ཨེ་ཝྃ་ཧོ།

༄༅།།ཡུལ་གངས་ཅན་ལྗོངས་ཀྱི་སྙིང་གྲོགས་དམ་པ་ བླ་མ་བསམ་གྲུབ་ལ་སྤྲིངས་ཡིག་གེ་སར་མེ་ཏོག་ ཅེས་བྱ་བ་བཞུགས་སོ།། ཨེ་མ་ཧོ་ཨ་ལ་ལ་ཧོ།། ༼༡༽ མཐོ་པོ་རི་གངས་ལྗོངས་ལུང་པ་ནས།། ཆེན་པོ་ཡི་མིང་ལ་མི་རེ་འཁན།། གྲོགས་པོ་ཁྱེད་སྙིང་གི་ནོར་བུ་ལགས།། རྒན་པོ་ངས་སེམས་ནས་བརྗེད་མེད་ལགས།། ༼༢༽ ཨ་མ་ཡི་ཉི་མ་འཆར་ཉིན་མོ།། ཨ་ལགས་རྗེ་སྨན་ཁང་མཆིས་ན་ཡང་།། ཨ་བུ་ངར་སྙིང་གཏམ་ཞལ་པར་གནང་།། ཨ་ལ་ལ་གནང་སྦྱིན་དཔག་མེད་མཛད།། ༼༣༽ ཧ་ཅང་གི་ས་ཐག་རིང་ན་ཡང་།། ས་མཐའ་ལ་དགོངས་པས་ལེགས་གཟིགས་ནས།། ཤ་ཞེན་གྱི་བདེན་ཚིག་བསླུ་མེད་ཀུན།། ལ་རྒྱ་ཅན་དམ་ཚིག་འགྱུར་མེད་ལགས།། ༼༤༽ ར་རུ་ཡི་རྣམ་པ་རབ་ཏུ་དབེན།། ཡ་རབ་ཀྱི་གཤིས་ཀ་ཡིད་དུ་འོང་།། འ་ཅག་ཀུན་མཐུན་ལམ་ཟབ་རྒྱས་འབྲེལ།། ཟ་ཧོར་གྱི་བླ་བརྒྱུད་རྣལ་འབྱོར་དངོས།། ༼༥༽ ཞྭ་དམར་གྱི་བསྟན་པ་སྙིང་ལས་གཅེས།། ཝ་ལེར་ངང་བླ་མའི་བཀའ་བཞིན་སྒྲུབ།། ཛ་ཡ་ཉིད་བཀའ་གཏེར་མཛོད་ལ་དབང་།། ཚ་བཟང་བཞིན་བྲོ་བ་མཆོག་ཏུ་མངའ།། ༼༦༽ ཙྭ་རི་སོགས་གནས་བསྐོར་ཚུལ་བཞིན་མཛད།། མ་ལུས་པའི་འགྲོ་བར་རྟག་ཏུ་བྱམས།། བཛྲ་ཡི་ཐེག་པར་བྱང་ཆུབ་བདག། ཕ་བཟང་གི་བུ་ལ་ལྟ་སྤྱོད་བཟང་།། ༼༧༽ པ་སངས་བཞིན་ལྷག་བསམ་དུང་ལས་དཀར།། ཉ་གང་བཞིན་བྱང་སེམས་བདག་ཉིད་རྗེ།། ཇ་ཆང་གི་ཚོགས་འཁོར་དག་པས་བསྐོར།། ཆ་ལུགས་ཀུན་ཀུན་བཟང་སྤྱོད་པར་དགྱེས།། ༼༨༽ ཅ་དག་གི་བཤད་སྒྲུབ་ཕྲིན་ལས་སྤེལ།། ང་རྒྱལ་དང་བྲལ་བའི་རིག་པ་འཛིན།། ག་ལ་བར་བཞུགས་ན་གུ་ཡངས་པ།། ཁ་བ་ཡི་ལྗོངས་ཀྱི་མཛེས་རྒྱན་ལགས།། ༼༩༽ ཀ་དག་གི་བླ་མ་ཀུན་ཏུ་བཟང་།། ཨོ་རྒྱན་གྱི་རྒྱལ་ཚབ་མ་ཎི་ཀ། ཨེ་མ་ཧོ་སྐུ་ཚེ་རྒྱལ་མཚན་བརྟན།། ཨུ་པ་ཡ་འགྲོ་དོན་མཐར་ཕྱིན་ཤོག། ༼༡༠༽ སྐུ་ཚེ་ཉིད་ཚེ་དཔག་མེད་དང་མཉམས།། གསུང་ཆོས་དག་འཁོར་འདས་ཡོངས་ལ་ཁྱབ།། ཐུགས་རྗེ་མཆོག་རྒྱལ་བ་ཀུན་ལས་ལྷག། ཡོན་ཏན་དང་ཕྲིན་ལས་ལྷུན་གྲུབ་ཤོག། ཅེས་པ་འདི་ཡང་རབ་གནས་ཤིང་འབྲུག་ས་ག་ཟླ་བའི་ཡར་ཚེས་བདུན་པ་སྟེ་བདག་ཅག་གི་སྟོན་པ་བཀའ་དྲིན་ཅན་གྱི་འཁྲུངས་སྐར་ཉིན་མོར་ངོས་ལ་དད་དམ་འགྱུར་བ་མེད་པའི་བླ་མ་དམ་པ་བསམ་འགྲུབ་ཡང་ཡང་དྲན་པའི་མོད་ལ་གང་ཤར་བ་དག་སྐུ་ཚེ་བརྟན་པ་དང་འགྲོ་དོན་རྒྱས་པའི་ཐབས་སུ་དམིགས་ཏེ་ཤྲཱིཿ ཨེ་མ་ཧོས་སེངྒྷ་གླིང་ཨེ་ཝྃ་དཔེ་མཛོད་ཁང་ནས་སྨོན་པར་དེ་དེ་བཞིན་དུ་འགྲུབ་པར་གྱུར་ཅིག་གུ། །། ཤྲཱིཿ སརྦ་བུདྡྷ་ཛྙཱ་ན་བཛྲ་བི་ཛ་ཡནྟུ།།

འཇའ་པན་ལ་འགྲོ་རན་ཐལ།། ཨེ་མ་ཧོ༔ འགྲོ་ན་འགྲོ་དོན་ཡོད་པར་དམིགས།། དམིགས་ཡུལ་གཞན་དོན་ཁོ་ན་ལས།། ལས་བཞི་མཆོག་གི་ཕྲིན་ལས་ཀུན།། ཀུན་བཟང་རྒྱལ་བའི་ཞིང་ཀུན་རྒྱལ།། ཤྲཱིཿ གླིང་པས་སོ།། See you again Canada I am flying to Japan and all Asia blessings Om Ah Hung Bezer Guru PADMA Siddhi Hung. Hung འཇའ་པན་ལ་འགྲོ་རན་ཐལ།། ཨེ་མ་ཧོ༔ འགྲོ་ན་འགྲོ་དོན་ཡོད་པར་དམིགས།། དམིགས་ཡུལ་གཞན་དོན་ཁོ་ན་ལས།། ལས་བཞི་མཆོག་གི་ཕྲིན་ལས་ཀུན།། ཀུན་བཟང་རྒྱལ་བའི་ཞིང་ཀུན་རྒྱལ།། ཤྲཱིཿ གླིང་པས་སོ།།

ཐུབ་པས་བྱིན་རླབས་འོད་གསལ་རང་བྱུང་རྟོགས།།འོད་གསལ་གསང་ཆེན་ཆོས་ལ་ངེས་ཤེས་འཁྲུངས། །ཉོན་མོངས་སྤང་བླང་དྲི་མ་རང་གྲོལ་བའི། །འོད་གསལ་རང་བྱུང་ཁྱེད་དང་དབྱེར་མེད་ཤོག། གསང་ཆེན་བླ་མེད་ཀྱི་རྣལ་འབྱོར་པ་ཆོས་དབྱིངས་རྡོ་རྗེ་རིན་པོ་ཆེ་ནི། མདོ་ཁམས་འབྲི་ཟླ་ཟལ་མོའི་སྒང་། སྒ་པ་རིན་ཆེན་ཚོ་དྲུག་སྒ་སྟོད་མཆོད་རྟེན་དཀར་པོ་བཞུགས་པའི་ཉེ་འགྲམ།འབྲི་ཀླུང་དལ་འབབ་ཀྱི་གཡོན་ངོས་དུང་དཀར་གྲོང་ཞེས་པའི་སྡེ་པར་ཡབ་ཚུལ་ཁྲིམས་རྒྱལ་མཚན་དང་ཡུམ་བཀྲ་ཤིས་ལྷ་མོ་གཉིས་ཀྱི་སྲས་སུ་སྤྱི་ལོ་༡༩༤༡ལོར་སྐུར་འཁྲུངས།ཆུང་ནས་བྱིས་པ་གཤིས་སྤྱོད་འཇམ་ཤིང་རང་བཞིན་ཆོས་ལ་མོས་པའི་བག་ཆགས་སད། སྤྱི་ལོ་༡༩༤༨ལོར་ཁྲི་འདུ་ན་ལུང་རི་ཁྲོད་དུ་བཞུགས་པའི་གྲུབ་དབང་སངས་རྒྱས་བཟང་པོ་འཇལ་ཏེ་བྱིན་བརྒྱུད་བརྡ་དོན་རྗེས་གནང་གི་དབང་དང་།འབྱུང་འགྱུར་ལེགས་ཉེས་ཀྱི་ལུང་བསྟན། སྲུང་མ་བཀའ་གཏད་ཀྱི་ཞལ་བཞེས་བཅས་གནང་། སྐབས་དེར་ལམ་ཁར་སྟོན་པ་ཐུབ་དབང་དང་ལས་འབྲེལ་ཐོག་མར་སད་རྟགས་སྒ་ཁྲི་འདུ་བསྐལ་བཟང་ཇོ་བོ་སྐུ་གཅིག་ལ་སྐུ་གསུམ་མའཇལ་སྣང་བྱུང་།སྤྱི་ལོ་༡༩༥༡ལོར་ཐུབ་བསྟན་དགོན་དགེ་འདུན་པའི་ཚོགས་གྲལ་དུ་ཞུགས་ནས་ཆོས་སྤྱོད་སོགས་ལ་བློར་འཛིན་གནང་།ས་སྐྱ་གོང་མ་ངག་དབང་ཀུན་དགའ་བསོད་ནམས་དང་། ངོར་ཁང་གསར་མཁན་པོ་ངག་དབང་ཡོན་ཏན་རྒྱ་མཚོ་སོགས་དམ་པ་རྣམས་ཀྱི་མདུན་སར་ས་སྐྱ་ལམ་འབྲས་གཙོས་པའི་དབང་ཆོས་ཐོབ།སྤྱི་ལོ་༡༩༥༦ལོར་ཙམ་ན་ཁོང་གི་ཐུགས་ལ་རང་ཤུགས་སུ་སྐྱེས་པའི་མི་རྟག་ངེས་འབྱུང་གི་བློས་བསྐུལ་ནས་ཟི་ཁྲོན་རྫ་ལྕང་དགོན་གྱི་མཁས་གྲུབ་དུ་མའི་མདུན་ནས་མདོ་སྔགས་གཞུང་ལུགས་ལ་ཐོས་བསམ་ཅི་ནུས་མཛད་ཅིང་དགེ་ཚུལ་གྱི་སྡོམ་པ་བཞེས་པ་དང་།རྫ་དཔལ་སྤྲུལ་སོགས་ལས་ཆོས་འབྲེལ་གང་མང་ཞུས། སྤྱི་ལོ་༡༩༥༨ལོར་དུས་འགྱུར་གྱི་ཁྲོད་སྒ་སྐྱེ་དགོན་མཁན་ཆེན་ངག་དགའ་རིན་པོ་ཆེའི་མདུན་ནས་འབྱུང་འདུལ་དང་འཇམ་དཔལ་སྒྱུ་དྲྭའི་དབང་དང་ཁྲིད་ལུང་ཐོབ།སྤྱི་ལོ་༡༩༦༠ནས་བཟུང་ལོ་ངོ་བཅུ་ཕྲག་ལྷག་ལ་ལྷ་སའི་ཇོ་བོ་མཇལ་བའི་རྐྱེན་སོགས་ཀྱིས་བསྐུལ་ཏེ་སྟོན་པ་ཤཱཀྱ་ཐུབ་པ་ཁོ་ནར་ཡི་དམ་བཟུང་སྟེ།ཐུན་མོང་སྔོན་འགྲོ་བློ་ལྡོག་རྣམ་བཞི་ནས་ཐུན་མིན་སྐྱབས་གསོལ་གཙོས་འབུམ་བཞི་དུ་མ་ཕྱིའི་གྲངས་ཙམ་དུ་མ་སོང་བར།ནང་སྙིང་ནས་ངེས་འབྱུང་དང་མོས་གུས་དྲག་པོས་བརྩོན་པས་སྐྱབས་འགྲོའི་ལམ་རྟགས་ཐོན། སྤྱི་ལོ་༡༩༦༩ལོ་ནས་འཇམ་མགོན་ཀོང་སྤྲུལ། གང་ཤར་མཁན་ཆེན།ཉག་ལ་པདྨ་བདུད་ལདུལ། རིག་འཛིན་འཇིགས་མེད་གླིང་པ་སོགས་ཀྱི་གདམས་དཔེ་བཅས་ལ་མཇལ་བས་ཕྱག་རྫོགས་ཟུང་འཇུག་མན་ངག་སེམས་དོན་གྱི་རང་ངོ་འཕྲོད།དེ་ནས