མཁའ་འགྲོ་མ་ཏཱ་རེ་ལྷ་མོ་དྲན་པའི་མེ་ལོང།
མཁའ་འགྲོ་མ་ཏཱ་རེ་ལྷ་མོ་དྲན་པའི་མེ་ལོང།
ན་མོ་གུ་རུ་ཏཱ་རེ་དྷེ་ཝི་ཡ།།
༡༽
དབྱིངས་ཀ་དག་སྟོང་པའི་ངང་ཉིད་ལས།།
འོད་ལྷུན་གྲུབ་སྣང་བའི་ཞིང་ཁམས་སུ།།
རྩལ་སྣ་ཚོགས་ཤར་བའི་མཁའ་འགྲོ་མ།།
མ་ཡུམ་ཆེན་ཏཱ་རེ་ལྷ་མོ་དྲན།།
༢༽
དུས་སྙིགས་ལྔའི་མུན་པ་འཁྲིགས་ན་ཡང་།།
རྗེ་སྣང་བྱེད་རྟ་བདུན་དབང་པོ་ཡིས།།
དཔལ་རྟེན་འབྲེལ་དགེ་བའི་མནྜལ་ཕུལ།།
ལས་རབ་འབྱམས་ཕྲིན་ལས་མཐའ་ནས་རྒྱས།།
༣༽
མགོན་ཏཱ་ར་ནགས་ཀྱི་སྒྲོལ་མ་ཉིད།།
གནས་རི་བོ་རྩེ་ལྔར་ཐོག་མར་མཇལ།།
དབང་བྱིན་རླབས་གནང་བའི་མ་མ་ཁྱེད།།
སེམས་དད་པའི་ངོས་ན་གསལ་བོ་དྲན།།
༤༽
ལྷ་རྩ་བ་གསུམ་གྱི་དབང་ལུང་ཐོབ།།
ཐུགས་དགྱེས་པ་ཆེན་པོས་རྗེས་སུ་བཟུང་།།
ལས་སྨོན་ལམ་བཟང་སྤྱོད་མཉམ་དུ་འཚོགས།།
ཆོས་དམ་ཚིག་བཟང་པོས་འབྲེལ་བ་དྲན།།
༥༽
སྔོན་ཁྲ་མོ་གླིང་གི་ནེའུ་ཆུང་དང་།།
ད་གངས་ཅན་མཁའ་འགྲོ་ཏཱ་རེ་མ།།
ཕ་པདྨའི་ཟབ་གཏེར་འགྱེད་པའི་གྲོགས།།
མ་སྐུ་གསུམ་བདག་མོ་ཡང་ཡང་དྲན།།
༦༽
ལུས་རགས་རྡུལ་མི་ཤིགས་དྭངས་མར་དག།
ངག་རླུང་ཁམས་ཨ་བ་དྷཱུ་ཏིར་རྫོགས།།
སེམས་ཀུན་རྟོག་རིག་པ་ཆོས་སྐུར་སྨིན།།
མ་འགྲོ་ཀུན་འདྲེན་པའི་དཔལ་ཐོབ་ཤོག།
ཅེས་པ་འདི་ཡང་རབ་གནས་ལྕགས་གླང་དབོ་ཟླའི་བཟང་པོ་གསུམ་པ་སྟེ་མཁའ་འགྲོ་དྲན་པའི་མྱོང་ཚོར་ཐོལ་བྱུང་དུ་ཨེ་མ་ཧོས་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་རྗེས་དྲན་གླུ་རུ་བླངས་པར་དགེའོ།། །། སྤྱི་ལོ་༢༠༢༡།༣།༢༥་ལའོ།།
