རིང་ནས་སྙིང་དུ་གཉེར་བའི་རྩ་བརྒྱུད་བླ་མའི་ཞལ་རྒྱུན་བཀའ་གཏེར་མན་ངག་ཐམས་ཅད་ཀྱི་རྒྱལ་པོ། ཐེག་པ་ཐམས་ཅད་ཀྱི་རྩེ་རྒྱལ། རྒྱུད་ཐམས་ཅད་ཀྱི་ཡང་སྙིང་། ལུང་ཐམས་ཅད་ཀྱི་ཕྱི་མོ། འོད་གསལ་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་ཉིང་ཁུ་ཐམས་ཅད་གཅིག་ཏུ་བསྡུས་པ། ཟབ་ལམ་འོད་གསལ་རྫོགས་པ་ཆེན་པོའི་གནད་དོན་ཀུན་ཕྱོགས་གཅིག་ཏུ་འདུས་པ། ཀུན་མཁྱེན་བརྒྱུད་པའི་འདྲ་འབག་རིན་པོ་ཆེའི་བཀའ་ལུང་མན་ངག་ཐམས་ཅད་བུམ་པ་གང་བཤུས་ལྟར་ཆིག་རྒྱུད་དུ་ཐོབ་ཡུལ་གྱི་བླ་མ་སངས་རྒྱས་དངོས་དག་དག་ལས་གདོད་མའི་ལམ་རིམ་ཡེ་ཤེས་བླ་མ་ཐོབ་པ་འདི་ལྟར།
༼༡༽ ༧སྐྱབས་རྗེ་རྩེ་བའི་མཁན་ཆེན་འཇིགས་མེད་རྣམ་རྒྱལ་རིན་པོ་ཆེ། ༢༽ དྲིན་ཆེན་ཨ་མ་བཀའ་དྲིན་ཅན། ༣༽ ༸དིལ་མཁྱེན་རྡོ་རྗེ་འཆང་། ༤༽ ༸ཆོས་རྗེ་དམ་པ་ཡིད་བཞིན་ནོར་བུ། ༥༽ བྱ་བྲལ་ཆོས་དབྱིངས་ཁྱབ་བརྡལ། ༦༽ དགེ་མང་མཁན་ཆེན་དབང་རྒྱལ་རྣམ་གསུམ། ༧༽ ཀུན་གཟིགས་པཎ་ཆེན་པདྨ་ཚེ་དབང་དང་། ༨༽ མཁན་ཆེན་རྡོ་རྗེ་འཆང་བསོད་ནམས་ཚེ་དབང་དང་། ༩༽ མགོ་ཚ་ཕུར་བ་སྤྲུལ་སྐུ། ༡༠༽ རྫ་རྒྱལ་མཁན་ཆེན་འབུམ་པ་དང་། ༡༡༽ ཨ་འཛོམ་འབྲུག་སྤྲུལ་རྡོ་རྗེ་འཆང་དང་༡༢༽ མཁན་ཆེན་མུན་སེལ། ༡༣༽ སེ་ར་ཡང་སྤྲུལ་རྡོ་རྗེ་འཆང་། ༡༤༽ ཁྲོམ་དགེ་ཨ་རིག་རྡོ་རྗེ་འཆང་། ༡༥༽ གྲུབ་དབང་ལུང་རྟོགས་རྒྱ་མཚོ་དང་། ༡༦༽ མར་པ་ཆོས་དབྱིངས་རྡོ་རྗེ་དང་། ༡༧༽བྱ་བྲལ་སངས་རྒྱས་རྡོ་རྗེ། ༡༨༽ གྲུབ་དབང་པདྨ་ནོར་བུ། ༡༩༽ འཁྲུལ་ཞིག་རིན་པོ་ཆེ་དང་། ༢༠༽ སྒོ་ཆེན་སྤྲུལ་སྐུ་གསང་སྔགས་བསྟན་འཛིན་དང་། ༢༡༽ ཀ་ཐོག་རིག་འཛིན་ཆེན་པོ་སོགས་ལས་ལེགས་པར་ཞུས་ནས་མི་ལོ་ཞེ་ལྔའི་རིང་ལ་ཉམས་ལེན་ཅི་ནུས་སུ་བྱས་པ་དང་། གཞན་ཡང་ངོས་ཀྱི་སློབ་མ་ཡང་ཤར་ལྷོ་ནུབ་བྱང་གི་དད་ལྡན་བརྒྱ་ཕྲག་དུ་མ་ལ་ཟབ་ཁྲིད་འབུལ་ནས་གྲོལ་བ་ཐོབ་ཡང་དུ་མ་བྱུང་བ་ནི་རང་གི་རང་ལ་ངོ་གནང་མི་དགོས་པ་སྐུ་འཚོ་བཞུགས་ཡོད་པ་དང་འདས་གྲོངས་སུ་སོང་བས་ཀྱང་འདས་རྟགས་བཞགས་གནང་བ་སོགས་དགའ་འོས་དང་ལོ་རྒྱུས་རང་བཞིན་ལྡན་པར་མཆིས་སོ།
དམིགས་བསལ་ནི་རང་ལ་སངས་རྒྱས་དངོས་སུ་མཐོང་འཁན་ཡོངས་ལ་ལེགས་སྐྱེས་ཐམས་ཅད་ཀྱི་རྒྱལ་པོ། བྱིན་རླབས་ཐམས་ཅད་ཀྱི་རྩ་བ། དངོས་གྲུབ་ཐམས་ཅད་ཀྱི་སྙིང་ཐིག་ཡིན། དེས་ན་ས་ག་ཟླ་བའི་དབང་ཚེས་ཚེས་གཅིག་ནས་ཡར་ཚེས་བཅོ་བར་ཨ་རི་ནས་ཤིང་ཀུན་བར་དུ་དད་གུས་དག་སྣང་ཅན་སྦས་གསང་མེད་པར་དབང་ཁྲིད་མན་ངག་ཡེ་ཤེས་བླ་མའི་ཟབ་ལམ་འོད་གསལ་རྫོགས་པ་ཆེན་པོའི་དོན་ཁྲིད་འདེབས་བཞིན་ཡོད། དེས་ད་སྐབས་ཨེ་ཝྃ་པའི་སློབ་གཙང་འགའ་ལ་ས་ག་ཟླ་བའི་ཉ་ལ་རིག་པའི་རྩལ་དབང་དང་ཟབ་ཁྲིད་རྒྱས་པར་འབུལ་འཆར་ཡིན། དེས་ན་རིགས་དང་སྐལ་བཟང་རྣམ་པ་ལེགས་པར་ཕེབས་དང་སྙིང་གི་མན་ངག སེམས་ཀྱི་བདུད་རྩི། སངས་རྒྱས་ཀྱི་ཞལ་བཟང་། ཚེ་གཅིག་སངས་རྒྱས་ཐོབ་པའི་དམ་ཆོས། ཀུན་མཁྱེན་གྱི་གསང་གསུམ་མཇལ་འདོད་ཡོད་པ་ཚོ་ཕེབས་ཤོག།་་་་་་་
——–ཨེ་མ་ཧོས
