རྔ་ཡབ་གླིང་པ་དྲན་གདུང་ཡིད་ཀྱི་མུན་སེལ། ཨེ་མ་ཧོ༔ ཨེ། གནས་དབེན་རི་པདྨ་བསམ་འཛིན་གྱི་ཐང་ན།། ཆོས་ཚུལ་བཞིན་སྒྲུབ་སའི་སྤྱིལ་ཆུང་གི་དབུས་ནས།། ཕ་བླ་མ་དྲན་པའི་སེམས་ཉིད་ལ་བལྟས་ཚེ།། མགོན་ཕྱོགས་དུས་སངས་རྒྱས་རིག་ངོ་ལས་མཇལ་སོང་།། ཝྃ། ཞིང་ཆོས་དབྱིངས་རབ་འབྱམས་ཁྱབ་བརྡལ་གྱི་ཀློང་ན།། ཆོས་རྫོགས་པ་ཆེན་པོའི་དབྱངས་སྙན་གྱི་རང་བྱུང་།། དོན་དམ་པ་དྲན་པའི་གྲགས་ཚད་ལ་མཉན་ཚེ།། སྐྱབས་ཀུན་འདུས་དམ་ཆོས་རིག་ངོ་ལས་ཐོས་སོ།། ཧོ། དབྱིངས་ཀ་དག་སྤྲོས་བྲལ་གཉུགས་སེམས་ཀྱི་ངང་ནས།། འོད་ལྷུན་གྲུབ་འཇའ་ཐིག་རྣམ་དག་གི་གཟུགས་བརྙན།། དཔལ་རིག་པའི་ཡེ་ཤེས་རང་གྲོལ་ཉིད་རྟོགས་ཚེ།། གཞི་བདེ་བཤེགས་ཀུན་བཟང་རིག་པ་ལ་ཤར་གདའ།། སྤྱི་ལོ། ༢༠༢༣ ༩ ༡༣ ཉིན་སྔ་དྲོའི་ཆར་ཤྲཱིཿ ཨེ་མ་ཧོས་ཤར་མར་བྲིས།

རྫོགས་པ་ཆེན་པོའི་གསོལ་འདེབས་ཡར་ལུང་གཙང་པོ། ན་མོ་གུ་རུ་ཨེ་མ་ཧོ།། ༼༡༽ ཀུན་བཟང་བཛྲ་བྷོ་དྷི་མཉྫུ་ཤྲཱིཿ ཤྲཱིཿ སེངྷ་ཛྙཱ་ན་སུ་ཏྲ་དང་།། བི་མ་མི་ཏྲ་པདྨ་སམ་བྷ་ཝ།། མཁའ་འགྲོ་ཡེ་ཤེས་མཚོ་རྒྱལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༢༽ རྗེ་འབངས་ཉེར་ལྔ་སོ་ཟུར་གནུབས་གཉགས་དང་།། ཏིང་འཛིན་བཟང་པོ་གནས་བརྟན་ལྡང་མ་རྒྱལ།། སེངྷེ་དབང་ཕྱུག་བཀྲ་ཤིས་རྡོ་རྗེ་དང་།། མཁས་པ་ཉི་འབུམ་ཞབས་ལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༣༽ གུ་རུ་ཇོ་འབེར་སེངྒེ་རྒྱབ་པ་དང་།། མེ་ལོང་རྡོ་རྗེ་ཀུ་མ་རཱ་ཛ་དང་།། ཀུན་མཁྱེན་རོང་ཀློང་གཏེར་ཆེན་ཡབ་སྲས་བཅས།། རིག་འཛིན་འཇིགས་མེད་གླིང་པར་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༤༽ རྒྱལ་བུ་མྱུ་གུ་འཇིགས་མེད་ཆོས་ཀྱི་དབང་།། ལུང་རྟོགས་རྒྱ་མཚོ་ཀུན་མཁྱེན་མི་ཕམ་པ།། ཡོན་ཏན་རྒྱ་མཚོ་ཐུབ་བསྟན་ཆོས་འཕེལ་དང་།། འཇིགས་མེད་ཕུན་ཚོགས་ཞབས་ལ་གསོལ་བ་འདེབས།། མཆོག་ཐུན་དངོས་གྲུབ་མ་ལུས་བདེ་མྱུར་སྩོལ།། ༼༥༽ ལྟ་བ་ཀ་དག་གདོད་མའི་ངོ་བོ་མཇལ།། སྒོམ་པ་ལྷུན་གྲུབ་ཡེ་ཤེས་རང་བཞིན་གསལ། སྤྱོད་པ་ཟུང་འཇུག་རིག་པའི་ཐུགས་རྗེའི་རྩལ།། འབྲས་བུ་ཀུན་བཟང་རྒྱལ་བའི་དགོངས་པ་བརྙེས།། མཆོག་ཐུན་དངོས་གྲུབ་མ་ལུས་མཐར་ཕྱིན་ཤོག། ————ཨེ་མ་ཧོས། འཇིག་རྟེན་ཆེ་ཆུང་ཡོད་པ་མིན་ན་ཡང་།། གཉོམ་ཆུང་འཚོ་སའི་ལས་དབང་མཐོ་དམན་ཡོད།། ཁྱུང་ཆེན་མཁའ་ལ་ལྡིང་བའི་གཤོག་རྩལ་དང་།། ངང་པས་འདམ་ལ་རོལ་བའི་ཁྱད་པར་ཡོད།། མི་འཇིགས་སྡེར་ཆགས་རྒྱལ་པོའི་ངར་སྐད་དང་།། དངངས་སྐྲག་ཚབ་ཚུབ་བཅས་ཀྱི་ཝ་སྐྱེས་གཉིས།།…

