རྒྱ་བོད་ཀྱི་དམ་ཆོས་བདེན་རྫུན་འགྱེད་པའི་གླུ་སྐོར་དང་པོ།། ན་མོ་གུ་རུ་ནིརྨ་ཀཱ་ཡ་ཡེ།། ༼༡༽ ཆོས་སྐུ་རྒྱལ་བའི་ཞིང་ལས་དེ་ཉིད་གཟིགས་ཅིང་།། ལོངས་སྤྱོད་རྫོགས་སྐུའི་མཚན་དཔེའི་སྒྱུ་འཕྲུལ་མངོན་པའི།། སྣ་ཚོགས་སྤྲུལ་སྐུའི་རོལ་བ་དཔག་མེད་སྟོན་པ།། བདེན་པའི་སྐུ་གསུམ་ཚོགས་ལ་མཆོད་ཕྱག་འབུལ་ལོ།། ༼༢༽ ཆོས་མེད་སྤྲང་པོ་ཕྱུག་པོས་ནོར་ཕྱིར་རྒྱགས།། བསྐྱེད་རྫོགས་མེད་པར་ཞིང་ཁམས་བཀོད་པ་བཤད།། རྫུན་ལ་བློ་ཕུག་བཅོལ་བའི་སྤྲུལ་རྫུན་རིགས།། སྐུ་གསུམ་མིང་དོན་མ་གོ་འཁོར་བ་འཁྱམས།། ༼༣༽ ལྷོ་རྒྱལ་འཛམ་བུ་གླིང་གི་ཡངས་སྟེངས་ན།། མཆོག་གི་སྤྲུལ་སྐུ་ཤཱཀྱ་ཐུབ་པ་དང་།། རྒྱལ་ཀུན་རྣམ་སྤྲུལ་པདྨ་འབྱུང་གནས་དང་།། བཟོ་སྐྱེའི་སྤྲུལ་སྐུ་བདེན་པ་བསམ་མི་ཁྱབ།། ༼༤༽ སྟོན་པ་སྐུ་བལྟམས་དཀའ་སྤྱད་གནང་བ་དང་།། ཆོས་ཕུང་བརྒྱད་ཁྲི་བཞི་སྟོང་གསུངས་པ་ཀུན།། མདོ་སྔགས་ཐེག་པའི་སྙིང་དོན་སེམས་ཐུལ་ན།། དམ་ཆོས་ཚུལ་བཞིན་སྒྲུབ་པའི་དོན་དག་གོ། ༼༥༽ ཉོན་མོངས་ཤུགས་དྲག་སྡེ་སྣོད་ཚོང་ལས་ཙམ།། མི་དགེ་བཅུ་སྤྱོད་དགེ་བཅུ་སྐྱོན་དུ་འཛིན།། སྤྱི་དོན་ཟེར་ནས་སྒེར་དོན་སྐྱོང་བའི་རིགས།། ཕན་བདེ་སྤེལ་འདོད་བཤད་ན་ལོག་པའི་ལམ།། ༼༦༽ བདེན་བཞིའི་མི་ཤེས་ཁ་བཤད་ཙམ་དུ་ཆགས།། སྐུ་གསུམ་མ་ཤེས་ཚོང་ལས་སྒེར་དོན་གཉེར།། དོན་གཉིས་ཟེར་ནས་གཞན་གནོད་གཞི་བཅས་སྒྲུབ།། སྐྱབས་གཅིག་མི་ཤེས་འགྲོ་རྣམས་རྨོངས་པར་སྐྱོ།། ༼༧༽ ཉིས་བརྒྱ་ལྔ་བཅུའི་སྡོམ་ཁྲིམས་མེད་བཞིན་དུ།། རབ་བྱུང་སྡོམ་རྒྱུན་སྤེལ་བའི་མཁན་པོ་དང་།། སྙིང་རྗེ་རྩ་བ་གཞན་ཕན་མེད་བཞིན་དུ།། དར་ཤི་ངན་སྐུལ་བྱེད་པའི་ཁྲེལ་མེད་དོར།། ༼༨༽ ཆོས་ལྡན་གངས་ཅན་ཡུལ་དུ་མ་སྐྱེས་ཀྱང་།། དག་སྣང་དགེ་བསྙེན་དམ་ཚིག་མེད་བཞིན་དུ།།…

