རྗེ་བཙུན་འཕགས་མ་སྒྲོལ་མ་ཉེར་གཅིག་ལ་ཕྱག་འཚལ་

རྗེ་བཙུན་འཕགས་མ་སྒྲོལ་མ་ཉེར་གཅིག་ལ་ཕྱག་འཚལ་
ཨེ་ཝཾ་ཉི་ཟླའི་སྣང་བ་ཞེས་བྱ་བ།།
ན་མོ་མ་ཧཱ་གུ་རུ་ཨརྱ་ཏཱ་ར་ཡེ།།
ཀ་དག་སྤྲོས་བྲལ་འོད་གསལ་འདུས་མ་བྱས།།
ལྷུན་གྲུབ་ཡེ་ཤེས་སྒྱུ་འཕྲུལ་དྲྭ་བ་ལས།།
ཨེ་ཝཾ་ཉི་ཟླའི་སྣང་བ་སྒྲོལ་མའི་དཔལ།།
འཁོར་འདས་རང་ངོ་ཤེས་པས་ཕྱག་འཚལ་ལོ།།
ཨོཾ་ཨཱཿཧཱུཾ་ཧྲཱིཿགསང་གསུམ་ཕྲིན་ལས་དཔལ།།
སྒོ་གསུམ་བག་ཆགས་མ་ལུས་སེལ་བའི་མགོན།།
འཇིགས་པ་ཀུན་སྐྱོབ་ཡུམ་ཆེན་ཕ་རོལ་ཕྱིན།།
རྗེ་བཙུན་འཕགས་མ་སྒྲོལ་མ་ཕྱག་འཚལ་ལོ།།
༼༡༽
སྤྱན་རས་གཟིགས་དབང་ཐུགས་རྗེ་ཚད་མེད་དག།
ཆུ་སྐྱེས་གེ་སར་བྱེ་བའི་བྱིན་རླབས་རྫོགས།།
སྐད་ཅིག་གློག་ལྟར་འགྲོ་ཁམས་ཡོངས་སུ་སྨིན།།
སྒྲོལ་མ་མྱུར་མ་དཔའ་མོར་ཕྱག་འཚལ་ལོ།།
༼༢༽
དྲི་མེད་སྟོན་ཀའི་ཟླ་བ་དཀར་པོའི་དཔལ།།
ཉ་གང་བརྒྱ་ཕྲག་བརྩེགས་པའི་ཞལ་བཟང་མ།།
སྐར་མ་སྟོང་ཕྲག་ཚོགས་པའི་འོད་རབ་འབར།།
རིག་འཛིན་དབྱངས་ཅན་ལྷ་མོར་ཕྱག་འཚལ་ལོ།།
༼༣༽
གསེར་སྔོ་ཆུ་སྐྱེས་བཞད་པའི་པདྨའི་ཕྱག།
སྦྱིན་པ་བརྩོན་འགྲུས་དཀའ་ཐུབ་རབ་ཞིའི་དཔལ།།
བཟོད་པ་བསམ་གཏན་སྤྱོད་ཡུལ་ཉིད་མའི་སྐུ།།
བསོད་ནམས་མཆོག་གཏེར་མ་ལ་ཕྱག་འཚལ་ལོ།།
༼༤༽
སྣང་བ་མཐའ་ཡས་རྒྱལ་བའི་སྤྱི་གཙུག་ཅན།།
ཕྱོགས་དུས་རྒྱལ་ཀུན་སྤྱོད་པའི་ཕ་རོལ་ཕྱིན།།
རྒྱལ་སྲས་མ་ལུས་བསྟེན་པའི་མ་མ་ཉིད།།
གཙུག་ཏོར་རྣམ་རྒྱལ་མ་ལ་ཕྱག་འཚལ་ལོ།།
༼༥༽
ཏུཏྟཱ་ར་ཞེས་ཧཱུྃ་གི་ཡི་གེའི་དཔལ།།
འདོད་ཕྱོགས་ནམ་མཁའི་འཁོར་འདས་ཟིལ་གྱིས་མནན།།
