གས་རིག་པ་འཛིན་པའི་སྐྱེས་བུ་ཞིག །

གསང་སྔགས་རིག་པ་འཛིན་པའི་སྐྱེས་བུ་ཞིག །

གསང་ཆེན་ཐབས་ཀྱི་མན་ངག་གསང་ལམ་ནས། །

རིག་འཛིན་ལྷ་གྲལ་བསྙེགས་པའི་ངོ་མཚར་ལ། །

བསམ་ན་དད་གདུང་ཡིད་ཀྱི་རྦ་རླབས་འཕྱོ། །

ངེས་དོན་རྒྱལ་སྲས་དངུལ་ཆུ་ཐོགས་མེད་མཆོག། 

གཟུགས་སྐུ་བདེ་བར་གཤེགས་པའི་ཉིན་མོ་སྙེ། །

ཚེ་གྲངས་འདི་ཡིས་ཉིད་ཀྱི་ཡིད་འཕྲོག་ནས། །

ཐུགས་ཀྱི་དགོངས་པ་ཞི་བའི་དབྱིངས་སུ་གཏད། །

སྤྱན་གྱི་ལྟ་སྟངས་ནམ་མཁའི་མཐོངས་སུ་གཟིགས། །

སྐུ་ཐིག་ཟེར་ཕྲེང་ལྟད་མོར་གཡེངས་པ་འདྲ། །

ཞབས་གཉིས་སྐྱིལ་ཀྲུང་བཞུགས་སྟངས་བརྟན་པ་ནི། །

འོད་གསལ་བདེ་བའི་མངལ་དུ་ཞུགས་པ་འདྲ། །

ཁ་བའི་འདབ་མས་འཕུར་ལྡིང་རྩེན་པ་དང་། །

མཚན་གྱི་མཁའ་ལ་འཇའ་ཐིག་ཟ་འོག་རིས། །

མདངས་ལྡན་ཚོན་གྱིས་བྲིས་པའི་རི་མོ་བཞིན། །

རྟགས་དང་མཚན་མ་མིག་གི་དཔལ་དུ་འཁྲུངས། །

མེ་ཏོག་གང་ལ་ཕོག་པའི་ལྷ་སྐལ་གྱི། །

ཆོས་དང་བླ་མས་རང་གི་ཡིད་འཚེངས་ཏེ།།

དོན་མེད་འགྲམ་ཆུ་གཞན་ལ་མ་ལྡང་ཡང་། །

འདུན་མ་མ་ཉེས་འདས་རྟགས་འདི་ཡིས་གསལ། །

མིང་དང་ཐོབ་ཀྱིས་རང་གི་ལས་སྒྲུབ་པའི། །

སྙིགས་མའི་རང་རྟགས་དྲི་མས་མ་གོས་པར། །

དམན་པའི་ས་ལས་རྟོགས་པའི་གདེངས་བརྙེས་པའི། །

དམ་པའི་ངང་ཚུལ་ཟིན་པ་ཁྱེད་ཀྱི་གཤིས། །