ཨ་མ་དང་བླ་མ་དྲན་པའི་མེ་ལོང་།

ཨ་མ་དང་བླ་མ་དྲན་པའི་མེ་ལོང་།

ན་མོ་གུ་རུ་ཨ་མ་ཏཱ་ར་ཡེ།།

དལ་འབྱོར་ནོར་བུ་ཨ་མའི་དྲིན་གྱིས་གསོས།།

ཡིད་ཀྱི་འཁྲུལ་རྟོག་བླ་མའི་ཐུགས་རྗེས་སེལ།།

ཐོས་བསམ་སྒོམ་པའི་བྱིན་རླབས་རྒྱུད་ལ་འབྱོར།།

སྙིང་པོའི་བཙན་ས་ཟིན་པ་ཕ་མའི་དྲིན།།

དམ་པས་རྗེས་བཟུང་ཚེ་འདིའི་ཕུག་འདུན་གྲུབ༵།།

མཚོ་སྐྱེས་རྒྱལ་བས་དགོངས་པའི་གཏད་རྒྱ་ཐོབ༵།།

ཟབ་རྒྱས་གཏེར་ལ་དབང་བའི་རིགས་བཟང་བདག།

བསྟན་འགྲོར་ཕན་བདེ་འབྱུང་བར་བླ་མའི་དྲིན།།

འཁོར་འདས་དྲིན་ལན་གཞལ་དུ་མེད་པའི་རྗེ།

ཆོས་དང་འཇིག་རྟེན་སྨན་པའི་ཨ་བླ་མ།།

ཉིན་གཅིག་མ་ཡིན་དྲན་ཤེས་རྟག་ཏུ་བརྟས།།

བུ་ངའི་སྙིང་གི་མེ་ལོང་སྒྲིབ་མེད་གསལ།།

མཚམས་རེར་དབེན་རིར་འགྲིམས་ནས་གསོལ་བ་འདེབས།།

སྐབས་རེར་གྲོང་ནག་ཉུལ་ནས་ཆོས་འཆད་བྱས།།

ནམ་རྒྱུན་ཨེ་ཝྃ་དྲན་པ་ཀུན་ཏུ་བཟང་།།

དཔལ་དགྱེས་རྡོ་རྗེར་དྲན་པའི་མེ་ལོང་མཆིས།།

འཆི་རུང་གང་དགའ་དག་པའི་ཞིང་དུ་འགྲོ།།

གསོན་རུང་གུ་ཡངས་རྫོགས་ཆེན་བསྟན་པ་སྤེལ།།

རེ་དྭོགས་ཀུན་བྲལ་མངོན་པའི་རྣལ་འབྱོར་པ།།

པདྨའི་རྒྱལ་ཚབ་དམ་པ་ང་མིན་སུ།།

ལྟ་བ་ལེགས་རྟོགས་སྤྱོད་པ་གཞན་ཕན་བརྩོན།།

སྒོམ་པ་འོད་གསལ་ཆོས་བརྒྱད་འཆིང་བས་དབེན།།

འབྲས་བུ་ཀུན་བཟང་རྒྱལ་བའི་མཛད་པ་ཅན།།

སྙིགས་དུས་འདྲེན་པའི་དེད་དཔོན་ཁོ་བོ་ཙམ།།

ཨ་ལ་ཀུ་རེ་ཡིན་ནོ་སྙིང་གྲོགས་རྣམས།།

མི་ཚེ་ཆོས་ལ་བཅོལ་བའི་དཔལ་དགྱེས་པ།།

རྡོ་རྗེ་འཆང་གི་རྗེས་སུ་སྤྱོད་པ་ལ།།

ཐུགས་དང་འགལ་བ་གྱུར་ན་བཟོད་པར་གསོལ།།

མདོར་ན་ཨ་མ་བླ་མ་དྲན་པ་འདིས།།

འཁོར་འདས་དགེ་བ་ཕུན་སུམ་ཚོགས་པར་བྱུང་།།

སེམས་ཀྱི་རྒྱུ་བ་ཡི་གེས་གཟུགས་སུ་བཀོད།།

དགེ་བས་འགྲོ་ཀུན་ཀུན་བཟང་ས་ཐོབ་ཤོག།

———ཨེ་མ་ཧོས