དེ་ཉིད་ཀྱི་གླུ་ཀུན་ཁྱབ་སངས་རྒྱས།།
ན་མོ་རཏྣ་ཏྲ་ཡཱ་ཡ།
དཔལ་བླ་མ་སངས་རྒྱས་མཐོང་བ་ཉིད།།
སེམས་དད་གུས་དམ་ཆོས་རྣལ་མ་ལགས།།
བློ་དག་སྣང་གུ་རུ་སིདྡྷིའི་གྲངས།།
ཉམས་རྟོགས་འབུལ་སྙིང་ནས་ཡི་རང་ཡོད།།
རྒན་བསོད་ནམས་དམན་པ་ག་ལ་ཡིན།།
རྒས་འཁོགས་ཀྱང་འཆི་ཆོས་འགྲུབ་ནས་འདུག།
རྟེན་དལ་འབྱོར་སྙིང་པོ་ལོན་ནས་གདའ།།
ད་འཆི་རུང་འགྱོད་དགོས་གཏན་ནས་མེད།།
ཕ་ཨོ་རྒྱན་པདྨའི་བུ་རྒྱུད་ལ།།
མ་འགྲོ་དྲུག་འདྲེན་པའི་ཐུགས་དམ་མཆིས།།
བུ་དམ་ཚིག་འགྱུར་མེད་ཀུན་ཁྱབ་ལ།།
དཔལ་ཡེ་ཤེས་བླ་མའི་གསལ་ཞིག་འདེབས།།
མགོན་བརྒྱུད་གསུམ་བླ་མ་གསོལ་བ་ཐོབས།།
སེམས་བྱུང་གནས་འགྲོ་གསུམ་ལེགས་པོར་དཔྱོད།།
གནད་བཞི་ཆ་གསུམ་བྲལ་རིག་པ་ལ།།
ལམ་མཐོང་བའི་རྫོགས་ཆེན་དེ་ཀ་ལགས།།
ཕྱི་བློ་ལྡོག་རྣམ་བཞི་གོམས་པ་དང་།།
ནང་ཚད་མེད་རྣམ་བཞི་སྒོམ་དང་།།
དོན་སྲོག་སྡོམ་གཟེར་བཞིས་ཐབས་ཤེས་ན།།
གནད་རིག་འཛིན་རྣམ་བཞིའི་དགོངས་པར་ཕྱིན།།
མགོར་སྐྱབས་འགྲོ་སེམས་བསྐྱེད་ཆ་ཚང་དང་།།
བར་རྡོར་སེམས་མཎྜལ་ཚོགས་བསགས་ཀྱིས།།
མཐར་བླ་མའི་རྣལ་འབྱོར་འདི་ཁོ་ན།།
སྐྱབས་ཀུན་འདུས་གུ་རུ་རིན་པོ་ཆེ།།
ལུས་འཇའ་ལུས་སྒོམ་ནས་གསོལ་བ་ཐོབས།།
ངག་བཛྲ་གུ་རུའི་བསྙེན་པ་བགྲངས།།
སེམས་རིག་པ་བླ་མའི་རྣལ་འབྱོར་ལ།།
དུས་རྟག་པར་བརྩོན་དང་མངོན་སངས་རྒྱས།།
ཕྱི་འཁོར་བའི་རྒྱ་མཚོ་བརྒལ་བ་དང་།།
ནང་སེམས་ཀྱི་ཉིད་མཐོང་བ་ལ།།
དོན་གུ་རུ་མ་གཏོགས་གཞན་ན་མེད།།
ཁྱོད་གསང་གསུམ་བདེ་བའི་རྟེན་འབྲེལ་ཡོད།།
ཡིད་ངེས་འབྱུང་འཁོར་བ་ཞེན་ལོག་གིས།།
ནང་བྱང་ཆུབ་སེམས་ལ་མངའ་དབང་འབྱོར།།
སེམས་དག་པའི་རྩལ་ལས་རིག་པ་ཉིད།།
མགོན་པདྨ་ཀ་ར་དེ་ཀ་ལགས།།
འཆི་གནད་གཅོད་སྡུག་བསྔལ་མི་མྱོང་ངེས།།
གཞི་རྣམ་མཁྱེན་གོ་འཕང་འཐོབ་པར་ངེས།།
ལམ་རྫོགས་པ་ཆེན་པོ་དེ་ཀ་ལ།།
དད་དག་སྣང་རྩི་དང་མ་ཡལ་མཛོད།།
ཁྱོད་དད་པ་ཅན་ལ་དངོས་གྲུབ་ཡོད།།
སེམས་བརྩེ་བ་ཅན་ལ་སྙིང་རྗེ་བཅས།།
གནད་ཟབ་མོའི་གདམས་ངག་བདུད་རྩི་ཉིད།།
སྒོ་ལུས་ངག་ཡིད་ལ་སྨིན་གྲོལ་འབུལ།།
དཔལ་ཀུན་བཟང་རྒྱལ་བའི་དགོངས་པ་ཉིད།།
ཐུགས་དགྱེས་པ་མཛོད་ལ་ཀློང་དུ་གཏམས།།
སྐྱབས་རྡོ་རྗེ་འཆང་དངོས་དེ་ཉིད་ལས།།
དུས་ནམ་ཡང་གཡོ་བར་མེད་པར་སྨོན།།
ཞེས་པ་འདི་ཡང་རབ་གནས་ས་ཕག་མགོ་ཟླའི་དཀར་ཕྱོགས་དགའ་བ་གཉིས་པར་དད་གུས་ཅན་ཀུན་ཁྱབ་སངས་རྒྱས་ལ་གུས་པ་ཤྲཱིས་དེ་ཉིད་ཀྱི་གླུ་རུ་བླངས་པར་དགེའོ།།