དད་དམ་གཙང་མའི་བླ་མ་དང་ཆོས་འབྲེལ་ལེགས་པར་གྲུབ་ནས་སི་ལོ་ཝ་ཀི་དང་རྒྱལ་ཕྲན་འགའ་རྒྱུད་ནས་གཏེར་བུམ་ལེགས་སྦྱིན་དང་སྒོམ་ཐག་རང་དབང་གིས་མཆོད་ནས་

དད་དམ་གཙང་མའི་བླ་མ་དང་ཆོས་འབྲེལ་ལེགས་པར་གྲུབ་ནས་སི་ལོ་ཝ་ཀི་དང་རྒྱལ་ཕྲན་འགའ་རྒྱུད་ནས་གཏེར་བུམ་ལེགས་སྦྱིན་དང་སྒོམ་ཐག་རང་དབང་གིས་མཆོད་ནས་

དཔལ་ལྡན་མཆོག་སྦྱིན་དང་ཛམ་ལྷ་ཆོས་སྒྲོན་གྱི་སྡོད་གནས་ཀྱི་ནགས་ཀློང་ངམ།

ཕོ་ལན་སྦྱིན་བདག་གི་རི་ཁྲོད་ན་བདེ་བར་མཆིས།

ངོས་ལ་ཐུགས་ཁུར་གནང་བ་ཀུན་ཁམས་བདེ་ཞུ་བ་དང་ད་དུང་བསམ་ལྷུན་ཚར་རེ་གསུང་ཡོང་བར་མཁྱེན་ནོ།། ཨེ་མ་ཧོ་འམ་ཨ་ཏིས 3/11/2024

སྤྲུལ་ཚུལ་ཁྲིམས་རྒྱ་མཚོའི་རྣམ་ཐར་ཉུང་བསྡུས་སུ་བཀོད་པ་དད་གསུམ་པདྨོ་བཞད་

པའི་ཉི་གཞོན་ཞེས་བྱ་བ་བཞུགས་སོ༎

༄༅༎པདྨའི་ཐུགས་ཀྱི་འོད་ཟེར་ཕྱོགས་བཅུར་འཕྲོ།།

རྒྱལ་ཁམས་ཡོངས་ལ་འགྲོ་དོན་མང་དུ་མཛད།།

སྤྲུལ་བའི་གཏེར་ཆེན་ཚུལ་ཁྲིམས་རྒྱ་མཚོ་ཡི།།

པདྨའི་ཐུགས་བཞེད་འགྲུབ་པར་བྱིན་གྱིས་རློབས།

དེ་ཡང་སྤྲུལ་བའི་སྐུ་མཆོག་དམ་པ་རྨ་ཡུལ་གཏེར་ཆེན༧ཚུལ་ཁྲིམས་རྒྱ་མཚོ་མཆོག་ནི ། ཆུང་དུས་ནས་དཔོན་ཐོབ་ཀྱི་རྒྱབ་སྐྱོར་མེད་ལ ། ཕྱུག་ཐོབ་ཀྱི་ངོ་སོ་ཅི་ཡང་མེད་པར་བུ་རང་སྐྱེས་ཀྱི་ངོ་བོ་གཙང་མ་དང་། ཆོས་ཡང་དག་གི་ལམ་སྟོན་བཟང་པོ །རྗེ་བླ་མ་ཡི་ཞལ་མཇལ་གསུང་ཐོས་ཀྱི་གོ་སྐབས་བརྒྱུད་ནས་གསེར་ས་འོག་ན་ཡོད་ཀྱང་། འོད་ནམ་མཁར་འཆར་བའི་དཔེ་བཞིན ། སྤྲུལ་བའི་སྐུ་མཆོག་དམ་པ༧ཚུལ་ཁྲིམས་རྒྱ་མཚོ་མཆོག་ལ་བསྟན་འགྲོར་ཕན་པའི་མཛད་རྗེས་མང་ན་ཡང་འདིར་སྐབས་སུ་བབས་པ་རགས་བསྡུས་ཙམ་ཞིག་ གླིང་ཛཾ་དར་དང་ཡར་ཁོག་སྨན་སྐྱབས་གཉིས་ཀྱིས་ཁོང་དང་འབྲེལ་ཡོད་ཀྱི་བླ་སྤྲུལ ། དད་ལྡན་གྱི་ཡོན་བདག དམ་གཙང་གི་སློབ་མ །རྣམས་ཀྱི་མདུན་ས་ནས་འཚོལ་སྡུད་བྱས་པ་གཙོ་བོར་གླེང་བ་ལ ། དེ་ཡང་སྤྱི་ལོ་༡༩༩༠སྟེ་བོད་རབས་རྒྱན་ལྕགས་ཕོ་རྟ་ཡི་ལོའི་ཟླ་བརྒྱད་པའི་མར་ངོས་ཚེས་ཉེར་ལྔ་མཁའ་འགྲོ་འདུ་བའི་དུས་བཟང་ཁྱད་པར་ཅན་ལ། མགོ་ལོག་པདྨ་འབུམ་གྱི་མངའ་ཁོངས་ད་ལྟ་ས་གནས་སྙི་སྟོད་དུ་འབོད་པའི་ཡུལ་དེར་ཐོག་མར་སྐུ་འཁྲུངས། ཁོང་མ་འཁྲུངས་བའི་ཡར་སྔོན་དུ་མ་ཡུམ་ལ་གཡུ་ཁོག་བྱ་བྲལ་བ་ཆོས་དབྱིངས་རང་གྲོལ་གྱིདོན་ས་ལུང་བསྟན་ནས་ཁྱོད་ལ་མ་འོངས་པར་སྐྱེས་བུ་དམ་པ་ཞིག་བསྟན་པ་དང་སེམས་ཅན་གྱི་ལ་བསམ་བཞིན་དུ་འབྱོན་པར་ལུང་བསྟན་པ་ལྟར་སྤྲུལ༧ཚུལ་ཁྲིམས་རྒྱ་མཚོ་ནི །

ཡབ་བྱ་བླ་མ་འབྱོར་རྒྱས་དང་ཡུམ་རྨོག་བཟའ་ཤེས་རབ་མཚོ་གཉིས་ཀྱི་སྲས་སུ་ངོ་མཚར་བའི་ལྟས་བཟང་དུ་མ་དང་བཅས་མ་ཡུམ་གྱི་སྐུ་ལུས་ལ་ན་ཟུག་ཅི་ཡང་མེད་པར་འཁྲུངས ། ཁོང་སྐུ་ན་ཆུང་ངུའི་དུས་སུ་ཞལ་ནས་ཀ་ཁ་ཞེས་གསལ་བཤད་སུམ་ཅུའི་དབྱངས་རྟ་བྱུང་རྒྱལ་དུ་གྱེར་བའི་དམ་པའི་རང་རྟགས་ཤིག་ལྷན་སྐྱེས་སུ་མངའ་བ་དང་། མ་ངེས་པའི་རྟགས་སུ་ཕུར་རྡོའི་སྟེང་དུ་ཞབས་རྗེས་བཀོད་པ་དང་ཉིན་འགའ་ལ་གར་སོང་མེད་པར་འགྲོ་ལ་ཕྱིར་ཐོན་ཚེ་མ་ཡུམ་གྱིས་དྲིས་ན་མཆོད་རྟེན་ལ་སོགས་པའི་ནང་དུ་སོང་ཞེས་ཤོད་སྲོལ་ཡོད་ཅེས་ཁོང་ཆུང་དུས་སུ་ཆ་རྒྱུས་ཡོད་པའི་མི་དག་གིས་བཤད ། བྱམས་བརྩེ་ཆེ་ཞིང་དམ་པའི་ལྷ་ཆོས་ལ་བརྩོན་སེམས་ཀྱི་བང་མི་ལྷོད་པ་ཞིག་ཡིན་ལ་ཁོང་དགུང་གྲངས་ལྔའི་སྟེང་ནས་ས་དེར་རྡོ་ལ་ཕྱག་རྗེན་པས་མ་ཎིའི་རྡོ་མཁར་སྣོད་བཅུད་ཀྱི་རྒུད་པ་སེལ་ཕྱིར་དུ་བཞེངས་པ་ད་ལྟ་མངོན་སུམ་དུ་མཇལ་རྒྱུ་ཡོད ། ས་ཆ་ཕ་སྟོད་ཀྱི་གསེར་འཛོམས་ཕྱུག་མོ་རུ་གཙང་བ་སྐུ་འབྲིང་གཏད་དཀྲུག་འདོན་དུ་བྱོན་སྐབས་སུ་ཁོང་ཐུགས་དགྱེས་པའི་ངང་ཚོགས་མང་གི་དབུས་ནས་སྐུ་མདུན་དུ་བོས་ཤིང་ཡི་གེ་སྦྱོངས་ཤིག་ཅེས་མ་འོངས་འབྱུང་འགྱུར་ལུང་དུ་བསྟན །

