ཨེ་ཝྃ་ཧོ།

༧རྗེ་བཙུན་སྨྲ་བའི་སེང་གེའི་བསྟོད་པ་ཀུན་སྐྱོབ་མཐུ་ལྡན་གྱི་འགྲེལ་བ་ཉུང་ངུ་གསར་བུ་འཇུག་པའི་ལམ་བཟང་། ཨེ་མ་ཧོ། ཀུན་སྐྱོབ་མཐུ་ལྡན་བློ་གྲོས་གཏེར་འཛིན་སྨྲ་བའི་སེང་གེ་ཐུགས་རྗེ་ཅན། ཞེས་པས། ཨེ་མ་ཧོ་ནི་ངོ་མཚར་ཆེ་བའི་སྒྲ་སྟེ་གཟི་བརྗིད་ཀྱི་ཆེ་བ་འདོན་ཕྱིར་བསྟོད་ཚིག་གི་ཐོག་མར་དྲངས་ཏེ། ཁམས་གསུམ་འཁོར་བའི་གནས་སུ་ཟོ་ཆུ་བཞིན་བརྒྱུད་པའི་སེམས་ཅན་ཀུན་ལ་སྐྱབས་དང་སྐྱབས་པ་ཆེན་པོ་སྟེ་མངོན་མཐོ་དང་ངེས་ལེགས་ཀྱི་ལམ་ངོགས་སྟོན་པའི་བྱིན་མཐུ་འམ་ནུས་པ་ལྡན་པ། ཇི་སྙེད་ཀུན་རྫོབ་ཀྱི་བོན་དང་ཇི་ལྟ་གནས་ལུགས་ཀྱི་བོན་སོགས་ཐམས་ཅད་གཟིགས་པའི་བློ་གྲོས་གང་གིས་སྤྱད་ཀྱང་འཛད་པ་མེད་པའི་གཏེར་གྱི་བང་མཛོད་འཛིན་ཞིང་། ཕྱི་ནང་གསང་བའི་ཐེག་སྒོ་གང་ཞིག་སྨྲ་བ་དང་དགྲོལ་བའི་གསུང་ལ་ཐོགས་རྡུགས་དང་འཇིགས་ཞུམ་མེད་པར་རྩལ་ཆེན་གྱི་སེང་གེ་ལྟ་བུའི་མཁྱེན་ཚད་ཀྱི་ཐུགས་དགོངས་དང་། འགྲོ་བ་ཀུན་ལ་བུ་གཅིག་གི་མ་ལྟར་བརྩེ་བའི་སྙིང་རྗེ་ཆེན་པོའི་བདག་ཉིད་ཅན་བསྟན་པ་དང་། མཚན་དཔེ་རབ་རྫོགས་གུར་གུམ་མདོག་དམར་ཞལ་གཅིག་ཕྱག་གཉིས་འཛུམ་དང་ལྡན། ཞེས་པ། གང་དེའི་སྐུ་ལ་མཚན་བཟང་སོ་གཉིས་དང་དཔེ་བྱད་བརྒྱད་ཅུ་མ་ཚང་བ་མེད་པར་རབ་ཏུ་མངའ་ཞིང་ཡོངས་སུ་རྫོགས་པ་དང་། གུར་གུམ་ཆུན་པོའི་མདོག་བཞིན་དམར་སེར་གྱི་མདངས་རྒྱས་ཤིང་གཞོན་ཚུལ་གྱི་ཉམས་དང་ལྡན་པའི་ཞལ་གཅིག་དང་། དོ་མཉམ་བདེན་གཉིས་མཚོན་པའི་ཕྱག་ནི་རྣམ་པ་གཉིས་སུ་གནས་ཤིང་། དྲག་དང་ཁྲོ་བོའི་ངང་ཚུལ་ལས་རིང་དུ་འདས་ཏེ་ཞི་ཞིང་དུལ་བའམ་དགྱེས་པ་ཆེན་པོའི་བཞད་མཛུམ་དང་ལྡན་པ་དང་། སྟོང་གསུམ་ཀུན་གྲགས་སྒྲ་རྒྱལ་འབྲུག་གི་ཁྲི་ལ་རོལ་པའི་འགྱིང་བག་ཅན། ཞེས་པས། སྟོང་དང་པོ་སྤྱི་ཕུད་ཀྱི་འཇིག་རྟེན་དང་། སྟོང་གཉིས་པ་བར་མའི་འཇིག་རྟེན། སྟོང་གསུམ་པ་མཐའ་ཐུག་གི་འཇིག་རྟེན་དང་གསུམ་སྟེ་འཇིག་རྟེན་ཀུན