༧གྲུབ་དབང་གཙང་བ་རིག་མཆོག་སྤྲུལ་སྐུ་ལ་བསྔགས་པ་རང་བཞིན་བརྗོད་པའི་མེ་ལོང་།།
ན་མོ་གུ་རུ་བིརྱ་དྷཱ་ར་ཡེ།།
མགོན་ཀུན་ཏུ་བཟང་དང་དབྱེར་མ་མཆིས།།
དཔལ་དགའ་རབ་རྡོ་རྗེའི་དངོས་སློབ་མཆོག།།
རྒྱའི་ཤྲཱིཿསེངྷའི་རྣམ་སྤྲུལ་གར།།
གཙང་གྲུབ་ཆེན་རིག་མཆོག་རིན་པོ་ཆེ།།
དཔལ་འཛུམ་དྲུག་བཀྲ་བའི་སྟག་ཤར་ཅིག།
རྩལ་སྒྱུ་འཕྲུལ་མངའ་བའི་གངས་སེང་ཞིག།
སེ་དབྲ་ཁྱུང་རྒྱུད་པའི་སྔགས་འཆང་ལ།།
སྙན་འབྲུག་སྒྲ་བཞིན་དུ་ཀུན་ལ་གྲགས།།
གདུང་རྒྱུད་པ་གསེར་གྱི་ཅོད་པན་འཛིན།།
ཕ་རུས་པ་དཀར་པོའི་ཕན་བདེ་སྐྱོང་།།
ཆོས་མདོ་སྔགས་ལུང་རྟོགས་བསྟན་པ་སྤེལ།།
གླིང་ཀུན་ལ་ཕྲིན་ལས་ཀུན་ཁྱབ་ཤོག།
ཕྱི་བྱང་ཆུབ་སེམས་དཔའི་མཛད་པ་ལ།།
ནང་རྟོགས་གྲོལ་རིག་པའི་གདེངས་ཚོད་ལྡན།།
དོན་གསང་བ་སྣང་སྲིད་འཁོར་འདས་མཁྱེན།།
རྗེ་རིག་འཛིན་རིག་མཆོག་རྣམ་པར་རྒྱལ།།
སྐུ་མཚན་དཔེ་གཟི་འོད་ལམ་སེ་ལམས།།
གསུང་དམ་ཆོས་སྒྲ་སྙན་ལྷང་སེ་ལྷངས།།
ཐུགས་ཡེ་ཤེས་རྡོ་རྗེ་ཀུན་ཁྱབ་དཔལ།།
དུས་ནམ་ཡང་འགྲོ་བའི་དོན་ལ་དགོངས།།
ཞེས་པ་འདི་ཡང་རབ་གནས་ས་ཕག་ཐ་སྐར་ཟླ་བའི་དབང་ཕྱོགས་རྒྱལ་བ་དང་པོར་ཨེ་ཝཾ་རྫོགས་ཆེན་དུས་འཁོར་འོད་གསལ་ཆོས་གླིང་ནས་ཤྲཱིཿཨེ་མ་ཧོས་ཐོལ་བྱུང་དུ་སྨྲས་པར་དགེའོ།། །།