ཕྱོགས་ལས་རྣམ་པར་རྒྱལ་བའི་རྟེན་འབྲེལ་འགྲིགས།། ཀྱེ་ཨེ་ཧོ།། བདག་གིས་བུ་བཞིན་སྐྱོང་བའི་གྲོགས་པོས་ཀྱང་།། བདག་ལ་དགྲ་བཞིན་སྡང་བའི་ངན་ཇུས་ཀུན།། ཀུན་བཟང་བྱང་ཆུབ་ལམ་དུ་བསྒྱུར་ནུས་པ།། ཀུན་མཁྱེན་རིག་འཛིན་བརྒྱུད་པའི་ཆེ་ཆོས་ལགས།། དངོས་སུ་བསྟོད་ཀྱང་ལྐོག་ནས་སྨད་རར་བཤམས།། བཟང་པོས་ལན་དུ་ངན་པའི་རྫུན་ཕྲ་འཁན།། དུད་འགྲོ་ལས་རྨོངས་འདྲེ་གཟུགས་ཨ་ཙ་མ།། གྲོགས་ངན་རྐྱེན་གྱིས་གཞན་དབང་མ་སོང་བར།། ཕྱི་ནང་གསང་བའི་ཕྱོགས་ལས་རྣམ་རྒྱལ་ནས།། བསྟན་དང་འགྲོ་བའི་མགོན་དུ་ཕན་བདེའི་ཆོས།། ནམ་ཡང་ནུབ་མེད་བསྐོར་བའི་རྟེན་འབྲེལ་འགྲིགས།། ——-འདྲེ་གཟུགས་ངོར་ཨེ་མ་ཧོས།

དྷཱིཿ ཚེ་འདིའི་སྣང་ཚུལ་ལ་སྐྱོ་བའི་གླུ་ནགས་ཚལ་བུ་མོའི་དབྱངས་སྙན་ཞེས་བྱ་བ། དྷཱིཿ རྒྱལ་ཀུན་མཁྱེན་པའི་རང་གཟུགས་བཤེས་གཉེན་དུ་སྣང་བ།། གཟུངས་སྤོབས་ཡོན་ཏན་བྱེ་བའི་གཏེར་མཛོད་ཀྱི་བདག་པོ།། རིགས་བརྒྱའི་སྤྲོ་གཞི་མི་ཕམ་བློ་གྲོས་ནི་དྲི་མེད།། འབྲལ་མེད་སྙིང་དབུས་པདྨོར་དགྱེས་བཞིན་དུ་བཞུགས་ཤིག ། འདི་སྣང་བདེ་འབྱོར་རྨི་ལམ་ལྟ་བུ་ཡི་ཆོས་ལ།། ཉིན་མཚན་བར་མེད་ཞེན་པ་ཉམ་ཐག་གི་འགྲོ་བའི།། དོན་མེད་བྱ་བཞག་མང་པོ་ཡིད་ཡུལ་དུ་ཤར་ཚེ།། སྐྱོ་བའི་ཉམས་གླུ་མི་འགུགས་རང་དབང་ནི་མ་བྱུང༌།། ཕྱུག་པོའི་རྒྱུ་ཞེས་ཀུན་གྱིས་སྨོན་གནས་སུ་བྱེད་མོད།། ལུས་སེམས་སྡོད་ཁོམ་མེད་པའི་སྡུག་སྣོན་ཞིག་མ་གཏོགས།། ཟས་གོས་བཟང་པོ་ཙམ་ཡང་ལོངས་སྤྱོད་ནི་མི་བྲ།། འཆི་ཁ་ཞེན་ཆགས་སྐྱེད་པས་ཐར་ལམ་གྱི་བར་ཆད།། ཇི་ལྟར་འབྱོར་ཡང་ཟས་གོས་གཉིས་པོ་ཙམ་མ་གཏོགས།། རང་གི་ཉམས་ལ་ཕན་པ་རྡུལ་ཆ་ཙམ་མེད་ངེས།། འཛམ་གླིང་རྒྱུ་ནོར་ཡོད་ཚད་མི་གཅིག་ལ་དབང་ཡང༌།། ད་རུང་ཆོག་ཤེས་མི་སྐྱེ་རེ་འདོད་ཀྱིས་གཡེང་འདུག ། ཉམ་ཐག་དབུལ་པོའི་ལུས་ཞེས་ཐམས་ཅད་ཀྱིས་སྨོད་ཀྱང༌།། ཚེ་གང་བར་མེད་གསོག་སྲུང་བརླག་པ་ཡི་སྡུག་བསྔལ།། ནོར་མང་ཅན་ལ་འབྱུང་བའི་ངང་ཚུལ་འདི་བསམ་ཚེ།། སྐྱིད་ཉལ་རང་ལ་དབང་ཕྱིར་སྤྲང་པོ་ཚོ་སྐྱིད་སྙམ།། དབྱར་ཁའི་མེ་ཏོག་འདི་དང་ཕྱུག་པོ་ཡི་རྒྱུ་ནོར།། ད་ལྟ་མཛེས་མཛེས་འདྲ་ཡང་ནམ་ཕུགས་ནི་ཐུབ་དཀའ།། སྙིང་པོ་མེད་ལ་ཧ་ཅང་ཞེན་པ་རང་ཆེ་ན།། བཟོད་དཀའ་ངན་འགྲོའི་གཡང་ལ་འགྲིམ་དགོས་ཤིག་མིན་ནམ།། གནའ་ཞིག་གླིང་བཞིའི་བདེ་འབྱོར་ཡོད་ཚད་ལ་དབང་བའི།། ལང་ཚོའི་གོས་རྒྱན་ལྷ་ལ་འགྲན་ནུས་ཀྱི་དཔོན་ཡང༌།། མི་རྟག་མཁའ་ལ་འཇའ་ཚོན་སྣང་བ་བཞིན་ཡལ་ན།། རང་རེའི་ལོངས་སྤྱོད་རྩྭ་རྩེའི་ཟིལ་བ་དང་ལོས་འདྲ།། ན་ནིང་ཀླུ་དང་འདྲ་བའི་ཕྱུག་པོ་ནི་ཕལ་ཆེར།། ད་ལོ་ཉམ་ཐག་སྤྲང་པོའི་གྲལ་མཐའ་ན་འདུག་པ།། འདི་ཀོ་རྨི་ལམ་མིན་ཡང་རྨི་ལམ་བཞིན་སྣང་ཕྱིར།། འཁོར་བའི་བདེ་ལ་སུན་པ་དབང་མེད་དུ་སྐྱེས་བྱུང༌།། མཐོན་པོའི་ཐོབ་ཅེས་ཀུན་ལ་གྲགས་ཆེན་ཞིག་ཡོད་དེ།། རྟག་བརྟན་མི་འདུག་སྟོན་ཁའི་སྤྲིན་དཀར་གྱི་སྤུན་ཟླ།། སྙིང་པོ་མེད་པ་དབྱར་གྱི་འཇའ་ཚོན་དངོས་ལགས་ཕྱིར།།…

༄༅། །ཨ་ཧོ། དུས་གསུམ་གྱི་རྟོག་པས་མ་བསླད་པའི། །ད་ལྟའི་ཤེས་པ་རྗེན་པ་འདི། །བསྒོམ་ཞེས་འཛིན་བློས་མ་བཅིངས་ཞིང་། །མ་བསྒྲོམ་ཞེས་ཡེངས་འབྱམས་སུ་མ་ཤོར་བར། །རང་བབ་རྗེན་པར་སྐྱོང་བ་འདི། །རྫོགས་པ་ཆེན་པོའི་ཉམས་ལེན་ཡིན། །དེ་ཚེ་རྣམ་རྟོག་ཅི་ཤར་ཡང་། །བཟང་ངན་གྱི་སྤང་བླང་བྱ་མི་དགོས། །ངོ་ཤེས་ཙམ་གྱི་རང་སར་གྲོལ། །ཤར་གྲོལ་འདི་ལམ་གྱི་གནད་དུ་བཟུང་། །ཉམས་གང་ཤར་བཤིག་ལ་ཁྲེས་སེ་བོར། །གཏད་མེད་ཞིག་པ་བློ་རེ་བདེ། །བློ་བདེ་བའི་འདུན་མ་ད་ལྟ་ཟིན། །ཆོས་རྣམ་གྲངས་མང་པོས་ཅི་ཞིག་བྱ། །ཀུན་ཏུ་བཟང་པོ་རང་ལས་རྙེད། །དོན་འདི་ཉིད་ཐུགས་ཀྱི་དབུས་སུ་བསྟིམ། ། ཞེས་མཧཱ་སུ་ཁའི་གསོལ་འདེབས། འཇིགས་བྲལ་ཡེ་ཤེས་རྡོ་རྗེས་སྨྲས།།

ཆོས་མཆེད་རྣམ་པར་དགའ་འོས་པའི་གསར་འགྱུར་བསྡུས་པ། དགའ་འོས་པ་ཞིག་ལ་ངོས་ཀྱི་སྐྱེ་བ་ཚེ་རབས་ཐམས་ཅད་དུ་བླ་མ་ཨོ་རྒྱན་པདྨ་འབྱུང་གནས་དང་ནམ་ཡང་འབྲལ་བ་མེད་པའི་ལས་དང་སྨོན་ལམ་གྱི་རྟེན་འབྲེལ་དང་། མི་ལོ་བཅུ་ཕྲག་དུ་མར་འབད་འབུས་ཀྱིས་རྟེན་འབྲེལ་བདེན་པ་མངོན་དུ་གྱུར། འཛམ་གླིང་འདི་བསྐལ་བ་རེ་བཟང་དགེ་མཚན་རེ་བརྟས། སྔོན་བྱུང་གི་རྣམ་ཐར་དང་ལོ་རྒྱུས་དག་རྣ་བས་ཐོས། ད་ལྟ་མིག་གི་མངོན་སུམ་མཐོང་བའི་དགེ་མཚན་ནི་འཇང་སྟག་ཚང་གི་གནས་སྒོ་ཆེན་མོ་རྩོལ་མེད་ཀྱི་ངང་དེ་ཧད་ཀྱིས་ཕྱེས། བདུད་རྩི་དཀར་དམར་གྱི་ཆབ་རྒྱུན་གློ་བུར་དྲག་ཏུ་བབས། འབབ་རྒྱུན་ལས་རང་བྱུང་གི་སྨན་སྒྲུབ་དང་། ཁ་དྭོགས་ཀྱི་འཇའ་འོད་འཕྲོ་བ་དང་། དྲི་ཞིམ་སྣ་ཚོགས་ཐུལ་བ་དང་། ཆུ་ཀླུང་ལས་བཛྲ་གུ་རུ་པདྨ་སིདྡྷི་ཧཱུྃ་ཞེས་སྒྲ་རང་བྱུང་དུ་གྲགས། རྐྱང་མ་རྫོང་ནས་བསྟན་སྲུང་འཇང་ཡུལ་སྟག་ཚང་གི་གཏེར་སྲུང་གི་གསོལ་མཆོད་འདོད་དོན་ལྷུན་གྲུབ་གསོལ་བ་དང་ཆབ་ཅིག་ཏུ། ༀ་ཨཱཿཧཱུྃ། ཞེས་དབྱངས་བཅས་པས་རོང་ཁང་དྭོགས་མོའི་ཆུ་ཀླུང་རང་བྱུང་གིས་ཛ་དྲག་རྦ་རླབས་བཅས་དྲག་ཏུ་བབས་སོང་། གློ་བུར་དུ་གློག་དམར་ལས་ཛ་དམར་པོ་འོད་དང་བཅས་དང་། བརྒྱུད་གསུམ་སྲུང་མ་དྲེགས་པ་རྒྱ་མཚོ་སྤྱི་དང་། །ཁྱད་པར་འཇང་རི་སྨུག་པོའི