ཁོང་གི་ཀློག་བསླབ་པའི་དགེ་རྒན་ནམ་ཡོངས་འཛིན་ནི་གསང་ལུང་དགོན་གྱི་བླ་མ་སྐལ་བཟང་ཉི་མ་ཡིན་ལ་འདི་བ་ཚང་སྔོན་མཁན་པོ་མུན་སེལ་གྱི་སློབ་བུ་ཐུགས་རྩིས་ཤིན་ཏུ་ཆེ་བ་ཞིག་ཡིན་པར་གྲགས ། དགུང་ལོ་བཅུ་གསུམ་གྱི་སྟེང་ཁོང་གི་ཞང་བོ་བླ་མ་སྐལ་བཟང་ཉི་མའི་དྲུང་ནས་ཡི་གེ་འབྲི་ཀློག་སོགས་ཟླ་གསུམ་ཙམ་ལ་བསླབ་པ་ལས་བཤད་གྲྭ་དང་སློབ་གྲྭ་གང་དུའང་མ་སོང་མོད་རང་བྱུང་གི་རྟོགས་པ་མངོན་དུ་གསལ་ནས་དགུང་ལོ་བཅྭོ་བརྒྱད་ལ་སླེབ་ཚེ་རང་ཡུལ་གྱི་གླིང་འབུད་དགོན་ནས་ཚོགས་གྲལ་དུ་ཞུགས ། གཡུ་ཐོག་སྤྲུལ་ཀརྨ་བསོད་ནམས་ཀྱི་མདུན་སར་ཁོང་གི་ཉེ་མི་འགའ་དང་ལྷན་དུ་བྱོན་སྐབས་སུ་སྤྲུལ་ཀརྨ་བསོད་ནམས་ཀྱིས་ཁོང་ལ་སྦྱིན་དགོས་པར་གསུངས་ནས་ཐུགས་དགྱེས་དགྱེས་ཚད་མེད་གནངས ། ཁང་སར་བསྟན་པའི་དབང་ཕྱུག་ཚང་གི་མདུན་ནས་འབུམ་ལྔ་བསགས་སྦྱང་ཚད་ལྡན་བྱས་མཐར་རིམ་བཞིན་དབང་ལུང་ཁྲིད་གསུམ་སྤྱི་དང་ཁྱད་པར་འོད་གསལ་རྫོགས་པ་ཆེན་པོའི་ཆོས་སྐོར་མང་དུ་ཞུས ། དེ་ནས་གླིང་འབུད་དགོན་གྱི་རྡོ་རྗེ་སློབ་དཔོན་སྤྲུལ་འཇིགས་མེད་ཀོ་ཆས་ཁོང་ལ་བླ་མའི་མཚན་གྱི་ཅོན་པན་བསྩལ་ནས་ཐུགས་གཙིག་ཤིན་ཏུ་ཆེན་པོ་མཛད ། སེང་ཤུལ་སྤྲུལ་སྐུའི་མདུན་དུ་ཁོང་བྱོན་ཚེ་སྐུ་པར་ལྷན་དུ་སྒྲོན་དགོས་པར་གསུངས་པ་དང་རྗེས་སུ་བླ་མ་ཐུགས་རྗེ་བྱོན་སྐབས་སུ་ཚུལ་ཁྲིམས་རྒྱ་མཚོ་ནི་བསྟན་པ་དང་སེམས་ཅན་ལ་ཕན་ཐོག་པའི་སྐུ་སྐྱེས་ཤིག་འབྱུང་ཞེས་ཁོང་གིས་ལུང་གིས་བསྔགས་ཅེས་གླིང་འབུད་དགོན་གྱི་བླ་མ་ཐུགས་རྗེས་གསུངས ། ཁོང་སྐུ་ན་ཆུང་དུས་མཚན་ལ་རྒྱལ་བ་དོན་གྲུབ་ཏུ་འབོད་ལ་རྗེས་སུ་རྡོ་གྲུབ་སྤྲུལ་སྐུ་ཐུབ་པས་ཁོང་གི་མཚན་ལ་ཚུལ་ཁྲིམས་རྒྱ་མཚོ་གསོལ་ནས་བསྟན་དང་འགྲོ་བའི་དོན་རྒྱ་ཆེར་ཡོངས་བར་བསྔགས་བརྗོད་ཀྱི་མེ་ཏོག་འཐོར། གཞན་ཡང་རྡོ་གྲུབ་སྤྲུལ་སྐུ་ཐུབ་པ་དང་། གཡུ་ཐོག་ཀརྨ་བསོད་ནམས ། བྱ་བྲལ་བ་ཆོས་དབྱིངས་རང་གྲོལ ། རེབ་གོང་ཨ་ལགས་མག་སར། གཙང་སྤྲུལ་འཇིགས་མེད་རྡོ་རྗེ་སོགས་བསྟན་འཛིན་གྱི་སྐྱེས་བུ་མང་པོའི་ཞབས་རྡུལ་སྤྱི་བོར་བསྟེན་པས་འཁོར་འདས་བདེན་ཞེན་གྱི་རྟོག་པ་དབྱིངས་སུ་སད་དེ་གྲུབ་པ་མཆོག་ཏུ་བརྙེས་ཤིང་ལྕགས་དབྱུག་གིས་ཕུར་མདུད་བྱས་པ་དང་། རྡོ་རིལ་རྩམ་པ་ལྟར་བརྫིས་པ་སོགས་གྲུབ་རྟགས་བསྟན་ཚུལ་ཤིན་ཏུ་མང་མོད་འདིར་ཡིག་ཚོགས་སྐྱུང་ཕྱིར་ཉུང་ཙམ་ལས་མ་བཀོད །

རྗེས་སུ་དར་ལག་ལ་བྱོན་ནས་འགྲོ་དོན་ཕྱོགས་མེད་དུ་རྒྱས་ཚུལ་ནི་འོག་ཏུ་བྱུང་ལ་ཁོང་གི་སྐུ་སྐྱེས་གོང་མ་དེ་མགོ་ལོག་སྡེར་ནང་དགོན་གྱི་མཁན་སྤྲུལ་རིག་པའི་རྡོ་རྗེ་ཡིན་པར་བཤད་སྲོལ་མཆིས ། ད་དུང་ཁོང་གི་ཉམས་སྣང་དང་མཁའ་འགྲོའི་བརྡ་ལུང་སོགས་སུ་གླིང་གི་དུས་སུ་གྲུབ་ཆེན་སུ་དང་གང་ཡིན་པ་སོགས་ལུང་དུ་གསལ་བོར་བསྟན་པ་ཡོད་མོད་རྗེས་མར་གསང་བའི་རྣམ་ཐར་དུ་འབྱུང་འགྱུར་ཡིན་པས་དེར་གཟིགས་པར་འཚལ།

ད་ནི་ལོ་རྒྱུས་དངོས་སུ་འཇུག་པ་ལ ། དེ་ཡང་པདྨ་རྫོང་སྨར་ཁོག་རྩིས་མདའ་དགོན་གྱི་གྲྭ་འབྲོ་རྡོར་དང་མཉམ་དུ་སྤྲོ་བསང་ལ་བྱོན་ཚེ་ནམ་མཁར་སྤྲིན་པ་འཁྲུགས་སྐབས་སུ་ཁོང་གིས་སྤྲིན་རྣམས་ཡར་དེད་མར་དེད་བྱེད་གསུང་ནས་བསྡིགས་མཛུབ་བསྟན་ཏེ་ཤར་སྤྲིན་ཤར་ལ་དེད ། ནུབ་སྤྲིན་ནུབ་ལ་དེད་ནས་གྲུབ་པའི་རྟགས་མཚན་དངོས་སུ་བསྟན། ཡང་པདྨ་རྫོང་གི་བཙན་ལོ་ཚང་དུ་བཞུགས་སྐབས་སུ་ཉེ་འབྲེལ་སོགས་མི་མང་པོ་ཞིག་དང་ལྷན་དུ་སྤྲོ་བསང་བྱས་ནས་བཞུགས་སྐབས་སུ་འབུ་ཞིག་ཇ་ཚན་ནང་ལྷུང་ནས་ཤི་བའི་ཚེ་ཁོང་གིས་འདི་སྙིང་རྗེ་ཤི་མི་ཉན་གསུངས་ནས་སེན་སྐོར་ཞིག་བརྡབ་ཚེ་ཡར་གསོན་དུ་བཅུག་པ་དེར་ཡོད་ཀུན་གྱིས་མཐོང་ནས་དེ་དག་གི་རྒྱུད་ལ་དད་པའི་ས་བོན་བསྐྲུན །ད་དུང་བསད་པ་གསོས་པ་སོགས་ཀྱི་མཛད་པ་ཤིན་ཏུ་མང་མོད་རེ་ཞིག་དེ་ག་ཙམ་མོ༎

དྭངས་ལག་རབ་བརྟན་གྱི་རྒན་མོ་ནད་གཞི་ལྕི་མོས་མནར་ཏེ་དབང་ཤོར་རྒྱུན་ཆད་མེད་པར་བྱུང་བཞིན་ཡོད་སྐབས་སུ་ཁོང་གིས་ཁབ་མདུད་པ་སོགས་བྱས་ཏེ་ནད་ལས་གྲོལ་བ་དང་། དེའི་རྗེས་ལོ་འགའི་མཇུག་ཏུ་ལྐུག་ནས་མགོ་ལོག་ཁུལ་མི་དམངས་སྨན་ཁང་དུ་བསྟན་མོད་ཕན་འབྲས་ཅི་ཡང་མ་བྱུང་། དེ་ནས་སྤྲུལ་རིན་པོ་ཆེ་གདན་དྲངས་ནས་ཁོང་གིས་བྱིན་རླབས་དང་དད་རྟེན་གནང་དེ་ནད་ལས་གྲོལ། ད་དུང་ཁོང་གིས་བདག་ལ་ཆང་འཐུང་ན་ ཉེས་པ་ཆེ་བའི་ཞལ་གདམས་མང་པོ་གསུངས་ཤིང་ཆང་གི་ཤེལ་དམ་དཀར་སྔོན་གཉིས་ཕུག་པ་དང་། ལྕགས་འགའ་ལ་མདུད་པ་མདུད་པའི་གྲུབ་རྟགས་བསྟན།