སྣང་སྲིད་མ་ལུས་དབང་དུ་འགུགས་ནུས་མ།།
འཕགས་མ་རིག་བྱེད་ལྷ་མོར་ཕྱག་འཚལ་ལོ།།
༼༦༽
གཙང་རིས་བརྒྱ་བྱིན་མེ་ལྷ་ཚངས་པ་སོགས།།
ལྷ་དབང་འབྱུང་པོ་རོ་ལངས་དྲི་ཟ་དང་།།
གནོད་སྦྱིན་ཚོགས་ཀྱིས་མདུན་ནས་རབ་བསྟོད་མ།།
གདོན་རིགས་འཇིགས་བྱེད་ཆེན་མོར་ཕྱག་འཚལ་ལོ།།
༼༧༽
ཏྲཊ་ཕཊ་སྔགས་ཀྱིས་ཕ་རོལ་འཁྲུལ་འཁོར་འཇོམས།།
གཡས་བསྐུམ་གཡོན་བརྐྱང་ཞབས་ཀྱིས་གཟུང་འཛིན་མནན།།
མཐུ་སྟོབས་མེ་འབར་འཁྲུགས་པ་ཤིན་ཏུ་འབར།།
གཞན་གྱིས་མི་ཐུབ་མ་ལ་ཕྱག་འཚལ་ལོ།།
༼༨༽
ཏུ་རེ་འཇིགས་པས་བདུད་དཔུང་རྣམ་པར་འཇོམས།།
ཆུ་སྐྱེས་ཞལ་ནི་ཁྲོ་གཉེར་ལྡན་མཛད་པའི།།
དགྲ་བོ་ཐམས་ཅད་མ་ལུས་གསོད་མཛད་མ།།
གཞན་གྱི་མི་ཐུབ་རྒྱལ་མོར་ཕྱག་འཚལ་ལོ།།
༼༩༽
དཀོན་མཆོག་རིན་ཆེན་གསུམ་མཚོན་ཕྱག་རྒྱའི་གར།།
སོར་མོས་ཐུགས་ཀར་རྣམ་པར་བརྒྱན་མའི་དཔལ།།
ཕྱོགས་དུས་འོད་ཚོགས་མ་ལུས་སྨིན་མཛད་མ།།
སེང་ལྡེང་ནགས་ཀྱི་སྒྲོལ་མ་ཕྱག་འཚལ་ལོ།།
༼༡༠༽
རབ་དགའ་བརྗིད་པའི་དབུ་རྒྱན་འོད་ཕྲེང་སྤེལ།།
བཞད་པ་རབ་བཞད་ཏུཏྟཱ་ར་ཡིས་མཚན།།
བདུད་དང་འཇིག་རྟེན་མ་ལུས་དབང་མཛད་མ།།
འཇིག་རྟེན་གསུམ་རྒྱལ་མ་ལ་ཕྱག་འཚལ་ལོ།།
༼༡༡༽
ས་གཞི་སྐྱོང་བའི་ཚོགས་ཀྱིས་ཐམས་ཅད་འགུགས།།
མཁྱེན་བརྩེ་ནུས་མའི་ཁྲོ་གཉེར་གཡོ་བའི་དཔལ།།
ཡི་གེ་ཧཱུྃ་གིས་ཕོངས་པ་ཀུན་སེལ་མ།།
དབུལ་སེལ་ནོར་སྟེར་མ་ལ་ཕྱག་འཚལ་ལོ།།
༼༡༢༽
ཟླ་དུམ་དབུ་བརྒྱན་བཀྲག་མདངས་ཤིན་ཏུ་འབར།།
རལ་པའི་ཁྲོད་ནས་འོད་དཔག་མེད་པས་མཛེས།།
