༧སྐྱབས་རྗེ་དམ་པ་༧བྱ་བྲལ་བ་༧པདྨ་ཆོས་དབྱིངས་ཁྱབ་བརྡལ་མཁྱེན་ནོ།། ན་མོ་གུ་རུ་པདྨ་དྷརྨཱ་དྷརྟུ་ཡེ།། ༼༡༽ ཕྱོགས་དུས་རྒྱལ་བ་ཀུན་གྱི་ཐུགས་རྗེ་ཅན།། མ་ལུས་འགྲོ་རྣམས་སྐྱབས་པའི་བཀའ་དྲིན་ཅན།། དམ་ཆོས་འོད་སྣང་འགྱེད་པའི་བྱིན་རླབས་ཅན།། པདྨ་ཆོས་དབྱིངས་ཁྱབ་བརྡལ་གསོལ་བ་འདེབས།། འཁོར་བ་དོང་ནས་སྤྲུགས་པར་བྱིན་གྱིས་རློབས།། ༼༢༽ ཆོས་བརྒྱད་ཞེན་པ་བྲལ་བའི་བྱ་བྲལ་བ།། ཆོས་ཀུན་དེ་ཉིད་གཟིགས་པའི་རྣལ་འབྱོར་པ།། འཁོར་བའི་སྐྱོན་གྱིས་མ་གོས་རིག་པ་འཛིན།། སྙིགས་དུས་སངས་རྒྱས་གཉིས་པར་གསོལ་བ་འདེབས།། སངས་རྒྱས་བསྟན་པ་འཛིན་སྐྱོང་སྤེལ་ནུས་ཤོག། ༼༣༽ ངེས་འབྱུང་རྣལ་མས་བཤད་དང་སྒྲུབ་པར་བརྩོན།། བྱང་ཆུབ་སེམས་ཀྱིས་ཕྱིན་དྲུག་སྤྱོད་པར་འཇུག། སྣང་སྲིད་རྣམ་དག་བདེ་ཆེན་ཡེ་ཤེས་རོལ།། གསུམ་ལྡན་རྡོ་རྗེ་འཛིན་ལ་གསོལ་བར་འདེབས།། ཐེག་གསུམ་ཆོས་ཀྱིས་འགྲོ་ཀུན་སྨིན་གྲོལ་ཤོག།     ཅེས་པ་རབ་གནས་ལྕགས་གླང་ནག་པ་ཟླ་བའི་ཡར་ངོའི་རྒྱལ་བ་དང་པོ་འམ། ༧སྐྱབས་རྗེ་འཁོར་ལོའི་མགོན་པོ་ཉིད་དགོངས་པ་ཆོས་དབྱིངས་སུ་གཟིམས་པའི་ཉིན་མོར་མིག་ཆུའི་ཀློང་ནས་གསོལ་བ་འདེབས་པར་དགེའོ།། སྤྱི་ལོར། ༡༥/༤/༢༠༢༡་ལ་ཨེ་མ་ཧོས་ད་བྲིས་ད་སྤེལ།།

ཁམས་ཡུལ་ཤུལ་ལ་གསོན་ཤུགས་རྒྱས།། དགུང་སྤྲིན་དཀར་གྱི་འཕུར་ལྡིང་རྩེན།། སྤང་སྔོ་ལྗང་གི་གཡུ་ལོ་རྒྱས།། ཆུ་དྭངས་གཙང་གི་སྦུ་དཀར་གཡོ།། ནགས་ལྗང་ལོ་ཡི་བྲོ་གར་འཁྲབ།། སྟེང་རྒྱ་ཕེབ་ལས་གསེར་འོད་འཕྲོ།། གླིང་གེ་སར་གྱི་ཀི་གསྭོ་བསྒྲོགས།། ས་དེ་ཚོ་ནི་སྐྱིད་པ་ལ།། ཡུལ་དེ་ཚོ་ནི་དགའ་བ་ལ།། ད་བྲིས་ད་སྤེལ།

