ཨེ་ཝྃ་ཧོ།

༼ སློབ་དཔོན་པདྨ་འབྱུང་གནས་ཀྱི་དངོས་སློབ་རྗེ་འབངས་ཉེར་ལྔའི་རྣམ་ཐར་ དང་། སྐུ་པར། གསོལ་འདེབས། ༽ བོད་རྒྱལ་སོ་བརྒྱད་པ་ཁྲི་སྲོང་ལྡེའུ་བཙན་གྱི་སྐུ་དུས་དུས་སློབ་དཔོན་པདྨ་འབྱུང་གནས་བོད་དུ་གདན་དྲངས་ཏེ་རྒྱལ་པོ་དང་གཞན་འབངས་མང་པོར་གསང་སྔགས་ཀྱི་ཆོས་གསུངས་ཏེ་གྲུབ་པ་ཐོབ་པའི་རྗེ་འབངས་ཉེར་ལྔ་སྟེ། ༡. གནུབས་ནམ་མཁའི་སྙིང་པོ་ (རབ་བྱུང་) ༢. སྒྲགས་པ་སངས་རྒྱས་ཡེ་ཤེས། ༣. ངན་ལམ་རྒྱལ་བ་མཆོག་དབྱངས་ (རབ་བྱུང་) ༤. མཁར་ཆེ་ཡེ་ཤེས་མཚོ་རྒྱལ། ༥. སོག་པོ་དཔལ་གྱི་ཡེ་ཤེས། ༦. རླངས་དཔལ་གྱི་སེང་གེ་ (རབ་བྱུང་) ༧. པ་གོར་བེ་རོ་ཙ་ན་ (རབ་བྱུང་) ༨. མངའ་བདག་རྒྱལ་པོ། ༩. རྒྱལ་མོ་གཡུ་སྒྲ་སྙིང་པོ། ༡༠. གཉགས་ཛྙ་ན་ཀུ་མཱ་ར། ༡༡. སྣ་ནམ་རྡོ་རྗེ་བདུད་འཇོམས། ༡༢. སྦ་མི་ཡེ་ཤེས་སྡེ། ༡༤. སོག་པོ་ལྷ་དཔལ། ༡༥. མཁར་ཆེ་དཔལ་གྱི་དབང་ཕྱུག ༡༦. ལྡན་མ་རྩེ་མང་། ༡༧. མཆན་བུ་ཀ་བ་དཔལ་བརྩེགས། ༡༨. ཤུད་པུ་དཔལ་གྱི་སེང་གེ ༡༩. འབྲེ་རྒྱལ་བའི་བློ་གྲོས་ (རབ་བྱུང་) ༢༠. ཁྱེའུ་ཀི་ཆུང་ལོ་ (དྲན་པ་ནམ་མཁའ་) ༢༡. བྲན་དཔལ་གྱི་དབང་ཕྱུག ༢༢. རྨ་རིན་ཆེན་མཆོག（རབ་བྱུང་) ༢༣. ལྷ་ལུང་དཔལ་གྱི་རྡོ་རྗེ་ (རབ་བྱུང་) ༢༤. ལང་འགྲོ་དཀོན་མཆོག་འབྱུང་གནས། ༢༥. ལ་སུམ་རྒྱལ་བ་བྱང་ཆུབ་ (རབ་བྱུང་) བཅས་སོ།། ༄༅། །རྗེ་འབངས་ཉེར་ལྔའི་གསོལ་འདེབས་བྱིན་རླབས་དབང་གི་ཆུ་རྒྱུན་ཞེས་བྱ་བ་བཞུགས་སོ། ། ༄༅། །གུ་རུ་པདྨ་སིདྡྷི་ཧཱུྃ་ཧྲཱིཿ ཁ་བའི་ལྗོངས་འདིར་དབང་དུས་སུ་རྟོགས་པ་བརྙེས་པའི་སྔགས་འཆང་གྲུབ་ཐོབ་རྣམས་ལ་གསོལ་འདེབས་ཀྱི་ཚིགས་སུ་བཅད་པ་བྱིན་རླབས་དབང་གི་ཆུ་རྒྱུན་ཞེས་བྱ་བ་ནི། དཔལ་ཀུན་ཏུ་བཟང་པོ་ལ་ཕྱག་འཚལ་ལོ། །འཛམ་གླིང་དག་པའི་ཞིང་ཁམས་བྲག་དམར། །དཔལ་གྱི་བསམ་ཡས་མཆིམས་ཕུའི་གེ་གོང་། །རྡོ་རྗེ་སློབ་དཔོན་གུ་རུ་པདྨར། །གསོལ་བ་འདེབས་སོ་བྱིན་གྱིས་རློབས་ཤིག །གང་སྐུ་རྫ་རི་ཀླད་ནས་ཉེར་བ། །ཧཱུྃ་ཞེས་གསུང་སྒྲས་གྱེན་དུ་ལྡོག་ཅིང་། །འགྱུར་མེད་ཐུགས་ཀྱི་ཡི་གེར་བྱིན་བརླབས། །ཁྱེད་ལ་གསོལ་འདེབས་བྱིན་གྱིས་རློབས་ཤིག །གནུབས་ཀྱི་རིགས་འཁྲུངས་དགེ་སློང་ཆེན་པོ། །ལྷོ་བྲག་མཁར་ཆུར་ཡང་དག་གྲུབ་བརྙེས། །ཉི་ཟེར་ལ་ཆིབས་ནམ་མཁའི་སྙིང་པོར། །གསོལ་བ་འདེབས་སོ་བྱིན་གྱིས་རློབས་ཤིག །གནུབས་ཡུལ་རོང་བྱོན་སངས་རྒྱས་ཡེ་ཤེས། །སྒྲགས་ཀྱི་ཡང་རྫོང་གཤིན་རྗེ་གཤེད་གྲུབ། །མཐུ་སྟོབས་བྲག་ལ་ཕུར་པ་འདེབས་དེར། །གསོལ་བ་འདེབས་སོ་བྱིན་གྱིས་རློབས་ཤིག །དབུ་རུ་ངན་ལམ་རིགས་འཁྲུངས་བྷིཀྵུ། །དབེན་རྩར་པདྨ་དབང་ཆེན་གྲུབ་བརྙེས། །རྟ་སྐད་གཙུག་བཏོན་རྒྱལ་མཆོག་དབྱངས་དེར། །གསོལ་བ་འདེབས་སོ་བྱིན་གྱིས་རློབས་ཤིག །སྒྲགས་མདར་ནུས་ལྡན་མཁར་ཆེན་རྒྱུད་འཁྲུངས། །མོན་ཁ་ནེ་རིང་ཕྲིན་ལས་ཕུར་གྲུབ། །མཚོ་རྒྱལ་བསད་པའི་མི་རོ་སློང་དེར།…

༼ ༓བརྟན་སྨོན་འོད་ཟེར་བཅུ་བ།།༓ ༽ ཨོཾ་སྭ་སྟི།། ༼ ༡ ༽ ཐེག་དགུའི་ཆོས་སྒོར་ཞུགས་པའི་སྔ་འགྱུར་པ།། ཆོས་བརྒྱད་རོ་བཞིན་དོར་བའི་དཔའ་བོའི་གཟུགས།། འཕགས་པའི་ནོར་བདུན་དགོངས་པའི་མཁས་སྤོབས་ཅན།། ཕྱིན་དྲུག་གནད་ལ་གོམས་པའི་བཙུན་པ་རྒྱལ།། ༼ ༢ ༽ རིགས་ལྔའི་དབང་ཕྱུག་རྡོ་རྗེ་འཆང་གི་ཆས།། བདེན་བཞི་བླང་དོར་བསྟན་པའི་རྒྱ་སྟོན་མཛད།། མཆོག་གསུམ་སྐྱབས་སུ་འཛིན་པའི་རིག་སྔགས་འཆང་།། དོན་གཉིས་མཐའ་རུ་ཕྱིན་པའི་སྤྲུལ་སྐུ་རྒྱལ།། ༼ ༣ ༽ སྐུ་ལ་ནད་མེད་ཚེ་རིང་ལང་འཚོ་རྒྱས།། གསུང་ལ་འགགས་མེད་མདོ་སྔགས་ཆོས་སྒྲ་སྒྲོགས།། ཐུགས་ལ་མཚུངས་མེད་དག་པ་རབ་འབྱམས་ཤར།། ཚེ་གཅིག་འོད་སྐུར་གྲོལ་བའི་སྨོན་ལམ་འདེབས།། ཞེས་པ་འདི་ཡང་རབ་གནས་ལྕགས་བྱིའི་དགུན་ཉི་མཐར་ཐུག་གི་དུས་ཚེས་ལ་རྨི་ལམ་དང་བརྙན་ཐུང་ཞིག་གིས་རྐྱེན་ལས་གང་ཤར་དུ་དཔལ་ཡུལ་མཆོག་སྤྲུལ་རིན་པོ་ཆེ་ལ་ཞབས་བརྟན་དུ་ཨེ་མ་ཧོས་དབྱིན་ཡུལ་ཨེ་ཝཾ་ཀུན་བཟང་དུར་ཁྲོད་ནས་སྨོན་པར་དགེའོོ།། །། ༢༠༢༠/༡༢/༡༩་ལ།

༄༅།།གནོད་སྦྱིན་ཙིའུ་དམར་པོའི་གསོལ་བསྡུས་ སྣང་སྲིད་དབང་དུ་སྡུད་པའི་ལྕགས་ཀྱུ་ ཞེས་བྱ་བ་བཞུགས་སོ། ཧཱུྃ་ཧྲཱི་ཧཱུྃ།། འཇིགས་རུང་བཙན་ཡུལ་ཟངས་ཐང་དམར་པོ་ནས།། འཇིགས་བྱེད་བཙན་རྒོད་རོལ་བ་སྐྱ་བདུན་ཚོགས།། འཇིགས་མེད་རྟུལ་ཞུགས་སྤྱོད་པའི་གར་སྟབས་བཅས།། མ་རུང་བསྟན་དགྲ་སྒྲོལ་བའི་འཕྲིན་ལས་མཛོད།། ཨོྃ་ཧྲཱིཿ པདྨ་ཏཱ་ཏྲི་ཏ་ཧཱུྃ་ཕཊཿ ༡༡/༡༠/༢༠༢༣་ལ་ཨེ་ཝྃ་རིག་པའི་ངོར་ཨེ་མ་ཧོས།།

