སྔགས་མང་ལ་རྫོགས་ཆེན་བསྒོམ་པར་སྐུལ་བའི་མགུར་གླུ་གང་ཤར།
སྔགས་མང་ལ་རྫོགས་ཆེན་བསྒོམ་པར་སྐུལ་བའི་མགུར་གླུ་གང་ཤར།
རང་བྱུང་སངས་རྒྱས་པད་མ་འབྱུང་གནས་དང་དབྱེར་མ་མཆིས་པའི་སྨན་རྒྱལ་གཡུ་ཐོག་ཡོན་ཏན་མགོན་པོ་ལ་ཕྱག་འཚལ་ལོ། མཆོད་དོ། སྐྱབས་སུ་མཆིའོ།།
གདོད་མའི་མགོན་པོ་སྤྲོས་པ་དྲི་མ་མེད།།
ཁ་སྦྱོར་ཡན་ལག་བདེ་ཆེན་ཀློང་དུ་གྲོལ།།
འཇའ་ལུས་རྡོ་རྗེའི་བདག་ཉིད་སྤྲུལ་བའི་སྐུ།།
ཀུན་བཟང་བླ་མས་དུས་རྟག་བྱིན་གྱིས་རློབས།།
མཆོག་གསུམ་དབྱེར་མེད་གུ་རུ་རིན་པོ་ཆེ།།
སྐུ་གསུམ་བདག་ཉིད་རྩ་བའི་བླ་མ་དང་།།
རྩ་གསུམ་དབྱེར་མེད་རྒྱུད་པའི་བླ་མའི་ཚོགས།།
བསླུ་མེད་སྐྱབས་གནས་ཡིན་ནོ་སྔགས་པ་ཚོ།།
ཐུན་མོང་བློ་ལྡོག་རྣམ་བཞིས་བློ་སྦྱོང་ལ།།
ཐུན་མིན་སྔོན་འགྲོ་རྩ་གསུམ་མཐར་ཕྱིན་བསྙེན།།
རྩ་རླུང་ཐིག་ལེའི་རྩལ་དང་བོགས་ཐོན་ནས།།
འོད་གསལ་རྫོགས་ཆེན་ཞུས་ཤིག་སྔགས་པ་ཚོ།།
ཆོས་རྣམས་སེམས་ལ་འདུས་པའི་སེམས་ཀྱི་སྡེ།།
སྣང་སྲིད་ཆོས་ཉིད་ཀློང་འདུས་ཀློང་སྡེ་དང་།།
འཁོར་འདས་དབྱེར་མེད་རང་གྲོལ་མན་ངག་སྡེ།།
རྫོགས་ཆེན་སྡེ་གསུམ་ཡིན་ནོ་སྔགས་པ་ཚོ།།
ཞེ་སྡང་གཉེན་པོར་མ་ཧ་ཡོ་ག་བསྟན།།
འདོད་ཆགས་གཉེན་པོ་ཨ་ནུ་ཡོ་ག་ཡིན།།
གཏི་མུག་རང་སངས་ཨ་ཏི་ཡོ་ག་སྟེ།།
རྒྱུད་མཐུན་ཉམས་སུ་ལོངས་ཤིག་སྔགས་པ་ཚོ།།
སྔོན་བསགས་ལས་མེད་བསྟན་པ་འདིར་མི་མཇལ།།
རིག་ངོ་འཕྲོད་ནས་བསྐྱང་ན་མི་གྲོལ་མེད།།
འཇིག་རྟེན་འཁོར་བར་བྲེལ་བ་ཆེ་བའི་དུས།།
རྫོགས་ཆེན་ངོ་སྤྲོད་དགོས་སོ་སྔགས་པ་ཚོ།།
མཐོང་ན་ཞིང་པ་འབྲོག་པ་གྲོལ་བར་འགྱུར།།
མ་མཐོང་བླ་ཆེན་སྤྲུལ་སྐུ་འཁྲུལ་བར་འགྱུར།།
རྟོགས་གྲོལ་ཅིག་ཅར་ཡེ་ཤེས་རྗེན་པ་འདི།།
མ་འཁྲུལ་སྐྱོང་ཤིག་ལས་ཅན་སྔགས་པ་ཚོ།།