ཨོཾ་མ་ཎི་པདྨེ་ཧཱུཾ་ཧྲཱིཿ ཡུལ་ཤུལ་ན་ས་ཡོམ་རྒྱབ། ཀྱེ་མ་སྤུན་ཟླ་དང་། གཞི་ཁྱིམ་རྒྱ་ཆ་དྲུག་ཅུའི་ཚེ་སྲོག་ཤོར།། ཀུན་མཁྱེན་བླ་མ་དང་། བླ་མ་དང་གྲྭ་བ་དགེ་འདུན་པས་ཕན་བདེ་བརླབ་ཆེན་མཛད། མི་རྟག་པ་འདི་གསང་བ་ཟབ་པས་ཀུན་གྱིས་དོན་སྣང་མཛད་རོགས། དམ་པའི་ཆོས་ལ་བརྩོན་པར་མཁྱེན་ནོ། དཀོན་མཆོག་གསུམ་པོས་སྐྱོབས། ———-ཨེ་མ་ཧོས

༄༅། །སྐྱབས་རྗེ་གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་          མཆོག་གི་རྣམ་པར་ཐར་པ་མདོར་བསྡུས་སུ་བརྗོད་པ་                      ཕྱི་རབས་དད་པའི་མཆོད་སྤྲིན་                              ཞེས་བྱ་བ།              …

ཀུན་བཟང་མེ་ཏོག་དྲན་པ་དཔྱིད་ཀའི་བརྡ་གླུ། ན་མོ་གུ་རུ་པདྨ་ཀ་ར་ཡེ།། ཀུན་བཟང་ནམ་མཁའ་ཡངས་པའི་ངོ་བོ་ལ།། ཀུན་བཟང་མེ་ཏོག་དབང་མོས་རང་བཞིན་གསལ།། ཀུན་བཟང་ཀུན་ཕན་ཕྲིན་ལས་ཐུགས་རྗེའི་རྩལ།། ཀུན་བཟང་ཡིད་བཞིན་ནོར་བུ་ཀུན་ནས་རྒྱལ།། ཀུན་བྱེད་རྒྱལ་པོའི་སྣང་བའི་མེ་ཏོག་ལ།། ཀུན་གསལ་རིག་པའི་ཡེ་ཤེས་འདབ་སྟོང་བཞད།། ཀུན་ཁྱབ་དྲི་བཟང་སྨན་གྱི་བདུད་རྩིའི་དཔལ།། ཀུན་ལ་ཕན་བདེས་འབྲས་བུ་རབ་ཏུ་འཇོ།། ཀུན་བཟང་གདུགས་དཀར་མོ་ཡི་གསང་གསུམ་ལ།། ཀུན་མཁྱེན་བླ་མ་འཇམ་དཔལ་དགྱེས་པའི་རྩལ།། བུདྡྷ་བཛྲ་རཏྣ་པདྨའི་གར།། ཀརྨ་རྟེན་འབྲེལ་ཟབ་མོའི་ཕྱཔགས་ཀུན་ཁྱབ།། ———-ཨེ་མ་ཧོས

༄༅། །མཁའ་འགྲོའི་དབང་ཕྱུག་རྗེ་བཙུན་མ་མུ་མེད་ཡེ་ཤེས་མཚོ་མོའི་གསོལ་འདེབས་རིག་པ་འཛིན་མའི་རྣ་རྒྱན་ཞེས་བྱ་བ། ཐུབ་བསྟན་གངས་དཀར་ལྷུན་པོའི་ཆུ་རྒྱུན་དེ།། ཡངས་པའི་ས་ཆེན་དུ་མར་བབས་པ་ལས།། ཚེ་གཅིག་ཟུང་འཇུག་གྲུབ་པ་བོད་ཀྱི་ཆོས།། གསང་སྔགས་བསྟན་པའི་ཆེ་བ་རྨད་དུ་བྱུང་།། ས་མཐོ་རི་གཙང་ཟབ་མོའི་ཆོས་གཏེར་མང་།། དཔའ་བོ་མཁའ་འགྲོའི་འདུ་བ་རྒྱུན་མི་ཆད།། བསིལ་ལྡན་ལྗོངས་འདི་སྦས་པའི་ཞིང་གཅིག་སྟེ།། ཨོ་རྒྱན་མཁའ་འགྲོའི་གླིང་དང་གཉིས་སུ་མེད།། གདོང་དམར་ཅོལ་ཆུང་སྤྲེལ་གྱི་བུ་རྒྱུད་ལ།། མཁའ་འགྲོ་གཏེར་སྟོན་རིག་འཛིན་གྲུབ་ཐོབ་སོགས།། འཛམ་གླིང་ཡུལ་གྲུ་ཕལ་ལ་མ་གྲགས་པའི།། ངོ་མཚར་སྐྱེས་ཆེན་རྒྱུ་སྐར་གྲངས་ལས་བརྒལ།། ཡེ་ཤེས་མཚོ་རྒྱལ་མ་ཅིག་ལབ་ཀྱི་སྒྲོན།། ཀུན་དགའ་འབུམ་དང་ཇོ་མོ་སྨན་མོ་སོགས།། འབྲེལ་ཚད་མཁའ་སྤྱོད་ཞིང་དུ་ཁྲིད་པ་ཡི།། མི་དང་མི་མིན་བར་གྱི་དེད་དཔོན་མང་།། སྐྲ་ལོའི་ཉག་མས་གཏེར་གྱི་སྒྲོམ་བུ་འབྱེད།། བརྡ་དང་གླུ་ཡིས་དུས་གསུམ་ལུང་དུ་སྟོན།། ཟབ་མོ་གསང་ཆེན་ཆོས་ཀྱི་ལྡེ་མིག་ལ།། དབང་བའི་རིགས་བཟང་ལྷ་མོ་ཞིང་འདིའི་རྒྱན།། མཁའ་སྤྱོད་ཞིང་དུ་འཕུར་བའི་འགྲོས་ཀྱིས་གཤེགས།། འདི་ཕྱིའི་བར་ལ་འཕྲིན་གྱི་སྐྱེལ་མ་མཛད།། གནས་ཡུལ་དུར་ཁྲོད་ཚོགས་ཀྱི་ཕུད་ལ་དབང་།། སྔགས་སྐྱེས་རིག་འཛིན་མཁའ་འགྲོའི་ཆེ་བ་མང་།། འཇམ་དབྱངས་ཐུགས་སྲོག་མུ༵་ཡིག་ཟླ་བའི་མདངས།། མཚུངས་མེད་བླ་མའི་ཐུགས་རྗེའི་འོད་ཟེར་གྱིས།། ཡང་ཡང་བསྐུལ་བས་མཁའ་འགྲོ་རྒྱ་མཚོ༵་ཡི།། གཙུག་གི་མེ་ཏོག་མདོ་ཁམས་ཕྱོགས་སུ་བབས།། གངས་ཅན་སྐྱེ་འགྲོའི་ཤ་དང་ཁྲག་གི་རྒྱུན།། འཕགས་མའི་སྐུ་ཡི་རྒྱུད་ལས་ཆད་པས་ན།། བརྩེ་ཆེན་མ་དེའི་ཐུགས་རྗེའི་སྒྲོན་མེ་གཅིག། དུས་མཐའི་མུན་པའི་ཁྲོད་ནས་སླར་ཡང་འབར།། སྣང་ས་འོད་འབུམ་མི་འགྱུར་དཔལ་སྒྲོན་དང་།།   འཕྲིན་ལས་ཆོས་སྒྲོན་གོ་འཇོ་མཁའ་འགྲོ་སོགས།།    རྨད་བྱུང་སྤྲུལ་བའི་མཛད་པ་དུ་མ་ཡིས།། བྱམས་བརྩེའི་པང་ནས་འགྲོ་འདི་འདོར་མ་མྱོང་།།…