ཨེ་ཝྃ་ཧོ།

ཨོ་རྒྱན་རིན་པོ་ཆེ་ལ་མཁྱེན་གསོལ་ཀུན་འདུས་རྒྱལ་བ། ན་མོ་མ་ཧཱ་གུ་རུ་པདྨ་སྃ་བྷ་ཝེ།། ཨེ་མ་ཧོ༔ སངས་རྒྱས་ཆོས་དང་དགེ་འདུན་ངོ་བོ་ཉིད།། ཨོ་རྒྱན་རིན་པོ་ཆེ་ལ་གསོལ་བ་འདེབས།། ཕྱི་ནང་གསང་བའི་འགལ་རྐྱེན་ཀུན་ཞི་ནས།། བསམ་པའི་དོན་ཀུན་ཡིད་བཞིན་འགྲུབ་པར་ཤོག། ཨོྃ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བླ་མ་ཡི་དམ་མཁའ་འགྲོའི་རང་བཞིན་དཔལ།། ཨོ་རྒྱན་རིན་པོ་ཆེ་ལ་གསོལ་བ་འདེབས།། ཉམས་རྟོགས་ཡོན་ཏན་ཡར་ངོའི་ཟླ་བཞིན་རྒྱས།། བསམ་པའི་དོན་ཀུན་ཡིད་བཞིན་འགྲུབ་པར་ཤོག། ཨོྃ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཆོས་སྐུ་ལོངས་སྐུ་སྤྲུལ་སྐུའི་ཐུགས་རྗེ་ཅན།། ཨོ་རྒྱན་རིན་པོ་ཆེ་ལ་གསོལ་བ་འདེབས།། སྐུ་གསུང་ཐུགས་ཀྱི་ཡོན་ཏན་ཀུན་ལ་དབང་།། བསམ་པའི་དོན་ཀུན་ཡིད་བཞིན་འགྲུབ་པར་ཤོག། ཨོྃ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ འགྲོ་འདུག་ཟ་ཉལ་བསམ་སྤྱོད་ཐམས་ཅད་ཀུན།། ཀུན་བཟང་ཨོ་རྒྱན་རྗེ་དང་རོལ་གཅིག་ཏུ།། སྣང་གྲགས་རིག་པའི་ཕྲིན་ལས་འགྲོ་ཁམས་ཁྱབ།། བསམ་པའི་དོན་ཀུན་ཡིད་བཞིན་འགྲུབ་པར་ཤོག། ཨོྃ་ཨཱཿ ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཞེས་པ་འདི་ཡང་རབ་གནས་ཆུ་ཡོས་ནག་པ་ཟླ་བའི་ཡར་ངོའི་་རྒྱལ་བ་གསུམ་པའི་ནམ་ལངས་ཁར་སད་རྨི་བཟང་པོའི་བར་མཚམས་ནས་བྱ་དང་བྱེའུ་མང་པོས་ཨོ་རྒྱན་རིན་པོ་ཆེ་མཁྱེན་ནོ་ཞེས་འབོད་པ་གསལ་བོ་ཐོས་པའི་མོད་ལ་གང་ཤར་བ་དག་མ་བཅོས་སེམས་ཀྱི་རི་མོ་དག་ནགས་ཀླུང་ཆེན་མོ་དེ་ཉིད་དུ་ཤྲཱིཿ སྨྱོན་ཨེ་མ་ཧོས་དད་གུས་མིག་ཆུའི་ཕྲེང་རྒྱུན་བར་ནས་བརྡོལ་བའི་གསོལ་འདེབས་ཟབ་མོའོ།། སརྦ་མངྒ་ལྃ།