་ད་བར་སྙིང་པོ་རྡོ་རྗེ་བཟླས་པ་དང་སྦྲགས་མན་ངག་དེའི་དོན་ལ་མཉམ་བཞག་དང་ཟུང་འབྲེལ་གྱིས་བརྩོན་པས།གསང་སྔགས་རྡོ་རྗེ་ཐེག་པའི་རྒྱུད་དོན་བཞིན། རྟེན་འབྲེལ་ལུས་ལ་འགྲིགས་ནས་རྟོགས་པ་སེམས་ལ་འཆར་ཞེས་གསུངས་པ་ལྟར།ཐོག་མ་སེམས་ཟིན་པས་རླུང་ཟིན། དེས་རྩ་ཐིག་གི་གནས་རྣམས་གཡོས་ཏེ་རང་ལུས་དག་དྭངས་སྦྱང་བསྒྱུར་རྟེན་འབྲེལ་འགྲིགས།དེ་ལས་ཨ་ཧྃ་འབར་འཛག་གི་རྟེན་འབྲེལ་དངོས་སུ་འགྲིགས་ཏེ་ཟག་མེད་དགའ་བཞི་ཉམས་མྱོང་བར་མ་ཆད་པར་མཚོན་བྱ་དོན་གྱི་ཡེ་ཤེས་རྟོགས།གསང་བདག་རྡོ་རྗེ་འཆང་བྱིན་བརྒྱུད་ཀྱི་རྟགས་སྣང་གིས་རྡོ་རྗེ་འབེབས་པའི་དབང་མཆོག་དེ་རྒྱལ་ཐབས་སྤྱི་བླུགས་ཀྱི་ཚུལ་དུ་བབས།དངོས་སུ་དེ་ལས་ཉེ་བརྒྱུད་ཀྱི་དོན་དབང་ཐོབ། གཞན་ཡང་ཁོང་ཁོང་ནང་གི་རྩ་རླུང་གི་ཁམས་རྣམས་དཔའ་བོ་དཔའ་མོ་སོགས་གཞི་ཡེ་གནས་རང་ལུས་གདན་གསུམ་དཀྱིལ་འཁོར་གྱི་དམ་ཚིག་སེམས་དཔའ་དེ་ཡེ་ཤེས་སེམས་དཔར་གནས་འགྱུར་ཏེ།གསང་ཆེན་རྡོ་རྗེ་སློབ་དཔོན་གྱི་གོ་འཕང་བརྙེས། དེ་ནས་ཕྱིའི་རྟགས་སུའང་སྤྱི་ཕྱིས་ཙམ་ཏེ་སྤྱི་ལོ་༡༩༩༠ལོ་ནས་བཟུང་སྐལ་ལྡན་ལས་ཅན་གྱི་སློབ་བུ་ཕོ་མོ་རྣམས་ལའང་དབང་དོན་བྱིན་རླབས་ཡེ་ཤེས་པ་བབས།དེ་ནི་ལམ་འབྲས་ལས་ཁམས་འདུས་པ་དང་། མཚན་བབརྗོད་ལས་རྡོ་རྗེ་འབེབས་པ། གཞན་ཡང་བླ་མེད་རྒྱུ་སྡེ་རྣམས་ནས་དབང་དོན་བྱིན་རླབས་ཡེ་ཤེས་བབས་པ་ཞེས་བྱ།དེ་ཀུན་རྡོ་རྗེ་ཐེག་པའི་སྣོད་དང་། རིགས་སད་ཀྱི་རྣལ་འབྱོར་གྱུར། གཞན་ཡང་ཁོང་གི་བཞུགས་མལ།ཚེམས་དང་དབུ་སྐྲ་སོགས་ལ་ཁ་དོག་སྣ་ཚོགས་ཅན་གྱི་རིང་བསྲེལ་མང་པོ་འཁྲུངས། ཁོང་སྨིན་གྲོལ་ལམ་རྟགས་ཐོག་མ་དེ་ནས་བཟུང་ཕ་ཡུལ་རང་ཁྱིམ་གྲོང་སྨད་དབང་དིལ་དབང་ཁང་དང་།དབེན་གནས་བཀྲ་ཤིས་གླིང་། ཐུབ་དགོན། མདོ་སྨད་གནས་བྲག་དཀར་སྤྲེལ་རྫོང་། མཚོ་སྙིང་མ་ཧཱ་དེ་བ།ལྷ་སར། བསམ་ཡས་མཆིམས་ཕུ། ཡར་ལུང་ཤེལ་བྲག་བཅས་བོད་ཡུལ་དང་། མ་ཧཱ་ཙི་ནའི་གནས་ཧྲན་ཞི་རི་བོ་རྩེ་ལྔ་།ཡུན་ནན་རི་བོ་བྱ་རྐང་། ཁྲང་ཨན་ལྷོ་རི་ཀྲུང་ནན་རི་བོ་སོགས་སུ་མཚམས་སྒྲུབ་ཁོ་ནས་ཕལ་ཆེར་དུས་འདའ། སྤྱི་ལོ་༡༩༨༡ལོར་ནས་བཟུང་ལོ་རེར་ཞག་འགར་སྐུ་མཚམས་ཐེངས་རེ་གཉིས་གྲོལ་ནས་འཁྲུངས་ཡུལ་དང་རང་དགོན་སོགས་སུ་བཛྲ་གུ་རུ།མ་ཎི། ཡིག་བརྒྱ་སོགས་ཀྱི་སྒྲུབ་པ་དང་འབྲེལ་དེར་འདུས་སྐྱེ་བོ་རྣམས་སྐྱབས་སེམས་སོགས་ནས་ཆོས་ཁྲིད་ཀྱི་གདམས་པ་གནང་བས་སྐལ་ལྡན་གྱི་བུ་སློབ་མང་པོ་བྱུང་།དངོས་སུ་བསྟན་པའི་མེ་རོ་རིམ་བཞིན་མཆེད་པར་བྱས། སྤྱི་ལོ་༡༩༨༨ལོར་ཐུབ་བསྟན་དགོན་ཆོས་སྒོ་ཕྱེ་ནས་ཕྱི་ནང་གི་རྟེན་དང་བརྟེན་པ་སྐྱར་བཞེངས་མཛད།གཞན་ཡང་དབེན་གནས་བཀྲ་ཤིས་དུ་བཀྲ་ཤིས་སྒྲུབ་དགོན་བཙུན་མའི་དགོན་སྐྱར་འཛུགས་དང་། གནས་མཆོག་མཆོད་རྟེན་དཀར་པོར་སྔགས་འཆང་ཨ་མྱེ་དགོན་བཅས་གསར་རྒྱབ་མཛད། སྤྱི་ལོར་༡༩༩༥ལོར་རིན་པོ་ཆེས་སྨིན་གྲོལ་ཉམས་རྟོགས་ངེས་པའི་ལམ་དུ་སླེབས་པའི་རྟེན་འབྲེལ་དང་པོ་སྒྲིགས་པའི་ཆོས་ར་ཐུབ་བསྟན་དགོན་དུ་ཚོགས། སྤྱི་ལོ་༡༩༩༨ལོར་ཀྲུང་གོ་ཆོས་ལུགས་སློབ་ཚོགས་ཀྱིས་གདན་ཞུས་ལྟར་རང་རྒྱལ་གྱི་ཆེད་མཁས་ཞིབ་འཇུག་པ་དང་དུ་མ་དང་ལྷན།ཆེད་དུ་རིན་པོ་ཆེ་ལོ་མང་བོད་ནང་བསྟན་གསང་སྔགས་སྒྲུབ་པའི་ཉམས་མྱོང་སྐོར་སོགས་ལ་ཞིབ་མོལ་ཚོགས་འདུ་འདུས།ཀྲུང་གོ་ཆོས་ལུགས་སློབ་ཚོགས་ནས་རིན་པོ་ཆེ་ལ་ཆེད་བསྐོས་ཞིབ་འཇུག་པ་ཞེས་པའི་དཔང་རྟགས་ཕུལ། སྤྱི་ལོ་༢༠༠༠ལོར་ཀྲུང་གོ་བོད་བརྒྱུད་མཐོ་རིམ་ནང་བསྟན་སློབ་གླིང་ནས་གླིང་གཙོ་དགེ་རྒན་ལྷན་ནས་གསང་ཆེན་སྨིན་གྲོལ་ཉམས་མྱོང་སྐོར་ལ་བགྲོ་གླེང་མཛད།སྤྱི་ལོ་༢༠༠༢ལོར་རིན་པོ་ཆེ་བཞུགས་པའི་སྒྲུབ་ཕུག་དབུ་མ་རྫོང་གི་གནས་སྒོ་ཕྱེ་ནས་དབྱར་ཁར་སྨིན་གྲོལ་ངེས་པའི་རྟེན་འབྲེལ་གཉིས་པའི་ཆོས་ར་དེ་དབེན་གནས་བཀྲ་ཤིས་གླིང་དུ་ཚོགས།སྔར་གྱི་སྒྲུབ་གནས་གྲོང་སྨད་ཁྱིམ་ཤུལ་དེར་རྗེས་དྲན་དབུ་མའི་རྡོ་རིང་བསླང་། སྤྱི་ལོར་༢༠༠༤ལོར་རྒྱལ་ཚབས་འོད་སྲུང་ཆེན་པོ་འགོག་པར་བཞུགས་པར་གྲགས་པའི་ཡུན་ནན་རི་བོ་བྱ་རྐང་དང་།རྒྱ་ནག་རི་བོར་རྩེ་ལྔར་ཐེངས་གཉིས་པར་གནས་འབྲེལ་ཕེབས། ཞོར་དུ་རྒྱ་ཡུལ་ཕྱོགས་སོ་སོའི་གདུལ་བྱ་སྐྱོངས། སྤྱི་ལོར་༢༠༠༦ལོར་རང་ཡུལ་དུ་ཕེབས་ཤིང་སྐྱ་སེར་བུ་སློབ་རྣམས་དང་མཇལ་འཛོམས་དང་འབྲེལ་རང་ཐུབ་བསྟན་དགོན་དང་དབེན་གནས་བཀྲ་ཤིས་ཆོས་གླིང་སྒྲུབ་ཕུག་དབུ་མ་རྫོང་དུ་མཐའ་མཇུག་གི་སྐུ་མཚམས་བཞུགས། སྤྱི་ལོར་༢༠༠༧ལོར་རིན་པོ་ཆེས་འཛམ་མཐའི་མཛད་སྒོ་སོགས་སྡེ་དགོན་རྣམས་ཀྱི་ཆེས་མཐའ་མཇུག་གི་བྱ་བ་རྣམས་ལེགས་པར་གྲུབ་པར་མཛད། སྤྱི་ལོར་༢༠༠༨ལོར་རིན་པོ་ཆེས་སྔར་གྱི་མཁའ་འགྲོའི་པྲ་ལུང་བཞིན་སྐུ་གཤེགས་ལ་ཉེ་བའི་དོན་དེ་ཁྱབ་བསྒྲགས་མཛད།ཕྱོགས་སོ་སོའི་སློབ་འབངས་རྣམས་དང་དམ་པའི་སྐྱེས་བུ་བླ་སྤྲུལ་རྣམས་ཀྱིས་སྐུ་ཚེ་བརྟན་བཞུགས་ཕུལ།ལོ་དེར་རིན་པོ་ཆེས་ཐུབ་བསྟན་དགོན་དུ་ཁམས་གསུམ་རྣམ་རྒྱལ་མཆོད་རྟེན་ཆེན་མོ་བཞེངས་པའི་འཆར་འགོད་དང་རྨང་འདིང་བ་སོགས་ཀྱི་དབུ་རྩོམ་མཛད། ལོ་དེའི་ཟླ་༡༠་པར་རིན་པོ་ཆེ་རང་ཉིད་ཀྱིས་གསར་བསྐྲུན་མཛད་པའི་བར་ལུང་མཚོ་སྔོན་ཁ་བ་རི་པ་བོད་རིག་གནས་སྤེལ་སྐྱོང་ལྟེ་གནས་སུ་ཕེབས་ཏེ།དེ་ནས་རྒྱ་བོད་ཀྱི་དད་ཅན་སྐྱ་སེར་སློབ་འབངས་སྐྱོང་སྟེ་སྐུ་ཚེ་ཆེས་མཐའ་མའི་བསྟན་འགྲོའི་དོན་མཛད། སྤྱི་ལོར་༢༠༠༩ལོའི་དཔྱིད་དུས་ཀྱི་སྔོ་གསར་སྐྱེ་མགོ་རྩོམ་པའི་ཉིན་ཞིག་རིན་པོ་ཆེས་དེ་རིང་ང་ཚོ་རི་བལྟས་འགྲོར་དེང་ཕན་ཆད་འཇིག་རྟེན་ཕྱི་རོལ་གྱི་ལྟད་མོ་ལྟ་བའི་གོ་སྐབས་མེད་ཅེས་གསུངས་ནས་རི་གཟིགས་ཕེབས།དེ་ནས་ཞག་གསུམ་མཚམས་ཁོང་གི་སྐུ་ལུས་རྩ་ཁམས་ཀྱི་འགྱུར་བ་ཆེན་པོ་བྱུང་སྟེ་མུ་འཐུད་བར་ལུང་དེར་སྐུ་མཚམས་བཞུགས།ཞབས་དྲུང་རྣམས་ལ་ཁོང་ལ་ཆོས་ཉིད་བར་དོའི་སྣང་བ་མང་པོ་འཆར་འདུག་ཅིང་། ད་ལྟ་ཞི་བའི་ལྷ་ཚོགས་རྣམས་འཆར་བའི་སྐབས་རེད་འདུག་ཅེས་གསུངས། སྤྱི་ལོར་༢༠༡༠ལོར་ཟླ་གཉིས་པའི་ཟླ་མཇུག