• April 2020

    སྙིང་གྲོགས་དགྱེས་པའི་ཐོལ་གླུ།།ན་མོ་གུ་ར་ཝེ།།མགོན་རྒྱལ་བ་ཀུན་འདུས་པདྨ་འབྱུང་།།དཔལ་ཆོས་སྐྱོང་གར་བསྒྱུར་སེང་ཆེན་རྗེ།།བུ་མོས་གུས་གདུང་བས་གསོལ་བ་འདེབས།།བསྟན་འགྲོ་ལ་ཕན་བདེ་ལྷུན་གྲུབ་སྩོལ།།སེང་དཀར་མོའི་རྟགས་ཀྱི་ཡུལ་གྲུ་ནས།།གནམ་སྤྲིན་ཆེན་འདབ་མ་ཐོད་ཀྱིས་བརྒལ།།ས་གོ་ལའི་ཡངས་རྩེ་དབྱིན་ཡུལ་ན།།རྐྱེན་བར་ཆད་མེད་པར་བདེ་བར་འབྱོར།།ཕྱི་རྒྱ་ནད་འཛམ་གླིང་སྤྱིར་ཁྱབ་ཀྱང་།།ནང་གྲོགས་མཆེད་སྙིང་དམར་ཆེ་བའི་ཕྱིར།།དོན་དཔལ་གདེང་ལྡན་པའི་རྣལ་འབྱོར་ང་།།ཛ་དྲག་པོས་བདེ་མྱུར་རི་ཁྲོད་ཕྱིན།།དབུ་ལྕང་ལོ་མཁའ་འགྲོ་བྱེ་བས་རྒྱན།།ལུས་རྩ་གནས་ཞི་ཁྲོ་རབ་འབྱམས་གཏམས།།དབུགས་འགྲོ་འོང་ཨོཾ་ཨཱཿཧཱུཾ་གིས་དབྱངས།།སེམས་གཡོ་མེད་རིག་ཀློང་ངང་དུ་བཞུགས།།ལུས་དཔལ་ཆེན་རྩ་རླུང་ཐིག་ལེ་དག།ངག་དགྱེས་པ་ཛབ་བཟླས་ལོངས་སྤྱོད་རྫོགས།།ཡིད་རྡོ་རྗེ་སངས་རྒྱས་ཡེ་ཤེས་སྨིན།།སྒོ་ལུས་ངག་ཡིད་གསུམ་བདེ་ལགས་སོ།།དཔའ་རྒྱ་སྟག་ངར་མ་འཛུམ་དྲུག་བརྟས།།གངས་སེང་ཆེན་དཀར་མོ་གཡུ་རལ་བརྗིད།།སྙན་གསེར་འབྲུག་སེར་པོས་རྔ་ཆེན་གྲགས།།དབྲ་ཁྱུང་སྲས་སྔར་བཞིན་བདེ་འཚམས་ལགས།།སྐུ་ཆོས་གོས་གསོལ་ཞིང་སྒོམ་ཐག་མཛེས།།གསུང་དཀོན་མཆོག་འཆད་པའི་ཚངས་དབྱངས་སྙན།།ཐུགས་འགྲོ་ཀུན་བྱམས་པའི་ཏིང་འཛིན་ཅན།།བུ་དགྲ་ལྷ་རྩེ་རྒྱལ་བདེ་ལེགས་སོ།།གནས་དབེན་པ་ཨེ་ཝཾ་ཆོས་སྒར་ན།།གྲོགས་བྱ་དང་བྱེའུའི་དབྱངས་རོལ་ཉན།།ཟས་བཅུད་ཆེན་རྩི་ཐོག་སྣ་ཚོགས་གསོལ།།དུས་ཉིན་མཚན་མེད་པར་ཞི་ལྷག་གོམས།།མ་དྲིན་ཆེན་འདས་པའི་གདུང་མཆོད་དང་།།བུ་དམ་ཚིག་ལྡན་ལ་སྲུང་སྐྱོབ་ཕྱིར།།ནད་རྡུལ་དུག་དགྲ་ལ་མ་འཇིགས་ནས།།ཕྱོགས་ཀུན་ནས་བདེ་ལེགས་ངང་དུ་མཆིས།།དྲིན་ཨ་མ་དྲན་ནས་སྨྱོས་ལ་ཁད།།གྲོགས་སྙིང་དམར་ཡོད་ནས་དགའ་ཡ་ལེ།།ངས་དགའ་སྐྱོ་དབེན་པའི་རི་ཀླུངས་ན།།བྱམས་སྙིང་རྗེ་སྒོམ་ནས་མཚམས་སུ་བཞུགས།།མགོན་པོ་སྐྱབས་ནསཕ་སྐྱེས་མཆོག་ནོར་བུ་དགྲ་འདུལ་གྱི།།བུ་གཅེས་ཕྲུག་སྣང་བུ་སྒོམ་ཐག་ཅན།།དཔའ་ཁེར་འགྲོ་དམར་ཡག་སྟག་གི་སྤུན།།སྐུ་གཟི་བརྗིད་ལྡེམ་མེ་བཞུགས་ལགས་སམ།།མ་སྐྱ་ལོ་སེང་ལྕམ་འབྲུག་མོ་ཡི།།བུ་འདང་ཆེན་ཨ་བུ་གྲུབ་རྟགས་ཅན།།ངག་དྲུག་འགྱུར་ཐལ་ལེ་བདེ་ལེགས་སམ།།གདོང་འབུམ་པའི་རྒྱ་ཚ་ཞལ་དཀར་གྱི།།བུ་ཚ་བོ་རིག་པའི་གཏེར་མཛོད་ཅན།།ཐུགས་ཏིང་འཛིན་ཀློངས་ན་བཞུགས་ལགས་སམ།།ཞེས་སྙིང་གྲོགས་སྨན་རམས་པ་མགོན་པོ་སྐྱབས་ཀྱི་འཕྲིན་ལན་དུ་ཨེ་མ་ཧོས་ཨེ་ཝཾ་རྫོགས་ཆེན་ཆོས་སྒར་ནས་འཕྲལ་དུ་ཕུལ་བར་དགེའོ།། །།

  • April 2020

    ལས་ཉོན་མ་རིག་རྨོངས་བའི་དྲྭ་གཟེབ་ན།།རིག་པའི་ཡེ་ཤེས་བོར་བའི་གཉིས་འཛིན་ཅན།།ཞེན་ཆགས་སྟོང་གི་བར་དུ་འཁྱམས་པ་བདག།།ཐུགས་རྗེའི་ཕྱག་གིས་སྐྱོར་དང་རྒྱལ་བའི་ཡུམ།། འདོད་སྲེད་སེམས་ཀྱི་གླང་སྨྱོན་མ་ཐུབ་ནས།།བག་མེད་ནགས་སུ་འཔྱན་པའི་མགོ་འཁོར་བདག།འདོད་ཡོན་འདམ་ལས་ཐར་བའི་དུས་མེད་ན།།སྙིང་རྗེའི་ལྕག་ཀྱུའི་འདྲེན་མཛོད་འཕགས་མ་ཀྱེ།། ཉིན་མཚན་ཀུན་དུ་འདི་སྣང་དཔལ་ལ་ཞེན།།ཚེ་རབ་རྒྱུད་མར་འཁོར་བའི་གྲོང་དུ་ལྷག།།ཡང་དག་སྣང་བས་རབ་དབུལ་ལས་ངན་ངས།།མ་ཁྱོད་གདུང་བས་འབོད་དོ་བརྩེ་བས་དགོངས།། བག་ཆགས་སེམས་ཀྱི་ཀུན་གཞི་མེ་ལོང་ངོས།།ཡིད་ཙམ་འཆར་བ་དེ་ནི་ཁྱེད་ཁོ་ན།།ལྷག་པའི་ལྷ་ཞེས་འུད་གོག་མ་ཡིན་ཡང་།།སྨོན་ལམ་ལས་ཀྱི་མེ་ཏོག་འཐོར་རམ་ཅི།།

