January 2019

མ་ཧཱ་གུ་རུ་པདྨ་ཀ་རའི་གསུང་གི་ཐོ་ཡིག་བཞུགས་སོ།།

མ་ཧཱ་གུ་རུ་པདྨ་ཀ་རའི་གསུང་གི་ཐོ་ཡིག་བཞུགས་སོ།།

བཀྲ་ཤིས་གཡང་གི་བྱིན་ཆགས་པའི།།
གངས་ལྡན་འཛིན་མའི་དཀྱིལ་འཁོར་ལ།།
དགེ་བའི་ལོ་ཏོག་སྨིན་མཛད་པའི།།
དཔལ་ལྡན་རྫོགས་པའི་སངས་རྒྱས་རྒྱལ།།

ཡུལ་ལ་རྒུད་པ་འབྱུང་བའི་སྔ་ལྟས་སམ།།
ནང་ལ་འཁྲུགས་རྩོད་བྱེད་པའི་གཡོ་ཇུས་སྟེ།།
གང་ཡིན་ངེས་པ་མེད་པའི་སྐུར་འདེབས་དང་།།
ལོག་པར་སྨྲ་རྣམས་རང་རིགས་ཕུང་བའི་རྒྱུ།།

འོན་ཀྱང་དུས་རབས་གསར་བའི་སྦྲང་རྩི་ཡིས།།
སེམས་ཁམས་གཏིང་ནས་མྱོས་པའི་ན་གཞོན་དག།
ཆུ་སྣ་གར་ཁྲིད་ཕྱོགས་སུ་རྒྱུགས་པ་ལྟར།།
ཅི་ཐོས་བདེན་པར་འཛིན་པའི་ཉེན་ཁ་ཡོད།།

དེ་བས་དེ་ལ་ཕན་པའི་སླད།།
གསལ་བཤད་གཡུ་སྦྲང་གཞོན་ནུ་མ།།
གངས་ཅན་ཡངས་བའི་སྐྱེད་ཚལ་དུ།།
ཅི་འདོད་གར་གྱིས་འཕུར་ལ་བྲེལ།།

ཤེས་ལྡན་སྤྱན་དཀྱུས་ཡངས་བ་དག་ལ་ངལ་བ་འདི་དག་གཞལ་ཡང་མི་དགོས་མོད། གསར་བུ་ཅི་སྨྲས་གཏམ་གྱིས་ཐེ་ཚོམ་གྱི་གནས་ལ་ལྷུང་བར་འགྱུར་བ་དག་ལ་ཕན་པའི་སླད་དུ་སློབ་དཔོན་གུ་རུ་རིན་པོ་ཆེ་བཀའ་དྲིན་ཅན་གྱི་གསུང་ཟབ་མོ་གཏེར་མ་དང་། ད་ལྟའི་དུས་ན་འགྲོ་བ་མིའི་འདུལ་བྱ་ལ་དངོས་སུ་མི་སྣང་ཞིང་། 
ལྷ་ཀླུ་གནོད་སྦྱིན་གྱི་ཡུལ་ན་བཞུགས་པ་དག་མ་ཡིན་པར་ད་ལྟ་ཡང་ང་ཚོ་སོ་སྐྱེ་རྟོག་གེ་བ་དག་ལ་དངོས་སུ་སྣང་བའི་གསུང་རྩོམ་རྣམས་ངོ་སྤྲོད་ཅུང་ཟད་བགྱིད་པར་འདོད། དེ་ཡང་འོག་ཏུ་གཞུང་སོ་སོའི་མཚན་ནམ་མིང་དང་། གཞུང་སོ་སོའི་མཛད་བྱང་ངམ་མཇུག་བྱང་དང་། ད་ལྟ་དཔར་དང་དེབ་གང་དུ་བཞུགས་མིན་རེ་རེ་ནས་འགོད་པས་གོ་རིམ་དང་མཐུན་པར་གཟིགས་པས་འཐུས་པར་འགྱུར་རོ།། འོ་ན་སློབ་དཔོན་ཆེན་པོ་ལ་གསུང་འབུམ་མེད་པ་ཅི་ཡིན་སྙམ་ན། གསུང་འབུམ་ཞེས་པ་བོད་རང་གི་བླ་མ་འགའ་རེས་ཕྱིས་སུ་སྲོལ་བཏོད་ནས་དར་བ་ཞིག་ཡིན་པ་ལས་རྒྱ་གར་རང་དུ་སྡེ་དང་ཚོགས་སོགས་སུ་འབོད་པ་མ་གཏོགས་གསུང་འབུམ་ཞེས་པའི་འབོད་སྲོལ་དེ་ཡོད་པར་མ་མཐོང་ཞིང་།
སློབ་དཔོན་རྒྱ་གར་གྱི་པཎྜི་ཏ་ཡིན་སྟབས་གསུང་དང་ཕྱག་དཔེ་དག་བཀའ་བསྟན་གྱི་ནང་དུ་བཞུགས་པ་ལས་གསུང་འབུམ་ལོགས་སུ་མེད་པ་ཡིན། དཔེར་ན་མགོན་པོ་ཀླུ་གྲུབ་ཀྱི་གསུང་འབུམ་ཞེས་པ་ཞིག་མེད་པ་བཞིན་ནོ།།

