ཨེ་ཝྃ་ཧོ།

སངས་རྒྱས་ཀུན་འདུས་ཕྱི་ཡི་བླ་མ་ཡིན།།དམ་ཆོས་ཡོངས་རྫོགས་ནང་གི་བླ་མ་ཡིན།།བཀའ་དྲིན་བརྗོད་བྲལ་གསང་བའི་བླ་མ་ཡིན།།བླ་མ་ཁྱེད་ནི་དུས་གསུམ་སངས་རྒྱས་ཡིན།། དུས་ཚེས་ངན་པ་ཡོད་ན་ཁྱེད་ཀྱིས་བཟློག།བཀྲ་མི་ཤེས་པ་ཡོད་ན་ཁྱེད་ཀྱིས་སེལ།།གདོན་བགེགས་འབྱུང་བོ་ཡོད་ན་ཁྱེད་ཀྱིས་ཐུལ།།ཁྱེད་ནི་བླ་མ་ཁྱེད་ནི་སངས་རྒྱས་དངོས།། ཁྱེད་ཀྱི་སྐུ་པར་མཇལ་ན་དད་འདུན་འཕེལ།།ཁྱེད་ཀྱི་མཛད་འཕྲིན་གླེང་ན་བརྗོད་མི་ཚར།།ཁྱེད་ཀྱི་བཀའ་དྲིན་བསམ་ན་མཆི་མ་ལྷུང་།།ཁྱེད་ལ་གུས་སོ་ཁྱེད་ལ་སྐྱབས་སུ་མཆི།། སྤྱི་ཚེས་དང་པོའི་ཚེས་གཅིག་ལ་གཙང་སྨྱོན་གྱིས།

དེ་ཉིད་ཀྱི་གླུ་ཀུན་ཁྱབ་སངས་རྒྱས།།ན་མོ་རཏྣ་ཏྲ་ཡཱ་ཡ།དཔལ་བླ་མ་སངས་རྒྱས་མཐོང་བ་ཉིད།།སེམས་དད་གུས་དམ་ཆོས་རྣལ་མ་ལགས།།བློ་དག་སྣང་གུ་རུ་སིདྡྷིའི་གྲངས།།ཉམས་རྟོགས་འབུལ་སྙིང་ནས་ཡི་རང་ཡོད།།རྒན་བསོད་ནམས་དམན་པ་ག་ལ་ཡིན།།རྒས་འཁོགས་ཀྱང་འཆི་ཆོས་འགྲུབ་ནས་འདུག།རྟེན་དལ་འབྱོར་སྙིང་པོ་ལོན་ནས་གདའ།།ད་འཆི་རུང་འགྱོད་དགོས་གཏན་ནས་མེད།།ཕ་ཨོ་རྒྱན་པདྨའི་བུ་རྒྱུད་ལ།།མ་འགྲོ་དྲུག་འདྲེན་པའི་ཐུགས་དམ་མཆིས།།བུ་དམ་ཚིག་འགྱུར་མེད་ཀུན་ཁྱབ་ལ།།དཔལ་ཡེ་ཤེས་བླ་མའི་གསལ་ཞིག་འདེབས།།མགོན་བརྒྱུད་གསུམ་བླ་མ་གསོལ་བ་ཐོབས།།སེམས་བྱུང་གནས་འགྲོ་གསུམ་ལེགས་པོར་དཔྱོད།།གནད་བཞི་ཆ་གསུམ་བྲལ་རིག་པ་ལ།།ལམ་མཐོང་བའི་རྫོགས་ཆེན་དེ་ཀ་ལགས།།ཕྱི་བློ་ལྡོག་རྣམ་བཞི་གོམས་པ་དང་།།ནང་ཚད་མེད་རྣམ་བཞི་སྒོམ་དང་།།དོན་སྲོག་སྡོམ་གཟེར་བཞིས་ཐབས་ཤེས་ན།།གནད་རིག་འཛིན་རྣམ་བཞིའི་དགོངས་པར་ཕྱིན།།མགོར་སྐྱབས་འགྲོ་སེམས་བསྐྱེད་ཆ་ཚང་དང་།།བར་རྡོར་སེམས་མཎྜལ་ཚོགས་བསགས་ཀྱིས།།མཐར་བླ་མའི་རྣལ་འབྱོར་འདི་ཁོ་ན།།སྐྱབས་ཀུན་འདུས་གུ་རུ་རིན་པོ་ཆེ།།ལུས་འཇའ་ལུས་སྒོམ་ནས་གསོལ་བ་ཐོབས།།ངག་བཛྲ་གུ་རུའི་བསྙེན་པ་བགྲངས།།སེམས་རིག་པ་བླ་མའི་རྣལ་འབྱོར་ལ།།དུས་རྟག་པར་བརྩོན་དང་མངོན་སངས་རྒྱས།།ཕྱི་འཁོར་བའི་རྒྱ་མཚོ་བརྒལ་བ་དང་།།ནང་སེམས་ཀྱི་ཉིད་མཐོང་བ་ལ།།དོན་གུ་རུ་མ་གཏོགས་གཞན་ན་མེད།།ཁྱོད་གསང་གསུམ་བདེ་བའི་རྟེན་འབྲེལ་ཡོད།།ཡིད་ངེས་འབྱུང་འཁོར་བ་ཞེན་ལོག་གིས།།ནང་བྱང་ཆུབ་སེམས་ལ་མངའ་དབང་འབྱོར།།སེམས་དག་པའི་རྩལ་ལས་རིག་པ་ཉིད།།མགོན་པདྨ་ཀ་ར་དེ་ཀ་ལགས།།འཆི་གནད་གཅོད་སྡུག་བསྔལ་མི་མྱོང་ངེས།།གཞི་རྣམ་མཁྱེན་གོ་འཕང་འཐོབ་པར་ངེས།།ལམ་རྫོགས་པ་ཆེན་པོ་དེ་ཀ་ལ།།དད་དག་སྣང་རྩི་དང་མ་ཡལ་མཛོད།།ཁྱོད་དད་པ་ཅན་ལ་དངོས་གྲུབ་ཡོད།།སེམས་བརྩེ་བ་ཅན་ལ་སྙིང་རྗེ་བཅས།།གནད་ཟབ་མོའི་གདམས་ངག་བདུད་རྩི་ཉིད།།སྒོ་ལུས་ངག་ཡིད་ལ་སྨིན་གྲོལ་འབུལ།།དཔལ་ཀུན་བཟང་རྒྱལ་བའི་དགོངས་པ་ཉིད།།ཐུགས་དགྱེས་པ་མཛོད་ལ་ཀློང་དུ་གཏམས།།སྐྱབས་རྡོ་རྗེ་འཆང་དངོས་དེ་ཉིད་ལས།།དུས་ནམ་ཡང་གཡོ་བར་མེད་པར་སྨོན།།ཞེས་པ་འདི་ཡང་རབ་གནས་ས་ཕག་མགོ་ཟླའི་དཀར་ཕྱོགས་དགའ་བ་གཉིས་པར་དད་གུས་ཅན་ཀུན་ཁྱབ་སངས་རྒྱས་ལ་གུས་པ་ཤྲཱིས་དེ་ཉིད་ཀྱི་གླུ་རུ་བླངས་པར་དགེའོ།།

༄༅།།༧གྲུབ་དབང་པདྨ་ནོར་བུའི་ཡང་སྲིད་རིན་པོ་ཆེའི་ཞབས་བརྟན་གསོལ་སྨོན་དཔག་བསམ་ལྗོན་བཟང་ཞེས་བྱ་བ་བཞུགས་སོ།།ན་མོ་མ་ཧྰ་གུ་རུ་པདྨ་མ་ཎི་ཡེ།།ཆོས་དབྱིངས་རབ་འབྱམས་ཀློང་ཡངས་རིག་གཏེར་ལས།།ལོངས་སྤྱོད་རྫོགས་སྐུ་བཅོམ་ལྡན་རྣམ་སྣང་མཛད།།སྤྲུལ་པའི་སྐུ་མཆོག་དགའ་རབ་རྡོ་རྗེ་ནས།།རྩ་བརྒྱུད་བླ་མའི་ཚོགས་ཀྱིས་ཤིས་པར་སྩོལ།།ལྔ་བརྒྱའི་གཙུག་བརྒྱན་པན་ཆེན་བཱི་མ་ལ།།བསམ་བཞིན་སྲིད་པ་བཟུང་བའི་ཚུལ་སྟོན་པས།།སྙིང་པོའི་བསྟན་པ་སྤེལ་ལ་ཟླ་བྲལ་བ།།པདྨ་ནོར་བུའི་ཡང་སྲིད་ཞབས་བརྟན་གསོལ།།ཐུགས་བསྐྱེད་དྲི་མེད་ཤེལ་གྱི་བུམ་པ་བཟང་ལས།།དམ་ཆོས་བདུད་རྩི་སྙིང་པོ་བརྒྱད་ལྡན་ཅན།།དཔལ་ཡུལ་དག་པའི་ཞིང་ནས་སྤྲོས་མཛད་པས།།རྟེན་འབྲེལ་ཆོས་ཀྱི་རྒྱལ་པོ་ཞབས་བརྟན་སྨོན།།སྐུ་གསུམ་རྣམ་པར་སྣང་མཛད་ཐུགས་ཀྱི་འཕྲུལ།།མཚོ་སྐྱེས་རྒྱལ་བའི་རྒྱལ་ཚབ་སྐྱབས་གནས་མཆོག།རྩ་གསུམ་རྒྱ་མཚོའི་སྤྱི་གཟུགས་གྲུབ་དབང་རྗེ།།ཡེ་ཤེས་སྒྱུ་མའི་རོལ་གར་ཞབས་བརྟན་ཤོག།བསྟན་དང་འགྲོ་བའི་དོན་ལ་རྟག་དགོངས་པས།།སྐུ་དངོས་སྤྲུལ་སྐུ་རྒྱུན་ཆད་མེད་པ་རུ།།སྐལ་ལྡན་སྐྱོང་བར་ཞལ་བཞེས་རྡོ་རྗེའི་ཚིག།།ནམ་ཡང་ཉམས་རྒུད་མེད་པར་ཞབས་བརྟན་གསོལ།།བཀའ་དྲིན་མཉམ་མེད་༧གྲུབ་དབང་ཆོས་ཀྱི་རྗེ།།སྐུ་གསུང་ཐུགས་ཡོན་ཕྲིན་ལས་མཐའ་རྒྱས་པས།།བསྟན་འགྲོའི་དོན་དུ་རླབས་ཆེན་མཛད་བཟང་གིས།།དམ་པའི་རྣམ་ཐར་ཇི་བཞིན་ཞབས་བརྟན་གསོལ།།ཕྱི་ནང་གསང་བའི་བར་ཆད་མི་འབྱུང་ཞིང་།།ཉམས་རྟོགས་ཡོན་ཏན་མི་ཟད་གོང་དུ་འཕེལ།།དོན་གཉིས་ལྷུན་གྲུབ་རྡོ་རྗེ་ཐོད་ཕྲེང་རྩལ།།སྐུ་ཚེ་བརྟན་ཅིང་བཞེད་དོན་ལྷུན་གྲུབ་ཤོག།།ཐེག་པ་ཆེན་པོའི་བྱང་སེམས་ས་གསུམ་ཁྱབ།།ཕྱག་རྒྱ་ཆེན་པོའི་བདེ་གསལ་གནས་ཀུན་ཁྱབ།།རྫོགས་པ་ཆེན་པོའི་བསྟན་པ་ཕྱོགས་ཀུན་ཁྱབ།།ཁྱབ་བདག་འགྲོ་བའི་མགོན་པོ་ཞབས་བརྟན་ཤོག།ཅེས་པ་རབ་རྒྱན་ཤིང་རྟའི་ཆུ་སྟོད་ཟླ་བའི་གཟའ་ཚེས་དགེ་བར་སྔ་འགྱུར་དཔལ་ཡུལ་དགོན་ཆེན་དུ་༧གྲུབ་དབང་རིན་པོ་ཆེའི་ཡང་སྲིད་ཁྲི་འདོན་རྒྱ་ཆེར་གནང་བའི་འདྲ་སྐུ་དཔར་མཇལ་བ་དང་མཁའ་འགྲོ་ཆོས་སྒྲོན་དང་དཔལ་ལྡན་ལྷ་མོ་སོགས་དད་ལྡན་སློབ་ཚོགས་ཀྱིས་བསྐུལ་ངོར་སྔ་འགྱུར་བསྟན་པའི་གྲལ་མཐར་བ་རྒྱལ་ཁམས་པ་ཨེ་མ་ཧོས་དབྱིན་ཡུལ་ཨེ་ཝྃ་ཕྱག་ཆེན་རི་ཁྲོད་ནས་གསོལ་བ་འདེབས་པར་དགེའོ།། །།