རྩ་བཞིའི་བསྙེན་སྒྲུབ་ཞི་ལྷག་རང་གྲུབ།ན་མོ་གུ་རུ་བུདྡྷ་ཛྙཱ་ན་ཡེ།།ཚེ་རབས་ལས་འབྲེལ་ཟབ་སའི་རྣལ་འབྱོར་ཕོ་མོས།།ཚིག་བདུན་དབྱངས་སུ་འདྲེན་པའི་སྙན་ངག་མཐར་ཐུག།བུ་ངར་དད་པའི་བརྩེ་གྲོགས་འགྱུར་མེད་མཚོན་པར།།གསོལ་འདེབས་མི་གཅིག་ལྷ་གཅིག་གཙུག་ལ་མཆོད་སོང་།།གཡོ་ཟོལ་ངོ་དགའི་ཆོ་འཕྲུལ་རྩ་ནས་མ་རེད།།ལུས་ངག་ཡིད་གསུམ་མཆོད་པ་བདག་ལ་ཕུལ་ནས།།པད་གླིང་གཏེར་གསར་བརྒྱུད་པའི་སྲོལ་རྒྱུན་ཟབ་མོ།།ཞི་བདེའི་རྒྱལ་ཁམས་འདི་ནས་གསར་དུ་བསྐྲུན་སོང་།བཀྲ་ཤིས་དད་དུང་བརྟས་པའི་གེ་སར་དགོན་པ།།བདེ་ལེགས་ཅི་འདོད་རོལ་སའི་ཆོས་གླིང་གྲུ་བཞི།།ཕུན་ཚོགས་དགའ་ཚལ་བཞད་པའི་བར་གསེང་འདི་ནས།།ཨེ་ཝཾ་ཕྱོགས་ལས་རྒྱལ་བའི་རྒྱལ་མཚན་འཛུགས་སོང་།།གྲགས་དཀར་གདུགས་ཀྱིས་བ་དན་འཛམ་གླིང་ཁྱབ་ནས།།ཆོས་དུང་དཀར་པོའི་སྙན་པ་ས་གསུམ་གདལ་བ།།གཡང་དཀར་རྟག་བརྟན་དཔལ་གྱི་བེའུའི་ཆོས་གྲྭ།།པདྨ་དཀར་པོ་ལྟ་བུའི་གཞིས་ཁྱིམ་ཆགས་སོང་།།སྨན་མཆོག་བདུད་རྩིའི་བུམ་བཟང་བྱིན་རླབས་གཏེར་མཛོད།།སྐལ་བཟང་གསེར་ཉའི་སྤྱན་ཡངས་མཁའ་ལྟར་མཉམས་ཏེ།།འཁོར་འདས་བདེ་ཆེན་འཁོར་ལོ་རྒྱུན་དུ་འཁོར་ཕྱིར།།འབྲེལ་ཚད་དོན་ལྡན་འབྱུང་བའི་རྟེན་འབྲེལ་འགྲིགས་སོང་།། ———ཨེ་མ་ཧོ

ནང་པ་དང་ཚན་རིག་པ་གཉིས་ཀྱི་ཁྱད་པར་ཆེན་པོ་བཞི་ཡོད་༡༽ ནང་པས་བེམ་པོ་རྣམས་རྡུལ་གྱི་ཆ་ཤས་བཤིག་པའི་འོག་ཏུ་འདི་ཞེས་སུ་གྲུབ་པའི་དངོས་པོ་རྡོག་རྡོག་ཅིག་མི་རྙེད་པ་དང་། ཤེས་པ་རྣམས་དུས་ཀྱི་ཆ་ཤས་བཤིག་པའི་འོག་ཏུ་འདི་ཞེས་སུ་གྲུབ་པ་གང་ཡང་མི་རྙེད་པར་འདོད། མདོར་ན་དངོས་པོ་རྣམས་ཆ་ཤས་བཤིག་ནས་བཏགས་དོན་བཙལ་བའི་ཚེ་ན་གང་ཡང་མི་རྙེད་པར་འདོད། ཚན་རིག་པས་ཀྱང་དེ་ལྟར་ནང་པའི་རིགས་པས་བཙལ་སྟངས་བྱས་ན་དངོས་པོ་གང་ཡང་མི་རྙེད་པར་ནང