གཞུང་གི་མིང་།
༼འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་ཐབས་ཀྱི་མན་ངག་རྒྱ་ཆེར་བཤད་པའི་འགྲེལ་པ།༽
གཞུང་གི་མཇུག་བྱང་། 
༼མཆོག་ར་བ་སྙིང་པོ་རྩ་བའི་མན་ངག་པདྨ་འབྱུང་གནས་ཀྱིས་མཛད་པའི་འགྲེལ་པ་རྫོགས་སོ།།༽
སྡེ་དགེ་བསྟན་འགྱུར་༼ཛི༽དུམ་པར་བཞུགས།

གཞུང་གི་མིང་།
༼དམ་ཚིག་ལྔ་པ། ༽
གཞུང་གི་མཇུག་བྱང་། ༼དམ་ཚིག་ལྔ་པ་ཞེས་བྱ་བ་སློབ་དཔོན་དཔལ་པདྨ་འབྱུང་གནས་ཞབས་ཀྱིས་མཛད་པ་རྫོགས་སོ།།༽
སྡེ་དགེ་བསྟན་འགྱུར་༼ཉ༽དུམ་པར་བཞུགས།

གཞུང་གི་མིང་།
༼རྡོ་རྗེ་རྣམ་པར་འཇོམས་པའི་གཟུངས་ཀྱི་རྣམ་པར་བཤད་པ་རྡོ་རྗེ་སྒྲོན་མ་ཞེས་བྱ་བ། ༽
གཞུང་གི་མཇུག་བྱང་།
༼གསང་སྔགས་མཐའ་དག་ལ་མངའ་བརྙེས་པའི་སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པའོ།།༽
སྡེ་དགེ་བསྟན་འགྱུར་༼ཐུ༽དུམ་པར་བཞུགས།

གཞུང་གི་མིང་།
༼དཔལ་འཇིག་རྟེན་མགོན་པོ་མཁའ་ལ་སྤྱོད་པའི་སྒྲུབ་ཐབས་ཞེས་བྱ་བ།༽
གཞུང་གི་མཇུག་བྱང་།
དཔལ་ལྡན་འཇིག་རྟེན་མགོན་པོ་ཁར་ས་པཱ་ཎའི་སྒྲུབ་ཐབས་ཞེས་བྱ་བ་གྲུབ་ཆེན་པདྨ་འབྱུང་གནས་ཞབས་ཀྱིས་མཛད་པ་རྫོགས་སོ།།
སྡེ་དགེ་བསྟན་འགྱུར་༼ནུ༽དུམ་པར་བཞུགས།

གཞུང་གི་མིང་།
༼རྡོ་རྗེ་རྣམ་པར་འཇོམས་པའི་ཐེམ་ཡིག་གསང་བ་ཞེས་བྱ་བ།༽
གཞུང་གི་མཇུག་བྱང་།
༼རྡོ་རྗེ་རྣམ་པར་འཇོམས་པའི་ཐེམ་ཡིག་གསང་བ་ཞེས་བྱ་བ་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ།།༽ སྡེ་དགེ་བསྟན་འགྱུར་༼པུ༽དུམ་པར་བཞུགས།