  • March 2020

    ཨོ་རྒྱན་རྒྱལ་བ་རིགས་ལྔའི་གསོལ་འདེབས་ཡིད་བཞིན་ནོར་བུའི་དོ་ཤལ།།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།ཞེ་སྡང་རང་གྲོལ་ཨོ་རྒྱན་རྡོ་རྗེ་འཆང་།།གུ་རུ་རྡོར་སེམས་ཡབ་ཡུམ་ལ་གསོལ་བ་འདེབས།།འོད་གསལ་མེ་ལོང་ཡེ་ཤེས་མངོན་རྟོགས་ནས།།དབྱིངས་རིག་མ་བུ་འདུ་འབྲལ་མེད་པར་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།ང་རྒྱལ་རང་གྲོལ་ཨོ་རྒྱན་རྡོ་རྗེ་འཆང་།།གུ་རུ་རིན་འབྱུང་ཡབ་ཡུམ་ལ་གསོལ་བ་འདེབས།།འཁོར་འདས་མཉམ་ཉིད་ཡེ་ཤེས་མངོན་རྟོགས་ནས།།ཆོས་ཉིད་ཡེ་གྲུབ་སངས་རྒྱས་ལྷུན་གྲུབ་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།འདོད་ཆགས་རང་གྲོལ་ཨོ་རྒྱན་རྡོ་རྗེ་འཆང་།།གུ་རུ་སྣང་མཐའ་ཡབ་ཡུམ་ལ་གསོལ་བ་འདེབས།།བདེ་ཆེན་སོར་རྟོགས་ཡེ་ཤེས་དོན་རྟོགས་ནས།།སྣང་སྲིད་དབང་བསྡུད་འགྲོ་དོན་བདེ་མྱུར་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།ཕྲག་དོག་རང་གྲོལ་ཨོ་རྒྱན་རྡོ་རྗེ་འཆང་།།གུ་རུ་དོན་གྲུབ་ཡབ་ཡུམ་ལ་གསོལ་བ་འདེབས།།གང་བསམ་བྱ་གྲུབ་ཡེ་ཤེས་དོན་རྟོགས་ནས།།ཆོས་ཉིད་སད་སར་ཕྱིན་པའི་དཔལ་ཐོབ་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།གཏི་མུག་རང་གྲོལ་ཨོ་རྒྱན་རྡོ་རྗེ་འཆང་།།གུ་རུ་རྣམ་སྣང་ཡབ་ཡུམ་ལ་གསོལ་བ་འདེབས།།ཆོས་ཀུན་ཆོས་དབྱིངས་ཡེ་ཤེས་དོན་རྟོགས་ནས།།འཇའ་ལུས་འཕོ་ཆེན་གདོད་མའི་སར་ཕྱིན་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།བླ་མ་ཀུན་འདུས་ཨོ་རྒྱན་རྡོ་རྗེ་འཆང་།།ཡི་དམ་ཀུན་རྫོགས་བཀའ་བརྒྱད་བདེ་བཤེགས་དཔལ།།མཁའ་འགྲོ་ཀུན་བཟང་སེངྒེ་གདོང་པ་དང་།།ཆོས་སྐྱོང་ཀུན་རྒྱལ་ནོར་བུ་དགྲ་འདུལ་མཁྱེན།།ཀུན་བཟང་སངས་རྒྱས་ཕྲིན་ལས་ལྷུན་གྲུབ་ཤོག།ཨོྃ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ།།ཞེས་པ་འདི་ཡང་རབ་གནས་ལྕགས་བྱིའི་དབོ་ཟླའི་ཡར་ཚེས་རྒྱལ་བ་གསུམ་པར་ཧེ་རུ་ཀ་སྣ་ཚོགས་རང་གྲོལ་ངོར་ཨེ་མ་ཧོའི་རིག་ཀློང་ནམ་མཁའ་མཛོད་ཀྱི་ཆོས་སྡེ་ལས་ཤར་བའི་ཡིད་བཞིན་ནོར་བུའི་དོ་ཤལ་ཆེན་པོའོ།། །།

