མགོན་པོ་དྲེགས་གཤེད་ཀྱི་གསོལ་མཆོད་དངོས་གྲུབ་མྱུར་སྩོལ།  དངོས་དང་ཡིད་སྤྲུལ་ཅི་འབྱོར་བཤམས་ལ། ཧཱུཾ་ཧྲཱིཿ  བཅོམ་ལྡན་མགོན་པོ་དྲེགས་གཤེད་བཀའ་སྲུང་ཆེ།།  གཉིས་མེད་རྒྱུད་རྒྱལ་དུས་ཀྱི་འཁོར་ལོ་སོགས།། ཀུན་མཁྱེན་རྒྱལ་བའི་བསྟན་པ་སྤེལ་མཛད་ལ།། གསོལ་ལོ་མཆོད་དོ་བཅོལ་བའི་ཕྲིན་ལས་མཛོད།།  ཨོཾ་ཀཱ་ལ་ཙཀྲ་དྷརྨཱ་པཱ་ལ་སརྦ་སིདྡྷི་ཕ་ལ་ཧཱུཾ་ཧཱུཾ།།  ཞེས་པ་འདི་ཡང་རབ་གནས་ལྕགས་གླང་དབོ་ཟླའི་དབང་ཚེས་དགེ་བར་ཀུན་མཁྱེན་ཇོ་ནང་གི་བསྟན་འཛིན་དམ་པ་སྔགས་འཆང་རྡོ་རྗེ་འཛིན་པ་མཆོག་ཚང་ཀཿགནམ་རིན་པོ་ཆེས་མཁའ་འགྲོ་ཆེན་མོ་ཀུན་དགའ་ཕྲིན་ལས་དབང་མོའི་རྣམ་ཐར་གསུང་པའི་སྐབས་སུ་ཆོས་སྐྱོང་སྐུ་པར་གནང་བའི་མོད་ལ་གང་ཤར་དུ་གསོལ་མཆོད་དུ་ཨེ་མ་ཧོས་ཐོ་རངས་ཁར་སད་རྨིས་ཚོར་སྣང་དྲག་པོས་སྙིང་ནས་གསོལ་མཆོད་འབུལ་བར་དགེའོ།། །།

༄༅། །མཁན་ཆེན་དམ་པ་ཆོས་དབྱིངས་ཁྱབ་བརྡལ་ མཆོག་གི་རྗེས་དྲན་འདས་པའི་གཟུགས་བརྙན་ གསལ་བའི་མེ་ལོང་བཞུགས།། ༼༡༽ ཆོས་དབྱིངས་མཁྱེན་པའི་ནམ་མཁའ་ཡངས་པ་ལས།། ཁྱབ་བརྡལ་བརྩེ་ཆེན་ཉི་མའི་འོད་ཟེར་ཞིག། སྐལ་བཟང་མེ་ཏོག་མཛེས་པའི་དཔལ་དུ་སྨིན།། མཚུངས་མེད་བླ་མར་དད་པའི་ལྷ་ཕྱག་བརྩེགས།། ༼༢༽ ཟས་གཙང་སྲས་དེ་མཇལ་བའི་སྐལ་བ་དམན།།  པད་མས་ཐུགས་རྗེས་ཟིན་པའི་བསོད་ནམས་ཆུང་།།   ཉམ་ཐག་ང་ལ་ཐར་བའི་ལམ་ཆེན་དུ།།  གོམ་པའི་འདེགས་འཇོག་སློབ་པ་ཁྱེད་ཉིད་ཙམ།།    ༼༣༽ གཞལ་བར་དཀའ་བའི་སྐུ་དྲིན་བསམས་པ་ན།། སངས་རྒྱས་ཡིན་ཡང་རུང་ལ་མིན་ཡང་རུང་།། སྐྱབས་གནས་རྒྱ་མཚོའི་ངོ་བོ་ཁྱེད་ལ་བཟླུམ།། ཐུགས་རྗེ་གདུགས་དཀར་གྲིབ་མས་ད་དུང་སྐྱོངས།། ༼༤༽ མཁས་བཙུན་གྲུབ་པའི་ཡོན་ཏན་བསམས་པ་ན།། མཐོན་པོའི་སྐྱེས་རབས་ཡོད་ཀྱང་མེད་ཀྱང་རུང་།། བྱིན་རླབས་རྒྱ་མཚོའི་གཏེར་དུ་ཡིད་ཆེས་པས།། དོན་བརྒྱུད་འཆི་མེད་བདུད་རྩིའི་དགའ་སྟོན་བྱིན།། ༼༥༽ གང་ཁྱེད་ཞི་བར་གཟིམ་ནས་དེ་རིང་བར།།   