གཞུང་གི་མིང་།
༼ཁོར་ཡུག་མངར་བའི་སྒྲུབ་ཐབས་ཞེས་བྱ་བ། ༽
གཞུང་གི་མཇུག་བྱང་།
༼ཁོར་ཡུག་མངར་བའི་སྒྲུབ་ཐབས་སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པ།༽ སྡེ་དགེ་བསྟན་འགྱུར་༼ཕུ༽དུམ་པར་བཞུགས།

གཞུང་གི་མིང་།
༼ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས།༽
གཞུང་གི་མཇུག་བྱང་།
༼ཚིག་ལྷུག་པའི་ཨ་ར་པ་ཙ་ནའི་སྒྲུབ་ཐབས་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ།།༽
སྡེ་དགེ་བསྟན་འགྱུར་༼མུ༽དུམ་པར་བཞུགས།

གཞུང་གི་མིང་།༼གཞལ་ཡས་ཁང་གསལ་བར་བྱེད་པའི་མངོན་རྟོགས་མུན་སེལ་སྒྲོན་མ་བཞུགས།༽
གཞུང་གི་མཇུག་བྱང་།
༼གཞལ་ཡས་ཁང་གསལ་བའི་མངོན་རྟོགས་མུན་སེལ་སྒྲོན་མ་ཞེས་བྱ་བ་སློབ་དཔོན་པདྨ་འབྱུང་གནས་ཀྱིས་མཛད་པ་རྫོགས་སོ།།༽
སྡེ་དགེ་བསྟན་འགྱུར་༼ཙུ༽དུམ་པར་བཞུགས།

༼ལྟ་བའི་ཕྲེང་བ་ཞེས་བྱ་བའི་མན་ངག་༽སློབ་དཔོན་ཆེན་པོ་པདྨ་འབྱུང་གནས་བོད་ཡུལ་ནས་སླར་གཤེགས་ཀར་བྲག་དམར་མཚོ་མོ་འགུལ་གྱི་ནེ་ཐང་དུ་དགུང་གསུམ་བཞེས་ནས་ལྷ་སྲས་ཁྲི་སྲོང་ལྡེ་བཙན་དང་རྗེ་འབངས་ལ་འགྱེས་ཕྱག་གི་དུས་སུ་མཛད་པ་རྫོགས་སོ།།

སློབ་དཔོན་ཆེན་པོ་པདྨ་འབྱུང་གནས་ཀྱིས་པཎྜི་ཏ་མཛད་ནས་བསྒྱུར་བའི་བཀའ་བསྟན་གྱི་སྐོར།

དྲག་སྔགས་འདུས་པ་རྡོ་རྗེ་རྩ་བའི་རྒྱུད་ཅེས་བྱ་བ་རྫོགས་སྷོ།། །།
རྒྱ་གར་གྱི་མཁན་པོ་ཆེན་པོ་སློབ་དཔོན་པདྨ་འབྱུང་གནས་དང་། བོད་ཀྱི་ལོ་ཙྪ་བ་བདག་བཻ་རོ་ཙ་ནས་བསྒྱུར་ཅིང་ཞུས་ཏེ་གཏན་ལ་ཕབ་པ།། །། རྒྱལ་པོ་ཁྲི་སྲོང་ལྡེ་བཙན་གྱི་བླའི་ཕྱག་དཔེ་ལ་ཞལ་བཤུས་པ་ལས་བརྒྱུད་པའོ།།

དེ་ཁོ་ན་ཉིད་སྒྲོན་མ་ཞེས་བྱ་བའི་རྒྱན། བླ་མའི་མན་ངག་རྒྱུད་མ་ཆད་པ། དེ་ཁོ་ན་ཉིད་ཉི་ཟླ་སྣང་བ་ཞེས་བྱ་བའི་སྒྲུབ་ཐབས་ཆེན་པོ་དགེ་སློང་ཀླུ་སྒྲུབ་ཀྱིས་མཛད་པ་རྫོགས་སོ།། །།པཎྜི་ཏ་གུ་རུ་པདྨ་འབྱུང་གནས་དང་། ལོ་ཙཱ་བ་གླང་དཔལ་གྱི་སེང་གེས་བསྒྱུར་རོ།།
༢༠༡༩ལོའི་
བོད་ཟླ་དང་པོའི་ཚེས་བཅུ་དྲུག་ལ་ཨ་དཔལ་གྱིས་སྤེལ་བའོ།།

Leave a Reply

Your email address will not be published.