ཨེ་ཝྃ་ཧོ།

ཡེ་སྟོང་གཞི་གྲོལ་མཉམ་པ་ཆེན་པོའི་ཀློང་།། འཁོར་འདས་འུབ་ཆུབ་ཕྱོགས་ལྷུང་ཀུན་དང་བྲལ།།  རིག་སྟོང་མི་ཤིགས་གདོད་མའི་ངོ་བོ་ཉིད།། ཀུན་བཟང་ཆོས་སྐུའི་བླ་མ་ཁྱེད་མཁྱེན་ནོ།།  རང་སྣང་ཡེ་ཤེས་གསལ་བའི་ཉི་མ་ཤར།།  ལྷུན་གྲུབ་རིགས་ལྔ་ཚོམ་བུའི་དཀྱིལ་འཁོར་བཀྲ། སྤྲོ་བསྡུས་སྤྱི་དཔལ་དབྱིངས་སྣང་ལྔ་ལྡན་པའི།།  རང་བཞིན་ལོངས་སྐུའི་བླ་མ་ཁྱེད་མཁྱེན་ནོ།། གང་འདུལ་འགྲོ་བའི་མོས་ཁམས་རྒྱ་མཚོའི་རྡུལ།། སོ་སོར་མ་འདྲེས་ཇི་བཞིན་མཁྱེན་གྱུར་པའི།། རྩོལ་མེད་དཔག་ཡས་འདྲེན་པའི་མཐུ་མངའ་བའི།།  ཁྱབ་བརྡལ་སྤྲུལ་སྐུའི་བླ་མ་ཁྱེད་མཁྱེན་ནོ།། སྒྱུ་འཕྲུལ་དྲྭ་བའི་ལམ་གསང་ཤེས་པ་ལ།།  ཐོས་པ་མ་ཡིན་བསྒོམ་དང་བསམ་པས་མིན།།  བླ་མའི་མན་ངག་གཅིག་པས་རྟོགས་གྱུར་པའི།། ཡེ་ཤེས་མངོན་སུམ་སྟོན་ལ་གསོལ་བ་འདེབས།། སྣང་སྲིད་བླ་མར་ཤར་བའི་བསྐྱེད་རིམ་དང་།། ཐུགས་ཡིད་དབྱེར་མེད་འདྲེས་པའི་རྫོགས་རིམ་ལ།། འདུས་ཕྱིར་དད་དམ་འགྱུར་བ་མེད་པའི་ངང་།། མཚུངས་མེད་ཐུགས་རྗེས་གཏེར་ལ་གསོལ་བ་འདེབས།། ས་དང་ལམ་གྱི་གལ་གནད་མཐར་ཐུག་པ།། ཞེ་ས་མ་ཡིན་ཚུལ་འཆོས་ངོ་སྲུང་མིན།། བླ་མར་རྩེ་གཅིག་མོས་གུས་རག་ལས་ཕྱིར།།  རྫོགས་སངས་ཡོན་ཏན་བརྒྱན་ལ་གསོལ་བ་འདེབས།། ས་ལམ་འབྲས་བུ་མྱུར་ཏུ་ཐོབ་འདོད་ན།། ཚོགས་བསགས་མ་ཡིན་རྟེན་མཆོད་སྒྲིབ་སྦྱང་མིན།།  བླ་མའི་ཞབས་ཏོག་ཁོ་ནར་རག་ལས་ཕྱིར།། འདྲེན་མཆོག་དཔལ་ལྡན་བླ་མར་གསོལ་བ་འདེབས།། ཚེ་གང་བཅོས་མའི་ལམ་གྱི་འདུལ་ཁྲིམས་ཀྱིས།། རང་རྒྱུད་གཅུན་ཏེ་ཚུལ་ཁྲིམས་བསྲུང་ན་ཡང་།། ཉོན་མོངས་གཡུལ་ངོ་བཟློག་པར་དཀའ་བས་ན།། ཆོས་ཀྱི་འོད་སྣང་བརྡལ་ལ་གསོལ་བ་འདེབས།། གཞན་ཕན་སེམས་ཀྱིས་འགྲོ་བ་འདྲེན་བྱེད་པའི།། དོན་གཉིས་ལམ་ལ་འབད་པ་བྱས་ན་ཡང་།། རྣམ་དག་བྱང་ཆུབ་རྒྱུད