༼ཁྱི་དང་མིའི་བསྟན་བཅོས།༽/གཅན་རང་སད།ཁྱི་ལ་ཁ་ཟས་སྦྱིན་པས་ཀྱང་།།དྲུང་དུ་བཅར་ནས་གཉེན་དུ་འཛིན།།མི་ལ་ཚེ་གང་ཕན་བཏགས་ཀྱང་།།ནམ་ཞིག་བཀྱེད་ནས་དགྲ་རུ་ལྟ།། ཁྱི་ཡིས་རང་གི་བདག་པོ་ལ།།གློ་བ་མི་རིང་ཞབས་ཞུ་སྒྲུབ།།མི་ཡིས་རང་གི་ཕ་མར་ཡང་།།བཀུར་བསྟི་མི་བྱེད་སྒོ་རུ་འདོན།། ཁྱི་ལ་རེ་ཞིག་འདྲིས་པས་ཀྱང་།།ནམ་ཡང་མི་བརྗེད་གདོང་རིས་ཟིན།།མི་ལ་ཡུན་རིང་འགྲོགས་ན་ཡང་།།ཕྱུག་པོ་ཆགས་ཚེ་ངོ་མི་ཤེས།། ཁྱི་ཡིས་མི་སྐད་མི་གོ་ཡང་།།འགྲོགས་ཚེ་གློ་སྙིང་བྲང་གསུམ་གཏོད།།མི་ནི་རང་སྐད་སྨྲ་མོད་ཀྱང་།།འགྲོགས་ཀྱིན་སོ་སོའི་སྐྱོན་ལ་རྟོག། ཁྱི་ཡིས་ཕན་བཏགས་ཆུང་ངུས་ཀྱང་།།བྱས་པ་ཤེས་ཤིང་དྲིན་དུ་གཟོ།།མི་ནི་ཚེ་གང་བསྐྱངས་ན་ཡང་།།མཐའ་མར་དགྲ་རུ་གྱུར་བ་མང་།། ཁྱི་ཡིས་གྲོད་ཁོག་འགྲངས་གྱུར་ན།།དངུལ་ལོར་ཕྱགས་དར་ཕུང་བོར་ལྟ།།མི་ལུས་གསེར་གྱིས་གཡོགས་གྱུར་ཀྱང་།།ཧམ་པའི་མེ་ལྕེ་སྔར་ལས་ཚ།། ཁྱི་ལ་ཁ་ཟས་ཐོབ་གྱུར་ན།།གཞན་གྱི་སྲོག་ལ་གནོད་མི་བྱེད།།མི་ནི་རང་དོན་གྱི་ནའི་སླད།།གཞན་གནོད་འཁོར་ལོ་བསྐོར་ལ་ལྟོས།། ཁྱི་ནི་ཕན་ཚུན་འཕྲད་གྱུར་ན།།རྔ་གཡུག་སྐེ་བསྣོལ་དུངས་དུངས་བྱེད།།མི་རྣམས་རང་འདྲར་འཕྲད་པའི་ཚེ།།ཕྲག་དོག་མིག་ཟུར་ཡོན་པོར་ལྟ།། ཁྱི་ལུས་དར་གྱིས་བཏུམས་གྱུར་ཀྱང་།།དམའ་བའི་ས་ན་སྔར་ལྟར་འགྲོ།།མི་ངན་དཔོན་དུ་བསྐོས་གྱུར་ན།།མགོ་བོ་བར་སྣང་ཁམས་ལ་འདེགས།། ཁྱི་ལ་གཅར་རྡུང་མ་བྱས་ན།།སྡིགས་དམོད་ཙམ་ལ་ཅི་མི་སྙམ།།མི་ལ་ཁ་ཡག་མ་བཤད་ན།།རྣམ་འགྱུར་སྲང་མདའ་ལྟར་དུ་སྟོན།། ཁྱི་ནི་གལ་ལ་ཐུག་ན་ཡང་།།རང་གི་བདག་པོར་རྨུགས་པ་མིན།།མི་ནི་རྒྱུ་ཡིས་བྲིད་པའི་ཚེ།།རང་གི་བླ་མ་ཡིན་ཡང་འཚོང་།། ཁྱི་ཡིས་འགན་འཁྲི་དང་བླངས་ནས།།ཉིན་མཚན་ཀུན་ཏུ་རང་ཁྱིམ་སྲུང་།།མི་ནི་རྙེད་དང་བཀུར་བསྟིའི་སླད།།ཤ་ཉེ་ཕུ་ནུ་ཡིན་ཡང་གསོད།། ཁྱི་ནི་ཚེ་གང་བཏགས་ན་ཡང་།།རང་གི་ཆགས་པར་བཟོད་བསྲན་བྱེད།།མི་ལ་བཟའ་ཟླ་བསྐོས་ཡོད་ཀྱང་།།བག་མེད་བྱི་བོ་བྱེད་ལ་ལྟོས།། ཁྱི་ནི་ཐལ་སྤུངས་འགྲམ་གནས་ཀྱང་།།རང་གི་བདག་པོར་གློ་བ་ཉེ།།མི་ནི་ཟུངས་ཁྲག་གིས་བསྐྱངས་ཀྱང་།།དྲིན་ལན་ལོག་འཇལ་ག་ཙམ་བྱེད།། ཁྱི་ལ་གདན་ཐོབ་དམའ་ན་ཡང་།།འཁང་གཏམ་ལེ་བདའ་གཞར་ཡང་མེད།།མི་རྣམས་གོ་གནས་ཕྲན་བུའི་ཆེད།།ས་ལྡིང་