ལོ་དང་ཟླ་བའི་ཕྲེང་བ་མང་འདས་ཀྱང་།།  དྲན་པའི་མེ་ལོང་དྭངས་མའི་སྐོར་ལུགས་རེར།།  དགྱེས་ཞལ་གསུང་གི་གདངས་དབྱངས་སྔར་བཞིན་འཆར།། ༼༦༽ མ་གྲུབ་འདོད་པའི་མེ་ལྕེ་ཉིན་བཞིན་འབར།།    གྲུབ་ཀྱང་ཕྲ་མོའི་མེ་སྟག་གཞན་ལ་མཆེད།།  རེ་བའི་མེ་དཔུང་ནང་ནས་ལུས་སེམས་འདི།།  སོལ་བའི་ཕུང་པོར་གྱུར་པའི་ཚུལ་བསམས་ཚེ།། ༼༧༽ ཁང་པའི་ཕྱི་ན་རྔམ་བརྗིད་མཛེས་ཆོས་མེད།།…

༄༅།།རྗེ་བཙུན་མཁའ་འགྲོ་མ་ཀུན་བཟང་དབང་མོའི་ ཞབས་བརྟན་ཙིཏྟ་མ་ཎི་ཞེས་བྱ་བ་བཞུགས་སོ།། ན་མོ་གུ་རུ་ཌཱཀྐི་ནི་ས་མནྟ་བྷ་དྲ་ཝ་ཤཾ་ཡེ།། ༡༽ ཀ་དག་ལྷན་སྐྱེས་མཁའ་འགྲོ་ཀུན༵་ཏུ་བཟང༵་།། ལྷུན་གྲུབ་སྔགས་སྐྱེས་མཁའ་འགྲོ་གར་དབང༵་མོ༵།། སྣ་ཚོགས་ཞིང་སྐྱེས་མཁའ་འགྲོ་མཁའ་སྤྱོད་བདག། རིག་འཛིན་ཀུན་བཟང་དབང་མོ་ཞབས་བརྟན་ཤོག། ༢༽ འཕགས་ཡུལ་ཀུན༵་བཟང༵་སྒྱུ་འཕྲུལ་ལྷ་མཛེས་མ།། གསང་ཆེན་གནས་སུ་ལས་ཀྱི་དབང༵་མོ༵་མཆོག། པདྨའི་ཞབས་དྲུང་ཤཱཀྱ་དྷེ་ཝའི་རྩལ།། འཇིགས༵་མེད༵་ཆོས༵་ཀྱི་སྒྲོན༵་མེར་ཞབས་བརྟན་ཤོག། ༣༽ བླ་མ་དམ་པས་རྟག་ཏུ་ཐུགས་རྗེས་སྐྱོབ།། ཡི་དམ་རྒྱ་མཚོའི་ཞལ་མཐོང་དངོས་གྲུབ་ཐོབ། མཁའ་འགྲོ་ཡོངས་ཀྱི་གཙོ་མོ་ཆོས་ཀྱི་རྗེ།། ཆོས་སྐྱོང་ཁྱབ་བདག་ཆེན་མོ་རྟག་འཚོ་ཤོག། ༤༽ ཕྱི་སྣང་ཐོས་བསམ་སྒོམ་པའི་ཕ་རོལ་ཕྱིན།། ནང་དུ་མཁས་བཙུན་བཟང་པོའི་དཔལ་ཡོན་ཕྱུག། གསང་ཆེན་བསྙེན་བསྒྲུབ་ཕྲིན་ལས་ཀུན་ཁྱབ་མཛད།། བསྟན་འགྲོའི་ཕན་བདེའི་མགོན་པོ་སྐུ་ཚེ་བརྟན། ༥༽ ཆོས་དབྱིངས་འགྱུར་མེད་དོན་དམ་བདེན་པ་དང་།། འོད་གསལ་འགགས་མེད་རྟེན་འབྲེལ་དག་པའི་ཞིང་།། གང་འདུལ་སྨན་པའི་རྒྱལ་མོ་ཀུན་བཟང་དབང་།། སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག། ཅེས་པ་འདི་ཡང་རབ་གནས་ལྕགས་གླང་གི་དབོ་ཟླའི་ཀུན་བཟང་གི་ཉི་མ་དང་དུས་བཟང་དབང་གི་དགའ་ཆར་མཁའ་འགྲོ་མཁའ་སྤྱོད་ཀུན་བཟང་དབང་མོས་རྟེན་འབྲེལ་དད་དང་དམ་རྫས་དང་ཐུགས་སྨོན་ཟབ་རྒྱས་གནང་བའི་དགེ་མཚན་ལས་འགགས་མེད་རྡོ་རྗེའི་རང་སྒྲ་ལས་བྱུང་བའི་རིང་འཚོའི་སྨོན་ཚིག་ཏུ་རིག་འཛིན་ཨེ་མ་ཧོས་ཡིད་མཚོ་རིག་པའི་ཀློང་ལས་ཤར་བ་དག་དེ་ཉིད་དུ་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་གསོལ་བ་འདེབས་པར་དགེའོ།། །།

ལྕེ་བཙུན་ཆེན་པོའི་བི་མ་ལའི་ཟབ་ཏིག་གི་བརྒྱུད་པའི་གསོལ་འདེབས་བཞུགས་སོ།། སྲིད་ཞིའི་ཁྱབ་བདག་ཀུན་བཟང་གདོད་མའི་མགོན། །རང་བྱུང་རིག་པ་སྐུར་སྨིན་རྡོ་རྗེ་སེམས། །རྩོལ་མེད་ཐེག་མཆོག་སྟོན་པ་དགའ་རབ་ལ། །གསོལ་བ་འདེབས་སོ་དགོངས་པས་བྱིན་གྱིས་རློབས། །ཨ་ཏིའི་མཛོད་འཛིན་འཇམ་དཔལ་བཤེས་གཉེན་ཞབས། །རིག་རྩལ་དབང་ཐོབ་ཤྲཱི་སེང་ཡེ་ཤེས་མདོ། །འཕོ་ཆེན་རྡོ་རྗེའི་སྐུར་བཞེངས་བི་མ་ལར། །གསོལ་བ་འདེབས་སོ་དགོངས་པས་བྱིན་གྱིས་རློབས། །གང་དེའི་རྗེས་བཟུང་མི་སློབ་ལམ་མཐར་ཕྱིན། །འོད་གསལ་སྐུ་བརྙེས་ལྕེ་བཙུན་སེང་གེ་དབང་། །གསང་འཛིན་མཁའ་འགྲོ་དཔལ་གྱི་བློ་གྲོས་མར། །གསོལ་བ་འདེབས་སོ་དགོངས་པས་བྱིན་གྱིས་རློབས། །བི་མ་ཡབ་སྲས་ཡེ་ཤེས་སྒྱུ་མའི་གར། །ཁྱབ་བདག་འོད་གསལ་སྤྲུལ་པའི་རྡོ་རྗེའི་ཞབས། །རབ་འབྱམས་རྩ་གསུམ་རྒྱལ་བའི་དཀྱིལ་འཁོར་ལ། །གསོལ་བ་འདེབས་སོ་དགོངས་པས་བྱིན་གྱིས་རློབས། །རིམ་པར་དབང་གིས་སྨིན་གྲོལ་ཅིག་ཅར་རྫོགས། །སེམས་སྦྱོང་ཉམས་ལེན་སྲིད་ཞིའི་འཆིང་ལས་གྲོལ། །སྒྲིབ་དག་ཚོགས་རྫོགས་མོས་གུས་ཚད་དུ་ཕྱིན། །བླ་མའི་བྱིན་རླབས་རྒྱུད་ལ་འཇུག་པར་ཤོག །སྒོ་གསུམ་འཁྲུལ་པའི་གཞི་རྩ་དྲུངས་ནས་ཆོད། །ཀ་དག་རང་སྣང་རིས་མེད་མངོན་དུ་གྱུར། །ལྷུན་གྲུབ་སྣང་བཞི་ཟད་སར་འཁྱོལ་ནས་ཀྱང་། །གཞོན་ནུ་བུམ་སྐུའི་དབྱིངས་སུ་བྱང་ཆུབ་ཤོག །ཟག་པ་རང་ཟད་འབྱུང་བ་རང་སར་དེངས། །དྲན་པ་རང་གྲོལ་ཟང་ཐལ་འོད་ཀྱི་ལུས། །སེང་གེ་དབང་ཕྱུག་ཉིད་དང་མཉམ་གྱུར་ནས། །གྲོལ་བ་རྣམ་བཞིའི་འཁོར་བ་དོང་སྤྲུག་ཤོག །ཅེས་པའང་བློ་གྲོས་མཐའ་ཡས་ཀྱིས་དབེན་པའི་གནས་སུ་སྦྱར་བ་དགེ་ལེགས་འཕེལ།། །།