༆ རི་དྭགས་ཆོས་འཁོར།
༆ རི་དྭགས་ཆོས་འཁོར།
རང་རའི་དགོན་སྡེ་ཁག་གི་ཡང་རྩེར་རིག་རྒྱུ་མང་བའི་འཁོར་ལོ་དང་རི་དྭགས་ཀྱི་གཟུགས་ལས་གྲུབ་པའི་བཀོད་པ་ཡ་མཚན་ཅན། རི་དྭགས་ཆོས་འཁོར་ཞེས་པ་དེ་ནི། གདུལ་བྱའི་སེམས་ཅན་ཐམས་ཅད་དམ་པའི་ཆོས་ལ་ཁུག་པའི་དོན་ཡིན་རུང་། ཞིབ་པར་ཞུ་ན། འཁོར་ལོའི་གྲུབ་ཆ་གཙོ་བོ་གསུམ་སྟེ། འཛིན་བྱེད་ཀྱི་ལྟེ་བ་དང་། གཅོད་བྱེད་ཀྱི་རྩིབས། སྡུད་བྱེད་ཀྱི་མུ་ཁྱུད་གསུམ་ལས། ཚུལ་ཁྲིམས། ཏིང་འཛིན།ཤེས་བར་བསླབ་པ་གསུམ་མམ་ཡང་ན་འདུལ་བ། མདོ་སྡེ། མངོན་པ་བཅས་ཆོས་སྡེ་སྣོད་གསུམ་མཚོན་ལ། རི་དྭགས་ཕོ་མོ་གཉིས་པོས་ཆོས་འཁོར་གྱི་རྩེ་མོར་བློ་རྩེ་གཅིག་ཏུ་ལྟ་བ་ནི། ཕྱི་ནང་གི་གྲུབ་མཐའ་འཛིན་མཁན་གང་ཟག་སུ་འདྲ་ཞིག་ཡིན་ཡང། མཐར་ཐུག་འབྲས་བུ་སྐུ་གསུམ་ལ་དམིགས་ཤིང་། བགྲོད་པའི་ལམ་ནི་སངས་རྒྱས་ཀྱིས་བསྟན་པའི་ལམ་མཆོག་ཏུ་གྱུར་པ་བསླབ་པ་གསུམ་ལས་གཞན་གང་ཡང་མེད་པ་རབ་ཏུ་མཚོན་བྱེད་ཅིག་ཡིན། དེ་ཡང་དོན་དམ་དུ་འཁོར་ལོ་རྩིབས་བརྒྱད་ལས། འཕགས་ལམ་ཡན་ལག་བརྒྱད་དང་བཅས་པའི་སངས་རྒྱས་ཀྱི་བཀའ་ཡོད་དོ་ཅོག་དང་། རི་དྭགས་ཕོ་མོ་གཉིས་ལས། ཐབས་དང་ཤེས་རབ་གཉིས་མཚོན་གྱི་ཡོད་པས། དོན་ལ་སངས་རྒྱས་ཀྱི་གོ་འཕང་ཐོབ་དགོས་ན། ངེས་པར་དུ་ཐབས་དང་ཤེས་རབ་གཉིས་ཟུང་འབྲེལ་བྱ་དགོས་པའི་ནང་པ་སངས་རྒྱས་པའི་རིང་ལུགས་གཏིང་ཟབ་ཞིག་མཚོན་གྱི་ཡོད།