གནམ་ལྡིང་ཅི་ཙམ་བྱེད།། ཁྱི་ཡིས་ཟུག་སྐད་འབྱིན་པ་ནི།།ཕལ་ཆེར་གྲགས་འགུལ་ཚོར་བས་ཡིན།།མི་ཡི་ཁྲོད་ན་དོོན་མེད་དུ།།ཀུ་ཅོ་འདོན་མཁན་ག་ཙམ་ཡོད།། ཁྱི་ཞེས་སྨད་པའི་དཔེར་འཛིན་ཀྱང་།།དེང་སང་ཁྱི་གོང་གནམ་ན་ཡོད།།མི་ཆེན་དག་གི་ཁྲོད་ན་ཡང་།།ཁྱི་ལ་མི་དོ་ཉུང་ཉུང་མིན།། ཁྱི་ཡིས་དགྲ་བོ་མཐོང་བ་ན།།ཐེ་ཚོམ་མེད་པར་འཇབ་རྒོལ་རྩོམ།།མི་ཡིས་ཕ་གསོད་ལག་དམར་ལའང་།།ཕན་བདེའི་སླད་དུ་བསྟི་སྟང་བྱེད།། ཁྱི་ཡིས་གཉུག་མའི་མཛའ་བོ་ལས།།ཀུན་ལ་དགའ་མདོག་སྟོན་པ་མིན།།མི་རྣམས་གྲོགས་རྙིང་ཡལ་བོར་ནས།།གསར་ཞེན་གཡམ་རྒྱུགས་ཆེ་ལ་ལྟོས།། ཁྱི་ཡིས་རྫི་རླུང་ལ་ཉན་ནས།།དགྲ་དང་གཉེན་གྱི་དབྱེ་བ་ཤེས།།མི་ནི་ཁ་གཏད་ལ་གནས་ཀྱང་།།དགྲ་གྲོགས་རྣམ་གཞག་འཆོལ་བ་མང་།། ཁྱི་ཡིས་དྲང་པོའི་རྣམ་རིག་གིས།།ཉེས་ཅན་དུག་རྫས་ཟང་མར་སྟོན།།མི་ཡིས་འཁྱོག་པའི་བློ་སྣ་ཡིས།།ནག་ཚོང་ཐབས་ལམ་ཅི་རིགས་འཚོལ།། ཁྱི་རྒན་ཤི་བའི་ཡ་སོར་ཡང་།།དག་སྣང་ཡོད་ན་གསེར་འོད་འཚེར།།མི་ལུས་རིན་ཆེན་གྲགས་ཆེ་ཡང་།།སྙིང་བོ་མ་ལོན་ཐལ་གོང་ཉིད།། ཁྱི་ཡི་རྣམ་པར་སྤྲུལ་བ་ཡི།།བྱང་ཆུབ་སེམས་དཔའ་རེས་འགར་འབྱུང་།།མི་ཡི་ཤ་ཚུགས་ལ་གནས་པའི།།དུད་འགྲོའི་བློ་ཅན་བགྲང་ལས་འདས།། ཁྱི་སྨྱོན་རང་རྐན་ཕུག་པའི་ཁྲག།རུས་པའི་བཅུད་དུ་སྒོམ་ནས་གཞིབ།།མི་ཡིས་གཞན་གྱི་ཤ་གསར་བ།།ཟས་ཀྱི་མཆོག་ཏུ་རློམ་ནས་ཟ།། ཁྱི་ཡིས་སྐབས་འགར་མི་མོ་ལ།།སྤྱོད་ཀྱང་ཅི་ཁག་དུད་འགྲོ་ཉིད།།མི་ཡི་ནང་ན་ཤེས་བཞིན་དུ།།འདོད་ལོག་སྤྱོད་པ་གྲངས་མི་ཟིན།། ཁྱི་དང་བྱི་ལ་འཛིང་བ་ནི།།རྒྱུ་འབྲས་མིན་པའི་ཐོབ་ཐང་རྩོད།།མི་ཡིས་རྩྭ་ཆུའི་བདག་འཛིན་སླད།།རིགས་མཐུན་ཅི་ཙམ་ཁྲག་ལ་བསྒྲེས།། ཁྱི་ཡིས་རང་ཤོང་སྤྱིལ་བུ་རུ།།གཞན་དག་ཡན་པོར་གཏོང་བ་མིན།།མི་ཡིས་བཅོས་མའི་འཛུམ་དཀར་གྱིས།།ཕ་རོལ་འགུགས་པའི་སྦྱོར་བ་རྩོམ།། ཁྱི་ཡིས་རང་གི་ཁ་ཟས་ཆེད།།སྤྱང་མོ་ཡིན་ཀྱང་དམར་འཛིང་བྱེད།།མི་ནང་ཅ་ནེ་འཕྲོག་ན་ཡང་།།གཉའ་སྒུར་ཞུམ་ཞུམ་བྱེད་མཁན་མང་།། ཁྱི་ཡིས་བཟའ་བཏུང་རྩོལ་བས་སྒྲུབ།།མི་ཡིས་ཁེ་ཕན་གཡོ་ཡིས་གཉེར།།མི་རྣམས་ཁྱི་ལས་ལྷག་པ་ཡི།།རྒྱུ་མཚན་ཆེན་པོ་ངས་མ་མཐོང་།། ཁྱི་དང་མི་ཡི་བསྟན་བཅོས་འདི།།ཁྱི་ལས་མི་ལ་མཁོ་གལ་ཆེ།།ཁྱི་ར་མགོན་པོ་རྡོ་རྗེ་ཡི།།ཁྱི་མོ་བཞིན་དུ་དུལ་བར་ཤོག། ༢༠༡༣ :༡༢:༨ ཉིན།ཁྲིན་ཏུའུ།

མགུར་དབྱངས།སྤྱན་གཟིགས་དངོས་བྱོན་མ་ཎི་བླ་མ་པདྨ་སིདྡྷི་འམ་མགོ་ལོག་བླ་མ་པདྨ་སིདྡྷིའི་དུང་བདུན་མར་གྲགས་པའི་མ་ཎི་མགུར་སྟངས་འདི་ཉིད། རྫ་གང་ཤར་བླ་མ་བརྒྱུད་ནས་སྨྱོ་ཤུལ་ཀུན་མཁྱེན་ངག་དབང་དཔལ་བཟང་གི་དངོས་སློབ། ར་ལི་བླ་མ་ཨོ་རྒྱན་རིག་འཛིན་ལ་གནང་། དེས་སྤྲུ་ཐུབ་བཟང་ལ་ཞལ་ནས་སྙན་དུ་བརྒྱུད་ནས་མ་ཎི་བླ་མའི་གསུང་སྲོལ་ཇི་བཞིན་པར་གནང་བ་དེ་ཉིད་སྤྲུལ་ཁོང་གིས་གསུངས་པར་མཛད་པ་འདི་ཉིད(མགུར)[འགྱུར་།དང་ཕན་ཡོན་ཤིན་ཏུ་ཆེ་བ་ཞིག་ཡིན་པར་གསུང་རྒྱུན་འདུག ་མགུར་སྟངས་འདི་ཉིད་འདི་ནས་སློབ་འདོད་ཡོད་པ་ཀུན་ལ་འབུལ། དགེའོ ༢༠༡༩་༥་༥་ལ་རིབོང་ཁེར་ལྡོམ་ནས་འཕུལ། ༄༅། ། འཕགས་མཆོག་མ་ཎི་བླ་མའི་ངོ་སྤྲོད་མདོར་བསྡུས།།ངུར་སྨྲིག་རྒྱལ་མཚན་འཆང་བ་འགྲོ་བའི་མགོན་པོ་མ་ཎི་བླ་མ་པདྨ་སིདྡྷི་ཞེས་མཚན་ཐོས་ཙམ་གྱིས་ངན་སོང་གི་རྒུད་པ་སེལ་བ་གང་ནི་པད་མའི་རྒྱལ་ཚབ་འགྲོ་འདུལ་སྤྲུལ་པའི་གཏེར་སྟོན་བཅུ་གསུམ་གྱིས་འཕགས་མཆོག་ཕྱག་ན་པད་མོའི་རྣམ་རོལ་ཏུ་རྒྱ་ཆེར་ལུང་གིས་བསྟན་ཅིང་ཞལ་མཇལ་གསུང་ཐོས་བྱུང་ཚད་བདེ་ལྡན་པད་མོ་བཀོད་པའི་ཞིང་དུ་འདྲེན་པར་བསྔགས་པ་ལྟར་ཡབ་ཨ་དབེས་རབ་བརྟན་དང་། ཡུམ་བཟའ་གཡུ་སྒྲོན་གཉིས་ཀྱི་སྲས་སུ་རབ་ཚེས་ས་ཡོས་སྤྱི་ལོ་༡༨༧༩ལོར་ངོ་མཚར་བའི་ལྟས་སྣ་ཚོགས་དང་བཅས་ཏེ་མགོ་ལོག་སྨར་ཁོག་ཏུ་སྐུ་འཁྲུངས། གསུང་ཐོག་མར་འབྱོན་ཚེ། འདི་སྐད་དུ། ཕ་ནི་ཀླུ་པོའི་རབ་བརྟན་ཡིན། ། མ་ནི་མ་བཟའ་གཡུ་སྒྲོན་ཡིན། ། ང་ནི་པདྨ་སིདྡྷི་ཡིན། ། ཨོཾ་མ་ཎི་པདྨེ་ཧཱུྃ༔ཞེས་ལན་དུ་མར་གསུངས་པ་ཀུན་གྱིས་ཐོས། སྐུ་ན་ཤིན་ཏུ་ཆུང་ངུའི་དུས་ནས་ཐེག་ཆེན་གྱི་རིགས་སད་དེ་གཞན་ཕན་གྱི་སྤྱོད་པ་ཁོ་ན་མཛད། དགུང་ལོ་བཅུ་གཉིས་པར་སྐྱབས་མགོན་གླིང་སྤྲུལ་པདྨ་ལུང་རྟོགས་རྒྱ་མཚོའི་ཞལ་ལ་བཏུད་དེ་རབ་བྱུང་དགེ་ཚུལ་གྱི་སྡོམ་པ་བཞེས་པ་དང་། མདོ་སྔགས་ཀྱི་གཞུང་དང་དབང་ལུང་མན་ངག་མང་པོ་གསན། གྱི་ལུང་བྲག་ཤར་དགོན་གྱི་བླ་མ་གྲགས་ལྡན་ལས་ཆོས་བཀའ་དུ་མ་གསན། རྫོགས་ཆེན་དགོན་དུ་ཕེབས་ནས་སྙིང་ཐིག་གོང་འོག་གི་ཆོས་བཀའ་རྣམས་ཚང་བར་གསན། དགུང་གྲངས་ཉི་ཤུ་བར་སྐྱབས་མགོན་གླིང་སྤྲུལ་པདྨ་ལུང་རྟོགས་རྒྱ་མཚོ་ལས་བསྙེན་པར་རྫོགས་ཤིང་མཚན་ལ་ཐུབ་བསྟན་ཞི་བའི་བློ་གྲོས་སུ་གསོལ། གྱི་ལུང་བྲག་ཤར་དགོན་གྱི་དགོན་བདག་གི་ཐུགས་འགན་བཞེས། ཀེ་ལི་ཆུང་ཞེས་པའི་མཚམས་ཁང་དུ་ལོ་དུ་མར་སྐུ་མཚམས་སུ་བཞུགས། གཅིག་ཆོག་སྐྱབས་ཀྱི་རྒྱལ་པོ་འཕགས་མཆོག་སྤྱན་རས་གཟིགས་ཀྱི་སྒོམ་སྒྲུབ་ལ་བརྟེན་ནས་གསུང་མཆོག་རིག་སྔགས་ཀྱི་རྒྱལ་པོ་ཡི་གེ་དྲུག་མའི་བཟླས་པ་ཐུགས་དམ་དུ་མཛད་ཅིང་དགུང་གྲངས་ང་ལྔའི་བར་མ་ཎི་དུང་ཕྱིར་བཅུ་ཞལ་ནས་ཐོན། འཕགས་པའི་དགྱེས་ཞལ་ལན་བཞིར་མཇལ་ཞིང་གསུང་གི་དབུགས་དབྱུང་ཐོབ། དེའི་ཕྱིར་རང་གཞན་ཀུན་ལ་དགེ་བསྐུལ་དང་གཏན་གྱི་འདུན་མ་ཡི་དམ་ཐུགས་རྗེ་ཆེན་པོ་ལས་ལྷག་པའི་འདྲེན་པའི་དེད་དཔོན་མ་མཆིས་པར་དགོངས་ཏེ་སྐུ་ཚེ་དེར་ལྷ་མཆོག་དེ་ཉིད་ཀྱི་ལྷ་སྔགས་ཏིང་འཛིན་ཁོ་ནས་འགྲོ་དོན་མཛད་དེ་གདུལ་བྱ་འཛམ་གླིང་གི་སུམ་ཆ་དང་འགྲོ་བ་དུང་ཕྱིར་བདུན་ཐར་ལམ་དུ་དྲངས་ཏེ་དགུང་གྲངས་དོན་བརྒྱད་པ་སྤྱི་ལོ༡༩༥༦ལོར་གཟུགས་སྐུ་རགས་པའི་བཀོད་པ་བསྡུས་ཏེ་ཐུགས་དགོངས་ཞི་བ་ཆེན་པོའི་དབྱིངས་སུ་བདེ་བར་གཤེགས་སོ།། རྗེ་བཙུན་བླ་མ་དམ་པ་གང་གི་གསུང་ཆོས་དག་ལས་སྤྱན་རས་གཟིགས་ཀྱི་མ་ཎིའི་བསྐུལ་ཆོག་འཕགས་པའི་ཞལ་གཟིགས་མ་ཞེས་བྱ་བ་མདོ་སྨད་ཀྱི་བྱིས་པ་ལོ་བརྒྱད་ཡན་གྱི་སྐྱ་སེར་ཀུན་གྱི་ངག་འདོན་དུ་གྲགས་ན་ཡང་ད་ལྟ་རྒྱུན་ཉམས་པས་ཤེས་མཁན་ཉུང་བ་དང་། སྔར་དུས་སུ་ཁོང་གི་གསུང་རྒྱུན་འཁྲུལ་མེད་ཐོས་པ་ཙམ་གྱིས་ངན་སོང་གི་སྐྱེ་སྒོ་གཅོད་ནུས་པའི་བྱིན་རླབས་ཀྱི་ཚན་ཁ་མངའ་བའི་མ་ཎིའི་པད་དབྱངས་ཀྱི་ཆོས་སྒྲ་ཆུ་བོའི་རྒྱུན་བཞིན་རྒྱུན་ཆད་པ་མེད་ཀྱང་དེང་སང་དགུན་དུས་ཀྱི་ཁུ་བྱུག་གི་སྐད་ལྟར་སོང་བ་ནི་སེམས་ཤིན་ཏུ་ཕངས་པའི་གནས་སོ། ། དེས་ན་སྐབས་འདིར་བསྟན་འགྲོ་ལ་གཅིག་ཏུ་ཕན་པའི་ལྷག་བསམ་ཅན་ཡན་བླ་མ་མཆོག་གིས་ཡོན་སྦྱར་གསུང་བསྐུལ་གནང་བ་ལ་བརྟེན་ནས་མ་ཎི་པད་དབྱངས་སྒྲ་བརྙན་འོད་འཁོར་དུ་བསྐྲུན་པའི་མཚམས་སྦྱོར་ཙམ་དུ་རྗེས་སུ་ཡི་རང་བཅས་ཐུབ་ནོར་ནས་༢༠༠༧་༢་༢༤ཉིན་བྲིས་པས་འབྲེལ་ཐོག་སེམས་ཅན་ཐམས་ཅད་འཕགས་མཆོག་ཐུགས་རྗེ་ཆེན་པོའི་གོ་འཕང་ལ་རེག་པར་གྱུར་ཅིག། ༎

