ན་རྒ་འཆི་མེད་ཀྱི་ཨ་ཕོ་ལྕང་ལོ་ཅན།ན་མོ་མ་ཧཱ་གུ་རུ་ཤྲཱིཿཨེ་མ་ཧོ༔༼༡༽སྔོ་བསངས་བུ་མོའི་གཞིན་ལ་མ་ཆགས་ཤིང་།།རྟ་བདུན་དབང་པོའི་དྲོད་ལ་མ་རེ་ནས།།ཀུ་མུད་གཉེན་ལ་མ་བལྟས་སྒྱུ་ལུས་གར།།ཨེ་ཝཾ་མཁྱེན་བརྩེའི་རིག་པ་ཤིན་ཏུ་གསལ།།༼༢༽ནམ་མཁའི་ཀློང་རལ་སྙམ་པའི་འཇིགས་སྣང་མེད།།རྒྱ་མཚོའི་ཀླུང་ཡངས་སྐམ་པའི་དྭོགས་སྐྲག་མེད།།མི་འདོད་དགྲ་གཅན་སྡུག་པའི་གནོད་པ་མེད།།འཇིགས་མེད་རྟུལ་ཞུགས་སྤྱོད་པའི་རྣལ་འབྱོར་ལགས།།༼༣༽རྨད་བྱུང་ཛམ་གླིང་སྒང་ན་ལུང་རིགས་བདག།ཀུན་བཟང་གཡུ་རལ་རྒྱས་པའི་སེང་ཕྲུག་ང་།།ན་རྒས་ཉེར་འཚེའི་འབུ་སྲིན་རབ་དབེན་ཕྱིར།།གང་ཤར་ཐོལ་བྱུང་མྱུར་བྲིས་ཐོགས་པ་མེད།།༼༤༽ལོག་སྨྲའི་ལྟ་ངན་འཇོམས་པའི་སེང་ཆེན་ཡིན།།རིགས་པའི་གད་རྒྱངས་སྒྲོག་མཁས་སེང་གདངས་ཡིན།།གངས་ལྗོངས་ལྷ་འབངས་སྐྱོང་བའི་སེང་རྒྱལ་ཡིན།།སེང་ལྕམ་བརྩེ་བའི་ཉི་གཞོན་འཛུམ་མདངས་གསལ།།༼༥༽རྒྱལ་བསྟན་རིན་ཆེན་འཛིན་པའི་སྲོག་ཤིང་ཆེ།།སྔ་འགྱུར་བཀའ་གཏེར་སྐྱོང་བའི་བསྟན་སྲུང་ཆེ།།གཏེར་གསར་ཕྱོགས་དུས་སྤེལ་བའི་དེད་དཔོན་ཆེ།།ཆེ་ཆོས་ཀུན་བཟང་ཕྲིན་ལས་བགྲེས་རྒུད་བྲལ།།༼༦༽མཁྱེན་པ་ནམ་མཁའི་མཐའ་བཞིན་ཀུན་ལ་ཁྱབ།།འོད་གསལ་ལུང་རིགས་རྒྱུ་སྐར་ཉི་ཟླ་བཀྲ།།ཕན་བདེས་སྣང་བ་སྦྱིན་པའི་དགེ་ཚོགས་ཤིས།།བདེ་ལེགས་ཀུན་བཟང་དྲན་པ་བརྗེད་ལྐུགས་བྲལ།།༼༧༽ཨེ་ཝཾ་ཉི་ཟླས་འགྲོ་ཀུན་ཆོས་སྒོ་འབྱེད།།ཕན་བདེའི་ཕྲིན་ལས་ཕྱོགས་དུས་ཀུན་ཏུ་སྤེལ།།འཛམ་གླིང་ཞི་བདེའི་འོད་སྣང་རྟག་གསལ་ནས།།མ་རིག་མུན་སེལ་འོད་གསལ་ཕུང་པོ་ལགས།།༼༨༽དབུ་ནག་ལྕང་ལོ་དར་མས་སྐུ་ལུས་གཏམས།།བཞི་བཅུའི་དུང་སོ་དཔུང་མཉམ་མ་རལ་བརྟས།།ཀུན་རྟོག་བརྒྱད་བཅུའི་རྒྱུ་བ་མ་འགགས་ཕྱིར།།སྙན་ངག་མྱུར་བྲིས་བགྱི་བར་ཐོགས་མེད་ལགས།།༼༩༽ལ་དྭགས་གངས་ཀྱི་ར་བའི་བར་གསེང་ནས།།ལྷག་བསམ་གངས་ལས་དཀར་བའི་གངས་ཅན་པ།།འཇམ་དཔལ་གངས་ལ་གཏོར་བའི་འབྲས་དཀར་འདིས།།མཁས་དབང་དམ་པའི་སྐུ་ཚེ་བརྟན་གྱུར་ཅིག།ཅེས་རབ་གནས་ས་ཕག་ཐ་སྐར་ཟླ་ཚེ་ངན་པར་སྟོན་གླུའི་མཇུག་བྱང་དུ་དྲ་གྲོགས་ཤིག་གིས་མི་ཚེ་རིང་ན། མྱུར་བྲིས་མི་ཐུབ་པ་ཞིག་མི་འོང་ངམ། ཞེས་པའི་ལན་དུ་ཚིག་ཇ་ཁམ་གང་གི་ཚེ་དབྱིན་ཡུལ་ཨེ་ཝཾ་སྦྲང་རྩིའི་ཟ་ཁང་ནས་ཤྲཱིཿསྨྱོན་ཨེ་མ་ཧོས་བདེ་མྱུར་ཏུ་བྲིས་པར་དགེའོ།། །།

ནམ་རྒྱུན་དུ་ངའི་མི་ཚེའི་ནང་ལ་གཟི་བརྗིད་དང་འགྱོད་མེད་ཅིག་ཡོད་པ་ནི་བླ་མ་དམ་པ་རྣམ་པའི་ཐུགས་དགོངས་ཟིན་པ་དང་ཨ་མ་དྲིན་ཆེན་མའི་བསམ་པ་ཡོངས་སུ་བསྐོངས་བ་དེ་ཡིན། དཔེར་ན་ཆོས་རྗེ་དམ་པ་ཡིད་བཞིན་ནོར་བུའི་གདམས་ངག་ཐམས་ཅད་བཟང་པོ་སྤྱོད་པ་ལས། ལས་ཀྱི་སྟོབས་རྣམས་ཡོངས་དག་བྱེད་ཅིང་།།ཉོན་མོངས་སྟོབས་རྣམས་ཀུན་ཏུ་འཇོམས་པར་བྱེད།།བདུད་ཀྱི་སྟོབས་རྣམས་སྟོབས་མེད་རབ་ཏུ་བྱེད།། བཟང་པོ་སྤྱོད་པའི་སྟོབས་ནི་རྫོགས་པར་རྒྱུ།། ཞེས་མདོ་སྡེ་ལས་བརྒྱ་བ་ནས་རྫོགས་པ་ཆེན་པོའི་བར་དུ་ཆོས་ཀུན་རྫོགས་པར་དབང་ལུང་མན་ངག་ཡོངས་སུ་རྫོགས་པར་ཞུས་ཏེ་ཉམས་ལེན་དུ་བྱས་ནས་ད་ནི་འཆི་གསོན་གང་བྱུང་དགའ་ཡ་ལེར་གནས་པ་འདིའོ།། ཨེ་མ་ཧོས

ཨེ་མ་ཧོའི་གཤིས་བསྟོད་མི་འཇིགས་རང་བྱུང་གདོང་ལྔའི་སྒྲ་དབྱངས།།ན་མོ་མ་ཧཱ་གུ་རུ་ཨེ་མ་ཧོ༔ཀ་དག་གདོད་མའི་མགོན་པོ་ཀུན་བཟང་ཡབ་ཡུམ།།ལྷུན་གྲུབ་འོད་གསལ་སྙིང་པོ་འཇམ་དཔལ་ཡབ་ཡུམ།།རང་བྱུང་ཕྲིན་ལས་འགྲོ་དོན་པད་འབྱུང་ཡབ་ཡུམ།།དབྱེར་མེད་དཔལ་དགྱེས་རྡོ་རྗེ་ཟུང་འཇུག་བླ་མ།།འཕགས་ཡུལ་གཤིན་རྗེའི་བཀའ་བབས་འཇམ་དཔལ་བཤེས་གཉེན།།བོད་ཡུལ་བསྟན་པའི་སྲོག་འཛིན་སངས་རྒྱས་ཡེ་ཤེས།།སྙིགས་དུས་འདྲེན་པའི་དེད་དཔོན་པདྨ་དྲག་གླིང་།།ཀུན་འདུས་འཇམ་དཔལ་དབྱངས་དངོས་དཔལ་དགྱེས་རྡོ་རྗེ།།མཁྱེན་རབ་རྨད་བྱུང་བཅུ་ཕྲག་རིག་པའི་ཁྱབ་བདག།།བརྩེ་ཆེན་དབང་ཕྱུག་ཀུན་ལ་བྱམས་པའི་ཕ་མ།།མཐུ་སྟོབས་ཀུན་བཟང་གཏེར་ཆེན་ཨེ་མ་ཧོ་ལ།།གསོལ་བ་འདེབས་སོ་དོན་གཉིས་ལྷུན་གྲུབ་ཤོག།ཨེ་ཝཾ་དགེ་མཚན་ས་གསུམ་སྙན་པར་གྲགས།།གང་འདུལ་ཕྲིན་ལས་ཉི་ཟླའི་འོད་སྣང་བཞིན།།མཁྱེན་བརྩེ་ནུས་ལྡན་གཏེར་ཆེན་དཔའ་བོ་ཆེ།།སྐུ་ཚེ་བརྟན་ཅིང་གང་བཞེད་ལྷུན་གྲུབ་ཤོག།སྤྲུལ་སྐུའི་འགྲོ་དོན་སེམས་ཅན་ཐར་ལམ་བཀོད།།ལོངས་སྐུའི་དག་ཞིང་མ་ལུས་འགྲོ་ལ་སྟོན།།ཆོས་སྐུའི་དགོངས་ལ་རྟོགས་པའི་དཔལ་དགྱེས་པ།།ཡོན་ཏན་ཕྲིན་ལས་རྡོ་རྗེ་ཀུན་ཁྱབ་ཤོག།འབྲེལ་ཚད་བདེ་ཆེན་ཞིང་དུ་འདྲེན་པའི་དཔལ།།འོད་གསལ་ཞིང་གི་ཁྱབ་བདག་དཔལ་དགྱེས་པ།།མཁྱེན་བརྩེ་ནུས་ལྡན་ཀུན་བཟང་རྡོ་རྗེ་འཆང་།།མཁན་ཆེན་བླ་མའི་ཞབས་ལ་གསོལ་བ་འདེབས།།ཆོས་ཉིད་མངོན་སུམ་རྟོགས་པར་བྱིན་གྱིས་རློབས།།ཉམས་སྣང་གོང་དུ་འཕེལ་བར་ཐུགས་རྗེས་ཟུངས།།རིག་པ་ཚད་དུ་ཕེབས་པའི་དངོས་གྲུབ་སྩོལ།།ཆོས་ཉིད་མཐར་ཕྱིན་རྒྱལ་བའི་སྐུ་ཐོབ་ཤོག།ཅེས་པ་འདིའང་རབ་གནས་ས་ཕག་ཐ་སྐར་ཟླ་བའི་ཡར་ཚེས་བཅུ་ལ་འབྲུག་པ་སངས་རྒྱས་ཀུན་འདུས་ཀྱིས་བསྐུལ་ངོར། བདག་འདྲ་མཉྫུ་ཤྲཱིཿཨནྟ་བཛྲའི་མཚན་ཅན་གྱིས་ཤར་མར་དུ་སྨྲས་པ་དགེའོ།། །།

སྟོན་ཀའི་མྱ་ངན་གྱི་ལོ་མ།།ཀྱེ་མ་ཧོ།།ལྷན་སྐྱེས་ཤིང་ལོ་མི་འདོད་ས་ལ་ལྷུང་།།ལྗང་མདོག་རང་དབང་མེད་པར་སེར་པོ་གྱུར།།ལྭ་དཀར་འབྱོར་བའི་རྒུད་པ་གམ་ན་ལྷག།ཀྱེ་མ་འཁོར་བའི་ཆོས་ལ་སྙིང་པོ་རལ།།ནོར་འཛིན་ཕལ་ཆེར་སྐྱི་སེར་ངར་མོས་མནར།།སྨུག་ཀློང་ཁྲོད་ནས་མི་རྟག་སྒྱུ་མ་མཐོང་།།རྨི་ལམ་ནང་ནས་བར་དོའི་གྲོགས་པོར་ཐུག།ཀྱེ་མ་འཆི་བའི་གསང་བ་ཨ་ཙ་མ།།བློ་གཏད་གྲོགས་ཀྱིས་བསླུས་པའི་བར་གསེང་ལས།།དྲོད་འཇམ་རིང་མོའི་དབྱར་རླུང་གྲང་ངེད་ཐལ།།ལུས་ངག་དྲོད་ཁོལ་ཡལ་བའི་རྒྱུ་འགྲིམ་ལ།།ཀྱེ་མ་ཡང་སྙིང་དོར་བ་ཀྱེ་མ་ཧུད།།བདེན་དྲང་དོང་དུ་གཡུགས་པའི་དུས་རབས་དར།།དྲིན་ལན་ལོག་འཇལ་མོད་པའི་སྐྱིལ་ཐང་ཁྲོད།།པུར་སྒམ་གསེར་དངུལ་རྒྱན་པའི་གནའ་སྲོལ་རིགས།།ཀྱེ་མ་མུན་པ་ལས་ཀྱང་མུན་ནག་བརྟས།།ཁ་མཆུ་རྡོ་ལ་ཚེས་པའི་ནམ་ཟླའི་གར།།ཐ་སྐར་ཉ་ལ་འཆར་བའི་རྟེན་འབྲེལ་སྐབས།།འཇིག་རྟེན་མགོ་བོ་བྲལ་བའི་རྡུལ་ཕུང་ཀླུང་།།ཀྱེ་མ་སྟོན་གྱི་མུན་ཀློང་ཡ་རེ་ང་།།འདིར་སྣང་ཁྲ་ཁྲ་ཡང་མོ་རླུང་གིས་ཁྱེར།།ཚོགས་བདུན་ཤེས་པ་ཀུན་གཞིའི་ངང་ངུ་རྒྱལ།།གྲོག་ཚང་རལ་བཞིན་བོད་འབངས་སྙིང་རེ་རྗེ།།ཀྱེ་མ་ཀྱེ་ཧུད་འགྲོ་ཀུན་བླ་མས་སྐྱོབས།།ཞེས་པ་འདི་ཡང་རབ་གནས་ས་ཕག་གི་ཐ་སྐར་ཟླ་བའི་ཚེས་བཅུ་ལ་སྒྲོལ་ངོར་བརྡ་དོན་སྙིང་པོ་རབ་གསལ་གྱི་རྒྱབ་ཆོས་སུ་ཤྲཱིཿསྨྱོན་པས་ཉི་མ་དམར་ཐག་ཆོད་པའི་སྐབས་སུ་མྱུར་བྲིས་བྱས་པར་དགེའོ།། །།

Om Ah Hung Hri Drumའོད་གསལ་སྙིང་པོའི་དགྱེས་མགུར་བདེ་ཆེན་པདྨོ་བཞད་པའི་ཉི་གཞོན། གཞས་ཚིག ཨེ་མ་ཧོ།དབྱངས། ནམ་མཁའ་རྡོ་རྗེ།ལེན་མཁན། ནམ་མཁའ།ཨེ་མ་ཧོ།།བླ་མ་དྲན་པའི་རྟེན་ཤིང་དཀར་པོ།།ཡི་དམ་རིག་པའི་འཆར་ཆ་དཀར་པོ།།མཁའ་འགྲོ་གཉུག་མའི་བདེ་ཆེན་དཀར་པོ།།དཀར་གསུམ་སྙིང་པོ་ནམ་ཡང་མ་བརྗེད།།ཨེ་མ་ཧོ།།རང་ཚུགས་མ་ཤོར་བདེན་པའི་ཀ་བ།།གཞན་སེམས་མ་དཀྲུག་དྲང་པོའི་གདོང་མ།།རང་གཞན་ཕན་བདེའི་ལྷ་ཁང་གྲུ་བཞི།།བདག་སྐྱོང་དམ་པའི་དྲན་ཤེས་མ་བརྗེད།།ཨེ་མ་ཧོ།།སྐུ་གཟུགས་གཙང་མ་བྱ་རྒྱུད་རྣམ་དག།གསུང་ཆོས་གཙང་མ་སྤྱོད་རྒྱུད་རྫོགས་པ།།ཐུགས་རྗེ་གཙང་མ་རྣལ་འབྱོར་སྨིན་གྲོལ།།གསང་སྔགས་མཛད་པ་ནམ་ཡང་མ་བརྗེད།།ཨེ་མ་ཧོ།།དྲིན་ཆེན་ཕ་མ་བསྐྱེད་རིམ་རྩ་བ།།ཐེག་ཆེན་སེམས་བསྐྱེད་རྫོགས་རིམ་སྙིང་པོ།།རྫོགས་པ་ཆེན་པོ་ཀུན་ལས་མཆོག་གྱུར།།ཡོ་ག་རྣམ་གསུམ་ཐུགས་དམ་མ་བརྗེད།།ཨེ་མ་ཧོ།།ཕ་མའི་བཀའ་དྲིན་ཚེ་འདིར་འཇལ་བ།།བླ་མའི་བཀའ་དྲིན་འདི་ཕྱི་བསླུ་མེད།།རང་དྲིན་རང་ལ་སྙིང་པོ་ལོན་པ།།དམ་ཆོས་སྒྲུབ་པ་སྙིང་ནས་མ་བརྗེད།།ཨེ་མ་ཧོ།།བརྗེད་མེད་སེམས་ཀྱི་རྡོ་རྗེ་འཆང་ཆེན།།ཀུན་བཟང་བླ་མ་སངས་རྒྱས་ཡེ་ཤེས།།རྒྱལ་བ་ཀུན་འདུས་མཚོ་སྐྱེས་རྡོ་རྗེ།།ཡེ་གནས་རྒྱལ་བའི་གསང་མཛོད་མ་བརྗེད།།ཅེས་རབ་གནས་ས་ཕག་ཐ་སྐར་ཟླ་བའི་ཚེས་བཅུའི་ཐོ་རངས་ཁར་འོད་གསལ་ཆོས་སྒྲོན་ངོར་ཤྲཱིཿསྨྱོན་ཨེ་མ་ཧོས་བདེན་གཏམ་གླུ་རུ་བླངས་པར་དགེའོ།། །།

