱག་འཚལ་ལོ། །བདག་ཅག་དེང་འདིར་བྱ་བ་རྩོམ་པ་ལ། །བགེགས་དང་ཉེ་བར་འཚེ་བ་ཀུན་ཞི་ནས། །འདོད་དོན་དཔལ་འཕེལ་བསམ་དོན་ཡིད་བཞིན་འགྲུབ། །བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག། །།ལྡང་ཚེ་བརྗོད་ན་དེ་ཉིན་དོན་ཀུན་འགྲུབ། །ཉལ་ཚེ་བརྗོད་ན་རྨི་ལམ་བཟང་པོར་མཐོང༌།།གཡུལ་དུ་འཇུག་ཚེ་བརྗོད་ན་ཕྱོགས་ལས་རྒྱལ།།བྱ་བ་རྩོམ་དུས་བརྗོད་ན་འདོད་དོན་འཕེལ།།རྒྱུན་དུ་བརྗོད་ན་ཚེ་དཔལ་གྲགས་འབྱོར་ཤིས།།བདེ་ལེགས་ཕུན་ཚོགས་བསམ་དོན་ཡིད་བཞིན་འགྲུབ།།སྡིག་སྒྲིབ་ཀུན་བྱང་མངོན་མཐོ་ངེས་ལེགས་ཀྱི།།དོན་ཀུན་འགྲུབ་པ་རྒྱལ་བ་མཆོག་གིས་གསུངས།།རབ་ཚེས་མེ་སྤྲེལ་ཟླ་ལྔ་ཚེས་གསུམ་ཉི་མ་དང་རྒྱུ་སྐར་རྒྱལ་གྱི་དུས་བཟང་པོའི་ཆ་ལ་འཇམ་དཔལ་དགྱེས་པའི་རྡོ་རྗེའི་ཡིད་མཚོ་ལས་བྱུང་བའི་ནོར་བུའི་དོ་ཤལ་ཆེན་པོའོ།།

༡ ཨེ་མ་གདམས་ངག་སྟོན་པའི་བླ་མ་ཁྱེད་མཁྱེན་ནོ།། བདག་གིས་ཡང་ཡང་བསམ་ན་བཀའ་དྲིན་རེ་དྲན་ནོ།། སྲིད་པའི་ཆུ་ཀླུང་དྲག་པོའི་རྦ་རླབས་ལ་གཡེང་ཚེ།། བརྩེ་བའི་ཕྱག་གིས་དྲངས་བའི་བཀའ་དྲིན་རེ་དྲན་ནོ།། ༢ སྐྱ་སེར་བྱ་བ་ཅི་བྱེད་ངེས་མེད་ལ་འཕྱན་ཚེ།། ངུར་སྨྲིག་ཆས་ལ་སྦྱོར་བའི་བཀའ་དྲིན་རེ་དྲན་ནོ།། འདོད་ཆགས་དུག་ཆུའི་ནད་ཀྱིས་གཟིར་བ་ཡི་དུས་ན།། མ་ཆགས་བདུད་རྩིས་འཚོ་བའི་བཀའ་དྲིན་རེ་དྲན་ནོ།། ༣ ཞེ་སྡང་མེ་ཡིས་འདི་ཕྱིའི་བདེ་དགེ་ལ་ཉེན་དུས།། བྱམས་ཆེན་ཆུ་སྣ་འདྲེན་པའི་བཀའ་དྲིན་རེ་དྲན་ནོ།། གཏི་མུག་མུན་ཁྲོད་འཐུག་པོར་མགོ་བོ་རེ་འཁོར་ཚེ།། ཤེས་རབ་ཉིན་བྱེད་འདྲེན་པའི་བཀའ་དྲིན་རེ་དྲན་ནོ།། ༤ སྡིག་ལྟུང་སྨེ་རྩོག་འདམ་དུ་བྱིང་བ་ཡི་སྐབས་ན།། སྡོམ་ཁྲིམས་ཆུ་ཡི་ཁྲུས་ཀྱི་བཀའ་དྲིན་རེ་དྲན་ནོ།། ཉོན་མོངས་དུག་ལྔའི་མཚོན་ཆ་ཆར་ལྟར་དུ་བབས་ཚེ།། ཡེ་ཤེས་གོ་ཆ་བསྐོན་པའི་བཀའ་དྲིན་རེ་དྲན་ནོ།། ༥ རང་དོན་ཡིད་བྱེད་དམ་པོའི་བཙོན་ཁང་དུ་ཆུད་ཚེ།། གཞན་ཕན་འཕྲུལ་གྱིས་གཏོར་བའི་བཀའ་དྲིན་རེ་དྲན་ནོ།། སྲིད་ཞིའི་མྱ་ངན་ཐང་ལ་གྲོགས་མེད་དུ་འཁྱམས་ཚེ།།ཐབས་ཤེས་ལམ་སྣ་འདྲེན་པའི་བཀའ་དྲིན་རེ་དྲན་ནོ།། ༦ རང་བློ་ངན་གོམས་ཆུ་སྣ་ཐུར་བབ་དུ་འགྲོ་ཚེ།། ཐབས་མཁས་ཟོ་ཆུན་འཁྱུད་མོའི་བཀའ་དྲིན་རེ་དྲན་ནོ།། རང་རྒྱུད་ཡོན་ཏན་བྲལ་བའི་གཅེར་བུ་རུ་འདུག་དུས།། བསླབ་གསུམ་གོས་རྒྱན་བགོ་བའི་བཀའ་དྲིན་རེ་དྲན་ནོ།། ༧ ཐར་བའི་ཁང་བཟང་ཉམས་དགར་འཇུག་འདོད་ཀྱི་ཚེ་ན།། ཐེག་གསུམ་སྒོ་ལྕགས་བཀྲོལ་བའི་བཀའ་དྲིན་རེ་དྲན་ནོ།། སྐྱོན་ཀུན་དོར་ལ་ཡོན་ཏན་བླང་ཚུལ་གྱི་སློབ་དཔོན།། འདི་ཕྱི་ཀུན་ལ་ཕན་པའི་བཀའ་དྲིན་རེ་དྲན་ནོ།། ༨ ཡིད་འོང་གཟུགས་ཀྱི་སྣང་བ་མཐོང་རེས་ཀྱི་ཚེ་ན།། རྗེ་བཙུན་བླ་མའི་སྐུ་ཡི་སྣང་བ་རེ་དྲན་ནོ།། རྣ་བར་འབབ་པའི་སྙན་པའི་སྒྲ་དབྱངས་རེ་ཐོས་ཚེ།། བླ་མའི་ལེགས་བཤད་གསུང་གི་དགའ་སྟོན་རེ་དྲན་ནོ།། ༩ འོད་གསལ་ཕྱག་རྒྱ་ཆེན་པོ་འཆར་རེས་ཀྱི་ཚེ་ན།། འཁྲུལ་མེད་རྡོ་རྗེའི་ཐུགས་དང་འདྲེས་ཉམས་རེ་དྲན་ནོ།། ཐུབ་བསྟན་ལུང་རྟོགས་རིན་ཆེན་ལྷུན་པོ་ལ་འཛེགས་ནས།། བཤད་སྒྲུབ་རྒྱལ་མཚན་བསྒྲེངས་བའི་བཀའ་དྲིན་རེ་དྲན་ནོ།། ༡༠ རང་གིས་འབད་ན་སངས་རྒྱས་ཐོབ་ངེས་སུ་བསྟན་ན།། སངས་རྒྱས་མཇལ་ཡང་འཕྲིན་ལས་མཚུངས་ཚུལ་དེ་དྲན་ནོ།། དེ་ལྟར་དྲན་པས་བླ་མ་ལྷར་བཅས་ཀྱི་བྱིན་རླབས།། ཆུ་བརྒྱ་མཚོ་ལ་འབབ་བཞིན་ཉིལ་ཉིལ་དུ་སྩོལ་ཅིག།། ༡༡ ཡང་དག་དད་པའི་སྦར་མོས་ལེགས་ཚོགས་ཀུན་རྙེད་མོད།། དད་མེད་ལག་རྡུམ་ཅན་ལ་ལེགས་རྙེད་ཅིག་མི་སྣང།། ཐེག་གསུམ་ཡོན་ཏན་ཇི་སྙེད་དད་པ་ཡི་རྗེས་འབྲང།། དེས་ན་ཆོས་ཀུན་རྩ་བ་དད་པ་ལ་རེམ་ཤིག།། ༡༢ དད་དང་དྲན་པའི་བླ་མ་གདམས་ངག་དང་བཅས་པ།། ཚུལ་བཞིན་ཡིད་བྱེད་དམ་ཆོས་སྒྲུབ་ཚུལ་ལ་བཟང་ངོ་།།