ངལ་གསོ་དང་ཉི་འོད་ལ་བལྟ་བཞིན་པའོ།།

ངལ་གསོ་དང་ཉི་འོད་ལ་བལྟ་བཞིན་པའོ།།
ཨེ་མ་ཧོ།།
དྲི་ཞིམ་མེ་ཏོག་ཡར་སྐྱེ་དགུང་དང་མཉམས།།
བསིལ་རླུངས་འཇམ་པོས་ལུས་ཟུངས་ངང་གིས་བརྟས།།
ཉི་འོད་དྲོན་པོ་འཇའ་འོད་ཀློང་ནས་འཆར།།
ཚེ་སྲོག་རྡོ་རྗེ་བྲག་རིའི་བཅུད་དུ་སྨིན།།
བླ་མ་དམ་པས་རི་ཀླུང་འཕྲིན་དུ་འབུལ།།
ཡབ་ཆེན་རྒྱལ་པོས་བཀའ་ནན་གཙུག་ཏུ་བབས།།
ཡུམ་ཆེན་དགོངས་པའི་དབྱིངས་ནས་རྒྱུན་དུ་གཟིགས།།
བག་གྲོ་དགྱེས་པ་རྡོ་རྗེ་ངལ་གསོར་གནས།།
འགའ་རིས་ལྷ་དང་བླ་མ་ཉིད་དུ་མཇལ།།
འགའ་རེས་ཁ་མང་ལག་མང་ཙམ་དུ་བལྟ།།
བཟང་ངན་དོ་མ་མཉམ་པའི་འཇིག་རྟེན་དུ།།
མི་རྣམས་ཕལ་ཆེར་གྲགས་པའི་རྗེས་རྒྱུགས།།
གང་ལྟར་བདེ་འོ་སྐྱིད་པ་བླ་མའི་དྲིན།།
ཕན་བདེ་ལེགས་ཚོགས་འབྱུང་བ་བདེན་པའི་དྲིན།།
ཅི་བསམ་ཡིད་བཞིན་གྲུབ་པར་ཆོས་སྐྱོང་དྲིན།།
གུ་ཡངས་བློ་བདེར་གནས་པར་རང་གིས་དྲིན།།
ལུས་ཀྱིས་རྣལ་འབྱོར་གཅེར་བུ་ཐང་དུ་ཉལ།།
ངག་གིས་བཛྲ་གུ་རུའི་ཛབ་དབྱངས་ངང་།།
ཡིད་ཀྱིས་རྒྱུ་བ་དབྱིངས་རིག་མ་བུ་འདྲིས།།
བདེ་སྐྱིད་དོ་ཟླ་དབེན་པའི་ཨེ་མ་ཧོ།།
ཤྲཱིས་དབྱིན་ཡུལ་ཨེ་ཝཾ་སྡུམ་རའི་ནང་ནས་བྲིས་པར་དགེའོ།།