་གནས་བདག་གཙོ་འཁོར་དང་། རོང་བཙན་ཁ་བ་དཀར་པོ་འཁོར་བཅས་བདག་གི་རྡོ་རྗེའི་དམ་ལ་འདུས་པ་དང་། དེ་ག་དེར་གནས་པའི་སྟག་ཚང་གནས་སྲུང་རྡོ་རྗེ་དབང་དྲག་རྩལ་ནི་སྐུ་མདོག་དམར་སྨུག་ཅན། ཕྱག་གཡས་པ་ལ་རྒྱལ་མཚན། ཕྱག་གཡོན་པ་ལ་དབང་གི་ཞགས་པས་རི་ལུང་དམ་པོར་བཅིངས་བར་སྣང་། དབུ་མ་རྫོང་ནས་ཡུམ་ཆེན་ཀླུ་མོ་འོད་དཀར་བུམ་བཟང་འོ་མས་གང་བ་ཞིག་བསྣམས་པ་ལས་བདག་གིས་ལག་གཡོན་དུ་གནང་བས་དགའ་བ་བཞིས་རང་ལུས་ངག་ཡིད་གསུམ་ཀུན་དགའ་བདེས་གང་བར་གྱུར། ། རོ་མ་རྫོང་ནས་བློན་པོ་འཇིགས་བྱེད་བདུད་འདུལ་གཡས་སུ་མདུང་དང་། གཡོན་དུ་ཞགས་པ་ཐོགས་པས་དགྲ་བགེགས་བཏུལ་བ་དང་བར་ཆད་གཡུལ་ལས་རྒྱལ་བར་འཆར། ཁྱད་པར་བདུད་བཙན་ཀླུ་གསུམ་དྲེགས་པ་རྒྱ་མཚོའི་ཚོགས་དང་བཅས་པ་རང་གིས་འདོད་དགུ་གྲུབ་པ་དང་། རྒྱལ་བསྟན་འོད་གསལ་རྫོགས་པ་ཆེན་པོའི་འཛིན་སྐྱོངས་སྤེལ་བའི་འཕྲིན་ལས་དུས་སུ་བབས་པར་ཞལ་གྱིས་བཞེས། འགྲོ་བ་ཀུན་ལ་ཕན་བདེ་རྒྱ་ཆེར་དང་ཞི་བདེ་བསྐྲུན་པའི་དགེ་མཚན་རབ་ཏུ་འབར་ཅིང་ཕྱོགས་ཀུན་ལས་རྣམ་པར་རྒྱལ་བའི་རྟེན་འབྲེལ་ཕུན་སུམ་ཚོགས་པར་གྱུར་ཏོ། ཅེས་པའང་རབ་གནས་ཆུ་ཡོས་སྟོན་ཟླ་འབྲིང་བོའི་དབང་ཚེས་ཉེར་གཅིག་ལ་རྨི་ལམ་དབང་ཕྱུག་རིག་འཛིན་ཨེ་མ་ཧོས་རིག་འདུས་མ་ཧཱ་གུ་རུ་པདྨ་སམ་བྷ་ཝའི་གནས་མཆོག་སྟག་ཚང་བཅུ་གསུམ་གྱི་ཡ་གྱལ་འཇང་ཡུལ་སྟག་ཚང་དབང་ཆེན་པདྨའི་དགའ་ཚལ་གྱི་གནས་སྒོ་འགྱེད་པའི་ཚེ་གནས་དེ་ན་ནི་བཀའ་འདུས་དང་དགོངས་འདུས། བཀའ་བརྒྱད་དང་ཞི་ཁྲོ། རྫོགས་པ་ཆེན་པོ་རྒྱུད་འབུམ་ཕྲག་དྲུག་ཅུ་རྩ་དགུ་སོགས་སྐུ་གསུང་ཐུགས་ཡོན་ཏན་ཕྲིན་ལས་གྱི་གནས་ཀུན་གསལ་བ་མཇལ་བའི་མོད་ལ་ཟིན་བྲིས་སུ་བཏབས་པར་དགེའོ།། །།