ལམ་ལྷ་གསོལ་འདེབས་ཡིད་བཞིན་ནོར་བུ།།

ལམ་ལྷ་གསོལ་འདེབས་ཡིད་བཞིན་ནོར་བུ།།
ཨེ་མ་ཧོ༔
ཕྱོགས་དུས་རྒྱལ་བ་སྲས་བཅས་དམ་ཆོས་ཚོགས༔
ཀུན་ལ་ཕྱག་འཚལ་བདག་ཅག་བཀྲ་ཤིས་དཔལ༔
བདེ་ལེགས་ཕུན་ཚོགས་ཡིད་བཞིན་ནོར་བུ་ཉིད༔
འགལ་རྐྱེན་ཀུན་ཞི་བསམ་དོན་ལྷུན་གྲུབ་ཤོག༔
ཧོང་ཀོང་བླ་སྨན་དམ་པ་རཏྣ་ཤྲཱིས་ངོར་ཨེ་མ་ཧོས་ཡིད་མཚོ་ལས་བྱུང་བའི་ནོར་བུ་དོ་ཤལ་དྲི་མ་མེད་པའོ།། སྤྱི་ལོ་༢༨/༥/༢༠༡༩ལ།

ཨོཾ་ཕྱོགས་བཅུའི་མུན་སེལ་ཕྱོགས་བཅུའི་འཇིག་རྟེན་ན།།
ཕྱོགས་བཅུའི་སངས་རྒྱས་རྣམས་ལ་ཕྱག་འཚལ་ལོ།།
བདག་ནི་ཕྱོགས་བཅུར་དོན་གཉེར་འགྲོ་བ་ན།།
དོན་དེ་འགྲུབ་ཏེ་སླར་ཡང་ལྡོག་པར་ཤོག།
ཕྱག་འཚལ་སྟེང་འོག་བཞུགས་པའི་སངས་རྒྱས་ལ།།
ཕྱག་འཚལ་སྐྱབས་མཆི་བདག་ཅག་གར་འགྲོ་ཡང་།།
དགྲ་ཇག་ཆོམ་རྐུན་མེ་ཆུ་གཅན་གཟན་སོགས།།
འཇིགས་པ་ཀུན་སྐྱོབས་བསམ་དོན་ལྷུན་གྲུབ་མཛོད།།
མགྲོན་པོ་ལམ་ཞུགས་ཐམས་ཅད་ལ།།
ཕྱོགས་རྣམས་ཐམས་ཅད་བདེ་བར་ཤོག།
གང་གི་དོན་དུ་འགྲོ་བྱེད་པ།།
དེར་འབད་མི་དགོས་འགྲུབ་གྱུར་ཅིག། །།
མདོ་ལས་སོ།