གུ་རུའི་གསོལ་འདེབས་ལྷ་སྔགས་ཕྱག་རྒྱ་མ།།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔ཨོཾ་དབྱིངས་སངས་རྒྱས་ཆོས་སྐུ་ཀུན་ཏུ་བཟང་།།ཨཱཿདབྱངས་དམ་ཆོས་ལོངས་སྐུ་རྡོ་རྗེ་འཆང་།།ཧཱུཾ་བྱིན་དགེ་འདུན་སྤྲུལ་སྐུ་པདྨ་འབྱུང་།།ཀུན་འདུས་བདེ་བཤེགས་ཡིད་བཞིན་ནོར་བུ་མཁྱེན།།བཛྲ་རྡོར་སེམས་མེ་ལོང་ཡེ་ཤེས་གསལ།།གུ་རུ་རིན་འབྱུང་མཉམ་ཉིད་ཡེ་ཤེས་གསལ།།པདྨ་སྣང་མཐའ་སོར་རྟོགས་ཡེ་ཤེས་གསལ།།སིདྡྷི་དོན་གྲུབ་བྱ་གྲུབ་ཡེ་ཤེས་གསལ།།ཧཱུཾ་ཉིད་རྣམ་སྣང་ཆོས་དབྱིངས་ཡེ་ཤེས་གསལ།།འོད་གསལ་སྒྱུ་འཕྲུལ་དྲྭ་བའི་སྙིང་པོ་གསལ།།ཀ་དག་སྣང་གྲགས་རིག་པ་ཡེ་ཤེས་ངང་།།ཕྱོགས་དུས་རྒྱལ་ཀུན་རང་གཟུགས་ཨེ་མ་ཧོ།།ཨོཾ་ཨཱཿཧཱུཾ་བཛྲ་གུ་རུ་པདྨ་སིདྡྷི་ཧཱུཾ༔ཅི་ནུས་བཟླས་ཏེ་ཆོས་ཉིད་མཉམ་པའི་ངང་དུ་མཉམ་པར་བཞག་གོཅེས་རབ་གནས་ས་ཕག་ཐ་སྐར་ཟླ་བའི་ཡར་ངོས་ཚེས་བཅུ་ལ་བིརྱ་དྷཱ་ར་སྭ་ར་སྭཱ་སྟི་དེ་ཝིའི་ངོར་ཤྲཱིས་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་གུས་པས་ཕུལ་བར་དགེའོ།། །།ཟླ་བ་དགུ་པ་དགུན་ར་ཕག་ཐ་སྐར་ཟླ་བའི་ཚེས་བཅུ་ལ་ཨོ་རྒྱན་གཉིས་པ་བལ་ཡུལ་ཡང་ལེ་ཤོད་དུ་ཕེབས་ཏེ་དཔལ་ཡང་དག་གི་སྒྲུབ་པ་ལ་བཞུགས་ཚེ་བལ་ཡུལ་དང་བོད་ཡུལ་གཉིས་ཀའི་ཆོས་ལ་གནག་པས་མ་རུངས་པའི་ལྷ་འདྲེས་ཏེ་ལྷ་མ་སྲིན་སྡེ་བརྒྱད་ཀྱི་ནད་མུག་སོགས་མི་འདོད་པའི་ཉེ་བར་འཚེ་བས་ཐོ་སྣ་ཚོགས་པ་བརྩམས་པར་བྱས་ཀྱང་དཔལ་རྡོ་རྗེ་གཞོན་ནུའི་སྐུར་བཞེངས་ཏེ་ལྷ་མ་སྲིན་སྡེ་བརྒྱད་ཀྱི་སྲོག་སྙིང་བླངས་ཤིང་བཀའ་དམ་གཉན་པོ་ལ་བཞག་ནས་ཆོས་ཀྱི་བསྲུང་མར་བསྐོས་ཏེ་བར་ཆད་ཐམས་ཅད་ལྷག་མེད་དུ་བསལ་ཞིང་ཕྱག་རྒྱ་ཆེན་པོ་མཆོག་གི་དངོས་གྲུབ་བརྙེས་པའི་ཚུལ་ཡང་ཕུར་གཉིས་ལ་བསྟེན་ཅིང་ཡང་ཕུར་བསྒྲགས་མའི་གདམས་པ་སྐལ་ལྡན་རྣམས་ཀྱི་དཔལ་དུ་སྩལ་བར་མཛད་པས་རྡོ་རྗེ་ཐོད་ཕྲེང་རྩལ་དུ་གྲགས་པའི་དུས་ཆེན་ཏེ་འདིའི་དུས་མཆོད་བཟུང་བ་ལ། གཤིན་རྗེའི་འཁོར་ལོ། མ་མོའི་དལ་ཡམས། འབྱུང་པོའི་རིམས་ནད་ལ་སོགས་པ་དང་། ལྟས་ངན་བརྒྱད་ཅུ་རྩ་གཅིག