བོད་རབ་བྱུང་བཅུ་བདུན་པ་ལྕགས་སྟག་གི་གནམ་ལོ་གསར་དུ་ཚེས།རིན་པོ་ཆེ་བོད་ཟླ་༡༢ཚེས་༣༠དབུ་མ་སྒྲ་གཅན་དུ་ཐིམ་པའི་ཉིན་དེ་ནས་བཟུང་ཚེས་བཅུ་གསུམ་བར།གྲུབ་པའི་སྤྱོད་པ་སྣ་ཚོགས་སྟོན་ཅིང་འབྱུང་འགྱུར་བྱ་བ་འགའ་ལ་དགོས་པའི་ཞལ་བཀོད་བཅས་གནང་། ཆོས་དབྱིངས་རྡོ་རྗེ་རིན་པོ་ཆེ་བཅུ་གསུམ་རྡོ་རྗེ་འཛིན་པའི་གོ་འཕང་ཕེབས་པའི་རྟགས་སམ་རྟེན་འབྲེལ་དུ་བོད་ལོ་སར་ཟླ་བའམ་ཆོ་འཕྲུལ་ཟླ་བའི་ཚེས་བཅུ་གསུམ་ཉིན་གཟུགས་སྐུ་བཀོད་པ་ཆོས་ཉིད་འོད་གསལ་ཀློང་དུ་ཐིམ་ཚུལ་བསྟན། རྗེས་འཇུག་སློབ་འབངས་རྣམས་ཀྱིས་བླ་མའི་དགོངས་རྫོགས་ཞག་ལྔ་བཅུ་བར་དུ་ཚོགས།ཞག་ལྔ་བཅུའི་དགོངས་རྫོགས་མཚམས་ཞོག་ལ་ཉེ་བའི་བོད་ཟླ་གཉིས་པའི་ཚེས་ཉེར་ལྔཉིན། སྐུ་གདུང་ཁང་གི་སྟེང་གི་ནམ་མཁར་འཇའ་མཚོན་སྣ་ཚོགས་ཤར་བ་དང་རྒོད་ཚོགས་ཁྱུ་བསྐོར་བཅས་ནས་ཉིན་དེར་རིང་བསྲེལ་སྣ་ལྔའི་དཔག་མེད་ཀྱི་ཆར་ཆེན་བབས།རིང་བསྲེལ་དེ་དག་འགའ་ཞིག་ནི་བྱེའུ་སྒོ་ང་ཙམ་འཁྲུངས་ཏེ་སྐལ་ལྡན་འགྲོ་བ་རྣམས་ཀྱི་དད་རྟེན་དུ་འཁྲུངས། བླ་མའི་དགོངས་པ་བཞིན་སྐུ་དམར་གདུང་འཇོག་པས་བཅོས་ལྷད་སོགས་ཅི་ཡང་མ་དགོས་པར་རུལ་ལྷད་སོགས་ཀྱི་སྐྱོན་དང་བྲལ་ཞིང་།སྐུ་ལ་རིང་བསྲེལ་སྣ་ལྔས་ཁྲས་བཏབ་པ་བཞིན་གྱིས་གང་བའི་སྐུ་གདུང་ཡིད་བཞིན་ནོར་བུ་དེ་དད་ལྡན་རྣམས་ཀྱི་བསོད་ནམས་སུ་སྨིན། རིན་པོ་ཆེ་ཁོང་གིས་ཕྱག་རྫོགས་དབུ་གསུམ་གྱི་དགོངས་པ་སོགས་ཀྱི་ཕྱོགས་སྒྲིགས་དང་ཞལ་རྩོམ་མཛད་པའི་པོད་བཅུ་ལྷག་རྗེས་འཇུག་རྣམས་ཀྱི་ནོམ་དུ་འཇིག་རྟེན་འདིར་བཞག