་པ་དང་གཅིག་མཚུངས་སུ་འདོད། འོན་ཀྱང་ཚན་རིག་པས་དངོས་པོ་རྣམས་སོ་སོར་དོོན་བྱེད་པའི་ནུས་པ་རེ་ཡོད་པས་བདེན་གྲུབ་ཏུ་འདོད། ནང་པས་དངོས་པོ་རྣམས་བཏགས་དོན་བཙལ་ན་མི་རྙེད་པས་བདེན་མེད་དུ་འདོད། ཚན་རིག་པས་དབུ་མའི་རིགས་པས་བཏགས་དོན་བཙལ་བའི་ཚེ་ན་མ་རྙེད་ན་བདེན་གྲུབ་མིན་པས་མ་ཁྱབ་པར་འདོད། ནང་པས་རིགས་པས་བཏགས་དོན་བཙལ་བའི་ཚེ་ན་མ་རྙེད་ན་བདེན་མེད་ཡིན་པས་ཁྱབ་པར་འདོད། ཚན་རིག་པས་དོན་བྱེད་ནུས་པ་ཡིན་ན་བདེན་པ་ཡོད་པས་ཁྱབ་ཟེར། ནང་པས་ཀུན་རྫོབ་ཏུ་དོན་བྱེད་ནུས་པ་ཙམ་གྱིས་བདེན་པར་འཇོག་མི་ཐུབ། བདེན་པ་ཡོད་ན་དོན་དམ་པར་དོན་བྱེད་ནུས་དགོས་ཟེར། ཁོང་གཉིས་ཆེས་མི་མཐུན་ས་ནི། ནང་པས་རིགས་པས་དངོས་པོ་རྣམས་ཆ་ཤས་བཤིག་པའི་ཚེ་ན་གང་ཡང་མ་རྙེད་པ་དེ་རྟོགས་ན་ཐམས་ཅད་མཁྱེན་པ་འཐོབ་པ་དང་སངས་རྒྱས་ནས་སེམས་ཅན་ཐམས་ཅད་ཀྱི་སྡུག་བསྔལ་མེད་པར་བཟོ་ཐུབ་པར་འདོད། ཚན་རིག་པས་དབུ་མའི་རིགས་པས་བཙལ་བས་གང་ཡང་མ་རྙེད་པའི་དོན་དེ་དོན་སྙིང་དང་རིན་ཐང་གང་ཡང་མེད་པ་དང་དེ་རྟོགས་ནའང་ཕན་གནོད་གང་ཡང་མེད་པར་འདོད། ༢༽ ནང་པས་ཤེས་པ་ནི། བེམ་པོ་ལས་ལོག་ཏུ་གྱུར་བའི་གསལ་རིག་ཙམ་ཞིག་འདོད། ཚན་རིག་པས་ཤེས་པ་ནི། དབང་རྩ་དང་ཕྲ་ཕུང་གི་ནུས་པ་ཙམ་ལས་བེམ་པོ་ལས་ལོག་ཏུ་གྱུར་བའི་དངོས་པོ་ཞིག་མི་འདོད། ནང་པས་ཤེས་པ་ནི། ཐོག་མ་མེད་པའི་དུས་ནས་མར་བརྒྱུད་ནས་བར་དོའི་རྣམ་ཤེས་འཁྱམ་པོ་ཞིག་ཕ་མའི་ཁུ་ཁྲག་དཀར་དམར་ལ་ཞུགས་ནས་ཉིང་མཚམས་སྦྱར། དེ་ལ་བརྟེན་ནས་ད་ལྟའི་ལུས་སེམས་ཀྱི་མ་ལག་ཆ་ཚང་གྲུབ་པར་འདོད། ཚན་རིག་པས་ཕ་མའི་ཁུ་ཁྲག་དཀར་དམར་ལ་ད་ལྟའི་ལུས་སེམས་ཀྱི་མ་ལག་ཆ་ཚང་འགྲུབ་བྱེད་ཀྱི་ནུས་པ་ཕུན་སུམ་ཚོགས་པའམ་རྒྱུ་ཚོགས་གྲངས་ཚང་ཡིན་པས་བར་དོའི་རྣམ་ཤེས་འཁྱམ་པོ་ཞིག་ཕ་མའི་ཁུ་ཁྲག་ལ་ཉིང་མཚམས་སྦྱོར་ཡང་རུང་མ་སྦྱོང་ཡང་རུང་ཕན་གནོད་གང་ཡང་མེད་པར་འདོད། ༣༽ ནང་པས་ཤེས་ཡོན་ནི། སྐྱེ་བ་གོང་མ་ནས་སློབ་པའི་ཡོན་ཏན་གྱི་ནུས་པའམ་བག་ཆགས་ཤེས་པ་ལ་བཞག་ནས་མར་བརྒྱུད་ཡོང་བ་དེ་ལ་ད་ལྟར་སློབ་ལ་བརྩོན་ནས་ཡར་རྒྱས་སོང་བ་དང་། དེ་ཡང་ཤེས་པ་ལ་བསླབས་པ་ཡིན་པས་ཤེས་པའི་ནུས་པར་གྱུར་ནས་མཐར་གཟུགས་པོ་འདི་བཞག་ནས་སྐྱེ་བ་ཕྱི་མ་ལ་མར་འགྲོ་བ་དང་། གང་ཟག་རང་གི་རྣམ་ཤེས་ལས་ལོགས་སུ་ལེན་རྒྱུ་མེད་པར་འདོད། ཚན་རིག་པས་ཤེས་ཡོན་ནི། སྐྱེ་བ་སྔ་ཕྱི་ལ་བརྒྱུད་རྒྱུ་མེད་པར་སློབ་ལ་བརྟེན་ནས་ད་ལྟའི་ཀླད་པའི་དབང་རྩའི་མ་ལག་ཡར་རྒྱས་སོང་བ་ཞིག་ཡིན་པ་དང་། དེ་ཡང་ཤེས་ཡོན་དེ་ཚུར་ལེན་ནས་མེ་མོ་རིའི་ཁར་ Memory card 存储卡ནང་ལ་བཅུག་ནས་ཉར་རྒྱུ་ཡོད་པ་དང་། སླར་ཡང་སྔོན་མ་གང་ནས་བླངས་བ་དེ་ལ་ཕྱིར་བླུག་རྒྱུ་ཡོད་པ་མ་ཟད། མི་གཞན་གྱི་ཀླད་པའི་ནང་ལའང་སྤོས་རྒྱུ་ཡོད་པར་འདོད། ༤༽ ནང་པས་སྡུག་བསྔལ་ནི། ལས་ཉོན་ལས་བྱུང་བ་དང་།…

གཅེས་ཕྲུག་ཚོས་བདེ་ཅན་དུ་སྐྱེ་བའི་རྒྱུ་བཞི་ལ་བསྟེན་ནས་བླ་མ་རུང་གི་བསྙེན་མཚམས་དང་འབྲེལ་ཏེ་ཨེ་ཝཾ་ཆོས་སྨན་གླིང་གི་ཨེ་ཝཾ་ལས་རིགས་སྒྱུ་རྩལ་ཚོགས་པས་བདེ་ཆེན་ཞིང་སྒྲུབ་ཀྱི་ཚབ་ཏུ་དྲན་རྟེན་གྱི་སྐུ་རེ་བཞེང་བར་འགྲན་བསྡུར་དེ་ལྷ་བབས་དུས་ཆེན་ལ་དབྱངས་གསལ་གྲངས་རྟགས་གནང་དང་། དང་པོ་དང་གཉིས་པའི་རབ་འབྲིང་བདག་གིས་འདེམས་འཆར་ཡིན། ངོས་གཅིག་པུར་མ་ཡིན་པར་དྲ་ཐོག་ནས་འདེམས་ཤོག་འཕེན་ནས་གཟེངས་རྟགས་འབུལ་རྒྱུ་དང་མངོན་བསྟོད་ཀྱང་ཡོད། ཨེ་མ་ཧོས

དཔལ་དགྱེས་པ་རྡོ་རྗེའི་རྣམ་ཐར་བདེན་དོན་རིན་པོ་ཆེ།ལེའུ་བཞི་བ། ཏང་གི་འོག་ནས་རྒྱལ་ཁ་ཐོབ་པའི་ཚུལ།།ལོ་བཅུ་གཅིག་ནས་བཅུ་གཉིས་བར་དུའོ།།ནངས་ནུབ་སྔ་ཕྱིའི་བར་ནས་བསྙེན་སྒྲུབ་བྱས།།རྩ་གསུམ་ཆོས་སྐྱོང་སེམས་ཀྱི་ཆོས་ཉིད་མཇལ།།གཉུག་མའི་སེམས་ལ་ཞི་ལྷག་རྗེན་པར་བུད།།འབྲོག་སྡེའི་ཕྱུགས་ར་ཁྲ་མོར་བྱིན་ཆགས་འབར།།གེ་སར་སྒྲུང་དང་མི་ལ་རས་པའི་མགུར།།ཟབ་གསང་སེམས་ཀྱི་གསེང་ལ་ཐིམ་པའི་ཚེ།།སྔ་ཕྱི་སྐྱེ་བའི་རྣམ་པར་ཐར་པའི་གཏམ།།འདས་སོང་ཐང་ཀའི་རི་མོ་བཞིན་དུ་དྲན།།མ་བརྟག་འཇིག་རྟེན་ཉམས་དགའི་སྣང་ངོར་རུ།།གཟུང་འཛིན་སེམས་ལ་སྦྲུམ་པའི་གྲོང་ཁྱིམ་ཁྲོད།།དགྲ་གྲོགས་བར་མའི་བདེན་རྫུན་སྒྱུ་མའི་འཕྲུལ།།དགའ་སྐྱོའི་གློག་གི་ཟློས་གར་རོལ་འདི་མཚར།།གུ་ཡངས་རེ་དྭོགས་བྲལ་བའི་དགོན་པ་ནས།།ཕྱུགས་རིགས་འདྲ་མིན་བདག་པོ་སྣབ་ལུད་པས།།འཆི་མེད་ལྷ་ལུས་ལས་ལྷག་དགའ་སྤྲོ་བཅས།།དབྱར་དགུན་ཚ་གྲང་བཟོད་པའི་དཔའ་བོ་དངོས།།མཁུར་ཚོས་དཀར་ལ་དམར་བའི་མདངས་དང་ལྡན།།ལྤགས་གོས་ལྤགས་དོར་ལྷམ་རིང་གཟི་བརྗིད་ཅན།།འུར་རྡོ་ཀོ་མདའ་གླིང་བུ་རིང་ཐུང་བཅས།།རལ་འཆིང་མཛེས་པའི་ཇོ་རུ་དཔའ་བོ་བཞིན།།རག་ཁྲ་རི་མོ་རྒྱན་གྱི་དང་པོ་ཐོབ།།ཨ་མཚེ་རོག་མོ་གཟེངས་རྟགས་རིན་མེད་ཀུན།།ཨ་མ་དགྱེས་པའི་ཁྱིམ་ཆུང་གཟི་འོད་བཅས།།རྟ་ནོར་ལུག་གི་འཕེལ་ཁ་དགུང་དུ་འཕྱུར།།སྦྲ་ཆོན་ཐག་པར་རླུང་རྟའི་དར་ཅོག་སྒྲོན།།སྔ་མོ་རི་བོ་བསང་མཆོད་དྲི་ཞིམ་ཐུལ།།དགུང་ཁར་མགྲོན་བཞི་བརྔན་པའི་གསུར་མཆོད་ཀྱི།།ཞིང་ཁམས་ཀུན་ཁྱབ་བླ་མའི་རྗེས་སུ་བཟློས།།བཅུ་གསུམ་ཡིད་བཞིན་ནོར་བུའི་ཐུགས་དམ་དང་།།བཅུ་གཉིས་མཛད་བཟང་དྲན་པའི་རྣམ་ཐར་ལ།།བཅུ་གཅིག་ཀུན་འོད་ཁྱབ་པའི་རྟེན་འབྲེལ་རིགས།།ས་བཅུ་སེམས་དཔའི་རྟུལ་ཞུགས་བདག་གིར་བཞེས།།ཤེས་རབ་དབང་ཕྱུག་རིག་ཆའི་སྤུན་དང་ཟླ།གཞུ་ཤུབ་གོང་འོག་གངས་དཀར་དགའ་བའི་ཚལ།།གཡང་དཀར་ལུག་གི་འབའ་སྒྲ་རྣ་བར་འཇེབས།།འཁྱག་ཀློང་ངར་མའི་གཅེས་ཕྲུག་ཨེ་མ་ཧོ༔