  • March 2020

    བདེ་སྨོན།ཨེ་མ་ཧོ།།གོ་ལའི་ནད་མུག་གླིང་གི་བར་གསེང་ནས།།སྐྱབས་གཅིག་རྡོ་རྗེ་གོ་ཁྲབ་ཡང་ཡང་བསྙེན།།འགྲོ་བའི་ནད་རིམས་ངན་པ་མྱུར་སེལ་ནས།།ཀུན་ཀྱང་དགའ་བདེའི་དཔལ་ལ་སྤྱོད་པར་ཤོག།ཕྱི་སྣང་དག་པ་རབ་འབྱམས་ཡོངས་སུ་ཤར།།ནང་བཅུད་བྱམས་བརྩེ་བྱང་ཆུབ་སེམས་ཉིད་བརྟས།།གསང་ཆེན་རང་རིག་བླ་མའི་དེ་ཉིད་རྟོགས།།ཡད་གསང་སངས་རྒྱས་ཡེ་ཤེས་མཐར་ཕྱིན་ཤོག།བླ་མ་ཨོ་རྒྱན་ཆེན་པོས་རྟག་ཏུ་སྐྱབས།།ཡི་དམ་རྡོ་རྗེ་གོ་ཁྲབ་བརྟན་དུ་སྲུང་།།མཁའ་འགྲོ་རྗེ་བཙུན་སྒྲོལ་མས་བར་ཆད་སེལ།།ཆོས་སྐྱོང་གེ་སར་རྒྱལ་པོས་དངོས་གྲུབ་སྩོལ།།ཨོཾ་ཨཱཿཧཱུཾ་ཧྲཱིཿབྷྲཱུཾ་སྭཱ་ཧཱ།།ཤྲཱིས་སོ།

  • March 2020

    གུ་རུ་རྒྱལ་བ་རིགས་ལྔའི་གསོལ་འདེབས་ཙིཏྟ་མ་ཎི་ཀ།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ།།༼༡༽ཨོཾ་དབྱིངས་ངོ་བོ་ཀ་དག་སྤྲོས་བྲལ་ལས༔ཨཱཿདབྱངས་རང་བཞིན་ལྷུན་གྲུབ་འོད་གསལ་དཔལ༔ཧཱུཾ་ཉིད་ཐུགས་རྗེའི་རྩལ་སྣང་སྤྲུལ་པའི་སྐུ༔སྐུ་གསུམ་ཀུན་འདུས་པདྨ་འབྱུང་གནས་མཁྱེན༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔༼༢༽བཛྲ་སེམས་དཔའ་ཆེན་དང་མ་མ་ཀི༔གུ་རུ་རཏྣ་དཔལ་དང་སངས་རྒྱས་སྤྱན༔པདྨ་སྣང་བ་མཐའ་ཡས་གོས་དཀར་མོ༔ཞི་རྒྱས་གར་དབང་རྒྱལ་པོར་གསོལ་བ་འདེབས༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔༼༣༽སིདྡྷི་དོན་ཡོད་གྲུབ་དང་དམ་ཚིག་སྒྲོན༔ཧཱུཾ་མཆོག་རྣམ་པར་སྣང་མཛད་དབྱིངས་ཕྱུག་མ༔གུ་རུ་རྒྱལ་བ་རིགས་ལྔར་གསོལ་བ་འདེབས༔འབྲས་ཆོས་ཉེར་ལྔའི་དགོངས་པ་མཐར་ཕྱིན་ཤོག༔ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔ཞེས་པ་འདི་ཡང་རབ་གནས་ས་ཕག་སྟོན་ཟླ་འགོ་མའི་ཡར་ངོའི་ཚེས་བཅུ་ལ་རིག་འཛིན་ཨེ་མ་ཧོས་སྙིང་དབུས་མི་ཕྱེད་དད་པའི་ཡིད་མཚོ་ལས་བྱུང་བར་བཞིན་ཨེ་ཝཾ་ཡོ་ག་ཆོས་ཚོགས་ནས་གསོལ་བར་འདེབས་པར་དགེའོ།།