དེ་ལྟར་ཆོས་དབྱིངས་རྡོ་རྗེ་རིན་པོ་ཆེ་ཁོང་སྐུ་འཚོ་བཞུགས་སྐབས་སུ།ཐུབ་བསྟན་དར་རྒྱས་མདོ་སྔགས་བཤད་སྒྲུབ་གླིང་གི་དགོན་བདག་བླ་མ། བཀྲ་ཤིས་སྒྲུབ་དགོན་གླིང་གི་སྒྲུབ་དཔོན་བླ་མ།དགོན་དོ་དམ་ཨུ་ཡོན་ལྷན་ཁང་གི་ཀྲུའུ་རིན། ཁྲི་འདུ་རྫོང་སྲིད་གྲོས་ཨུ་ཡོན། ཀྲུང་གོ་ཆོས་ལུགས་སློབ་ཚོགས་ཆེད་བསྐོས་ཀྱི་ཞིབ་འཇུག་པ།མཚོ་སྔོན་ནང་བསྟན་གསང་སྔགས་ཚོགས་པའི་སློབ་དཔོན། མཚོ་སྔོན་ཁ་བ་རི་པ་བོད་རིག་གནས་སྤེལ་སྐྱོང་ལྟེ་གནས་ཀྱི་ཚོགས་གཙོ་བཅས་ཡིན། ཁོང་གི་དགོངས་བཞེད་ནི། མིང་དང་ནོར་གྱི་རྗེས་སུ་མི་འབྲང་ཞིང་།།རྟེན་བཞེངས་མཁར་བརྩིགས་ཕྱོགས་སུ་མ་ལྷུང་བ། །བཅའ་བརྡུང་འབུད་དཀྲོལ་ཁོ་ནས་དུས་མི་འདའ།།སྙིང་པོ་སྒྲུབ་ལ་གཞོལ་བ་རང་གཞན་བསྐུལ། ། དཔལ་ལྡན་བླ་མའི་ཐུགས་དགོངས་རྫོགས་པ་དང་། །མཁའ་མཉམ་ཡོངས་ལ་བདེ་སྐྱིད་འབྱུང་བ་ཡི།།བདག་གཞན་མ་ལུས་ཚོགས་བསགས་སྒྲིབ་སྦྱང་ནས། །མྱུར་དུ་སངས་རྒྱས་ས་ལ་འགོད་པར་ཤོག ། ཅེས་པ་རྗེ་དེའི་ཞབས་འབངས་སུ་གཏོགས་པའི་བླ་སྤྲུལ་ཐུབ་བསྟན་འོད་གསལ་དེས་སྤྱི་ལོ་༢༠༡༦ལོར་ཟླ་༡༢པར་ཆོས་དབྱིངས་རྡོ་རྗེ་རིན་པོ་ཆེའི་ཕྱིའི་རྣམ་ཐར་ལས་བསྡུས་ཏེ་གུས་པས་ཕུལ།དགེའོ། །

དེ་རིང་ནི་བདག་གི་རྨི་ལམ་གྱི་བདེན་པ་མངོན་དུ་གྱུར་ནས་རྗེ་བཙུན་འཕགས་མ་སྒྲོལ་མ་དཀར་མོ་དང་རྣམ་དབྱེར་མ་མཆིས་པའི་འཕགས་མ་སྒྲོལ་མ་འཇམ་དབྱངས་དཔལ་མོ་དང་དངོས་སུ་ཞལ་མཇལ། རྗེ་བཙུན་སྒྲོལ་མ་དཀར་མོ་འོད་ཟེར་བརྒྱ་བའི་དབང་ལུང་མན་ངག་ཁྲིད་བཅས་གདམས་ངག་ཐམས་ཅད་ཐུགས་བརྩེ་ཆེན་པོས་སྒོ་ནས་གནང་བ་དང་བྱིན་རླབས་བསྩལ་བས་རྗེས་སུ་བཟུངས། བསོད་ནམས་དང་སྐལ་བ་བཟང་སོང་། ༸སྐྱབས་རྗེ་དམ་པ་ཀཿ ཐོག་རིག་འཛིན་ཆེན་པོ་དང་མཁའ་འགྲོ་དམ་པ་ལ་སྙིང་ནས་བཀའ་དྲིན་ཆེ་ཞུའོ། ཚེ་རིང་ནད་མེད་ཀྱི་བྱིན་རླབས། ཟབ་གཏེར་སྒོ་འགྱེད་ཀྱི་དངོས་གྲུབ། མན་ངག་ཀུན་ཚང་གི་གདམས་ཟབ། བདུད་བཞི་གཡུལ་རྒྱལ་གྱི་དཔའ་གདེང་བཅས་གང་བསམ་ལྷུན་གྲུབ་ཀྱི་རྟེན་འབྲེལ་ཐམས་ཅད་ལེགས་པའི་ཕྱོགས་སུ་འགྲིགས་སོ།། ཨེ་མ་ཧོས་ཨ་རིའི་སྟག་ཚང་བ་གམ་ནས་བྲིས་པར་དགེའོ།།