་ལ་འབྱུང་དཀའ་བས།། བྱང་སེམས་ངང་གིས་འདྲེན་ལ་གསོལ་བ་འདེབས།། སྣང་སྲིད་འཁོར་འདས་ཆོས་རྣམས་རྣམ་དག་པའི།། ལྷ་སྔགས་ཆོས་ཉིད་རོལ་པར་བསླབ་ན་ཡང་།། འཛིན་ཞེན་ཕྲ་མོ་དབྱིངས་སུ་ནུབ་དཀའ་བས།། དགོངས་པ་ནམ་མཁའ་འདྲ་ལ་གསོལ་བ་འདེབས།། ཚེ་འདིར་བྲེལ་དོས་ལས་ལ་ཆེར་གཡེང་བའི།། རྣམ་སྨིན་མཁན་གྱིས་ལྗོངས་འདིར་གང་བའི་ཚེ།། དམ་ཆོས་ཉི་མའི་དྲོད་ཁོལ་འབུམ་བརྡལ་བའི།། གང་སྐུ་ཉི་མ་འདྲ་ལ་གསོལ་བ་འདེབས།། རྒྱལ་གསུང་ཟབ་མོའི་གནས་རྣམས་བཤད་ཡམས་སུ།། ཅི་བཞིན་མི་འཇོན་ཆོས་གྲྭའི་གང་ན་ཡང་།། མདོ་རྒྱུད་ལམ་གྱི་དཀའ་གནད་ཀུན་བྲལ་བའི།། གསུང་རབས་སྒྲོ་འདོགས་གཅོད་ལ་གསོལ་བ་འདེབས།། མ་ངེས་གྲུབ་རྫུ་སྨྱོན་པའི་བཏུལ་ཞུགས་ཀྱིས།། ལས་འབྲས་ཁྱད་གསོད་མི་དགེའི་བཤེས་གཉེན་རིགས།། རྣམས་མང་འགྲོ་བ་བསླུ་བའི་དུས་སྐབས་འདིར།། མཁྱེན་པའི་ཡེ་ཤེས་འབར་ལ་གསོལ་བ་འདེབས།། བཀའ་གཏེར་ཟུང་གི་ཆོས་བརྒྱུད་དབྱིངས་སུ་ཡལ།། མདོ་སྒྱུ་སེམས་གསུམ་གླེགས་བམ་ཁྲོད་དུ་ལུས།། གར་དབྱངས་ཐིག་སོགས་ཁྲོམ་དུ་བཤམས་དུས་འདིར།། བཀའ་གཏེར་བསྟན་པའི་བདག་པོར་གསོལ་བ་འདེབས།། གཞུང་ལུགས་ཐང་མར་བརྡལ་བའི་མཁས་འདོད་ཚོའི།། འཆད་རྩོད་རྩོམ་གྱི་སྒྲ་བརྒྱ་སྒྲོགས་ན་ཡང་།། རྐྱེན་ངན་བྱུང་ཚེ་ཐ་མལ་པ་དང་མཚུངས།། གང་སྣང་གྲོགས་སུ་འཆར་ལ་གསོལ་བ་འདེབས།། དུས་ཀྱི་དྲག་རླུང་འཚུབ་པའི་གནས་སྐབས་འདིར།། བློ་གཏོད་ཁེལ་བ་སུ་ཡང་མི་འདུག་པས།། བླ་མར་བསྟེན་ཡུན་རིང་བའི་དགོངས་སྤྱོད་ཀྱིས།། གདམས་ངག་ཉན་ཡུན་རིང་བར་གསོལ་བ་འདེབས།། ཕྱི་ནས་ཐོས་པའི་སྒྲོ་འདོགས་གཅོད་མི་དགོས།། ནང་ནས་ཉམས་ལེན་མར་ཁུ་འཕྱུར་མི་དགོས།། གསང་བ་རིམ་གཉིས་ལམ་ལ་བསྟེན་མི་དགོས།། གསང་གསུམ་བླ་མར་འདུས་ལ་གསོལ་བ་འདེབས།། མཚན་རྫོགས་དཔེ་བྱད་ཅན་ལ་རེ་མི་དགོས།། མངོན་ཤེས་ཡོན་ཏན་འབར་ལ་ལྟོས་མི་དགོས།། ཇི་ལྟ་ཇི་སྙེད་མཁྱེན་པའི་མཐུ་མངའ་བའི།། དཔལ་ལྡན་བླ་མ་མཆོག་ལ་གསོལ་བ་འདེབས།། དེང་དུས་ཆོས་བརྒྱད་མཁན་ཀྱི་ས་སྟེང་གང་།། གཞན་མགོ་གཡོག་པའི་ནེ་ཙོའི་ལྕེ་ལྡན་ཚོས།། ལྟར་སྣང་ཆོས་པའི་ཨོ་ཟོབ་བྱེད་དུས་འདིར།། མི་ལ་གཉིས་པར་གྲགས་ལ་གསོལ་བ་འདེབས།། བསྟན་པའི་རྩ་བ་བོར་བའི་ཆོས་གཟུགས་ཚོའི།། བསྟན་པ་རྙེད་དང་བཀུར་སྟི་ཞེས་འུར་ནས།། བྱ་མང་དོན་མང་གནས་ལ་ལྷུར་ལེན་སྐབས།། ཀུན་སྤང་བྱ་བྲལ་བླ་མར་གསོལ་བ་འདེབས།། དུས་གསུམ་རྒྱལ་བ་གསོལ་ཞིང་མཆོད་པ་ལས།། མགོན་པོ་ཁྱེད་ཀྱི་བ་སྤུའི་བུ་ག་ཙམ།། དྲན་པའི་དངོས་གྲུབ་བྱིན་རླབས་ཆེས་མྱུར་བའི།། བྱིན་རླབས་མཚུངས་པ་མེད་ལ་གསོལ་བ་འདེབས།། མདོར་ན་ད་ནས་སྐྱེ་བ་ཐམས་ཅད་དུ།། བསམ་རྒྱུ་བླ་མ་མ་གཏོགས་མེད་པ་དང་།། བསྒོམ་རྒྱུ་མོས་གུས་མ་གཏོགས་མེད་པ་ཡི།། བླ་མའི་ཐུགས་དང་འདྲེས་པར་གསོལ་བ་འདེབས།།

༧སྐྱབས་རྗེ་དམ་པ་༧བྱ་བྲལ་བ་༧པདྨ་ཆོས་དབྱིངས་ཁྱབ་བརྡལ་མཁྱེན་ནོ།། ན་མོ་གུ་རུ་པདྨ་དྷརྨཱ་དྷརྟུ་ཡེ།། ༼༡༽ ཕྱོགས་དུས་རྒྱལ་བ་ཀུན་གྱི་ཐུགས་རྗེ་ཅན།། མ་ལུས་འགྲོ་རྣམས་སྐྱབས་པའི་བཀའ་དྲིན་ཅན།། དམ་ཆོས་འོད་སྣང་འགྱེད་པའི་བྱིན་རླབས་ཅན།། པདྨ་ཆོས་དབྱིངས་ཁྱབ་བརྡལ་གསོལ་བ་འདེབས།། འཁོར་བ་དོང་ནས་སྤྲུགས་པར་བྱིན་གྱིས་རློབས།། ༼༢༽ ཆོས་བརྒྱད་ཞེན་པ་བྲལ་བའི་བྱ་བྲལ་བ།། ཆོས་ཀུན་དེ་ཉིད་གཟིགས་པའི་རྣལ་འབྱོར་པ།། འཁོར་བའི་སྐྱོན་གྱིས་མ་གོས་རིག་པ་འཛིན།། སྙིགས་དུས་སངས་རྒྱས་གཉིས་པར་གསོལ་བ་འདེབས།། སངས་རྒྱས་བསྟན་པ་འཛིན་སྐྱོང་སྤེལ་ནུས་ཤོག། ༼༣༽ ངེས་འབྱུང་རྣལ་མས་བཤད་དང་སྒྲུབ་པར་བརྩོན།། བྱང་ཆུབ་སེམས་ཀྱིས་ཕྱིན་དྲུག་སྤྱོད་པར་འཇུག། སྣང་སྲིད་རྣམ་དག་བདེ་ཆེན་ཡེ་ཤེས་རོལ།། གསུམ་ལྡན་རྡོ་རྗེ་འཛིན་ལ་གསོལ་བར་འདེབས།། ཐེག་གསུམ་ཆོས་ཀྱིས་འགྲོ་ཀུན་སྨིན་གྲོལ་ཤོག།     