  • March 2020

    སྣང་སྲིད་དབང་དུ་སྡུད་པའི་གསོལ་འདེབས་བྱིན་རླབས་སྤྲིན་ཆེན།ཨོཾ་ཨཱཿཧཱུྃ་ཧྲཱིཿབདེ་ཆེན་འབར་བ་དབང་གི་ཕོ་བྲང་དུ། །བདེ་སྟོང་སོ་སོར་རྟོག་པའི་ཡེ་ཤེས་སྐུ། །མ་ཆགས་བདེ་ལྡན་པདྨའི་རང་བཞིན་ལས། །རྡོ་རྗེ་ཉི་མ་སྣང་བ་ཆེན་པོའི་དཔལ། །ཆོས་སྐུ་སྣང་བ་མཐའ་ཡས་རྡོ་རྗེ་ཆོས། །འཇིག་རྟེན་དབང་ཕྱུག་ཐུགས་རྗེ་རྗེས་ཆགས་གཟུགས། །པདྨ་རྒྱལ་པོ་འཁོར་འདས་མངའ་དབང་བསྒྱུར། །སྣང་སྲིད་ཟིལ་གནོན་དབང་ཆེན་ཧེ་རུ་ཀ །གསང་བ་ཡེ་ཤེས་བཛྲ་ཝཱ་ར་ཧི། །བདེ་མཆོག་འདོད་པའི་རྒྱལ་པོ་བདེ་ཆེན་གཏེར། །མ་ལུས་སྐྱེ་རྒུའི་ཡིད་འཕྲོག་རིགས་བྱེད་མ། །མཆོག་ཐུན་ཕྱག་རྒྱའི་དབང་ཕྱུག་བདེ་སྟོང་གར། །དབང་མཛད་རྡོ་རྗེ་དཔའ་བོ་ཌཱ་ཀིའི་ཚོགས། །སྣང་སྟོང་མཉམ་པ་ཆེན་པོའི་ངང་ཉིད་དུ། །རྡོ་རྗེ་སྐུ་ཡི་གར་གྱིས་སྲིད་གསུམ་གཡོ། །འགག་མེད་གསུང་གི་བཞད་སྒྲས་ཁམས་གསུམ་འགུགས། །འོད་ཟེར་དམར་པོས་འཁོར་འདས་ཡོངས་ལ་ཁྱབ། །སྲིད་ཞིའི་དྭངས་བཅུད་གཡོ་ཞིང་སྡུད་པར་བྱེད། །རྡོ་རྗེ་ཆགས་པ་ཆེན་པོའི་ཐུགས་ཀྱིས་ནི། །རྣམ་གཉིས་དངོས་གྲུབ་འདོད་རྒུའི་མཆོག་སྩོལ་ཞིང༌། །རྡོ་རྗེ་ལྕགས་ཀྱུ་ཞགས་པ་ཆེན་པོ་ཡིས། །སྣང་སྲིད་བདེ་བ་ཆེན་པོར་སྡོམ་བྱེད་པ། །མཐའ་ཡས་སྒྱུ་འཕྲུལ་དྲྭ་བའི་རོལ་གར་ཅན། །ཏིལ་གྱི་གོང་བུ་ཕྱེ་བ་བཞིན་བཞུགས་པའི། །རབ་འབྱམས་རྩ་གསུམ་དབང་གི་ལྷ་ཚོགས་ལ། །གུས་པས་གསོལ་བ་འདེབས་སོ་བྱིན་གྱིས་རློབས། །མཆོག་ཐུན་དངོས་གྲུབ་འདོད་རྒུའི་དཔལ་མཐའ་དག །ཐོགས་མེད་དབང་དུ་བྱེད་པའི་དངོས་གྲུབ་སྩོལ། །ཅེས་པའང་རབ་ཚེས་ས་ཡོས་ཟླ༧་ཚེས༡་ལ་དྷཱིཿམིང་པས་སྤེལ། གསོལ་བ་བཏབ་ན་གང་ཟག་སུ་ཡང་རུང་སྟེ་དབང་གི་ལས་ཀུན་ཇི་ལྟར་བསམ་པ་བཞིན་འགྲུབ་པར་གདོན་མི་ཟའོ། །དར་དམར་ལ་བྲིས་ཏེ་ཕྱར་བའམ་མེ་རླུང་ལ་འཁོར་ལོ་བྱས་ཀྱང་འགྲུབ་བོ། །མངྒ་ལཾ།། །།