ཡེ་འདྲོགས་སུམ་བརྒྱ་དྲུག་ཅུ། དུས་མིན་འཆི་བ་རྣམ་བརྒྱད་སོགས་འགལ་རྐྱེན་བར་ཆད་སེལ་ཞིང་ལྷུན་གྲུབ་རིག་འཛིན་གྱི་ས་འཐོབ་པར་འགྱུར་རོ། །༄༅། །ཨོྃ་ཨཱ༔ཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔རང་བཞིན་རྣམ་དག་བློ་བྲལ་གཉུག་མའི་སྦུབས༔གསལ་མདངས་འགག་མེད་བདེ་སྟོང་ལོངས་སྐུའི་རྩལ༔སྤྲུལ་སྐུའི་ཞིང་ཁམས་མི་མཇེད་བཀོད་པའི་ཆ༔ཟངས་མདོག་དཔལ་གྱི་རི་བོར་སྐྱེ་བར་ཤོག༔འཛམ་གླིང་ས་ཡི་ལྟེ་བ་རྡོ་རྗེ་གདན༔དུས་གསུམ་རྒྱལ་བས་ཆོས་འཁོར་བསྐོར་བའི་གནས༔དེ་ཡི་ནུབ་བྱང་རྔ་ཡབ་ལང་ཀའི་གླིང༔ཟངས་མདོག་དཔལ་གྱི་རི་བོར་སྐྱེ་བར་ཤོག༔བཀོད་པ་ལྷུན་གྲུབ་ཙིཏྟིའི་ས་འཛིན་སྤོ༔རྩ་བ་གདེངས་ཅན་འཇོག་པོའི་ཐོད་དུ་བཅིངས༔རྐེད་པར་ལུས་མེད་མཁའ་འགྲོས་ཚོགས་འཁོར་བསྐོར༔རྩེ་མོ་གཟུགས་ཁམས་བསམ་གཏན་སྙོགས་པ་ལྟའི༔ཟངས་མདོག་དཔལ་གྱི་རི་བོར་སྐྱེ་བར་ཤོག༔རི་རྒྱལ་དེ་ཡི་རྩེ་མོའི་གཞལ་མེད་ཁང༔ཤར་ཤེལ་ལྷོ་ཕྱོགས་དབང་སྔོན་བེེཌུརྱ༔ནུབ་ཕྱོགས་པད་རག་བྱང་ཕྱོགས་ཨིནྡྲ་ནི༔ཕྱི་ནང་བར་མེད་ཟང་ཐལ་དབང་གཞུའི་མདངས༔ཟངས་མདོག་དཔལ་གྱི་རི་བོར་སྐྱེ་བར་ཤོག༔ཁྱམས་དང་གྲུ་ཆད་གློ་འབུར་འཇའ་རིས་འཁྱིལ༔འདོད་སྣམ་ཕ་གུ་དྲ་བ་དྲ་ཕྱེད་དང༔ཤར་བུ་མདའ་ཡབ་སྒོ་རྒྱན་རྟ་བབ་ཅན༔ཆོས་འཁོར་གདུགས་དོན་བརྡ་དོན་རྟགས་རྫོགས་པའི༔ཟངས་མདོག་དཔལ་གྱི་རི་བོར་སྐྱེ་བར་ཤོག༔དཔག་བསམ་ལྗོན་པའི་ཤིང་དང་བདུད་རྩིའི་ཆུ༔ནེའུ་སེང་སྨན་ལྗོངས་དྲི་བསུང་འཐུལ་བའི་ཁྲོད༔དྲང་སྲོང་རིག་འཛིན་བྱ་ཚོགས་བྷྲ་མ་ར༔ཐེག་གསུམ་ཆོས་ཀྱི་སྒྲ་དང་བརྡ་གླུ་སྒྱུར༔ཟངས་མདོག་དཔལ་གྱི་རི་བོར་སྐྱེ་བར་ཤོག༔ཕོ་བྲང་གཞལ་མེད་ཆེན་པོའི་ལྟེ་བ་ལ༔རིན་ཆེན་ཟུར་བརྒྱད་པདྨ་ཉི་ཟླའི་སྟེང༔བདེ་གཤེགས་ཀུན་འདུས་རང་བྱུང་པདྨ་འབྱུང༔སྐུ་གསུམ་རིག་འདུས་འཇའ་འོད་ཀློང་ན་བཞུགས༔ཟངས་མདོག་དཔལ་གྱི་རི་བོར་སྐྱེ་བར་ཤོག༔གང་གི་ཟབ་གསལ་བདེ་ཆེན་ཡེ་ཤེས་རྩལ༔སྟོང་ཉིད་སྙིང་རྗེར་ཤར་བའི་སྒྱུ་འཕྲུལ་ལས༔ཕྱོགས་བཅུ་ཀུན་དང་ཁྱད་པར་བོད་ཡུལ་དུ༔སྤྲུལ་བ་བྱེ་བ་ཕྲག་བརྒྱ་བར་མེད་འགྱེད༔ཟངས་མདོག་དཔལ་གྱི་རི་བོར་སྐྱེ་བར་ཤོག༔གཡས་ཀྱི་གྲལ་ན་རྒྱ་བོད་རིག་འཛིན་རྣམས༔འོད་གསལ་རྡོ་རྗེའི་རོལ་མོར་འབྱམས་སུ་ཀླས༔གཡོན་གྱི་གྲལ་ན་འཕགས་བོད་པཎ་གྲུབ་རྣམས༔བཤད་སྒྲུབ་ཉམས་རྟོགས་བགྲོ་གླེང་ཆོས་སྒྲ་འུར༔ཟངས་མདོག་དཔལ་གྱི་རི་བོར་སྐྱེ་བར་ཤོག༔མཐའ་སྐོར་བར་མཚམས་བར་མཚམས་རྗེ་འབངས་ཉེར་ལྔ་དང༔སྤྲུལ་པའི་གཏེར་སྟོན་གྲུབ་པའི་ཁྱུ་མཆོག་རྣམས༔ཐེག་པ་རིམ་དགུའི་འཁོར་ལོ་ལ་སྤྱོད་ཅིང༔གཡོ་མེད་དགོངས་པའི་གཟེར་གྱི་བརྟུལ་ཞུགས་འཛིན༔ཟངས་མདོག་དཔལ་གྱི་རི་བོར་སྐྱེ་བར་ཤོག༔ཕྱོགས་བཞི་མཚམས་བརྒྱད་གྲུ་ཆད་བར་ཁྱམས་ཀུན༔དཔའ་བོ་ཌཱ་ཀི་ལྷ་དང་ལྷ་མོས་ཁེངས༔རྡོ་རྗེའི་གླུ་གར་མིག་འཕྲུལ་ལྟ་བུར་གཡོ༔ཕྱི་ནང་གསང་བའི་མཆོད་སྤྲིན་སྟོབ་པར་བྱེད༔ཟངས་མདོག་དཔལ་གྱི་རི་བོར་སྐྱེ་བར་ཤོག༔དེ་སྟེང་ལོངས་སྐུའི་གཞལ་མེད་བཀོད་མཛེས་ནང༔ཕྱག་པ་པདྨ་འཇིག་རྟེན་དབང་ཕྱུག་ལ༔ཚོམ་བུའི་དཀྱིལ་འཁོར་བསམ་ཡས་འཁོར་གྱིས་བསྐོར༔རྣམ་རྟོག་བག་ཆགས་དགྲ་གདོན་ཐལ་བར་བྱེད༔ཟངས་མདོག་དཔལ་གྱི་རི་བོར་སྐྱེ་བར་ཤོག༔དེ་སྟེང་ཆོས་སྐུའི་ཞིང་ཁམས་ཉམས་དགའ་བར༔གཞི་སྣང་ཡེ་ཤེས་སྙིང་པོ་ཀུན་ཏུ་བཟང༔སྣང་མཐའ་རིག་པའི་འཁོར་ལ་བརྡ་ཆོས་སྟོན༔སྟོན་འཁོར་དགོངས་པ་མཉམ་པའི་ཕྲིན་ལས་ཅན༔ཟངས་མདོག་དཔལ་གྱི་རི་བོར་སྐྱེ་བར་ཤོག༔སྒོ་བཞིར་བཀའ་ཉན་རྒྱལ་པོ་ཆེན་པོ་བཞི༔ཕྱི་ནང་གསང་བའི་ལྷ་སྲིན་སྡེ་བརྒྱད་ཀུན༔ཕོ་ཉར་མངགས་ནས་མུ་སྟེགས་དམ་སྲི་འདུལ༔དམ་ཅན་རྒྱ་མཚོ་དཔའ་རྟགས་རྒྱལ་རྔ་རྡུང༔ཟངས་མདོག་དཔལ་གྱི་རི་བོར་སྐྱེ་བར་ཤོག༔དེ་ལྟར་ཞིང