གངས་ཅན་འགྲོ་བ་ཡོངས་ཀྱི་སྐྱབས་གཅིག་གུ་རུ་རིན་པོ་ཆེའི་ཐུགས་རྒྱུད་བསྐུལ་ཕྱིར་བཛྲ་གུ་རུའི་དགེ་སྐུལ།ཆོས་དབྱིངས། དེ་ཡང་གངས་ཅན་འགྲོ་བ་ཡོངས་ཀྱི་སྐྱབས་གཅིག་བཀའ་དྲིན་མཚུངས་མེད་ཨོ་རྒྱན་སངས་རྒྱས་གཉིས་པའི་ཐུགས་རྒྱུད་བསྐུལ་ཏེ་བཛྲ་གུ་རུ་ཅི་ནུས་སུ་འདོན་རྒྱུ་དང་གུ་རུ་རིན་པོ་ཆེ་ལ་གསོལ་བ་འདེབས་བྱས་ན་མཆོག་དང་ཐུན་མོང་གི་དངོས་གྲུབ་འཐོབ་པ་དང་། ཁྱད་པར་དུ་ཕྱོགས་ཀྱི་ཐ་གྲུ་ཀུན་ཏུ་སངས་རྒྱས་ཀྱི་བསྟན་པ་དར་བ་སེམས་ཅན་ལ་བདེ་སྐྱིད་འབྱུང་བར་འཁྲུལ་མེད་རྡོ་རྗེའི་བཀའ་ལུང་དུ་མ་ནས་ཡང་ནས་ཡང་དུ་གསུངས་པ་དཔེར་མཚོན་ཙམ་འགོད་ན། གཏེར་ཆེན་ལས་རབ་གླིང་པའི་རྒྱལ་ཁབ་སྤྱིའི་ལུང་བསྟན་ཐམས་ཅད་ཀྱི་ནང་དོན་མདོར་བསྡུས་ཏེ་གཏེར་སྟོན་ཉིད་ཀྱི་ཞལ་སྔ་ནས་འདི་ལྟར་གསུངས་ཏེ། རྒྱལ་ཁབ་སྤྱི་ལ་ཕན་ཐབས་གཉེན་པོ་ཡོད་པ་རྣམས་མདོར་བསྡུས་ཏེ་ཚང་བར་བྲིའོ། །རྒྱལ་ཁབ་ཀྱི་མི་བདེ་སྤྱིའི་གཉེན་པོ་བཛྲ་གུ་རུ་ཁོ་ན་གལ་ཆེ་ཚུལ་དང་།། ཞེས་སོགས་གསུངས་པ་དང་། བདུད་འཇོམ་ལུང་བསྟན་ལས། དཔལ་རྡོ་རྗེ་ཕུར་པ་མ་གཏོགས་པའི༔དུས་སྙིགས་མའི་བདུད་མགོ་གང་གིས་གནོན༔དཔལ་ཨོ་རྒྱན་ཆེན་པོ་མ་གཏོགས་པའི༔བོད་ཐུགས་རྗེས་སྐྱོང་མི་སུ་ཞིག་ཡོད༔ ཅེས་དང་། རྡོ་གྲུབ་ཆེན་གྱི་ལུང་བསྟན་ལས། སྡེ་མཆོག་དམན་ཀུན་བསམ་པ་སྤྱི་དྲིལ་གྱིས།།ལྷ་ཨོ་རྒྱན་གྱི་རྣམ་ཐར་གསུང་སྒྲོག་དང་།།ལེའུ་བདུན་མ་བཛྲ་གུ་རུ་སོགས༔གང་མང་དུ་འདོན་དང་། ཞེས་དང་། ཁྱད་པར་དུ་པདྨ་བཀའ་ཐང་དང་།།ལེའུ་བདུན་དང་བསམ་ལྷུན་གང་མང་སྒྲུབ།།སློབ་དཔོན་གྱི་སྐུ་གསུང་ཐུགས་ཀྱི་རྟེན།།ཅི་མང་དུ་བཞེངས་ན་ཕན་དང་བདེའི།།མངོན་རྟོགས་གཟུགས་མཐོང་ལ་ཐེ་ཚོམ་མེད།། ཅེས་དང་། ཅོག་སྟེང་མདོ་སྤྲུལ་གྱི་ལུང་བསྟན་ལས། རྗེ་པད་འབྱུང་ལ་རྒྱུན་དུ་གསོལ་བ་ཐོབ༔ ཅེས་དང་། ཨ་པཾ་གཏེར་སྟོན་གྱི་ལུང་བསྟན་ལས། བོད་སྡུག་གི་དུས་ལ་ཐུག་པའི་ཚེ། །ལྷ་པད་འབྱུང་ལས་གཞན་སུ་ཡིས་སྐྱོབ། །དད་མེད་ཀྱི་བདུད་ཀྱིས་ཀ་ཞ་སྒྲོག༔རྒྱལ་བ་རྣམ་མཉམ་པར་གསུང་ཡིན་སྨྲ༔ དང་པོ་ནི་གང་ཅན་འགྲོ་བ་ལ༔ཐུགས་བསྐྱེད་ཀྱི་སྨོན་ལམ་ཁྱད་པར་ཡོད། །བར་དུ་ནི་རྗེ་དང་བླ་མའི་ཚུལ༔བཟུང་ནས་སུ་བསྟན་པའི་ཁྱད་པར་གཉིས༔ ཐ་མ་རུ་སྙིགས་མའི་འགྲོ་བ་ལ༔ཐུགས་བརྩེ་བའི་གཏེར་གྱི་ཁྱད་པར་གསུམ༔དུས་གསུམ་གྱི་རྒྱལ་བ་ཐམས་ཅད་ཀྱི༔མཁྱེན་བརྩེ་ནུས་ཡོན་ཏན་གཅིག་བསྡུས་བཞི༔ བལ་ཡུལ་གྱི་མཆོད་རྟེན་བཞེངས་པའི་ཚེ༔སྙིགས་འགྲོ་ལ་སྨོན་ལམ་ཁྱད་པར་ལྔ། །ངེད་ཉེར་བཞིའི་ཡུལ་གྱི་ཌཱཀྐིའི་གཙོས༔དཀྱིལ་འཁོར་ཀུན་ཁྱབ་བདག་གཙོ་བོར་བཞུགས༔ རིག་འཛིན་རྣམས་ཡེ་ཤེས་སྒྱུ་མའི་འཕྲུལ༔དཔེ་ནམ་མཁར་ཟླ་བའི་དཀྱིལ་འཁོར་ལ༔འཛམ་གླིང་གི་ཆུ་སྣོད་ཇི་སྙེད་དུ༔ཟླ་གཟུགས་ཀྱི་སྤྲུལ་པའི་ཟློས་གར་བཞིན༔ ས་སྟེང་འདི་པདྨའི་གདུལ་བྱ་ཡིན༔རིགས་གསུམ་གྱི་སྤྲུལ་པའི་བཤེས་གཉེན་རྣམས༔པད་འབྱུང་གི་རྣམ་རོལ་མཐའ་ལས་འདས༔གཞན་ཕན་གྱི་མཛད་པ་ཕྲིན་ལས་སྒོ༔ ཡོལ་མེད་དུ་རྒྱ་མཚོའི་རླབས་ལྟར་འཁྲུགས༔བུ་སྡུག་ཚེ་ཕ་མར་འབོད་པ་བཞིན༔རྗེ་པདྨར་གུས་པས་གསོལ་བ་ཐོབ༔ ཅེས་སོགས་ཞལ་ཆེམས་དང་ལུང་བསྟན་དཔག་ཏུ་མེད་པ་ཞིག་རྩོད་བྲལ་སྤྲུལ་པའི་གཏེར་སྟོན་དུ་མའི་གཏེར་ཁ་ནས་ལན་གཅིག་མིན་པར་ཡང་ཡང་གསུངས་པ་དང་། སྤྱིར་དུས་ཀྱི་རྒུད་པ་བཟློག་ཐབས་སྐུ་རིམ་དམིགས་བསལ་བ་རྣམས་ནི་ཇི་སྐད་དུ གུ་རུའི་ཞལ་ནས། སྔས་ན་རི་དྭགས་མི་ཚུད་རྒྱ་དང་འདྲ༔ ཕྱིས་ན་ཆུ་ཤོར་ཟིན་པའི་རགས་དང་འདྲ༔ ཞེས་གསུངས་པ་ལྟར་ཡུལ་དུས་གང་ཟག་གི་ཁྱད་པར་ཡོད་མོད་ཀྱང་། གུ་རུའི་ཐུགས་རྒྱུད་བསྐུལ་ཕྱིར་བཛྲ་གུ་རུ་འདོན་རྒྱུ་དང་རྡོ་རྗེ་ཕུར་པའི་བསྙེན་སྒྲུབ་ལས་གསུམ་ལ་བརྩོན་པར་བྱེད་པ་ནི་གཏེར་ལུང་སྔ་ཕྱི་ཐམས་ཅད་དགོངས་པ་གཅིག་དང་དབྱངས་གཅིག་གི་ཚུལ་དུ་དུས་དང་གནས་སྐབས་ཐམས་ཅད་དུ་གལ་ཆེ་བར་གསུངས་འདུག་པས་ཅིས་ཀྱང་འབད་པར་འཚལ་ཞེས་རབ་གནས་ས་ཕག་བོད་ཟླ་ ༨ ཚེས་ ༡༠…

བླ་མའི་རང་བཞིན།ཨེ་མ་ཧོ།།༼༡༽སྐྱབས་རྗེ་བླ་མ་སངས་རྒྱས་ཆོས་ཀྱི་སྐུ།མ་རིག་མུན་ནག་བསལ་པའི་ཉི་མ་དངོས།།ཆོས་རྗེ་བླ་མ་དམ་པ་ལོངས་སྤྱོད་རྫོགས།།ཏིང་འཛིན་ཞི་བསིལ་སྦྱིན་མཁས་ཟླ་བ་ལགས།།༼༢༽ཐུགས་རྗེ་ཀུན་ལ་མཉམ་པའི་སྤྲུལ་པའི་སྐུ།།འགྲོ་འདུལ་སྣ་ཚོགས་སྣང་བའི་སྐར་ཚོགས་གྲངས།།ཉམས་རྟོགས་ཡོན་ཏན་ཀུན་བཟང་བླ་མ་ཉིད།།ལེགས་ཚོགས་རྩ་བ་བརྟན་པའི་ནོར་འཛིན་བཞིན།།༼༣༽ཕྱི་ཡི་བླ་མ་མདོ་སྔགས་བསྟན་པའི་དཔལ།།ནང་གི་བླ་མ་བྱང་སེམས་དགྱེས་པ་རྩལ།།གསང་བའི་བླ་མ་རྡོ་རྗེ་འཆང་ཆེན་པོ།།ཡང་གསང་རྫོགས་པ་ཆེན་པོའི་བླ་མ་རྒྱལ།།༼༤༽རྟོགས་པ་ནམ་མཁའ་མཉམས་པའི་བླ་མ་ལ།།བྱིན་རླབས་རྒྱལ་བ་རྒྱལ་མཚོའི་ཐུགས་དམ་གནས།།རང་གཞན་དོན་གཉིས་གྲུབ་པའི་དགེ་བའི་བཤེས།།སྙིང་དང་སྲོག་ལས་གཅེས་ན་དངོས་གྲུབ་འབྱུང་།།༼༥༽བླ་མའི་སྐུ་ལ་མཚན་དཔེའི