ཨེ་ཝྃ་ཧོ།

༄༅།།སྔ་འགྱུར་རིག་འཛིན་ཆོས་འཁོར་གླིང་ལ་ཆེད་དུ་འབུལ་བའི་གཏམ་ རྟེན་འབྲེལ་ལས་ཀྱི་ལམ་བཟང་ཞེས་བྱ་བ་བཞུགས་སོ།། ན་མོ་མ་ཧཱ་གུ་རུ་རཏྣ་ཏྲ་ཡཱ་ཡ།། ༼༡༽ ཆོས་དབྱིངས་ཡེ་ཤེས་རབ་འབྱམས་རྒྱལ་བའི་སྐུ།། ཆོས་ཅན་རྟེན་འབྲེལ་བཟང་པོའི་དམ་ཆོས་གསུང་།། ཆོས་ཀུན་དེ་ཉིད་རིག་པ་བླ་མའི་ཐུགས། ཆོས་འཁོར་གླིང་གི་ཕྲིན་ལས་ཀུན་ཁྱབ་རྒྱལ།། ༼༢༽ བྱམས་བརྩེ་དག་པ་ནམ་མཁའི་ཁམས་དང་མཉམས།། དགའ་བདེ་རྫོགས་པ་རྒྱར་མཚོའི་གཏེར་ཏུ་གཏམས། བཏང་སྙོམས་སྨིན་གྲོལ་ཀུན་ལ་ཁྱབ་པས་མཛེས།། སྙིང་གི་གྲོགས་པོའི་མཛད་པར་རྗེས་ཡི་རངས།། ༼༣༽ འཁོར་འདས་སྤྱན་རས་ཡངས་པའི་ལོ་ཙཱ་ཆེ།། སྦྱིན་པའི་ཕྱག་རྒྱ་ཆེན་པོའི་རྟེན་བཟང་འབྲེལ།། སྙན་པའི་ངག་པ་དབང་བའི་སྒྲོལ་མའི་དབྱངས།། བསྟན་འགྲོར་ཕན་བདེ་སྤེལ་བའི་ཆོས་ཚོགས་རྒྱལ།། ༼༤༽ གནས་སའི་འཁོར་ཡུག་ས་ཆུ་བཟང་དགུ་འཛོམས།། ཕྱོགས་བཅུའི་མི་སྣ་གུ་ཡངས་ཆོས་དཔལ་དད།། སྒྱུ་འཕྲུལ་དཀྱིལ་འཁོར་གླིང་དཀར་དཔའ་བོའི་གར།། སྔ་འགྱུར་ཆོས་འཁོར་གླིང་མཆོག་རྟག་ཏུ་རྒྱལ།། ༼༥༽ རྩ་བརྒྱུད་བླ་མའི་དགོངས་བརྡ་སྙན་ནས་བརྒྱུད།། ལས་སྨོན་རྟེན་འབྲེལ་བཟང་མོས་དམ་ཚིག་ཅན།། སྐལ་ལྡན་སློབ་ཚོགས་རྒྱས་པའི་གདན་ས་ཉིད། མི་ནུབ་སྲིད་མཐའི་བར་དུ་བརྟན་གྱུར་ཅིག།། ཅེས་པ་འདི་ཡང་རབ་གནས་ཤིང་སྦྲུལ་ས་ག་ཟླ་བའི་དབང་ཕྱོགས་རྒྱལ་བ་དང་པོར་༸སྐྱབས་རྗེ་ནམ་མཁའ་རྒྱ་མཚོ་རིན་པོ་ཆེས་བཀོད་བསྒྲིགས་དང་ལོ་ཙཱ་བ་ཆེན་པོ་དཔལ་ལྡན་རྡོ་རྗེ་ཡབ་ཡུམ། བླ་ཚབ་ནོར་བུ་རྡོ་རྗེ་དང་རྟེན་འབྲེལ་བཟང་མོ་སོགས་དད་གུས་་སྣང་ཅན་ལ་ཉིན་མ་བདུན་གྱི་རིང་ལ་ཆོས་ཁྲིད་ཟབ་རྒྱས་རྟོགས་པའི་མཎྜལ་འབུལ་ཐུབ་པ་དང་ངེད་ཅག་བླ་སློབ་འབྲལ་མི་ཕོད་པའི་ངང་དུ་མཉམ་པོར་གནམ་ཐང་དུ་ཆས་ཁར་གང་ཤར་བཀའ་དྲིན་ཆེ་འབུལ་དུ་ཤྲཱིཿ ཨེ་མ་ཧོས་དགའ་གཏམ་གླུ་རུ་བླངས་པར་དགེའོ།། ཤྲཱིཿ སརྦ་བི་ཛ་ཡནྟུ།། །།

ཨོཾ་ཧེ་ཧེ་ཏིཥྛ་ཏིཥྛ་བྷནྡྷ་བྷནྡྷ་དྷཱ་ར་ཡ་དྷཱ་ར་ཡ་ནི་རུནྡྷ་ནི་རུནྡྷ་ཨ་མུ་ཀ་ཨུརྞ་མ་ཎི་ཡེ་སྭཱ་ཧཱ། ༄༅།།རྒྱལ་གླུ་པདྨའི་རྒྱལ་མཚན་ཡིད་བཞིན་ནོར་བུའི་ཏོག་གི་འོད་སྣང་ཞེས་བྱ་བ། ཨེ་མ་ཧོ༔ ཨ་ལ་ལ་ཧོ།། ༼༡༽ ཀ་དག་ཡེ་ཀློང་མཉམ་པར་བརྡལ་བའི་དབྱིངས།། ལྷུན་གྲུབ་འོད་གསལ་སྙིང་པོ་འབྱམས་ཀླས་པས།། སངས་རྒྱས་ཡེ་ཤེས་དྲག་སྔགས་གླིང་པའི་གར།། ཨེ་ཝྃ་ཆོས་རྒྱལ་དམ་པ་ཀུན་ནས་རྒྱལ།། ༼༢༽ འཁོར་འདས་ཆོས་ཀུན་རང་གྲོལ་རྡོ་རྗེའི་སྐུ།། ཟབ་རྒྱས་དབྱངས་ཀུན་ཐོས་གྲོལ་དམ་པའི་གསུང་།། སྤངས་རྟོགས་ཡོན་ཏན་སྨིན་གྲོལ་མཁྱེན་བརྩེའི་ཐུགས།། དོན་གཉིས་ལྷུན་གྲུབ་དཔལ་དགྱེས་རྡོ་རྗེ་རྒྱལ།། ༼༣༽ སྣང་སྲིད་རྣམ་དག་ཡེ་ཤེས་དཀྱིལ་འཁོར་ལས།། དོན་དམ་བྱང་ཆུབ་སེམས་ལ་མངའ་དབང་བསྒྱུར།། ནམ་མཁའ་མཛོད་ཀྱི་ཏིང་འཛིན་འཕྲུལ་འཁོར་གྱི།། འདོད་རྒུ་ཀུན་འབྱུང་ཡིད་བཞིན་ནོར་བུ་རྒྱལ།། ༼༤༽ བདེ་ཆེན་རབ་འབར་དབང་གི་ཕོ་བྲང་ནས།། མ་ལུས་འགྲོ་ཀུན་སྡུད་པའི་མཐུ་སྟོབས་ཅན།། ཐབས་གྲོལ་ཨུཏྤལ་དམར་པོའི་ཕྱག་རྒྱའི་གར།། བཅོམ་ལྡན་སྣང་མཐའི་པདྨ་རྒྱལ་པོ་རྒྱལ།། ༼༥༽ ཞི་བདེའི་ཏིང་འཛིན་ཤེས་རབ་སྒྱུ་འཕྲུལ་ལས།། མ་རུང་བདུད་བཞིའི་འཇིགས་པ་ཀུན་བསྒྲལ་ཏེ།། ཕྱོགས་ལས་རྣམ་པར་རྒྱལ་བའི་རྒྱལ་མཚན་བསྒྲིངས།། ཕྲིན་ལས་ཀུན་ཁྱབ་ཡེ་ཤེས་རལ་གྲི་རྒྱལ།། ༼༦༽ གསང་ཆེན་ཡང་དག་གངས་ཆེན་མཚོ་ཡི་གཏེར།། ཟག་མེད་ཡེ་ཤེས་མཛོད་ལ་དབང་འབྱོར་བའི།། གསང་བ་སྙིང་པོའི་ཡང་གསང་བླ་ན་མེད།། མདོ་རྒྱུད་མན་ངག་བརྩིབས་སྟོང་འཁོར་ལོར་རྒྱལ།། ༼༧༽ སྔགས་སྐྱེས་མཁའ་འགྲོའི་རྟེན་འབྲེལ་མངོན་དུ་གསལ།། ཞིང་སྐྱེས་མཁའ་འགྲོའི་ཚོགས་ལ་མངའ་དབང་བསྒྱུར།། ལྷན་སྐྱེས་མཁའ་འགྲོའི་དེ་ཉིད་མངོན་སུམ་རྟོགས།། མཁའ་འགྲོའི་དབང་ཕྱུག་ཧེ་རུ་ཀ་དཔལ་རྒྱལ།། ༼༨༽ བསམ་སྦྱོར་ངན་པའི་བདུད་རིགས་རྩ་ནས་ཞི།། གང་འདོད་ལོངས་སྤྱོད་དབྱར་གྱི་མཚོ་བཞིན་རྒྱས།། དབང་དྲག་མཆོག་གི་དངོས་གྲུབ་ཀུན་ཐོབ་ནས།། མཐུན་རྐྱེན་ལེགས་འཛོམས་ཀུན་བཟང་རྒྱལ་པོ་རྒྱལ།། ༼༩༽ རྒྱལ་ལོ་རྒྱལ་ལོ་དཀོན་མཆོག་རྩ་གསུམ་རྒྱལ།། རྒྱལ་བསྟན་དར་ཞིང་རྒྱལ་ཁམས་བདེ་བར་རྒྱལ།། རྒྱལ་ཀུན་དགྱེས་པས་རྒྱལ་གླུ་རྒྱལ་སྲས་རྒྱལ།། རྒྱལ་རྒྱལ་རང་རྒྱལ་ལྷ་མི་ཐམས་ཅད་རྒྱལ།། ལྷ་རྒྱལ་ལོ། ཀི་ཀི་བསྭོ་བསྭོ་ལྷ་རྒྱལ་ལོ།། ཞེས་པ་འདི་ཡང་རབ་གནས་ཤིང་སྦྲུལ་ས་ག་ཟླ་བའི་དབང་ཕྱོགས་རྒྱལ་བ་དང་པོར་༸སྐྱབས་རྗེ་གྲུབ་དབང་རིག་འཛིན་གྲུབ་པ་མཐར་ཕྱིན་མཆོག་དང་། རིག་འཛིན་རྟེན་འབྲེལ་བཟང་མོ་དང་མཁས་དབང་ལོ་ཙཱ་བ་ཆེན་པོ་རིག་འཛིན་དཔལ་ལྡན་རྡོ་རྗེ་དང་བླ་ཚབ་རིག་འཛིན་ནོར་བུ་རྡོ་རྗེ་དང་། རིག་འཛིན་རྡོ་རྗེ་སྒྲོལ་མ་དང་རིག་འཛིན་ཀརྨ་མཁའ་འགྲོ་དང་རིག་འཛིན་དཔལ་ལྡན་ལྷ་མོ་བཅས་རིག་འཛིན་འདུས་སྡེའི་བཀོད་བསྒྲིགས་ལེགས་གནང་དང་། དཔལ་སྔ་འགྱུར་རིག་འཛིན་ཆོས་འཁོར་གླིང་ནས་རྨི་ལམ་སྐོར་ལས་གསང་བ་རྣལ་འབྱོར་རྣམས་འཆད་བཞིན་པའི་སྐབས་སུ་གང་ཤར་བ་དག་རྨི་ལམ་དབང་ཕྱུག་གམ་རིག་འཛིན་ཨེ་མ་ཧོས་དེ་ཉིད་དུ་རྒྱལ་གླུ་རུ་ཐོལ་གྱིས་བླངས་པར་དགེའོ།། ཤྲཱིཿ སརྦ་མངྒ་ལམ།