གདོད་མའི་མགོན་པོ་མི་ཕམ་རིན་པོ་ཆེ་རྗེས་སུ་དྲན་པ་བཅོས་མིན་དད་པའི་གདུང་དབྱངས། ༡ རྒྱལ༵་ཀུན་མཁྱེན་པའི་མེ་ལོང་དྷཱིཿཡིག་མཚན།།རྒྱལ༵་བསྟན་དུས་ཀུན་གསལ་བྱེད་དམར་སེར་འཆང་།།རྒྱལ༵་སྲས་རིགས་གསུམ་སེམས་དཔའི་སྒྱུ་འཕྲུལ་བ།།རྒྱལ༵་དབང་མཚོ་སྐྱེས་བརྒྱུད་པར་བཅས་ལ་བསྔགས།། ༢དྲི༵་མེད་དྭངས་གཙང་འོ་མའི་མཚོ་གླིང་ནས།།དྲི༵་བྲལ་གཟི་དཔལ་བཀྲ་བའི་ཆུ་ཤེལ་དབང་།།དྲི༵་མའི་མུན་ཚོགས་གཏིང་ནས་ཡོངས་གསལ་བ།།དྲི༵་མེད་སྣང་གཏེར་མཚོ་སྐྱེས་བླ་མ་རྒྱལ།།༣གང༵་གི་བུ་སློབ་གསེར་རིའི་ལྷུན་པོའི་ཕྲེང་།།གང༵་ཞིག་སྨྲ་བའི་རྒྱལ་པོ་འཇིགས་བྲལ་བ།།གང༵་སྣང་བརྡ་དང་དཔེ་རུ་ཤར་གཟིགས་པ།།གང༵་ཞིག་མི་ཕམ་མི་ཡི་སེང་གེར་བསྔགས།།༤གངས་རིའི་མེ་ཏོག་འཛུམ་པའི་ས་ཡི་ཆར༵།།ཆར༵་ལྡན་ཟླ་ཀླུང་གཡུ་འབྲུག་ནོར་བུའི་ཚལ༵།།སྣོད་བཅུད་དགེ་བའི་ལེགས་ཚོགས་འཕེལ་བའི་གནས།།ཞིང༵་འདིར་ངོ་མཚར་སྐུ་ཡི་མེ་ཏོག་བཞད།།༥ཆུང་ནས༵་དད་དང་ངེས་འབྱུང་ནོར་གྱིས་ཕྱུག།ཡེ་ནས༵་ཐབས་དང་ཤེས་རབ་ཟུང་དུ་འཇུག།གདོད་ནས༵་ཆོས་སྐུའི་ངོ་བོར་སངས་རྒྱས་པ།།སྐྱེ་ནས༵་ཕྲེང་བར་མཛད་འཕྲིན་མཁའ་དང་མཉམ།།༦སྨྲ་བའི་སེང་གེའི་ཞལ་གཟིགས་ཁྱེད་ལ༵་ཐོབ། ། འཇམ་དབྱངས་མཁྱེན་བརྩེའི་ཐུགས་རྒྱུད་སྙིང་ལ༵་འཕོས། ། བློ་གཏེར་དབང་པོའི་བྱིན་རླབས་ཡིད་ལ༵་སྨིན། ། མི་ཕམ་འཇམ་པའི་དབྱངས་ལ་གསོ༵ལ་བ༵་འདེ༵བས། ། ༧གཏེར་སྟོན་བསོད་རྒྱལ་ཨ་འཛོམས་འབྲུག་སྤྲུལ་རྗེ༵། ། རྫོགས་སྤྲུལ་ལྔ་བ་དཔལ་སྤུངས་སི་ཏུ་རྗེ༵། ། ཀུན་བཟང་དཔལ་སོགས་གྲུབ་པའི་དབང་ཕྱུག་བཅས། །ཡབ་རྗེ་མི་ཕམ་མགོན་པོར་གསོ༵ལ་བ༵་འདེ༵བས། ། ༨བྷོ་ཊའི་མཁས་དབང་སྟོང་གིས་ཟླ་བྲལ་བ། ། དཔལ་རིའི་དགེ་བཤེས་བློ་བཟང་ར༵བ་གསལ་ལ། །བརྒལ་ལན་རྩོད་ལ་རིག་པའི་དཔའ་བོ་མཆོག ། མི་ཕམ་འཇམ་དབྱངས་བླ་མར་གསོ༵ལ་བ༵་འདེ༵བས། ། ༩རྒྱབ་བརྟེན་ལུང་གི་མདུན་ནས་ཁྱེད་མི༵་ཕམ༵། ། དམ་བཅའ་རྡོ་རྗེའི་ཁྲི་ལས་ཁྱེད་མི༵་ཕམ༵། ། རིགས་འཕྲུལ་ཁྲི་མ་འབུམ་གྱིས་ཁྱེད་མི༵་ཕམ༵། ། མི་ཕམ་ཡིད་བཞིན་ནོར་བུར་གསོ༵ལ་བ༵་འདེ༵བས། །༡༠སྤོབས་པ་གླང་པོའི་སྟོབས་ཀྱིས་ཁྱེད་མི༵་ཕམ༵། ། གཟི་བརྗིད་སེང་གེའི་འགྱིང་གིས་ཁྱེད་མི༵་ཕམ༵། ། ཐལ་ངག་ལྕགས་ཀྱི་སྡེར་མོས་ཁྱེད་མི༵་ཕམ༵། ། མི་ཕམ་ཐམས་ཅད་མཁྱེན་པར་གསོ༵ལ་བ༵་འདེ༵བས། ། ༡༡འཇམ་དཔལ་དྲག་པོས་མི་དང་མི་བཞི༵ན་རྩེད། ། གེ་སར་སྐྱེས་བུ་ལུས་དང་གྲིབ་བཞི༵ན་འགྲོགས། །ཆོས་སྐྱོང་དགྲ་ལྷས་མ་དང་བུ་བཞི༵ན་སྲུང་། །རྩ་གསུམ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༢ངོ་བོ་ཆོས་སྐུ༵་དྲུག་པ་རྡོ་རྗེ་འཆང་། །རང་བཞིན་ལོངས་སྐུ༵་རྒྱན་དང་དཔེ་བྱད་ཅན། །སྣ་ཚོགས་སྤྲུལ་སྐུ༵་གང་ལ་གང་འདུལ་བ། །སྐུ༵་གསུ༵མ་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༣ཡེ་ན༵ས་སངས་རྒྱས་གོ་འཕང་མངོན་དུ་གྱུར། ། རིང་ན༵ས་ཆོས་ཀྱི་བདེན་པ་ཐུགས་ལ་གཏམས། ། གདོད་ན༵ས་རྒྱལ་སྲས་འཕགས་པའི་ཚུལ་འཛིན་པ། །དཀོན་མཆོག་ཀུན་འདུས་ཁྱེད་ལ་ཕྱ༵ག་འཚ༵ལ་ལོ༵། །༡༤ཁྱེད༵་ཀྱི་ཡོན་ཏན་གངས་རི་ལས་ཀྱ༵ང་མཐོ། ། ཁྱེད༵་ཀྱི་བཀའ་དྲིན་ས་འཛིན་ལས་ཀྱ༵ང་བརྗིད། །ཁྱེད༵་ཀྱི་མཁྱེན་རྒྱ་ནམ་མཁའ་ལས་ཀྱ༵ང་ཆེ། །མཁྱེན་གཏེར་ནོར་བུའི་མཛོད་ལ་ཕྱ༵ག་འཚ༵ལ་ལོ༵། །༡༥སྤྱིར་ན་ཤཱཀྱའི་བསྟན་ལ་བཀའ་དྲིན་ཆེ༵། །ལྷག་ཏུ་སྔ་འགྱུར་ཡོངས་ཀྱི་མགོན་གཅིག་པུ།…