སྤྲུལ་རིན་པོ་ཆེ་དང་ངེད་གཉིས་ལུང་སྔོན་དགོན་དུ་འགྲོ་བའི་སྐབས་སུ་རླངས་འཁོར་མགྱོགས་མོར་རྒྱུགས་བཞིན་ཡོད་སྐབས་གློ་བུར་དུ་ལག་འཁོར་ས་ལ་ལྷུང་མོད་མི་དང་རླངས་འཁོར་གང་ལ་ཡང་གནོད་མ་ཐེབས་པར་མ་ཟད་ལག་ཆ་གང་ཡང་མེད་ནའང་ཕྱིར་སྤྲད་དེ་ལམ་ལ་ཆས ། ང་ཚོའི་བླ་མ་རྟོགས་ལྡན་དགོན་གྱི་ངའི་ཚ་བུ་ཞིག་གི་རྒན་མོའི་མ་རྒན་ཞ་ནས་ལོ་མང་པོའི་རིང་སྨན་པར་བསྟན་ནའང་ཕན་པ་མ་བྱུང་ལ་གཟེར་ཟུག་ཧ་ཅང་ཆེ་བའི་སྐབས ། ངེད་ཅག་གི་སྡེ་མི་པི་པི་ཟེར་བ་ཞིག་གིས་སྤྲུལ་ཚུལ་ཁྲིམས་རྒྱ་མཚོ་གདན་དྲངས་ན་ཁོང་གིས་སྨན་ཡང་མཁྱེན་ལ་གྲུབ་རྟགས་ཡང་སྟོན་རྒྱུ་ཡོད་པར་བཤད་པས་ངེད་གཉིས་གདན་འདྲེན་ཞུ་རུ་སོང་ནས་ཁོང་གདན་དྲངས་དེ་ནད་པ་ཚང་ལ་ཐོན་སྐབས་སུ་ནད་པ་མལ་སའི་ནང་དུ་ཉལ་ནས་འདུག ། བྱོན་མ་ཐག་ཏུ་ཁོང་གིས་སྐུ་རིམ་ཞིག་གསུང་ཞོར་དུ་གདོན་རྫས་ཤིག་འདུག་ཅེས་གསུངས། བུ་དང་བུ་མོ་མག་པ་སོགས་ཀྱིས་གདོན་རྫས་དེ་འདྲ་ཞིག་མེད་ཅེས་དང་དུ་མ་བླངས་བའི་སྐབས་སྤྲུལ་སྐུའི་སྣོད་སོགས་ངོས་འཛིན་མཛད ། རྒན་མོ་ནད་པ་དེས་བཤད་ན་མོའི་ཨ་ཁུས་མོ་ལ་སྤྲད་པ་ཡིན་ཞེས་བཤད ། དེ་ནས་རྫས་དེ་ཁོང་ལ་ཕུལ་བས་ངེད་ཅག་གི་རླངས་འཁོར་ནང་དུ་བཞག་ནས་བཅག་སར་ཁྱེར་ཏེ་ཡོང་སྐབས་སུ་སྟོང་རྟར་ཤོར་ནའང་སྣ་ལམ་དུ་གཞོབ་བདུག་ཙམ་ལས་རླངས་འཁོར་གྱི་མགོ་མཇུག་ཡོངས་རྫོགས་ན་ཤུལ་འདི་རེད་སྙམ་པ་གཅིག་ཅིང་མི་འདུག་པའི་གྲུབ་རྟགས་དངོས་སུ་བསྟན་རྗེས་སུ་ཁོ་རང་ལྷག་ཏུ་དད་པ་དང་ཡིད་ཆེས་པར་གྱུར །རྗེས་ནས་ནད་པ་ཁོ་ཞ་བསྲངས་ནས་ནད་མེད་དུ་གྱུར ། ད་དུང་ངེད་ཅག་དྭངས་ལག་ན་ཉི་རྡེའུ་ཟེར་བ་ཞིག་ཡོད་ལ་དེ་ཚང་ལ་གྲྭ་བ་ཞ་བོ་སྐད་ཆ་མི་ཤོད་པ་ཞིག་ཡོད ། དེ་ཚང་གིས་བདག་ལ་འབྲེལ་བ་བྱས་ནས་ཁོང་ཚོ་སྤྲུལ་སྐུའི་མདུན་དུ་འགྲོ་རོགས་དགོས་ཚུལ་སོགས་བཤད་པས་ཕྲན་གྱིས་འགྲོ་རོགས་ལན་གཅིག་བྱས ། རྗེས་སུ་ཁོ་ཚོ་ཁོང་གི་མདུན་སར་ཡང་དང་བསྐྱར་དུ་སོང་བས་ད་ལྟ་ནད་གཞི་མེད་དུ་གྱུར་ཏེ་དེང་སྐབས་བླ་མ་རྟོགས་ལྡན་དགོན་ནང་དུ་འཚོགས་ཡོད་ཅེས་དྭངས་ལག་དབང་བཛིན་གྱིས་བཤད ། ཡང་འཛུགས་བསྐྲུན་རྡོར་ཚུར་གྱིས་ཁོའི་ཉེ་སྐོར་དག་གཏད་ལ་བརྒྱབ་ཡོད་པ་གཏེར་ཆེན་བདེ་བའི་རྡོ་རྗེ་དང་། ཁྲ་གླིང་མཆོག་སྤྲུལ་བསྟན་པའི་ཉི་མ་སོགས་ཀྱིས་གསུངས་ནའང་གར་མནན་སོགས་མ་ཤེས་པར་རང་སོར་ལུས་ནས་མི་ལོ་བཅྭོ་བརྒྱད་འདས་པའི་ཚེ་སྤྲུལ་རིན་པོ་ཆེ་ཚུལ་ཁྲིམས་རྒྱ་མཚོ་ལ་ནན་གྱིས་ཞུས་མཐར་ཁོང་དངོས་སུ་བྱོན་ནས་མགོ་ལོག་རྟ་བོར་ཟམ་ཆེན་གྱི་ཞོལ་དུ་ཁོང་གིས་ཕྱག་མཛུབ་གེར་ནས་ས་ཆ་འདི་ག་རེད་ཅེས་གསལ་བོར་ལུང་གིས་བསྟན་པར་མ་ཟད་གཏད་རྣམས་རང་ས་དེ་མ་ཐག་ནས་བླངས ། རྗེས་སུ་སྤྲུལ་བའི་གཏེར་ཆེན་བདེ་བའི་རྡོ་རྗེ་ལ་ལོ་རྒྱུས་རྣམས་སྦ་གསང་མེད་པར་ཞུས་ཤིང་ལུང་བསྟན་བསྐྱར་ཞུས་བྱས་ཚེ་ཁོང་གིས་གཏད་རྣམས་ལྷག་མེད་དུ་བླངས་འདུག་པས་ཁོང་ནི་བསམ་གྱིས་མི་ཁྱབ་པའི་གཏེར་སྟོན་བཟང་པོ་ཞིག་གོ་ཞེས་བསྔགས་བརྗོད་ཀྱི་མེ་ཏོག་ཡང་ཡང་འཐོར་ཞེས་འཛུགས་བསྐྲུན་གྱི་ཡུལ་མི་རྡོར་ཚུར་གྱིས་གསལ་བོར་བཤད ། ཉིན་ཞིག་ལ་སྤྲུལ་རིན་པོ་ཆེ་དང་ཁོ་ཚོ་མཉམ་དུ་རྨ་ཆུའི་ཆུ་རྒྱུད་ལ་སྤྲོ་སངས་དུ་ཕེབས་སྐབས་སུ་རྩེད་མོའི་ཚུལ་དུ་རྡོ་ཕ་བོང་ཞིག་གི་སྟེང་ལ་ཞབས་རྗེས་དཔར་དེ་གྲུབ་རྟགས་བསྟན་པ་ད་ལྟ་དངོས་སུ་མཇལ་རྒྱུ་འདུག་ཅེས་སྨན་སྐྱབས་ཀྱིས་བཤད ། དམ་པ་གང་ཉིད་གཙང་ཞོལ་ལྷ་པོ་དང་ཚ་ཁོ་གྲུབ་ཆེན་རྣམས་དང་མཉམ་དུ་རྨ་ཡུལ་དར་ལག་ཁྲ་གླིང་དགོན་གྱི་ཉེ་འདབས ། ས་ནག་རྡོ་མཁར་དུ་ཕེབས་སྐབས་སྤྲུལ་རིན་པོ་ཆེས་རྡོ་རིལ་དཀར་ཡོལ་ཙམ་ཞིག་ཕྱག་ཏུ་བླངས་ནས་ཕྱག་ཐམ་བཞག་པ་ད་ལྟ་མངོན་སུམ་དད་པའི་རྟེན་དུ་མཇལ་རྒྱུ་འདུག ད་དུང་སྤྲུལ་རིན་པོ་ཆེས་གཏེར་བླངས་པ་དང་གྲུབ་རྟགས་བསྟན་པ་སོགས་མང་པོ་བརྗོད་ཀྱིས་མི་ལང་བ་ཞིག་གཙང་ལྷ་པོས་གསལ་བོར་ཤེས། ཨ་རིག་གཏེར་ཆེན་༧པདྨ་འོད་གསལ་གསང་སྔགས་གླིང་བས་ཁོང་ལ་གསོལ་འདེབས་དང་ཞབས་བརྟན་སོགས་གསུང་ནས་སྐུ་གསུང་ཐུགས་རྟེན་སོགས་གནང་དེ་ཐུགས་བརྩེ་བརྩེ་དཔག་མེད་གནང་། དེ་ནས་གླིང་འབུད་དགོན་གྱི་སྤྲུལ་བརྩོན་འགྲུས་བཟང་པོ་དང་སྤྲུལ་རིན་པོ་ཆེ་རྣམས་གཉིས་རྒྱ་ནག་ཧྲིན་ཡང་ལ་ཕེབས་སྐབས་རི་བོ་རྩེ་ལྔ་ནས་རྒྱ་བས་པེན་གྱིས་རྡོ་ཞིག་རྨ་ཆུའི་རྒྱ་ལ་བསྐུར་ནས་གཏེར་ཆེན་ཁོང་ལ་ཕྱག་ཐམ་ཞིག་འཇོག་པར་གསོལ་བ་བཏབ་ཚེ་ཁོང་གིས་རྡོ་ལ་ཕྱག་ཐམ་བཀོད་པ་ད་ལྟ་རྒྱ་ཡུལ་དེའི་དད་རྟེན་ལ་མངོན་སུམ་དུ་འཇལ་སར་མཆིས། དྭངས་ལག་དཔལ་ཆུང་ཚང་གི་བུ་མོ་ཀ་ཅོ་ལ་མ་ངེས་པའི་ནད་ཞིག་ཐེབས་པའི་ཚེ་ཁོང་གི་མདུན་སར་ཐེངས་དང་པོར་ཁྲིད་སྐབས་སུ་ཁོང་གིས་མདུད་པ་མདུད་པས་ནད་གཞི་ཡར་དྭངས་བྱུང་། རྗེས་མར་མོས་བོར་བརླག་ཐེབས་ཚེ་སྔར་ལྟར་ན་བའི་ཚེ་ཡང་བསྐྱར་ཁོང་གི་མདུན་སར་ཁྲིད་པའི་ཚེ་ཁོང་གིས་ཁབ་ཀྱི་སྲུང་མདུད་དང་བདུག་པ་སོགས་གནངས་ནས་སངས་དྲག་བྱུང་བ་དང་། ཁོའི་སྤུན་རྡོ་ལོ་ལ་སྔ་རྗེས་དུ་མར་རྐྱེན་ངན་སྣ་ཚོགས་ཀྱིས་གཙེས་པའི་ཚེ་ཁོང་ལ་སྐྱབས་འཇུག་ཞུས་ཚེ་ཁོང་གི་དབུ་སྐྲ་ཆང་ནང་བསླད་དེ་འཐུང་བའི་ཚུལ་མཛད་རྗེས་གྲུབ་རྟགས་ཀྱིས་ཕུར་མདུད་ཞིག་ཏུ་བསྒྱུར་ཏེ་གནངས་བས་རྗེས་མར་ཁོ་ལ་དེ་འདྲའི་རྐྱེན་ངན་གཅིག་གིས་ཀྱང་མི་ཚུགས་པར་གྱུར ། ཉིན་ཞིག་ལ་དཔལ་ཆུང་གིས་ཁོ་ཚང་ལ་དད་རྟེན་ཞིག་དགོས་ཞེས་ནན་དུ་བསྐུལ་མཐར་རྡོ་ལྷམ་དང་འདྲ་བ་ཞིག་ཡོད་པ་དེའི་ངོས་སུ་ཁོང་གིས་ཕྱག་ཐམ་ཕབས་པ་ད་ལྟ་ཁྱིམ་ཚང་གི་རྟེན་གཙོར་མཆོད་ཁང་དུ་བཞུགས་ཞེས་དཔལ་ཆུང་གིས་བཤད ། ད་དུང་གསང་བདག་ཕྱག་ན་རྡོ་རྗེ་མི་ཡི་རྣམ་པར་རོལ་བ་ཨྱོན་སྐུ་གསུམ་གླིང་བ་དང་། བྱ་བྲལ་བ་ངག་དབང་ཆོས་དབྱིངས་རང་གྲོལ་རྣམ་གཉིས་ཀྱིས་སྤྲུལ་རིན་པོ་ཆེ་ཁོང་རྡོ་རྗེ་གོ་ཁྲབ་དངོས་ཡིན་པར་གསུངས་བ་ས་སྟེང་གི་མི་མང་པོས་བཤད་ཀྱིན་འདུག་པ་ཁོ་བོས་ཐོས་མྱོང་ཞེས་བཤད །ཡང་ཁོས་བཤད་རྒྱུར། ན་ནིང་གི་ནད་རྐྱེན་འདི་རྒྱ་ཡུལ་མང་པོར་དར་ཁྱབ་ཏུ་འགྲོ་བཞིན་པའི་སྐབས་ཕྲན་གྱིས་ཁོང་རིན་པོ་ཆེ་ལ ། ང་ཚོའི་ས་གནས་འདི་རུ་གཏན་སྡོད་བྱེད་པའི་ཁྱིམ་ཚང་ཚོར་ནད་དེ་མི་ཕོག་ཐབས་སུ་ཁྱེད་ཆིབས་བསྒྱུར་གནང་དགོས་ཞེས་ཞུས་པ་ལྟར་ཁོང་བྱོན་ནས་གསུར་བསྔོས་རྒྱས་པར་མཛད ། སྲུང་བདུད་དང་བདུག་པ ། ཆང་སྔགས་སོགས་གནང་། ཐུགས་སྐྱེད་སྨོན་ལམ་གྱི་མཚམས་སྦྱོར་བྱས་པའི་ནུས་སྟོབས་ཀྱིས་ད་ལོའི་ནད་དུག་གི་འཇིགས་སྐྲག་ལས་སྐྱབས་སོང་ཞེས་ས་གནས་དེ་གའི་མི་དམངས་ཀྱིས་བཤད་འདུག་ཅེས་དཔལ་ཆུང་གིས་བཤད ། ད་དུང་དཔལ་ཆུང་གི་སྤུན་རྡོ་ལོའི་བུ་མོ་ཞིག་གློ་བུར་དུ་ཟུག་གཟེར་བཙན་པོ་ཞིག་གིས་གདུང་དེ་གཡས་གཡོན་ནས་མི་གཉིས་ཀྱིས་སྐྱོར་དགོས་པ་ཞིག་ཏུ་གྱུར་སྐབས་སུ་ཁོང་གི་སྐུ་མདུན་དུ་སོང་བ་ན ། ཁོང་གིས་གཏེར་སྨན་དང་མདུད་པ་གནང་། ཞལ་སུ་དང་བྱིན་རླབས་བྱས་པས་དེའི་དགུང་མོ་ནས་ནད་གཞི་མེད་དུ་གྱུར ། སྔོན་ཞིག་ལ་ཕ་ཡུལ་འཛམ་ཐང་ནས་ཡིན་པའི་ཨ་ཁུ་ཡེ་ཤེས་ཞེས་པ་ཞིག་བསྙུན་གྱིས་ཟིན་ནས་ཟི་ལིང་དུ་སྨན་ཁང་ལ་སོང་ནས་སྨན་པ་གང་བཟང་དག་ལ་བསྟན་མོད་དྲག་སྐྱེད་མ་བྱུང་། བླ་མ་མང་པོར་མོ་རྩིས་ལུང་གསུམ་ཞུས་ཏེ་རིམ་གྲོ་གང་མང་བྱས་ཀྱང་ཕན་པ་མ་བྱུང་ཚེ་ཉེ་མི་དག་ཅི་བྱ་གཏོལ་མེད་དུ་གྱུར་བའི་སྐབས་དེར་ངེད་ཅག་གིས་སྤྲུལ་རིན་པོ་ཆེ་གདན་ཞུ་བྱས་པ་ཡིན ། ཁོང་གི་གཏེར་ཆོས་རྡོ་རྗེ་གོ་ཁྲབ་ཀྱི་མདོས་སོགས་རིམ་གྲོ་ཉིན་གཅིག་ལ་སྒྲུབ་མཐར་ཉིད་ཀྱི་ཞལ་ནས་ད་ཐེངས་ཁོང་ལ་སྐུ་གེགས་ཀྱིས་མི་ཚུགས་ཅེས་གསུངས་ཤིང་སྒོའི་ཡ་ཐེམ་དུ་བསྲུང་མདུད་བཏགས ། དེ་ལྟར་ལུང་བསྟན་གྱི་དབུགས་དབྱུང་བ་ལྟར་དགུང་མོ་ནས་བླ་མའི་བསྙུན་གཞི་ཡར་སྐྱེད་བྱུང་བ་དང་ཕྱིས་སུ་བསྙུན་གཞི་མེད་དུ་དྭངས་སོང་ཞེས་དཔལ་ཆུང་གིས་བཤད ། ས་གནས་དྭངས་ལག་ནས་ཡིན་ལ་ཁོང་གི་ཡོན་བདག་ནོར་བྷ་ཟེར་བ་ཞིག་གི་ཆུང་མའི་དྲན་པ་ཉམ་ཏེ་ལོ་མང་པོ་འགོར་ལ་ཐེངས་རེར་ཁ་མལ་དུ་གནས་ནའང་སྐབས་རེར་དྲན་པ་ཉམ་པ་ཞིག་ཏུ་གྱུར་ཚེ་ཉིན་ཞིག་ལ་སྤྲུལ་རིན་པོ་ཆེ་ཁོང་ཚང་ལ་བྱོན་ནས་བྱིན་རླབས་བཀའ་བསྒོ་སོགས་བྱས་ཤིང་སྲུང་མདུད་དམ་ཟས་ཀྱི་རིགས་གནང་བས་ད་ལྟ་མི་དངོས་སུ་གྱུར་ཡོད་ཅེས་བཤད ། ཡང་དཔལ་ཆུང་གིས་སྔོན་ཆད་ཁོ་ཚོ་མཁན་ཤུར་ཞོལ་མ་ཞེས་པའི་ས་ཞིག་ལ་མཚེར་ས་བྱས་ནས་སྡོད་སྐབས་སུ་ཆུ་འགོ་ལ་བཙོག་མནོལ་ཤོར་བས་འཁུ་ལྡོག་གིས་ཁོའི་ཞང་བོ་དང་རྡོ་ལོའི་སྲང་མོ་གཉིས་ཤི་ཤོར་བ་དང་ །ཆུ་འགོ་དེའང་ཆུ་ཆད་པར་མ་ཟད་ལུང་བ་གསུམ་གྱི་ནང་གི་ཆུ་སྐམ་པར་གྱུར་ཚེ་དཔལ་ཡུལ་པད་ཆོས་ཚང་གིས་ཁྱེད་ཅག་གིས་དེའི་ཆུ་འགོ་དེ་བསྟོད་དགོས་ཚོད་རེད ། མ་བསྟོད་ན་ཁྱེད་ཅག་གི་མཐའ་ལ་ལྟོས་ཟེར་བ་ཞིག་ཡོང་བར་གསུངས། དེ་ནས་ས་དེར་ས་བདག་ཀླུ་གཉན་བཅོས་མཁན་གདན་འདྲེན་ཞུས་ནས་བཅོས་ཀྱང་ཕན་འབྲས་ཆེར་མ་བྱུང་། རྗེས་ནས་ཁོང་ལ་ཞུས་ཏེ་ཁོང་གདན་དྲངས་ཚེ་ཁོང་གིས་ས་བསྟོད་ཆུ་བསྟོད་བྱས་མཐར་ཆུ་འགོ་རྣམས་སྔར་ལས་ལྷག་པ་ཞིག་སོས་སོང་བ་དེ་ཁོ་རང་གིས་བསམ་ན་གཏེར་ནས་བཏོན་པ་ཡིན་སྙམ་ཡོད་ཅེས་དཔལ་ཆུང་གིས་བཤད ། ད་དུང་དཔལ་ཆུང་གི་བུ་འཕྲིན་རྒྱམ་གསང་རུ་ན་ཡོད་ལ ། ས་དེར་དྲེད་མོང་གིས་གནོད་པ་བྱས་ནས་རུ་སྐོར་མང་པོ་ཞིག་ལ་གྱོང་གུད་བཟོས་པའི་ཚེ ། འཕྲིན་རྒྱམ་གིས་སྤྲུལ་རིན་པོ་ཆེ་གདན་དྲངས་བ་དང་། ཁོང་གིས་ཕྱག་མདུད་ཞིག་སྡོད་ཁང་དང་བར་ཐག་གོམ་པ་བརྒྱའམ་ཉིས་བརྒྱ་ཙམ་གྱི་མཚམས་སུ་བཏགས་ནས་སོང་རྗེས་སུ་དྲེད་མོང་མི་ཡོང་བས་གསང་རི་མའི་ཡུལ་མི་ཀུན་གྱིས་ཡ་མཚན་གྱི་གནས་སུ་གླེང་གིན་འདུག་ཞེས་ཁོའི་བུ་འཕྲིན་རྒྱམ་གྱིས་བཤད་སོང་ཟེར ། གཞན་ཡང་ལོ་ཞིག་གི་ལོ་གསར་གྱི་སྐབས་ལ་ཁེལ་བའི་ཉིན་ཞིག་ལ་ཁོང་གི་གྲོགས་པོ་སྔགས་པ་ཞིག་དང་མཉམ་དུ་བདུད་རྩི་བཞེས་ནས་བབཞུགས་སྐབས་ཆང་རྣམས་འཐུང་ཚར་ཚེ་ཁོང་གིས་བདག་ལ་ངའི་མཛུབ་རྩེ་ནས་བླངས་ཆོག་གསུངས་ཏེ་ཕྱག་འཛུབ་ཆང་གི་ཤེལ་དམ་ནང་དུ་བཅུག་ནས་དཀྲུག་དཀྲུག་སྐར་ལྔ་ནས་བཅུ་ཙམ་ལ་བྱས་ཚེ་ཆང་གིས་ཤེལ་དམ་གྱི་ཁ་གང་ཚོད་ཙམ་ཞིག་བྱས་ནས་ཁོང་གིས་ཕྲན་ལ་འདིའི་ཆང་འདིའི་བྲོ་བ་ཅི་འདྲ་རེད་འདུག་ཁྱོད་ཀྱིས་ལྟོས་ཤིག་ཅེས་གསུངས ། ཕྲན་གྱིས་ཁམ་གང་ཙམ་ཞིག་འཐུང་བའི་མོད་ལ་སྔར་འཐུང་མ་མྱོང་བའི་ཆང་བྲོ་བ་བཙན་པོ་ཅན་ཞིག་རེད་འདུག་ཅེས་ཁོང་གི་གྲོགས་པོ་སྔགས་པ་ཕུག་སྐྱབས་ཀྱིས་དངོས་སུ་གསུངས། ཡང་དྭངས་ལག་གི་ཁྱི་ཚོན་པོ་ཞེས་པའི་རྐང་པ་ནད་པ་ཅན་ཞིག་ལྷག་བསམ་ཟེར་བ་ཞིག་གིས་ཁྲིད་ནས་ཁོང་ལ་ནད་བཅོས་བྱེད་རོགས་ཞུས་ཀྱང་ཁོང་གིས་ཐོག་མར་དང་ལེན་མ་བྱས ། ཡང་ནས་ཡང་དུ་ལྷག་བསམ་གྱིས་ནན་ཞུས་བྱས་ཚེ་ཁོང་གིས་ནད་པ་ཁོའི་སྒྱིད་ཁུག་ནས་སྐྲན་ཆེ་ཚད་དང་ལྡན་པ་ཞིག་བླངས་པ་དང་མཉམ་དུ་རྨ་ཁའང་རྨང་མེད་དུ་སོས་པའི་གྲུབ་རྟགས་བསྟན་ཞེས་དྭངས་ལག་ལྷག་བསམ་གྱིས་བཤད། ཀློང་ཡངས་ཟེར་བའི་ཁྱིམ་ཚང་ཞིག་གི་བུ་མོ་སྨྱོན་པ་ཞིག་ཡིན་ལ་སྤྲུལ་ཚུལ་ཁྲིམས་རྒྱ་མཚོས་ཁྲུས་དང་བཀའ་བསྒོ ། སྲུང་མདུད་སོགས་གནང་བས་སྨྱོ་ནད་དེ་གཞི་མེད་སངས་དྲག་བྱུང་བ་དང་། ཁོ་ལ་མཚོན་ན་སྔོན་ནད་པ་ཞིག་ཡིན་པར་མ་ཟད་བྱ་བ་ལམ་འགྲོ་ཅན་ཞིག་མིན་ནའང་བླ་མ་ཁོང་དང་མཇལ་རྗེས་སུ་ཁོང་གིས་སྲུང་མདུད་དང་། བྱིན་རླབས་དད་པའི་རྟེན་དུ་ཁོང་གིས་ཞལ་དུ་ཁབ་མིད་དེ་བདུད་པ་བྱས་པ་ད་ལྟ་རང་གི་སྐེའི་གའུའི་ནང་དུ་བཞུགས་ལ་ད་ལྟ་ནད་གཞི་དྲག་སྐྱེད་བྱུང་ཡོད ། ད་དུང་ཁོང་གིས་གྲུབ་རྟགས་བསྟན་ཏེ་གནང་བའི་བྱིན་རླབས་དད་པའི་རྟེན་དུ་ས་མིན་རྡོ་མིན་རིན་ཆེན་སྣ་ལྔའི་མདངས་ཅན་ཞིག་གྲུབ་རྟགས་ཀྱིས་བླངས་ཏེ་མདའ་དར་གྱི་ནང་དུ་བཅིངས་བས་ངེད་ཚང་ལ་སྔར་དང་མ་འདྲ་བའིམི་དར་རྒྱུ་དར་བྱུང་ཡོད་ཞེས་བཤད ། ད་དུང་ཁོའི་བཟའ་ཟླའི་ཉེ་འབྲེལ་ལུང་རྟོགས་ཟེར་བ་ཞིག་ལ་མ་ངེས་པའི་ནད་ཞིག་ཐེབས་ནས་ལོ་འགའ་འགོར་ནའང་སྨན་པར་བསྟན་པས་ཕན་ཐོག་ཅི་ཡང་མ་བྱུང་བར་ལུས་ཡོད་པ་དེ་ལ་སྤྲུལ་རིན་པོ་གང་ཉིད་ཀྱིས་གཏེར་སྨན་གནང་ནས་ད་ལྟ་ཧ་ཅང་བདེ་བའི་སྐབས་སུ་གྱུར་ཡོད ། ད་དུང་ཁོས་བཤད་རྒྱུར་ཁོ་ཚོའི་ལ་ཕར་རྒྱབ་ཏུ་ཆུ་འགོ་ཞིག་གནའ་སྔ་མོ་ང་རང་ལོ་ན་ཆུང་བའི་སྐབས་ཡོད་ལ་ཕྱིས་ཀྱི་ལོ་སུམ་ཅུའི་ཡར་སྔོན་ནས་ཆུ་འགོ་སྐམ་ནས་རྡོ་རྐྱང་བ་ལས་མི་འདུག་སར་ཁོང་བྱོན་ནས་ཐུགས་བསྐྱེད་སྨོན་ལམ་བྱས་པའི་བྱིན་མཐུས་དེའི་སྟོན་ཁ་ནས་ཆུ་སྔར་ལྟར་དྭངས་གཙང་དུ་འཁྱིལ་བ་ད་ལྟའང་ཡོད་ཅེས་མཛོ་རྒན་རྭ་བར་གྱི་ཡོན་བདག་འགྱུར་མེད་རང་གྲོལ་གྱིས་བཤད། རྔ་བའི་རྨེ་རུ་མའི་བུ་མོ་ལྷ་ལྕམ་གྱིས་སྤྲུལ་རིན་པོ་ཆེ་ངེད་ཅག་ཡོད་སར་བྱོན་མྱོང་ལ ། ངེད་ཚང་གི་ཁྱིམ་མཚེའི་བུད་མེད་ཞིག་གི་ལག་པ་ན་ནས་ཞ་ཡོད་པ་ཞིག་སྤྲུལ་རིན་པོ་ཆེའི་མདུན་དུ་བཅར་ནས་ཞུས་པས་ཁོང་གིས་ཁྱེད་ཚང་གི་ཆུ་འགོ་དེ་དང་འདི་ལྟ་བུ་ཞིག་བཙོག་སོང་བའི་གནོད་པ་རེད་ཅེས་གསལ་བོར་ལུང་གིས་བསྟན་པ་ལྟར་རྗེས་མར་ས་བཅོས་པའི་ད་ལྟ་མོ་སྔར་དང་མ་འདྲ་བའི་བདེ་ཐང་ཅན་དུ་གྱུར་བ་དང་། གཞན་ཡང་ཁབ་ཀྱི་ཕུར་བདུད་བདུད་པ་སོགས་གྲུབ་རྟགས་བསྟན་པའང་ཧ་ཅང་མང་། ངེད་ཅག་ས་གནས་འདིར་ཡང་ནད་པ་མང་པོས་སྤྲུལ་སྐུའི་བཀའ་དྲིན་གྱིས་ད་ལྟ་དྲག་སྐྱེད་བྱུང་འདུག་ཟེར་མཁན་ཧ་ཅང་མང་པོ་འདུག་ཅེས་སྤྲུལ་རིན་པོ་ཆེའི་སྐུ་སྲིང་ཡིན་པར་བཤད་པའི་བུ་མོ་ལྷ་ལྕམ་གྱིས་བཤད ། སྔོན་ཞིག་ལ་གྲུབ་ཆེན་སངས་དཔལ ། རྨ་སྟོད་ཀྱི་བུད་མེད་རིན་ཆེན་སྐྱིད་དང་ང་ཚོ་སྤྲུལ་རིན་པོ་ཆེ་ཚང་གི་སྒར་ཁྱིམ་དུ་སོང་བའི་ཚེ་ཁོང་རྣམས་ཀྱིས་ཚོགས་འདོན་ཞིང་བདུད་རྩི་བཞེས་པའི་ཚེ་སྤྲུལ་ཚུལ་ཁྲིམས་རྒྱ་མཚོས་ཞལ་རྩེད་མཛད་ཞོར་དུ་ཤེལ་དམ་ཞིག་སྣུར་ཏེ་གྲུབ་རྟགས་བསྟན་པ་རེད་ཅེས་སྦྲ་གསར་འཚམས་པོས་བཤད ། ཉིན་ཞིག་ལ་སྤྲུལ་སྐུ་དང་ཁོང་གཉིས་རྨ་སྟོད་དུ་རྒྱལ་སྲས་རྟགས་ཅན་གྱི་རླངས་འཁོར་ཞིག་བསྐོར་ནས་འགྲོ་བའི་སྐབས་སུ་འཕྲང་དམར་གྱི་ས་ཆའི་ཟམ་ཆེན་ཞིག་གི་སྟེང་ལ་ཐོན་ཚེ་ཟམ་དེའི་དཀྱིལ་ནས་ལྕགས་མདོང་རིང་ཚད་ལ་མཐོ་གཉིས ། ལེབ་ཞིང་ལ་སོར་བཞི་ཡོད་པ་ཙམ་ཞིག་བུད་འདུག་པ་བདག་གིས་མཐོང་ཕྲལ་ཕྲན་གྱིས་སྤྲུལ་རིན་པོ་ཆེ་ལ་སྐྱོན་ཆེ་བར་འདུག་ཞེས་ཞུས་ཚེ་ཁོང་གིས་མི་སྐྱོན་གསུང་ནས་འཛེམས་དོག་ཅི་ཡང་མེད་པར་སོང་ནའང་མི་དང་རླངས་འཁོར་གཉིས་ལ་སྐྱོན་ཅི་ཡང་མ་བྱས་པར་བསམ་ན་དེ་ནི་ཁོང་གི་གྲུབ་རྟགས་ཤིག་ཡིན་པར་བདག་ལ་ཡིད་ཆེས་ཡོད ། དེ་མིན་ང་ཚོའི་འོད་ཟེར་ཡུལ་ཚོའི་སྡེ་མི་མང་པོར་ཁོང་གིས་གྲུབ་རྟགས་ཀྱིས་ཁབ་བདུད་པ་དང་ལུང་བསྟན་གནང་བ་སོགས་བསམ་གྱིས་མི་ཁྱབ་པ་ཤོད་རྒྱུ་འདུག་ཅེས་འོད་ཟེར་ཡུལ་ཚོའི་སྡེ་མི་འཇིགས་གྲོལ་གྱིས་བཤད །ཉིན་ཞིག་ལ་སྤྲུལ་རིན་པོ་ཆེ་ཚུལ་ཁྲིམས་རྒྱ་མཚོ་ཁོང་སྦྲ་ནག་མགྲོན་ཁང་དུ་བཞུགས་ཡོད་པའི་སྐབས་སུ་སྤྲུལ་བཟོད་པ་རྒྱ་མཚོ་དང་ངེད་ཅག་ཁོང་གི་མདུན་ལ་སོང་སྐབས་སུ ། ཁོང་གི་གཟུངས་མ ། ད་དུང་སི་ཁྲོན་གྱི་མི་ཞིག་བཅས་མི་ཁ་ཤས་འཛོམས་སར་ཁོང་གིས་ཁབ་ཞིག་དུམ་བུ་གསུམ་དུ་བཏང་རྗེས་ཞལ་དུ་མིད་ནས་བདུད་པ་བརྒྱབ་ཏེ་ངེད་ཅག་གི་དགོན་པ་ངེས་དོན་བཀྲ་ཤིས་ཆོས་འཁོར་གླིང་ལ་རྟེན་སྐལ་དུ་གནང་བ་དང་གཞན་ཡང་སྤྲུལ་རྡོ་རྗེ་བཟང་པོ་དང་། སྤྲུལ་ཚུལ་ཁྲིམས་རྒྱ་མཚོ་བཅས་ངེད་ཅག་མི་གསུམ་བདག་གིས་བཀོད་སྒྲིག་ལྟར་ཀྲུང་དབྱང་གི་མཁས་དབང་འཇམ་དཔལ་རྒྱ་མཚོའི་མདུན་དྲུང་དུ་འགྲོ་བའི་སྐབས་སུ་དགོང་མོ་ཟི་ལིང་གི་མགྲོན་མཁར་ཞིག་གི་སུམ་ཐོག་གི་སྟེང་དུ་ཞག་མལ་བྱས་ཤིང་བདུད་རྩི་བཞེས་ནས་བཞུགས་སྐབས་སུ་སྤྲུལ་རྡོར་བཟང་གི་ཕྱག་ནང་གི་ཆང་དམ་བུ་གང་ལ་ཁོང་གིས་ཞལ་སུ་ཞིག་བཏབ་ཏེ་ད་ཁྱོད་ཀྱིས་འཐུང་དང་ཆུ་ཡིན་ཞེས་གསུངས་བའི་མོད་ལ་བདག་ཡིད་ཆེས་དེ་ཙམ་མ་བྱུང་བར་ལོགས་ནས་ཆང་དམ་བུ་གང་གི་ཁ་ཕྱེས་ཏེ་ཁོང་ལ་འདི་ཆུར་བསྒྱུར་རོགས་ཞུས་ནས་ཤེལ་དམ་རང་གི་ལག་ཏུ་བཟུང་སྐབས་ཁོང་གིས་ཞལ་སུ་ཞིག་བྱས་ཚེ་ཁོའི་ལག་གི་ཆང་དེ་ཆུ་རུ་བསྒྱུར་འདུག་ཅེས་སྤྲུལ་གཙང་བ་སྔགས་འཆང་གིས་གསུངས ། སྤྲུལ་རིན་པོ་ཆེ་ཚུལ་ཁྲིམས་རྒྱ་མཚོའི་སྐུ་པར་གྱིས་དངོས་སུ་ཞལ་འཛུམ་པ་དང་གསུང་འབྱོན་པ་སོགས་རྒྱ་བོད་གཉིས་ཀྱི་ཡུལ་གྲུ་སོ་སོ་ན་ཡོད་པར་གྲགས་མོད་ཐེངས་འདིར་དུས་ཚོད་ཀྱི་དབང་གིས་འཚོལ་སྡུད་ཅུང་ཙམ་འཐུས་ཤོར་དུ་སོང་ནའང་དཔེར་མཚོན་ཙམ་ཞིག་ཞུ་ན་དར་ལག་གླིང་དཀར་སྡེ་ཁུལ་གྱི་ཁྱིམ་བདག་སྨན་སྐྱབས་ཀྱི་ནག་མོ་མཁའ་སྤྱོད་ཀྱི་མཐོང་སྣང་ལ་སྤྲུལ་རིན་པོ་ཆེའི་སྐུ་པར་གྱིས་ཞལ་འཛུམ་པ་མཛད་པ་དངོས་སུ་མཇལ་སོང་ཞེས་མོས་བཤད་དོ ། ། གཏེར་སྟོན་འཕྲིན་ལས་ཀྱི་སྲས་སྟོབས་ལྡན་དང་སྤྲུལ་ཚུལ་ཁྲིམས་རྒྱ་མཚོ ། ངེད་ཅག་མི་གསུམ་གྱིས་ངེད་ཙང་གི་ཁྱིམ་དུ་འོང་ནས་འུར་རྒྱབ་ནས་བསྡད་པ་ན ། ངེད་ཚང་གི་ཁྱིམ་དུ་མེ་སྐམ་ཞིག་ཡོད་ལ་གཏེར་སྟོན་འཕྲིན་ལས་ཀྱི་སྲས་སྟོབས་ལྡན་དང་ཁོང་རྣམ་གཉིས་ཀྱིས་རང་རང་གི་ས་ནས་མེ་སྐམ་གྱི་ཡ་ཁ་དང་མ་ཁ་གཉིས་བདུད་པ་ངེད་ཚང་གི་ཁྱིམ་ན་ད་ལྟའང་ཡོད་ཅེས་སྔགས་པ་སྐལ་བཟང་རྡོ་རྗེས་གསུངས་སོ༎ མདོ་སྨད་ཁྲོ་སྐྱབས་ཐུགས་རྗེ་ཆེན་པོའི་གནས་ཀྱི་སྒྲོལ་མའི་སྒྲུབ་ཆུའི་ཁ་ཞོལ་ནས་ཁོང་ཉིད་གཅིག་པུར་རི་ངོས་སུ་ཡར་འཛེགས་ཏེ་སྐུ་པར་ཞིག་སྒྲོན་པའི་སྐབས་ཁོང་གི་ཞལ་གཏུམ་དྲག་ཁྲོ་བོ་ལྟ་བུ་ཞིག་ཏུ་གྱུར་བ་དང་། ཕྱག་མཐིལ་གཉིས་ན་སྤྱན་གཉིས་མངོན་པའི་གྲུབ་རྟགས་བསྟན ། ཉིན་ཞིག་ཁོས་ཡི་གེ་སྦྱོར་འདོན་ལེགས་པར་མ་བྱས་པའི་རྟེན་འབྱུང་ལ་ལྟོས་ཏེ་ཁོང་གིས་བདག་ལ་ཕྱག་འབེབ་གནངས་ཚེ་ཕྱག་ཕྲེང་སིལ་བུར་ས་ལ་འཐོར ། རྗེས་ནས་ཕྱག་ཕྲེང་དག་ཁོས་བཏུས་པའི་ཚེ་གྲངས་ཀ་བརྒྱ་དང་བཅྭོ་བརྒྱད་ལ་འཕེལ་བའི་གྲུབ་རྟགས་བསྟན་པས་དད་པ་བླ་ལྷག་ཏུ་སྐྱེས་སོང་ཞེས་ཁོང་གི་སློབ་བུ་ཆོས་རིག་གིས་བཤད ། ཡང་ཉིན་ཞིག་ལ་མགོ་ལོག་ཁུལ་ནས་ཡོན་ཏན་ཟེར་བ་ཞིག་གིས་ཁོའི་རླངས་འཁོར་ནང་དུ་བདུད་པ་ཞིག་དགོས་ཞེས་ཞུས་ཚེ་ཁོང་གིས་ཕུར་མདུད་ཞིག་གནངས ། རྗེས་སུ་ཁོའི་རླངས་འཁོར་ལ་དོན་རྐྱེན་བྱུང་ནས་རླངས་འཁོར་གྱི་ཕྱི་ནང་གཉིས་མེད་པར་བཟོས་མོད་ནང་གི་མི་ལ་སྐྱོན་ཅི་ཡང་མ་བྱུང་ ། ངེད་གཉིས་ཁྱིམ་ཚང་ཞིག་གི་ཤུལ་སྲུང་དུ་བསྡད་སྐབས་སུ་ཉིན་ཞིག་ལ་ལྕགས་སྦོམ་པོ་ཞིག་ལག་ཏུ་བླངས་ནས་འདི་མདུད་དགོས་ཞེས་བཤད་ཀྱིན་ལྕགས་དེ་སྐུད་པ་ལྟར་བསྒྲིམས་ལ་རྗེས་མར་སྦྲ་ནག་སངས་པོ་ལ་སྦྱིན ། ཉིན་ཞིག་ལ་མོའི་སྟེང་དུ་ངར་ཁོས་ཞོར་དུ་གྲི་ཞིག་བཀུག་པ་མོས་མིག་གིས་མཐོང་བ་དང་། ཉིན་ཞིག་ལ་མཁའ་རིའི་ཕུག་པ་ནས་སྨན་མང་པོ་ཞིག་ས་དེའི་བྲག་རིའི་བར་གསེང་ནས་གཏེར་ལ་བླངས ། ད་དུང་ཁབ་བདུད་པ་ལ་ལོ་རྒྱུས་ཤིན་ཏུ་མང་ལ་ཁྱད་པར་བ་ཞིག་ནི ། ནད་པ་ཚོ་ལ་ཁབ་མདུད་ནས་སྦྱིན་ནའང་ཁོ་ཚོས་བོར་བརླག་ཏུ་ཤོར་ཚེ་ཕྱིར་རང་ཁྱིམ་དུ་ཐོན་སྲིད་། དེ་མིན་ད་དུང་སྨྱོ་རྟགས་བསྟན་གྱིན་དུ་བ་དང་ཆང་མཛུབ་རྩེ་ནས་ཕུད་དུས་ཡོད་ཅེས་ཁོང་གི་གཟུངས་མ་ཆེ་བ་ཀུན་བཟང་སྒྲོལ་མས་བཤད་ཀྱང་སྐབས་འདིར་སླེབ་ཚེ་ཚིག་སྔ་སྦ་གསང་བྱས་སོང་། རྡོ་རྗེ་ཐར་ཟེར་བའི་ནད་པ་ཞིག་ལ་མགོ་ནས་ནད་ཁ་བཏགས་ཀྱིས་འཐེན་པ་དང་ད་དུང་མཁལ་མ་དང་སྐེད་ཚིགས་མགོ་སོགས་ནས་ནད་ཁ་བཏགས་ཀྱིས་འཐེན་པ་བགྲང་གིས་མི་ལང་བར་མ་ཟད་གྲུབ་རྟགས་སམ་མཚོན་བཅོས་བྱས་པའི་རྣམ་གྲངས་དང་། བྱ་བྱིས་ལ་སོགས་པ་བསད་པ་གསོས་པའི་རྣམ་ཐར་ཡང་ཤིན་ཏུ་མང་མོད་གནས་སྐབས་སུ་རྣམ་ཐར་འཚོལ་ཡུལ་གྱི་གང་ཟག་དག་ལ་དྲྭ་དང་བརྡ་རྟགས་ཡོད་མེད་ཀྱི་དབང་གིས་ལོ་རྒྱུས་ས་བོན་ཡོངས་རྫོགས་མཁོ་སྤྲོད་མ་བྱུང་བས་གནས་སྐབས་དེ་ཙམ་ལས་འབྲི་ཐབས་མ་བྱུང་། ད་ནི་འཕྲོས་དོན་ལ་འཇུག་པར་བྱེད་ན། དེ་ནས་དགུང་ལོ་ཉེར་གཅིག་གི་སྟེང་། མ་དང་མཁའ་འགྲོས་བརྡ། ལྷ་དང་བླ་མའི་ལུང་བསྟན་གྱིས་བསྐུལ་བ་ལྟར་མཚན་ལྡན་གྱི་གཟུངས་མ་བསྟེན་པའི་ཚེ་ཉམས་སྣང་གོང་དུ་འཕེལ་བའི་བརྡའམ་རྟགས་སུ་ཟབ་མོ་དགོངས་པའི་ཀློང་ནས་གཏེར་དུ་ཕབས་པའི་ཆོས་སྐོར་ལ་ད་ལྟ་དངོས་སུ་ཡོད་པ་ཟབ་ཆོས་པོད་བདུན ། གླིང་སྒྲུང་པོད་གཅིག་བཅས་སྐྱེ་དགུའི་བསོད་ནམས་ཀྱི་དཔལ་དུ་བཞུགས །