ཐུགས་རྗེ་རྟག་ཏུ་འོད་རབ་འགྱེད་མཛད་མ།།
བཀྲ་ཤིས་དོན་བྱེད་མ་ལ་ཕྱག་འཚལ་ལོ།།
༼༡༣༽
བསྐལ་ཐའི་མེ་ལྟར་འབར་བའི་ཕྲེང་དབུས་གནས།།
གཡས་བརྐྱང་གཡོན་བསྐུམ་ཀུན་ནས་བསྐོར་དགའི་དཔལ།།
འཁྲུལ་སྣང་དགྲ་དཔུང་རྣམ་པར་འཇོམས་མཛད་མ།།
གནོད་བྱེད་དགྲ་དཔུང་འཇོམས་ལ་ཕྱག་འཚལ་ལོ།།
༼༡༤༽
ས་གཞིའི་ངོས་ལ་ཕྱག་རྒྱ་མཐིལ་གྱིས་བསྣུན།།
ཞབས་ཀྱིས་བརྡུང་ཞིང་ཁྲོ་གཉེར་ཅན་མཛད་དཔལ།།
ཡི་གེ་ཧཱུྃ་གིས་རིམ་བདུན་རྣམས་འགེམས་མ།།
དྲག་མོ་ཁྲོ་གཉེར་ཅན་ལ་ཕྱག་འཚལ་ལོ།།
༼༡༥༽
བདེ་དགེ་མྱ་ངན་འདས་ཞི་སྤྱོད་ཡུལ་ཉིད།།
སྭཱ་ཧཱ་ཨོཾ་དང་ཡང་དག་རབ་ལྡན་པས།།
སྡིག་པ་ཆེན་པོའི་ཚོགས་ཀུན་འཇོམས་མཛད་མ།།
འཕགས་མ་རབ་ཞི་མ་ལ་ཕྱག་འཚལ་ལོ།།
༼༡༦༽
ཀུན་ནས་བསྐོར་རབ་དགའ་བའི་མཐུས།།
སྔགས་བཅུ་བཀོད་པས་ལས་ཉོན་དགྲ་ལུས་འགེམས།།
རིག་པ་ཧཱུྃ་ལས་སྒྲོལ་མ་དེ་ཉིད་མ།།
རིག་སྔགས་སྟོབས་འཇོམས་ནུས་མ་ཕྱག་འཚལ་ལོ།།
༼༡༧༽
ཏུ་རེའི་ཞབས་བརྡབས་ཧཱུྃ་གི་ས་བོན་ཉིད།།
རི་རབ་མནྡྷར་དང་འབིགས་བྱེད་སོགས།།
འཇིག་རྟེན་གསུམ་རྣམས་གཡོ་བའི་སྒྱུ་འཕྲུལ་མ།།
གཟུངས་སྔགས་དཔག་མེད་གནོན་མ་ཕྱག་འཚལ་ལོ།།
༼༡༨༽
ལྷ་མཚོ་རྣམ་པའི་རི་དྭགས་རྟགས་ཅན་བསྣམས།།
ཏཱ་ར་གཉིས་བརྗོད་ཕཊ་ཀྱི་ཡི་གེས་བརྒྱན།།
དུག་རྣམས་མ་ལུས་སེལ་མཛད་རྗེ་བཙུན་མ།།
བཟླས་སྔགས་རྨ་བྱ་ཆེན་མོ་ཕྱག་འཚལ་ལོ།།
༼༡༩༽
ལྷ་ཚོགས་རྒྱལ་དང་མིའམ་ཅིས་བསྟེན།།
ཀུན་ནས་གོ་ཆ་དགའ་བའི་བརྗིད་པའི་དཔལ།།
རྩོད་དང་རྨི་ལམ་ངན་པ་ཀུན་སེལ་མ།།
བཅོམ་ལྡན་གདུགས་དཀར་མོ་ལ་ཕྱག་འཚལ་ལོ།།
