དགོན་པ་དུ་མ་དུས་གཅིག་ཏུ་བཞེང་བའི་མཛད་བཟང་།
དགོན་པ་དུ་མ་དུས་གཅིག་ཏུ་བཞེང་བའི་མཛད་བཟང་།
ཨེ་མ་ཧོ༔
༼༡༽
བསོད་ནམས་ཆོས་དཔལ་གྱི་སྒྲོན་མེ་འབར།།
ཤེས་རབ་ཕར་ཕྱིན་ཆོས་མིག་སྣང་།།
ཨོ་རྒྱན་མཁའ་འགྲོའི་གླིང་ཀ་བཞེངས།།
༼༢༽
ཚེ་རབས་སྐྱེ་བའི་ཕྲེང་བར་འབྲེལ།།
བླ་མའི་དགོངས་པ་བཞིན་སྒྲུབ་པའི།།
སྤྲུལ་སྐུ་འོད་གྲགས་རིན་པོ་ཆེས།།
ཨེ་ཝྃ་བསམ་ཡས་གླིང་ཀ་བཞེངས།།
༼༣༽
ཆོས་དང་དམ་ཚིག་གཅིག་ཏུ་འབྲེལ།།
ཆོས་མཐུན་མཛད་པའི་ཕྲིན་ལས་ཅན།།
ཆོས་བདག་པདྨ་ཆོས་གྲགས་ཀྱིས།།
ཨེ་ཝྃ་ཀུན་བཟང་ཆོས་གླིང་བཞེངས།།
༼༤༽
གནས་བརྟན་སྡེ་སྣོད་འཛིན་པ་ཆེ།།
མཁན་ཆེན་བླ་མ་ཁོ་ནར་དད།།
དགེ་སློང་འཇམ་མགོན་བླ་མ་ཡིས།།
ཨེ་ཝྃ་གེ་སར་དགོན་པར་བཞེངས།།
༼༥༽
བསླབ་གསུམ་རྒྱན་གྱིས་ཐུགས་རྒྱུད་ཕྱུག།
སྡེ་སྣོད་གསུམ་གྱིས་ཆོས་སྒྲ་སྒྲོག།
གསང་གསུམ་བླ་མ་སྐྱབས་བཅོལ་བས།།
ཨེ་ཝྃ་ཀུན་དགའ་ར་བར་བཞེངས།།
༼༦༽
རྨི་ལམ་གོ་ཁྲབ་རྡོ་རྗེ་ལས།།
ནགས་ཚལ་དགའ་བའི་ཀླུང་ཆེན་པོར།།
སྔགས་འཆང་དཔལ་ཆེན་རྡོ་རྗེ་ཡིས།།
པདྨ་དྲག་གླིང་དགོན་པར་བཞེངས།།
༼༧༽
ཨེ་ཝྃ་ཆོས་སྨན་གེ་སར་ལྗོངས།།
ཁྲ་སྡོམ་རྫ་ཁྲའི་གུང་བ་རུ།།
རྣལ་འབྱོར་ཨེ་ཝྃ་རིག་པ་ཡིས།།
སྤྱི་དཔོན་དཔེ་མཛོད་ཁང་ཆེན་བཞེངས།།
༼༨༽
དྲག་སྔགས་གླིང་པའི་ཐུགས་ཀྱི་སྲས།།
གྲུབ་དབང་རྫོགས་ཆེན་རྒྱལ་བའི་སྲས།།
ཨ་འགྱུར་ཐུབ་བསྟན་སྙན་གྲགས་ཀྱིས།།
ཐུབ་བསྟན་རྣམ་རྒྱལ་ཕོ་བྲང་བཞེངས།།
༼༩༽
འཁོར་བའི་ཚན་རིག་འབུམ་རམས་པ།།
མྱང་འདས་མཁས་གྲུབ་གཉིས་ལྡན་ཆེ།།
མཁན་པོ་དྲི་མེད་ཟླ་བ་ཡིས།།
ཨེ་ཝྃ་དགོན་པ་གསར་དུ་བཞེངས།།
༼༡༠༽
སྐྱེ་བའི་ཕྲེང་བ་ལས་སྨོན་འབྲེལ།།
བླ་མ་སངས་རྒྱས་ཡེ་ཤེས་མཇལ།།
སོག་སྤྲུལ་མགོན་པོ་སྐྱབས་མཆོག་གིས།།
བཀྲ་ཤིས་རབ་བརྟན་དགོན་པར་བཞེངས།།