དགུང་ལོ་ཉེར་ལྔའི་སྟེང་རྨ་སྐོར་ལ་ཐེངས་མང་པོར་ཕེབས་ཤིང་། ཐེངས་ཤིག་ལ་རྨ་ཆེན་གྱི་ངང་གཤོག་ནས་ཕེབས་སྐབས་སུ་ཁོང་གི་མདུན་གྱི་ནམ་མཁའ་ནས་འཇའ་ཤར་བ་དང་། གནས་རྡོ་ཕྱག་གིས་རེགས་པའི་ཚེ་རྡོའི་ངོས་ནས་འཇའ་རིས་ཨ་ཡིག་གིས་མཚན་པ་ཤར་ཞིང་ཁོང་ལ་ཐིམ་པས་ཁོང་ལ་ཡང་ཉམས་སྣང་འགའ་མཆིས་མོད་སྐབས་འདིར་མི་སྤྲོ ། དེར་ཡོད་མཇལ་བ་ཡོངས་ཡ་མཚན་དད་པའི་གནས་སུ་གྱུར་ཞེས་ཁོང་གི་སྐུ་རྗེས་འབྲངས་བའི་མཇལ་བ་དག་གིས་བཤད ། ཁོང་དགུང་གྲངས་ཉེར་བརྒྱད་ལ་ཁེལ་སྐབས་སུ་བླ་མ་ཡི་དམ ། མཁའ་འགྲོ་ཆོས་སྐྱོང་སོགས་ཀྱིས་བཀས་བསྐུལ་བའི་ཉམས་སྣང་མང་པོ་ཞིག་ལ་གཞི་བྱས་ཏེ་གླིང་བྲོའི་ཚོགས་པ་གསར་བཙུགས་གནང་ཡང་ཉམས་སྣང་དག་སྐབས་སུ་མ་བབས་པའི་རེ་ཞིག་སྨྲ་བར་མི་བྱའོ། །