༼༢༠༽
ཉི་ཟླ་རྒྱས་པའི་སྤྱན་གཉིས་འོད་རབ་གསལ།།
ཧ་ར་གཉིས་བརྗོད་ཏུཏྟཱ་ར་ཡི་དཔལ།།
ཤིན་ཏུ་དྲག་པོའི་རིམས་ནད་ཀུན་སེལ་མ།།
རི་ཁྲོད་ལོ་གྱོན་མ་ལ་ཕྱག་འཚལ་ལོ།།
༼༢༡༽
འགྲོ་རྣམས་དེ་ཉིད་གསུམ་་ལ་ལེགས་པར་བཀོད།།
ཞི་མཐུ་ཡང་དག་ལྡན་པའི་ཏུ་རེའི་དཔལ།།
གདོན་དང་རོ་ལོངས་གནོད་སྦྱིན་ཚོགས་འཇོམས་མ།།
ལྷ་མོ་འོད་ཟེར་ཅན་མ་ལ་ཕྱག་འཚལ་ལོ།།
རྩ་སྔགས་བསྟོད་པ་ཕྱག་འཚལ་ཉེར་གཅིག་གི།།
ངོ་བོ་རང་བཞིན་ཐུགས་རྗེའི་ཕྲིན་ལས་ཀུན།།
རྒྱལ་ཡུམ་སྒྲོལ་མའི་རྒྱུད་དོན་བཞིན་བསྟོད་པས།།
འགྲོ་ཀུན་ཕན་བདེའི་དོན་ཀུན་ལྷུན་གྲུབ་ཤོག།
སྣང་བ་ཐམས་ཅད་སྤྲུལ་པའི་སྐུ་རུ་དག།
སྒྲ་གྲགས་མ་ལུས་ལོངས་སྤྱོད་ཡོངས་སུ་རྫོགས།།
དྲན་རྟོག་རིག་པ་ཆོས་སྐུའི་རོལ་བར་སྨིན།།
གསང་གསུམ་ཀུན་བཟང་ངོ་བོར་སངས་རྒྱས་ཤོག།
ཅེས་པ་འདི་ཡང་རབ་གནས་ལྕགས་བྱིའི་ས་ག་ཟླ་བའི་དཀར་ཕྱོགས་རྒྱལ་བ་དང་པོར་༧སྐྱབས་རྗེ་དམ་པ་དྲི་མེད་གླིང་པ་འམ་༧སྒོ་ཆེན་སྤྲུལ་སྐུ་གསང་སྔགས་བསྟན་འཛིན་རིན་པོ་ཆེས་ངོས་ལ་ཐུགས་བརྩེས་ཆེན་པོས་རྗེ་སྒྲོལ་མའི་གསོལ་འདེབས་དོན་ཀུན་ལྷུན་གྲུབ་གནང་བའི་བྱིན་རླབས་དང་། རྨི་ལམ་བཟང་པོ་དང་གནད་ཡོད་མི་སྣ་འགས་ཡང་ཡང་བསྐུལ་མ་དང་རང་གིས་མི་ཕྱེད་པའི་དད་པས་རྣམ་པར་སྣང་མཛད་ཀྱི་རྒྱུད་ཚིག་དང་མཐུན་པར་བསྟན་དང་འགྲོ་ལ་ཕན་པའི་ཕྱིར་དུ་རིག་འཛིན་དཔལ་དགྱེས་པ་རྡོ་རྗེས་དབྱིན་ཡུལ་ཨེ་ཝཾ་རྫོགས་ཆེན་ཆོས་སྒར་ནས་ཕྱག་འཚལ་བས་དོན་དང་ལྡན་པར་གྱུར་ཅིག་གུ། ཤྲཱིཿསརྦ་ལོ་ཀ་པ་ལ་བི་ཛ་ཡནྟུ