མི་ཚེ་གང་གི་གྲོགས་མཆོག་རྣམ་གསུམ། ཨེ་མ་ཧོ༔ དགའ་སྐྱོ་ངེས་འབྱུང་བསྐུལ་བའི་གྲོགས།། ཚེ་གཅིག་ཐར་ལམ་འདྲེན་པའི་གྲོགས།། གསང་ཆེན་ཟབ་གཏེར་འགྱེད་པསི་གྲོགས།། གྲོགས་གསུམ་སྙིང་གི་གྲོགས་མཆོག་ཡིན།། སྐྱབས་ཅིག་འཇིགས་མེད་རྣམ་རྒྱལ་དཔལ།། མ་ཅིག་རྗེ་བཙུན་ཨོ་རྒྱན་དགྱེས།། ཆོས་ཅིག་རྫོགས་པ་ཆེན་པོ་གསུམ།། ཁོ་བོའི་བླ་སྙིང་སྲོག་གསུམ་ཡིན།། སྒྲུབ་བརྒྱུད་གོང་མའི་རྣམ་ཐར་གཅིག། ཀུན་བཟང་རྫོགས་པ་ཆེན་པོ་གཉིས།། སྐྱབས་གཅིག་ཡིད་བཞིན་ནོར་བུ་གསུམ།། བདག་གི་འདི་ཕྱི་བར་དོའི་སྐྱབས།། སངས་རྒྱས་པདྨ་འབྱུང་གནས་གཅིག། དམ་ཆོས་ཀུན་བཟང་བླ་མ་གཉིས།། དགེ་འདུན་མི་ལའི་རྣམ་ཐར་གསུམ།། བསླུ་མེད་ནང་གྲོགས་རྣམ་གསུམ་ལགས།། ——-ཨེ་མ་ཧོས།

ཨ་མ་དང་བླ་མ་དྲན་པའི་མེ་ལོང་། ན་མོ་གུ་རུ་ཨ་མ་ཏཱ་ར་ཡེ།། དལ་འབྱོར་ནོར་བུ་ཨ་མའི་དྲིན་གྱིས་གསོས།། ཡིད་ཀྱི་འཁྲུལ་རྟོག་བླ་མའི་ཐུགས་རྗེས་སེལ།། ཐོས་བསམ་སྒོམ་པའི་བྱིན་རླབས་རྒྱུད་ལ་འབྱོར།། སྙིང་པོའི་བཙན་ས་ཟིན་པ་ཕ་མའི་དྲིན།། དམ་པས་རྗེས་བཟུང་ཚེ་འདིའི་ཕུག་འདུན་གྲུབ༵།། མཚོ་སྐྱེས་རྒྱལ་བས་དགོངས་པའི་གཏད་རྒྱ་ཐོབ༵།། ཟབ་རྒྱས་གཏེར་ལ་དབང་བའི་རིགས་བཟང་བདག། བསྟན་འགྲོར་ཕན་བདེ་འབྱུང་བར་བླ་མའི་དྲིན།། འཁོར་འདས་དྲིན་ལན་གཞལ་དུ་མེད་པའི་རྗེ། ཆོས་དང་འཇིག་རྟེན་སྨན་པའི་ཨ་བླ་མ།། ཉིན་གཅིག་མ་ཡིན་དྲན་ཤེས་རྟག་ཏུ་བརྟས།། བུ་ངའི་སྙིང་གི་མེ་ལོང་སྒྲིབ་མེད་གསལ།། མཚམས་རེར་དབེན་རིར་འགྲིམས་ནས་གསོལ་བ་འདེབས།། སྐབས་རེར་གྲོང་ནག་ཉུལ་ནས་ཆོས་འཆད་བྱས།། ནམ་རྒྱུན་ཨེ་ཝྃ་དྲན་པ་ཀུན་ཏུ་བཟང་།། དཔལ་དགྱེས་རྡོ་རྗེར་དྲན་པའི་མེ་ལོང་མཆིས།། འཆི་རུང་གང་དགའ་དག་པའི་ཞིང་དུ་འགྲོ།། གསོན་རུང་གུ་ཡངས་རྫོགས་ཆེན་བསྟན་པ་སྤེལ།། རེ་དྭོགས་ཀུན་བྲལ་མངོན་པའི་རྣལ་འབྱོར་པ།། པདྨའི་རྒྱལ་ཚབ་དམ་པ་ང་མིན་སུ།། ལྟ་བ་ལེགས་རྟོགས་སྤྱོད་པ་གཞན་ཕན་བརྩོན།། སྒོམ་པ་འོད་གསལ་ཆོས་བརྒྱད་འཆིང་བས་དབེན།། འབྲས་བུ་ཀུན་བཟང་རྒྱལ་བའི་མཛད་པ་ཅན།། སྙིགས་དུས་འདྲེན་པའི་དེད་དཔོན་ཁོ་བོ་ཙམ།། ཨ་ལ་ཀུ་རེ་ཡིན་ནོ་སྙིང་གྲོགས་རྣམས།། མི་ཚེ་ཆོས་ལ་བཅོལ་བའི་དཔལ་དགྱེས་པ།། རྡོ་རྗེ་འཆང་གི་རྗེས་སུ་སྤྱོད་པ་ལ།། ཐུགས་དང་འགལ་བ་གྱུར་ན་བཟོད་པར་གསོལ།། མདོར་ན་ཨ་མ་བླ་མ་དྲན་པ་འདིས།། འཁོར་འདས་དགེ་བ་ཕུན་སུམ་ཚོགས་པར་བྱུང་།། སེམས་ཀྱི་རྒྱུ་བ་ཡི་གེས་གཟུགས་སུ་བཀོད།། དགེ་བས་འགྲོ་ཀུན་ཀུན་བཟང་ས་ཐོབ་ཤོག། ———ཨེ་མ་ཧོས