་ལ་སྙན་པའི་གྲགས་པ་ལྡིར་བའི་སྒྲ་ཡི་རྒྱལ་པོ་ཞེས་ངར་ཆེན་གཡུ་འབྲུག་གིས་བཏེགས་པའི་ཁྲི་འཕང་མཐོན་པོ་ལ་རོལ་པའམ་བཞུགས་པའི་གཟི་བརྗིད་འགྱིང་སྟབས་བག་ཕེབ་ཅིང་ཁོང་ལྷོད་པའི་ཚུལ་ཅན་དུ་གནས་ཤིང་། འཕྲུལ་ཆེན་ཡི་གེ་བཞི་བཅུས་རབ་སྤྲས་བཀྲ་གསལ་ནམ་བཟའ་ལེགས་པར་བགོས། ཞེས་པ། འཕྲུལ་གྱི་ཡི་གེ་ཆེན་མོ་སྟེ་ཞང་བོད་ཡི་གེ་ཀུན་གྱི་བྱུང་ཁུངས་སམ་མ་ཕྱི་དབྱངས་གསལ་བཞི་བཅུའི་གཟུགས་ཀྱི་རྣམ་པར་མཚན་པས་རབ་ཏུ་སྐྲས་པའི་དར་གྱི་སྟོད་གཡོག་སོགས་བཀྲ་ལ་གསལ་བའི་ནམ་བཟའ་སྐུ་ལ་ལེགས་ཤིང་འཚམ་པར་བགོས་པ་དང་། རྒྱུད་ལུང་མན་ངག་སྡེ་སྣོད་ཀུན་འབྱུང་གཏོ་ཡི་བཀའ་སྒྲོམ་རབ་ཏུ་འགེལ། ཞེས་སྟོན་པས་གསུངས་ཤིང་ཞུས་ལེན་དང་འབྲེལ་བའི་རྒྱུད་དང་། འཕགས་པས་བཀྲལ་ཏེ་གཏན་ཚིགས་སུ་ཆེ་བའི་ལུང་དང་། ཉུང་ལ་འདུས་ཤིང་མཛུབ་ཚུགས་སུ་སྟོན་པའི་མན་ངག་གི་སྡེ་གསུམ་པོ་གདུལ་བྱ་སྣོད་དང་ལྡན་པ་ཀུན་ལ་བྱུང་དང་འབྱུང་བའི་གཏོ་ཡི་བཀའ་སྒྲོམ་ཞེས་གསུང་རབ་ཀྱི་བཅུད་དུ་སྦ་བའི་སྣོད་སྒྲོམ་སྐུ་ཡི་རྒྱབ་ཕྱོགས་སུ་རབ་ཏུ་འགེལ་བའམ་འཁུར་བའི་རྣམ་ཅན་དང་། ཕྱག་གཡས་སྔོན་དམར་ཤེས་རབ་རལ་གྲིས་འཁྲུལ་རྟོག་བདག་འཛིན་རྩད་ནས་གཅོད། ཞེས་པས་ཕྱག་གཡས་ན་མཐིང་སྔོན་ནམ་མཁའི་མདངས་དང་ལྡན་ཞིང་རྩེ་མོར་དམར་ནག་མེ་རི་འབར་བས་བརྒྱན་པའི་ཤེས་རབ་ཀྱི་རལ་གྲི་རྣོན་པོས་འཁྲུལ་པའི་རྣམ་པར་རྟོག་པ་ཀུན་དང་རྩ་བ་བདག་གཞན་གཉིས་སུ་འཛིན་པའི་མ་རིག་བག་ཆགས་དང་བཅས་པ་རྩད་ནས་གཅོད་པའི་བརྡ་རུ་མཁའ་རུ་ཕྱར་བ་དང་། གཡོན་པའི་གསལ་བའི་སྒྲོན་མེས་འགྲོ་བ་མ་རིག་བློ་མུན་སེལ་བར་མཛད། ཞེས་པ། ཕྱག་གཡོན་པས་མེ་ཏོག་ཨུད་པ་ལའི་དཀྱིལ་དུ་གསལ་ལ་འོད་དུ་འཚེར་བའི་སྒྲོན་མེས་ཀུན་འབྱུང་ལས་ཉོན་དབང་གིས་འགྲོ་ཞིང་འཁྱམས་པའི་སེམས་ཅན་རྣམས་ཀྱི་ཡང་དག་གཤིས་ཀྱི་གནས་ལུགས་མ་རིག་རྨོངས་པའི་བློ་དབྱར་གྱི་ཤེའུ་མུན་འཁྲིག་པ་ལྟ་བུ་དེ་ཉིད་སྐད་ཅིག་ལ་སེལ་བར་མཛད་པ་དང་། གཡས་གཡོན་འཕྲག་གཉིས་འབར་བའི་ཉི་ཟླ་ཐབས་ཤེས་ཟུང་འབྲེལ་ཚུལ་དུ་བརྗིད། ཅེས་སྐུ་ཡི་གཡས་གཡོན་འཕྲག་གོང་གཉིས་སུ་མདངས་ཟེར་འོད་དུ་འབར་བའི་ཉི་མ་དང་ཟླ་བ་གཉིས་ཐབས་དང་ཤེས་རབ་ཡ་མ་བྲལ་བར་ཟུང་དུ་འབྲེལ་བའི་བརྡའམ་ཚུལ་དུ་བརྒྱན་ཅིང་བརྗིད་དང་ལྡན་པ། གཡུ་ཡི་ཟུར་ཕུད་རིགས་ཀྱི་རྟགས་སོགས་ཞི་རྒྱན་མཛེས་པའི་རྒྱན་གྱིས་བརྒྱན། ཞེས་པའི་དོན་དབུ་ལ་གཡུ་ཡི་ཟུར་ཕུད་ཅེས་སྔོ་ལྗང་གཡུ་འོད་འབར་བའི་རིན་པོ་ཆེའི་དབུ་རྒྱན་ལ་དབུས་ཀུན་སྣང་ཁྱབ་པ་གཙོས་བདེ་བར་གཤེགས་པ་རིགས་ཀྱི་ལྷ་ལྔ་འམ་གཡུང་དྲུང་སོགས་རིགས་རྟགས་ལྔ་ཡིས་མཚན་པའི་དབུ་རྒྱན་གསོལ་བ་ལ་སོགས་ཞི་བའི་ལྷ་རྒྱན་བཅུ་གསུམ་རྣམ་པར་མཛེས་ཤིང་བཀོད་པའི་ཕྲ་ཚོམ་དང་ཕྲེང་བའི་རྒྱན་གྱིས་སྤྲས་པའམ་བརྒྱན་པར་མཛད་པ། ལེགས་པ་ཀུན་འབྱུང་རྒྱལ་དང་རྒྱལ་སྲས་ཐམས་ཅད་འདུས་པའི་ངོ་བོ་ཉིད། ཅེས་པ། གནས་སྐབས་དང་མཐའ་ཐུག་གང་ལའང་ཕན་བདེ་ལེགས་པའི་ཡོན་ཏན་ཡོད་ཅོག་ཀུན་གྱི་འབྱུང་བའི་གནས་སུ་གྱུར་པ་ཕྱོགས་བཅུ་མུ་མཐའ་མེད་པ་ན་བཞུགས་པའི་རྒྱལ་བ་སྟེ་སངས་རྒྱས་དང་རྒྱལ་སྲས་གཡུང་དྲུང་སེམས་དཔའ་ཐམས་ཅད་ཀྱི་མཁྱེན་བརྩེ་ནུས་སྟོབས་གཅིག་ཏུ་འདུས་པའི་ངོ་བོ་འམ་བདག་ཉིད་དུ་གྱུར་པ། མཐའ་རིང་འཁོར་བའི་རྒྱ་མཚོ་འདི་ལས་ཉེ་བར་སྒྲོལ་མཛད་ཕྲིན་ལས་ཅན། ཞེས་གཏིང་མཐའ་མི་མངོན་ཞིང་བཞུར་རྒྱུན་རིང་ལ་ཟད་པ་མེད་པ་འཁོར་བའི་སྡུག་བསྔལ་རྒྱ་མཚོ་ཆེན་པོ་འདི་ལྟ་བུ་ལས་མི་འགྱང་ཉེ་བར་གཏན་བདེའི་སྐམ་ས་རུ་སྒྲོལ་བར་མཛད་པའི་རྣམ་བཞིའི་ཕྲིན་ལས་འགག་པ་མེད་པའི་བདག་ཉིད་ཅན་གང་དེར། ལུས་ངག་ཡིད་གསུམ་སྒོ་ནས་དྭངས་པས་ཁྱེད་ལ་རབ་ཏུ་ཕྱག་བགྱིས་པས། ཞེས་པས་གུས་པ་ལུས་ཀྱི་ཕྱག་དང་བསྟོད་དབྱངས་ངག་གི་ཕྱག་དང་དགའ་དད་ཡིད་ཀྱི་ཕྱག་གསུམ་གྱི་སྒོ་ནས་ཚུལ་འཆོས་ཀྱི་དྲི་མས་མ་གོས་པས་ན་དྭངས་བ་སྟེ་མགོན་པོ་ཁྱེད་ལ་གུས་པ་ཆེན་པོས་རབ་ཏུ་འམ་ཡང་དག་པའི་ལྷ་ཕྱག་ལན་གྲངས་མང་དུ་བགྱིས་ཤིང་འཚལ་བས་ན། མི་ཕམ་རྒྱལ་མཛད་དགྱེས་པའི་ཞབས་པད་བདག་གི་སྤྱི་བོར་མྱུར་དུ་ཞོག