བཛྲ་གུ་རུའི་ཕན་ཡོན་བཞུགས།
༅། །ན་མོ་གུ་རུ་པདྨ། སློབ་དཔོན་ཆེན་པོ་ཡབ་ཡུམ་ལ། །གསོལ་བ་འདེབས་སོ་བྱིན་གྱིས་རློབས། །བཛྲ་གུ་རུ་འདོན་མཁན་ལ། །བཛྲ་གུ་རུའི་ཕན་ཡོན་བརྗོད། །སྔོན་དུས་དཔལ་གྱི་བསམ་ཡས་སུ། །བུད་མེད་ཡེ་ཤེས་མཚོ་རྒྱལ་གྱིས། །ཕྱི་ནང་གསང་པའི་མཎྜལ་མཆོག །ཨོ་རྒྱན་རྗེ་ལ་ཕུལ་ནས་སུ། །གུས་པས་ཕྱག་འཚལ་འདི་སྐད་གསོལ། །མ་འོངས་སེམས་ཅན་བློ་སྣ་མང་། །དམུ་རྒོད་ཆོས་ལ་ལོག་ལྟ་ཆེ། །ཁྱད་པར་གསང་སྔགས་ཟབ་མོ་ལ། །ལོག་ལྟ་བྱེད་མཁན་མང་དུ་འབྱུང་། །དེ་དུས་ནད་མཚོན་མུག་གསུམ་གྱིས། །བོད་ཁམས་སྡུག་ལ་གཏད་པའི་དུས། །ཕན་པའི་རིམ་གྲོ་མང་ཡོད་ཀྱང་། །སྒྲུབ་ལོང་མེད་ཅིང་བར་ཆད་ཆེ། །རྫས་དང་ཡོ་བྱད་མི་ཚང་ཞིང་། །དུས་ངན་སེམས་ཅན་ཁ་མི་འཆམ། །དེ་དུས་གུ་རུ་ཉིད་སྒྲུབ་པའི། །ཕན་ཡོན་ཐམས་ཅད་གསུང་དུ་གསོལ། །སློབ་དཔོན་ཆེན་པོའི་ཞལ་ནས་ཀྱང་། །དད་ལྡན་བུ་མོ་ཁྱོད་བདེན་ནོ། །མ་འོངས་དེ་འདྲའི་དུས་ཚོད་ལ། །ཕན་པའི་གཏེར་ཁ་མང་སྦས་ཀྱང་། །སེམས་ཅན་བསོད་ནམས་ཟད་སྟབས་ཀྱིས། །རྟེན་འབྲེལ་འགྲིགས་པ་ཤིན་ཏུ་དཀའ། །འོན་ཀྱང་དེ་འདྲའི་དུས་ཚོད་ལ། །སྙིང་བོ་བཛྲ་གུ་རུ་འདི། །གནས་ཆེན་དང་ནི་དགོན་ཆེན་དང་། །རི་ཆེན་རྩེའམ་ཆུ་ཆེན་འགྲམ། །ལྷ་འདྲེའི་ཆོ་འཕྲུལ་ཆེ་ས་རུ། །སྔགས་པ་དམ་ཚིག་ལྡན་པ་དང་། །དགེ་འདུན་ཚུལ་ཁྲིམས་ལྡན་པ་དང་། །སྐྱེ་བོ་དད་པ་ལྡན་པ་དང་། །བུད་མེད་མཚན་ལྡན་ཐམས་ཅད་ཀྱིས། །སེམས་བསྐྱེད་བསམ་པ་བཟང་པོ་ཡིས། །བརྒྱ་སྟོང་ཁྲི་འབུམ་བྱེ་བ་སོགས། །
བཏོན་པའི་ཕན་ཡོན་བསམ་མི་ཁྱབ། །ནད་དང་གདོན་དང་མཚོན་འཁྲུག་དང་། །ལོ་ཉེས་མུ་གེ་ཆོ་འཕྲུལ་ཞི། །ཆར་ཆུ་དུས་འབེབ་ཡུལ་ཕྱོགས་སུ། །བཀྲ་ཤིས་དགེ་ལེགས་འབྱུང་བར་འགྱུར། །འདི་དང་ཕྱི་མ་བར་དོ་རུ། །རབ་དངོས་འབྲིང་ཉམས་རྨི་ལམ་དུ། །ཨོ་རྒྱན་ཆེན་པོའི་ཞལ་མཐོང་ནས། །གསུང་དབྱངས་ཟབ་མོ་ཐོས་པར་འགྱུར། །ཕྱི་མར་རྔ་ཡབ་དཔལ་རི་རུ། །རིག་འཛིན་ཕོ་མོའི་ཚོགས་གྲལ་དུ། །ཆུད་ནས་གསང་སྔགས་ཉམས་བླངས་ཏེ། །ས་ལམ་རིམ་རྫོགས་སངས་རྒྱས་འགྱུར། །སྙིང་པོ་བཛྲ་གུ་རུ་འདི། །བརྒྱ་རེ་བཟླས་པ་མ་ཆག་ན། །གཞན་གྱི་ཡིད་དུ་འོང་བ་དང་། །ཟས་ནོར་ལོངས་སྤྱོད་འབད་མེད་འབྱུང་། །སྟོང་དང་ཁྲི་སོགས་བཟླས་བྱས་ན། །གཞན་སྣང་ཟིལ་གྱིས་གནོན་པ་དང་། །བྱིན་རླབས་ནུས་པ་ཐོགས་པ་མེད། །
