ཨེ་ཝྃ་ཧོ།

༄༅། །མཁའ་འགྲོའི་དབང་ཕྱུག་རྗེ་བཙུན་མ་མུ་མེད་ཡེ་ཤེས་མཚོ་མོའི་གསོལ་འདེབས་རིག་པ་འཛིན་མའི་རྣ་རྒྱན་ཞེས་བྱ་བ། ཐུབ་བསྟན་གངས་དཀར་ལྷུན་པོའི་ཆུ་རྒྱུན་དེ།། ཡངས་པའི་ས་ཆེན་དུ་མར་བབས་པ་ལས།། ཚེ་གཅིག་ཟུང་འཇུག་གྲུབ་པ་བོད་ཀྱི་ཆོས།། གསང་སྔགས་བསྟན་པའི་ཆེ་བ་རྨད་དུ་བྱུང་།། ས་མཐོ་རི་གཙང་ཟབ་མོའི་ཆོས་གཏེར་མང་།། དཔའ་བོ་མཁའ་འགྲོའི་འདུ་བ་རྒྱུན་མི་ཆད།། བསིལ་ལྡན་ལྗོངས་འདི་སྦས་པའི་ཞིང་གཅིག་སྟེ།། ཨོ་རྒྱན་མཁའ་འགྲོའི་གླིང་དང་གཉིས་སུ་མེད།། གདོང་དམར་ཅོལ་ཆུང་སྤྲེལ་གྱི་བུ་རྒྱུད་ལ།། མཁའ་འགྲོ་གཏེར་སྟོན་རིག་འཛིན་གྲུབ་ཐོབ་སོགས།། འཛམ་གླིང་ཡུལ་གྲུ་ཕལ་ལ་མ་གྲགས་པའི།། ངོ་མཚར་སྐྱེས་ཆེན་རྒྱུ་སྐར་གྲངས་ལས་བརྒལ།། ཡེ་ཤེས་མཚོ་རྒྱལ་མ་ཅིག་ལབ་ཀྱི་སྒྲོན།། ཀུན་དགའ་འབུམ་དང་ཇོ་མོ་སྨན་མོ་སོགས།། འབྲེལ་ཚད་མཁའ་སྤྱོད་ཞིང་དུ་ཁྲིད་པ་ཡི།། མི་དང་མི་མིན་བར་གྱི་དེད་དཔོན་མང་།། སྐྲ་ལོའི་ཉག་མས་གཏེར་གྱི་སྒྲོམ་བུ་འབྱེད།། བརྡ་དང་གླུ་ཡིས་དུས་གསུམ་ལུང་དུ་སྟོན།། ཟབ་མོ་གསང་ཆེན་ཆོས་ཀྱི་ལྡེ་མིག་ལ།། དབང་བའི་རིགས་བཟང་ལྷ་མོ་ཞིང་འདིའི་རྒྱན།། མཁའ་སྤྱོད་ཞིང་དུ་འཕུར་བའི་འགྲོས་ཀྱིས་གཤེགས།། འདི་ཕྱིའི་བར་ལ་འཕྲིན་གྱི་སྐྱེལ་མ་མཛད།། གནས་ཡུལ་དུར་ཁྲོད་ཚོགས་ཀྱི་ཕུད་ལ་དབང་།། སྔགས་སྐྱེས་རིག་འཛིན་མཁའ་འགྲོའི་ཆེ་བ་མང་།། འཇམ་དབྱངས་ཐུགས་སྲོག་མུ༵་ཡིག་ཟླ་བའི་མདངས།། མཚུངས་མེད་བླ་མའི་ཐུགས་རྗེའི་འོད་ཟེར་གྱིས།། ཡང་ཡང་བསྐུལ་བས་མཁའ་འགྲོ་རྒྱ་མཚོ༵་ཡི།། གཙུག་གི་མེ་ཏོག་མདོ་ཁམས་ཕྱོགས་སུ་བབས།