ཅེས་འཁོར་བའི་གཡུལ་ས་ཆེན་པོ་འདིར་མི་ལྟུང་བའམ་ནམ་ཡང་ཕམ་པ་མེད་པར་གཏན་དུ་རྒྱལ་བར་མཛད་པའི་ཐུགས་ཉིད་དགྱེས་ཤིང་བྱམས་པ་ཆེན་པོའི་ཚུལ་གྱིས་སྐུ་ཡི་ཞབས་ཟུང་དྲི་མེད་པད་མོ་ལྟ་བུ་གང་དེ་སྐྱབས་ཞུ་བ་པོ་བདག་གི་སྤྱི་བོར་ཡུན་ཏུ་མི་ཐོགས་པར་མྱུར་བ་ཉིད་དུ་ཞོག་ཅིག་ཅེས་བསྐུལ་བ་དང་། དམ་པ་སྨད་པའི་ལས་རྣམས་གང་བགྱིས་སྤྱན་སྔར་བཤགས་སོ་བཟོད་པར་གསོལ། ཞེས་པས་བསྟོད་པར་འོས་པའི་ཡུལ་དམ་པ་སུ་ལའང་སྒྲོ་སྐུར་དང་འཕྱ་སྨོད་བྱས་པས་སྡིག་པའི་ལས་ངན་གྱི་ཚོགས་རྣམས་ཕྲ་རག་གང་ཞིག་རང་གིས་བགྱིས་པ་དང་གཞན་ལ་བགྱིད་དུ་བསྩལ་བ་ཅི་བྱས་པ་ཐམས་ཅད་ཁྱེད་ཀྱི་སྤྱན་སྔར་རམ་མདུན་དྲུང་དེར་མི་འཆབ་གནོང་འགྱོད་སེམས་ཀྱིས་བཤགས་སོ་ཞེས་ཉེས་སྐྱོན་བགྲང་ཞིང་ཁེངས་བསྐྱུངས་བའི་སྒོ་ནས་བཟོད་པར་གསོལ་ཏེ་ཉེས་བྱས་བསྡོམ་པ་དང་། ཕུན་ཚོགས་ལྡན་ཀྱང་དངོས་འབྱོར་ཡིད་སྤྲུལ་མཆོད་ཚོགས་འབུལ་ལོ་ཐུགས་རྗེས་བཞེས། ཞེས་པ། གང་ན་བཞུགས་པའི་ཞིང་དུ་འཕོངས་པ་མེད་པར་དགོས་རྒུ་ཕུན་སུམ་ཚོགས་པའི་གཏེར་དང་ལྡན་པ་ལགས་མོད་ཀྱང་བདག་གཞན་འགྲོ་བ་རྣམས་ཀྱིས་དངོས་སུ་འབྱོར་བ་དང་ཡིད་ཀྱིས་དམིགས་ཤིང་སྤྲུལ་ཏེ་མཆོད་པའི་ཚོགས་སུ་བསགས་པ་འདི་རྣམས་འབུལ་ལོ་ཞེས་བློས་བླངས་ཏེ་ཕུལ་བ་ཡིན་པས་ཐུགས་ཀྱིས་མི་འདོར་བར་རྗེས་སུ་ཆགས་པའི་ཚུལ་གྱིས་བཞེས་ཞེས་མཆོད་པ་དང་། ཉིན་མཚན་ཀུན་ཏུ་འདུན་པས་བསམ་ཀྱང་ད་རུང་ཁྱེད་ཀྱི་ཐུགས་རྗེའི་ཤུགས། ཞེས་ཉིན་དང་མཚན་ལ་སོགས་དུས་དང་རྣམ་པ་ཀུན་ཏུ་དད་འདུན་མོས་པས་ཁྱེད་ཉིད་ཡིད་ལ་སྒོམ་ཞིང་བསམ་མོད་ཀྱང་ད་དུང་ངམ་ད་རུང་སྨྲ་དབང་ཁྱེད་ཀྱི་ཐུགས་རྗེ་ཞེས་མཁྱེན་བརྩེའི་ནུས་ཤུགས་གང་ཞིག་མངའ་བ་དེ་ལྟར་ནའང་། ཅུང་ཟད་མེད་སྙམ་འོན་ཀྱང་བདག་གི་ཉེས་པའི་སྐྱོན་གྱི་སྒྲིབ་པ་ཟད། ཅེས་པས་ཁོ་བོའི་རྒྱུད་ལ་གང་དེའི་ཆ་ཤས་ཅུང་ཟད་ཙམ་ཡང་ཐོབ་པར་མ་ནུས་པའམ་མེད་པར་སྙམ་བཞིན་མཆིས་ན། འོན་ཏེ་སླད་ཕྱིན་ཆད་ཀྱང་བདག་གི་སྒོ་གསུམ་གྱི་སྡིག་པ་མི་དགེས་ཉེས་ཤིང་བསགས་པའི་སྐྱོན་གྱི་ཚོགས་ཀུན་ནས་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་ཕྲ་རགས་དང་བཅས་པ་འདི་རྣམས་དག་ཅིང་ཟད་པའི་ཕྱིར་དུ། རབ་འབྱམས་ཤེས་བྱའི་ཚོགས་ཀུན་ཀུན་གསལ་བློ་གྲོས་བདག་ལ་མྱུར་དུ་སྩོལ། ཞེས་ཤིན་ཏུ་རྒྱ་ཆེ་ལ་རབ་ཏུ་མུ་མཐའ་མེད་པར་འབྱམས་སུ་ཀླས་པའི་ཤེས་པར་བྱ་བའི་ཚོགས་ཏེ་འཁོར་འདས་ལམ་གསུམ་གྱིས་བསྡུས་པའི་བོན་ཀུན་ལུས་པ་མེད་པ་ཀུན་ནས་ཡོངས་སུ་ཤེས་ཤིང་གསལ་བའི་བློ་གྲོས་རིག་རྩལ་ཅི་མཆིས་པ་རྣམས་མི་ཤེས་རྨོངས་པ་བདག་གི་རྒྱུད་ལ་གཡེལ་བ་མེད་པར་མྱུར་བ་ཉིད་དུ་བསྩལ་བར་མཛད་དུ་གསོལ་ཞེས་པ་དང་། བདག་ལ་མགོན་བྱེད་རེ་ས་ཁྱེད་ལས་ལྷག་པའི་གཞན་ལ་སུ་མེད་པས། ཞེས་པ། བདག་ལ་ཞེས་གང་སྐྱབས་ཞུ་བ་པོ་རང་ཉིད་ལ་གནས་སྐབས་དང་མཐའ་ཐུག་ཀུན་ལ་ཕན་བདེའི་མགོན་ནམ་སྡོང་གྲོགས་སུ་བྱེད་པར་དད་འདུན་གྱི་རེ་བ་འཆང་ས་རིག་པའི་ལྷ་མཆོག་ཁྱེད་ལས་མཆོག་ཏུ་གྱུར་པའམ་ལྷག་པའི་གནས་ཤིག་སྣང་སྲིད་ཀྱི་ཞིང་འདི་དང་གཞན་གང་ན་སུ་ཡང་མེད་པས་ན། དུས་རྣམ་ཀུན་ཏུ་མི་འབྲལ་ཁྱེད་ཀྱི་ཐུགས་རྗེས་བདག་ལ་བཟུང་དུ་གསོལ། ཞེས་འདི་ཕྱི་བར་དོ་ལ་སོགས་དུས་དང་རྣམ་པ་ཀུན་ཏུ་མི་འབྲལ་འགྲོགས་ཤིང་ཁྱེད་ཀྱི་ཐུགས་རྗེ་སྟེ། དོན་དམ་མྱ་འདས་ཀྱི་བོན་དང་ཀུན་རྫོབ་འཁོར་བའི་བོན་ཀུན་སྒྲིབ་པ་མེད་པར་གཟིགས་པའི་མཁྱེན་པ་དང་འགྲོ་བ་ཡོངས་ལ་བུ་ལྟར་བརྩེ་བའི་སྙིང་རྗེ་ཆེན་པོ་དེས་ཁས་ཉེན་བདག་ལ་བྲི་གང་མེད་པར་བཟུང་བར་མཛད་དུ་གསོལ་ཞེས་ཞུ་བ་དང་། བདག་གིས་གཞན་ཕྱིར་བཀའ་ཡི་འཁོར་ལོ་བསྐོར་ཞིང་འགྲོ་རྣམས་མྱུར་སྒྲོལ་ཤོག