གཏེར་ཆེན་རིག་འཛིན་པདྨ་དྲག་སྔགས་གླིང་པའི་རྣམ་ཐར་གེ་སར་སྙིང་པོ།ན་མོ་གུ་རུ་བུདྡྷ་ཛྙཱ་ན་ཡེ།།པདྨའི་ཐུགས་སྲས་སངས་རྒྱས་ཡེ་ཤེས་རྩལ།།པདྨའི་བཀའ་གཏེར་མཛོད་ལ་མངའ་དབང་བསྒྱུར།།པདྨའི་རྒྱལ་ཚབ་གསུམ་ལྡན་རྡོ་རྗེ་འཛིན།།པདྨ་དྲག་སྔགས་གླིང་པས་དགེ་ལེགས་སྩོལ།།སྙིགས་དུས་བསྟན་པ་སྤེལ་ལ་ཟླ་བྲལ་བ།།གཏེར་ཆེན་པདྨ་དྲག་སྔགས་གླིང་པ་ཡི།།གསང་གསུམ་རྣམ་ཐར་རྒྱ་མཚོ་ཆེན་པོ་ལས།།སྐྲ་རྩེའི་ཐིགས་ཙམ་དད་པའི་རྒྱན་ཏུ་སྤྲོ།།དེ་ཡང་གཏེར་ཆེན་དམ་པ་རིག་འཛིན་པདྨ་དྲག་སྔགས་གླིང་པའི་ཐུན་མོང་དང་ཐུན་མིན་གསང་བའི་མཛད་པ་རྒྱ་མཚོ་ལྟ་བུ་མཆིས་པ་ལས་འདིར་སྐྲ་རྩེའི་ཐིགས་ཙམ་ཅུང་ཟད་བསྡུས་ཏེ་བཤད་པ་ལ་གསུམ་ལས། དང་པོ་སྐུ་སྐྱེས་རབས། གསུང་གི་མཛད་པ། ཐུགས་རྗེའི་ཕྲིན་ལས་བཅས་ཡོད་པ་ལས། དང་པོ་གཏེར་ཆེན་རིག་འཛིན་པདྨ་དྲག་སྔགས་གླིང་པ་ནི་ཨ་ལྕགས་འབྲི་ཡི་རྒྱུད་པ་དཔའ་མཛངས་དང་རིགས་བཟང་ལས་བྱུང་བའི་འབྲི་ལྷ་རྒྱལ་རུས་པ་གཙང་པའི་མཆེད་པ་ཨ་སྐྱོང་ཁག་གསུམ་ཞེས་ཡོངས་སུ་གྲགས་པའི་མངའ་སྡེ་མང་དུ་མཆིས་པ་ལས། སྟག་ཐོག་རིན་ཆེན་མགོན་པོ་ཤེས་འཇམ་དཔལ་གཤིན་རྗེ་གཤེད་ཀྱི་བཀའ་བབས་གནོད་སྦྱིན་ཤན་པ་དམར་པོའི་སྤྲུལ་སྐུ་ཡིན་པ་སྡུག་ལ་འཛེམ་ཤིང་ཆོས་ལ་དགའ་བ། དཔའ་རྩལ་དྲུག་ཅུ་རྩ་བཞི་ལྡན་པའི་ཡ་རབས་ཀྱི་མི་རྒྱུད་དུ་ཡོངས་སུ་གསལ་བའི་ཡབ་མཆོག་དང་། ཡུམ་ཆེན་ཨ་སྐྱོང་ཁང་རྒན་དཔོན་་གྱི་སྲས་མོ་རིག་བྱེད་སྒྲོལ་མ་གཉིས་ཀྱི་སྲས་སུ་རབ་བྱུང་བཅོ་ལྔ་བའི་བགྲང་བྱ་དྲུག་པ་ཆུ་ཁྱི་སྟེ། སྤྱི་ལོ་༡༩༢༢་༥་༡ ལ། རྒྱལ་དབང་པདྨ་འབྱུང་གནས་ཀྱི་ཐུགས་སྲས། གནུབས་ཆེན་སངས་རྒྱས་ཡེ་ཤེས་ཀྱི་སྒྱུ་འཕྲུལ་རྣམ་པར་རོལ་བ། གླིང་དཀར་ལྷ་སྲས་དགྲ་ལྷ་རྩེ་རྒྱལ་གྱི་རོལ་གར། ཕྱི་མའི་དུས་སུ་སྤྲུལ་བའི་གཏེར་སྟོན་དང་མཁས་གྲུབ་སྐྱེས་བུ་དུ་མའི་རིགས་སུ་རྫུ་འཕྲུལ་གྱི་རིགས་སུ་ཅིག་ཆར་དུ་བསྟན་དང་འགྲོ་བའི་དཔལ་མགོན་དུ་ཐུགས་བསྐྱེད་སྨོན་ལམ་བསམ་གྱིས་མི་ཁྱབ་