་གི་བཀོད་པ་གསལ་བཏབ་ནས༔ཕྱི་རོལ་ཡུལ་གྱི་ཟངས་མདོག་དཔལ་རི་ལ༔ཡུལ་ཅན་ནང་གི་རིག་པས་སྨོན་དེའི་མཐུས༔རང་ལུས་མི་མཇེད་ཞིང་གི་བཀོད་པའི་ནང༔རང་སྣང་ཟངས་མདོག་དཔལ་རིར་མངོན་པར་ཤོག༔ཁྱད་པར་བསྐྱེད་རྫོགས་ཟབ་མོའི་རྟེན་འབྲེལ་གྱིས༔རྩ་གསུམ་འཁོར་ལྔའི་མདུད་པ་གྲོལ་ནས་ཀྱང༔སྙིང་དབུས་ཟངས་མདོག་དཔལ་རིའི་ཕོ་བྲང་ཆེར༔ལྷན་སྐྱེས་ཡེ་ཤེས་རོལ་བའི་རྩལ་རྫོགས་ནས༔རང་རིག་པད་འབྱུང་རྗེ་དང་མཇལ་བར་ཤོག༔ཚོགས་སྦྱོར་མཐོང་སྒོམ་མི་སློབ་ལམ་ལྔའི་སྦུབས༔རབ་དགའ་ནས་བཟུང་ཀུན་ཏུ་འོད་ཀྱི་བར༔དེ་ལས་རྡོ་རྗེ་ཐེག་པའི་ས་མཆོག་གཉིས༔ཁྱད་པར་འོད་གསལ་རྫོགས་པ་ཆེན་པོ་ཡི༔ཐུན་མོང་མ་ཡིན་ཡེ་ཤེས་བླ་མའི་ས༔བྱར་མེད་ལྷུག་པའི་ངང་དུ་རྫོགས་ནས་ཀྱང༔གཞི་དབྱིངས་པདྨ་འོད་དུ་གྲོལ་བར་ཤོག༔གལ་ཏེ་དགོངས་པའི་རྩལ་ཆེན་མ་རྫོགས་ན༔གསོལ་འདེབས་སྨོན་ལམ་དྲག་པོའི་འཕེན་པ་ཡིས༔ནམ་ཞིག་འཆི་བ་བཙན་ཐབས་བྱུང་བའི་ཚེ༔པདྨའི་ཕོ་ཉ་མཁའ་འགྲོ་གར་མཁན་མས༔མངོན་སུམ་ལག་པའི་ཁུ་ཚུར་ནས་བཟུང་སྟེ༔མཁའ་ཆེན་བཟའ་དང་གུ་ཎ་ནཱ་ཐ་ལྟར༔བདག་ཀྱང་པདྨ་འོད་དུ་འཁྲིད་པར་ཤོག༔ཆོས་དབྱིངས་རྣམ་པར་དག་པའི་བདེན་པ་དང༔དཀོན་མཆོག་རྩ་གསུམ་རྒྱ་མཚོའི་ཐུགས་རྗེ་ཡིས༔བདག་གི་སྨོན་པ་ཡིད་བཞིན་འགྲུབ་གྱུར་ནས༔འགྲོ་བ་འདྲེན་པའི་དེད་དཔོན་བྱེད་པར་ཤོག༔ཅེས་པའང་རང་བཞིན་སྤྲུལ་པའི་ཞིང་ཁམས་དང་ཁྱད་པར་མ་མཆིས་པ་རྔ་ཡབ་པདྨ་འོད་ཀྱི་ཞིང་མཆོག་དམ་པར་བགྲོད་པའི་སྨོན་ལམ་དཔལ་རིའི་གསང་ལམ་ཞེས་བྱ་བ༔ སྙན་བརྒྱུར་རྡོ་རྗེ་བཙུན་མོའི་རྣལ་འབྱོར་བ་དྷརྨཱ་ཀིརྟིའི་བཞེད་སྐོངས་སུ་དཔལ་ཨོ་རྒྱན་ཆོས་ཀྱི་རྒྱལ་པོ་ཡབ་ཡུམ་གྱི་ཐུགས་རྗེའི་ཟླ་ཟེར་སྙིང་ལ་འཛགས་པའི་བྱིན་རླབས་ལས༔ འོད་གསལ་རྫོགས་པ་ཆེན་པོ་མངོན་སུམ་གྱི་གནད་ལ་གོམས་པའི་རྣལ་འབྱོར་པ་ཧེ་རུ་ཀ༔ པདྨ་དབང་ཆེན་གྱིས་བསམ་ཡས་མཆིམས་ཕུའི་འོག་མིན་མཁའ་འགྲོའི་ཚོགས་ཁང་མེ་ཏོག་གི་མཚམས་མལ་དུ་སྦྱར་བའོ།།