འཇིག་རྟེན་འཁོར་བ་བྲེལ་འཚུབ་ཆེ་བའི་དུས།།
ཉོན་མོངས་མང་ལ་རྩོད་ཉོག་དར་བའི་དུས།།
སྣང་རིག་ཟང་ཐལ་ཅན་གྱི་རྫོགས་ཆེན་བསྒོམ།།
འདི་ཕྱི་གཉིས་ཀ་སྐྱིད་དོ་སྔགས་པ་ཚོ།།
སྐྱེས་སྟོབས་ཤེས་རབ་མེད་ན་མེད་དུ་ཆུག།
སྦྱངས་པའི་ཡོན་ཏན་དམིགས་བསལ་དགོས་མ་ཡིན།།
ཞི་ལྷག་བསྐྱེད་རྫོགས་མང་པོ་མི་ཤེས་ཀྱང་།།
རྫོགས་ཆེན་རིག་ངོ་འཕྲོད་དགོས་སྔགས་པ་ཚོ།།
རྫོགས་ཆེན་བླ་མ་བཤད་ལ་མཁས་མི་དགོས།།
རྫོགས་ཆེན་བླ་མར་མང་པོའི་ལུང་མི་དགོས།།
རྫོགས་ཆེན་བླ་མར་རྒྱུད་པའི་བྱིན་བརླབ་དང་།།
རིག་ངོའི་ཉམས་མྱོང་དགོས་སོ་སྔགས་པ་ཚོ།།
ཁ་བདེ་ལྕེ་བདེས་རྫོགས་ཆེན་སྟོན་མི་ཐུབ།།
འཆད་རྩོད་རྩོམ་པས་རྫོགས་ཆེན་གཞལ་མི་ཐུབ།།
སྔོན་ལས་རྟོགས་ལྡན་བླ་མ་ཁོ་ན་ལས།།
བརྗོད་མེད་དོན་དེ་རྟོགས་ཡོང་སྔགས་པ་ཚོ།།
ཟང་ཐལ་རྗེན་པའི་རིག་པ་མ་མྱོང་ན།།
དབང་ལུང་ཁྲིད་ཀྱི་གྲངས་ཀས་ག་ལ་གྲོལ།།
དཔེ་མང་ལྷ་མང་རྗེས་སུ་མ་རྒྱུག་པར།།
རིག་ངོའི་བླ་མ་བསྟེན་ཅིག་སྔགས་པ་ཚོ།།
ཚུལ་འཆོས་འཛུམ་གྱིས་གྲོལ་བར་མི་འགྱུར་ལ།།
ཁ་མཁས་བཤད་དང་རྩོད་པས་ག་ལ་གྲོལ།།
སྔགས་དང་རིམ་གྲོ་སོགས་ཀྱིས་མི་གྲོལ་བ།།
རིག་ངོ་ཁོ་ནས་གྲོལ་ལོ་སྔགས་པ་ཚོ།།
ཁ་དོག་དཀར་དམར་ཡིན་དང་མ་ཡིན་དང་།།
འཁོར་འདས་ཡོད་དང་མེད་སོགས་རྩོད་མི་དགོས།།
ཡིད་དཔྱོད་སྤྲོས་བཅས་དམིགས་པ་འཛིན་མེད་དུ།།
གནས་ལུགས་ལྷུན་གྲུབ་སྐྱོངས་ཤིག་སྔགས་པ་ཚོ།།
དགའ་རབ་རྡོ་རྗེས་ཚིག་གསུམ་གནད་བརྡེག་བསྟན།།
དེང་དུས་འགྲེལ་བ་སུམ་བརྒྱས་འཁྲུལ་དུ་བཅུག།
ཆེ་ཆེ་མཐོ་མཐོའི་ཚིག་མང་མི་དགོས་པས།།
ཉམས་ལྡན་བླ་མ་བསྟེན་ཞིག་སྔགས་པ་ཚོ།།
བཤད་རྒྱུའི་ཚིག་གིས་བརྗོད་མེད་དོན་དེ་གབ།།
བཟང་ངན་སྤང་བླང་བློ་ཡིས་བློ་འདས་ཤོར།།