ཅེས་པས་དེའི་མཐུས་བདག་གིས་འགྲོ་བ་གཞན་གྱི་ཤེས་རྒྱུད་དཀྲོལ་བ་དང་བསྟན་པ་ཡུན་ཏུ་གནས་ཕྱིར་རྒྱལ་བའི་བཀའ་ཡི་གསུང་གསང་གང་ལ་སྒོམ་སྒྲུབ་ལྷུར་ལེན་དང་འཆད་རྩོད་རྩོམ་པའི་བྱ་བྱེད་འཁོར་ལོ་བསྐོར་བ་ལྟ་བུ་གང་དག་གདུལ་བྱའི་རྒྱུད་ལ་ལེགས་པར་འཕོས་ཞིང་ལས་ཉོན་དབང་གིས་སྡུག་བསྔལ་གྱི་མཚོ་ལ་བྱིང་བའི་འགྲོ་དྲུག་སེམས་ཅན་རྣམས་རིང་པོར་མི་ལོན་པར་མྱུར་དུ་བདེ་ཆེན་རྫོགས་པའི་ཞིང་ཁམས་སྐམ་ས་ཆེན་པོར་སྒྲོལ་བའམ་འཁོད་པར་ཤོག་ཅེས་སྨོན་ལམ་གྱིས་མཐར་བརྒྱན་པའོ།།

༧མཁས་དབང་དམ་པ་དོལ་པོའི་སྤྲུལ་སྐུ་ཨོ་རྒྱན་ཆོས་དབྱིངས་རྡོ་རྗེ་རིན་པོ་ཆེའི་ཞབས་བརྟན་སྨོན་གསོལ་ཀུན་བཟང་མེ་ཏོག།ན་མོ་མ་ཧཱ་གུ་རུ་པདྨ་ཀ་ར་ཡེ།།ཨོ༵་རྒྱན༵་མཚོ་སྐྱེས་རྡོ་རྗེས་ཐུགས་རྗེའི་དཔལ།།ཆོས༵་དབྱིངས༵་སྤྲོས་བྲལ་ངང་ནས་མ་གཡོས་བཞིན།།ཡེ༵་ཤེས༵་སྒྱུ་འཕྲུལ་རོལ་བའི་སྤྲུལ་པའི་སྐུ།།སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག།སྔ་འགྱུར་ཀུན་མཁྱེན་ཡབ་སྲས་མི་ཕམ་རྗེའི།།ལེགས་བཤད་གཏེར་མཛོད་དཔལ་ལ་དབང་འབྱོར་ཞིང་།།གཟུངས་སྤོབས་འཆད་རྩོམ་སྤེལ་བའི་ཕྲིན་ལས་ཅན།།དོལ་པོའི་མཆོག་སྤྲུལ་དམ་པ་ཞབས་བརྟན་ཤོག།ཚུལ་ཁྲིམས་རྣམ་དག་གནས་བརྟན་དགེ་སློང་རྗེ།།ཏིང་འཛིན་ཡང་དག་བྱང་ཆུབ་སེམས་དཔའ་ཆེ།།ཤེས་རབ་ཀུན་བཟང་རིག་འཛིན་རྣལ་འབྱོར་པ།།གསུམ་ལྡན་རྡོ་རྗེ་འཆང་དབང་ཞབས་བརྟན་ཤོག།སྐུ་ཚེ་བརྟན་པ་ཚེ་མཐའ་ཡས་དང་མཉམས།།གསུང་ཆོས་ཁྱབ་བརྡལ་རྫོགས་ཆེན་བསྟན་པ་སྤེལ།།ཐུགས་རྗེ་ཨོ་རྒྱན་ཆོས་དབྱིངས་རྡོ་རྗེའི་དཔལ།།འཁོར་འདས་རྒྱན་ཏུ་རྟག་ཏུ་འཚོ་བཞེས་གསོལ།།ཞེས་པ་འདི་ཡང་རབ་གནས་ས་ཕག་ས་ག་ཟླ་བའི་དབང་ཚེས་རྒྱལ་བ་གསུམ་པར་མཁས་དབང་དམ་པ་གང་གི་ལྟ་ཕྱོགས་ཀྱི་འབེལ་གཏམ་ཟུར་ཙམ་ཉན་པའི་མོད་ལ་ལོ་སྔོན་ནས་རིག་འཛིན་ནམ་མཁའ་རྫོང་དུ་ཞི་དུལ་འཕགས་ནོར་བདུན་ལ་རང་བྱན་ཆུབ་པའི་སྤྲུལ་པའི་སྐུ་མཇལ་བ་དེ་ལྷང་ངེར་ལྷམ་མེར་ལྷན་ནེར་དྲན་པའི་མོད་ལ་མགོན་པོ་གང་ཉིད་སྐུ་ཚེ་བརྟན་ཅིང་བཞེད་དོན་ཡིད་བཞིན་འགྲུབ་པའི་བདེན་ཚིག་ཏུ་ཤྲཱིཿཨེ་མ་ཧོས་ཨ་རིའི་ཨེ་ཝཾ་བོད་སྙིང་ཆོས་ཚོགས་ཁང་ནས་བགྱིས་པར་དགེའོ།། །། སྤྱི་ལོ་༡/༦/༢༠༡༩ལ།།་