་འོད་སྣང་བཀྲ།།བླ་མའི་གསུང་ལ་དམ་ཆོས་མ་ལུས་ཤིས།།བླ་མའི་ཐུགས་ལ་སྟོབས་བཅུའི་ནུས་པས་བདེ།།བླ་མ་དགེ་ལེགས་ཀུན་གྱི་འབྱུང་གནས་ལགས།།༼༦༽ལུས་ལ་བདེ་དྲོད་འབར་བ་བླ་མའི་དྲིན།།ངག་ལ་བདེན་ཚིག་མཆིས་པ་བླ་མའི་དྲིན།།སེམས་ཉིད་དེ་བཞིན་རིག་པ་བླ་མའི་དྲིན།།དྲིན་ཆེན་བླ་མ་སྙིང་གི་ནོར་བུ་ཡིན།།༼༧༽བླ་མ་མ་ནོར་དམ་པ་སྙིང་ལ་འཛིན།།བླ་མའི་རྣལ་འབྱོར་བསྙེན་བསྒྲུབ་རྒྱུན་དུ་སྐྱོང་།།བླ་མའི་ཡོན་ཏན་ཕྲིན་ལས་ཀུན་སྤེལ་ན།།བླ་མའི་དབང་བཞི་ཡོངས་སུ་རྫོགས་པར་འགྱུར།།༼༨༽བླ་མའི་སྐུ་བཞིའི་ཁྱེར་སོ་མ་བརྗེད་ན།།བླ་མའི་བདེན་བཞིའི་དགོངས་པ་མངོན་དུ་གྱུར།།བླ་མའི་སྣང་བཞིའི་རིག་འཛིན་མཐར་ཕྱིན་ནས།།བླ་མ་རྒྱལ་བ་ཀུན་དང་དགོངས་པར་མཉམས།།ཞེས་པ་འདི་ཡང་རབ་གནས་ས་ཕག་མགོ་ཟླའི་དགའ་བ་གསུམ་པར་ཨེ་ཝཾ་ཚང་གིས་དྲྭ་ཚོམ་གྱི་རྐྱེན་ལས་ཤྲཱིཿཨེ་མ་ཧོས་དབྱིན་ཡུལ་ཨེ་ཝཾ་ཛྙཱ་ན་གུ་རུའི་ལྷ་ཁང་ནས་གང་ཤར་གླུ་རུ་བླངས་པར་དགེའོ།། །།

༄༅༅།།༧སྐྱབས་རྗེ་དམ་པ་༧རྒྱལ་བ་༧ཞེ་ཆེན་རབ་འབྱམས་རིན་པོ་ཆེ་འགྱུར་མེད་ཆོས་སེང་ལ་བསྔགས་པ་དོན་གནས་འཁོར་འདས་དད་པའི་ལྷ་དར་དཀར་པོ།།ཨོཾ་སྭཱ་སྟི་བི་ཛ་ཡནྟུ།།ཞེ༵་མཐུན་རྫོགས་པ་ཆེན༵་པོའི་མཁའ་དབྱིངས་ནས།།རབ༵་འབྱམས༵་འོད་གསལ་ཉི་ཟླ་རིན༵་པོ༵་ཆེ༵།།འགྱུར༵་མེད༵་དམ་ཆོས༵་མི་ཡི་སེང༵་གེ༵་གང་།།འཁོར་འདས་ཁྱབ་བདག་ཆེན་པོས་དགེ་ལེགས་སྩོལ།།༼༡༽ཟབ་ཞི་སྤྲོས་བྲལ་འོད་གསལ་འདུས་མ་བྱས།།ཆོས་འཁོར་རྣམ་གསུམ་དགོངས་པ་ལེགས་རྟོགས་ནས།།ཁམས་གསུམ་འགྲོ་ལ་སྨིན་གྲོལ་ཡོངས་བསྩལ་བའི།།ཕན་བདེས་གསེར་གྱི་འཁོར་ལོ་རྟག་པར་འཁོར།།༼༢༽དྲི་མེད་བྱང་སེམས་དཔག་བསམ་ལྗོན་པར་བརྟས།།གཞན་དོན་ཕྱིན་དྲུག་སྤྱོད་པའི་འབྲས་བཟང་སྨིན།།བདེ་ལེགས་དགེ་ཚོགས་སྦྱིན་མཁས་སྤྲུལ་པའི་སྐུ།།ཕྲིན་ལས་པདྨ་དཀར་པོ་རྣམ་པར་བཞད།།༼༣༽མདོ་སྔགས་གེ་སར་གསར་བའི་ལང་ཚོས་ཕྱུག།ཉེས་རྡུལ་མ་གོས་མཁྱེན་གཉིས་ཡེ་ཤེས་དཔལ།།བདེན་གཉིས་མ་ནོར་ལམ་བཟང་སྟོན་པའི་མགོན།།ཐབས་ཤེས་གསེར་ཉ་རིན་ཆེན་རྣམ་པར་བཀྲ།།༼༤༽བཀའ་གཏེར་མན་ངག་མི་ཟད་རྒྱ་མཚོའི་གཏེར།།བརྒྱུད་གསུམ་ལུང་རྟོགས་བཤད་སྒྲུབ་སྣང་བའི་དཔལ།།འགྲོ་ཁམས་ཆོས་ལ་བཀོད་པའི་རབ་འབྱམས་པ།།གྲགས་སྙན་ཆོས་དུང་དཀར་པོ་ཕྱོགས་ཀུན་གྲགས།།༼༥༽ཕུན་ཚོགས་སྡེ་བཞིའི་བསོད་ནམས་ངང་གིས་འདུ།།སྣང་གྲགས་རིག་པའི་རྟུལ་ཞུགས་མ་ཎི་ཀ།སྙན་འཇེབས་ཚིག་གིས་མཚོན་ནུས་མ་ཡིན་པར།།དགེ་ལེགས་དཔའ་བེའུའི་རི་མོ་ལྷུན་གྱིས་གྲུབ།།༼༥༽རྫོགས་ཆེན་ལྟ་བའི་གཞི་རྒྱ་ཕྱོགས་ལྷུང་བྲལ།།ཕྱག་ཆེན་སྒོམ་པའི་ལམ་བཟང་བདེ་ཆེན་འཕེལ།།ཀུན་བཟང་སྤྱོད་པ་རྒྱ་མཚོའི་མགུལ་རྒྱན་མཛེས།།འདོད་འབྱུང་འབྲས་བུའི་བུམ་པ་བཟང་པོ་རྒྱལ།།༼༦༽ལས་ཉོན་ཚ་གདུང་ཀུན་སེལ་སྨན་ཆེན་པོ།།བདུད་བཞིའི་གཡུལ་ལས་རྒྱལ་དཔའ་བོ་ཆེ།།བྱམས་བརྩེས་འགྲོ་ལ་དགོངས་པའི་ཐུགས་དམ་ཅན།།གཙུག་གཏོར་གདུགས་དཀར་ལས་ལྷག་སྐྱབས་མགོན་ལེགས།།༼༧༽མི་འཇིགས་བཞི་ལྡན་དབང་ལུང་མན་ངག་སྤེལ།།ཕུན་ཚོགས་ལྔ་འཛོམས་དད་གུས་དག་སྣང་སྐྱོང་།།ཡང་དག་ཐར་ལམ་འདྲེན་པའི་དེད་དཔོན་རྗེ།།བཤད་སྒྲུབ་ཆོས་ཀྱི་རྒྱལ་མཚན་མི་ནུབ་བསྒྲིངས།།༼༨༽བརྒྱུད་གསུམ་བླ་མའི་རྣམ་ཐར་ཇི་བཞིན་མཛད།།ཞི་ཁྲོ་རབ་འབྱམས་ཕྲིན་ལས་མངའ་དབང་འབྱོར།།མཁའ་འགྲོ་ཆོས་སྐྱོང་ཁྱབ་བདག་ཀུན་ཏུ་བཟང་།།གང་བསམ་ལྷུན་གྲུབ་ཡིད་བཞིན་ནོར་བུ་རྒྱལ།།སྐུ་ཚེ་འགྱུར་མེད་རྟག་ཏུ་ཞབས་པད་བརྟན།།གསུང་ཆོས་འགགས་མེད་བདུད་རྩི་རྟག་ཏུ་འཇོ།།ཐུགས་རྗེ་མཚུངས་མེད་རབ་འབྱམས་ཞིང་ཀུན་གདལ།།གསང་གསུང་ཕྲིན་ལས་འཁོར་འདས་རྟག་ཁྱབ་ཤོག།ཅེས་པ་འདི་ཡང་རབ་གནས་ས་ཕག་མགོ་ཟླ་བའི་ཡར་ངོའི་ཚེས་པ་བཅུ་ལ་༧སྐྱབས་རྗེ་དམ་པས་གསུང་དངོས་ཐོས་པའི་བཀའ་མོལ་དང་དད་གུས་ཚད་མེད་པའི་ངང་ནས་དམ་པ་ཉིད་ཀྱི་སློབ་མའི་གྲལ་མཐར་འཛིན་པ་དཔལ་དགྱེས་པ་རྡོ་རྗེས་ཨེ་ཝཾ་ཛྙཱ་ན་གུ་རུའི་ལྷ་ཁང་དེ་ཉིད་དུ་སྙིང་ནས་གསོལ་བ་འདེབས་པ་དེ་བཞིན་དུ་འགྲུབ་པར་གྱུར་ཅིག་གུ། དགེའོ།། དགེའོ།། དགེའོ།། །།

ཉི་ཟླ་ཞག་དུས་བཟང་།།ཨེ་མ་ཧོ།།ཉི་མ་དགེ་བར་དམ་པའི་ཆོས་ཀྱིས་འཚོ།།ཟླ་བ་བཟང་པོ་་བླ་མ་དམ་པས་འབྲེལ།།ཞག་པོ་བདེ་ལེགས་འཁོར་འདས་དཔལ་ཡོན་བརྟས།།དུས་ཚོད་ཀུན་བཟང་བཀྲ་ཤིས་ཕུན་སུམ་ཚོགས།།་་་་་་་་ཞབས་བརྟན།ཨེ་མ་ཧོ།།སྐུ་ཚེ་འགྱུར་མེད་རྟག་ཏུ་ཞབས་པད་བརྟན།།གསུང་ཆོས་འགགས་མེད་བདུད་རྩི་རྟག་ཏུ་འཇོ།།ཐུགས་རྗེ་མཚུངས་མེད་རབ་འབྱམས་ཞིང་ཀུན་གདལ།།གསང་གསུང་ཕྲིན་ལས་འཁོར་འདས་རྟབ་ཁྱབ་ཤོག། ༧སྐྱབས་རྗེ་དམ་པ་ཉིད་ཀྱི་སློབ་མའི་གྲལ་མཐར་འཛིན་པ་དཔལ་དགྱེས་པ་རྡོ་རྗེས་སྙིང་ནས་གསོལ་བ་འདེབས་པར་དགེའོ།། །།