གཅིག་ཤེས་ཀུན་གྲོལ་རིག་པ་ཟང་ཀ་མ།།
རྟོགས་ལྡན་བླ་མར་ཞུས་ཤིག་སྔགས་པ་ཚོ།།
ཞེ་སྡང་ཆེ་ཡང་རྫོགས་པ་ཆེན་པོས་གྲོལ།།
འདོད་ཆགས་ཅན་ཡང་རྫོགས་པ་ཆེན་པོས་གྲོལ།།
གཏི་མུག་རང་གྲོལ་རྫོགས་པ་ཆེན་པོ་ནི།།
མཐར་ཐུག་གྲོལ་ལམ་ཡིན་ནོ་སྔགས་པ་ཚོ།།
འཛིན་མེད་ཟང་ཀ་མ་དེ་རྩོལ་མེད་སྐྱོང་།།
སྔགས་པ་སྔགས་མ་སུ་ཡང་ངེས་པར་གྲོལ།།
དུག་ལྔ་རང་ཤིག་ཚོགས་དྲུག་རང་ཤར་ནི།།
གེགས་མེད་ལམ་འཁྱེར་ཡིན་ནོ་སྔགས་པ་ཚོ།།
ཟང་ཐལ་རྗེན་པའི་རིག་པ་མ་མཐོང་ན།།
ཆེ་ཆེ་མང་མང་ཚིག་གིས་ཅི་ཞིག་བྱ།།
རྣམ་རྟོག་ལྷ་དང་རྩོལ་བཅས་རྫོགས་རིམ་སོགས།།
རྫོགས་ཆེན་གོལ་སར་བསྟན་ནོ་སྔགས་པ་ཚོ།།
ཟང་ཐལ་སོ་མའི་རིག་པ་བསྐྱང་ཐུབ་ན།།
རྣམ་རྟོག་རྩོལ་བཅས་ཆོས་གཞན་དགོས་མ་ཡིན།།
འབུམ་བསྙེན་ཁྲི་བསྒོམ་མི་ཚེ་བསྐྱལ་ན་ཡང་།།
རིག་ངོ་མ་མཐོང་མི་གྲོལ་སྔགས་པ་ཚོ།།
ཞབས་དཀར་དྲིན་གྱི་རིག་པའི་གསེར་ཐུར་གྱིས།།
མ་རིག་བདག་འཛིན་སྐྱ་འགྲིབ་ཡོངས་སུ་ཕྱེས།།
གཉིས་འཛིན་ལས་དང་ཉོན་མོངས་ལས་གྲོལ་ན།།
ཀ་དག་ཁྲེགས་ཆོད་ཡིན་ནོ་སྔགས་པ་ཚོ།།
ཞབས་དཀར་དྲིན་གྱི་བདུད་རྩི་བུམ་བཟང་གིས།།
སྒྲོན་བཞི་སྣང་བཞིའི་དྲི་མ་ཡོངས་སུ་དག།
སྣང་སྟོང་འོད་གསལ་གཞོན་ནུ་བུམ་སྐུ་འགྲུབ།།
ལྷུན་གྲུབ་ཐོད་རྒལ་ཡིན་ནོ་སྔགས་པ་ཚོ།།
ཅོག་བཞག་གསུམ་གྱི་གནད་ཀྱིས་བསྒོམ་ན་ཡང་།།
ལྟ་སྟངས་གསུམ་གྱི་གནད་ཀྱིས་གཟིགས་ན་ཡང་།།
རྩ་རླུང་འཕྲུལ་གྱི་འཁོར་ལོ་བསྐོར་ན་ཡང་།།
རིག་ངོ་ཞི་གནས་མ་ནོར་སྔགས་པ་ཚོ།།
གཉིས་སྣང་བདག་འཛིན་ཉོན་མོངས་མཐུག་པོ་ནི།།
ལས་སྒྲིབ་མཁྲེག་གམ་ཁྲེགས་པོ་ཡིན་པས་ན།།
ཤེས་རབ་སྟོང་ཉིད་མེད་གཅིག་ཕྱལ་ལྷུན་གྱིས།།
གཉིས་འཛིན་རྩ་མེད་ཆོད་ཅིག་སྔགས་པ་ཚོ།།
རིག་པའི་རྩལ་དབང་བཞུགས་དང་གཟིགས་སྟངས་གནད།།
སྒོ་ཡུལ་རིག་གནད་སྒྲོན་བཞིའི་ངོ་འཕྲོད་ལ།།
དཀར་ནག་ཁྲ་གསུམ་སྣང་བཞིའི་ཐོད་རྒལ་ནི།།
མཐར་ཐུག་འཇའ་ལུས་ཡིན་ནོ་སྔགས་པ་ཚོ།།
གྲྭ་ཟུར་ཉམས་མེད་ཐིག་ལེ་ཆེན་པོའི་ཀློང་།།
སྣང་སྟོང་འཁོར་འདས་འུབ་ཆུབ་ཕྱལ་ལེ་བ།།
བསྒོམ་དང་བསྒོམ་མཁན་བྲལ་བའི་རིག་པའི་ཀློང་།།
མཇལ་མེད་ངང་དུ་མཇོལ་ཞིག་སྔགས་པ་ཚོ།།
རྩེ་གཅིག་སྤྲོས་བྲལ་རོ་གཅིག་བསྒོམ་མེད་ཀྱི།།
ལྷན་སྐྱེས་ཡེ་ཤེས་བདེ་ཆེན་ཕྱག་རྒྱ་ཆེ།།
གནས་པ་དབྱིངས་དང་འཕྲོ་བ་རིག་པའི་རྩལ།།
ཕྱག་རྫོགས་དབྱེར་མེད་སྐྱོང་ཤིག་སྔགས་པ་ཚོ།།
དབེན་གསུམ་ངང་དུ་འོད་གསལ་སྒྱུ་ལུས་ཤར།།
ཟུང་འཇུག་ལྷན་སྐྱེས་བདེ་ཆེན་རྒྱུན་ཆད་མེད།།
བླ་མེད་རྒྱུད་ཀྱི་གསང་བའི་སྙིང་པོ་དང་།།
རྫོགས་ཆེན་དབྱེར་མེད་བསྒོམ་ཞིག་སྔགས་པ་ཚོ།།
ཤེས་རབ་ཡུམ་ཆེན་རྣམ་ཀུན་རྡོ་རྗེའི་དབྱིངས།།
སྣང་སྟོང་དབྱེར་མེད་ཟབ་ཞི་སྤྲོས་པ་བྲལ།།
རྟེན་འབྲེལ་སྙིང་པོ་དབུ་མ་ཐལ་འགྱུར་དང་།།
ཁྲེགས་ཆོད་དབྱེར་བསྒོམ་ཞིག་སྔགས་པ་ཚོ།།
ཕྱི་ནང་གཞན་གསུམ་སོར་སྡུད་བསམ་གཏན་དང་།།
སྲོག་རྩོལ་འཛིན་པ་རྗེས་དྲན་ཏིང་འཛིན་གྱི།།
མཆོག་གི་སྟོང་གཟུགས་བདེ་ཆེན་དུས་འཁོར་དང་།།
རང་རིག་དབྱེར་མེད་བསྒོམ་ཞིག་སྔགས་པ་ཚོ།།
མདོར་ན་མ་རྒྱུད་འོད་གསལ་སྙིང་པོ་དང།།
ཕ་རྒྱུད་དག་པའི་སྒྱུ་ལུས་མཐར་ཐུག་པ།།
གཉིས་མེད་ཟུང་འཇུག་རྡོར་འཆང་གསང་ཚིག་དང་།།
ཁྲེགས་ཐོད་དབྱེར་མེད་བསྒོམ་ཞིག་སྔགས་པ་ཚོ།།
རྫོགས་ཆེན་ལྟ་བ་མཐོང་ན་ཀུན་མཁྱེན་ཡིན།།
དབྱིངས་རིག་ཀློང་ཆེན་མཇལ་ན་རྫོགས་ཆེན་ཡིན།།
འཁོར་འདས་ཟང་ཐལ་རབ་འབྱམས་ཡེ་ཤེས་འདི།།
རྩོལ་མེད་སྐྱོང་ཤིག་སྔགས་པ་སྔགས་མ་ཚོ།།
སད་དང་གསོན་དུས་དུག་ལྔ་རང་གྲོལ་དགོས།།
གཉིད་དང་འཆི་སྐབས་འོད་གསལ་རྟོགས་པ་དགོས།།
མཉམ་རྗེས་གཉིས་མེད་གདིང་ཆེན་ཐོབ་གྱུར་ན།།
དོན་གྱི་སྔགས་འཆང་ཡིན་ནོ་སྔགས་པ་ཚོ།།
རྫོགས་ཆེན་ཀློང་ལ་མ་འདུས་ཆོས་གཞན་མེད།།
རྫོགས་ཆེན་མ་རྟོགས་གཞན་གྱིས་གྲོལ་མི་འགྱུར།།
བླ་མའི་དྲིན་ལས་རིག་པ་སྐད་ཅིག་མ།།
ཡེངས་མེད་རྩོལ་མེད་སྐྱོངས་ཤིག་སྔགས་པ་ཚོ།།
བརྗོད་མེད་རང་རིག་ཡེ་ཤེས་མཐོང་བའི་ཚེ།།
འཛིན་མེད་ལྟ་བ་ཕྱོགས་མེད་ཕྱལ་བར་ཐོངས།།
ལྷ་སྔགས་ཏིང་འཛིན་འོད་གསལ་དེ་ལ་འདུས།།
སྐུ་གསུམ་རང་རིག་ཡིན་ནོ་སྔགས་པ་ཚོ།།
རྡུལ་ཙམ་མ་གྲུབ་ངོ་བོ་རྩ་ནས་སྟོང་།།
འགག་མེད་རང་བཞིན་གསལ་ལ་དྲི་མ་བྲལ།།
བྱང་སེམས་ཐུགས་རྗེ་ཕྱོགས་མེད་ཀུན་ལ་ཁྱབ།།
སྐུ་གསུམ་རང་སེམས་ཡིན་ནོ་སྔགས་པ་ཚོ།།
འཇིག་རྟེན་ཆོས་བརྒྱད་སྒྱུ་མའི་དཔེ་བརྒྱད་ཡིན།།
ཉོན་མོངས་དུག་ལྔ་ཡེ་ཤེས་རིགས་ལྔ་ཡིན།།
འཁོར་འདས་རང་གྲོལ་མ་བསྒོམ་སངས་རྒྱས་ཡིན།།
བསྒོམ་གྱི་ལམ་འཁྱེར་མ་བརྗེད་སྔགས་པ་ཚོ།།
འདོད་ཆགས་ཐ་མལ་མ་འཇོག་བདེ་སྟོང་བསྒོམ།།
ཁོང་ཁྲོ་ཐ་མལ་མ་འཇོག་གསལ་སྟོང་བསྒོམ།།
གཏི་མུག་ཐ་མལ་མ་འཇོག་རིག་སྟོང་བསྒོམ།།
ངེས་དོན་བསྒོམ་ཆེན་ཡིན་ནོ་སྔགས་པ་ཚོ།།
འདོད་ཆགས་རང་གྲོལ་བདེ་སྟོང་ངང་དུ་འབྱམས།།
ཞེ་སྡང་རང་ཞི་གསལ་སྟོང་ཀློང་དུ་ཕྱལ།།
གཏི་མུག་རང་སངས་རིག་སྟོང་དབྱིངས་སུ་ཤར།།
བཟང་ངན་སྤང་བླང་མེད་དོ་སྔགས་པ་ཚོ།།
ལྟ་བ་མཐོ་ཞིང་བསྒོམ་གྱི་རྩལ་རྫོགས་ཀྱང་།།
བསླུ་མེད་རྟེན་འབྲེལ་ལས་འབྲས་གནད་ཤེས་ལ།།
འཁོར་བ་དོང་སྤྲུགས་རིགས་དྲུག་སྒྲོལ་བའི་ཕྱིར།།
དམིགས་མེད་བྱང་སེམས་མ་བརྗེད་སྔགས་པ་ཚོ།།
ཚོགས་དྲུག་རང་གྲོལ་བྱིན་བརླབ་སྙིང་ལ་ཞུགས།།
གཡུ་ཐོག་འཁོར་འདས་རང་གྲོལ་རང་ངོ་འཕྲོད།།
འོད་གསལ་རྫོགས་པ་ཆེན་པོའི་མགུར་གླུ་འདི།།
འཛིན་མེད་བླངས་པ་ཡིན་ནོ་སྔགས་པ་ཚོ།།
