མི་ལོ་ཉེར་ལྔའི་ཡར་སྔོན་ནས་རྨིས་པའི་རྨི་ལམ་གྱི་བདེན་པ་ད་མངོན་དུ་གྱུར་ཅིང་།

མི་ལོ་ཉེར་ལྔའི་ཡར་སྔོན་ནས་རྨིས་པའི་རྨི་ལམ་གྱི་བདེན་པ་ད་མངོན་དུ་གྱུར་ཅིང་། ཁྱད་པར་དུ་མི་གཤིས་གསེར་དང་ལྷག་བསམ་དུང་ལས་གྲུབ་པའི་༸མཆོག་སྤྲུལ་སྐྱབས་རྗེ་༸ཡིད་བཞིན་ནོར་བུ་༸ཨ་འགྱུར་སྐུ་ཕྲེང་ལྔ་བ་རྫོགས་ཆེན་པ་ཐུབ་བསྟན་སྙན་གྲགས་རིན་པོ་ཆེས་དཀའ་སྤྱད་འབད་བརྩོན་ལས་བསྐྲུན་པའི་སྐྱེན་པོ་དགོན་མདོ་སྔགས་བཤད་སྒྲུབ་དར་རྒྱས་གླིང་རྟེན་དང་བརྟེན་པ་བཅས་ལེགས་པར་བཞེངས་ཟིན་པ་ལ་ལེགས་གཟིགས་དང་། ཁྲ་ཉི་མ་ལེབ་དུ་རྒྱན་དང་རྒྱལ་གང་ཡང་འཇོགས་མི་དགོས་པར་སྒོ་རྟགས་ཨང་དང་པོ་སྟེ། སྒོམ་ཁང་རྩེ་ཕུད་དེ་ངོས་ལ་གནང་སྦྱིན་བྱས་འདུག ཨེ་ཝྃ་གནམ་རྫོང་ཕྱུག་མོ་ཞེས་གསོལ་ཞིང་དུང་ལེན་བྱས་པ་ཡིན། བཀའ་དྲིན་ཆེ་ཞུ་དང་། སྤྱིར་བདག་ལ་མཚོན་ན་ཆོས་ཚོགས་དང་དགོན་སྡེ་དང་ལྷ་ཁང་གི་བདག་པོ་ལ་ཆགས་སྲེད་ཞེན་འདོད་པ་གཏན་ནས་དབེན་ན་ཡང་། ད་ཐེངས་རྟེན་འབྲེལ་དང་སྨོན་ལམ་ལ་དུང་ལེན་བྱས་པར་བསྟན་འགྲོ་ལ་ཕན་བདེའི་ཐབས་ཤེས་ཁོ་ན་ལས་གཞན་གང་ཡང་མིན་ནོ།།

ཨ་འགྱུར་རྒྱལ་བའི་ཐུགས་བསྐྱེད་ནམ་མཁའ་ལས།།

ཐུབ་བསྟན་སྙན་པའི་གྲགས་པ་བར་སྣང་ཁྱབ།།

འཛམ་གླིང་ཡངས་རྩེའི་དགོན་པ་མདོ་སྔགས་གླིང་།།

འཁོར་འདས་དཔལ་དུ་རྟག་ཏུ་འཚོ་གྱུར་ཅིག།

———ཨེ་མ་ཧོས ༢༡/༧/༢༠༢༣་ལའོ།