ཁོང་གི་དག་སྣང་ལས་ཕབས་པའི་སྣང་སྲིད་ཚོགས་སྒྲུབ་ཀྱི་ཆོ་ག་དེ་གཏེར་སྒྲུབ་བྱེད་སྐབས་སུ་ཟབ་ཁྱད་ཆེ་བའི་ཁྱད་ཆོས་སུ་གཏོར་མ་ལས་རིལ་བུ་བབས་པ་སོགས་རྟེན་འབྲེལ་གྱི་རྟགས་མཚན་དུ་མ་གསལ ། ད་དུང་ཁོང་གི་གསུང་ཆོས་བྲག་དམར་འབུམ་རྫོང་གནས་ཀྱི་བཀོད་པ་ལྷུན་གྲུབ་རོལ་མོ་དགྱེས་པའི་མཆོད་བྲོ་ནི ། ཐོག་མར་བ་ཡན་མཁན་ངག་དབང་བསྟན་འཛིན་གྱིས་བསྐལ་བ་སྟག་གི་ལོར་བསྐུལ་བ་ལྟར་དག་པར་ཕབས་པ་ལ། ཕྱི་ནང་གསང་བ་མང་ཡང་རྗེས་སུ་བླ་མ་བདུད་འཇོམས་ཀྱི་གདུང་རྒྱུད་མ་ནོར་བ་མཆོག་སྤྲུལ་ཁྱེའུ་རིན་ཆེན་ཟླ་བས་བྲོ་ལ་བསྒྱུར་དགོས་ཞེས་གསུང་གིས་ཡང་ཡང་བསྐུལ་བ་ལྟར་བྱས་ནས་ད་ལྟ་རང་ཅག་གི་གླིང་བྲོའི་ཚོགས་པའི་དགོང་ཚོགས་ཀྱི་ནང་དུ་འཁྲབ་ཀྱིན་ཡོད ། གཞན་ཡང་རང་དགོན་གླིང་འབུད་དགོན་གྱི་གཙོས་དགོན་ཁག་མང་པོར་ཤོག་དངུལ་གྲངས་མེད་ཕྱག་འགྱེད་བཏང་བ་དང་། བདག་མེད་ནད་པ ། ཉམ་ཆུང་དབུལ་བོ་སོགས་ལ་སྨན་དང་ཟས་གོས་ཡོ་སྤྱད་ཀྱི་སྦྱིན་པ་དཔག་ཏུ་མེད་པ་བཏང་ ། ཡང་ལོ་རེ་བཞིན་དར་ལག་རྫོང་ཡོངས་ཀྱི་མི་དམངས་ལ་ཞབས་འདེགས་ཞུ་ཆེད་དང་། སློབ་མ་དག་གི་མ་འོངས་བའི་མདུན་ལམ་ལ་དམིགས་ཏེ་ཁྲིམས་མཐུན་གྱིས་གཟབ་སྦྱོང་འཚོགས་ནས་བྱིས་པ་ཚོར་དགུན་གནང་གི་ལས་བྱ་འབྲི་ཚུལ་དང་། རྒན་པོ་དག་ལའང་སྟབས་བདེའི་ངང་ཡི་གེ་སྦྱོར་ཀློག་སོགས་ལོ་མང་རིང་བསླབ་པས་ས་གནས་མང་ཚོགས་དང་འབྲེལ་ཡོད་སྡེ་ཁག་མང་པོས་ཁེ་ཕན་ཆེ་བའི་ལས་རིགས་ཤིག་རེད་ཅེས་དགའ་བསུ་དང་བསྟོད་བསྔགས་ཐེངས་མང་པོར་ཐོབ ། སྔོན་གླིང་རྗེ་གེ་སར་རྒྱལ་པོའི་སྐུ་མཁར་སེང་འབྲུག་སྟག་རྩེའི་གནའ་ཤུལ་གྱི་དྲི་བསུང་འཐིལ་ཞིང་ད་ལྟའང་གླིང་གི་དཔའ་བརྟུལ་སུམ་ཅུའི་མཚན་ཐོབ་ཀྱི་མཁར་གྲོང་ཁྱབ་པའི་དར་ལག་རྫོང་མཁའ་རིའི་ཕུག་པའི་རི་རྒྱུད་དུ་ཁོང་གིས་ཀྲུང་གོའི་གེ་སར་རིག་གནས་ཞིབ་འཇུག་དང་། ཀྲུང་གོའི་གེ་སར་བྱ་བར་ཧུར་བརྩོན་བྱེད་གནས་ཤིག་ཁོང་གི་གཏེར་ཆོས་རྣམས་ཀྱི་ནང་གི་བརྡ་ལུང་དང་བླ་མ་མང་པོས་ལུང་བསྟན་ལྟར་བཞེངས་བསྐྲུན་བྱས་པ་ནི། མགོ་ལོག་དར་ལག་འགྱ་བ་དོན་གྲུབ་གེ་སར་རིག་གནས་རྒྱུད་འཛིན་ལྟེ་གནས་དང་། དར་ལག་འགྱ་བ་དོན་གྲུབ་གེ་སར་རིག་གནས་རྟེན་གཞི་ལས་སྒྲུབ་ཁང་གསར་བཞེངས་མཛད་པའི་སྐབས་སུ་གླིང་འབུད་དགོན་སེ་ལེབ་གྲོང་བརྡལ་དང་དགོན་པའི་དམངས་དམ་ཁང་ནས་སྤྲུལ་སྐུ་ཡིན་པའི་གྲོས་མཐུན་གྱི་ཡི་གེ་ཁོང་ལ་རྒྱབ་སྐྱོར་གྱི་ཚུལ་དུ་གླིང་འབུད་དགོན་གྱི་སྲིད་གྲོས་སྐུ་ཚབ་དང་། ནང་བསྟན་ཡོངས་འཛིན། དགོན་པའི་གཙོ་གཞོན་ཐུགས་རྗེ་སོགས་ཀྱིས་གནང་བར་མཛད་དོ།།

དམ་པའི་མཛད་པ་གཅིག་ཏུ་མ་ངེས་པར༎

གང་འདུལ་གདུལ་བྱར་སྣ་ཚོགས་ཐབས་ཚུལ་གྱིས༎

འགྲོ་ཕན་སྤྱོད་པ་རྒྱ་མཚོའི་འཇིངས་ལས་ཟབ༎

བློ་དམན་བདག་འདྲའི་ཡུལ་དུ་ག་ལ་མཆིས༎

འོན་ཀྱང་དད་ལྡན་གདུལ་བྱའི་ངོས་སྐལ་དུ༎

རྣམ༵་པའི་ཆ་ཙམ་མཐུན་སྣང་མ་ནོར་བར༎

ཐར༵་འདོད་དག་ལ་དད་པའི་སྐྱེས་སུ་བསྐྲུན༎

བསོད་ནམས་ཅི་མཆིས་བསྟན་འགྲོར་ཕན་ཕྱིར་བསྔོ༎