པའི་མཛད་ཕྲན་ཅན་གྱི་ཡ་གྱལ། སྤྲུལ་བའི་གཏེར་སྟོན་ཆེན་པོ་པདྨ་དྲག་སྔགས་གླིང་པ་ཉིད་ཕྱི་ནང་གསང་བའི་རྟེན་འབྲེལ་ལེགས་པའི་ལྟས་བཟང་བཅས་མཚན་དཔེའི་གསེར་ཞལ་སྙིགས་དུས་མུན་པ་བསལ་བའི་བགོ་སྐལ་དུ་སྐུ་འཁྲུངས། གཞན་ལས་ལོ་སྐྱེད་ལས་ཟླ་སྐྱེས་འཚར་བའི་ལང་ཚོ་དང་ལྷན་སྐྱེས་སུ་སྐྱེ་བ་དྲན་པ་དང་ལྷ་ཀླུ་མི་མ་ཡིན་མཐོང་བ་སོགས་བསམ་ཡུལ་ལས་འདས་པའི་མངོན་ཤེས་དང་གྲུབ་རྟགས་མཛད།གཉིས་པ་ནི། སྤྱི་ལོ་༡༩༢༩་དེ་དགུང་གྲངས་བདུན་ནས་ཡི་གེ་འབྲི་ཀློག་སོགས་ཐོགས་མེད་དུ་མཁྱེན། ཡབ་ལས་ཆོ་ག་ཆོས་སྤྱོད་ལ་བྱང་ཆུབ་པར་གྱུར། ཆུ་ཆེན་དང་ཤུག་གསེབ་དང་རི་རྩེ་རུ་གུ་རུ་རིན་པོ་ཆེ་སྒོམ་གྱིན་ཡིན་གསུངས་ནས་ཉིན་གང་བོར་དབེན་པར་ཁོ་ན་དགྱེས་པས་སྒོམ་ཆེན་དུ་གྲགས། ལོ་ནས་ལོར་རྟག་པར་དེ་དེ་བཞིན་དུ་མཛད།སྤྱི་ལོ་༡༠༣༧་ལོའམ། དགུང་གྲངས་བཅོ་ལྔའི་སྐབས་སུ་གློ་བུར་དུ་ངེས་འབྱུང་དྲག་པོ་ཞིག་གིས་ཐུགས་རྒྱུད་བསྐུལ་ནས་དཔལ་སྔ་འགྱུར་ཆོས་གྲྭ་ཆེན་པོ་རྡོ་གྲུབ་སྒར་དུ་ལོ་གསུམ་བཞུགས་ནས་བརྩོན་པ་དྲག་པོས་སློབ་གཉེར་མཛད་ནས་སྦྱངས་བ་མཐར་ཕྱིན་པ་དང་།སྤྱི་ལོ་༡༩༣༩ལོ་འམ་དགུང་གྲངས་བཅུ་བདུན་ལ་སོན་སྐབས་སུ་ཨ་པང་གཏེར་ཆེན་རིག་འཛིན་ཨོ་རྒྱན་ཕྲིན་ལས་གླིང་བའི་མདུན་དུ་བྱོན་ནས་གསང་སྔགས་ཕྱི་ནང་གསང་བའི་དབང་ལུང་མན་ངག་རྫོགས་པ་ཆེན་པོའི་མན་ངག་ཆིག་རྒྱུད་ཐམས་ཅད་བུམ་པ་གང་བྱོའི་ཚུལ་གྱིས་གསན་བསམ་སྒོམ་པར་མཛད།སྤྱི་ལོ་༡༩༤༥་ལོ་འམ་དགུང་གྲངས་ཉེར་གསུམ་སྟེང་མཁྱེན་བརྩེ་ཆོས་ཀྱི་བློ་གྲོས་ཀྱི་དྲུང་ནས་ཅིག་ཆར་བསྙེན་པར་རྫོགས་ཞིང་ཆོས་དང་གདམས་ངག་ཆ་ཚང་ཞུས་ཏེ་དཀའ་སྤྱད་དང་ཐུགས་སྨོན་རྒྱ་ཆེར་མཛད་ནས་ཕྱག་གཡོན་གྱི་སྲིན་མཛུབ་ཀྱང་མར་མེར་སྒྲོན་པ་སོགས་གཟུངས་སྤོབས་རླབས་ཆེན་དང་ངོ་མཚར་གྱི་བཀོད་པར་བསམ་ཡུལ་ལས་མཛད་པར་སྣང་ངོ་།སྤྱི་ལོ་༡༩༤༧་ལ་འམ་དགུང་གྲངས་ཉེར་ལྔ་ལ་འཇམ་དབྱངས་མཁྱེན་བརྩེ་རྡོ་རྗེ་འཆང་གིས་གནུབས་ཆེན་སངས་རྒྱས་ཡེ་ཤེས་ཀྱི་སྐྱེ་སྲིད་ཡིན་པ་དང་། རྒྱལ་དབང་པདྨ་ཀ་རའི་རྒྱལ་ཚབ་ཟབ་མོ་གཏེར་གྱི་གཏེར་གྱི་བཀའ་བབས་ཡིན་པར་གསལ་བར་གསུངས་ཏེ། རྟེན་བསྒྱུར་སྔགས་ལམ་ལ་ཞུགས་དགོས་པར་ལྡོག་མེད་ཀྱི་བཀའ་ལུང་སྤྱི་གཙུག་ཏུ་བབས་པ་དང་། གསང་མཚན་ལ་པདྨ་རང་གྲོལ་རྩལ་གནང་ཞིང་། གཏེར་སྟོན་གྱི་མཚན་ལ་པདྨ་དྲག་སྔགས་གླིང་པ་ཞེས་གསོལ་ནས། ཞབས་བརྟན་སྨོན་ཚིག་དང་གསོལ་འདེབས་ཚིགས་སུ་བཅད་པ་འདི་ཡང་གསུངས།ཨེ་མ་ཧོ།རིག་འཛིན་ཨོ་ཌཱི་ཡ་ནའི་སྒྱུ་འཕྲུལ་གར།།པད་འབྱུང་ཆོས་གཏེར་རྒྱ་མཚོས་གཏེར་རྒྱ་ཐོབ།།མཛད་དཀའ་རྒྱལ་བའི་སྲས་ཀྱི་སྤྱོད་པ་ཅན།།པདྨ་དྲག་སྔགས་གླིང་པར་གསོལ་བ་འདེབས།།ཞེས་སྐུ་གསུང་ཐུགས་རྟེན་བཅས་གནང་བ་དང་། མཁྱེན་བརྩེ་རིན་པོ་ཆེ་དང་། ཉིད་ཀྱི་སྐུ་མཆེད་སྣང་མཛད་གྲུབ་པའི་རྡོ་རྗེ་སོགས་ཀྱིས་བརྟག་བསྒྲིག་མཛད་ནས་ཤཱཀྱ་དེ་ཝའི་རྣམ་འཕྲུལ་འཇིགས་མེད་དཔལ་སྒྲོན་ནམ་པདྨ་གར་དབང་དཔལ་མོ་དང་། མནྡ་ར་ཝའི་སྤྲུལ་པ་གླིང་དཀར་བསོ་ཚེ་འབྱུང་གནས་ཀྱི་སྲས་མོ་འཇིགས་མེད་ཆོས་སྒྲོན་གཉིས་ཀྱང་ཁབ་ཏུ་བཞེས། ཁྱད་དུ་རིག་མ་མནྡ་ར་ཝའི་རྣམ་སྤྲུལ་དང་ཐབས་ཤེས་ཟུང་དུ་འབྲེལ་བས་ཟབ་གཏེར་གྱི་སྒོ་འཕར་བདེ་བླག་ཏུ་ཕྱེ་བའི་ཐོག་མའི་སྐབས་སུ་མཁྱེན་བརྩེ་རིན་པོ་ཆེ་དང་། རྒྱལ་བ་ཞེ་ཆེན་རབ་འབྱམས་རིན་པོ་ཆེ་སོགས་འཁོར་སློབ་སུམ་བརྒྱ་ལྷག་གི་དབུས་སུ་གུ་རུ་པདྨའི་ཚེ་བུམ་རྣམ་པ་དུང་དཀར་རིང་བསྲེལ་གྱིས་ཕྱུར་བུར་གཏམས་པ་སྤྱན་དྲངས་པ་མཁྱེན་བརྩེའི་རྟེན་ཁྲོད་དུ་བཞུགས། འཇམ་དཔལ་དབྱངས་དང་དབྱངས་ཅན་ཀྱི་རང་བྱུང་སྐུ་སོགས་དང་། གཞན་ཡང་། ཡེ་ཤེས་མཚོ་རྒྱལ་གྱི་རཀྟའི་སྒྲོམ་བུ་བརྡ་ཡིག་གིས་མཚན་པ་ཅན་དུ་མ་དང་། གེ་སར་བླ་རྡོ། ནད་སེལ་ཨ་རུ་རྣམ་རྒྱལ་སོགས་སྐུ་གསུང་ཐུགས་རྟེན་གྲངས་མང་དག་ས་གཏེར་བཞེས།གསུམ་པ་ནི།བླ་རྫོགས་ཐུགས་གསུམ་ལས་དང་པོ་བླ་མའི་རྣལ་འབྱོར་ལ། རིག་འཛིན་བླ་མའི་བསྒྲུབ་པ་དགོངས་བརྒྱུད་སྙིང་པོ་ཆིག་དྲིལ། རང་རིག་བླ་མའི་གསང་སྒྲུབ། དུས་འཁོར་བླ་མའི་རྣལ་འབྱོར། སྤྲོས་མེད་ཨ་ཏིའི་ལུགས་ཀྱི་གུ་རུ་དྲག་པོའི་ལུས་དཀྱིལ།…

དབྱིན་ཡུལ་གྱི་གངས་ལྡན་རི་བོ།།ཨེ་མ་ཧོ།།རི་བོ་མཐོ་ཞིང་རི་རྩེ་དགུང་དང་མཉམས།།རི་མགུལ་ཡངས་ཤིང་རིའི་མཐར་ནགས་ཀླུང་མཛེས།།རི་རབ་ལྷུན་པོའི་གཡས་གཡོན་རི་ཕྲན་ཀུན།།རི་རྒྱལ་དཔོན་ལ་དཔུང་གིས་བསྐོར་བཞིན་གསལ།།རི་ལུང་དག་གཙང་ནེའུ་གསེང་སྨན་ལྗོན་ལ།།མཚོ་དང་མཚོའུ་པའི་ཕྲེང་བ་ཡིད་དུ་འོང་༎རང་བྱུང་སྨན་དང་མེ་ཏོག་དྲི་བཟང་འཐུལ༎ཕྱི་ནང་ཀུན་བཟང་སེམས་ཀྱི་དག་ཞིང་སྟེ༎ འཁྱམས་པོའི་ཚེ་མཇུག་སྐྱེལ་སའི་དགོན་པར་ལགས།།གོང་ན་དཔོན་མེད་བར་དོའི་འཁྲུག་རྩོད་དབེན།།བདག་ལ་དབང་བའི་ས་ཞིང་ཨེ་ཀལ་བརྒྱའ།།ལྷན་སྐྱེས་བཟའ་བཅའ་བཏུང་བའི་རྩི་ཤིང་རིགས།།ཅི་དགོས་འཕང་མེད་ལོངས་སུ་སྤྱོད་པར་ཡོད།།རྩ་གསུམ་བསྙེན་པའི་རྔ་ཏིང་རོལ་དབྱངས་དང་།།རྙེད་དཀའི་ལུས་སེམས་ཞི་བདེ་འབྱུང་བའི་གནས།།ཨེ་ཝཾ་རྫོགས་ཆེན་དུས་འཁོར་ཆོས་གླིང་དུ་།།འཁོར་འདས་བདེ་སྐྱིད་འབད་མེད་ལྷུན་གྲུབ་ཡོད།།སངས་རྒྱས་བསྟན་པའི་རྒྱལ་ས་འདི་ནས་ཟིན།།དམ་ཆོས་བདེན་པའི་རྒྱལ་རྔ་འདི་ནས་བརྡུངས།།དགེ་འདུན་དཀོན་མཆོག་བཤད་སྒྲུབ་འདི་ནས་དར།།སྔ་འགྱུར་བསྟན་པའི་རྒྱལ་མཚན་བསྒྲེངས་གྱུར་ཅིག།།ཅེས་པ་འདི་ཡང་རབ་གནས་ས་ཕག་ས་ག་ཟླ་བའི་གནམ་སྟོང་ཉི་འཛིན་ཨ་ཧྥུ་རི་ཀ་ནས་སྒྲ་གཅན་ལས་གྲོལ་མ་ཐག་ཏུ་མཁའ་འགྲོ་རིག་འཛིན་དབྱངས་ལྷ་མོས་བསྐུལ་ངོར་གདན་ས་དེ་ཉིད་ནས་ཤྲཱིཿསྨྱོན་ཨེ་མ་ཧོས་བགྱིས་པར་དགེའོ།།