ལྷོ་ཁའི་གྲྭ་ནང་ཡར་བྱོན་ཨོ་རྒྱན་གླིང་གི་གུ་རུ་གསུང་ འབྱོན་མའི་ལོ་རྒྱུས་བསྡུས་པ། གཟུར་གནས་དྲང་སྲོང་དགྱེས་པའི་ གཏམ། འདིར་རིས་སུ་མ་ཆད་པའི་དད་ལྡན་སེར་སྐྱ་ཀུན་གྱི་ཐུགས་ལ་ངེས་རྒྱུར། སྤྱིར་སངས་རྒྱས་ཀྱི་ཕྲིན་ལས་ནི་མདོ་ལས། རྒྱ་མཚོ་ཆུ་སྲིན་རྣམས་ཀྱི་གནས། ། དུས་རླབས་ཡོལ་བར་འགྱུར་སྲིད་ཀྱི། ། གདུལ་བར་བྱ་བའི་སྲས་རྣམས་ལ། ། སངས་རྒྱས་དུས་ལས་ཡོལ་བ་མེད། ། ཅེས་གསུངས་པ་ལྟར་འཁོར་བར་འཁྱམས་པའི་སེམས་ཅན་ལས་ཉོན་གྱི་དུཿཁས་མནར་བའི་འགྲོ་བ་ཡོངས་ལ་སངས་རྒྱས་ཀྱི་ཕྲིན་ལས་ནམ་ཡང་རྒྱུན་མི་འཆད་ཅིང་། ཁྱད་པར་དེང་གི་དུས་སྙིགས་མ་ལྔ་བརྡོ་བའི་སྐབས་འདིར་སངས་རྒྱས་ཐམས་ཅད་ཀྱི་འཕྲིན་ལས་གཅིག་ཏུ་བསྡུས་པའི་སྤྱི་གཟུགས་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱི་བྱིན་རླབས་དང་ཕྲིན་ལས་ནི་གཞན་ལས་ཀྱང་ཆེས་མྱུར་བ་ཡིན་ཏེ། ཀུན་འཁྱེན་མི་ཕམ་རྒྱ་མཚོའི་ཞལ་སྔ་ནས། སྙིགས་མའི་རྒུད་པ་མུན་ལྟར་འཁྲིགས་ན་ཡང་། ། རྒྱལ་དབང་པདྨའི་འཕྲིན་ལས་ཟླ་ལྟར་གསལ། ། ཞེས་རྡོ་རྗེའི་ཚིག་གིས་བསྔགས་པ་ནང་བཞིན་རང་རེ་ཚོས་བླ་མ་ཨོ་རྒྱན་ཆེན་པོ་ལ་གསོལ་བ་འདེབས་རྒྱུ་དང་། ཁོང་གི་སྐུ་གསུང་ཐུགས་ཀྱི་བྱིན་གྱིས་རླབས་པའི་གནས་དང་སྐུ་རྟེན་བྱིན་ཅན་སོགས་ལ་གནས་མཇལ་ཕྱག་མཆོད་འབུལ་བ་སོགས་ནི་ཤིན་ཏུ་གལ་ཆེ་བ་ཡིན་ལ། སྤྱིར་མདོ་དབུས་ཁམས་གསུམ་གྱི་གནས་སོ་སོ་ན་བླ་མ་ཨོ་རྒྱན་ཆེན་པོའི་སྐུ་འདྲ་དང་བྱིན་རླབས་ཀྱི་རྟེན་མང་དུ་མཆིས་མོད། རེབ་འདིར་ཉེ་བའི་ཆ་ལ་ཆེས་ངོ་མཚར་དང་ལྡན་པའི་གུ་རུ་གསུང་འབྱོན་མར་གྲགས་པའི་རྟེན་འགངས་ཆེན་གང་ཉིད་བཞུགས་སའི་གནས་ངོ་སྤྲོད་པར་བྱེད་པ་ལ། དེ་ཡང་གང་དུ་བཞུགས་པའི་གནས་ནི། ཐང་ཡིག་ལས། དེ་ཉིད་མི་གནས་མྱ་ངན་འདས་འོག་ཏུཿ ཡར་ཀླུངས་མཐིལ་ནས་རྣམ་སྨིན་བསྐྱེད་རྒྱལ་འབྱུངཿ ཕག་གིས་ས་སློག་དབུས་ཁམས་ས་ཧོར་ཟཿ བཙན་རྫོང་བརྒྱ་དང་རྩ་བརྒྱད་ཕྱོགས་སུ་འབྱུངཿ ཤེལ་གྱི་བྲག་ཕུག་སྦས་པའི་གཏེར་ཁ་འདིཿ མི་བཞག་འདོན་པའི་རྟགས་དེར་བསྟན་ནས་བྱུངཿ གཏེར་སྟོན་ཨོ་རྒྱན་གླིང་པ་ཞེས་བྱ་འབྱུངཿ ཞེས་ལུང་བསྟན་པ་ནང་བཞིན་ཡར་རྗེ་ཨོ་རྒྱན་གླིང་པ་ཞེས་བྱ་བ་དེ་ནི་རབ་བྱུང་ལྔ་པའི་ཆུ་ཕག་གི་ལོ་སྟེ་༡༣༢༣་ན་གཡོ་རུ་གྲྭ་ནང་གི་ཡར་རྗེ་ཞེས་པར་བོད་རྒྱལ་པོའི་གདུང་རྒྱུད་དུ་ཆད་པ་རྒྱལ་བ་ཡར་རྗེ་ཞེས་སུ་ངོ་མཚར་གྱི་མཚན་དཔེ་དང་བཅས་པར་སྐུ་འཁྲུངས། མཁས་དང་གྲུབ་པའི་ཡོན་ཏན་ལ་མངའ་དབང་འབྱོར་ཞིང་དགུང་ལོ་ཉེར་གསུམ་པར་བསམ་ཡས་མཆོད་རྟེན་དམར་པོ་ནས་གཏེར་གྱི་ཁ་བྱང་བཞེས་ཏེ་ཟབ་གཏེར་མི་འདྲ་བ་ཉེར་ལྔ་བླངས་པར་མཛད་དོ། །རྗེ་ཁོང་ཉིད་བཞུགས་པའི་དགོན་པ་དེ་ནི་ཁོང་གི་མེས་པོ་ཤེས་རབ་བཟང་པོས་བཞེངས་པའི་གཡོ་རུ་གྲྭ་ནང་དགོན་ཡིན་ལ། དགོན་དེའི་ལྷ་ཁང་གི་བཟོ་དབྱིབས་ནི་ཟངས་མདོག་དཔལ་རིའི་བཀོད་པ་དང་འདྲ་བར་རིན་ཆེན་ཟུར་བརྒྱད་ཀྱི་དབྱིབས་ཅན་སྟེང་འོག་བར་གྱི་རྟེན་གྱི་གཙོ་བོ་ཆོས་ལོངས་སྤྲུལ་གསུམ་གྱི་སྐུ་རྟེན་ཚད་ལྡན་བཞུགས་ཤིང་། ལྷ་ཁང་ནང་གི་ལྷོའི་གྱང་ངོས་སུ་ཡར་རྗེ་ཨོ་རྒྱན་གླིང་པས་ཕྱག་བཟོ་མཛད་པའི་གུ་རུ་པདྨ་སཾ་བྷ་ཝའི་ཞལ་ཐང་བྱིན་ཅན་བཞུགས་ལ། བྱང་ངོས་སུ་ཡང་རྗེ་དེ་ཉིད་ཀྱི་ཤིང་ཁྲག་ལས་བྲིས་པའི་རྟ་མགྲིན་དྲེགས་པ་ཚར་གཅོད་ཀྱི་སྐུ་ཕྱག་བཟོ་མཛད་པ་གཉིས་ཆར་ད་ལྟའང་མཇལ་རྒྱུ་ཡོད་དོ། ། ཁྱད་པར་དུ་ད་སྐབས་ཁོང་སྐུ་གཤེགས་རྗེས་སུ་ཁོང་གི་སྐུ་གདུང་གི་གཟུངས་གཞུག་ལས་ཐོན་པའི་བཀའ་གདམས་མཆོད་རྟེན་དང་། ལོ་ཆེན་བཻ་རོ་ཙ་ནའི་གཏེར་སྒྲོམ་འཁྲུལ་མེད་སོགས་ཀྱི་གཟུངས་གཞུག་ཅན་གྱི་གུ་རུའི་སྐུ་གསུང་འབྱོན་མ་འདི་ཉིད་ནི་རྗེ་འཇིགས་མེད་མཁས་གྲུབ་རྒྱ་མཚོའམ་ཡོངས་གྲགས་སུ་རེབ་གོང་བླ་མ་ཨ་ལག་འཇམ་དབྱངས་ཚང་ཞེས་མཁས་གྲུབ་གཉིས་ལྡན་ཞིག་ཡོད་པ་གང་ཉིད་འཁོར་དཔོན་སློབ་དུ་མ་དང་མཉམ་དུ་གནས་དེར་མཇལ་བར་བྱོན་ཅིང་། གུ་རུའི་སྐུའི་མདུན་ནས་གསོལ་འདེབས་དང་སྤྱན་འདྲེན་གྱི་ཚིག་གིས་བསྐུལ་ཚེ་ཨོ་རྒྱན་ཆེན་པོའི་སྐུས་ཐུགས་དགྱེས་པའི་ཉམས་ཀྱིས་ཞལ་འཛུམ་ཞིང་བཞད་པ་དང་སྤྱན་གཡོ་བ་སོགས་དེར་ཡོད་ཀུན་ལ་མཐུན་སྣང་དུ་གྲུབ་ཚུལ་སོགས་ཨ་ལག་རིན་པོ་ཆེ་ཁོང་གི་གསུང་སྒྲ་འཁྲུལ་མེད་ད་ལྟ་མཉན་དུ་ཡོད་པ་འདི་ག་ཡིན་ལ། དེས་ན་ད་ལྟ་མི་ལོ་སྟོང་ཕྲག་ལ་ཉེ་བའི་སྔོན་ནས་བཞེངས་པའི་ཡར་རྗེ་དགོན་དང་ཡར་རྗེ་ཨོ་རྒྱན་གླིང་པ་སོགས་དམ་པ་དུ་མས་ཞབས་ཀྱིས་བཅགས་ཤིང་བྱིན་གྱིས་རླབས་པའི་གནས་དེར་གུ་རུ་གསུང་འབྱོན་མས་མཚོན་པའི་དད་འདུན་གྱི་ཡུལ་ཁྱད་པར་ཅན་དེ་འདྲ་རང་རེའི་བསོད་ནམས་ཀྱི་ཞིང་སར་བཞུགས་པ་འདི་ནི་ཆེས་ངོ་མཚར་བའི་གནས་སུ་གྱུར་འདུག་པས་ཀུན་གྱིས་གནས་མཇལ་དང་ཕྱག་མཆོད་བྱེད་པར་གསོལ་བ་འདེབས་པ་ལགས་སོ། ། ལྷ་ས་ནས་ལྷོ་ཁའི་གྲྭ་ནང་ཡར་བྱོན་ཨོ་རྒྱན་གླིང་དུ་ མཆོད་མཇལ་ལ་འགྲོ་བའི་ ལམ་ཡིག ལྷོ་ཁའི་གྲྭ་ནང་ཡར་བྱོན་༼ཡ་ཆེན ༽ཨྱོན་གླིང་དུ་མཆོད་མཇལ་ལ་འགྲོ་ཚེ་ཐོག་མར་ལྷ་ས་ནས་གྲྭ་ནང་རྫོང་དང་དེ་ནས། གཞུང་ལམ་ཁ་གཏད་ཀྱི༼ལྷོ་ཕྱོགས༽རྒྱ་ཡིག་གི་གྲྭ་ནང་རྫོང་ཞེས་པའི་ཁྲོམ་རྭའི་གཞུང་ལམ་དེད་ནས་དྲང་མོར་ལྷོ་ཕྱོགས་སུ་སྤྱི་ལེ་༦ ཙམ་ལ་སོང་ན་དཀྱིལ་རུ་ཤང་ལ་སླེབ་ཐུབ། དེ་ནས་དྲང་མོར་གཞུང་ལམ་དེད་ནས་ཡར་ལུང་པའི་ཕུགས་ལ་སྤྱི་ལེ་༤ ཙམ་གྱི་ལམ་ལ་སོང་ན། ལུང་པ་ཞིག་གི་མདོར་སླེབ་ཅིང་། ལག་པ་གཡོན་ཕྱོགས་ན་ལམ་བྱང་ཅིག་བཙུགས་ཡོད། དེའི་སྟེང་དུ་ཡར་བྱོན་ལྷ་ཁང་ཞེས་ཡར་བྱོན་ཨྱོན་གླིང་ལ་འགྲོ་སའི་ཕྱོགས་སྟོན་གྱི་དགོན་པའི་མིང་བྲིས་ཡོད། དེ་ནས་ལམ་ཉིས་ཚུགས་དེ་ལས་ལག་པ་གཡས་ཕྱོགས་ཀྱི་ཟེགས་ལམ་དེའི་ནང་ལ་འགྲོ་དགོས། དེ་ནས་སྤྱི་ལེ་༣ ཙམ་ལ་སོང་ན་བདེ་སྐྱིད་གླིང་གྲོང་ཚོ་ལ་བསླེབ་འོང་། དེ་རུ་ཡང་ལམ་ཉིས་ཚུགས་ཤིག་ཡོད། དེ་ནས་ལག་པ་གཡོན་ཕྱོགས་ཀྱི་གྲོང་ཚོ་ཨུ་ཡོན་ལྷན་ཁང་གི་འགྲམ་གྱི་ལམ་དེའི་ནང་ལ་འགྲོ་དགོས། དེ་ནས་སྨི ༥༠ ཙམ་སོང་ན། ཡར་བྱོན་ཨྱོན་གླིང་ལ་སླེབས་ཐུབ་པ་ཡིན། ༈ དེ་འདྲ་དེ་ལས་གང་ཞིག་ཐོབ་པ་ཡི།།དགེ་བ་དེ་ཡང་མར་གྱུར་འགྲོ་བ་ཀུན།།བཤེས་གཉེན་དམ་པས་ཟིན་ནས་དམ་པའི་གསུང་།།སྒྲུབ་པའི་འབྲས་ལེགས་མཐོང་བའི་རྒྱུ་རུ་བསྔོ།། བདག་ཀྱང་དེང་ནས་ཚེ་རབས་ཐམས་ཅད་དུ།།བླ་མ་མཆོག་དང་དེ་ཡི་རྗེས་འཇུག་གི།བྲན་དུ་གྱུར་ནས་ཅི་གསུང་བཀའ་སྒྲུབ་ཅིང་།།མཉེས་པས་རྗེས་སུ་འཛིན་པ་ཡོད་གྱུར་ཅིག།འཁོར་བའི་མཐའ་དང་ལུས་ཅན་མཐའ་དེ་སྲིད།།ལུས་དང་ལོངས་སྤྱོད་དགེ་བ་ཀུན་སྤུངས་ཏེ།།ཉམ་ཐག་མ་རྒན་རྣམས་ཀྱི་གཡོག་བགྱིད་ཅིང་།དེ་ཀུན་རྫོགས་སངས་རྒྱས་པའི་ཆོས་འཛིན་ཤོག། ༈ བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་བྱེད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་པའི་མཚོ་ལས་འགྲོ་ཀུན་མྱུར་སྒྲོལ་ཤོག །སངས་རྒྱས་སྐུ་གསུམ་བརྙེས་པའི་བྱིན་བརླབས་དང་། །ཆོས་ཉིད་མི་འགྱུར་བདེན་པའི་བྱིན་བརླབས་དང་། །དགེ་འདུན་མི་ཕྱེད་འདུས་པའི་བྱིན་བརླབས་ཀྱིས། །ཇི་ལྟར་བསྔོ་བ་སྨོན་ལམ་འགྲུབ་པར་ཤོག ། །དགེ་བ་འདི་ཡིས་སྐྱེ་བོ་ཀུན། །བསོད་ནམས་ཡེ་ཤེས་ཚོགས་བསགས་ཏེ། །བསོད་ནམས་ཡེ་ཤེས་ལས་བྱུང་བའི། །དམ་པ་གཉིས་ནི་མྱུར་ཐོབ་ཤོག ། །། །།

གངས་ཅན་བོད་པའི་བླ་བརྒྱུད་གསོལ་འདེབས་ཙིཏྟ་མ་ཎིའི་ཕྲེང་བ་ ཞེས་བྱ་བ་བཞུགས་སོ།། ན་མོ་མ་ཧཱ་གུ་རུ་བུདྡྷ་ཛྙཱ་ན་པདྨ་ཀཱ་ར་ཡེ།། ༼༡༽ ཀ་དག་ཆོས་དབྱིངས་མགོན་པོ་ཀུན་ཏུ་བཟང་།། ལྷུན་གྲུབ་འོད་གསལ་ཁྱབ་བདག་རྡོ་རྗེའཆང་།། ཀུན་འདུས་རྒྱལ་ཀུན་སྤྱི་གཟུགས་པདྨ་འབྱུང་།། བརྒྱུད་གསུམ་བླ་མ་རྣམས་ལ་གསོལ་བ་འདེབས།། ༼༢༽ ཀུན་བཟང་རྡོར་སེམས་དགའ་རབ་ཤྲཱི་སེང༌།། པདྨ་ཀ་ར་རྗེ་འབངས་ཉེར་ལྔ་དང༌།། སོ་ཟུར་གནུབས་གཉགས་གཏེར་སྟོན་བརྒྱ་རྩ་སོགས།། བཀའ་གཏེར་བླ་མ་རྣམས་ལ་གསོལ་བ་འདེབས།། ༼༣༽ དཔལ་ལྡན་མར་མེ་མཛད་དང་ཁུ་རྔོག་འབྲོམ།། སྐུ་མཆེད་རྣམ་གསུམ་ཙོང་ཁ་ཡབ་སྲས་གསུམ།། རྒྱལ་པཎ་རྣམ་གཉིས་དགེ་ལྡན་ཁྲི་རབས་བཅས།། བཀའ་གདམས་དགེ་བཤེས་རྣམས་ལ་གསོལ་བ་འདེབས།། ༼༤༽ དཔལ་ཆེན་བཀའ་བབས་འཁོན་སྲས་གོང་མ་ལྔ།། ས་ངོར་ཚར་གསུམ་རྫོང་ཆེན་ཡབ་སྲས་ནས།། མཁས་གྲུབ་རིམ་བྱོན་པདྨའི་བཀའ་འབངས་སོགས།། ལམ་འབྲས་བརྒྱུད་པ་ཀུན་ལ་གསོལ་བ་འདེབས།། ༼༥༽ རྡོ་རྗེ་འཆང་ཆེན་ཏཻ་ལོ་ནཱ་རོ་པ།། མར་པ་མི་ལ་རྗེ་བཙུན་སྒམ་པོ་པ།། ཆེ་བཞི་ཆུང་བརྒྱད་པདྨའི་རྣམ་སྤྲུལ་པ།། ཕྱག་ཆེན་བཀའ་བརྒྱུད་བླ་མ་གསོལ་བ་འདེབས།། ༼༦༽ མཚོ་རྒྱལ་རྣམ་སྤྲུལ་ཡེ་ཤེས་མཁའ་འགྲོ་མ།། ཁྱུང་པོ་རྣལ་འབྱོར་རིན་ཆེན་བདུན་བརྒྱུད་དང་།། ཕྲེང་བ་རྣམ་པ་གཉིསཐང་རྒྱལ་ལ་ཉེ་བརྒྱུད་སོགས།། ཤངས་པ་བཀའ་བརྒྱུད་བླ་མ་གསོལ་བ་འདེབས།། ༼༧༽ མཚོ་རྒྱལ་སྨོན་བརྒྱུད་དམ་པ་སངས་རྒྱས་ནས།། མ་གཅིག་ལབ་སྒྲོན་རྨ་སོ་ཀཾ་གསུམ་དང་།། སྒོ་བའི་རྣལ་འབྱོར་བཀའ་བབས་དུས་གསུམ་སོགས།། ཞི་གཅོད་བླ་བརྒྱུད་རྣམས་ལ་གསོལ་བ་འདེབས།། ༼༨༽ པདྨ་དཀར་པོ་པདྨ་འབྱུང་གནས་ནས།། ཆོས་རྒྱལ་རིགས་ལྡན་དུས་ཞབས་ཆེ་ཆུང་དང༌།། རྭ་འབྲོ་ཙ་མི་རང་དོལ་བུ་སྟོན་སོགས།། སྦྱོར་དྲུག་དུས་བརྒྱུད་རྣམས་ལ་གསོལ་བ་འདེབས།། ༼༩༽ ཨོ་རྒྱན་ཡབ་ཡུམ་རྡོ་རྗེ་བཙུན་མོ་ནས།། མཁས་གྲུབ་ཨོ་རྒྱན་རང་བྱུང་རྡོ་རྗེ་དང་།། མཁར་ཆུ་སྤུ་ཏྲ་ནེ་རིང་རྣལ་འབྱོར་སོགས།། བསྙེན་སྒྲུབ་བརྒྱུད་པ་ཀུན་ལ་གསོལ་བ་འདེབས།། ༼༡༠༽ སྤྱན་རས་གཟིགས་དབང་མི་ཏྲ་ཛོ་ཀིའི་ཞབས།། ཤ་རི་པུ་ཏྲ་གྲགས་པ་རིན་ཆེན་དང༌།། བྱམས་པ་དགའ་སོགས་སྙན་བརྒྱུད་ཁྲིད་དྲུག་སོགས། ཞི་གནས་བླ་བརྒྱུད་ཀུན་ལ་གསོལ་བ་འདེབས།། ༼༡༡༽ ཀུན་མཁྱེན་རོང་ཀློང་རྣམ་གཉིས་ཡབ་སྲས་ནས།། ཚེམ་བུ་བོ་དོང་པཎ་ཆེན་རོང་སྟོན་ཆེ།། སྒྲོལ་བའི་མགོན་པོ་མཁྱེན་ཀོང་མཚོག་གསུམ་སོགས།། ལྷག་མཐོང་བརྒྱུད་འཛིན་རྣམས་ལ་གསོལ་བ་འདེབས།། ༼༡༢༽ སྟོབས་བཅུ་ཡོན་ཏན་ཀུན་རྫོགས་ཀུན་མཁྱེན་པ།། མི་ཕམ་རྣམ་རྒྱལ་ཡོན་ཏན་རྒྱ་མཚོ་དང་།། ཐུབ་བསྟན་ཆོས་འཕེལ་ཡིད་བཞིན་ནོར་བུ་སོགས།། རྩ་བརྒྱུད་བླ་མ་རྣམས་ལ་གསོལ་བ་འདེབས།། ༼༡༣༽ རྩ་གསུམ་རྒྱལ་བ་ཀུན་འདུས་བླ་མ་ནས།། རབ་འབྱམས་ཞི་ཁྲོའི་ཁྱབ་བདག་ཡི་དམ་རྗེ།། མཁའ་འགྲོ་ཆོས་སྐྱོང་དུས་གསུམ་སངས་རྒྱས་སོགས།། དངོས་རྒྱུད་བླ་མ་རྣམས་ལ་གསོལ་བ་འདེབས།། ༼༡༤༽ བློ་ལྡོག་རྣམ་བཞི་འབྱོངས་བར་བྱིན་གྱིས་རློབས།། ངེས་འབྱུང་རྣལ་མ་སྐྱེ་བར་བྱིན་གྱིས་རློབས།། བྱང་ཆུབ་སེམས་མཆོག་འཁྲུངས་བར་བྱིན་གྱིས་རློབས།། སྣང་སྲིད་དག་མཉམ་རྟོགས་པར་བྱིན་གྱིས་རློབས།། ༼༡༥༽ བསྐྱེད་རིམ་དག་པའི་སྣང་བ་མཐར་ཕྱིན་ནས།། རྫོགས་རིམ་རྩ་རླུང་ཐིག་ལེར་ལས་སུ་རུང་།། བསྐྱེད་རྫོགས་དབྱེར་མེད་རྫོགས་པ་ཆེན་པོའི་ངང་།། སྐྱེ་བ་ཚེ་རབས་ཀུན་ཏུ་འབྲལ་མེད་ཤོག། ༼༡༦༽ བསྟན་པ་སྨན་པའི་བཤད་སྒྲུབ་ཕྲིན་ལས་རྒྱས། འགྲོ་ལ་ཕན་བདེའི་མཛད་པ་མཐར་ཕྱིན་ནས།། བསྟན་འགྲོའི་དོན་ཀུན་ཡིད་བཞིན་ལྷུན་གྱིས་གྲུབ།། ཀུན་བཟང་འགྲོ་དོན་མ་ལུས་མཐར་ཕྱིན་ཤོག། ཅེས་པ་འདི་ཡང་རབ་གནས་ཆུ་ཡོས་སྨིན་དྲུག་ཟླ་བའི་དབང་ཕྱོགས་རྒྱལ་བ་དང་པོར་དད་གུས་དག་སྣང་གིས་ཕྱུག་པའི་མཁའ་འགྲོ་མ་རྣམས་དང་ཨེ་ཝྃ་པའི་ཆོས་བདག་རིན་པོ་ཆེ་སོགས་ཀྱིས་བོད་ཀྱི་བླ་བརྒྱུད་གསོལ་འདེབས་ཤིག་དགོས་པར་ཡང་ཡང་སྐུལ་ངོར་གང་ཤར་འབྲི་བ་ལ་ཆགས་ཐོགས་བྲལ་བའི་སྙན་རྩོམ་པ་རིག་འཛིན་ཨེ་མ་ཧོས་དབྱིན་ཡུལ་ཨེ་ཝྃ་བདེ་མཆོག་དབང་གི་ཕོ་བྲང་ནས་མཆོག་གསུམ་བརྒྱུད་པ་ཡོངས་ལ་གསོལ་བ་ཕུར་ཚུགས་སུ་བཏབས་པ་དེ་དེ་བཞིན་དུ་འགྲུབ་པར་གྱུར་ཅིག་གུ།། ཤྲཱིཿ སརྦ་ལོ་ཀ་དྷརྨཱ་པ་ལ་བི་ཛ་ཡནྟུ།། །། སྤྱི་ལོ་༣༡/༡༠/༢༠༢༣་ལ།། 31/10/2023