འབུམ་དང་བྱེ་བ་སོགས་བཟླས་ན། །ཁམས་གསུམ་དབང་དུ་བསྡུ་བ་དང་། །སྲིད་གསུམ་ཟིལ་གྱིས་གནོན་པ་དང་། །ལྷ་འདྲེ་མ་ལུས་བྲན་དུ་འཁོལ། །འཕྲིན་ལས་རྣམ་བཞི་ཐོགས་མེད་འགྲུབ། །རང་གི་ཡིད་ལ་གང་བསམ་བཞིན། །སེམས་ཅན་འགྲོ་དོན་དཔག་མེད་འབྱུང་། །བྱེ་བ་གསུམ་མམ་བདུན་བཟླས་ན། །སངས་རྒྱས་རྣམས་དང་འབྲལ་མེད་ཅིང་། །ཨོ་རྒྱན་རྗེ་དང་དབྱེར་མེད་པར། །ལྷ་སྲིན་སྡེ་བརྒྱད་བྲན་དུ་འཁོལ། །ཅི་བཅོལ་ལས་རྣམས་ཐམས་ཅད་གྲུབ། །རབ་རྣམས་ཚེ་འདིར་འཇའ་ལུས་འགྲུབ། །འབྲིང་གིས་འཆི་བ་འོད་གསལ་ཟིན། །ཐ་མ་སྲིད་པ་བར་དོར་གྲོལ། །གཞན་ཡང་བཛྲ་གུ་རུ་ལ། །ཐེག་པ་རིམ་དགུ་རྒྱུད་སྡེ་བཞི། །ཆོས་ཕུང་བརྒྱད་ཁྲི་བཞི་སྟོང་དང་། །བླ་མ་ཡི་དམ་མཁའ་འགྲོ་དང་། །ཆོས་སྐྱོང་སྲུང་མ་གཏེར་བདག་བཅས། །སྲོག་སྙིང་མ་ལུས་འདི་ལ་ཚང་། །ཨོཾ་ཨཱཿཧཱུྃ་ནི་སྐུ་གསུང་ཐུགས། །བཛྲ་རྡོ་རྗེ་རིགས་ཀྱི་སྲོག །གུ་རུ་རིན་ཆེན་རིགས་ཀྱི་སྲོག །པདྨ་པདྨ་རིགས་ཀྱི་སྲོག །སིདྡྷི་ལས་ཀྱི་རིགས་ཀྱི་སྲོག །
ཧཱུྃ་ནི་བདེ་གཤེགས་རིགས་ཀྱི་སྲོག །ཨོཾ་ནི་རིགས་ལྔ་ལོངས་སྤྱོད་རྫོགས། །ཨཱཿནི་ཆོས་སྐུ་མི་འགྱུར་བ། །ཧཱུྃ་ནི་སྤྲུལ་སྐུ་གུ་རུ་དྲུག །བཛྲ་ཁྲག་འཐུང་ལྷ་ཚོགས་རྫོགས། །གུ་རུ་རིག་འཛིན་ལྷ་ཚོགས་རྫོགས། །པདྨ་མཁའ་འགྲོ་ཤུགས་འགྲོ་རྫོགས། །སིདྡྷི་ནོར་ལྷ་གཏེར་བདག་རྫོགས། །ཧཱུྃ་ལ་ཆོས་སྐྱོང་ཐམས་ཅད་རྫོགས། །ཨོཾ་ཨཱཿཧཱུྃ་ནི་རྒྱུད་སྡེ་གསུམ། །བཛྲ་འདུལ་བ་མདོ་སྡེ་གཉིས། །གུ་རུ་མངོན་པ་ཀྲི་ཡ་གཉིས། །པདྨ་ཨུ་པ་ཡོ་ག་གཉིས། །སིདྡྷི་ཨ་ནུ་ཨ་ཏི་གཉིས། །ཧཱུྃ་ནི་རྫོགས་པ་ཆེན་པོའོ། །ཨོཾ་ཨཱཿཧཱུྃ་གིས་དུག་གསུམ་ལས། །གྱུར་པའི་སྡིག་སྒྲིབ་མ་ལུས་འདག །བཛྲ་ཞེ་སྡང་སྒྲིབ་པ་འདག །གུ་རུས་ང་རྒྱལ་ལས་གྱུར་འདག །པདྨས་འདོད་ཆགས་ལས་གྱུར་འདག །སིདྡྷིས་ཕྲག་དོག་ལས་གྱུར་འདག །ཧཱུྃ་གིས་ཤེས་བྱའི་སྒྲིབ་པ་འདག །ཨོཾ་ཨཱ་ཧཱུྃ་གིས་སྐུ་གསུམ་འཐོབ། །བཛྲས་མེ་ལོང་ཡེ་ཤེས་ཐོབ། །གུ་རུས་མཉམ་ཉིད་ཡེ་ཤེས་ཐོབ། །པདྨས་སོར་རྟོག་ཡེ་ཤེས་ཐོབ། །སིདྡྷིས་བྱ་གྲུབ་ཡེ་ཤེས་ཐོབ། །ཧཱུྃ་གིས་ཡེ་ཤེས་ལྔ་པོ་ཐོབ། །
