January 2019

ཨ་མ་ལ་ཀ་རྩོམ་རྒྱུ་འབྲས་མན་ངག་བདུན་གྱི་མེ་ལོང་།།

ཨ་མ་ལ་ཀ་རྩོམ་རྒྱུ་འབྲས་མན་ངག་བདུན་གྱི་མེ་ལོང་།།
ཨེ་མ་ཧོ།
ཨ་མ༵འི་བརྩེ་དུང་ངོ་ཤེས༵་ཨ་དོན་ཉིད།།
ཧ་ཅང་དཀའ་སྤྱད་ཅན་གྱི་ཨ་མ་ནི།།
ས་སྟེང་མི་ལུས་ཡིད་བཞིན་ནོར་བུའི་དཔལ།།
ཤ་ཞེན་བུ་ལ་གནང་སྦྱིན་མཆོག་ཏུ་བཟང་།།
ལ་རྒྱའི་དྲིན༵་གྱིས་སྐྱོང་བའི་རྣམ་པར་ཐར།།
ར་བ་གངས་རིས་བསྐོར་བའི་ཞིང་ཁམས་སུ།།
ཡ་མཚན་རྟོགས་པའི་ཡེ་ཤེས་རྒྱས་མཛད་མ།།
འ་འུར་མིན་པར་སྙིང་ནས་བཀའ་དྲིན་དྲན༵།།
ཟ་མའི་ཟས་མཆོག་གཅེས་པའི་བུ་ལ་གནང་།།
ཞྭ་བཞིན་གཙུག་ཏུ་བསྐུར་བའི་སྙིང་བརྩེ་ཅན།།
ཝ་ལེར་སེམས་ཀྱི་རང་གཤིས་འགྱུར་མེད་པ།།
ཛ་ཡའི་ཆོས་སྒོར་ཞུགས་པ་དྲིན༵་ལན༵་བཟོ༵ས།།
ཚ་གྲང་ཐེག་པའི་གོས་བཟང་རྒྱན་ཏུ་གསོལ།།
ཙ་རིའི་གནས་ལ་ཡིད༵་འོང༵ས་བྱམས༵་སེམས་ཅན།།
མ་གྱུར་འགྲོ་རྣམས་འདྲེན་པའི་ཐུགས་དམ་ལ།།
བ་བེའུའི་འཚོ་ལྟར་སྦྱིན་པའི་བདག་པོ་བྱས།།
ཕ་མཆོག་བླ་བརྒྱུད་དད་པའི་རྣལ་འབྱོར་མས།།
པ་ཏྲའི་བཀྲ་ཤིས་བརྩེ༵་བའི༵་སྙིང༵་རྗེ༵་དང་།།
ན་རཀ་བདེ་ལེགས་མཛད་པའི་ཕྱག་རྒྱ་ཆེས།།
ད་གདོད་རྫོགས་པ་ཆེན༵་པོ༵འི་བསྟན་པ་སྤེལ།།
ཐ་དག་སྡུག་ཀུན་བསལ་བའི་ལྷག༵་བསམ༵་དང་།།
ཏ་ཐཱ་ག་ཏཱའི་ལམ་བཟང་རྣམ༵་པར་དག༵།
ཉ་གང་ཟླ་བཞིན་ཨ་མའི་དགོངས་པར་སྒྲུབ།།
ཇ་བཟང་དཔལ་བཞིན་ལང་ཚོའི་དབང་ཐང་བརྟས།།
ཆ་ཅན་ཀུན་ཏུ་བཟང་པོའི་རང༵་འབྲས༵་ལ།།
ཅ་དག་བླ༵་ན་མེད༵་པའི་བརྩོན་འགྲུས་ཀུན།།
ང་རྒྱལ་མིན་པར་བྱང༵་ཆུབ༵་ལ༵་དམིགས༵་པ༵།།
ག་བུར་དབང་ལྟར་ཨ་མའི་དགོངས་པ་རྫོགས།།
ཁ་བ་གངས་ཅན་མེས་པོའི་ཡ་རབས་སྲོལ།།
ཀ་དག་གཉུག་མའི་འཁོར་འདས་མཛེས་པའི་རྩལ།།
ཨོ་རྒྱན་པདྨའི་རང་ལུགས་འཛིན་མཁས་པ།།
ཨེ་མ་ཧོ་ཞེས་ངེས་དོན་སངས་རྒྱས་ལེགས།།
ཨུ་དུམ་ཝཱ་ར་ལྟ་བུའི་མི་ལུས་དཔལ།།
ཨི་ཤོ་མ་ཏིའི་དགྱེས་པའི་འབེལ་གཏམ་རྒྱུན།།
རང་བྱུང་རྡོ་རྗེའི་ཀློང་ནས་ཤར་བ་རྣམས།།
མ་སྦས་སྙིང་གི་གྲོགས་ལ་ཤྲཱིས་གདམས།།
སྤྱི་ལོ་༢༠༡༩ ཟླ་༡ ཚེས་༢༩་ལ་དབྱིན་ཡུལ་ཛྙཱ་ན་གུ་རུའི་ལྷ་ཁང་དུ་བགྱིས་པར་དགེའོ།། །།

Leave a Reply

Your email address will not be published.