ཨེ་མ་ཧོ་མཁྱེན་ནོ། ཨེ་མ་ཧོ༔ ན་མོ་མ་ཧཱ་གུ་རུ་བྷྱེ།། ན་མོ་མ་ཧཱ་བུདྡྷ་ཡེ།། ན་མོ་མ་ཧཱ་དྷརྨཱ་ཡེ།། ན་མོ་མ་ཧཱ་སྃ་གྷ་ཡེ།། ཨེ་མ་ཧོ༔ རྟོག་པའི་རྟོགས་པར་དབེན་པ་དང་།། ངག་གི་བརྗོད་པའི་ཡུལ་ལས་འདས།། རིག་པ་ཀུན་བཟང་ཀློངས་མཁྱེན་པ།། དྲི་བྲལ་རྡོ་རྗེ་འཆང་ཆེན་འདུད།། དཔའ་བོ་ཀུན་གྱི་དཔའ་བོ་ཆེ།། མཁའ་འགྲོ་ཀུན་གྱི་བདག་མོ་ཆེ།། རྒྱལ་སྲས་རྒྱལ་བའི་ཐུགས་ཀྱི་སྲས།། གསུམ་ལྡན་ཀུན་མཁྱེན་ཉི་མའི་གཉེན།། སྐྱེ་བ་མེད་ལ་འགག་པ་མེད།། འོང་བ་མེད་ལ་འགྲོ་བ་མེད།། རང་བཞིན་བྲལ་བའི་གཤིས་བབས་ལ།། ཀུན་འདུས་ཆོས་སྐུ་དབྱིངས་སུ་བཞུགས། ཉི་མ་ཡིན་ལ་ཟླ་བ་ཡིན།། ངོ་བོ་ཡིན་ལ་ཀུན་འདུས་ཡིན།། ཆོས་སྐུ་ཡིན་ལ་ལོངས་སྐུ་ཡིན། བླ་མ་དུས་གསུམ་སངས་རྒྱས་མཁྱེན། བྲལ་བ་མེད་པའི་ཐུགས་ཀྱིས་འཛིན། འཛིན་པ་མེད་པའི་དབྱིངས་སུ་ཞུགས། ཟུང་འཇུག་དབྱེར་མེད་ངོ་བོའི་སྐུ། མཚོན་བྱ་བྲལ་བའི་སྐུ་ཐོབས་ཤོག། གོང་གི་སྙིང་གི་བླ་མའི་སྐྱབས་འོག་པ་མགོན་པོ་སྐྱབས་ནས་ཡུ་རོབ་སི་ལོ་ཝ་ཀི་ཡའི་བཀྲ་ཤིས་རབ་བརྟན་གླིང་ནས་སྨོན་པའོ།། །།

༄༅།།བླ་མ་སྒོམ་ཚུལ་འཁོར་འདས་གསལ་བའི་མེ་ལོང་། ཨེ་མ་ཧོ༔ ༼༡༽ ཀ་ཡེ་དག་ཆོས་དབྱིངས་སྟོང་ཉིད་ལས།། འོད་ཡོངས་རྫོགས་ཞིང་ཁམས་རབ་འབྱམས་ཤར།། སེམས་གྲོལ་སྨིན་རིག་པ་རང་ངོ་ཤེས།། དོན་བདེན་གཉིས་མཐར་ཕྱིན་བླ་མ་མཁྱེན།། ༼༢༽ ལུས་དད་པས་ཕྱག་དང་ཕྱག་རྒྱ་སྦྱོར།། ངག་ངུ་ངག་ཀློང་ནས་གསོལ་བ་ཐོབས།། སེམས་ཐུགས་ཡིད་དབྱེར་ཏིང་འཛིན་ངང་།། ཆོས་ཀུན་ཤེས་ལྟ་བ་ཤེས་རབ་འབོད།། ༼༣༽ ལས་དང་པོས་བློ་ལྡོག་རྣམ་བཞི་སྒོམས།། ཆོས་རྩ་བ་ངེས་འབྱུང་རྣལ་མ་གོམས།། མ་འགྲོ་དོན་སྒྲུབ་ཕྱིར་བྱང་སེམས་བཅས།། སེམས་བསྐྱེད་རྫོགས་རྫོགས་པ་ཆེན་པོར་བརྩོན།། ༼༤༽ བློ་རྣམ་རྟོག་མ་མང་སྐྱབས་སེམས་ཀྱིས།། སེམས་འདི་སྐད་གཅིག་མི་སྡོད་པས། དད་པའི་ངུ་ངག་ཀློང་ནས་བླ་མར་འབོད། གནས་ལུགས་རྒྱུད་ལ་སྐྱེ་བའི་བྱིན་རློབས་ཞུས།། ༼༥༽ དམ་ཆོས་བདུད་བརྩིའི་སྨན་མཆོག་ཡང་ཡང་འཐུང་།། ལས་ཉོན་ནད་ལས་ཐར་ཕྱིར་བསག་སྦྱོང་འབོད།། ཚོགས་གཉིས་རྫོགས་ན་སྒྲིབ་གཉིས་བག་ཆགས་སྦྱོང་།། དོན་གཉིས་ལྷུན་གྱིས་གྲུབ་པར་གདོན་མི་ཟ།། ཤྲཱིཿ གླིང་པས་གཡུ་སྒྲ་སྙིང་པོའི་ཡང་སྲིད་མཆོག་སྤྲུལ་རྡོ་རྗེ་དབང་རྒྱལ་ལ་ཐོལ་གྱིས་གངམས་པར་དགེའོ།། 4/9/2024

སྐྱེས་ཚོགས་ཁོ་ནས་བུད་མེད་བསྙེན་པར་རྫོགས་མི་རུང་པའི་ཚུལ་མཁན་རིག་དར་ལ་ཕུལ་བ། རྩོམ་པ་པོ་རིག་པའི་རྡོ་རྗེ་ནས། དེ་ཡང་ཉེ་ཆར་དྲྭ་ལམ་ཁག་ཁ་ཤས་ཤིག་ནས་གསེར་རྟའི་མཁན་པོ་རིག་དར་གྱིས་བརྩམས་གནང་བའི་རྩོམ་ཡིག་ཐར་ཐོར་ཞིག་མཐོང་བྱུང་བས་དེའི་ནང་དོན་གཙོ་བོ་ནི་དགེ་སློང་ཕ་ཚོགས་རྐྱང་པས་བུད་མེད་བསྙེན་པར་རྫོགས་ཆོག་པའི་འབོད་སྐུལ་དང་བཅས་པའི་སྒོ་ནས་མདོ་དང་བསྟན་བཅོས་ཀྱི་ལུང་ཁ་ཤས་ཤིག་ཚོལ་བསྡུ་བྱས་ཏེ་དགེ་སློང་མའི་སྡོམ་པ་སྦྱིན་པ་ལ་ཚངས་སྤྱོད་ཉེར་གནས་ཀྱི་སྡོམ་པ་སྔོན་དུ་འགྲོ་དགོས་པའི་ངེས་པ་མེད་ཚུལ་དང་ཕ་ཚོགས་རྐྱང་པས་ཀྱང་ཚངས་སྤྱོད་ཉེར་གནས་ཀྱི་སྡོམ་པ་སྦྱིན་ཆོག་ཚུལ་དང་དེ་ལྟར་མི་ཆོག་པ་ལ་རྒྱབ་རྟེན་གྱི་ལུང་རིགས་གང་ཡང་མེད་ཚུལ་སོགས་མང་དུ་གསུངས་གནང་འདུག་པས་འདི་ལ་ཁོ་བོས་ཕྲག་དོག་དང་སྡང་ཞེན་སོགས་གང་ཡང་སྨྲ་རྩིས་མེད་མོད་འོན་ཀྱང་རྩོམ་ཡིག་འདི་དང་འདི་འདྲའི་རིགས་ཅན་རྣམས་ལ་འཐད་མི་འཐད་ཀྱི་ཆ་ལ་དགག་སྒྲུབ་ཅུང་ཟད་རེ་དགོས་པར་སྣང་སྟེ་གལ་སྲིད་འདི་དང་འདི་འདྲའི་རིགས་ཅན་གྱི་རྩོམ་ཡིག་རྣམས་ལ་དགག་སྒྲུབ་མ་བྱས་པར་བཏང་སྙོམས་སུ་བཞག་ན་མ་དག་རྒྱུན་འབྱམས་སུ་འགྲོ་ཉེས་ཡོད་པས་འདི་ལ་ལེགས་ཉེས་ངེས་པར་དུ་དཔྱོད་དགོས་པ་ཡིན་ཏེ་དེ་ཡང་ཆོས་རྗེ་ས་སྐྱ་པཎྜི་ཏ་ནས། དམ་ཆོས་འཁྲུལ་དང་མ་འཁྲུལ་པ། །སྐྱེ་བ་གཏན་གྱི་གྲོས་ཡིན་པས། །འདི་ལ་ལེགས་ཉེས་དཔྱོད་པ་ལ། །སྡང་ཞེས་སྨྲ་བ་རང་སྐྱོན་ཡིན། །ཞེས་གསུངས་པས་སོ། ། དེས་ན་ཁོ་བོས་འདིའི་སྐོར་ལ་དགག་སྒྲུབ་ཅུང་ཟད་རེ་ཞུས་ན། དེ་ཡང་ཁྱོད་ཀྱིས་བྲིས་པའི་རྩོམ་ཡིག་དེ་དག་ལས་དང་པོར་ཚངས་སྤྱོད་ཉེར་གནས་ཀྱི་སྡོམ་པ་ཕ་ཚོགས་རྐྱང་པས་བསྒྲུབ་ཆོག་པར་གསུངས་པའི་སྒྲུབ་བྱེད་ལ་འདི་ལྟར་བཀོད་གནང་འདུག་སྟེ། དེ་ཡང་མདོ་རྩར། དགེ་སློབ་མའི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དང་བསྙེན་པར་རྫོགས་པར་བྱ་བ་ལ་ཡང་ངོ་། ཞེས་གསུངས་སོ། །ཞེས་དང་། ཡང་རྒྱ་ཆེར་འགྲེལ་ལས། དགེ་སློབ་མའི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དང་བསྙེན་པར་རྫོགས་པར་བྱ་བ་ལ་ཡང་ངོ་ཞེས་བྱ་བ་ནི། དགེ་སློབ་མ་མཚམས་ཀྱི་ཕྱི་རོལ་ན་གནས་པ་རྣམས་ཀྱིས་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མནོད་པ་དང་། བསྙེན་པར་རྫོགས་པར་བྱ་བ་ཆོས་དང་ལྡན་པའི་དོན་དེ་གཉིས་བྱུང་ན་དེ་དག་བསྒྲུབ་པའི་དོན་དུ་ཡང་དགེ་སློང་དབྱར་གནས་པར་ཁས་བླངས་པ་མཚམས་ཀྱི་ནང་ན་འདུག་པས་ཞག་བདུན་མན་ཆད་མཚམས་ཀྱི་ཕྱི་རོལ་དུ་འགྲོ་ཞིང་དེ་ཚུན་ཆད་ཀྱིས་ཕྱིར་འཁོར་བར་བྱིན་གྱིས་བརླབ་བོ་ཞེས་བྱ་བར་སྦྱར་རོ། །ཞེས་གསུངས་སོ། ། ཞེས་སོགས་བསྟན་བཅོས་ཀྱི་ལུང་ཁ་ཤས་ཤིག་བཀོད་གནང་འདུག་ཀྱང་མདོ་ལས་ཚངས་སྤྱོད་ཉེར་གནས་ཀྱི་སྡོམ་པ་ཕ་ཚོགས་རྐྱང་པས་སྦྱིན་ཆོག་པའི་སྒྲུབ་བྱེད་ཀྱི་ལུང་ནི་གང་ཡང་བཀོད་རྒྱུ་རྙེད་མི་འདུག་ལ་འོན་ཀྱང་ཁྱོད་ཀྱིས་བཀོད་པའི་བསྟན་བཅོས་དེ་དག་གི་དོན་ནི་ཁོ་བོས་འོག་ཏུ་འཆད་པར་བྱའོ། ། དེས་ན་ཁྱེད་ལྟར་ན་སློབ་དཔོན་ཡོན་ཏན་འོད་དང་རྒྱ་ཆེར་འགྲེལ་གཉིས་ཀ་ལ་ནང་འགལ་ཡོད་པར་འགྱུར་ཏེ་དེ་ཡང་སློབ་དཔོན་ཡོན་ཏན་འོད་ཀྱིས་མཛད་པའི་འདུལ་བ་མདོ་རྩ་བ་ལས། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་ཐོབ་པར་བསྙེན་པར་རྫོགས་པར་མི་འགྱུར་རོ། །ཞེས་སོགས་གསུངས་པ་དང་། ཡང་སློབ་དཔོན་ཡོན་ཏན་འོད་ཀྱིས་མཛད་པའི་རང་གི་རྣམ་བཤད་ལས། དགེ་སློང་མའི