གསོལ་འདེབས་དངོས་གྲུབ་ཀུན་འདུས། ཨེ་མ་ཧོ༔ བླ་མའི་བླ་མ་པདྨ་ཆོས དབྱིངས་ཁྱབ་བརྡལ་མཁྱེན་ནོ་། ། བླ་མའི་བླ་མ་དག་པའི་དག་པ་རྒྱལ་བའི་སྲས་གཅིག་ངུར་སྨྲིག་འཛིན་པའི་དྲི་མེད་དགེ་སློང་བྱ་བྲལ་བ།། བརྒྱུད་པའི་རྒྱུད་པ་སྙན་ལས་སྙན་ལ་རབ་ཏུ་རྒྱུད་མཛད་ཤེལ་ཕྲེང་འཛིན་པའི་པདྨ་དཀར།། བྱིན་རླབས་རླབས་ཀྱིས་ཐུགས་རྗེ་འོད་དཀར་ཐུགས་ཀྱི་མཁྱེན་ཀློང་ཀུན་བཟང་དགོངས་པ་ཆོས་ཀྱི་དབྱིངས།། སྐུ་དྲིན་སྲིད་པའི་ཁྱོན་གྱིས་གཞལ་ཡང་གཞལ་མེད་དྲང་སྲོང་རྣལ་འབྱོར་ཆེན་པོ་ཁྱབ་བརྡལ་མགོན་མཆོག་སྙིང་ནས་དྲན།། ཨོྃ་ཨཱཿ ཧཱུྃ་དྷརྨཱ་དྷཱ་ཏུ་གུ་རུ་པདྨ་སིདྡྷི་ཧཱུྃ།། བླ་མའི་བླ་མས་བྱིན་རླབས་ཐོབ་པས་སྐལ་ལྡན་བུ་སློབ་མགོན་པོ་སྐྱབས་ནས་རང་ཤག་བཀྲ་ཤིས་རབ་བརྟན་གླིང་ནས་བྲིས་པ་དགེའོ་ལེགས་འཕེལ།། 11/4/2024

༄། །ཟངས་མདོག་དཔལ་རིའི་སྨོན་ལམ་དཔལ་རིའི་གསང་ལམ་ཞེས་བྱ་བ་བཞུགས་སོ། ། ཨོཾ་ཨཱཿཧཱུྃ་བཛྲ་གུ་རུ་པདྨ་སིདྦྷི་ཧཱུྃཿ རང་བཞིན་རྣམ་དག་བློ་བྲལ་གཉུག་མའི་སྦུབས༔ གསལ་མདངས་འགག་མེད་བདེ་སྟོང་ལོངས་སྐུའི་རྩལ༔ སྤྲུལ་སྐུའི་ཞིང་ཁམས་མི་མཇེད་བཀོད་པའི་ཆ༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ འཛམ་གླིང་ས་ཡི་ལྟེ་བ་རྡོ་རྗེ་གདན༔ དུས་གསུམ་རྒྱལ་བས་ཆོས་འཁོར་བསྐོར་བའི་གནས༔ དེ་ཡི་ནུབ་བྱང་རྔ་ཡབ་ལངྐའི་གླིང༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ བཀོད་པ་ལྷུན་གྲུབ་ཙིཏྟའི་ས་འཛིན་སྤོ༔ རྩ་བ་གདེངས་ཅན་འཇོག་པོའི་ཐོད་དུ་བཅིངས༔ སྐེད་པར་ལུས་མེད་མཁའ་འགྲོས་ཚོགས་འཁོར་བསྐོར༔ རྩེ་མོ་གཟུགས་ཁམས་བསམ་གཏན་སྙོགས་པ་ལྟའི༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ རི་རྒྱལ་དེ་ཡི་རྩེ་མོའི་གཞལ་མེད་ཁང༔ ཤར་ཤེལ་ལྷོ་ཕྱོགས་དབང་སྔོན་བཻ་ཌཱུརྱ༔ ནུབ་ཕྱོགས་པད་རག་བྱང་ཕྱོགས་ཨིནྡྲ་ནི༔ ཕྱི་ནང་བར་མེད་ཟང་ཐལ་དབང་གཞུའི་མདངས༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ ཁྱམས་དང་གྲུ་ཆད་གློ་འབུར་འཇའ་རིས་འཁྱིལ༔ འདོད་སྣམ་ཕ་གུ་དྲ་བ་དྲ་ཕྱེད་དང༔ ཤར་བུ་མདའ་ཡབ་སྒོ་རྒྱན་རྟ་བབ་ཅན༔ ཆོས་འཁོར་གདུགས་ཏོག་བརྡ་དོན་རྫོགས་པའི༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ དཔག་བསམ་ལྗོན་པའི་ཤིང་དང་བདུད་རྩིའི་ཆུ༔ ནེའུ་སིང་སྨན་ལྗོངས་དྲི་བསུང་འཐུལ་བའི་ཁྲོད༔ དྲང་སྲོང་རིག་འཛིན་བྱ་ཚོགས་བྷྲ་མ་ར༔ ཐེག་གསུམ་ཆོས་ཀྱི་སྒྲ་དང་བརྡ་གླུ་སྒྱུར༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ ཕོ་བྲང་གཞལ་མེད་ཆེན་པོའི་ལྟེ་བ་ལ༔ རིན་ཆེན་ཟུར་བརྒྱད་པདྨ་ཉི་ཟླའི་སྟེང༔ བདེ་གཤེགས་ཀུན་འདུས་རང་བྱུང་པདྨ་འབྱུང༔ སྐུ་གསུམ་རིགས་འདུས་འཇའ་ཟེར་ཀློང་ན་བཞུགས༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ གང་གི་ཟབ་གསལ་བདེ་ཆེན་ཡེ་ཤེས་རྩལ༔ སྟོང་ཉིད་སྙིང་རྗེ་ཤར་བའི་སྒྱུ་འཕྲུལ་ལས༔ ཕྱོགས་བཅུ་ཀུན་དང་ཁྱད་པར་བོད་ཡུལ་དུ༔ སྤྲུལ་པ་བྱེ་བ་ཕྲག་བརྒྱ་བར་མེད་འགྱེད༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ གཡས་ཀྱི་གྲལ་ན་རྒྱ་བོད་རིག་འཛིན་རྣམས༔ འོད་གསལ་རྡོ་རྗེའི་རོལ་བར་འབྱམས་སུ་ཀླས༔ གཡོན་གྱི་གྲལ་ན་འཕགས་བོད་པན་གྲུབ་རྣམས༔ བཤད་སྒྲུབ་ཉམས་རྟོགས་བགྲོ་གླེང་ཆོས་སྒྲ་འུར༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ མཐར་སྐོར་བར་མཚམས་རྗེ་འབངས་ཉེར་ལྔ་དང༔ སྤྲུལ་པའི་གཏེར་སྟོན་གྲུབ་པའི་ཁྱུ་མཆོག་རྣམས༔ ཐེག་པ་རིམ་དགུའི་འཁོར་ལོ་ལ་སྤྱོད་ཅིང༔ གཡོ་མེད་དགོངས་པའི་གཟེར་གྱིས་བརྟུལ་ཞུགས་འཛིན༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ ཕྱོགས་བཞི་མཚམས་བརྒྱད་གྲུ་ཆད་བར་ཁྱམས་ཀུན༔ དཔའ་བོ་ཌཱ་ཀི་ལྷ་དང་ལྷ་མོས་ཁེངས༔ རྡོ་རྗེའི་གླུ་གར་མིག་འཕྲུལ་ལྟ་བུར་གཡོ༔ ཕྱི་ནང་གསང་བའི་མཆོད་སྤྲིན་སྟོབ་པར་བྱེད༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ དེ་སྟེང་ལོངས་སྐུའི་གཞལ་མེད་བཀོད་མཛེས་ནང༔ ཕྱག་ན་པདྨ་འཇིག་རྟེན་དབང་ཕྱུག་ལ༔ ཚོམ་བུའི་དཀྱིལ་འཁོར་བསམ་ཡས་འཁོར་གྱིས་བསྐོར༔ རྣམ་རྟོག་བག་ཆགས་དགྲ་གདོན་ཐལ་བར་བྱེད༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ དེ་སྟེང་ཆོས་ཆོས་སྐུའི་ཞིང་ཁམས་ཉམས་དགའ་བར༔ གཞི་སྣང་ཡེ་ཤེས་སྙིང་པོ་ཀུན་ཏུ་བཟང༔ སྣང་མཐའ་རིག་པའི་འཁོར་ལ་བརྡ་ཆོས་སྟོན༔ སྟོན་འཁོར་དགོངས་པ་མཉམ་པའི་ཕྲིན་ལས་ཅན༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ སྒོ་བཞིར་བཀའ་ཉན་རྒྱལ་པོ་ཆེན་པོ་བཞི༔ ཕྱི་ནང་གསང་བའི་ལྷ་སྲིན་སྡེ་བརྒྱད་ཀུན༔ ཕོ་ཉ་མངགས་ནས་མུ་སྟེགས་དམ་སྲི་འདུལ༔ དམ་ཅན་རྒྱ་མཚོའི་དཔའ་རྟགས་རྒྱལ་རྔ་བརྡུང༔ ཟངས་མདོག་དཔལ་གྱི་རི་བོར་སྐྱེ་བར་ཤོག༔ དེ་ལྟར་ཞིང་གི་བཀོད་པ་གསལ་བཏབ་ནས༔ ཕྱི་རོལ་ཡུལ་གྱི་ཟངས་མདོག་དཔལ་རི་ལ༔ ཡུལ་ཅན་ནང་གི་རིག་པས་སྨོན་དེའི་མཐུས༔ རང་ལུས་མི་མཇེད་ཞིང་གི་བཀོད་པའི་ནང༔ རང་སྣང་ཟངས་མདོག་དཔལ་རིར་མངོན་པར་ཤོག༔ ཁྱད་པར་བསྐྱེད་རྫོགས་ཟབ་མོའི་རྟེན་འབྲེལ་གྱིས༔ རྩ་གསུམ་འཁོར་ལྔའི་མདུད་པ་གྲོལ་ནས་ཀྱང༔ སྙིང་དབུས་ཟངས་མདོག་དཔལ་རིའི་ཕོ་བྲང་ཆེར༔ ལྷན་སྐྱེས་ཡེ་ཤེས་རོལ་པའི་རྩལ་རྫོགས་ནས༔ རང་རིག་པད་འབྱུང་རྗེ་དང་མཇལ་བར་ཤོག༔ ཚོགས་སྦྱོར་མཐོང་སྒོམ་མི་སློབ་ལམ་ལྔའི་སྦུབས༔ རབ་དགའ་ནས་བཟུང་ཀུན་ཏུ་འོད་ཀྱི་བར༔ དེ་ལས་རྡོ་རྗེ་ཐེག་པའི་ས་མཆོག་གཉིས༔ ཁྱད་པར་འོད་གསལ་རྫོགས་པ་ཆེན་པོ་ཡི༔ ཐུན་མོང་མ་ཡིན་ཡེ་ཤེས་བླ་མའི་ས༔ བྱར་མེད་ལྷུག་པའི་ངང་དུ་རྫོགས་ནས་ཀྱང༔ གཞི་དབྱིངས་པདྨ་འོད་དུ་གྲོལ་བར་ཤོག༔ གལ་ཏེ་དགོངས་པའི་རྩལ་ཆེན་མ་རྫོགས་ན༔ གསོལ་འདེབས་སྨོན་ལམ་དྲག་པོའི་འཕེན་པ་ཡིས༔ ནམ་ཞིག་འཆི་བ་བཙན་ཐབས་བྱུང་བའི་ཚེ༔ པདྨའི་ཕོ་ཉ་མཁའ་འགྲོ་གར་མཁན་མས༔ མངོན་སུམ་ལག་པའི་ཁུ་ཚུར་ནས་བཟུང་ནས༔…