ཅེས་པ་རབ་གནས་ལྕགས་གླང་ནག་པ་ཟླ་བའི་ཡར་ངོའི་རྒྱལ་བ་དང་པོ་འམ། ༧སྐྱབས་རྗེ་འཁོར་ལོའི་མགོན་པོ་ཉིད་དགོངས་པ་ཆོས་དབྱིངས་སུ་གཟིམས་པའི་ཉིན་མོར་མིག་ཆུའི་ཀློང་ནས་གསོལ་བ་འདེབས་པར་དགེའོ།། སྤྱི་ལོར། ༡༥/༤/༢༠༢༡་ལ་ཨེ་མ་ཧོས་ད་བྲིས་ད་སྤེལ།།

ཁམས་ཡུལ་ཤུལ་ལ་གསོན་ཤུགས་རྒྱས།། དགུང་སྤྲིན་དཀར་གྱི་འཕུར་ལྡིང་རྩེན།། སྤང་སྔོ་ལྗང་གི་གཡུ་ལོ་རྒྱས།། ཆུ་དྭངས་གཙང་གི་སྦུ་དཀར་གཡོ།། ནགས་ལྗང་ལོ་ཡི་བྲོ་གར་འཁྲབ།། སྟེང་རྒྱ་ཕེབ་ལས་གསེར་འོད་འཕྲོ།། གླིང་གེ་སར་གྱི་ཀི་གསྭོ་བསྒྲོགས།། ས་དེ་ཚོ་ནི་སྐྱིད་པ་ལ།། ཡུལ་དེ་ཚོ་ནི་དགའ་བ་ལ།། ད་བྲིས་ད་སྤེལ།

ཨོཾ་མ་ཎི་པདྨེ་ཧཱུཾ་ཧྲཱིཿ ཡུལ་ཤུལ་ན་ས་ཡོམ་རྒྱབ། ཀྱེ་མ་སྤུན་ཟླ་དང་། གཞི་ཁྱིམ་རྒྱ་ཆ་དྲུག་ཅུའི་ཚེ་སྲོག་ཤོར།། ཀུན་མཁྱེན་བླ་མ་དང་། བླ་མ་དང་གྲྭ་བ་དགེ་འདུན་པས་ཕན་བདེ་བརླབ་ཆེན་མཛད། མི་རྟག་པ་འདི་གསང་བ་ཟབ་པས་ཀུན་གྱིས་དོན་སྣང་མཛད་རོགས། དམ་པའི་ཆོས་ལ་བརྩོན་པར་མཁྱེན་ནོ། དཀོན་མཆོག་གསུམ་པོས་སྐྱོབས། ———-ཨེ་མ་ཧོས

༄༅། །སྐྱབས་རྗེ་གཡུ་ཁོག་བླ་མ་བྱ་བྲལ་ཆོས་དབྱིངས་རང་གྲོལ་          མཆོག་གི་རྣམ་པར་ཐར་པ་མདོར་བསྡུས་སུ་བརྗོད་པ་                      ཕྱི་རབས་དད་པའི་མཆོད་སྤྲིན་                              ཞེས་བྱ་བ།                           དང་པོ།   མདོ་ཁམས་གཡུ་ཁོག་ཏུ་སྐུ་འཁྲུངས་ཤིང་ཆོས་སྒོར་འཛུད་པའི་བླ་མ་ཧོར་བླ་གཞན་ཕན་རིན་པོ་ཆེས་རྗེས་སུ་བཟུང་བའི་སྐོར།      