ཁ་བ་དང་སྐྱེན་པོ་དགོན་སྡེ་དྲན་པ་མེ་ལོང་དྲི་མེད།ན་མོ་གུ་རུ་ཨ་བྷྱེ་ཛ་ཡ་ཡེ།།༡༽ཀ་མ་ལ་ལྟར་དྭངས་སའི་སྟག་གཞུང་དུ།།ཁ་བའི་རྡུལ་མང་བརྩེགས་པའི་དབྱར་དགུན་སྐབས།།ག་བུར་མདངས་སུ་འཕོས་པའི་གཞི་ཁྱིམ་འདི།།ང་ཡི་སྲིད་པའི་རྩེ་ན་ལྷང་ངེར་གཏམས།།༢༽ཅ་ཅོའི་སྨྲ་གཡེང་རྒོད་པའི་བསྡུས་གྲྭ་དར།།ཆ་ལུགས་འདྲ་མིན་སྤྱོད་པའི་རྣལ་འབྱོར་མང་།།ཇ་འཐུང་ངོ་དགའ་བཤད་སའི་གྲོགས་པོ་མོད།།ཉ་ཉོག་གཏམ་ལ་ཆ་འཇོག་ཅི་ཡང་མེད།།༣༽ཏ་ན་ག་ནའི་སྤྱོད་པར་གཤེགས་ནས་བཟུང་།།ཐ་དག་ཞེན་པ་བྲལ་བའི་སྨྱོན་པ་ངས།།ད་ལྟའི་རྨི་ལམ་ནང་གི་ཚོར་བ་ལས།།ན་གཞོན་ཁྱད་མེད་སྙིང་གི་དབུས་ན་མཆིས།།༤༽པ་ལོ་འཇིགས་ནས་རབ་བྱུང་སྣ་བརྫིས་སམ།།ཕ་རྒན་ཟེར་ནས་སྡིགས་ར་བཤད་ན་ཡང་།།བ་ཕྱུགས་འཕེལ་ཁ་རྒྱ་སའི་གཡང་ར་དེར།།མ་ཁྱིམ་གྲྭ་གསུམ་འཛོམས་པའི་སྨོན་ལམ་ཡོད།།༥༽ཙ་ར་མ་ཆོད་སྒྲོ་བཀུར་མ་མང་དང་།།ཚ་བའི་ངེད་དང་བྲལ་བའི་བསིལ་གླིང་དེར།།ཛ་ཡའི་བསྟན་པ་དར་བའི་རྟེན་འབྲེལ་ཡོད།།ཝ་ལེར་མཆོག་གསུམ་དཔུང་ལ་བསྟེན་པར་མཛོད།།༦༽ཞ་ཉེ་གསེར་དང་འགྲན་ན་ལྕི་ཚད་ཤེས།།ཟ་ཉལ་ཁོ་ན་གདམས་ན་ཚོར་སྣང་འཁྲུལ།།འ་ཅག་ལས་དང་སྨོན་ལམ་འབྲེལ་ཟབ་ཕྱིར།།ཡ་ཀིའི་བདེ་བ་ཅན་ནས་མཉམ་འཛོམས་ཡོད།།༧༽ར་བ་གངས་དཀར་ཕུང་པོས་གཏམས་ན་ཡང་།།ལ་རྒྱའི་ལྷག་བསམ་དཀར་པོ་མ་ཡོད་ན།།ཤ་ཁྲག་མི་ལུས་བླངས་རུང་དོན་དགོས་ཆུང་།།ས་ལམ་ཡོན་ཏན་་ཕྱོགས་ལ་བརྩོན་པར་འཚལ།།༨༽ཧ་ཅང་དུང་བའི་སྲིང་ཆུང་ཁྲོག་དྷཱིཿའི་མས།།ཨ་ལགས་དད་གུས་ཆེ་བའི་འབོད་སྐུལ་ངོར།།ཧ་ཤང་རལ་བ་ཅན་གྱི་ཐོལ་གྱིས་བྲིས།།ཨ་ཧོ་ཀུན་ལ་ཕན་བདེའི་དཔལ་དུ་སྨོན།།༩༽ཨི་ལྡན་དབྱངས་གསལ་སྙན་པའི་བ་དན་འདི།།ཨུ་ཚུགས་བཅས་ཏེ་གོ་ལའི་སྟེང་ནས་གྱེར།།ཨེ་མ་དབུལ་ཕྱུག་མེད་པར་རྩོམ་འདི་ཕུལ།།ཨོ་རྒྱན་བླ་མས་རྟག་ཏུ་སྐྱོབ་གྱུར་ཅིག།————-ཨེ་མ་ཧོས

བཛྲ་གུ་རུ་ཉམས་སུ་ལེན་པའི་ཐབས།ཧོར་ཟླ་གསུམ་པ་དབྱར་ར་སྦྲུལ་ནག་ཟླར་གྱི་ཚེས་བཅུ་ནི་གུ་རུ་རིན་པོ་ཆེས་ཟ་ཧོར་རྒྱལ་པོ་གཙུག་ལག་འཛིན་གྱི་སྲས་མོ་ཡེ་ཤེས་ཀྱི་མཁའ་འགྲོ་ལྷ་ལྕམ་མནྡ་ར་བ་ཕྱག་རྒྱར་མཛད་དེ་འཆི་མེད་ཚེ་ཡི་རིག་འཛིན་མངོན་དུ་མཛད་པའི་ཚུལ་དང་དེ་ཉིད་ཀྱི་རྒྱལ་ཁམས་ཆོས་ལ་འགོད་པར་མཛད་པའི་དུས་སུ་རྒྱལ་བློན་རྣམས་ཀྱིས་མེ་དཔུང་རབ་ཏུ་འབར་བ་ཆེན་པོར་གསོན་བསྲེག་བྱས་པའི་ཚེ་ན་འབར་བའི་མེ་ཡང་བསིལ་བའི་ཆུར་བསྒྱུར་ཏེ་མེ་དཔུང་ཆེན་པོ་འབར་བའི་དབུས་སུ་དྭངས་པའི་མཚོ་ཆེན་པོ་པདྨའི་སྡོང་པོར་བལྟ་བས་མི་ངོམ་པའི་ཁྱེའུ་འཇའ་འོད་ཀྱི་ཀློང་དུ་ངོ་མཚར་རྨད་དུ་བྱུང་བ་རྫུ་འཕྲུལ་གྱི་བཀོད་པ་སུ་རྩེན་ཏེ་སུམ་ཅུ་རྩ་གསུམ་གྱི་ལྷ་ཡིས་མཆོད་ཅིང་བསྟོད་པའི་རྣམ་རོལ་མཐའ་ཡས་པ་བསྟན་པས་རྒྱལ་བློན་འཁོར་བཅས་ཀྱིས་ཀྱང་རབ་ཏུ་གནོང་འགྱོད་ཀྱིས་ཕྱག་དང་མཆོད་བསྟོད་བསྙེན་བཀུར་ཞུས་ཏེ་ཆོས་ཀྱིས་སྨིན་པར་མཛད་པས་འཆི་མེད་པདྨ་འབྱུང་གནས་སུ་གྲགས་པའི་དུས་ཆེན་ཏེ། འདི་བཟུང་བས་ཕྱོགས་གང་དུ་འགྲོ་ཡང་བསམ་པའི་དོན་ཐམས་ཅད་འབད་མེད་དུ་འགྲུབ་ཅིང་བཀྲ་མི་ཤིས་པ་མ་ལུས་ཞི་ཞིང༌། མཐར་ཐུག་ཚེ་དབང་རིག་འཛིན་འཐོབ་པར་གྱུར་བ་དང༌། སྟོན་པས་འདིའི་ཚེས་བཅོ་ལྔ་ལ་དཔལ་ལྡན་འབྲས་སྤུང་གི་མཆོད་རྟེན་ཆེན་པོར་ཆོས་རྒྱལ་ཆེན་པོ་ཟླ་བ་བཟང་པོ་ལ་སོགས་པར་དཔལ་གཉིས་སུ་མེད་པའི་རྒྱུད་ཀྱི་རྒྱལ་པོ་དུས་ཀྱི་འཁོར་ལོ་གསུང་བར་མཛད་པའོ།། ༄༅། །བཛྲ་གུ་རུ་ཉམས་སུ་ལེན་པའི་ཐབས་མན་ངག་ཡིད་བཞིན་ནོར་བུ་ཏོག་གི་བློ་གྲོས་ཞེས་བྱ་བ་བཞུགས་སོ། ། ༄༅། །ན་མོ་གུ་རུ་བཛྲ་མ་ཧཱ་མུ་དྲཱ་ཡ། རྒྱལ་ཀུན་མཚན་དཔེ་གཅིག་ཏུ་འདུས་པའི་དཔྱིད། །རྒྱལ་གསུང་རབ་འབྱམས་རྒྱ་མཚོ་འདུས་ཐིག་ལེ། །རྒྱལ་ཀུན་ཡེ་ཤེས་ངོ་བོ་ཀུན་ཏུ་བཟང་། །རྒྱལ་མཆོག་པདྨ་ཐོད་ཕྲེང་རྩལ་ལ་འདུད། །ཚེ་གཅིག་བྱང་ཆུབ་མཆོག་གི་དོན། །གཅིག་ཆོག་བློ་བདེ་ཟབ་པའི་བཅུད། །བཛྲ་གུ་རུའི་ཉམས་ལེན་ཚུལ། །རང་གི་འདོད་བཞིན་བརྗོད་པར་བྱ། །དེ་ཡང་དལ་འབྱོར་རྙེད་དཀའ་དང་མི་རྟག་འཆི་བ་ལས་རྒྱུ་འབྲས་འཁོར་བའི་ཉེས་དམིགས་ཐར་པའི་ཕན་ཡོན་རྣམས་ཀྱིས་བློ་རྒྱུད་འཁོལ་ཞིང་འཁོར་བས་དུབ་པ་དང་། མྱང་འདས་ལ་ངེས་པར་འབྱུང་བའི་བསམ་པ་དང་ཁྱད་པར་ལྷག་པའི་བསམ་པ་མི་དམན་པ་སྙིང་ཐག་པ་ནས་སྐྱེ་བ་གལ་ཆེ་ཞིང་། དེ་ནས་རྡོ་རྗེ་ཐེག་པའི་འཇུག་ངོགས་དབང་བསྐུར་གང་རུང་ཞིག་ལེགས་པར་ཐོབ་ཅིང་དེའི་དམ་ཚིག་བཅས་པ་མ་ཉམས་པས་ལམ་ཉམས་སུ་ལེན་པའི་སྙིང་པོ། སྤྱིར་འདུལ་དཀའ་བའི་འགྲོ་བ་མཐའ་དག་དང་། ཁྱད་པར་གདོང་དམར་བོད་ཀྱི་གདུལ་བྱ་རྣམས་ཀྱི་བླ་མ་དང་དཀྱིལ་འཁོར་ལྷའི་ངོ་བོ་ཐ་མི་དད་པ། སངས་རྒྱས་གཟི་བརྗིད་འོད་དཔག་ཏུ་མེད་པའི་ངོ་བོ་ཨོ་རྒྱན་གྱི་སློབ་དཔོན་ཆེན་པོའི་ཚུལ་བསྟན་པ་གུ་རུ་པདྨ་འབྱུང་གནས་སུ་ངེས་ཤིང་གྲུབ་ལ། དེའི་སྒྲུབ་ཐབས་ཀྱི་རིམ་པ་བསམ་གྱིས་མི་ཁྱབ་པ་ལས། འདིར་ཚིག་བདུན་གསོལ་འདེབས་ཀྱི་མན་ངག་དང་མཐུན་པར་ཉམས་སུ་ལེན་པའི་ཚུལ་ནི།ཐོག་མར་བདག་དང་མཁའ་ཁྱབ་ཀྱི་སེམས་ཅན་ཐམས་ཅད་སྐྱབས་གནས་དཀོན་མཆོག་རྩ་གསུམ་ཀུན་འདུས་ཀྱི་ངོ་བོ་གུ་རུ་པདྨ་འབྱུང་གནས་ལ་སྐྱབས་སུ་མཆིའོ་སྙམ་ཞིང་ངག་ནས། ཨོཾ་ཨཱཿཧཱུྃ། དུས་འདི་ནས་བཟུང་བྱང་ཆུབ་མ་ཐོབ་བར། །སྐྱབས་གནས་མཆོག་གྱུར་རྣམས་ལ་སྐྱབས་སུ་མཆིའོ། །ཞེས་བརྗོད། ནམ་མཁའི་མཐའ་དང་མཉམ་པའི་སེམས་ཅན་འདི་རྣམས་འཁོར་བའི་སྡུག་བསྔལ་བཟོད་གླགས་མེད་པ་ཉམས་སུ་མྱོང་དགོས་པ་སྙིང་རེ་རྗེ། ཀུན་དྲིན་ཆེ་བ་ཕ་མའི་རང་བཞིན་ཡིན་པས་བདག་གིས་ཅི་ནས་ཀྱང་སངས་རྒྱས་ཀྱི་ས་ལ་འགོད་དགོས། དེའི་ཆེད་དུ་ཡང་ཟབ་བླ་མའི་སྒྲུབ་པ་ལ་འབད་པར་བྱའོ་སྙམ་ནས། སེམས་བསྐྱེད་འགྲོ་བ་ཀུན་དོན་དུ། །ཡང་གསང་བླ་མ་བསྒྲུབས་ནས་ནི། །གང་ལ་གང་འདུལ་ཕྲིན་ལས་ཀྱིས། །འགྲོ་དྲུག་བསྒྲལ་བར་དམ་བཅའ་འོ། །ཞེས་བརྗོད་ཅིང་དབུགས་གཏོང་རྔུབ་དགེ་སྡིག་གཏོང་ལེན་གྱི་དམིགས་པ་ཡང་ཅི་ནུས་བྱའོ། །དེ་ནས་མཁའ་ཁྱབ་རྒྱལ་བའི་དཀྱིལ་འཁོར་ཀུན་གྱི་ངོ་བོ་གུ་རུའི་སྐུ་ལས་བདུད་རྩིའི་རྒྱུན་བྱུང་། དེས་བདག་གི་སྡིག་སྒྲིབ་དག་པར་བསམས་ལ། ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ།…

གནམ་གཤིས་དང་སྐྱེད་ཚལ།།ཨེ་མ་ཧོ།།༡༽དྲི་ཞིམ་ཆུ་སྐྱེས་བཞད་པའི་སྐྱེད་ཚལ་ན།།ཁོ་རོ་ན་ཡིས་བཟང་བཙོན་བྱས་པའི་འོག།རྨི་ལམ་ངང་ནས་དག་པའི་ཞིང་ཁམས་མཇལ།།དགའ་སྐྱོ་འདྲིས་མའི་བར་ནས་གཉིད་ལས་སད།།༢༽ཐུན་བཞི་ལས་དྲུག་ཚང་བས་རྩ་གསུམ་བསྙེན།།སེ་ཁྱུང་དབྲ་རིགས་བསམ་ནས་སྔོན་འགྲོ་བཤད།།དམ་པ་གོང་མར་སྙན་འཕྲིན་ཀློང་བས་འབྲེལ།།སྙིང་གི་ཆོས་མཆེད་འགའ་དང་ནང་གཏམ་བགྲོས།།༣༽སྦྲང་ཆར་སིལ་སིལ་བབས་ཏེ་ནོར་འཛིན་བརླན།།རྩི་ཤིང་ནགས་ཚལ་ཡིན་ཡང་སྤྱན་ཆབ་བསིལ།།ནད་རིམས་མྱུར་ཏུ་ཞི་བའི་སྨོན་བཏབས།།འགྲོ་ཀུན་སངས་རྒྱས་ཐོབ་ཕྱིར་བསྔོ་བ་བྱས།།༤༽ཏང་གི་ངོ་ལ་མོའུ་ཕ་ཡིན་བརྗོད།།རྒྱ་འབར་ཐུག་དུས་སྟོན་པའི་འཁྲུངས་སྐར་བརྩིས།།བོད་ནང་འབྲེལ་ཏེ་ཞག་བརྒྱའི་དམ་ཚིག་འབྲེལ།།ཀུན་ལ་རིས་མེད་ཞེས་པའི་གཏམ་བཟང་གླེང་།།༥༽ལྷག་ལ་སྔ་དང་ཆད་ལ་ཕྱི་མ་ཡི།།ཝ་ཡེལ་གྲགས་པའི་ལུག་ཤ་རྒྱག་ཚད་ཟོས།།བདུད་རྩིའི་ཆང་དམར་དེ་ཡང་མཆོད་པས་འཐུང་།།ཚེས་བཅུའི་ཚོགས་འཁོར་དགེ་འདུན་གྲངས་ཚང་ཚོགས།། སྐྱབས་འགྲོ་སྒྲོལ་མ་བྱེ་བ་དུང་ལ་ཉེ།།སིདྡྷི་དུང་ཕྱུར་འགྲུབ་པའི་དགེ་བ་འགྲུབ།།འདས་ལོག་མཁའ་འགྲོའི་ལུང་བསྟན་གསལ་བ་དང་།།དགེ་ལེགས་ས་གསུམ་ཁྱབ་པའི་རྟེན་འབྲེལ་འགྲིགས།།—————-ཨེ་མ་ཧོས

