ཨེ་ཝཾ་བཀྲ་ཤིས་བདེ་ལེགས།
ན་མོ་གུ་རུ་མངྒ་ལཾ་གུཧྱེ་སུ་ཁ་ཡེ།།
ཀ་དག་བདེན་པའི་ཆོས་དབྱིངས་དགོངས་པ་བཀྲ།།
ལྷུན་གྲུབ་ཡེ་ཤེས་འོད་གསལ་ཀུན་ཏུ་ཤིས།།
ཨེ་ཝཾ་ཕན་བདེའི་ལང་ཚོ་རྟག་ཏུ་བདེ།།
བསྟན་འགྲོའི་དཔག་བསམ་ལྗོན་བཟང་ཤིན་ཏུ་ལེགས།།
༡༽
ཀུན་བཟང་རྒྱལ་བའི་གཞལ་མེད་ཁང་ཆེན་རྩེར།།
ཨེ་ཝཾ་རྫོགས་པ་ཆེན་པོའི་བསྟན་པ་གང་།།
མི་ནུབ་སྒྱུ་འཕྲུལ་བཀོད་པ་དགུང་དང་མཉམ།།
ཕྱོགས་ལས་རྣམ་པར་རྒྱལ་བའི་རྒྱལ་མཚན་བསྒྲེངས།།
༢༽
རབ་འབྱམས་ཤེས་བྱ་རྒྱ་མཚོའི་མཇིངས་ཟབ་གཏིང་།།
ཨེ་ཝཾ་གསེར་མིག་འཇའ་རིས་ཟློས་གར་འཁྱུགས།།
ཚོས་ཚན་རིག་པའི་གསེར་གཤོག་གཏིང་མཐའ་བརྒལ།།
འཁོར་འདས་ཀུན་བཟང་གསེར་ཉ་རིན་ཆེན་རྒྱལ།།
༣༽
ནོར་འཛིན་བསོད་ནམས་གཏེར་གྱི་མངལ་རྒྱ་སྦྲུམ།།
ཨེ་ཝཾ་རིན་ཆེན་ནོར་གྱི་བང་མཛོད་གཏམས།།
སྣང་སྲིད་སྣོད་བཅུད་རྒུད་པ་ངང་གིས་སེལ།།
གང་བསམ་ལྷུན་གྲུབ་འདོད་འབྱུང་བུམ་བཟང་མངོན།།
༤༽
སྲིད་ཞིའི་ཕུན་ཚོགས་བདེ་ཆེན་རྫིང་བུ་འཁྱིལ།།
ཨེ་ཝཾ་མཛེས་སྡུག་འདབ་སྟོང་རྣམ་པར་བཞད།།
བརྩེ་དུང་མཛའ་དགུས་ར་ཡིག་གཉིས་པ་འཁོར།།
དྲི་མེད་ལྷག་བསམ་པདྨ་དཀར་པོ་བཀྲ།།
༥༽
དགེ་ལེགས་དགའ་བོའི་གཡས་འཁྱིལ་རི་མོ་མཛེས།།
ཨེ་ཝཾ་སྙན་གྲགས་ཚངས་དབྱངས་ཆོས་སྒྲ་ལྡིར།།
མ་རིག་རྨོངས་ཚོགས་གཉིད་ཀྱི་བྱིང་བ་དཀྲོགས།།
རྨད་བྱུང་ཐོས་གྲོལ་ཆོས་དུང་དཀར་པོས་ཤིས།།
༦༽
ཐུབ་བསྟན་བཤད་སྒྲུབ་ཉམས་རྟོགས་ཉི་ཟླའི་འོད།།
ཨེ་ཝཾ་འཕྲོ་འདུའི་ཕྲིན་ལས་གཡུང་དྲུང་འཁྱིལ།།
ཆོས་དཔལ་རིག་པའི་གཟི་འོད་འབུར་དུ་ཐོན།།
ཅི་དགར་དཔལ་གྱི་བེའུའི་ལོངས་སྤྱོད་བདེ།།
༧༽
འཇིག་རྟེན་ཞི་བསིལ་དགའ་བདེའི་ཚེ་བསོད་དཔལ།།
ཨེ་ཝཾ་དབང་ཐང་གནམ་ས་བར་སྣང་གང་།།
ཀུན་བཟང་དར་དཔྱངས་སྣ་ལྔས་འགྲོ་ཀུན་བཅིངས།།
ཕན་བདེའི་ཞི་བསིལ་གདུགས་དཀར་མངོན་པར་ལེགས།།
༨༽
མཁྱེན་བརྩེའི་རྩིབས་སྟོང་དཀྱིལ་འཁོར་རྣམ་པར་བཀྲ།།
ཨེ་ཝཾ་ཕྲ་རྒྱན་སྣ་ཚོགས་འོད་མདངས་ཤིས།།
ཕན་བདེའི་ཀུན་བཟང་ཕྲིན་ལས་རྟག་ཏུ་བདེ།།
དམ་ཆོས་ཡིད་བཞིན་གསེར་གྱི་འཁོར་ལོ་ལེགས།།
བསྐལ་བཟང་རྒྱལ་བའི་འོད་གསལ་སྙིང་པོའི་གར།།
ཨེ་ཝཾ་བུདྡྷ་ཛྙཱ་ནའི་ཐུགས་ཐིག་དཔལ།།
དགྱེས་དགུར་བརྗིད་པའི་གནུབས་ཆེན་རིང་ལུགས་ཆེ།།
བཀའ་གཏེར་རྡོ་རྗེ་ཕྱོགས་ཀུན་ཁྱབ་གྱུར་ཅིག།
ཅེས་པ་འདི་ཡང་རབ་གནས་ས་ཕག་མགོ་ཟླའི་དབང་ཕྱོགས་ཀྱི་ཟླ་ཚེས་དགེ་བའི་དུས་ཆེན་ལ་སྔགས་འཆང་རིག་འཛིན་ཡོངས་ཀྱི་རྒྱལ་པོ། མཁས་གྲུབ་གཉིས་ལྡན་གྱི་བླ་མ་༧སྐྱབས་རྗེ་དམ་པ་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་གྱི་དགོངས་བཞེད་བཞིན་དུ་འཕགས་ཡུལ་ཨེ་ཝཾ་གནུབས་ཆེན་དགོན་པར། རིགས་ཀུན་གྱི་ཁྱབ་བདག་ཆེན་པོ་༧རྒྱལ་བ་ཞེ་ཆེན་རབ་འབྱམས་རིན་པོ་ཆེའི་འཇམ་དབྱངས་མཁྱེན་བརྩེའི་བཀའ་ཆོས་སྐོར་གསུང་བའི་རྣམ་པའི་རྟེན་འབྲེལ་ལེགས་འགྲིགས་ཀྱི་འཇའ་གུར་རང་བྱུང་སོགས་ལེགས་གྲུབ་བྱུང་བ་ལ་བཀྲ་ཤིས་བདེ་ལེགས་ཕུན་སུམ་ཚོགས་པའི་འཚམས་རྟགས་སུ་གནུབས་ཆེན་སངས་རྒྱས་ཡེ་ཤེས་ཀྱི་སྐྱེ་རྒྱུད་འཛིན་པའི་ཤྲཱིཿཨེ་མ་ཧོས་དགའ་དད་སྤྲོ་བའི་ཡི་རང་བཅས་དབྱིན་ཡུལ་ཨེ་ཝཾ་ཀུན་བཟང་ཆོས་གླིང་ནས་དེ་ཉིད་དུ་སྨོན་པར་དགེའོ།། །།
