གཅེས་ཕྲུག་དཔལ་ལྡན་རྣལ་འབྱོར་མ་རྒྱལ་ལོ།།

གཅེས་ཕྲུག་དཔལ་ལྡན་རྣལ་འབྱོར་མ་རྒྱལ་ལོ།།
ཨེ་མ་ཧོ།།
དབྱིངས་ཀ་དག་ངང་ལས་འོད་གསལ་དུ་ཤར་བ།།
ལས་སྨོན་ལམ་དཀར་པོས་བར་ཐག་ཏུ་འབྲེལ་བའི།།
སེམས་བརྩེ་དུང་ཅན་གྱི་རྣལ་འབྱོར་མའི་རང་གཤིས།།
གཞི་གཉུག་མའི་གནད་ལ་འཕོ་འགྱུར་ཅིག་མི་འདུག།
གདངས་སྙན་པོས་དབྱངས་ཀྱིས་ཨ་དཔལ་ཞེས་འོས་ཚེ།།
སྙིང་རུས་པའི་གཏིང་ནས་དམ་ཚིག་ཏུ་བཟུང་ནས།།
ཚེ་འདི་ཕྱིའི་ལམ་སྟོན་ཅི་ནུས་རེ་བཤད་པ།།
ཡིད་དགའ་དུང་བཅས་ཏེ་བརྗེད་མེད་དུ་བཟུང་འདུག།
མ་མཁའ་འགྲོ་བཏགས་ནས་ཁྱབ་བསྒྲགས་རེ་མེད་ཀྱང་།།
ལུས་སྒྱུ་རྩལ་ངོམས་ནས་འཛམ་གླིང་ལ་ཁྱབ་སོང་།།
ཕ་བླ་མའི་གཅེས་ཕྲུག་ངོ་སོ་རེ་བསྟོད་ཚེ།།
མ་བྱམས་བརྩེ་ཚོགས་པས་དགུང་འཚོགས་ཀྱང་བསྡུས་སོང་།།
དབྱར་དྲུག་གཞུང་མེ་ཏོག་ཐང་ཆེན་ལ་བརྡལ་ཀྱང་།།
གཟུགས་ལང་ཚོས་རྒྱན་པའི་རྣལ་འབྱོར་མའི་ཟློས་གར།།
ཕྱི་སྣོད་བཅུད་ཀུན་གྱིས་འགྲན་ཟླ་ཙམ་མི་འདུག།
མིག་ཟུམ་པ་མེད་པར་ཁྱེད་ཞལ་ལ་འཁོར་སོང་།།
སྤྱིའི་རྒྱལ་ཡོངས་ཀུན་ལ་རླུང་ལྟར་རུ་གྲགས་ཚེ།།
ངའི་སྐྱིད་པའི་རྨི་ལམ་སད་ཐབས་ལ་མ་འབད།།
ཆོས་ཟབ་རྒྱས་སྙིང་པོ་ཡོ་ག་ལ་བརྩོན་ནས།།
མ་འགྲོ་དྲུག་འདྲེན་པའི་རྣལ་འབྱོར་མ་བྱུང་བར།།
ཨ་ཕ་རྒན་བགྲེས་པོ་འཆི་སེམས་ཞིག་བདེ་སོང་།།
དཔལ་གཟེངས་རྟགས་ཐོབ་པ་ལུས་སྦྱོང་གི་གྲུབ་འབྲས།།
བཟང་དགྱེས་དགུའི་ཕྱུག་པ་དག་སྣང་གི་དམ་ཚིག།
ཐུགས་རྡོ་རྗེ་ཆོས་བདུན་ངོ་བོ་རུ་བཞུགས་པས།།
ངེད་ཕ་བུ་ནམ་ཡང་འབྲལ་བ་རུང་མེད་དོ།།
ཞེས་པ་འདི་ཡང་རབ་གནས་ས་ཕག་སྣྲོན་ཟླའི་ཡར་ངོའི་ཚེས་པ་བཅུའི་ཉིན་ལ་བླ་མ་ལྷ་རུ་མཇལ་བའི་ཡེ་ཤེས་ཆོས་སྒྲོན་དང་མཁའ་འགྲོ་རིག་འཛིན་དབྱངས་ཅན་ལྷ་མོས་ངོར་ཤྲཱིཿསྨྱོན་ཨེ་མ་ཧོས་ཉམས་འུར་གླུ་རུ་བླངས་པར་དགེའོ།། །།