བྱ་རྒྱལ་ཁྱུང་ལ་འཕྲིན་བཅོལ་གང་བསམ་ལྷུན་གྲུབ།ན་མོ་གུ་རུ་ག་རུ་ཌཱ་ཡ།།ཆོས་དབྱིངས་ཀུན་བཟང་ཡབ་ཡུམ་ལ།།རིགས་བདག་རྒྱལ་བ་ཡབ་ཡུམ་བསྐོར།།རྒྱལ་ཀུན་འདུས་ཞལ་པདྨ་འབྱུང་།།ཐུགས་དམ་བསྐུལ་ཞིང་སྐྱབས་སུ་མཆི།།མཐིང་མདོག་བྱ་རྒྱལ་ཁྱུང་ཆེན་ལ།།དཔའ་ཐུལ་དགྲ་ལྷའི་གོ་ཆས་གསོལ།།ཐབས་ཤེས་ཉི་ཟླའི་དཀྱིལ་ནས་བཞེངས།།རྒྱལ་མཚན་ནོར་བུ་འཛིན་ལ་བསྟོད།།སངས་རྒྱས་སྟོང་གི་དབུ་རྒྱན་ཅིང་།།རྒྱལ་སྲས་སེམས་དཔའི་ཕྲིན་ལས་གར།།ཉན་ཐོས་རིག་གྲོལ་དགེ་འདུན་དཔུང་།།དུག་ནད་ཀུན་སེལ་རྒྱལ་ལ་འདུད།།ལས་ཉོན་བདུད་བཞིའི་འཇིགས་ཀུན་སེལ།།མ་རིག་གདོན་བགེགས་འཇོམས་པའི་དཔལ།།ཐར་ལམ་འདྲེན་པའི་ཡི་དམ་མཆོག།མེས་དབོན་རྒྱུད་པའི་ལྷ་སྲུང་མཆོད།།དབྲ་ཆེན་བསྟན་པའི་བཀའ་སྲུང་མཛོད།།ཕན་བདེ་སྤེལ་བའི་ཕྲིན་ལསམཛོད།།མདོར་ན་འགྲོ་བ་སེམས་ཅན་ཀུན།།ཀུན་བཟང་ཞིང་དུ་སྨིན་གྲོལ་མཛོད།།ཅེས་པ་འདི་ཡང་རབ་གནས་མེ་སྤྲེལ་རྒྱལ་ཟླའི་གཟའ་ཚེས་དགེ་བར་ཤྲཱིས་སོ།། རྟག་པར་རྒྱུན་མ་ཆད་པ་འདོན་ཐུབ་མཁན་ཡོད་ན་བསམ་པའི་དོན་ཐམས་ཅད་ཡིད་བཞིན་དུ་འགྲུབ་པར་གདོན་མི་ཟའོ།། ཕྱི་ལོ་༢༠༡༧/༡/༢༧ལའོ      

འཕུར་ལམ་གྱི་དཀར་པོ་རྟེན་འབྲེལ་ཀུན་བཟང་།ཨེ་མ་ཧོ།།༼༡༽དཀར་ཕྱོགས་རྒྱལ་བ་གསུམ་པའི་ཐོ་རངས་ཁར།།སྤྲིན་དཀར་འོག་ལ་གཞོན་ནས་གནམ་འཕང་བསྐྱོད།།གངས་དཀར་རི་བོས་བསྐོར་བའི་མན་ཏྲ་ནར།།ལྷག་དཀར་དགེ་བའི་ཉིན་མོར་བདེ་བར་འབྱོར།།༼༢༽མཚོ་དཀར་བ་ཚྭ་ཅན་གྱི་གྲོང་ཁྱེར་ནས།།གོས་དཀར་ལྕང་ལོ་གྱིས་མཇལ་ཕྱག་འཚལ།།དམ་དཀར་དད་གུས་མཆོད་པའི་ཕྱག་རྒྱ་བཅས།།འོད་དཀར་ཡེ་ཤེས་འཇའ་ཟེར་རྟེན་འབྲེལ་འགྲིགས།།༼༣༽རྣམ་དཀར་དགེ་ཚོགས་བསྐྲུན་པའི་ཞིང་ཁམས་མཆོག།དཀྱིལ་དཀར་ཨེ་ཝཾ་སངས་རྒྱས་དགའ་ཚལ་དུ།།ཟླ་དཀར་ས་ག་ཟླ་བའི་འཁྲུངས་སྐར་རུ།།གོས་དཀར་བསྟན་པའི་ཁྱབ་བདག་དངོས་སུ་མཇལ།།་་་་་་་་་་གནམ་ལྕགས་མཁན་རིན་པོ་ཆེ་ངག་དབང་དང་ཡེ་ཤེས་འཇའ་ཟེར་དང་ལུགས་དངོས་སུ་རང་བྲིས་བཞིན་དུ་གནམ་ཐང་དུ་བསུ་བར་བྱོན་ནས་བོང་བ་གསེར་གཟིགས་ཀྱིས་བཀའ་དྲིན་གནང་། ཁྱད་པར་དུ་༧དོན་གྱི་སླད་དུ་མཚན་ནས་སྨོས་ན་༧སྐྱབས་རྗེ་དམ་པ་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་གྱི་བྱམས་བརྩེའི་གསེར་ཞལ་མཇལ། བཀའ་དྲིན་དང་བྱིན་རླབས་བསྩལ། སངས་རྒྱས་སྟོང་གི་དགའ་ཚལ་དང་རྫོགས་ཆེན་སྟོན་པའི་དཀྱིལ་འཁོར། ཨེ་ཝཾ་ཏཱ་ར་དགོན་པ་བླ་མ་དམ་པ་དང་མཉམ་དུ་གནས་བསྐོར་དང་བཀའ་མོལ་གནང་། སྙིང་གྲོགས་མཁན་པོ་གནམ་ལྕགས་རྡོ་རྗེ་དང་མཁས་བཙུན་བཟང་པོས་ཕྱུག་པའི་རྗེ་བཙུན་མ་འཇམ་དབྱངས་དཔལ་མོ་དང་མོའི་ཡུམ་ཆེན་དང་ཤྲི་དང་སོགས་དང་ཚོགས་འཁོར་ལ་དངོས་སུ་ཞུགས་པའི་སྤྲོ་དགའ་བརྟས་སོ།

རང་བྱུང་གི་རྟོགས་གསོལ།།ན་མོ་གུ་རུ་བཛྲ་གུ་ཧྱེ་བིརྱ་དྷ་ར་ཡེ།།ཟབ་གསང་སྙིང་ཐིག་དགོངས་པའི་མཛོད་ལ་དབང་།།རིག་འཛིན་བརྒྱུད་པའི་སྣང་བཞིར་ཕ་རོལ་ཕྱིན།།སེང་ཧེ་ཤྭ་ར་ཉིད་དང་དབྱེར་མེད་པའི།།སྐྱབས་མཆོག་དྲིན་ཆེན་བླ་མ་གསོལ་བ་འདེབས།།ཕྲིན་ལས་ཀུན་ཁྱབ་དབྱིངས་དང་མཉམ་པར་ཤོག།ཨེ་མ་ཧོས་ཨ་ལས་ས་པདྨ་འདབ་བརྒྱད་དང་གནམ་འཁོར་ལོ་རྩེ་བརྒྱད་ཀྱི་རང་བྱུང་གི་དཀྱིལ་འཁོར་མཛེས་པའི་དབུས་ནས་སྨོན་པའོ།།ྋསྐྱབས་རྗེ་སྒོ་ཆེན་སྤྲུལ་སྐུ་གསང་སྔགས་བསྟན་འཛིན་རིན་པོ་ཆེའི་ཞབས་བརྟན་གསོལ་འདེབསབཞུགས་སོ།།ཨེ་མ་ཧོ།།གསང་སྔགས་བསྟན་འཛིན་དམ་པ་ཡིད་བཞིན་དབང་།།བཤད་སྒྲུབ་དྲི་མེད་ལྷ་གོས་རྩེར་མཆོད་ནས།།མི་ནུབ་བསྟན་པའི་རྒྱལ་མཚན་ཕྱོགས་བཅུར་བསྒྲེངས།།སྐྱབས་མཆོག་དམ་པ་བསྐལ་བརྒྱར་འཚོ་བཞེས་གསོལ།།ཨེ་མ་ཧོ་རུ་འབོད་པས་རྩེ་གཅིག་ཏུ་སྨོན་ཞིང་གསོལ་བ་བཏབ་པར་དགེའོ།།