རྒྱལ་སྲས་ལག་ལེན་གསུང་འབྱོན་མ།། ན་མོ་རཏྣ་ཏྲཱ་ཡཱ་ཡ། དེ་ལ་འདིར་ཁྱུང་སྤྲུལ་རིན་པོ་ཆེས་བརྩམས་པའི་ཁྱད་ཆོས་བདུན་ལྡན་གྱི་རྒྱལ་སྲས་ལག་ལེན་གསུང་འབྱོན་མ་འདི་ནི་རྣམ་པ་ཚོས་གཟིགས་དང་ཁྱད་ཆོས་བདུན་ལྡན་ཡོད་དེ། ༼༡༽ ཡིག་རིགས་ཙམ་མི་ཤེས་འཁན་ལ་ཡང་རི་མོས་ལམ་ནས་གསལ་བཤད་ཐང་ཁ་ཞེ་གཉིས་ལས་གྲུབ་པས་སྐྱབས་སེམས་ཀྱི་རྨིང་གཞི་བརྟན་པོ་འགྲོ་བའི་དགོས་པ་ཁྱད་པར་ཅན་ཡོད་པ་དང་། ༼ ༢༽ བོད་ཡིག་ཤེས་ན་སྐུ་པར་རྣམས་ལ་རེ་རེ་ལ་སྟོན་པའི་སྐྱེས་རབས་བཞིན་དུ་ཁ་གསལ་ལ་གོ་བདེ་བར་གསལ་བཤད་གནང་ཡོད་པས་ཐོས་བསམ་སྒོམ་གསུམ་པོ་སྟབས་ཅིག་ཏུ་འགྲོ་བའི་དགོས་པའི་ཆེ་བ་དང་། ༼༣༽ རྒྱ་ཡིག་དང་དབྱིན་ཡིག་མཁྱེན་ན་ཚད་ལྡན་ཡི་གེ་ལ་ལེགས་བསྒྱུར་གནང་ཡོད་པས་ཤེས་རབ་ཅན་གྱིས་གེགས་མེད་བདེ་མྱུར་ཏུ་ཤེས་ཐུབ་པའི་དགོས་པ་དང་། ༼༤༽ ཐང་ཁ་ཚད་ལྡན་གྱི་ལམ་ནས་སྤེལ་བ་སྒྱུ་རྩལ་གསོན་ཤུགས་དངོས་སུ་དོད་པོར་སྣང་བས་དད་གུས་གསོན་ཤུགས་རྒྱས་ཐུབ་པའི་ཐབས་ཤེས་ཀྱི་དགོས་པ་ཡོད་པ་དང་། ༼ ༥༽ ཀློག་བདེ་ཡང་རྒྱས་བསྡུས་འབྲིང་གི་ཚད་ཤིང་གནད་ལ་ཁེལ་བ་ཡོད་པས་བཤད་གྲྭ་བ་ཚོ་ལ་དགོས་མཁོ་ཤིན་ཏུ་ཆེ་བ་དང་། ༼༦༽ སླ་ཆོས་ལྟ་བུ་མ་སོང་བར་མི་ལོ་དུ་མར་འབད་འབངས་ཀྱིས་འབྲས་བུ་གཡུར་དུ་ཟ་བ་འབུར་དུ་ཐོན་ཡོད་པ་དང་འཐེབ་རྩ་ཡང་བཤད་སྒྲུབ་ཕྲིན་གྱི་རྒྱུ་རུ་འགྱུར་བ་ཡིན་པ་དང་། ༼༧༽ དེབ་གཟུགས་ཀྱང་ཆེ་ཆུང་སྟབས་བདེ་ལ་གང་དུ་བསྣམ་རུང་ཉམས་ལེན་འཁན་རྣམས་ལ་སྐུ་གསུང་ཐུགས་ཀྱི་རྟེན་འབྲལ་མེད་དུ་གནང་ན་ཡང་ཁྱེར་བདེ་ལ་ཤོག་བུ་བཟང་ཆ་ལས་གྲུབ་པར་ཤར་ཏག་རེད་འདུག་པས་སྒྲུབ་གྲྭ་བ་རྣམས་ལ་དད་རྟེན་བླ་ན་མེད་པ་ཡོད་པའོ།། དེས་ན་ཆོས་གྲོགས་རྣམ་པས་དོན་གཉེར་གནང་ན་སོ་སོར་སྐལ་བ་བཟང་པོ་ཡིན་པར་མཁྱེན་འཚལ། འོག་གི་གཟུགས་རིས་ཨེ་ཝྃ་རིག་པ་ལ་འབྲེལ་ན་ཅི་དགོས་འདོད་དོན་བཞིན་བླུ་ཐུབ་པས་དེ་ལུགས་ཀྱིས། སོ་སོས་ཉོས་ཤིགས། གཞན་ལ་སྤེལ་ཤིགས། ཉམས་སུ་ལོངས་ཤིགས། 30/10/2023 ———ཨེ་མ་ཧོས།།