འཇུ་མི་ཕམ་རྣམ་རྒྱལ་རྒྱ་མཚོ་ལ་ན་མོ།།ན་མོ་གུ་རུ་ཨ་ཛི་ཏ་བི་ཛ་ཡེ།།ཀ་དག་དབྱིངས་ཆེན་ལ་གཟིམས་འཇམ་གནང་ཡང་།།ལྷུན་གྲུབ་འོད་གསལ་གྱི་མལ་སའི་དཀྱིལ་ནས།།ཟུང་འཇུག་བདེ་ཆེན་གྱི་རྟུལ་ཞུགས་སྤྱོད་པ།།འཇུ་རིགས་དཔའ་བོ་ལ་རིག་མས་སྒུག་ཡོད།།དད་གུས་འདོད་གདུང་ཉིད་ཁྱེད་ལ་ཕྱོགས་པས།།བློ་གྲོས་དགའ་མ་ལ་ཕྱག་རྒྱ་ཆེན་པོས།།སོ་གཉིས་ལང་ཚོ་ཡིས་སྤྲོ་དགས་རོལ་ནས།།ཉེར་གཅིག་མདུད་པ་ཉིད་ངང་གིས་གྲོལ་ཐལ།།ལྟ་བ་རྫོགས་ཆེན་ལ་བལྟད་མོར་བལྟ་ཞོར།།སྒོམ་པ་ཕྱག་ཆེན་ལ་བདེ་དྲོད་འབར་ནས།།སྤྱོད་པ་དབུ་སེམས་ལ་ཕྱིན་དྲུག་བརྩོན་སྟེ།།འབྲས་ཆོས་ཉེར་ལྔ་ལ་ཅི་དགར་ཕྱིན་འགྲོ།།ཞེས་པ་འདི་ཡང་རབ་གནས་ས་ཕག་ས་ག་ཟླ་བའི་ཉེར་དགུའི་ཉིན་ནམ་མི་ཕམ་རིན་པོ་ཆེའི་དགོངས་རྫོགས་སྐབས་མཁའ་འགྲོ་པདྨ་གཡང་འཛོམས་ངོར་འཇམ་དཔལ་དགྱེས་པ་རྡོ་རྗེ་རུ་འབོད་པས་ཨེ་ཝཾ་ཀུན་བཟང་རི་ཁྲོད་ཀྱི་མཚོ་རྒྱལ་བླ་མཚོའི་ཁ་ནས་སྨོན་པར་དགེའོ།། །།

༄༅། །སྐྱིད་གླུ་བཞུགས་སོ། །སངས་རྒྱས་ཀུན་དངོས་བརྒྱུད་གསུམ་བླ་མ་ཡི་དགོངས་བཅུད། །བསྟན་པའི་སྙིང་པོ་ནང་རྒྱུད་སྡེ་གསུམ་གྱི་ཟབ་གནད། །མ་ནོར་ལེགས་པར་འཛིན་མཛད་མཆོག་ཚོགས་ཀྱི་འདུས་པ། །ཕན་བདེའི་འབྱུང་གནས་ཡིད་བཞིན་དབང་མཆོག་གི་རྒྱལ་པོ། །གཙུག་ཏུ་བཀོད་ནས་སྐལ་ལྡན་བདག་ཉིད་དང་བདག་འདྲའི། །ལེགས་སྨོན་དུས་སུ་སྨིན་པའི་བློ་ལྡན་གྱི་ཚོགས་སུ། །རང་སྙེམས་ཞེན་པ་མེད་པའི་བདེན་གཏམ་གྱི་རང་བཞིན། །ཉམས་དབྱངས་སྐྱིད་གླུ་ལེན་ནོ་ཤེས་ལྡན་གྱི་གྲོགས་པོ། །སྙིགས་མ་ལྔ་པོ་བདོ་བ་དེང་སང་གི་དུས་ན། །བསྒྲིམ་བསྒྲིམ་ཇི་ལྟར་འབད་ཀྱང་རྩོལ་བཅས་ཀྱི་ཐེག་པས། །ཤིན་ཏུ་གདུལ་བར་དཀའ་ཡང་རྩོལ་མེད་ཀྱི་ཉམས་ལེན། །ཆོས་ཕུང་བརྒྱད་ཁྲིའི་འགགས་མདུད་རང་གྲོལ་དུ་གཏོང་བ། །སྙིང་དབུས་མི་ཟད་ཆོས་ཀྱི་གཏེར་སྒོ་དེ་འབྱེད་པའི། །ལམ་མཆོག་འདི་དང་ལྡན་ན་ནགས་ཚལ་ལ་མེ་བཞིན། །སྙིགས་མའི་རྐྱེན་ངན་སྣ་ཚོགས་ལམ་ཁྱེར་དུ་ནུས་པའི། །རྣལ་འབྱོར་སྐལ་ལྡན་དེ་ཚོ་སྐྱིད་པ་ཡི་རབ་མཆོག །ཕ་མེས་རིག་འཛིན་བརྒྱུད་པའི་ཕ་འབབ་ལ་བརྟེན་ཏེ། །གཞན་གྱིས་བསྐལ་མང་འབད་པས་བསྒྲུབ་ནའང་དཀའ་བའི། །སྲིད་གསུམ་འཁོར་བའི་གཡང་ས་རིག་རྩལ་གྱིས་གཅོད་ཅིང་༌། །གྲུབ་མཆོག་རིག་འཛིན་དཔའ་བོའི་དགའ་ཚལ་ལ་ཡུད་ཀྱིས། །མཁའ་ལ་ཁྱུང་ལྡིང་བཞིན་དུ་གཅིག་རྗེས་གཅིག་སླེབ་པའི། །གྲུབ་བརྙེས་བརྒྱུད་ལྡན་བླ་མའི་གྲལ་རིམ་ལ་བསམ་ན། །གྲལ་མཐའི་བཙུན་ཆུང་བདག་ཀྱང་ཉམས་དགའ་ཡི་ངང་ནས། །སྐྱིད་པའི་གླུ་ཆུང་ལེན་སྙིང་འདོད་པ་ཞིག་བྱུང་ངོ་༌། །གཟུང་འཛིན་ཚ་དབལ་འཁྲུགས་པའི་ཀུན་རྟོག་གི་སེམས་ལ། །ཅིར་བྱས་ཅིར་མི་ལོ་བའི་རང་གཤིས་སུ་ཤོར་བས། །མང་ཐོས་མང་སྨྲ་མང་དུ་བསམ་པ་ཡི་སྐྱེ་བོ། །མང་ཞིག་ཚོགས་ཀྱང་དམུས་ལོང་རྣམས་ཀྱིས་ནི་ཉི་ཟླ། །ཇི་བཞིན་ཕྱོགས་ཙམ་མི་ཤེས་ཆོ་ངེ་རང་སྒྲོག་མོད། །བརྒྱུད་ལྡན་བླ་མའི་མན་ངག་ཡིད་གཏིང་དུ་ཁེལ་བས། །བློ་འདས་ཡེ་ཤེས་རྩི་སྨན་ཅུང་ཟད་ཅིག་ཐེབས་པས། །མ་གོམས་དེ་གར་ལུས་ཀྱང་སྐྱིད་པོ་རང་འདུག་གོ །རིགས་གསུམ་རྒྱལ་བ་འདུས་པའི་ངོ་བོ་ཡི་བླ་མ། །མཚན་ཙམ་དྲན་པས་བྱིན་རླབས་ཆར་སྤྲིན་ལྟར་གཡོ་བ། །བོད་ལ་བཀའ་དྲིན་མཚུངས་མེད་རིག་འཛིན་གྱི་སློབ་དཔོན། །མཚོ་སྐྱེས་རྡོ་རྗེའི་ཞབས་པད་འདོད་འབྱུང་གི་ནོར་བུ། །སྤྱི་བོའི་གཙུག་ཏུ་བསྒོམ་པའི་སྐལ་བཟང་འདི་ཐོབ་པ། །ལྷ་སྐལ་ཆད་པའི་དད་མེད་འགའ་ཞིག་ལ་བསམ་ན།…