༄༅།།ཨ་མ་དམ་པའི་དགོངས་རྫོགས་བསུ།། ཨེ་མ་ཧོ།། བྱམས་བརྩེ་མ་བཅོས་གཉུག་མའི་ཡེ་ཤེས་སྐུ།། འོད་གསལ་སྙིང་པོའི་ཤེས་རབ་འོད་དུ་འབར།། ནམ་ཡང་ནུབ་མེད་སེམས་ཀྱི་ཨ་མའི་དྲིན།། དྲིན་ལ་དྲིན་དུ་ཤེས་ནས་དགོངས་རྫོགས་བསུ།། ཨ་མ་ཨ་ཕའི་དགོངས་པ་དབྱིངས་ནས་དགྱེས།། མ་ལུས་འགྲོ་ལ་ཕན་བདེའི་དཔལ་ལ་རོལ།། ཨ་མའི་ཐུགས་སུ་བརྣག་པའི་འགྲོ་དོན་ཀུན།། ཀུན་བཟང་ཕྱམ་གཅིག་སངས་རྒྱས་མྱུར་ཐོབ་ཤོག། མཁའ་འགྲོ་བདེ་ཆེན་ལྷ་མོ་དང་པདྨ་ཚེ་བརྟན་ངོར་ཤྲཱིས་སོ།།25/2/26

ཤར་ཕྱོགས་རྟགས་བརྒྱད་འགྲོ་དོན་གཟི་བརྗིད་འབར།། ཨེ་མ་ཧོ༔ ༼༡༽ རིག་འཛིན་དབྱངས་ཅན་ལྷ་མོས་བྱིན་རླབས་ལས།། མཁྱེན་རབ་འཇམ་དཔལ་དགྱེས་པ་རྡོ་རྗེའི་རྩལ།། ཕན་བདེས་གདུགས་དཀར་ནུས་མཐུ་མཁའ་རུ་གཡོ།། འཁོར་འདས་བཀྲ་ཤིས་བདེ་ལེགས་ཕུན་ཚོགས་གྱུར།། ༼༢༽ ཨེ་ཝྃ་པདྨ་ཀ་རས་བདག་རྐྱེན་ལས།། རྩ་གསུམ་རྒྱལ་བའི་དབང་ལུང་མན་ངག་བསྩལ།། ཐུབ་བསྟན་རྒྱལ་མཚན་མི་ནུབ་དབྱིངས་ལ་བསྒྲེངས།། ཞིང་ཀུན་བཀྲ་ཤིས་བདེ་ལེགས་ཕུན་སུམ་ཚོགས།། ༼༣༽ དབང་ཆེན་པདྨ་དགྱེས་པའི་རྡོ་རྗེའི་གར།། ཨེ་ཝྃ་རིག་པའི་སྒྱུ་འཕྲུལ་དྲྭ་བའི་དཔལ།། ཀུན་མཁྱེན་བུམ་བཟང་འཛམ་གླིང་རྒྱན་དུ་གཏམས།། ཟངས་རིའི་བཀྲ་ཤིས་བདེ་ལེགས་ཕུན་སུམ་ཚོགས།། ༼༤༽ མཁས་ལེགས་ཏཱ་རས་བྱམས་བརྩེ་དད་མོས་མཐུས།། རིག་འཛིན་བརྒྱུད་པའི་གསེར་བཟང་ཤིང་རྟ་ཆེ།། ཡིད་བཞིན་ནོར་བུ་པདྨ་དཀར་པོའི་གཤིས།། སྣང་སྲིད་བཀྲ་ཤིས་བདེ་ལེགས་ཕུན་སུམ་ཚོགས།། ༼༥༽ ཨཱརྱ་ཏཱ་ར་སྐུ་གསུམ་མཁའ་འགྲོ་ཡིས།། གསེར་གླིང་གནས་སུ་གསེར་ཆོས་བསྐོར་བར་བསྐུལ།། ཀུན་ཁྱབ་ཆོས་དུང་དཀར་པོའི་སྒྲ་སྙན་ཉིད།། ཡུལ་མཚོ་བཀྲ་ཤིས་བདེ་ལེགས་ཕུན་སུམ་ཚོགས།། ༼༦༽ མཁའ་འགྲོ་ཡེ་ཤེས་མཚོ་རྒྱལ་ཐུགས་རྗེའི་སྟོབས།། ཐེག་ཀུན་ཁྱབ་བརྡལ་རྫོགས་པ་ཆེན་པོའི་གླིང་།། འགྱུར་མེད་གཡུང་དྲུང་དཔལ་བེའུའི་རི་མོར་ཤར།། བསྟན་སྲིད་བཀྲ་ཤིས་བདེ་ལེགས་ཕུན་སུམ་ཚོགས།། ༼༧༽ གསུམ་ལྡན་འབྱུང་བའི་རྟ་མཆོག་གོམས་འགྲོས་ལས།། སྟག་སེང་ཁྱུང་འབྲུག་ཕྱོགས་དུས་རྒྱལ་བའི་སྟོབས།། ཟབ་རྒྱས་ཆོས་ཀྱི་འཁོར་ལོ་རྟག་ཏུ་བསྐོར།། རྒྱལ་བསྟན་བཀྲ་ཤིས་བདེ་ལེགས་ཕུན་སུམ་ཚོགས།། ༼༨༽ མཁྱེན་བརྩེ་ཡེ་ཤེས་སྤྱན་བཟང་འདབ་མ་ཡངས།། བཀའ་གཏེར་མན་ངག་མཛོད་ལ་དབང་འབྱོར་བས།།…