ཨ་མའི་ལྟ་སྒོམ་སྤྱོད་པ་ཉི་ཟླ་སྐར་མའི་འོད་གསལ།།
ཨེ་མ་ཧོ།།
ཀ་དག་ཆོས་དབྱིངས་དགོངས་པ་ཀུན་བཟང་མོ།།
ཞིང་སྣང་ལྷུན་གྲུབ་འོད་གསལ་བདེ་ཆེན་གནས།།
ཟུང་འཇུག་སྣང་སྲིད་རྣམ་དག་རང་དབང་བསྒྱུར།།
ཨོ་རྒྱན་སྒྲོལ་མའི་ཞབས་ལ་གསོལ་བ་འདེབས།།
ཆོས་ཀུན་མཉམ་ཉིད་དག་པར་བྱིན་གྱིས་རློབས།།
རང་སྣང་སྐུ་གསུམ་རྫོགས་པའི་དངོས་གྲུབ་སྩོལ།།
ཀུན་བཟང་གདོད་མའི་རང་བཞིན་སྨིན་གྲོལ་ནས།།
ཁམས་གསུམ་འཁོར་བ་དོང་ནས་སྤྲུགས་ནུས་ཤོག།
བསམ་ཡས་མཆིམས་ཕུ་གངས་རི་ཐོད་དཀར་སོགས།།
འཕགས་བོད་དབེན་གནས་སྒྲུབ་པའི་རྒྱལ་མཚན་བསྒྲེངས།།
དོན་གཉིས་ལྷུན་གྲུབ་ཚེ་འདིར་སངས་རྒྱས་མ།།
ཨོ་རྒྱན་སྒྲོལ་མའི་ཞབས་ལ་གསོལ་བ་འདེབས།།
འཁོར་འདས་ཆོས་སྐུར་རྟོགས་པར་བྱིན་གྱིས་རློབས།།
ཨ་མའི་རྣལ་འབྱོར།
ཨཱཿ
དབྱིངས་སྣང་འོད་གསལ་ལྷུན་གྲུབ་རིག་པའི་རྩལ།།
འཇའ་ཟེར་ཐིག་ལེའི་ཀློང་ན་རྗེ་བཙུན་མ།།
སེར་གསལ་མཛེས་མཛུམ་སྐྱབས་སྦྱིན་ཕྱག་རྒྱ་ཅན།།
བྱིན་རླབས་མཆོག་སྟེར་སྐྱབས་ཀུན་ངོ་བོར་གསལ།།
ཡེ་ཤེས་སྐུ་ཅན་གདོད་མའི་ཀུན་བཟང་མོར།།
གུས་པས་ཕྱག་འཚལ་མཆོད་འབུལ་སྐྱབས་སུ་མཆི།།
ཚེ་རབས་ཕྲེང་བར་འབྲལ་མེད་རྗེས་བཟུང་ནས།།
བསྟན་འགྲོའི་དོན་ཀུན་བདེ་མྱུར་ལྷུན་གྲུབ་མཛོད།།
ཨོཾ་ཨོ་ཌཱི་ཡ་ཏཱ་ར་སིདྡྷི་ཧཱུཾ།། ཅི་ནུས་མཐར།
ཏཱ་ར་དགྱེས་པས་འོད་ཞུ་རང་ལ་ཐིམ།།
ཡེ་ཤེས་ཨ་མའི་རྩལ་དབང་སེམས་ལ་རྫོགས།།
རང་རིག་ཆོས་ཟད་དགོངས་པ་ཨ་མའི་ཐུགས།།
ཆོས་ཀུན་མཉམ་ཉིད་ཀློང་དུ་ཨེ་མ་ཧོ།།
ཞེས་པའི་དོན་ལ་ཅི་ནུས་སུ་མཉམ་པར་བཞག་ནས་རྒྱུན་གྱི་སྤྱོད་ལ་ཇི་བདེར་འཇུག་གོ། ཞེས་པའང་རབ་གནས་ས་ཁྱིའི་རྒྱལ་ཟླའི་དབང་ཕྱོགས་རྒྱལ་བ་གཉིས་པར་། ཆུང་ནས་དད་གུས་དམ་ཚིག་ལ་འགྱུར་བ་མེད་པའི་ཨ་ནེ་དཔལ་ལྡན་ཆོས་སྒྲོན་དང་། རིག་འཛིན་ནམ་མཁའ་རྒྱ་མཚོ་དང་། སྲས་མོ་ཨརྱ་ཏཱ་ར་སོགས་ཀྱིས་ངོར་ཨེ་ཝཾ་ཛྙཱ་ན་གུ་རུའི་ལྷ་ཁང་དུ། ཨ་མའི་ཐུགས་དམ་ཟག་མེད་བདུད་རྩིས་བྱིན་རླབས་སྩལ་བཞིན་པའི་སྐབས་སུ། ཨ་མའི་ཉེ་གནས་པ་ཤྲཱིཿཨེ་མ་ཧོས་དད་གུས་དགོངས་རྒྱུད་བསྐུལ་ཕྱིར་བྱམས་བརྩེའི་དག་སྣང་མིག་ཆུའི་རྒྱ་མཚོ་ཆེན་པོའི་ཀློང་ནས་ཕུལ་བར་དགེའོ།། །།