ཆོས་དབྱིངས་མཛོད་དང་ཡེ་ཤེས་བླ་མ་དང་།།
ཁྱད་པར་ཚོགས་དྲུག་རང་གྲོལ་གསུངས་ཆོས་དག།
ཡང་ཡང་མཇལ་ནས་ལྟ་བ་ཐག་གཅོད་པ།།
བོགས་འདོན་མེད་ཐབས་མེད་ཡིན་སྔགས་པ་ཚོ།།
རལ་བ་བཅིངས་དུས་བླ་མའི་རྣལ་འབྱོར་བསྒོམ།།
གཟན་དཀན་གྱོན་དུས་དྲི་མེད་ཡེ་ཤེས་དྲན།།
བགྲང་ཕྲེང་འཛིན་དུས་ཐུགས་རྗེས་འགྲོ་བ་འདྲེན།།
དྲན་པ་ཤེས་བཞིན་སྐྱོངས་ཤིག་སྔགས་པ་ཚོ།།
ལྟ་གྲུབ་གཞན་ལ་མ་རྩོད་དག་སྣང་སྦྱོང་།།
མདོ་སྔགས་དབྱེན་སྦྱོར་མ་བྱེད་ཟུང་འཇུག་བསྒོམ།།
ཆབ་སྲིད་འཇིག་རྟེན་ཆོས་ལ་མ་ཞེན་པར།།
རིག་ངོ་སྐྱོངས་ཤིག་སྔགས་པ་སྔགས་མ་ཚོ།།
ཁྱིམ་ཚང་ཁྱིམ་མཚེས་སྙིང་རྗེ་བརྩེ་བས་སྐྱོངས།།
ཁྱིམ་ལས་ཞིང་ལས་རྨི་ལམ་ལྟ་བུར་ལྟོས།།
ཚེས་བཅུའི་ཚོགས་དང་རྒྱུན་གྱི་རྣལ་འབྱོར་བསྒོམ།།
རིག་པ་སོ་མ་སྐྱོངས་ཤིག་སྔགས་མ་ཚོ།།
སྟོང་ཉིད་སྙིང་རྗེ་དབྱེར་མེད་རྣལ་འབྱོར་མ།།
བདེ་སྟོང་ཟུང་འཇུག་བདེ་ཆེན་ངོ་བོར་ལྟོས།།
སྤྲོས་པའི་མཐའ་བརྒྱད་བྲལ་བའི་ཡེ་ཤེས་ཀྱི།།
གནས་ལུགས་རང་སོར་སྐྱོངས་ཤིག་སྔགས་མ་ཚོ།།
ཡེ་ཤེས་མཚོ་རྒྱལ་ཇོ་མོ་སྨན་མོ་སོགས།།
འཇའ་ལུས་མཁའ་སྤྱོད་སྔགས་མ་མཁའ་འགྲོའི་ཚོགས།།
འོད་གསལ་རྫོགས་པ་ཆེན་པོས་རང་གྲོལ་བྱུང་།།
རྗེས་སུ་སྒྲུབ་དང་གྲོལ་ལོ་སྔགས་མ་ཚོ།།
ཡུམ་ཆེན་ཤེར་ཕྱིན་དབྱངས་ཅན་ངག་གི་དཔལ།།
སྒྲོལ་མའི་འཕྲིན་ལས་སེང་གདོང་དྲག་མོའི་ཤུགས།།
རྡོ་རྗེ་རྣལ་འབྱོར་མ་ཡི་བདེ་སྟོང་སྐུ།།
རང་བྱུང་རིག་པར་བཞུགས་སོ་སྔགས་མ་ཚོ།།
རྣལ་འབྱོར་ཕོ་མོའི་ལུས་ལ་ཁྱད་པར་མེད།།
རིག་པ་སུས་མཐོང་དེ་ནི་གྲོལ་པར་འགྱུར།།
ཐིག་ལེ་དཀར་དམར་བདེ་དྲོད་རང་འབར་ལ།།
བུད་མེད་ཁྱད་དུ་འཕགས་སོ་སྔགས་མ་ཚོ།།
འགྲོ་བ་ཐམས་ཅད་དྲིན་ཅན་མ་ལ་བསྒོམ།།
དམིགས་མེད་བརྩེ་བས་བཏང་སྙོམ་འགྲོ་ཀུན་སྐྱོང་།།
