ཞབས་དཀར་ཚོགས་དྲུག་རང་གྲོལ་གྱིས་མཛད།

ཞབས་དཀར་ཚོགས་དྲུག་རང་གྲོལ་གྱིས་མཛད། 
ཨོཾ་མ་ཎི་པདྨེ་ཧཱུྃ་ཧྲཱིཿ འཕགས་པ་ཐུགས་རྗེ་ཆེན་པོ་དགོངས་སུ་གསོལ།། ཚེ་འདིར་དྲིན་གྱིས་བསྐྱངས་པའི་དྲིན་ཅན་ཕ། །འཇིག་རྟེན་ཕྱི་མའི་ཡུལ་དུ་སོང་བ་ལ། །གཡེལ་བ་མེད་པར་ཐུགས་རྗེའི་སྤྱན་གྱིས་གཟིགས། །ཨོཾ་མ་ཎི་པདྨེ་ཧཱུྃ་ཧྲཱིཿ ཤུལ་ནས་བུ་ཡིས་དཀོན་མཆོག་མཆོད་པ་དང་། །དགེ་འདུན་བསྙེན་བཀུར་ལ་སོགས་དགེ་བའི་ལས། །ཅི་བྱས་ཐམས་ཅད་མྱུར་དུ་རྗེས་འབྲངས་ནས། །ཕྱི་མའི་དུས་སུ་ཕན་ཐོགས་འབྱུང་བར་ཤོག། ཨོཾ་མ་ཎི་པདྨེ་ཧཱུྃ་ཧྲཱིཿ ཁྱིམ་ཚང་བཟའ་བའི་ཁ་རྒྱབ་གཉིས་ཀྱི་ཕྱིར། །ནམ་ཡང་ཡུལ་ནས་སྡོད་པའི་དུས་མི་འབྱུང་། །ཕྱོགས་བཅུར་འཁྱམས་ནས་ཟས་གོས་ནོར་རྣམས་བཙལ། །གང་མཁོ་ཁྱེར་ནས་འོང་བའི་དྲིན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ ཉིན་པར་འགྲོ་ཞིང་མཚན་མོ་ཉལ་ན་ཡང་། །བུ་དང་བུ་མོ་རྣམས་ཀྱི་ལྟོ་རྒྱབ་འདི། །ཇི་ལྟར་བྱས་ན་རྙེད་དམ་བསམ་བློ་བཏང་། །སེམས་ཁུར་མ་ལས་ཆེ་བའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿཟས་ནི་ངན་ངོན་གོས་ཧྲུལ་སློག་པ་གྱོན། །ཉིན་པར་ལྟོ་བཅགས་མཚན་མོའི་གཉིད་སྤངས་ནས། །ཞིང་ལས་སོ་ནམ་རེམ་པས་ཉིན་མཚན་འདས། །ཚེ་འདིར་སྐྱིད་པོ་མ་བྱུང་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿནོར་རྫས་བཙལ་ནས་མ་རྙེད་རྐུ་འཕྲོག་བྱས། །རྫུན་དང་གཡོ་སྒྱུས་ཕ་རོལ་གཞན་མགོ་སྐོར། །སྡིག་ལས་མང་པོ་ཞར་དང་ཞོར་ལ་བསགས། །ཕྱི་མར་ནམ་ཡང་མི་སྐྱིད་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ རྒྱུན་དུ་ཚོང་དང་བུན་བསྐྱེད་འཚོ་སྐྱོང་བྱེད། །བུ་ལ་བཟང་ཞིག་ཡོད་ན་བུ་སྐྱེས་སྙམ། །རབ་ཏུ་དགའ་བས་ཁོང་འཛུམ་མང་པོ་བྱེད། །ཁ་སྐྱེལ་མགོ་ལ་བྱུགས་པའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ བུ་ལ་ན་ཚ་ཅུང་ཟད་ཙམ་བྱུང་ཡང་། །དངངས་ནས་མོ་སྨན་རྩིས་པའི་དྲུང་དུ་རྒྱུག།ཁྱིམ་ན་ཡོད་པའི་ཟས་གོས་ཕལ་ཆེ་བ། །ཕངས་མེད་གླུད་དུ་གཏོང་བའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ བུ་དང་བུ་མོ་ཆེ་རུ་སོང་བ་ན། །བུ་མོར་གོས་རྒྱན་བཏགས་ནས་གནས་ལ་རྫོང། །བུ་ནི་ལ་ལར་ཆོས་བསླབས་རབ་བྱུང་བྱས། །ལ་ལར་ཆུང་མ་ལེན་པའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ སྡིག་སྡུག་གཏམ་ངན་ཐམས་ཅད་ཁྱད་དུ་བསད། །ཤ་ཐང་བསྐྱེད་ནས་འབད་པས་བཙལ་བ་ཡི། །ས་ཞིང་ཁང་པ་ནོར་རྫས་ཅི་ཡོད་པ། །ཐམས་ཅད་བུ་ལ་སྤྲོད་པའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ རང་ཉིད་ལག་པ་སྟོང་པར་གྱུར་ན་ཡང་། །བདག་གིས་ཐམས་ཅད་བུ་ལ་འཕྲོད་དོ་ཟེར། །ད་ནི་འཕྲོད་སར་འཕྲོད་ནི་ཡིན་ནོ་ཞེས། །སླར་ཡང་དགའ་དགའ་བྱེད་པའི་དྲིན་ཆེན་ཕ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ དེ་ལྟར་ཚེ་འདིར་བསྐྱངས་པའི་དྲིན་ཆེན་ཕས། །དོན་མེད་བཟའ་ཚང་ལྟོ་རྒྱབ་བསྒྲུབ་བསྒྲུབ་ནས། །དོན་ཆེན་དམ་ཆོས་བསྒྲུབ་པའི་ཁོམ་མ་བྱུང་། །ཚེ་འདིར་བསྐྱངས་པའི་བུ་དང་བུ་མོར་བྲལ། །ཨོཾ་མ་ཎི་པདྨེ་ཧཱུྃ་ཧྲཱིཿ འཇིག་རྟེན་ཕྱི་མར་སོང་བ་སྙིང་རེ་རྗེ། །སྤྱན་རས་གཟིགས་ཀྱིས་ལམ་སྣ་དྲང་དུ་གསོལ། །ཤུལ་ནས་བུ་ཡིས་ཅི་བྱས་དགེ་རྩ་རྣམས། །རྗེས་སུ་འབྲངས་ནས་ཕན་ཐོགས་འབྱུང་བར་ཤོག།ཨོཾ་མ་ཎི་པདྨེ་ཧཱུྃ་ཧྲཱིཿ ཞེས་པ་དྲིན་ཅན་གྱི་ཕ་ཤི་བའི་དགེ་རྩའི་སྟེང་ནས་བསྐུལ་ཆོག་པ་འདི་ཡང་ཞབས་ཀར་ཚོགས་དྲུག་རང་གྲོལ་གྱིས་སྨྲས་པའོ། །དགེའོ། །ཕ་ཁྱོད་འདི་ནས་ལུས་སེམས་བྲལ་བའི་ཚེ། །མགོན་པོ་འོད་དཔག་མེད་ཀྱིས་ལམ་སྣ་དྲོངས། །ཞིང་མཆོག་བདེ་བ་ཅན་དུ་སྐྱེ་བར་ཤོག། ཨོཾ་མ་ཎི་པདྨེ་ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ་ཧྲཱིཿཨོཾ་མ་ཎི་པདྨེ་ཧཱུྃ་ཧྲཱིཿ