གཞི་དབྱིངས་ཀ་དག་གཉིས་ཆོས་ཡོངས་བྲལ་གདོད་མའི་ཆོས་སྐུ་ཀུན་ཏུ་བཟང་། །གཞི་སྣང་ལྷུན་གྲུབ་ཡེ་ཤེས་ལྔ་ལྡན་ལོངས་སྤྱོད་རྫོགས་སྐུ་རྡོ་རྗེ་སེམས། །གཉིས་སུ་མེད་གང་རྫོགས་ཆེན་སྟོན་པ་སྤྲུལ་པའི་སྐུ་མཆོག་དགའ་རབ་སྟེ། །སྐུ་གསུམ་སྟོན་པར་མཉམ་ཉིད་ལྟ་དང་དྭངས་བའི་ཡིད་ཀྱིས་ཕྱག་བགྱིའོ། །འཇམ་དཔལ་རྣམ་སྤྲུལ་མཉྫུ་མི་ཏྲ་དང་། །ལྟ་བ་མཐར་སོན་ཤྲཱི་སེང་ཧའི་ཞབས། །འོད་ལུས་གྲུབ་པ་ཛྙཱ་ན་སུ་ཏྲ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །པཎ་གྲུབ་བྱེ་བའི་གཙུག་གི་རྒྱན་མཆོག་འཕོ་ཆེན་སྐུ་བརྙེས་བི་མ་ལ། །དུས་གསུམ་རྒྱལ་བའི་ཕྲིན་ལས་གཅིག་བསྡུས་གསང་ཆེན་སྟོན་པ་པདྨ་འབྱུང་། །རྣམ་སྣང་ལོ་ཙཱ་ཡེ་ཤེས་མཚོ་རྒྱལ་ཚངས་པ་ལྷ་ཡི་མེ་ཏོག་སོགས། །གྲུབ་བརྙེས་ལོ་པཎ་རྗེ་འབངས་ཚོགས་ཀྱིས་བྱིན་བརྒྱུད་རྟོགས་པའི་ཕ་ཕོག་སྩོལ། །གདོད་མའི་མགོན་པོ་ཀློང་ཆེན་རབ་འབྱམས་ཞབས། །ཀུན་མཁྱེན་གཉིས་པ་རིག་འཛིན་འཇིགས་མེད་གླིང་། །ཀུན་བཟང་གཞན་ཕན་རྒྱལ་བའི་མྱུ་གུ་སོགས། །དགོངས་བརྡ་སྙན་བརྒྱུད་བླ་མར་གུས་ཕྱག་འཚལ། །སྙིང་ཐིག་སྲོག་འཛིན་འཇིགས་མེད་ཆོས་ཀྱི་དབང་། །བཀའ་བབ་བདུན་ལྡན་མཁྱེན་བརྩེའི་དབང་པོ་དང་། །བརྒྱུད་སྲོལ་ཀུན་འདུས་དཔའ་བོ་རྡོ་རྗེ་སྟེ། །རྩ་རྒྱུད་བླ་མའི་ཚོགས་ཀྱིས་ཤིས་པ་སྩོལ། །ཆོ༷ས་དབྱིང༷ས་ཀ་དག་སྐྱེ་མེད་ཀློང་ནས་ཆོས་ཟད་དགོངས་པའི་ལྟ་བ་རྫོགས། །ར༷ང་གྲོལ༷་ལྷུན་གྲུབ་ལོངས་སྐུའི་ཞིང་གཟིགས་ཐོད་རྒལ་སྒོམ་པ་ཚད་ལ་ཕེབས། །ཟུང་འཇུག་སྣ་ཚོགས་སྤྲུལ་པའི་སྐུ་ཡིས་བྱར་མེད་སྤྱོད་པ་གོང་དུ་འཕེལ། །ཆོས་ཉིད་མངོན་གཟིགས་བྱ་བྲལ་བླ་མ་སྙིང་དབུས་དད་བརྒྱའི་པདྨོར་བཞུགས། །གང་གི་ཞིང་འདིའི་མཛད་རྣམ་ཕྱོགས་བསྡུས་ཤིག །ཕྱི༷་ར༷བས་ཁྱེད་རྗེས་སློབ་པར་ཁས་འཆེ་བས། །ད༷ད་གསུམ་གུས་པ༷འི་ཡིད་ཀྱིས་མཆོ༷ད་སྤྲིན༷་དུ། །འགོད་ལ་ལྷ་དང་བླ་མས་གནང་བ་སྩོལ། །        