མཆོད་སྨོན་གྱི་ཀུན་བཟང་སྤྲིན་ཆེན།ན་མོ་གུ་རུ་ཨེ་མ་ཧོ།།ཀ་དག་སྤྲོས་བྲལ་འོད་གསལ་རིག་པའི་ཀློང་།།ཀུན་བཟང་སྣང་བ་དག་པ་རབ་འབྱམས་པ།།ཡེ་ཤེས་སྒྱུ་འཕྲུལ་དྲྭ་བའི་དཀྱིལ་འཁོར་ལ།།ཟག་མེད་མཆོད་པའི་སྤྲིན་ཆེན་ཡོངས་སུ་འབུལ།།མཆོད་ཡོན་གཙང་མས་རྒྱལ་ཀུན་མ་ལུས་མཆོད།།ཞབས་གསིལ་དག་པས་ཁྲུས་མཆོག་ཡོངས་སུ་གསོལ།།མེ་ཏོག་སྣ་ཚོགས་རྒྱན་ཕྲེང་མཛེས་པས་ཕྱུག།བདུག་སྤོས་དྲི་བཟང་ཞིང་ཁམས་ཀུན་ཏུ་ཁྱབ།།མར་མེའི་འོད་གསལ་སྣང་བས་ས་གསུམ་གདལ།།དྲི་ཆབ་སྨན་སྣས་སྣང་སྲིད་རིག་རྩལ་བརྟས།།ཞལ་ཟས་འདོད་ཡོན་ཀུན་བཟང་ཚོགས་འཁོར་རོལ།།རོལ་མོའི་སྒྲ་སྙན་རྒྱལ་ཀུན་དགྱེས་ཕྱིར་འབུལ།།རིག་པ་སྐུ་གསུམ་ངོ་བོར་སྐྱབས་སུ་མཆི།།རིག་འཛིན་རྒྱལ་ཀུན་རང་བཞིན་སེམས་མཆོག་བསྐྱེད།།རིག་པའི་གར་ཁྱབ་ཐུགས་རྗེ་འགྲོ་ལ་དམིགས།།རིག་སྟོང་གདོད་མའི་དབྱིངས་སུ་གྲོལ་བར་སྨོན།།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ།།ཨོ་རྒྱན་རིན་པོ་ཆེ་ལ་གསོལ་བ་འདེབས།།མཆོག་ཐུན་དངོས་གྲུབ་མ་ལུས་མྱུར་སྩོལ་ཅིག།ཀུན་ལ་ཕན་བདེའི་ཕྲིན་ལས་བརླབ་པོ་ཆེས།།ཀུན་བཟང་རྫོགས་ལྡན་ཀུན་གྱིས་ལོངས་སྤྱོད་ཤོག། ————ཤྲཱིས

༄༅།།མཁན་ཆེན་བླ་མ་ཨེ་མ་ཧོ༔སྐུ་ཚེ་བརྟན།།གསང་ཆེན་གསང་བ་ཟབ་མོའི་མཛོད་འཛིན་པ། །རྒྱལ་ཀུན་གསང་བའི་བདག་པོ་ཨེ་མ་ཧོ། །རྒྱལ་བ་ཀུན་ལ་ཡེ་ཤེས་ཕྲིན་ལས་ཏེ། །འགྲོ་བའི་ཁམས་ལ་རིག་སྟོང་རྗེན་པར་བཞུགས། །ཞེས་རབ་བྱུང་བཅུ་བདུན་པའི་ལྕགས་བྱིའི་རང་ཟླ་གསུམ་པའི་ཚེས ༨ ལ་མཁན་ཆེན་བླ་མའི་སྐུ་འཁྲུངས་པའི་ཉིན་བཟང་ལ་བཀྲིས་བདེ་ལེགས་ལྷོ་མོན་པ་སངས་རྒྱས་མགོན་པོ་ནས་སྒོ་གསུམ་གུས་པས་ཕྱག་བཅས་ཕུལ།། ༄༅།།དཔལ་དགྱེས་པ་རྡོ་རྗེ་རིན་པོ་ཆེ།།དཔལ་ཆེན་དགྱེས་རོལ་བདེ་བ་ཆེན་པོའི་འཕྲུལ། །ལྷུན་གྲུབ་འདུས་མ་བྱས་པ་རྡོ་རྗེའི་གར། །སྒྲིབ་བྲལ་སྤྲུལ་བའི་རོལ་པ་འགྲོ་བའི་མགོན། །མཚུངས་མེད་པའི་སྡེ་ལ་གསོལ་བ་འདེབས། །ཨེ་ཝཾ་ཟུང་དུ་འཇུག་པ་ཆུ་ཟླའི་ཚུལ། །མ་བཅོས་མཐའ་གྲོལ་ཀུན་བཟང་བདེ་ཆེན་གར། །ཚངས་ཆེན་བསྐལ་བ་རྒྱ་མཚོའི་མཛེས་རྒྱན་དུ།།རྟག་བརྟན་གཡུང་དྲུང་གཤིས་སུ་ཨ་ཧོ་ཡ། །——མཁས་དབང་དམ་པས༢༠༢༠་༥་༡་ལ།