། གངས་ཅན་སྐྱེ་འགྲོའི་ཤ་དང་ཁྲག་གི་རྒྱུན།། འཕགས་མའི་སྐུ་ཡི་རྒྱུད་ལས་ཆད་པས་ན།། བརྩེ་ཆེན་མ་དེའི་ཐུགས་རྗེའི་སྒྲོན་མེ་གཅིག། དུས་མཐའི་མུན་པའི་ཁྲོད་ནས་སླར་ཡང་འབར།། སྣང་ས་འོད་འབུམ་མི་འགྱུར་དཔལ་སྒྲོན་དང་།།   འཕྲིན་ལས་ཆོས་སྒྲོན་གོ་འཇོ་མཁའ་འགྲོ་སོགས།།    རྨད་བྱུང་སྤྲུལ་བའི་མཛད་པ་དུ་མ་ཡིས།། བྱམས་བརྩེའི་པང་ནས་འགྲོ་འདི་འདོར་མ་མྱོང་།། ཆུང་ངུའི་དུས་ནས་དག་པའི་བག་ཆགས་སད།། རྩི་ཤིང་ནགས་ཚལ་ལོ་འདབ་རེ་རེའི་རྩེར།། མྱ་ངན་མེད་མཆོག་ཆོས་ཀྱི་རྒྱལ་པོ་ཡི།། མཐོང་གྲོལ་མཚན་དཔེའི་ཞལ་བཟང་ཡང་ཡང་མཇལ།། ཁྱབ་བདག་བླ་མ་འཇམ་པའི་རྡོ་རྗེ་དང་།། སྐྱེ་བའི་ཕྲེང་བར་སྨོན་ལམ་ལས་ཀྱིས་འབྲེལ།། དོན་བརྒྱུད་རྟོགས་པའི་ཉི་མ་སྙིང་ནས་ཤར།། ཤེས་བྱའི་ཆོས་ལ་ཐེ་ཚོམ་མུན་པ་སངས།། ཆོས་བརྒྱད་ཆགས་སྡང་གཏམ་གྱི་ཚིག་ཟུར་མེད།། དོན་ཆུང་བྲེལ་འཚུབ་བྱ་བའི་གཡེང་བ་སྤངས།། དམ་ཆོས་བྱང་ཆུབ་ཁོ་ནར་ཐུགས་འདུན་ཕྱོགས།། ཁྱེད་ནི་ཐར་འདོད་སྐྱེ་བོའི་རྟེན་ས་ཡིན།། ངེས་འབྱུང་ཆར་གྱིས་བརླན་པའི་སྐྱེད་ཚལ་དུ།། བསླབ་གསུམ་པདྨོའི་འདབ་སྟོང་རྒྱས་པ་ལས།། འདུལ་འཛིན་བུང་བས་འཕུར་ལྡིང་ཕྱོགས་དེར་རྩེ།། ཁྱེད་ནི་ངུར་སྨྲིག་འཛིན་པའི་འཁོར་ས་ཡིན།། མཐོན་པོའི་དཔོན་ལ་ངོ་སྲུང་བསྟོད་བསྔགས་མེད།། དམའ་མོའི་དུད་འགྲོ་ཡན་ཆད་བརྩེ་བས་སྐྱོང་།། ཐུགས་རྗེ་ཟླ་བའི་འོད་དཀར་ཀུན་ནས་སྙོམ།། ཁྱེད་ནི་རྒྱལ་སྲས་སེམས་མའི་མིག་ལྟོས་ཡིན།། འཇིགས་རུང་དུར་ཁྲོད་བརྒྱད་ཀྱི་ཚོགས་ཁང་ན།། བརྟུལ་ཞུགས་གྲུབ་པའི་དཔའ་བོ་མཁའ་འགྲོ་ཡིས།། མི་རྐང་གླིང་བུ་སིང་སིང་འབུད་པའི་དུས།། ཁྱེད་ནི་གནས་ཡུལ་མཁའ་འགྲོའི་ཚོགས་དཔོན་ཡིན།། བརྒྱུད་གསུམ་བླ་མའི་བྱིན་རླབས་གངས་ཀྱི་རི།། དད་གུས་ཉི་མའི་འོད་ཀྱིས་ཞུ་བ་ལས།། སྨིན་གྲོལ་ཆུ་བོས་ཐུགས་ཀྱི་རྒྱ་མཚོ་གང་།། ཁྱེད་ནི་མཚུངས་མེད་བླ་མའི་རྒྱལ་ཚབ་ཡིན།། འདོད་རྒུའི་རེ་བ་སྩོལ་བའི་ཡིད་བཞིན་ནོར།། ལྷོ་གླིང་འཛིན་མའི་རྒྱན་དུ་མ་བཞུགས་ཀྱང་།། ཐུགས་ཀྱི་དགོངས་པ་འཕོ་ས་ཁྱེད་ཡིན་པས།། ཁྱེད་ནི་ང་ཅག་སློབ་མའི་སེམས་རྟེན་ཡིན།། བྱ་རྒྱལ་ཐང་དཀར་རྒོད་པོའི་འཕུར་འགྲོས་ཀྱིས།།     བམ་ཆེན་ཚོགས་ཀྱི་འཁོར་ལོར་དགྱེས་རོལ་བའི།།   ཤ་ཟ་མཁའ་འགྲོ་འབུམ་གྱི་གཙོ་མོར་བཞུགས།། མུ་མེད་ཡེ་ཤེས་མཚོ་མོར་གསོལ་བ་འདེབས།། རྣལ་འབྱོར་རིག་འཛིན་གྲུབ་པའི་ཚོགས་ཁང་ཉུལ།།       དཀར་ནག་ལས་ལ་ཚར་གཅོད་རྗེས་སུ་འཛིན།། དམ་ཚིག་མཁའ་འགྲོ་རྒྱ་མཚོའི་གཙུག་ན་བརྗིད།། མུ་མེད་ཡེ་ཤེས་མཚོ་མོར་གསོལ་བ་འདེབས།།   བོད་ཡུལ་གྲུབ་པའི་གནས་ཆེན་དུ་མ་ན།། པདྨའི་ཟབ་གཏེར་སྲུང་བའི་བཀའ་ཉན་མ།། བསྟན་སྲུང་མ་མོ་མཁའ་འགྲོའི་སྙིང་གི་ནོར།། མུ་མེད་ཡེ་ཤེས་མཚོ་མོར་གསོལ་བ་འདེབས།། ལྷ་ཡི་དར་དཔྱངས་རིན་ཆེན་རྒྱན་ཆས་མཛེས།། མེ་ཏོག་ཚལ་ན་རྫུ་འཕྲུལ་གར་གྱིས་རྩེ།། མཁའ་སྤྱོད་ཞིང་གི་མཁའ་འགྲོ་བྱེ་བའི་ཚབ།།…

རྒྱལ་གླུ་བཀྲ་ཤིས་རྟགས་བརྒྱད། ན་མོ་གུ་རུ་བུདྡྷ་མངྒ་ལྃ་ཛ་ཡ་ཡེ།། ༼༡༽ བསྟན་སྲིད་བུམ་པ་བཟང་པོའི་དབྱིངས་ཀློང་དུ།། ཞི་བདེའི་གདུགས་དཀར་སྲིད་ཞིའི་མཁའ་ལ་བསྒྲིངས།། མི་ནུབ་རྒྱལ་མཚན་དཔལ་གྱི་བེའུས་གཏམས།། དྲི་མེད་གསེར་ཉར་དུང་དཀར་རང་བྱུང་གྲགས།། ༼༢༽ ལྷག་བསམ་པདྨ་དཀར་པོའི་ནོར་འཛིན་ལ།། སྐལ་བཟང་དཔག་བསམ་ལྗོན་པའི་ལོ་འདབ་རྒྱས།། ཕན་བདེས་ཆོས་འཁོར་ཟབ་མོས་བསྟན་པ་སྲུང་།། ཕྱོགས་ལས་རྣམ་པར་རྒྱལ་བའི་བཀྲ་ཤིས་ཤོག། ༼༣༽ བཀྲ་ཤིས་ཕྱི་ནང་གསང་བའི་རྟེན་འབྲེལ་བརྟས།། བདེ་ལེགས་མཐུན་པའི་བོད་འབངས་དགའ་ཞིང་སྤྲོ།། ཕུན་ཚོགས་སྡེ་བཞིའི་དཔལ་ལ་ལོངས་སུ་སྤྱོད།། ཀུན་ཏུ་བཟང་པོའི་ཕྲིན་ལས་མཐར་ཕྱིན་ཤོག། ———ཨེ་མ་ཧོས

མཁའ་འགྲོ་རྗེ་བཙུན་སྒྲོལ་མ་དཀར་མོའི་སྨོན་གསོལ་དཔག་བསམ་ལྗོན་བཟང་།། ཨོཾ་ཨཱཿཧཱུཾ་ཧྲཱིཿ མ་ཧཱ་གུ་རུའི་བྱིན་རླབས་དབང་བཞི་ཐོབ།། སྤྱན་རས་གཟིགས་ཀྱི་དངོས་གྲུབ་མ་ལུས་གནང་།། རྗེ་བཙུན་སྒྲོལ་མའི་ཕྲིན་ལས་མཐར་ཕྱིན་ནས།། གྲུབ་བཙན་རྡོ་རྗེས་བར་ཆད་མ་ལུས་སོལ།། གང་བསམ་ལྷུན་གྱིས་གྲུབ་པའི་བཀྲ་ཤིས་ཤོག། དགེ་འདུན་མཐུན་པའི་འཁོར་ལོས་ས་གསུམ་ཁྱབ།། དམ་ཆོས་བཤད་སྒྲུབ་འཁོར་ལོས་ཁམས་གསུམ་འདྲེན།། སངས་རྒྱས་དྲན་པའི་འཁོར་ལོ་སྐུ་གསུམ་བརྟས།། བླ་མ་ཀུན་བཟང་འཁོར་ལོ་སྒོ་གསུམ་ཤར།། འགྲོ་ཀུན་དཀྱིལ་འཁོར་གཅིག་ཏུ་སངས་རྒྱས་ཤོག། ཚེ་འདིར་ཚེ་རིང་ནད་མེད་བདེ་སྐྱིད་ལྡན།། ཕྱི་མ་བདེ་ཆེན་དག་པའི་ཞིང་དུ་སྐྱེས།། ནམ་མཁའ་མ་སྟོང་འཁོར་བ་མ་འཇིག་བར།། བསྟན་དང་འགྲོ་ལ་ཕན་བདེ་ཁོ་ནར་སྒྲུབ།། འབྲེལ་ཚད་དོན་ལྡན་འཁོར་བ་དོང་སྤྲུགས་ཤོག། ——-ཨེ་མ་ཧོས

སློབ་དཔོན་པདྨས་མཁའ་འགྲོའི་ཚོགས་དཔོན་མཛད་པའི་ཚེས་བཅུའི་དུས་ཆེན། ཚེས་བཅུའི་ཕན་ཡོན་སྡུག་བསྔལ་ཀུན་སེལ་ལས། ཨེ་མ་ཧོ༔ སྤྲུལ་པའི་ཕ་གཅིག་པདྨ་ང་ལ་ཉོན༔ ད་དུས་བསྐལ་པ་བཟང་ཞིང་བསོད་ནམས་དར༔ སྙིགས་མའི་དུས་ན་སྡིག་སྤྱོད་འགྲོ་བ་རྣམས༔ ངན་འགྲོའི་གནས་འགྲིམས་ཐར་པ་ཐོབ་པར་དཀའ༔ དེ་དོན་པདྨ་བདག་གིས་རྟོགས་གྱུར་ནས༔ ཕྱི་རབས་དོན་དུ་ཟབ་མོ་སྙིང་པོའི་བཅུད༔ བདེ་གཤེགས་རྣམས་ཀྱི་ཐུགས་ཀྱི་ཚལ་པ་རྣམས༔ ཤར་ལྷོ་ནུབ་བྱང་སྟོད་སྨད་ཐམས་ཅད་དུ༔ རིན་ཆེན་གཏེར་དུ་སྦས་ནས་བཀའ་རྒྱས་བཏབ༔ དུས་མཐར་སྨོན་ལམ་ལས་དག་སྐྱེས་བུ་ཡི༔ ཆ་ལུགས་མ་ངེས་སྤྲུལ་པའི་སྐུ་མཆོག་འགས༔ ཐར་ཐོར་འབྱུང་ཞིང་ཟབ་གཏེར་རྒྱ་བཀྲོལ་ཏེ༔ འགྲོ་བ་འགའ་ཞིག་ཐར་པའི་ལམ་བཀོད་ནས༔ སྐྱེས་བུ་རྣམས་ནི་ཞིང་ཁམས་ཕྱོགས་ཕྱོགས་གཤེགས༔ དེ་དུས་པདྨ་ང་ནི་ལྷོ་ནུབ་ཏུ༔ མ་རུངས་སྲིན་པོའི་ཁ་གནོན་བྱེད་པར་འགྱུར༔ ཕྱི་རབས་དུས་ཀྱི་ལས་ལྡན་སྐྱེས་བུ་དང༔ དམ་ཆོས་སྤྱོད་པའི་རྣལ་འབྱོར་ཕོ་མོ་རྣམས༔ དུས་བཟང་ཡར་གྱི་མར་ངོའི་ཚེས་བཅུའི་དུས༔ ང་ལ་མོས་ན་ཚེས་བཅུའི་མཆོད་པ་གྱིས༔ དམ་རྫས་གཏོར་མ་རིན་ཆེན་འབར་བ་ཤོམས༔ ཚིག་བདུན་གསོལ་འདེབས་སྙན་པའི་དབྱངས་ཀྱིས་བོས༔ མཆོད་པ་བཤམས་ཤིང་མོས་གུས་གདུང་ཤུགས་ཀྱིས༔ སྙིང་ཁོང་རུས་པའི་གཏིང་ནས་ང་ཉིད་ལ༔ གསོལ་བ་བཏབ་ན་པདྨ་ང་ཉིད་ཀྱིས༔ ཟངས་མདོག་དཔལ་གྱི་རི་བོ་རྩེ་མོ་ནས༔ ཁྱེའུ་ངུས་པ་ཕ་མས་མི་བཟོད་ལྟར༔ བརྩེ་བར་བསམས་ནས་དད་ལྡན་ཚོགས་ཁང་དུ༔ སྤྲུལ་པ་དུ་མ་སྣ་ཚོགས་ཆ་ལུགས་སུ༔བསྒྱུར་ནས་འོང་བས་དེ་དོན་གོ་བར་གྱིས༔ དེ་དུས་སྨོན་ལམ་གང་བཏབ་འགྲུབ་པ་དང༔ བྱིན་རླབས་ཞུགས་པའི་རྟགས་ནི་སྣ་ཚོགས་འབྱུང༔ ཁྱད་པར་བག་དྲོ་ཉམས་དགའ་ཤེས་པ་གསལ༔ ཏིང་འཛིན་ཐང་ལྷོད་མེད་པ་འབྱུང༔ དེ་དུས་ང་ཉིད་ཕེབས་རྟགས་ཡིན༔ དེ་དུས་ང་ལ་གུས་པ་གྱིས༔ རབ་ཀྱིས་བསྐྱེད་རྫོགས་གནས་ལུགས་རྟོགས༔ ཕྱི་ནང་གསང་བའི་སྒྲུབ་པ་ཚུགས༔ སེམས་བསྐྱེད་བསམ་པ་བཟང་པོ་ཡིས༔ འགྲོ་དྲུག་ཐུགས་རྗེས་འདྲེན་པ་ཡི༔ ལས་འབྲེལ་སྨོན་ལམ་རྒྱ་ཆེན་ཐོབ༔ འབྲིང་གིས་ལུས་ངག་ཡིད་གསུམ་གྱི༔ སྒྲིབ་སྦྱང་ལས་ལ་བརྩོན་པར་གྱིས༔ བཀའ་ཡི་གསུང་སྒྲོགས་མཆོད་རྟེན་བཞེངས༔ བསྙེན་པར་གནས་དང་ཚྭ་ཚྭ་གདབ༔ སྲོག་བླུ་ཉ་སྟོན་བྱ་བ་དང༔ ལམ་འཕྲང་བཅོས་དང་ཟམ་པ་འཛུགས༔ དགེ་འདུན་མཆོད་དང་བསྐོར་བ་དང༔ རང་རང་གང་མོས་དགེ་བ་གྱིས༔ བདག་ལ་གུས་པས་གསོལ་བ་ཐོབ༔ ཐ་མས་ཚེས་བཅུ་ནམ་ཤར་ཚེ༔ སྲོག་གཅོད་སྡིག་པའི་ལས་མ་བྱེད༔ མདོར་ན་ཡར་ངོའི་ཚེས་བཅུའི་ཉིན༔རབ་འབྲིང་ཐ་མའི་གང་ཟག་གིས༔ སངས་རྒྱས་མཆོད་དང་སེམས་ཅན་གསོ༔ ཐ་ནའང་སྙིང་པོ་གུ་རུ་སིདྡྷི་དང༔ ཡི་གེ་འབྲུ་གཅིག་གུས་པར་བྲིས༔ སྙིང་རྗེའི་སེམས་ཀྱིས་ཆུ་ཕོར་གང༔ སྦྱིན་པ་བཏང་བ་ཐམས་ཅད་ཀུན༔ པདྨ་འབྱུང་གནས་དུས་མཆོད་ཡིན༔ དེ་དུས་ང་ཡི་སྨོན་ལམ་གྱིས༔ དགེ་བ་ཅི་འགྲུབ་འབུམ་འགྱུར་ལམ༔ ང་ཡིས་ཐུགས་རྗེས་རྒྱུན་དུ་སྐྱོབ༔ དེ་དོན་གོ་འམ་སྐལ་ལྡན་ཚོ༔ སྐལ་མེད་ལོག་ལྟ་ཅན་ལ་ཅི་ཆ་ཡོད༔ ང་ཡི་ཐུགས་རྗེའི་གདུལ་བྱ་ཡིས༔ཡིད་ལ་ཟུང་ཞིག་རྗེས་འཇུག་རྣམས༔ ང་ཡི་གསུང་གིས་གདུལ་བྱ་ཡི༔ བོད་ལ་བདེ་སྐྱིད་འབྱུང་འདོད་ན༔ རྒྱལ་ཁྲིམས་ཆོས་ཁྲིམས་བཟང་པོ་ཚུགས༔ དཔེ་ལུང་རྣམ་ཐར་བཟང་པོ་སྐྱོངས༔ ཕྱོགས་ཞེན་ཕུགས་སུ་བཅུག་པ་ཡིས༔སེམས་ཅན་སྡུག་བསྔལ་ལས་མ་གསོག༔ སངས་རྒྱས་བསྟན་པ་ཐུན་མོང་བ༔ ཀུན་ལ་དག་སྣང་ཕྱོགས་མེད་གྱིས༔བཀའ་དང་རྒྱུད་ལུང་མན་ངག་གོ༔ ཕྱི་ནང་གསང་བའི་སྒྲུབ་པ་ཚུགས༔ རང་རང་མོས་པའི་དམ་ཆོས་ལ༔ ལྷག་ཆད་བཅོས་བསླད་མེད་པར་སྒྲུབས༔ དེ་ལྟར་བྱས་ན་བོད་ཡུལ་འདིར༔ བདེ་སྐྱིད་ལྡན་པར་ཐེ་ཚོམ་མེད༔ ཅེས་གསུངས་སོ༔ ཚེས་བཅུའི་ཕན་ཡོན་སྡུག་བསྔལ་ཀུན་སེལ་འདི༔ མཁའ་འགྲོ་ཡེ་ཤེས་མཚོ་རྒྱལ་གྱིས་མདོར་བསྡུས་པ༔ ཟངས་ཡག་བྲག་གི་གཏེར་མའོ༔

༄༅།།ཨེ་ཝཾ་གསང་སྔགས་གླིང་། ཨོཾ་སྭ་སྟི།། ཨེ་ཝཾ་གསང་ཆེན་རྡོ་རྗེ་ཐེག་པའི་སྲོལ།། ཟབ་རྒྱས་གདམས་པའི་བརྒྱུད་འཛིན་རིན་པོ་ཆེ།། སྔགས་འཆང་རིག་པ་འཛིན་པའི་བསྟན་པ་ཉིད།། འཁོར་འདས་རྒྱན་ཏུ་རྟག་ཏུ་མཛེས་གྱུར་ཅིག། ཅེས་པ་འདི་ཡང་རབ་གནས་དབོ་ཟླའི་དབང་ཕྱོགས་མཁའ་འགྲོ་འདུ་བའི་དུས་ཆེན་ལ་ཡུལ་དབུས་གཙང་གི་སྔགས་འཆང་འོད་ཟེར་གོ་ཆའི་ངོར་ཨེ་མ་ཧོས་ཐོ་རངས་ཁར་རྟེན་འབྲེལ་ལྷུན་གྲུབ་ཏུ་སྨོན་པར་དགེའོ།།

མགོན་པོ་དྲེགས་གཤེད་ཀྱི་གསོལ་མཆོད་དངོས་གྲུབ་མྱུར་སྩོལ།  དངོས་དང་ཡིད་སྤྲུལ་ཅི་འབྱོར་བཤམས་ལ། ཧཱུཾ་ཧྲཱིཿ  བཅོམ་ལྡན་མགོན་པོ་དྲེགས་གཤེད་བཀའ་སྲུང་ཆེ།།  གཉིས་མེད་རྒྱུད་རྒྱལ་དུས་ཀྱི་འཁོར་ལོ་སོགས།། ཀུན་མཁྱེན་རྒྱལ་བའི་བསྟན་པ་སྤེལ་མཛད་ལ།། གསོལ་ལོ་མཆོད་དོ་བཅོལ་བའི་ཕྲིན་ལས་མཛོད།།  ཨོཾ་ཀཱ་ལ་ཙཀྲ་དྷརྨཱ་པཱ་ལ་སརྦ་སིདྡྷི་ཕ་ལ་ཧཱུཾ་ཧཱུཾ།།  ཞེས་པ་འདི་ཡང་རབ་གནས་ལྕགས་གླང་དབོ་ཟླའི་དབང་ཚེས་དགེ་བར་ཀུན་མཁྱེན་ཇོ་ནང་གི་བསྟན་འཛིན་དམ་པ་སྔགས་འཆང་རྡོ་རྗེ་འཛིན་པ་མཆོག་ཚང་ཀཿགནམ་རིན་པོ་ཆེས་མཁའ་འགྲོ་ཆེན་མོ་ཀུན་དགའ་ཕྲིན་ལས་དབང་མོའི་རྣམ་ཐར་གསུང་པའི་སྐབས་སུ་ཆོས་སྐྱོང་སྐུ་པར་གནང་བའི་མོད་ལ་གང་ཤར་དུ་གསོལ་མཆོད་དུ་ཨེ་མ་ཧོས་ཐོ་རངས་ཁར་སད་རྨིས་ཚོར་སྣང་དྲག་པོས་སྙིང་ནས་གསོལ་མཆོད་འབུལ་བར་དགེའོ།། །།