ཨོཾ་ཨཱཿཧཱུྃ་གིས་ལྷ་དང་འདྲེ། །མི་རྣམས་མ་ལུས་འདུལ་བར་འགྱུར། །བཛྲས་དྲི་ཟ་མེ་ལྷ་འདུལ། །གུ་རུས་གཤིན་རྗེ་སྲིན་པོ་འདུལ། །པདྨས་ཆུ་ལྷ་རླུང་ལྷ་འདུལ། །སིདྡྷིས་གནོད་སྦྱིན་དབང་ལྡན་འདུལ། །ཧཱུྃ་གིས་གཟའ་དང་ས་བདག་འདུལ། །ཨོཾ་ཨཱཿཧཱུྃ་གིས་ཕྱིན་དྲུག་འགྲུབ། །བཛྲས་ཞི་བའི་ལས་རྣམས་འགྲུབ། །གུ་རུས་རྒྱས་པའི་ལས་རྣམས་འགྲུབ། །པདྨས་དབང་གི་ལས་རྣམས་འགྲུབ། །སིདྡྷིས་འཕྲིན་ལས་མ་ལུས་འགྲུབ། །ཧཱུྃ་གིས་དྲག་པོའི་ལས་རྣམས་འགྲུབ། །ཨོཾ་ཨཱཿཧཱུྃ་གིས་བན་བོན་གྱི། །བྱད་ཁ་ཕུར་ཁ་བཟློག་པར་འགྱུར། །བཛྲས་ཡེ་ཤེས་བྱད་ཁ་བཟློག །གུ་རུས་སྡེ་བརྒྱད་བྱད་ཁ་བཟློག །པདྨས་འཇིག་རྟེན་ལྷ་འདྲེ་བཟློག །སིདྡྷིས་ཀླུ་དང་ས་བདག་བཟློག །ཧཱུྃ་གིས་བྱད་ཁ་མ་ལུས་བཟློག །ཨོཾ་ཨཱཿཧཱུྃ་གིས་དུག་གསུམ་འཇོམས། །བཛྲ་ཞེ་སྡང་ལས་གྱུར་འཇོམས། །གུ་རུས་ང་རྒྱལ་ལས་གྱུར་འཇོམས། །པདྨས་འདོད་ཆགས་ལས་གྱུར་འཇོམས། །སིདྡྷིས་ཕྲག་དོག་ལས་གྱུར་འཇོམས། །ཧཱུྃ་གིས་ཉོན་མོངས་བརྒྱད་ཁྲི་འཇོམས། །ཨོཾ་ཨཱཿཧཱུྃ་གིས་སྐུ་དང་གསུང་། །ཐུགས་ཀྱི་དངོས་གྲུབ་ཐོབ་པར་འགྱུར། །བཛྲས་ཞི་ཁྲོའི་དངོས་གྲུབ་ཐོབ། །གུ་རུས་རིག་འཛིན་བླ་མེད་ཐོབ། །པདྨས་མཁའ་འགྲོ་མཁའ་སྤྱོད་ཐོབ། །སིདྡྷིས་མཆོག་ཐུན་དངོས་གྲུབ་ཐོབ། །ཧཱུྃ་གིས་ཅི་བསམ་དངོས་གྲུབ་ཐོབ། །ཨོཾ་ཨཱཿཧཱུྃ་གིས་གདོད་མ་ཡི། །ཞིང་ཁམས་མཆོག་ཏུ་འཕོ་བར་འགྱུར། །བཛྲས་མངོན་དགའི་ཞིང་དུ་འཕོ། །གུ་རུས་དཔལ་ལྡན་ཞིང་དུ་འཕོ། །པདྨས་བདེ་ཆེན་ཞིང་དུ་འཕོ། །སིདྡྷིས་ལས་རབ་རྫོགས་ཞིང་འཕོ། །ཧཱུྃ་གིས་འོག་མིན་ཞིང་དུ་འཕོ། །ཨོཾ་ཨཱཿཧཱུྃ་གིས་སྐུ་གསུམ་གྱི། །རིག་འཛིན་མཆོག་ནི་ཐོབ་པར་འགྱུར། །བཛྲས་སར་གནས་རིག་འཛིན་ཐོབ། །གུ་རུས་ཚེ་དབང་རིག་འཛིན་ཐོབ། །པདྨས་ཕྱག་རྒྱའི་རིག་འཛིན་ཐོབ། །སིདྡྷིས་ལྷུན་གྲུབ་རིག་འཛིན་ཐོབ། །ཧཱུྃ་གིས་རྣམ་སྨིན་རིག་འཛིན་ཐོབ། །དེ་ཕྱིར་བཛྲ་གུ་རུ་ལ། །མ་འདུས་པ་ནི་གཅིག་ཀྱང་མེད། །བཛྲ་གུ་རུ་གཅིག་བརྗོད་པའི། །ཕན་ཡོན་དེ་ལ་གཟུགས་ཡོད་ན། །འཛམ་གླིང་འདི་ཡང་སྣོད་དུ་ཆུང་། །བཛྲ་གུ་རུ་དབྱངས་བྱས་ཏེ། །བཏོན་པའི་སྒྲ་ཐོས་སེམས་ཅན་ནི། །བྱ་བྱིའུ་འབུ་སྲིན་ཡན་ཆད་ཀྱང་། །རིག་འཛིན་ཞིང་དུ་སྐྱེ་བར་འགྱུར། །གལ་ཏེ་འདོན་པར་མ་ནུས་ན། །དར་ལྕོག་བྱས་ཏེ་རླུང་ལ་ཕྱོར། །རླུང་གིས་ཕོག་ཚད་གྲོལ་བར་འགྱུར། །ཡང་ན་ཤིང་དང་རྡོ་ལེབ་ལ། །བྲིས་ཏེ་སྒོ་ཡི་སྟེང་རྣམས་དང་། །ཀུན་གྱིས་མཐོང་བར་བཞག་གྱུར་ན། །ནད་གདོན་སྡིག་སྒྲིབ་འདག་པ་དང་། །ལྷ་སྲིན་འདྲེ་རྒོད་འབྱུང་པོ་ཡི། །རྒྱུ་ལམ་ཆད་ཅིང་གནོད་འཚེ་ཞི། །མཐིང་ཤོག་དག་ལ་གསེར་གྱིས་བྲིས། །རབ་གནས་བྱས་ཏེ་སྐེ་ལ་འདོགས། །ནད་དང་བགེགས་ཀྱིས་མི་ཚུགས་ཤིང་། །འཆི་དུས་རོ་དང་ལྷན་དུ་ནི། །བསྲེགས་ན་རབ་ལ་འཇའ་འོད་འཁྱུག །ཐ་མའང་བདེ་ཆེན་ཞིང་དུ་འཕོ། །བསླུ་མེད་བཛྲ་གུ་རུ་ཡི། །ཕན་ཡོན་ཇི་ལྟར་གསུངས་པ་བཞིན། །མྱུར་དུ་འགྲུབ་པར་མ་གྱུར་ན། །པདྨ་ང་ཡིས་སེམས་ཅན་རྣམས། །བསླུས་པ་ཡིན་ཞེས་ཞལ་བཞེས་མཛད། །དེས་ན་བསླུ་མེད་པད་འབྱུང་གི། །སྙིང་པོ་འབྲི་འདོན་ཀློག་གསུམ་མཛོད། །ཡོན་ཏན་ཚད་འདས་བསྒྲང་མི་ནུས། །འདི་ནི་ཞོ་འོང་ལ་དཔྱིས་དང་། །གླིང་རྒྱ་བྱང་ཆུབ་སེང་གེ་གཤོང་། །ཨ་བར་སོགས་ཀྱི་དད་ལྡན་གྱི། །ཕོ་མོ་ཕན་སེམས་ཅན་རྣམས་ལ། །ཀརྨ་གླིང་པའི་གཏེར་བྱོན་ལྟར། །ཆོས་དབྱིངས་སྟོབས་ལྡན་རྡོ་རྗེས་སྦྱར། །དགེ་འདིས་སློབ་དཔོན་ཆེན་པོ་ལ། །གསོལ་བ་འདེབས་ཤིང་སྐྱབས་འཚོལ་མཁན། །ཕོ་མོ་ཆེ་ཆུང་སུ་ཡིན་ཀྱང་། །བདག་དང་ལྷན་ཅིག་མཁའ་སྤྱོད་ཀྱི། །ཞིང་དུ་སྐྱེས་ནས་པད་འབྱུང་གི། །སྲས་ཀྱི་ཐུ་བོར་འགྱུར་བར་ཤོག །
ཞེས་པའི་འདི་ནི་ཆོས་དབྱིངས་རང་གྲོལ་དང་རིན་ཆེན་ལས་གྲུབ་གཉིས་ཀྱིས་བསྐུལ་ངོར་རྫོགས་ཆེན་པ་ཆོས་དབྱིངས་སྟོབས་ལྡན་རྡོ་རྗེས་སྦྱར་པའོ། །
སྤྲུལ་སྐུ་ཀརྨ་གླིང་པའི་གཏེར་བྱོན་བཛྲ་གུ་རུའི་ཕན་ཡོན་དང་འབྲུ་འགྲེལ་བཞུགས་སོ།།
༄༅། །ཨ༔ ནཛ་ཤམཐ།།ཞམ༔རྒ།རྨ༔ བཛྲ་གུ་རུ་དེ་ཝ་ཌཱཀྐི་ནི་ཧཱུྃ༔ བླ་མ་ཡི་དམ་མཁའ་འགྲོ་གསུམ་ལ་ཕྱག་འཚལ་ལོ༔ བདག་སྐྱེ་དམན་ཡེ་ཤེས་མཚོ་རྒྱལ་གྱིས༔ ཕྱི་ནང་གསང་བའི་མཎྜལ་རྒྱ་ཆེན་པོ་ཕུལ་ནས་ཞུས་པ༔ ཀྱཻ༔ སློབ་དཔོན་པདྨ་འབྱུང་གནས་ལགས༔ བདག་ཅག་བོད་ཀྱི་སེམས་ཅན་ཐམས་ཅད་ལ༔ ཚེ་འདི་དང་ཕྱི་མའི་དོན་རྒྱ་ཆེན་པོ་མཛད་པ་ཤིན་ཏུ་བཀའ་དྲིན་ཉིད་ལས་ཆེ་བ་སྔར་ཡང་མ་བྱོན༔ ཕྱིས་ཀྱང་མི་འབྱོན་པས༔ ཉིད་ཀྱི་སྒྲུབ་པ་ཉིང་ཁུ་ལྟ་བུ་གནང་བ་ཡིས༔ བདག་སྐྱེ་དམན་ཡིན་ཀྱང་ཐེ་ཚོམ་མེད་དེ༔ མ་འོངས་པའི་སེམས་ཅན་བློ་སྣ་མང་ཞིང་དམུ་རྒོད་ཆེ་བ༔ དམ་པའི་ཆོས་ལ་ལོག་པར་ལྟ་ཞིང་༔ ཁྱད་པར་གསང་སྔགས་བླ་མེད་ཀྱི་ཆོས་ལ་སྐུར་འདེབས་བྱེད་དུ་འོང་བས༔ དེ་དུས་སེམས་ཅན་ཐམས་ཅད་ལ་ནད་མུག་མཚོན་གསུམ་དར་ཁྱད་པར་དུ་རྒྱ་བོད་ཧོར་གསུམ་གྲོག་མའི་ཚང་བཤིགས་པ་འདྲ་བ་བོད་འབངས་སྡུག་པའི་དུས་ལ་བབས༔ དེ་རྣམས་བཅོས་པའི་ཐབས་མང་དུ་གསུང་ཤིང་༔ མ་འོངས་པའི་གང་ཟག་རྣམས་སྒྲུབ་ལོང་མེད་པ༔ ཅུང་ཟད་རེ་སྒྲུབ་འདོད་པ་རྣམས་ཀྱང་༔ བར་ཆད་དབང་ཆེ་བ་འོང་༔ སེམས་ཅན་ཁ་མི་འཆམས༔ རྫས་དང་སྤྱོད་པ་མི་གཙང་༔ དུས་ངན་དེ་འདྲ་ཤིན་ཏུ་བཟློག་པར་དཀའ༔ དེ་འདྲའི་དུས་སུ་གུ་རུ་ཉིད་ཀྱི་སྒྲུབ་ཐབས་བཛྲ་གུ་རུ་ཁོ་ན་ལ་བརྟེན་ན་ཕན་ཡོན་ཅི་ལྟ་བུ་ལགས༔ མ་འོངས་པའི་བློ་དམན་རྣམས་ཀྱི་དོན་དུ་གསུང་བར་ཞུ་ཞེས་ཞུས་སོ༔ དེ་ནས་སློབ་དཔོན་ཆེན་པོས་བཀའ་སྩལ་པ༔ འོ་དད་ལྡན་བུ་མོ་ཁྱོད་ཀྱིས་ཞུས་པ་དེ་ཤིན་ཏུ་བདེན་ནོ༔ མ་འོངས་དེ་འདྲའི་དུས་ཚོད་ལ༔ སེམས་ཅན་ལ་གནས་སྐབས་དང་མཐར་ཐུག་ལ་ཕན་ཐོགས་ངེས་པ་ཡིན༔ མན་ངག་སྒྲུབ་ཐབས་དཔག་ཏུ་མེད་པ་ས་གཏེར་ཆུ་གཏེར་བྲག་གཏེར་ནམ་མཁའི་གཏེར་ལ་སོགས་པ་མང་དུ་སྦས་ཏེ༔ དུས་ངན་གྱི་སྐབས་ལས་ཅན་རྣམས་ཀྱི་ཐབས་རྟེན་འབྲེལ་འགྲིགས་ཤིན་ཏུ་དཀའ༔ སེམས་ཅན་གྱི་བསོད་ནམས་ཟད་པའི་རྟགས་ཡིན་ནོ༔ འོན་ཀྱང་དེ་འདྲའི་དུས་ལ༔ བཛྲ་གུ་རུའི་སྙིང་པོ་འདི་གནས་ཆེན་པོའམ༔ དགོན་སྡེའམ༔ རི་བོ་ཆེན་པོའི་རྩེའམ༔ ཆུ་བོ་ཆེན་པོའི་འགྲམ་དང་༔ ལྷ་སྲིན་འབྱུང་པོ་དར་བའི་ས་མགོ་ས་མདོ་ལ་སོགས་པ་ལ༔ སྔགས་པ་དམ་ཚིག་དང་ལྡན་པ༔ དགེ་འདུན་སྡོམ་ལྡན༔ སྐྱེ་བོ་དད་ཅན༔ བུད་མེད་མཚན་ལྡན་ལ་སོགས་པ་རྣམས་ཀྱིས་སེམས་བསྐྱེད་རྒྱ་ཆེན་པོའི་ངང་ནས༔ བརྒྱ་སྟོང་ཁྲིད་འབུམ་བྱེ་བ་དང་དུང་ཕྱུར་ལ་སོགས་པ་ཅི་འགྲུབ་བཟླས་ན༔ ཕན་ཡོན་དང་ནུས་པ་བསམ་གྱིས་མི་ཁྱབ༔ ཡུལ་ཕྱོགས་ཐམས་ཅད་ལ་ནད་མུག་མཚོན་གསུམ་དམག་འཁྲུག་ལོ་ཉེས་ལྟས་ངན་ཆོ་འཕྲུལ་ངན་པ་ཐམས་ཅད་བཟློག༔ ཆར་ཆུ་འབེབས་ཤིང་ལོ་ཕྱུགས་ལེགས་པ་དང་༔ ཡུལ་ཕྱོགས་ལ་བཀྲ་ཤིས་པར་འགྱུར་རོ༔ ཚེ་འདི་དང་ཕྱི་མ་བར་དོའི་འཕྲང་གསུམ་ལ༔ རབ་དངོས༔ འབྲིང་ཉམས༔ ཐ་མ་རྨི་ལམ་ལ་ང་དང་ཡང་ནས་ཡང་དུ་འཕྲད་ཅིང་༔ ས་ལམ་རིམ་པར་རྫོགས་ནས་རྔ་ཡབ་གླིང་དུ་རིག་འཛིན་ཕོ་མོའི་གྲལ་དུ་ཚུད་པར་ཐེ་ཚོམ་མེད་དོ༔ བརྒྱ་རེ་བཟླས་པ་མ་ཆག་ན་ཡང་གཞན་གྱི་ཡིད་དུ་འོང་ཞིང་ཟས་ནོར་ལོངས་སྤྱོད་འབད་མེད་དུ་འབྱུང་༔ སྟོང་དང་ཁྲི་ལ་སོགས་པ་བཟླས་ན་གཞན་སྣང་ཟིལ་གྱིས་གནོན་ཅིང་བྱིན་རླབས་དང་ནུས་པ་ཐོགས་པ་མེད་པར་འགྲུབ་བོ༔ འབུམ་དང་བྱེ་བ་སོགས་བཟླས་པ་བྱེད་ན༔ ཁམས་གསུམ་དབང་དུ་འདུས༔ སྲིད་གསུམ་ཟིལ་གྱིས་གནོན༔ ལྷ་འདྲེ་བྲན་དུ་འཁོལ༔ འཕྲིན་ལས་རྣམ་བཞི་གང་ལ་ཡང་ཐོགས་པ་མེད་པར་འགྲུབ་ཅིང་སེམས་ཅན་ཐམས་ཅད་ལ་ཅི་བསམ་པའི་འགྲོ་དོན་དཔག་ཏུ་མེད་པ་བྱེད་ནུས་པར་འགྱུར་རོ༔ བྱེ་བ་གསུམ་མམ་བདུན་ལ་སོགས་པ་བགྲང་བར་ནུས་ན་དུས་གསུམ་སངས་རྒྱས་རྣམས་དང་འབྲལ་བ་མེད་ཅིང་༔ ང་དང་དབྱེར་མི་ཕྱེད་པར་ལྷ་སྲིན་སྡེ་བརྒྱད་ཐམས་ཅད་བཀའ་ཉན་གསུང་བསྟོད༔ ཅི་བཅོལ་བའི་ལས་བསྒྲུབ་ཅིང་༔ རབ་འདི་ལ་འཇའ་ལུས་འགྲུབ༔ འབྲིང་འཆི་ཁར་འོད་གསལ་མ་བུ་འཕྲོད༔ ཐ་མ་ཡང་བར་དོར་ང་ཡི་ཞལ་མཐོང་ནས་སྣང་བ་རང་སར་གྲོལ་ཏེ་རྔ་ཡབ་གླིང་དུ་སྐྱེ་ནས་འགྲོ་དོན་དཔག་ཏུ་མེད་པ་འབྱུང་བར་འགྱུར་རོ༔ ཞེས་གསུངས་སོ༔ སློབ་དཔོན་ཆེན་པོ་ལགས༔ འདི་ལྟ་བུའི་ཕན་ཡོན་དང་ནུས་པ་དཔག་ཏུ་མེད་པ་རྒྱ་ཆེན་པོ་གསུངས་པ་བཀའ་དྲིན་ཆེ་ལགས༔ མ་འོངས་སེམས་ཅན་རྣམས་ཀྱི་དོན་དུ་གུ་རུ་པདྨའི་འབྲུ་འགྲེལ་གྱི་ཕན་ཡོན་ནུས་པ་དཔག་ཏུ་མེད་ཡང་༔ མདོར་བསྡུས་པ་ཞིག་གསུངས་པར་ཞུས་ཞེས་ཞུས་སོ༔ དེ་ནས་སློབ་དཔོན་ཆེན་པོས་བཀའ་སྩལ་པ༔ འོ་རིགས་ཀྱི་བུ་མོ༔ བཛྲ་གུ་རུ་ཞེས་པ་ནི༔ ང་གཅིག་པུའི་སྙིང་པོ་མ་ཡིན་ཏེ༔ ཡི་དམ་རྒྱུད་སྡེ་བཞི་དང་༔ ཐེག་པ་རིམ་དགུ་དང་༔ ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ལ་སོགས་པའི་སྲོག་སྙིང་༔ དུས་གསུམ་སངས་རྒྱས་ཐམས་ཅད་དང་༔ བླ་མ་ཡི་དམ་མཁའ་འགྲོ་ཆོས་སྐྱོང་ལ་སོགས་པའི་སྙིང་པོ་འདི་ལ་ཚར་བའོ༔ ཚང་བའི་རྒྱུ་མཚན་ཅི་ལྟ་བུ་ཞེ་ན༔ ལེགས་པར་ཉོན་ལ་ཡིད་ལ་ཟུངས་ཤིག༔ བཟླ་བར་གྱིས་ཤིག༔ འབྲི་བར་གྱིས་ཤིག༔ མ་འོངས་སེམས་ཅན་རྣམས་ལ་བསྟན་པར་གྱིས་ཤིག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་ནི་སྐུ་གསུང་ཐུགས་ཀྱི་སྙིང་པོ་མཆོག༔ བཛྲ་རྡོ་རྗེ་རིགས་ཀྱི་སྙིང་པོ་མཆོག༔ གུ་རུ་རིན་ཆེན་རིགས་ཀྱི་སྙིང་པོ་མཆོག༔ པདྨ་པདྨ་རིགས་ཀྱི་སྙིང་པོ་མཆོག༔ སིདྡྷི་ལས་ཀྱི་རིགས་ཀྱི་སྙིང་པོ་མཆོག༔ ཧཱུྃ་ནི་བདེ་གཤེགས་རིགས་ཀྱི་སྙིང་པོ་མཆོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ནི་རྒྱལ་བ་རིགས་ལྔ་ལོངས་སྤྱོད་རྫོགས༔ ཨཱཿནི་ཆོས་སྐུ་མི་འགྱུར་ཡོངས་སུ་རྫོགས༔ ཧཱུྃ་ནི་སྤྲུལ་སྐུ་གུ་རུའི་དྲུང་དུ་རྫོགས༔ བཛྲ་ཧེ་རུ་ཀ་ཡི་ལྷ་ཚོགས་རྫོགས༔ གུ་རུ་བླ་མ་རིག་འཛིན་ལྷ་ཚོགས་རྫོགས༔ པདྨ་མཁའ་འགྲོ་ཤུགས་འགྲོའི་ལྷ་ཚོགས་རྫོགས༔ སིདྡྷི་ནོར་ལྷ་གཏེར་བདག་ཀུན་གྱི་སྲོག༔ ཧཱུྃ་ནི་ཆོས་སྐྱོང་མ་ལུས་ཀུན་གྱི་སྲོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་ནི་རྒྱུད་སྡེ་གསུམ་གྱི་སྲོག༔ བཛྲ་འདུལ་བ་མདོ་སྡེ་གཉིས་ཀྱི་སྲོག༔ གུ་རུ་མངོན་པ་ཀྲི་ཡ་གཉིས་ཀྱི་སྲོག༔ པདྨ་ཨུ་པ་ཡོ་ག་གཉིས་ཀྱི་སྲོག༔ སིདྡྷི་མ་ཧཱ་ཨ་ནུ་གཉིས་ཀྱི་སྲོག༔ ཧཱུྃ་ནི་རྫོགས་ཆེན་ཨ་ཏི་ཡོ་གའི་སྲོག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་དུག་གསུམ་ལས་གྱུར་སྒྲིབ་པ་དག༔ བཛྲ་ཞེ་སྡང་ལས་གྱུར་སྒྲིབ་པ་དག༔ གུ་རུས་ང་རྒྱལ་ལས་གྱུར་སྒྲིབ་པ་དག༔ པདྨ་འདོད་ཆགས་ལས་གྱུར་སྒྲིབ་པ་དག༔ སིདྡྷི་ཕྲག་དོག་ལས་གྱུར་སྒྲིབ་པ་དག༔ ཧཱུྃ་གིས་ཉོན་མོངས་ལས་གྱུར་སྒྲིབ་པ་དག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་ཆོས་ལོངས་སྤྲུལ་གསུམ་ཐོབ༔ བཛྲ་མེ་ལོང་ལྟ་བུའི་ཡེ་ཤེས་ཐོབ༔ གུ་རུས་མཉམ་པ་ཉིད་ཀྱི་ཡེ་ཤེས་ཐོབ༔ པདྨ་སོ་སོར་རྟོགས་པའི་ཡེ་ཤེས་ཐོབ༔ སིདྡྷི་བྱ་བ་གྲུབ་པའི་ཡེ་ཤེས་ཐོབ༔ ཧཱུྃ་གིས་ཡེ་ཤེས་ལས་གྱུར་ཐམས་ཅད་འགྲུབ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་ལྷ་འདྲེ་མི་གསུམ་འདུལ༔ བཛྲ་དྲི་ཟ་མེ་ལྷའི་གདོན་རྣམས་ཐུབ༔ གུ་རུས་གཤིན་རྗེ་སྲིན་པོའི་གདོན་རྣམས་ཐུབ༔ པདྨ་ཆུ་ལྷ་རླུང་བདག་གདོན་རྣམས་ཐུབ༔ སིདྡྷི་གནོད་སྦྱིན་དབང་ལྡན་གདོན་རྣམས་ཐུབ༔ ཧཱུྃ་གིས་གཟའ་དང་ས་བདག་གདོན་རྣམས་ཐུབ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་ཕ་རོལ་ཕྱིན་དྲུག་འགྲུབ༔ བཛྲ་ཞི་བའི་ལས་ཀུན་ཐམས་ཅད་འགྲུབ༔ གུ་རུས་རྒྱས་པའི་ལས་ཀུན་ཐམས་ཅད་འགྲུབ༔ པདྨ་དབང་གི་ལས་ཀུན་ཐམས་ཅད་འགྲུབ༔ སིདྡྷི་ཕྲིན་ལས་ལས་ཀུན་ཐམས་ཅད་འགྲུབ༔ ཧཱུྃ་གིས་དྲག་པོའི་ལས་ཀུན་ཐམས་ཅད་འགྲུབ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་བན་བོན་བྱད་ཕུར་བཟློག༔ བཛྲ་ཡེ་ཤེས་ལྷ་ཡི་བྱད་ཁ་བཟློག༔ གུ་རུས་ལྷ་སྲིན་སྡེ་བརྒྱད་བྱད་ཁ་བཟློག༔ པདྨ་འཇིག་རྟེན་ལྷ་འདྲེའི་བྱད་ཁ་བཟློག༔ སིདྡྷི་ཀླུ་དང་ས་བདག་བྱད་ཁ་བཟློག༔ ཧཱུྃ་གིས་ལྷ་འདྲེ་མི་གསུམ་བྱད་ཁ་བཟློག༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་དུག་ལྔའི་དམག་དཔུང་འཇོམས༔ བཛྲ་ཞེ་སྡང་ལས་གྱུར་དམག་དཔུང་འཇོམས༔ གུ་རུས་ང་རྒྱལ་ལས་གྱུར་དམག་དཔུང་འཇོམས༔ པདྨ་འདོད་ཆགས་ལས་གྱུར་དམག་དཔུང་འཇོམས༔ སིདྡྷི་ཕྲག་དོག་ལས་གྱུར་དམག་དཔུང་འཇོམས༔ ཧཱུྃ་གིས་ལྷ་འདྲེ་མི་གསུམ་དམག་དཔུང་འཇོམས༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་སྐུ་གསུང་ཐུགས་ཀྱི་དངོས་གྲུབ་ཐོབ༔ བཛྲ་ཡི་དམ་ཞི་ཁྲོའི་དངོས་གྲུབ་ཐོབ༔ གུ་རུས་རིག་འཛིན་བླ་མའི་དངོས་གྲུབ་ཐོབ༔ པདྨ་མཁའ་འགྲོ་ཆོས་སྐྱོང་དངོས་གྲུབ་ཐོབ༔ སིདྡྷི་མཆོག་དང་ཐུན་མོང་དངོས་གྲུབ་ཐོབ༔ ཧཱུྃ་གིས་ཅི་བསམ་དངོས་གྲུབ་མ་ལུས་ཐོབ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་གདོད་མའི་ཞིང་ཁམས་འཕོ༔ བཛྲ་ཤར་ཕྱོགས་མངོན་དགའི་ཞིང་ཁམས་འཕོ༔ གུ་རུས་ལྷོ་ཕྱོགས་དཔལ་ལྡན་ཞིང་ཁམས་འཕོ༔ པདྨ་ནུབ་ཕྱོགས་བདེ་ཆེན་ཞིང་ཁམས་འཕོ༔ སིདྡྷི་བྱང་ཕྱོགས་ལས་རབ་ཞིང་ཁམས་འཕོ༔ ཧཱུྃ་གིས་དབུས་ཕྱོགས་གཡོ་མེད་ཞིང་ཁམས་འཕོ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ ཨོཾ་ཨཱཿཧཱུྃ་གིས་སྐུ་གསུམ་རིག་འཛིན་ཐོབ༔ བཛྲ་ས་ལ་གནས་པའི་རིག་འཛིན་ཐོབ༔ གུ་རུས་ཚེ་ལ་དབང་བའི་རིག་འཛིན་ཐོབ༔ པདྨ་ཕྱག་རྒྱ་ཆེན་པོའི་རིག་འཛིན་ཐོབ༔ སིདྡྷི་ལྷུན་གྱིས་གྲུབ་པའི་རིག་འཛིན་ཐོབ༔ ཧཱུྃ་གིས་རྣམ་པར་སྨིན་པའི་རིག་འཛིན་ཐོབ༔ ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ༔ བཛྲ་གུ་རུ་ལན་གཅིག་བརྗོད་པ་ཡི༔ དེ་ལ་གཟུགས་མཆིས་འཛམ་གླིང་སྣོད་དུ་ཆུང་༔ འདི་ཉིད་མཐོང་ཐོས་དྲན་པའི་སེམས་ཅན་ཀུན༔ རིག་འཛིན་ཕོ་མའི་གྲལ་ལ་འཁོད་པ་ངེས༔ བསླུ་མེད་བཛྲ་གུ་རུའི་བདེན་ཚིག་ལ༔ གང་འདོད་བཀའ་བཞིན་འགྲུབ་པར་མ་གྱུར་ན༔ པདྨ་ང་ཡིས་སེམས་ཅན་བསླུ་བ་ཨང་༔ མི་བསླུ་ངེས་པས་བཀའ་བཞིན་བསྒྲུབ་པར་གྱིས༔ བཟླས་པ་མི་ནུས་རྒྱལ་མཚན་རྩེ་ལ་ཕྱོར༔ རླུང་ཕོག་སེམས་ཅན་གྲོལ་བར་ཐེ་ཚོམ་མེད༔ ཡང་ན་ས་ཤིང་རྡོ་ཡི་ལོགས་སུ་བྲིས༔ རབ་གནས་བྱས་ནས་ལམ་ལ་བཀྲམ་ན་ཡང་༔ མཐོང་བ་ཙམ་གྱིས་ནད་གདོན་སྒྲིབ་པ་དག༔ ས་དེར་གནས་པའི་འདྲེ་སྲིན་རྒྱུ་ལམ་ཆོད༔ མཐིང་ཤོག་དག་ལ་གསེར་གྱིས་བྲིས་ལ་འདོགས༔ གདོན་བགེགས་འབྱུང་པོའི་གནོད་པ་བྱེད་མི་ནུས༔ ཤི་ནས་རོ་དང་མ་བྲལ་བསྲེག་ན་ནི༔ འཇའ་ཚོན་འཁྱུག་ཅིང་བདེ་ཆེན་འཕོ་བར་ངེས༔ འབྲི་ཀློག་འདོན་པའི་ཡོན་ཏན་ཚད་ལས་འདས༔ མ་འོངས་སེམས་ཅན་དོན་དུ་བཀོད་དེ་སྦས༔ སྐལ་ལྡན་ལས་ཅན་བུ་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ ལོག་ལྟ་ཅན་ལ་གསང་རྒྱ་རྒྱ་རྒྱ༔ དམ་ཚིག་ཅན་ལ་གཏད་རྒྱ་རྒྱ་རྒྱ༔ སྤྲུལ་སྐུ་ཀརྨ་གླིང་པས་གཏེར་ནས་གདན་དྲངས་ཏེ་ཤོག་སེར་ལས་བཤུས་པའོ༔ ༔
