༈ རྨེ་སྤྲུལ་བསྟན་འཛིན་རྒྱ་མཚོ་མཚམས་སྦྱོར་མདོར་བསྡུས།
༈ རྨེ་སྤྲུལ་བསྟན་འཛིན་རྒྱ་མཚོ་མཚམས་སྦྱོར་མདོར་བསྡུས།
གཙང་རིགས་སྐལ་བཟང་རྣམ་འདྲེན་གྱིས།
༈གངས་ལྗོངས་སྨྲ་བའི་དབང་ཕྱུག་རྨེ་སྤྲུལ་རིན་པོ་ཆེ་ལུང་རྟོགས་བསྟན་འཛིན་རྒྱ་མཚོ། དཔལ་མཚོ་བྱུང་འཛུམ་པའི་མེ་ཏོག་མཆོག་ནི། སྤྱི་ལོ་༡༩༦༨ལོ་སྟེ་བོད་རབ་བྱུང་བཅུ་དྲུག་པའི་རབ་རྒྱལ་ས་སྤྲེལ་ལོའི་ཟླ་དང་པོའི་ཚེས་བདུན་ཉིན་མདོ་སྨད་རྟའི་ཆོལ་ཁ་ཝ་ཤུལ་རྨེ་བའི་ཡུལ། གསེར་དེའུ་ཞེས་པའི་སར་ཡབ་ཆོས་ཡུལ་བདུད་འདུལ་དང་། ཡུམ་གདོང་སྣ་བཟའ་རྣམ་དཀར་གཉིས་ཀྱི་སྲས་སུ་སྐུ་འཁྲུངས། ཆུང་མིང་ལ་བསྟན་པའི་རྒྱལ་མཚན་ཞེས་གསོལ། མི་རིང་བར་ཝ་ཤུལ་དཔོན་ཚེ་དབང་དཔལ་ལྡན་གྱིས་མདོ་རིན་པོ་ཆེ་ཟིལ་གནོན་དགྱེས་པ་རྡོ་རྗེའི་ཡང་སྤྲུལ་ངོས་འཛིན་བྱེད་ཆེད་བྱིས་པ་དྲུག་ཅུ་ལྷག་གིི་མཚན་ཐོ་བསྡུས་ཏེ་སྐྱབས་མགོན་ས་སྐྱ་གོང་མའི་མདུན་དུ་ཐུགས་བརྟག་ཕུལ་ཚེ། ཁོང་གིས་སྤྲུལ་སྐུ་འདིའི་མཚན་ཐོ་ཕྱག་ཏུ་བཟུང་ནས་འདི་ནི་བསམ་གྱིས་མི་ཁྱབ་པའི་སྐྱེས་ཆེན་དམ་པ་ཞིག་སྟེ་བསྟན་དང་འགྲོ་བའི་དོན་རྒྱ་ཆེན་པོ་འགྲུབ་ངེས་ཤིག་རེད་ཅེས་གསུངས་ཀྱང་བླ་མ་སུའི་སྤྲུལ་སྐུ་ཡིན་གསལ་པོར་མ་གསུངས། རེ་ཞིག་རྨེ་བའི་མཁན་པོ་ནོར་བུ་བསྟན་འཛིན་གྱི་མཚན་ཐོགས་ཤིག་ཅེས་བཀའ་ཕེབས་ཤིང་། བསྟན་འཛིན་རྒྱ་མཚོ་ཞེས་པའི་མཚན་གསོལ། ཝ་ཤུལ་རྨེ་བའི་ཡུལ་གྱི་བླ་མ་ཆོས་ལྡན་སོགས་སྐྱེས་ཆེན་དམ་པ་འགས། རྨེ་བའི་མཁན་ཆེན་རྣམ་བཞིའི་ཡ་གྱལ་མཁས་གྲུབ་གཉིས་ལྡན་གྱི་མཁན་པོ་བསོད་ནམས་མགོན་པོའི་ཡང་སྤྲུལ་ཉིད་དུའང་ངོས་འཛིན་མཛད། སྐུ་ན་ཆུང་བའི་དུས་ནས་མཁྱེན་པའི་ཤེས་རབ་དང་བརྩེ་བའི་སྙིང་རྗེ་གཉིས་བཅོས་མིན་དུ་མངའ་ཞིང་། ཡི་གེ་འབྲི་ཀློག་སོགས་ཆེར་མ་བསླབས་ཀྱང་ཚེགས་མེད་དུ་མཁྱེན། ཆོ་གའི་ཕྱག་ལེན་དང་འདོན་ལྟ་དབྱངས། མཆོད་པ་བཅའ་བཤམས། ལྷ་རིས་འབྲི་བ་སོགས་བརྡ་ཙམ་བསྟན་པས་མཁྱེན། ཡུལ་དེར་བཞུགས་པའི་གཞུང་ལུགས་རབ་འབྱམས་ལ་མཁྱེན་རྒྱ་ཡངས་པའི་མཁས་དབང་སྣང་གྲོལ་རབ་འབྱམས་དང་། སྤྲུལ་རྡོ་རྗེ་དགྲ་འདུལ་སོགས་ཡོངས་འཛིན་དུ་བསྟེན་ཏེ་བློ་སྦྱོང་དང་ཐུན་མོང་གི་རིག་གནས་འགའ་གསན་སྦྱང་མཛད། ཁྱད་པར་མཁན་པོ་སྲས་མཆོག་མདུན་ནས་རྒྱལ་སྲས་ལག་ལེན་སོ་བདུན་མ་གསན་པ་ནས་བཟུང་སྔར་གྱི་རྩེ་དགོད་གཡེང་བ་སོགས་བྱིས་པའི་སྤྱོད་པ་ཐམས་ཅད་ཆམས་ཀྱིས་བཞག་སྟེ་རྒྱལ་སྲས་བྱང་ཆུབ་སེམས་དཔའི་ཉམས་ལེན་ཁོ་ན་ཐུགས་གཙིགས་གནང་ནས་སྒོ་གསུམ་གྱི་མཛད་པ་ཀུན་བལ་ལ་ཆུ་བཏབ་པ་བཞིན་འཇམ་ཞིང་ལྷོད་དུང་ངེ་བ་ཞིག་ཏུ་གྱུར་སོང་ཞེས་ཁོང་ལ་རྒྱུས་ཡོད་ཀུན་གྱིས་གླེང་།
དགུང་གྲངས་བཅུ་བདུན་སྟེང་རྨེ་བའི་མཁན་པོ་རིག་གནས་མདུན་ནས་དབུ་སྐྲ་བསིལ་ཞིང་རབ་བྱུང་དགེ་ཚུལ་གྱི་སྡོམ་པ་མནོས། དཀོན་མཆོག་ཆོས་ཀྱི་འབྱུང་གནས་ཞེས་པའི་མཚན་གསོལ། སྣང་གྲོལ་རབ་འབྱམས་པ་སོགས་ཀྱི་མདུན་ནས་དཔེ་ཁྲིད་ཞུ་སྐབས་ཁོང་གིས་ཡར་སློབ་དཔོན་ལ་དྲི་བ་འགའ་བཀོད་པར། སྤྲུལ་སྐུ་འདིའི་རྣམ་དཔྱོད་ཀྱི་མཁྱེན་རྩལ་ལ་ཡོངས་འཛིན་རྣམས་ཧ་ལས་ཤིང་། འདི་ནི་སེ་འབྲས་དགའ་གསུམ་སོགས་ཆོས་སྡེ་ཆེན་པོ་ཞིག་ཏུ་མ་ཕེབས་ན་ངེད་ཅག་ལྟ་བུས་ཡོངས་འཛིན་བྱེད་ས་ཞིག་ལར་ནས་མ་རེད་ཅེས་བཀའ་སློབ་ཡང་ཡང་གནང་ཞིང་ཐུགས་གཙིགས་བླ་མེད་མཛད།
འདིའི་སྐབས་སུ་ཁམས་གསེར་རྟའི་ཡུལ་གྱི་མཁན་ཆེན་དམ་པའི་མཚན་གྱི་སྙན་པ་ཐོས་ཤིང་། བླ་སློབ་ཞལ་འཛོམས་ཀྱི་ཐུགས་བསྐྱེད་སྨོན་ལམ་བཟང་པོའི་འབྲས་བུ་དུས་སུ་སྨིན་ཏེ། སྤྱི་ལོ་༡༩༨༧ལོར་ཡོངས་རྫོགས་བསྟན་པའི་སྒྲོན་མེ་ཆོས་རྗེ་དམ་པ་ཡིད་བཞིན་ནོར་བུ་མཁན་ཆེན་༧འཇིགས་མེད་ཕུན་ཚོགས་འབྱུང་གནས་ཞེས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་དེའི་ཞབས་པད་གཙུག་ཏུ་བླངས་ཤིང་སངས་རྒྱས་དངོས་མཐོང་གི་དད་པས་ཚུལ་བཞིན་བསྟེན་ཏེ། སྨིན་གྲོལ་ཆོས་ཀྱི་དཔལ་ལ་ངོམས་མེད་དུ་རོལ། དེ་ནས་བཟུང་གསེར་ཐང་བླ་རུང་ལྔ་རིག་ནང་བསྟན་སློབ་གྲྭ་ཆེན་མོ་ནས་མདོ་སྔགས་གཞུང་ལུགས་རབ་འབྱམས་ལ་གཟིགས་རྟོགས་རྒྱ་ཆེར་མཛད་དེ་མཁས་པའི་གྲགས་པ་སྔར་ལས་རྒྱས། ཆོས་རྗེ་མཆོག་གི་རྟོགས་བརྗོད་དད་གསུམ་མུ་ཏིག་དཀར་པོའི་འཁྲི་ཤིང་དང་། ཆོས་རྗེ་མཆོག་དྭངས་བསིལ་རི་བོ་རྩེ་ལྔར་ཕེབས་པའི་རྟོགས་བརྗོད་མནྡྷ་རའི་ཆུན་པོ་སོགས་མདོ་དབུས་ཁམས་གསུམ་ན་སྙན་པའི་ཚད་དུ་གླེང་བ་འདི་དག་ཀྱང་མཛད། དགུང་གྲངས་ཉེར་གསུམ་སྟེ་ཕྱི་ལོ་༡༩༩༠རབ་གནས་ལྕགས་རྟ་ལོར་གསེར་ཐང་བླ་རུང་ལྔ་རིག་ནང་བསྟན་སློབ་གླིང་ནས་སྡོམ་བརྩོན་སྡེ་སྣོད་འཛིན་པ་ཞེས་མཁན་པོའི་མཚན་རྟགས་ཕུལ། ཆོས་རྗེ་མཆོག་གི་ཞལ་ནས་གངས་ལྗོངས་སྨྲ་བའི་དབང་ཕྱུག་རྨེ་སྤྲུལ་བསྟན་འཛིན་རྒྱ་མཚོ་ཞེས་མཐོང་གཟིགས་བླ་མེད་མཛད་དེ་བླ་རུང་ལྔ་རིག་ནང་བསྟན་སློབ་གྲྭ་ཆེན་མོའི་གཙོ་འཛིན་གཞོན་པ་ཉིད་དུ་བསྐོ་བཞག་གནང་། གཞན་ཡང་ཆོས་རྗེ་མཆོག་གི་གསུང་འཕྲོས་ལས། རྫོང་ཀུན་བཟང་ཉི་མའི་གཏེར་ལུང་དུ། རྩལ་ལྡན་སྤྲེལ་གྱི་གཞོན་ནུཿ ལོ་འབྲས་བཅུད་ཀྱིས་བརྒྱན་བཞིནཿ དུང་གི་རི་ལ་ཡན་གྱུརཿ དབང་མེ་ཞགས་པས་འཛིན་དགོསཿ སྟག་མོས་རང་ས་ཟིན་ཚེཿ དབང་ཞགས་ཡིན་པ་ཤེས་དགོསཿ ཞེས་ཤར་དུང་རིའི་ཉེ་འདབས་ནས་དགུང་སྙིང་སྤྲེལ་ཅན་གྱི་སྐྱེས་བུ་ཞིག་ངེད་ཀྱི་མཛད་འཕྲིན་སྤེལ་བའི་བྱེད་པོ་ཉིད་དུ་ལུང་གིས་བསྟན་འདུག་པ་དེ་ནི་སྤྲུལ་སྐུ་བསྟན་འཛིན་རྒྱ་མཚོ་འདི་ཡིན་ངེས། སྤྲུལ་སྐུ་འདི་ཉིན་གཅིག་ལ་མེད་ནའང་ངའི་སེམས་ལ་སྒར་འདི་སྟོང་པ་ཡིན་པའི་ཚོར་སྣང་ཞིག་སྐྱེས་འདུག་ཅེས་ཡང་ཡང་གསུངས།
སྤྲུལ་སྐུ་རིན་པོ་ཆེ་འདི་ནི་མི་གཞི་བཟང་ཞིང་། ངང་རྒྱུད་འཇམ་པ། གཞུང་དྲང་བ། རང་ཚུགས་ལྡན་པ། བྱ་བ་གང་ཞིག་སྒྲུབ་ཀྱང་བློ་གཟུ་བོར་གནས་པའི་དཔྱད་པ་སྔོན་དུ་མཛད་པ། མཐོ་དམན་དྲག་ཞན་སུ་དང་ཡང་འགྲོགས་བདེ་བ། སྐུའི་བཞིན་མདངས་གསལ་བས་མཐོང་ན་མི་མཐུན་པ་མེད་པ། གསུང་གི་གདངས་དབྱངས་འཇམ་པས་ཤིན་ཏུ་ཕེབས་པར་སྨྲ་ཞིང་གཞན་སེམས་སྲུང་བ། ཐུགས་ཀྱི་བྱམས་བརྩེ་ཆེ་བས་ཉམ་ཐག་སྐྱེ་བོ་རྣམས་ལ་ལྷག་པར་མཉེས་ཤིང་གཤིན་པ། སྲོག་ཆགས་གྲོག་མ་ཚུན་ལའང་བརྩེ་བའི་སྙིང་རྗེ་གཞན་ལས་ཆེ་བ་ནི་འཕགས་ཆེན་བྱང་ཆུབ་སེམས་དཔའི་རང་གཤིས་ལྷང་ངེར་གསལ་བ་ཞིག་གོ །འཛམ་གླིང་སྤྱིའི་ལོ་རྒྱུས་དང་གནའ་དེང་གི་རིག་གནས་ཀུན་ལ་མཁྱེན་རྒྱ་ཆེ་ཞིང་། ཁྱད་པར་བོད་ཀྱི་བཟོ། གསོ་བ། སྒྲ། ཚད་མ། ནང་དོན་རིག་པ་མདོ་སྔགས་རྒྱུད་སྡེ་དང་བཅས་རིག་པའི་གནས་ལྔ་མ་མཁས་ཤིང་། འཇིག་རྟེན་ཆོས་བརྒྱད་ལ་མི་དགྱེས་པ། འུད་སྒྲོག་གི་གྲགས་སྙན་མི་གཉེར་བ། རྒུད་སྐྱོབ་དང་གནང་སྦྱིན། ཚེ་ཐར་དང་སྲོག་བླུ་སོགས་ཕལ་ཆེར་གསང་བའི་སྟབས་ཀྱིས་མཛད། སྔོན་ནས་ད་བར་ཆོས་སྒར་ཆེན་པོ་འདིར་རྒྱུན་བཞུགས་མཛད་དེ། ཐུན་མོང་རིག་གནས་འཛིན་གྲྭ་དང་། ཚད་མའི་འཛིན་གྲྭ། ཐུན་མིན་རྒྱུད་སྡེ་མན་ངག་གི་འཛིན་གྲྭ་སོགས་ཀྱི་མཁན་པོ་མཛད་ཅིང་ཆོས་སྒར་གྱི་འདུས་པ་སྤྱི་ལ་སྨིན་བྱེད་དབང་དང་གྲོལ་བྱེད་ཁྲིད་ཀྱི་གདམས་པ་སོགས་ལེགས་བཤད་ཆོས་ཀྱི་དགའ་སྟོན་ཕངས་མེད་དུ་བསྩལ་བས་བླ་རུང་ཆོས་སྒར་ཆེན་མོ་ན་ཁོང་གི་སློབ་མར་མ་གྱུར་པ་ཞིག་ཕལ་ཆེར་མེད་པ་ལྟ་བུ་ཡིན། ཁོང་གི་གསུང་རྩོམ་ནི། མདོ་སྔགས་རིག་གནས་ལོ་རྒྱུས་དང་བཅས་པ། དཔྱད་པ་གསུམ་གྱིས་ལེགས་པར་དག་པའི་པོ་ཏི་དྲུག་ཙམ་བཞུགས་པར་ཚིག་དོན་གཉིས་ཀའི་ཆ་ནས་ཟླ་བྲལ་མཁས་པའི་ཁྱད་ཆོས་མངོན་གསལ་དུ་ཐོན་ཡོད། སྤྱི་ལོ་༢༠༡༣ལོར་ཀན་སུའུ་མི་རིགས་དཔེ་སྐྲུན་ཁང་གིས་ཚད་ལྡན་དཔེ་རྟགས་བཀོད་ནས་པར་དུ་བསྐྲུན་ཏེ་ད་ལྟ་རྒྱལ་ཡོངས་ས་གནས་སོ་སོ་ན་འགྲེམ་སྤེལ་བྱེད་བཞིན་པ་འདིའོ། །བླ་རུང་སྒར་དུ་ཕེབས་ནས་ད་ཙམ་མི་ལོ་སུམ་བཅུ་འགོར་ཞིང་ད་དུང་ཆོས་རྗེ་མཆོག་གི་གདན་ས་བཟུང་ནས། སྐུ་གཟུགས་བདེ་ཐང་དེ་ཙམ་མིན་ཡང་། སྐུའི་འོ་བརྒྱལ་ལ་མ་འཛེམས་པར་དམ་པའི་མཛད་པ་རྣམས་བདག་གིར་བྱས་ཏེ་འཛམ་གླིང་སྐྱེ་འགྲོའི་བདེ་སྡུག་སྤྱི་དང་ཁྱད་པར་གདོང་དམར་བོད་པ་ཚང་གི་ཆོས་དང་རིག་གནས་ཉམས་པ་སླར་གསོ་དང་མི་ཉམས་གོང་འཕེལ་གྱི་ཕྱོགས་ལ་ཐུགས་ཁུར་དང་ཕྱག་ལས་རྒྱ་ཆེན་པོ་གནང་བཞིན་ཡོད། མདོར་ན་མཁས་བཙུན་བཟང་གསུམ་དང་། འཆད་རྩོད་རྩོམ་གསུམ། ཐོས་བསམ་སྒོམ་གསུམ་སོགས་དམ་པའི་ཚུལ་དགུའི་ཡོན་ཏན་གྱིས་ལེགས་པར་མཛེས་པས་རྒྱལ་བསྟན་སྤྱི་དང་ཁྱད་པར་སྔ་འགྱུར་བསྟན་པའི་གཙུག་རྒྱན་ཉིད་དུ་ད་ལྟ་སྐུ་ཚེ་འཆི་མེད་རྔ་སྒྲའི་རྒྱལ་པོའི་ངོ་བོར་འཚོ་ཞིང་གཞེས་པར་མ་ཟད་རྣམ་གསུམ་མཁས་པའི་མཛད་པ་ཆུ་བོའི་རྒྱུན་བཞིན་གནང་བའི་སྐལ་བཟང་ལགས་སོ། །
ཞེས་པ་འདིའང་གང་གི་སློབ་བུའི་མིང་ཙམ་འཛིན་པ་གཙང་རིགས་སྐལ་བཟང་རྣམ་འདྲེན་གྱིས་སྤྱི་ལོ་༢༠༡༧.༡.༢༥ལ་སྤོས་ལྡན་གྲོང་ཁྱེར་ནས་སྦྱར་བ་དགེའོ།།
