༄༅།།བདུད་འཇོམས་སངས་རྒྱས་པདྨ་བཞད་པའི་ བླ་མའི་རྣལ་འབྱོར་ཀུན་བཟང་མེ་ལོང་ ཞེས་བྱ་བ་བཞུགས་སོ།།  སྐྱབས་སེམས་དང་ཡན་ལག་བདུན་པ་སྔོན་དུ་སོང་ནས། ཨ༔ ཀ་དག་སྤྲོས་བྲལ་ཆོས་དབྱིངས་ངོ་བོ་ལས།། ལྷུན་གྲུབ་འོད་གསལ་ཡེ་ཤེས་རང་བཞིན་ངང་།། ཟུང་འཇུག་མཉམ་ཉིད་རིག་པ་ཐུགས་རྗེའི་རྩལ།། བདུད་འཇོམས་སངས་རྒྱས་པདྨ་བཞད་པར་མཁྱེན།། ཨ༔ སངས༵་རྒྱས༵་ཀུན་བཟང་ཆོས་དབྱིངས་ངང་ཉིད་ལས།། པ༵དྨ༵་བཞ༵ད་པ༵་སྣང་མཐའི་སྒྱུ་འཕྲུལ་གར།། དཀར་གསལ་མཛེས་འཛུམ་མཉམ་བཞག་སྐྱིལ་ཀྲུང་བཅས།། གསལ་སྟོང་དབྱེར་མེད་ཆེན་པོའི་ངང་དུ་གསལ།། ཨ༔ ལྟ་བ་ཀ་དག་ཀློང་ཆེན་རབ་འབྱམས་ངང་།། སྒོམ་པ་ལྷུན་གྲུབ་མཁྱེན་བརྩེ་འོད་གསལ་ལས།། སྤྱོད་པ་ཟུང་འཇུག་རྒྱལ་བུ་མྱུ་གུར་སྨིན།། འབྲས་བུ་ཀུན་བཟང་ཐུགས་དང་དབྱེར་མེད་བསམ།། ཨོྃ་ཨཱཿ  ཧཱུྃ་བཛྲ་གུ་རུ་བུདྡྷ་པདྨ་ཀཱ་ར་སརྦ་སིདྡྷི་ཧཱུྃ་ཨ།། ཞེས་དང་སིདྡྷི་ཅི་ནུས་དང་། གསོལ་བ་འདེབས་པ་ནི། ཨ༔ ཕྱོགས་དུས་སངས༵་རྒྱས༵་ཡེ་ཤེས་རྡོ་རྗེའི་སྐུ།། ཨོ་རྒྱན་པ༵དྨ༵་བཞད༵་པ༵འི་སྒྱུ་འཕྲུལ་གར།། མཁྱེན་བརྩེ་ནུས་ལྡན་ཡིད་བཞིན་ནོར་བུ་ཉིད།། བསྟན་དང་འགྲོ་བར་ཕན་བདེས་རྟག་འཚོ་ཤོག།  དབང་བཞི་ལེན་ཐབས་ནི།། ཨོྃ་ཨཱཿ  ཧཱུྃ་ཧྲཱིཿ བླ་མ་དགྱེས་བཞིན་དབང་བཞི་ཡོངས་སུ་བསྐུར།། སྒྲིབ་བཞི་དག་ཅིང་སྐུ་བཞིའི་འབྲས་བུ་ཐོབ།། སྨིན་གྲོལ་ཡེ་ཤེས་བླ་མའི་རྒྱལ་ས་ཕྱིན།། འགྲོ་ཀུན་དག་མཉམ་ཆེན་པོར་སངས་རྒྱས་ཤོག། ཨ༔ཨ༔ཨ༔ ཞེས་ཅི་ནུས་སུ་སྐུ་གསུམ་བླ་མའི་ངོ་བོ་ལ་མཉམ་པར་བཞགས་མཐར་བླ་མའི་ཐུགས་དང་རང་སེམས་དབྱེར་མེད་ཀྱི་ངང་དུ་རྒྱུན་གྱི་སྤྱོད་ལམ་ལ་འཇུག་པར་བྱའོ།། ཞེས་པའང་འདི་ཡང་རབ་གནས་ཆུ་སྟག་རྒྱལ་ཟླའི་རྒྱལ་བ་དང་པོ་ལ་སྐུ་གསུམ་རྒྱལ་བ་ཀུན་འདུས་སངས་རྒྱས་པདྨ་བཞད་པ་ལ་མི་ཕྱེད་པའི་དད་གུས་ཅན་༸གྲུབ་དབང་རིག་འཛིན་གྲུབ་པ་མཐར་ཕྱིན་མཆོག་དང་། དད་དམ་འོད་གསལ་གྱི་སྣང་བ་མཐུན་པའི་རྗེ་བཙུན་མ་ཚེ་བརྟན་པདྨ་མཁའ་འགྲོས་གདུང་འབོད་ཡང་ཡང་གནང་བ་ལ་བརྟེན་ནས་ཨེ་མ་ཧོས་རྨི་ལམ་འོད་གསལ་ནམ་མཁའ་མཛོད་ཀྱི་ཆོས་སྡེ་ལས་གང་ཤར་བ་རྣམས་མ་བཅོས་ཤུགས་འབྱུང་དུ་བྱུང་བའི་ཟུར་ཙམ་ཞིག་དབྱིན་ཡུལ་ཨེ་ཝྃ་བདེ་མཆོག་ཕོ་བྲང་ནས་སྨྲས་པར་དགེའོ།། །།…

གླིང་རྗེ་གེ་སར་སྐྱེས་བུ་དོན་གྲུབ་ཀྱི་རྣམ་ཐར་བསྡུས་པ་རིན་ཆེན་ནོར་བུའི་དོ་ཤལ་བཞུགས།           ན་མོ་གུ་རུ་སེངྷ་མ་ཎི་རཱ་ཛ་ཡེ། སྣང་མཐའི་ཡེ་ཤེས་པདྨའི་ཐུགས་ཀྱི་སྲས། །རིགས་གསུམ་སྒྱུ་འཕྲུལ་ཁྲི་སྲོང་སྤྲུལ་བའི་གར། །གླིང་དཀར་རྒྱལ་མཆོག་ནོར་བུ་དགྲ་འདུལ་ཞེས། །མི་རྗེ་ལྷ་ཡི་དགོངས་སྤྱོད་ཅན་ལ་འདུད། །བྱིན་རླབས་གཏེར་མཛོད་བླ་མ་སེང་ཆེན་རྗེ། །དངོས་གྲུབ་ཀུན་སྩོལ་ཡི་དམ་གེ་སར་རྒྱལ། །འཕྲིན་ལས་གཡེལ་མེད་དོན་གྲུབ་དགྲ་བླའི་གཙོ། །ཀུན་བཟང་ཨ་དཀར་འོད་ཀྱི་ཝེར་མ་དྲན། །གང་ཉིད་གདོད་ནས་བྱང་ཆུབ་མཆོག་བརྙེས་ཀྱང་། །སྙིགས་མའི་འགྲོ་ལ་ཐུགས་བརྩེ་རྗེས་ཆགས་ཏེ། །འཛམ་གླིང་འདི་རུ་གསང་གསུམ་འཕྲིན་ལས་ཀྱིས། །འགྲོ་དོན་མཛད་ཚུལ་རྣམ་ཐར་བརྗོད་ལས་འདས། །དེ་ཡི་ནང་ཚན་བསིལ་ལྡན་གངས་རིའི་ལྗོངས། །སིལ་འཐོར་དུཿཁས་གདུང་སྐབས་གླིང་ཡུལ་དུ། །མི་དབང་བདུད་འདུལ་དཔའ་བོའི་གར་བཟུང་བའི། །ངོ་མཚར་མཛད་བཟང་བཀའ་དྲིན་ལྷག་ཏུ་ཆེ། །དང་པོ་དགའ་ལྡན་དག་པ་ལྷ་ཡུལ་དུ། །བདེ་མཆོག་ཚངས་པ་དཀར་པོའི་སྐུར་སྣང་བའི། །སྲས་ཀྱི་མཆོག་གྱུར་ཐོས་པ་དགའ་བའི་ཚུལ། །ཀུན་བཟང་དགོངས་པའི་ཀློང་ན་ཉམས་རེ་དགའ། །དེ་ཚེ་ཕྱོགས་བཅུའི་སངས་རྒྱས་བྱང་སེམས་རྣམས། །དགོངས་དབྱངས་གཅིག་གིས་མི་ཡུལ་བདུད་སྲིན་ཚོགས། །འདུལ་ལ་ཚངས་སྲས་བུ་ཏོག་ཁྱེད་གཅིག་ཅེས། །བཀའ་ཡི་མེ་ཏོག་བདེ་ཆེན་འཁོར་ལོར་བསྩལ། །གང་དུ་འཁྲུང་བའི་ཡུལ་དང་ཡབ་ཡུམ་དང་། །ཕུ་ནུ་དཔའ་གྲོགས་གདུལ་བྱའི་ཡུལ་གྱུར་ཀུན། །མ་འདྲེས་གསལ་བོར་གཟིགས་པ་དུ་མ་ཡིས། །འགྱུར་མེད་རྡོ་རྗེའི་ལུང་གི་རོལ་མོ་བསྒྲགས། །འགྲོ་མགོན་པདྨའི་དབང་སྐུར་བྱིན་གྱིས་རླབས། །རིགས་ལྔའི་མཁའ་འགྲོས་ཐབས་གྲོགས་ཞལ་གྱིས་བཞེས། །ལྷ་གཉན་ཀླུ་སོགས་དཀར་ཕྱོགས་སྐྱོང་རྣམས་ཀྱིས། །མི་ཡུལ་འགྲོ་དོན་གྲོགས་དན་གཡར་དམ་མཛད། །སྔོན་སྨོན་ཐུགས་བསྐྱེད་དུས་སུ་བབས་པ་བཞིན། །མདོ་ཁམས་གནས་མཆོག་ལྕི་སོས་ཡག་གི་མདོར།…