ཁོ་བོ་ནི་མཚོ་སྔོན་ཡུལ་ཤུལ་ཁྲི་འདུར་སྐྱེས་ཤིང་། གཅེས་མིང་ལ་དཀོན་ཅོག་དཔལྡན་དང་པིར་མིང་ལ་གྱིན་འདའ་བ་ཞེས་པ་ཞིག་རང་བཟོས་བྱས། ལོ་ཆུང་ལོ་རིམ་དྲུག་པའི་ཐེམ་སྐས་བརྒལ་ནས་མཐར་གྱིས་ཆོས་དང་རིག་གཞུང་ལ་བག་ཆགས་རེ་འཇོག་ཕྱིར་རང་དགོན་གྱི་གྲལ་མཐར་ཞུགས། ཡེ་ལོ་2014 ལོ་ནས་རྩོམ་རིག་གསར་རྩོམ་གྱི་ཕྱོགས་སུ་གོམ་ཁ་དང་པོ་བསྒྱུར་ཏེ།བགས་ཀྱིས་ལས་མཐུན་སྙན་ངག་གི་ཕྱུགས་ཆུང་ཞིག་བསུས་ཏེ་ཁྱེའུ་སྙིང་རྗེ་མོ་འགའ་ཡང་འཁྲུངས་ཤིང་། འགའ་རེས་སྒེར་དང་གཞུང་གི་དུས་དེབ་གངས་དཀར་རི་བོ་དང་གངས་ཀྱི་རོལ་དབྱངས། ཤྭ་སྐྱ་ལོ་དེབ།ད་དུང་དྲྭ་ཚིགས།ཚགས་པར་སོགས་སུ་འདྲ་པར་ཐེངས་འགར་སྒྲོན་མྱོང་། ད་སྐབས་གསེར་ཐང་བླ་རུང་ནས་སློབ་སྦྱོང་ཕྲན་བུ་རེ་བྱེད་མུར་མཆིས་སོ། ། ཐུགས་ཀྱིས་དགོངས་ཡངས་གནང་རོགས། གྱིན་འདའ་བ། ཁྲི་འདུ། ལུས་ངག་ཡིད་ཀྱིས་སྒོམ་ཞིང་དད་པའི་ཀློང་ན་བཞུགས་པའི།།སེམས་ཀྱི་མཆོད་སྟེགས་སྟེང་གི་ཤེས་རབ་དབྱངས་ཀྱི་བདག་མོར།།རབ་འབྱམས་མཆོད་པའི་སྤྲིན་ཕུང་བློ་ཡིས་བླངས་ཏེ་མཆོད་དོ།། དུས་གསུམ་ནར་མར་འབོད་ཅིང་ཡིད་ཆེས་དད་པས་བཞེངས་བའི།།འཁོར་འདས་དབྱིངས་ནས་གཟིགས་པའི་རྒྱལ་སྲས་བྱང་ཆུབ་སེམས་མ།།ཞེན་ཆགས་སྲིད་པར་ལྟུང་བའི་བདག་འཛིན་འགོང་པོ་སྒྲོལ་ཅིག། སྒོ་གསུམ་འདུན་པས་མཆོད་ཅིང་མོས་གུས་ཀློང་ན་བཞུགས་པའི།།རྒྱ་ཆེན་ཚོགས་གཉིས་ཡེ་རྫོགས་ས་ཐོབ་རྒྱལ་བའི་སྲས་མོ།།མཁྱེན་དཔྱོད་ཡངས་བའི་གཏེར་ལས་ལེགས་གསུང་གྲུ་ཆར་བབས་ཤོག། རབ་དཀར་པད་ཟླའི་གདན་ལས་གདུབ་ཀོར་སིལ་སིལ་འཁྲོལ་བའི།།མེ་ཏོག་མགུལ་བར་ཐོགས་པའི་མཚོ་འཁྲུངས་ཡིད་ཀྱི་ལྷ་མོས།།ཐེག་བཟང་ཚེམས་ཕྲེང་དགོད་བཞིན་འཛུམ་པའི་སྤྱན་ཟུང་སྟོན་ཤོག། ཟ་འོག་སེང་རས་སྤུད་ཅིང་ཉམས་ཀྱིས་སྤྱན་ཟུང་གཡོ་བའི།།གསེར་གྱི་རྒྱུད་སྐུད་འཁྲོལ་བའི་ལྷ་ཚོགས་ཞིང་གི་སྒེག་མོ།།ལང་ཚོའི་འཇོ་སྒེག་དབར་ནས་འཛུམ་དཀར་དར་ཅིག་ངོམ་ཤོག། གཉི་ཟླའི་འོད་ཀྱི་ཕང་བར་ཚིག་གི་ས་བོན་གཏོར་བའི།།ངག་རིགས་མེ་ཏོག་བཞད་པའི་ཚངས་དབྱངས་སྨྲ་བའི་བདག་མོ།།དཀྱུས་རིང་ཨུཏྤལ་འཛུམ་བཞིན་དབྱངས་ཀྱི་ཟིལ་བ་འཁྲོལ་ཤོག། ངག་དབང་ཡུམ་གཅིག་ལྷ་མོས་ཐུགས་བརྩེ་ཡུན་ཅིག་ཕྱོགས་དང་།།ངག་རིགས་དཔལ་ལ་དུང་བའི་སྐལ་ལྡན་མགྲིན་པའི་པད་མོར།།ངག་ཚིག་གེ་སར་ཟེའུ་འབྲུ་ངོམས་མེད་བཅུད་དུ་གཏམས་ཤོག། 2146 10. 6 ཉི་མ་བླ་བྲང་ནས། ཁ་བྱང་མེད་པའི་སྙན་ངག་མཉེན་མོ་ཞིག གྱིན་འདའ་བ། ཁྲི་འདུ། ང་འཛིན་ལྕགས་ཀྱི་ཐག་པ་ཆད་ཡོད་ན།།ང་རྒྱལ་རྡོ་ཡི་མགོ་འཕང་བྱིང་ཟིན་ན།།ང་དང་ཁྱོད་ཅེས་སྒྲུན་སེམས་མི་དགོས་པས།།ང་ནི་རྫོགས་པའི་སངས་རྒྱས་ཡིན་ཀྱང་སྲིད།། འཇིག་རྟེན་ཚང་ཆེན་འདི་ཡི་རྩེད་ཆས་ཡིན།།འཁོར་བའི་བརྙན་འཕྲུལ་ནང་གི་ཟློས་གར་ཡིན།།རང་སེམས་ཕྱི་ནང་གསལ་བའི་ཆུ་ཤེལ་མིན།།རང་གཤིས་རྗེན་པ་རྟོགས་པའི་སངས་རྒྱས་མིན།། ཁྱོས་ཀྱང་སྡིགས་ཚིག་གཤེ་ན་གཤེ་ཤོག་དང་།།སྐྱོན་རྔོག་ཉེས་མཚང་འབྲུ་ན་འབྲུ་ཤོག་དང་།།ངས་ཀྱང་མི་སྨྲ་རྟུལ་ཞུགས་འཛིན་ནས་ཆོག།སེམས་དཀྱེལ་ཡངས་བའི་ཀློང་ནས་འཛིན་ཀྱང་ཆོག། ཤ་ཚའི་ཚིག་ཡུས་ཤིག་གི་ཚིག་གསེང་ན།།བློ་དཀར་བདེན་གཏམ་ཞིག་གི་ནང་བཅུད་ན།།སེམས་ཉིད་རིག་ངོ་འཕྲོད་པའི་ངེས་ཤེས་ཡོད།།རང་སེམས་གསལ་བོར་འཆར་སའི་མེ་ལོང་ཡོད།། ཚོར་བ་འཁྱག་ལ་འབྱར་བའི་སྣང་བ་དེ།།སྣང་བ་རླུང་ལ་འདྲེས་པའི་ཚོར་བ་དེ།།སེམས་ཀྱི་བག་ཆགས་འཐུག་པས་གནད་ཅིག་རེད།།སྔོན་གྱི་ལན་ཆགས་བཙན་པས་ལན་ཞིག་རེད།། ཡུན་ཙམ་ཞིག་ལ་སེམས་རྩ་འཁྲུག་པ་འདི།།སྐད་ཅིག་ཅིག་ལ་ངོ་གདངས་འགྱུར་བ་འདི།།རང་སེམས་འཆིང་ཐག་ཞེན་ཆགས་རྒོད་པས་རེད།།རང་ལུས་གདོས་བཅས་འཛིན་པ་དྲག་པས་རེད།། མི་འདོད་སེམས་བྱུང་འདི་དག་གང་ནས་ཆད།།མ་ངེས་རྟོགས་ཚོགས་འདི་དག་གང་ནས་ཡོང་།།སེམས་ཀྱི་གནས་ལུགས་ངང་ནས་འཚོལ་བར་བྱ།།གཤིས་ཀྱི་ངོ་བོ་ཀློང་ནས་གསལ་བར་བྱ།། ཡེ་ལོ 2019. 5. 9 དགུན་ཟླ་རིང་མོ། གྱིན་འདའ་བ། ཁྲི་འདུ།…

རང་རིག་བླ་མའི་རྣལ་འབྱོར་ཙིཏྟ་མ་ཎི།།ན་མོ་གུ་རུ་བུདྡྷ་ཛྙཱ་ན་ཡེ།།ཨེ་མ་ཀུན་བཟང་རྒྱལ་བའི་ཐུགས།།མ་ལུས་འོད་གསལ་རང་བཞིན་དཔལ།།ཨ་ཧོ་ཀ་ལྷུན་ངོ་བོ་ཉིད།།བསླུ་མེད་ཡིད་བཞིན་ནོར་བུ་མཁྱེན།།སྐྱབས་གཅིག་འདྲེན་མཆོག་ཆོས་ཀྱི་རྒྱལ།།ཡེངས་མེད་འཛིན་མེད་མཐའ་བྲལ་ངང་།།གསང་གསུམ་རང་སེམས་དབྱེར་མེད་པར།།བདེ་གསལ་མི་རྟོག་དྲན་པར་བརྟས།།རང་ངོ་ཤེས་ཞིང་རང་བབས་བཞག།ངོ་བོ་སྟོང་པ་ཆོས་སྐུའི་ཞལ།།རང་བཞིན་ལྷུན་གྲུབ་ལོངས་སྐུའི་རྩལ།།ཐུགས་རྗེ་ཀུན་ཁྱབ་འགྲོ་དོན་མཛད།།སྙིང་དབུས་གཉུག་མའི་དཀྱིལ་འཁོར་དུ།།རྩ་ཐིག་རླུང་སེམས་བདེ་བ་ཆེ།།རིག་པ་ཟང་ཐལ་འོད་ཀྱི་སྐུ།།ཀུན་བཟང་རྒྱལ་བའི་ཞལ་ལ་བལྟའ།།ཕྱི་ན་དད་གུས་ས་གཞི་བརྟན།།ནང་དུ་དམ་ཚིག་ལྗོན་བཟང་འཕེལ།།གསང་བ་འབྲས་བུ་རྗེན་པར་རྟག།ཡང་གསང་ཡིད་བཞིན་ནོར་བུ་ཤར།།ཤར་གྲོལ་དུས་མཉམ་ཀུན་ཏུ་བཟང་།།བླ་མའི་བཀའ་དྲིན་རྫོགས་པ་ཆེ།།ཡེ་སངས་རྒྱས་པ་ཨེ་མ་ཧོ།།ཕྲིན་ལས་ཀུན་ཁྱབ་ལྷ་རྒྱལ་ལོ།།ཨོཾ་གུ་རུ་བུདྡྷ་ཛྙཱ་ན་སིདྡྷི་ཧཱུཾ་ཧྲཱིཿཞེས་པ་ས་ཕག་ཐ་སྐར་ཟླ་བའི་གཟའ་ཚེས་དགེ་བར་ལས་སྨོན་གྱིས་འབྲེལ་བའི་འབྲུག་མཁས་དབང་དམ་པ་ཕུབ་རྡོ་རྗེ་དབང་དང་ཨེ་ཝཾ་ལ་ལྷག་པར་དད་པའི་དོལ་པོ་པ་བཀྲ་ཤིས་ལྷུན་གྲུབ་ཀྱིས་ངོར་ཤྲཱིཿཨེ་མ་ཧོས་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་ཐོལ་བྱུང་དུ་ཕུལ་བར་དགེའོ།། །། སྤྱི་ལོ་༢༠༡༩ ཟླ་བ༡༡ ཚེས་༡༡་ལ།།