ཞེས་ཤིས་པར་བརྗོད་པའི་ཚིག་གིས་མདུན་བསུས་ཏེ། འདིར་སྲིད་ཞིའི་ལེགས་ཚོགས་དང་ཕན་བདེ་མ་ལུས་པ་འབྱུང་བའི་གནས་གཅིག་པུ་རྒྱལ་བའི་བསྟན་པ་རིན་པོ་ཆེ་ཉག་གཅིག་ཡིན་ཞིང་། དེ་ཉིད་འཛིན་སྐྱོང་སྤེལ་བའི་བསྟན་འཛིན་སྐྱེས་ཆེན་དུ་མ་དུས་རབས་སོ་སོར་འཕགས་བོད་ཀྱི་ལྗོངས་སུ་ལེགས་པར་བྱོན་ཅིང་གང་ལ་གང་འདུལ་གྱི་མཛད་ཕྲིན་མཁའ་མཐར་ཁྱབ་པ་བརྗོད་ལས་འདས། ཁྱད་པར་བསིལ་ལྡན་བོད་ཀྱི་ལྗོངས་འདིར་རིས་མེད་རྒྱལ་བསྟན་སྐྱོང་བའི་མངའ་བདག་བསམ་བཞིན་བསྟན་འགྲོའི་ཆེད་དུ་བྱོན་པའང་བསམ་གྱིས་མི་ཁྱབ། དེ་ལས་འདིར་སྐབས་སུ་བབས་པ་ཉེ་རབས་སུ་མདོ་ཁམས་སྨད་ཀྱི་ཕྱོགས་འདིར། པཎ་ཆེན་བི་མའི་རྣམ་རོལ། མཁས་གྲུབ་བྱེ་བའི་གཙུག་རྒྱན། ཟབ་གསང་རྫོགས་ཆེན་ཀྱི་རྣལ་འབྱོར་བ་འགྲན་པའི་ཟླ་ཐམས་ཅད་དང་བྲལ་བ་དོན་གྱི་སླད་དུ་མཚན་ནས་སྨོས་ན་༧ སྐྱབས་རྗེ་གཡུ་ཁོག་བླ་མ་བྱ་བྲལ་བ་ཆོས་དབྱིངས་རང་གྲོལ་ཞེས་མཚན་གྱི་རྔ་གསང་སྲིད་པ་གསུམ་ན་ལྷང་ངེར་གྲགས་པ་གང་དེ་ཉིད་ཀྱི་མཛད་རྣམ་རགས་ཙམ་འགོད་པ་ལ། དེ་ཡང་སྐྱབས་རྗེ་དམ་པ་གང་ཉིད་ངེས་པའི་དོན་དུ་གདོད་ནས་རྒྱལ་བ་རྣམས་དང་གཉིས་སུ་མེད་པར་མངོན་པར་བྱང་ཆུབ་ནའང་ཇི་སྐད་དུ། ཇི་ལྟར་གདུལ་བྱ་དག་པ་ཡི།…

ཀུན་བཟང་མེ་ཏོག་དྲན་པ་དཔྱིད་ཀའི་བརྡ་གླུ། ན་མོ་གུ་རུ་པདྨ་ཀ་ར་ཡེ།། ཀུན་བཟང་ནམ་མཁའ་ཡངས་པའི་ངོ་བོ་ལ།། ཀུན་བཟང་མེ་ཏོག་དབང་མོས་རང་བཞིན་གསལ།། ཀུན་བཟང་ཀུན་ཕན་ཕྲིན་ལས་ཐུགས་རྗེའི་རྩལ།། ཀུན་བཟང་ཡིད་བཞིན་ནོར་བུ་ཀུན་ནས་རྒྱལ།། ཀུན་བྱེད་རྒྱལ་པོའི་སྣང་བའི་མེ་ཏོག་ལ།། ཀུན་གསལ་རིག་པའི་ཡེ་ཤེས་འདབ་སྟོང་བཞད།། ཀུན་ཁྱབ་དྲི་བཟང་སྨན་གྱི་བདུད་རྩིའི་དཔལ།། ཀུན་ལ་ཕན་བདེས་འབྲས་བུ་རབ་ཏུ་འཇོ།། ཀུན་བཟང་གདུགས་དཀར་མོ་ཡི་གསང་གསུམ་ལ།། ཀུན་མཁྱེན་བླ་མ་འཇམ་དཔལ་དགྱེས་པའི་རྩལ།། བུདྡྷ་བཛྲ་རཏྣ་པདྨའི་གར།། ཀརྨ་རྟེན་འབྲེལ་ཟབ་མོའི་ཕྱཔགས་ཀུན་ཁྱབ།། ———-ཨེ་མ་ཧོས