་དགེ་འདུན་འབའ་ཞིག་གི་དབུས་སུ་ཚངས་པར་སྤྱོད་པ་ལ་ཉེ་བར་གནས་པ་སྡོམ་པའི་ཡན་ལག་ཏུ་གྱུར་པ་ནི་གཉིས་པའོ། །གཉིས་ཀའི་མདུན་གྱི་དབུས་སུ་བསྙེན་པར་རྫོགས་པར་གསོལ་བ་ལ་བསྙེན་པར་རྫོགས་པའི་ཡན་ལག་ཏུ་གྱུར་པ་ནི་གསུམ་པའོ། །ཞེས་སོགས་བུད་མེད་བསྙེན་པར་རྫོགས་པ་ལ་ཚངས་སྤྱོད་ཉེར་གནས་ཀྱི་སྡོམ་པ་མ་ཐོབ་པར་བསྙེན་རྫོགས་ཀྱི་སྡོམ་པ་མི་སྐྱེ་བར་གསུངས་པ་དང་ཚངས་སྤྱོད་ཉེར་གནས་དེ་ཡང་དགེ་སློང་མའི་དགེ་འདུན་འབའ་གིས་སྦྱིན་དགོས་པར་གསུངས་པས་ཁྱེད་ལྟར་ན་དགེ་སློང་མའི་དགེ་འདུན་འབའ་ཞིག་གི་དབུས་སུ་ཚངས་སྤྱོད་ཉེར་གནས་ཀྱི་སྡོམ་པ་སྦྱིན་དགོས་པར་གསུངས་པ་འདི་མི་འཐད་པར་ཐལ། དགེ་སློང་ཕའི་དགེ་འདུན་འབའ་ཞིག་གི་དབུས་སུ་ཡང་ཚངས་སྤྱོད་ཉེར་གནས་ཀྱི་སྡོམ་པ་སྦྱིན་ཆོག་པ་ཡོད་པའི་ཕྱིར། དེས་ན་ཁྱོད་ཀྱིས་གོང་གི་གཞུང་འདི་དག་མ་མཐོང་བའམ་ཡང་ན་རང་གིས་མཐོང་ན་ཡང་རང་ཉིད་ཀྱི་དམ་བཅའ་ལ་གནོད་ཀྱིས་དོགས་ནས་མ་མཐོང་བའི་ཟོལ་མཛད་དེ་བཞུགས་པ་གང་རུང་ལས་མ་འདས་སོ། ། གཞན་ཡང་དེ་དང་འདྲ་བར་རྒྱ་ཆེར་འགྲེལ་ལས་ཀྱང་། དགེ་སློང་མ་རྫོགས་པར་བསྙེན་པར་བྱ་བ་ལ། དགེ་འདུན་གྱི་དབུས་སུ་བར་ཆད་དྲི་བ་ལན་གཉིས་བྱ་དགོས་ཏེ། གཅིག་ནི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའི་དུས་ན་དགེ་སློང་མའི་དགེ་འདུན་འབའ་ཞིག་གི་དབུས་སུ་ལས་བྱེད་པའི་དགེ་སློང་མས་དྲི་བའོ། །ཞེས་ཚངས་སྤྱོད་ཉེར་གནས་ཀྱི་སྡོམ་པ་སྦྱིན་པའི་དུས་སུ་དགེ་སློང་མ་འབའ་ཞིག་གི་དབུས་སུ་བསྒྲུབ་བྱ་མ་དེ་ལ་བར་ཆད་འདྲི་དགོས་པར་གསུངས་པ་དང་། ཡང་རྒྱ་ཆེར་འགྲེལ་ལས། དགེ་སློང་མའི་དགེ་འདུན་འབའ་ཞིག་གི་དབུས་སུ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའི་སྔ་རོལ་ཁོ་ནར་དྲི་བའི་ཐ་མར་གསུམ་པ་ནི་དགེ་སློང་ལས་བྱེད་པས་གཉི་གའི་དགེ་འདུན་གྱི་དབུས་སུ་བསྙེན་པར་རྫོགས་པར་གསོལ་བའི་འོག་ཏུ་དྲི་བའོ།…