༄༅།།སྔ་འགྱུར་བསྟན་པའི་བདག་པོ་ངེས་པ་དོན་གྱི་མཁན་ཆེན་བླ་མ་ཨ་བུ་རིན་པོ་ཆེ་པདྨ་དྲག་སྔགས་གླིང་བའི་སྐྱེ་སྤྲུལ་དྲི་མ་མེད་མ་མཆོག་གི་སྐུ་གསུམ་ཤེལ་ཀྱི་གོང་བུའི་ཞབས་དྲུང་མངོན་པར་འཕགས་པའི་དཔལ་དུ།།གུས་པ་བུ་སློབ་མགོན་པོ་སྐྱབས་ཀྱིས་གསོལ་བ་འདེབས་སྙིང་།

༑ལེགས་ཚོགས་འབུམ་གྱིས་ཕྱུགས་པའི་སྐུ་ཉིད་ཀྱི་སྐུ་གསུམ་ཐུགས་ཡོན་ཏན་འཕྲིན་ལས་ཀྱིས་འགྲོ་ཀུན་ཐར་བའི་ལམ་མཆོག་ལ་འགོད་པར་མཛད་པའི་མཛད་པ་ནམ་མཁའི་མཐའ་དང་མཉམ་པར་འཛམ་གླིང་ཤར་ནུབ་ཀུན་ཞབས་ཀྱིས་བཅག་ནས་འགྲོ་དོན་མ་ལུས་ལྷུན་གྱིས་འགྲུབ་པའི་ངང་སྐུ་གསུམ་བདེ་དགའི་རྒྱ་མཚོའི་ཀློངས་སུ་བདེ་བདེ་མཆིས་སམ་ལགས།།གུས་པ་བུ་སློབ་མགོན་པོ་སྐྱབས་རང་ཁྱིམ་བཀྲ་ཤིས་རབ་བརྟན་གླིང་གི་གཡང་གི་སྒོ་བཞི་འཛོམས་པའི་གནས་ཡུལ་ན།ལུས་བདེ་སེམས་བདེ་ངང་བླ་མ་བཟང་བོས་གནང་བའི་དམ་ཆོས་ཟབ་མོ་ཉམས་ལེན་ཅི་ཐུབ་ངང་བདེ་ཞིང་སྐྱིད་པའི་ངང་གནས་ལགས།

འདིར་ཨ་བུ་རིན་པོ་ཆེ་མཆོག་ལ་ཞུ་བར་བྱེད་པའི་གཏམ་གྱི་སྙིང་བོ་ནི།གུས་བའི་བླ་མ་རིན་པོ་ཆེའི་སྐུ་ཚེའི་མི་འགྱུར་རྡོ་རྗེ་བཞིན་བརྟན་པ་དང་།འགྲོ་དོན་མ་ལུས་དཔག་མེད་དུ་རྒྱས་བའི་ལྷད་དུ་སྣང་སྲིད་དབང་དུ་སྡུད་པའི་གསོལ་འདེབས་བྱིན་རླབས་སྤྲིན་ཆེན་སྟོང་ཚར་གཅིག་དང་རྡོ་རྗེ་གོ་ཁྲབ་ཚར་བརྒྱ།གུ་རུ་སིངྷི་ཚར་བརྒྱ།གེ་སར་རྩ་སྔགས་ཚར་བརྒྱ།སྒྲོལ་མའི་སྔགས་ཚར་བརྒྱ་བཅས་ཡོངས་སུ་འགྲུབ་པ་བྱས་ནས།དེ་རིང་ས་ག་ཟླ་བའི་ཚེས་ཆེན་བཅོ་ལྔའི་ཨེ་ཝྃ་སྨོན་ལམ་ཆེན་མོ་སྐབས་བརྒྱ་དང་ཞེ་བདུན་པའི་དུས་ཚིགས་ཁྱད་པར་ཅན་དང་སྐབས་དང་བསྟུན་བླ་མ་རིན་པོ་ཆེ་ལ་འབུལ་རྒྱུ་ལགས་ན།

འདིའི་མཚོན་གྱི་དགེ་བའི་རྩ་བ་གང་ཡོད་ཐམས་ཅད་སྤྱིར་རིགས་དྲུག་སེམས་ཅན་ཐམས་ཅད་དང་།ཡང་སྒོས་བདག་ལ་བཀའ་དྲིན་གསུམ་ལྡན་གྱི་རྩ་བའི་བླ་མ་རིན་པོ་ཆེའི་སྐུ་གསུམ་རྡོ་རྗེའི་ངོ་བོ་རི་རབ་བཞིན་བརྟན་ཅིང་།།ཕྱོགས་བཅུའི་འགྲོ་དོན་མ་ལུས་བདེ་ལེགས་ངང་འགྲུབ་པ་བཅས་ཀྱི་ཆེད་དོན་དུ།བཀྲ་ཤིས་རྟགས་བརྒྱད་ཀྱིས་བརྒྱན་པའི་ཁ་བཏགས་དྲི་མ་མེད་པ་དང་བཅས་འབུལ་བར་ལགས་ན།ཇི་ལྟར་གསོལ་བ་བཏབ་པ་བཞིན་དེ་དེ་བཞིན་འགྲུབ་པར་བླ་མའི་སྐུ་གསུང་ཐུགས་གསུམ་དང་དབྱེར་མེད་པའི་རྩ་གསུམ་གྱི་ལྷ་ཚོགས་རྣམས་ཀྱིས་འཕྲིན་ལས་སྩོལ་བའི་བྱིན་རླབས་བཅས།

སྒོ་གསུམ་གུས་པ་ཆེན་པོའི་གསོལ་བ་འདེབས་པར་ཞུ་ཞུ་ཞུ།

བོད་རྒྱལ་ལོ་༢༡༥༡་ས་ག་ཟླ་བའི་ཚེས་ཆེན་༡༥ཉིན་རང་ཤག་བཀྲ་ཤིས་རབ་བརྟན་གླིང་ནས་བུ་སློབ་མགོན་པོ་སྐྱབས་ཀྱིས་གསོལ་བ་བཏབ་པ་དགེ་ལེགས་འཕེལ།། །།