གསོལ་མཆོད་ཀུན་བཟང་སྤྲིན་ཆེན།།
གསོལ་མཆོད་ཀུན་བཟང་སྤྲིན་ཆེན།།
ཧཱུཾ་ཧྲཱིཿ
རྒྱལ་བ་ཀུན་འདུས་པདྨ་ཀ་ར་རྗེ།།
འཛམ་གླིང་མི་ཡི་སེངྒེ་གེ་སར་རྒྱལ།།
སྐྱེས་མཆོག་དབང་གི་རྒྱལ་པོ་རིན་པོ་ཆེ།།
གསོལ་ལོ་མཆོད་དོ་བསམ་དོན་མྱུར་འགྲུབ་མཛོད།།
ཧཱུཾ་ཧཱུཾ།
གླིང་དཀར་དཔའ་ཐུལ་དྭངས་སྨན་ཡོངས་ཀྱི་གཙོ།།
བདུད་བཞི་དགྲ་བགེགས་འཇོམས་པའི་དཔའ་བོ་ཆེ།།
འབུམ་པའི་ལྷ་སྲས་དགྲ་ལྷ་རྩེ་རྒྱལ་ལ།།
གསོལ་ལོ་མཆོད་དོ་བསམ་དོན་ལྷུན་འགྲུབ་མཛོད།།
ཧཱུཾ་བྷྱོ།།
སྣང་སྲིད་འཛམ་གླིང་དབང་བའི་སྒྱུ་འཕྲུལ་གར།།
བདེ་ཆེན་ཡེ་ཤེས་སྟེར་བའི་མཛའ་ན་མོ།།
ཕྲིན་ལས་མྱུར་སྒྲུབ་དར་བཟའ་ཆོས་སྒྲོན་ལ།།
གསོལ་ལོ་མཆོད་དོ་བསམ་དོན་ལྷུན་འགྲུབ་མཛོད།།
ཧཱུཾ་བྷྲཱུཾཿ
གང་བྱས་བྱང་ཆུབ་ལམ་དུ་གྱུར་པ་དང་།།
གང་བསམ་ལྷུན་གྲུབ་བསྟན་འགྲོའི་དོན་ཆེན་འགྲུབ།།
གང་འདོད་ཕན་བདེ་སྤེལ་བའི་དངོས་གྲུབ་ཀུན།།
ཀུན་བཟང་སྤྲིན་ཆེན་ས་གསུམ་ཁྱབ་པར་ཤོག།
ཧཱུཾ་ཧྲཱིཿ
སྙིགས་དུས་མུན་པ་མ་ལུས་རབ་ཏུ་སེལ།།
བཤད་སྒྲུབ་བསྟན་པའི་ཉི་ཟླ་འོད་དུ་གསལ།།
སྣང་སྲིད་དག་པ་རབ་འབྱམས་ཞིང་དུ་ཤར།།
བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག།
མཁའ་འགྲོ་མ་པདྨ་གཡུ་མཚོས་ངོར་གང་ཤར་བཅོས་བསྒྱུར་མེད་པར་དེ་ཉིད་དུ་ཨེ་མ་ཧོས་གསོལ་བ་འདེབས་པར་དགེའོ།། །།