རང་མགོ་ཐོན་ནས་གཞན་དོན་ལ་འབད་ཅིང་།།
ཐེག་ཆེན་བྱང་སེམས་བསྒོམ་ཤིག་སྔགས་མ་ཚོ།།
གཏེར་རྫུན་གྲྭ་རྫུའི་མགོ་སྐོར་མ་ཐེབས་པར།།
རྟོགས་ལྡན་བླ་མར་མཐར་ཐུག་སེམས་ངོ་ཞུས།།
གསོན་དུས་མི་འགྱོད་འཆི་དུས་མི་སྐྲག་པའི།།
ནང་གི་རྟོགས་པ་དགོས་སོ་སྔགས་མ་ཚོ།།
དགོན་བཞུགས་བཙུན་མ་ཁྱིམ་གནས་སྔགས་མ་དང་།།
དཔའ་བོའི་ཚེ་གྲོགས་ཕྲུ་གུའི་མ་ཡུམ་རྣམས།།
འབྲོག་མོ་ལས་བྱེད་མ་སོགས་གང་ཡིན་ཡང་།།
ཀ་དག་རིག་ངོས་གྲོལ་ལོ་སྔགས་མ་ཚོ།།
ཕ་མའི་དྲིན་གྱིས་རིན་ཆེན་མི་ལུས་ཐོབ།།
བསོད་ནམས་དྲིན་གྱིས་རྡོ་རྗེ་ཐེག་པ་མཇལ།།
བླ་མའི་དྲིན་གྱིས་རང་གྲོལ་ལྟ་བ་མཐོང་།།
འགྲོ་ཕན་སྨོན་ལམ་ཐོབས་ཤིག་སྔགས་་མ་ཚོ།།
སྔགས་འཆང་རྟོགས་པ་སྐྱེ་བའི་བཀྲ་ཤིས་ཤོག།
སྔགས་མའི་སེམས་ངོ་འཕྲོད་པའི་བཀྲ་ཤིས་ཤོག།
སྔགས་ཕྲུག་མང་དུ་འཕེལ་བའི་བཀྲ་ཤིས་ཤོག།
སྔགས་མང་བསྟན་པ་རྒྱས་པའི་བཀྲ་ཤིས་ཤོག།
ཅེས་ངེས་དོན་རྫོགས་པ་ཆེན་པོའི་འཇའ་ལུས་བླ་མ་གཡུ་ཐོག་ཡོན་ཏན་མགོན་པོའི་གསུངས་རྫོགས་ཆེན་འཁོར་འདས་ངོ་སྤྲོད་ཆེན་མོའི་འགྲེལ་བ་དང་ལྷན་ཐབས་ཤིག་སྒྲིག་སྐབས་སུ། སྔར་བྱོན་གྱི་རྟོགས་ལྡན་མ་ཡེ་ཤེས་མཚོ་རྒྱལ་དང་། སྐྱེས་ཆེན་རྒྱལ་བ་ཀློང་ཆེན་རབ་འབྱམས་དང་། རྒྱལ་དབང་ལྔ་བ་སྔགས་རྒན་གང་ཤར་རང་གྲོལ་དང། རྗེ་བཙུན་མ་མི་འགྱུར་དཔལ་སྒྲོན་དང་གཏེར་ཆེན་མ་སེ་ར་མཁའ་འགྲོ། ངེས་དོན་སྔགས་འཆང་ཞབས་དཀར་ཚོགས་དྲུག་རང་གྲོལ་རྣམ་པའི་སྐུ་དྲིན་རྗེས་སུ་དྲན་བཞིན་སྔགས་པ་ཧེ་རུ་ཀའམ་སྨན་པ་ཉི་ཟླས་རང་ལ་རང་གིས་ཁེར་ལབ་བྱས་པ་ཡིན་ནོ།། འཇར་མན་ནས་ཕེན་ལན་དུ་འཕུར་བའི་གནམ་གྲུའི་ནང་རྫོགས་པར་སྦྱར་བ་ཡིན་ལ་འདིས་ཀྱང་སྔགས་ཕྲུག་འགའ་རེ་ལ་ཕན་པའི་སྨོན་ལམ་དང་བཅས་སོ།། །།
